Chapter 1

janamejaya uvāca |
kathaṃ yuyudhire vīrāḥ kurupāṇḍavasomakāḥ |
pārthivāśca mahābhāgā nānādeśasamāgatāḥ || 1 ||
[Analyze grammar]

vaiśaṃpāyana uvāca |
yathā yuyudhire vīrāḥ kurupāṇḍavasomakāḥ |
kurukṣetre tapaḥkṣetre śṛṇu tatpṛthivīpate || 2 ||
[Analyze grammar]

avatīrya kurukṣetraṃ pāṇḍavāḥ sahasomakāḥ |
kauravānabhyavartanta jigīṣanto mahābalāḥ || 3 ||
[Analyze grammar]

vedādhyayanasaṃpannāḥ sarve yuddhābhinandinaḥ |
āśaṃsanto jayaṃ yuddhe vadhaṃ vābhimukhā raṇe || 4 ||
[Analyze grammar]

abhiyāya ca durdharṣāṃ dhārtarāṣṭrasya vāhinīm |
prāṅmukhāḥ paścime bhāge nyaviśanta sasainikāḥ || 5 ||
[Analyze grammar]

samantapañcakādbāhyaṃ śibirāṇi sahasraśaḥ |
kārayāmāsa vidhivatkuntīputro yudhiṣṭhiraḥ || 6 ||
[Analyze grammar]

śūnyeva pṛthivī sarvā bālavṛddhāvaśeṣitā |
niraśvapuruṣā cāsīdrathakuñjaravarjitā || 7 ||
[Analyze grammar]

yāvattapati sūryo hi jambūdvīpasya maṇḍalam |
tāvadeva samāvṛttaṃ balaṃ pārthivasattama || 8 ||
[Analyze grammar]

ekasthāḥ sarvavarṇāste maṇḍalaṃ bahuyojanam |
paryākrāmanta deśāṃśca nadīḥ śailānvanāni ca || 9 ||
[Analyze grammar]

teṣāṃ yudhiṣṭhiro rājā sarveṣāṃ puruṣarṣabha |
ādideśa savāhānāṃ bhakṣyabhojyamanuttamam || 10 ||
[Analyze grammar]

saṃjñāśca vividhāstāstāsteṣāṃ cakre yudhiṣṭhiraḥ |
evaṃvādī veditavyaḥ pāṇḍaveyo'yamityuta || 11 ||
[Analyze grammar]

abhijñānāni sarveṣāṃ saṃjñāścābharaṇāni ca |
yojayāmāsa kauravyo yuddhakāla upasthite || 12 ||
[Analyze grammar]

dṛṣṭvā dhvajāgraṃ pārthānāṃ dhārtarāṣṭro mahāmanāḥ |
saha sarvairmahīpālaiḥ pratyavyūhata pāṇḍavān || 13 ||
[Analyze grammar]

pāṇḍureṇātapatreṇa dhriyamāṇena mūrdhani |
madhye nāgasahasrasya bhrātṛbhiḥ parivāritam || 14 ||
[Analyze grammar]

dṛṣṭvā duryodhanaṃ hṛṣṭāḥ sarve pāṇḍavasainikāḥ |
dadhmuḥ sarve mahāśaṅkhānbherīrjaghnuḥ sahasraśaḥ || 15 ||
[Analyze grammar]

tataḥ prahṛṣṭāṃ svāṃ senāmabhivīkṣyātha pāṇḍavāḥ |
babhūvurhṛṣṭamanaso vāsudevaśca vīryavān || 16 ||
[Analyze grammar]

tato yodhānharṣayantau vāsudevadhanaṃjayau |
dadhmatuḥ puruṣavyāghrau divyau śaṅkhau rathe sthitau || 17 ||
[Analyze grammar]

pāñcajanyasya nirghoṣaṃ devadattasya cobhayoḥ |
śrutvā savāhanā yodhāḥ śakṛnmūtraṃ prasusruvuḥ || 18 ||
[Analyze grammar]

yathā siṃhasya nadataḥ svanaṃ śrutvetare mṛgāḥ |
traseyustadvadevāsīddhārtarāṣṭrabalaṃ tadā || 19 ||
[Analyze grammar]

udatiṣṭhadrajo bhaumaṃ na prājñāyata kiṃcana |
antardhīyata cādityaḥ sainyena rajasāvṛtaḥ || 20 ||
[Analyze grammar]

vavarṣa cātra parjanyo māṃsaśoṇitavṛṣṭimān |
vyukṣansarvāṇyanīkāni tadadbhutamivābhavat || 21 ||
[Analyze grammar]

vāyustataḥ prādurabhūnnīcaiḥ śarkarakarṣaṇaḥ |
vinighnaṃstānyanīkāni vidhamaṃścaiva tadrajaḥ || 22 ||
[Analyze grammar]

ubhe sene tadā rājanyuddhāya mudite bhṛśam |
kurukṣetre sthite yatte sāgarakṣubhitopame || 23 ||
[Analyze grammar]

tayostu senayorāsīdadbhutaḥ sa samāgamaḥ |
yugānte samanuprāpte dvayoḥ sāgarayoriva || 24 ||
[Analyze grammar]

śūnyāsītpṛthivī sarvā bālavṛddhāvaśeṣitā |
tena senāsamūhena samānītena kauravaiḥ || 25 ||
[Analyze grammar]

tataste samayaṃ cakruḥ kurupāṇḍavasomakāḥ |
dharmāṃśca sthāpayāmāsuryuddhānāṃ bharatarṣabha || 26 ||
[Analyze grammar]

nivṛtte caiva no yuddhe prītiśca syātparasparam |
yathāpuraṃ yathāyogaṃ na ca syācchalanaṃ punaḥ || 27 ||
[Analyze grammar]

vācā yuddhe pravṛtte no vācaiva pratiyodhanam |
niṣkrāntaḥ pṛtanāmadhyānna hantavyaḥ kathaṃcana || 28 ||
[Analyze grammar]

rathī ca rathinā yodhyo gajena gajadhūrgataḥ |
aśvenāśvī padātiśca padātenaiva bhārata || 29 ||
[Analyze grammar]

yathāyogaṃ yathāvīryaṃ yathotsāhaṃ yathāvayaḥ |
samābhāṣya prahartavyaṃ na viśvaste na vihvale || 30 ||
[Analyze grammar]

pareṇa saha saṃyuktaḥ pramatto vimukhastathā |
kṣīṇaśastro vivarmā ca na hantavyaḥ kathaṃcana || 31 ||
[Analyze grammar]

na sūteṣu na dhuryeṣu na ca śastropanāyiṣu |
na bherīśaṅkhavādeṣu prahartavyaṃ kathaṃcana || 32 ||
[Analyze grammar]

evaṃ te samayaṃ kṛtvā kurupāṇḍavasomakāḥ |
vismayaṃ paramaṃ jagmuḥ prekṣamāṇāḥ parasparam || 33 ||
[Analyze grammar]

niviśya ca mahātmānastataste puruṣarṣabhāḥ |
hṛṣṭarūpāḥ sumanaso babhūvuḥ sahasainikāḥ || 34 ||
[Analyze grammar]