Chapter 109

saṃjaya uvāca |
bhagadattaḥ kṛpaḥ śalyaḥ kṛtavarmā ca sātvataḥ |
vindānuvindāvāvantyau saindhavaśca jayadrathaḥ || 1 ||
[Analyze grammar]

citraseno vikarṇaśca tathā durmarṣaṇo yuvā |
daśaite tāvakā yodhā bhīmasenamayodhayan || 2 ||
[Analyze grammar]

mahatyā senayā yuktā nānādeśasamutthayā |
bhīṣmasya samare rājanprārthayānā mahadyaśaḥ || 3 ||
[Analyze grammar]

śalyastu navabhirbāṇairbhīmasenamatāḍayat |
kṛtavarmā tribhirbāṇaiḥ kṛpaśca navabhiḥ śaraiḥ || 4 ||
[Analyze grammar]

citraseno vikarṇaśca bhagadattaśca māriṣa |
daśabhirdaśabhirbhallairbhīmasenamatāḍayan || 5 ||
[Analyze grammar]

saindhavaśca tribhirbāṇairjatrudeśe'bhyatāḍayat |
vindānuvindāvāvantyau pañcabhiḥ pañcabhiḥ śaraiḥ |
durmarṣaṇaśca viṃśatyā pāṇḍavaṃ niśitaiḥ śaraiḥ || 6 ||
[Analyze grammar]

sa tānsarvānmahārāja bhrājamānānpṛthakpṛthak |
pravīrānsarvalokasya dhārtarāṣṭrānmahārathān |
vivyādha bahubhirbāṇairbhīmaseno mahābalaḥ || 7 ||
[Analyze grammar]

śalyaṃ pañcāśatā viddhvā kṛtavarmāṇamaṣṭabhiḥ |
kṛpasya saśaraṃ cāpaṃ madhye ciccheda bhārata |
athainaṃ chinnadhanvānaṃ punarvivyādha pañcabhiḥ || 8 ||
[Analyze grammar]

vindānuvindau ca tathā tribhistribhiratāḍayat |
durmarṣaṇaṃ ca viṃśatyā citrasenaṃ ca pañcabhiḥ || 9 ||
[Analyze grammar]

vikarṇaṃ daśabhirbāṇaiḥ pañcabhiśca jayadratham |
viddhvā bhīmo'nadaddhṛṣṭaḥ saindhavaṃ ca punastribhiḥ || 10 ||
[Analyze grammar]

athānyaddhanurādāya gautamo rathināṃ varaḥ |
bhīmaṃ vivyādha saṃrabdho daśabhirniśitaiḥ śaraiḥ || 11 ||
[Analyze grammar]

sa viddho bahubhirbāṇaistottrairiva mahādvipaḥ |
tataḥ kruddho mahābāhurbhīmasenaḥ pratāpavān |
gautamaṃ tāḍayāmāsa śarairbahubhirāhave || 12 ||
[Analyze grammar]

saindhavasya tathāśvāṃśca sārathiṃ ca tribhiḥ śaraiḥ |
prāhiṇonmṛtyulokāya kālāntakasamadyutiḥ || 13 ||
[Analyze grammar]

hatāśvāttu rathāttūrṇamavaplutya mahārathaḥ |
śarāṃścikṣepa niśitānbhīmasenasya saṃyuge || 14 ||
[Analyze grammar]

tasya bhīmo dhanurmadhye dvābhyāṃ ciccheda bhārata |
bhallābhyāṃ bharataśreṣṭha saindhavasya mahātmanaḥ || 15 ||
[Analyze grammar]

sa cchinnadhanvā viratho hatāśvo hatasārathiḥ |
citrasenarathaṃ rājannāruroha tvarānvitaḥ || 16 ||
[Analyze grammar]

atyadbhutaṃ raṇe karma kṛtavāṃstatra pāṇḍavaḥ |
mahārathāñśarairviddhvā vārayitvā mahārathaḥ |
virathaṃ saindhavaṃ cakre sarvalokasya paśyataḥ || 17 ||
[Analyze grammar]

nātīva mamṛṣe śalyo bhīmasenasya vikramam |
sa saṃdhāya śarāṃstīkṣṇānkarmāraparimārjitān |
bhīmaṃ vivyādha saptatyā tiṣṭha tiṣṭheti cābravīt || 18 ||
[Analyze grammar]

kṛpaśca kṛtavarmā ca bhagadattaśca māriṣa |
vindānuvindāvāvantyau citrasenaśca saṃyuge || 19 ||
[Analyze grammar]

durmarṣaṇo vikarṇaśca sindhurājaśca vīryavān |
bhīmaṃ te vivyadhustūrṇaṃ śalyahetorariṃdamāḥ || 20 ||
[Analyze grammar]

sa tu tānprativivyādha pañcabhiḥ pañcabhiḥ śaraiḥ |
śalyaṃ vivyādha saptatyā punaśca daśabhiḥ śaraiḥ || 21 ||
[Analyze grammar]

taṃ śalyo navabhirviddhvā punarvivyādha pañcabhiḥ |
sārathiṃ cāsya bhallena gāḍhaṃ vivyādha marmaṇi || 22 ||
[Analyze grammar]

viśokaṃ vīkṣya nirbhinnaṃ bhīmasenaḥ pratāpavān |
madrarājaṃ tribhirbāṇairbāhvorurasi cārpayat || 23 ||
[Analyze grammar]

tathetarānmaheṣvāsāṃstribhistribhirajihmagaiḥ |
tāḍayāmāsa samare siṃhavacca nanāda ca || 24 ||
[Analyze grammar]

te hi yattā maheṣvāsāḥ pāṇḍavaṃ yuddhadurmadam |
tribhistribhirakuṇṭhāgrairbhṛśaṃ marmasvatāḍayan || 25 ||
[Analyze grammar]

so'tividdho maheṣvāso bhīmaseno na vivyathe |
parvato vāridhārābhirvarṣamāṇairivāmbudaiḥ || 26 ||
[Analyze grammar]

śalyaṃ ca navabhirbāṇairbhṛśaṃ viddhvā mahāyaśāḥ |
prāgjyotiṣaṃ śatenājau rājanvivyādha vai dṛḍham || 27 ||
[Analyze grammar]

tatastu saśaraṃ cāpaṃ sātvatasya mahātmanaḥ |
kṣurapreṇa sutīkṣṇena ciccheda kṛtahastavat || 28 ||
[Analyze grammar]

athānyaddhanurādāya kṛtavarmā vṛkodaram |
ājaghāna bhruvormadhye nārācena paraṃtapa || 29 ||
[Analyze grammar]

bhīmastu samare viddhvā śalyaṃ navabhirāyasaiḥ |
bhagadattaṃ tribhiścaiva kṛtavarmāṇamaṣṭabhiḥ || 30 ||
[Analyze grammar]

dvābhyāṃ dvābhyāṃ ca vivyādha gautamaprabhṛtīnrathān |
te tu taṃ samare rājanvivyadhurniśitaiḥ śaraiḥ || 31 ||
[Analyze grammar]

sa tathā pīḍyamāno'pi sarvatastairmahārathaiḥ |
matvā tṛṇena tāṃstulyānvicacāra gatavyathaḥ || 32 ||
[Analyze grammar]

te cāpi rathināṃ śreṣṭhā bhīmāya niśitāñśarān |
preṣayāmāsuravyagrāḥ śataśo'tha sahasraśaḥ || 33 ||
[Analyze grammar]

tasya śaktiṃ mahāvegāṃ bhagadatto mahārathaḥ |
cikṣepa samare vīraḥ svarṇadaṇḍāṃ mahādhanām || 34 ||
[Analyze grammar]

tomaraṃ saindhavo rājā paṭṭiśaṃ ca mahābhujaḥ |
śataghnīṃ ca kṛpo rājañśaraṃ śalyaśca saṃyuge || 35 ||
[Analyze grammar]

athetare maheṣvāsāḥ pañca pañca śilīmukhān |
bhīmasenaṃ samuddiśya preṣayāmāsurojasā || 36 ||
[Analyze grammar]

tomaraṃ sa dvidhā cakre kṣurapreṇānilātmajaḥ |
paṭṭiśaṃ ca tribhirbāṇaiściccheda tilakāṇḍavat || 37 ||
[Analyze grammar]

sa bibheda śataghnīṃ ca navabhiḥ kaṅkapatribhiḥ |
madrarājaprayuktaṃ ca śaraṃ chittvā mahābalaḥ || 38 ||
[Analyze grammar]

śaktiṃ ciccheda sahasā bhagadatteritāṃ raṇe |
tathetarāñśarānghorāñśaraiḥ saṃnataparvabhiḥ || 39 ||
[Analyze grammar]

bhīmaseno raṇaślāghī tridhaikaikaṃ samācchinat |
tāṃśca sarvānmaheṣvāsāṃstribhistribhiratāḍayat || 40 ||
[Analyze grammar]

tato dhanaṃjayastatra vartamāne mahāraṇe |
jagāma sa rathenājau bhīmaṃ dṛṣṭvā mahāratham |
nighnantaṃ samare śatrūnyodhayānaṃ ca sāyakaiḥ || 41 ||
[Analyze grammar]

tau tu tatra mahātmānau sametau vīkṣya pāṇḍavau |
nāśaśaṃsurjayaṃ tatra tāvakāḥ puruṣarṣabha || 42 ||
[Analyze grammar]

athārjuno raṇe bhīṣmaṃ yodhayanvai mahāratham |
bhīṣmasya nidhanākāṅkṣī puraskṛtya śikhaṇḍinam || 43 ||
[Analyze grammar]

āsasāda raṇe yodhāṃstāvakāndaśa bhārata |
ye sma bhīmaṃ raṇe rājanyodhayanto vyavasthitāḥ |
bībhatsustānathāvidhyadbhīmasya priyakāmyayā || 44 ||
[Analyze grammar]

tato duryodhano rājā suśarmāṇamacodayat |
arjunasya vadhārthāya bhīmasenasya cobhayoḥ || 45 ||
[Analyze grammar]

suśarmangaccha śīghraṃ tvaṃ balaughaiḥ parivāritaḥ |
jahi pāṇḍusutāvetau dhanaṃjayavṛkodarau || 46 ||
[Analyze grammar]

tacchrutvā śāsanaṃ tasya trigartaḥ prasthalādhipaḥ |
abhidrutya raṇe bhīmamarjunaṃ caiva dhanvinau || 47 ||
[Analyze grammar]

rathairanekasāhasraiḥ parivavre samantataḥ |
tataḥ pravavṛte yuddhamarjunasya paraiḥ saha || 48 ||
[Analyze grammar]