Chapter 71

bhagavānuvāca |
saṃjayasya śrutaṃ vākyaṃ bhavataśca śrutaṃ mayā |
sarvaṃ jānāmyabhiprāyaṃ teṣāṃ ca bhavataśca yaḥ || 1 ||
[Analyze grammar]

tava dharmāśritā buddhisteṣāṃ vairāśritā matiḥ |
yadayuddhena labhyeta tatte bahumataṃ bhavet || 2 ||
[Analyze grammar]

na ca tannaiṣṭhikaṃ karma kṣatriyasya viśāṃ pate |
āhurāśramiṇaḥ sarve yadbhaikṣaṃ kṣatriyaścaret || 3 ||
[Analyze grammar]

jayo vadho vā saṃgrāme dhātrā diṣṭaḥ sanātanaḥ |
svadharmaḥ kṣatriyasyaiṣa kārpaṇyaṃ na praśasyate || 4 ||
[Analyze grammar]

na hi kārpaṇyamāsthāya śakyā vṛttiryudhiṣṭhira |
vikramasva mahābāho jahi śatrūnariṃdama || 5 ||
[Analyze grammar]

atigṛddhāḥ kṛtasnehā dīrghakālaṃ sahoṣitāḥ |
kṛtamitrāḥ kṛtabalā dhārtarāṣṭrāḥ paraṃtapa || 6 ||
[Analyze grammar]

na paryāyo'sti yatsāmyaṃ tvayi kuryurviśāṃ pate |
balavattāṃ hi manyante bhīṣmadroṇakṛpādibhiḥ || 7 ||
[Analyze grammar]

yāvacca mārdavenaitānrājannupacariṣyasi |
tāvadete hariṣyanti tava rājyamariṃdama || 8 ||
[Analyze grammar]

nānukrośānna kārpaṇyānna ca dharmārthakāraṇāt |
alaṃ kartuṃ dhārtarāṣṭrāstava kāmamariṃdama || 9 ||
[Analyze grammar]

etadeva nimittaṃ te pāṇḍavāstu yathā tvayi |
nānvatapyanta kaupīnaṃ tāvatkṛtvāpi duṣkaram || 10 ||
[Analyze grammar]

pitāmahasya droṇasya vidurasya ca dhīmataḥ |
paśyatāṃ kurumukhyānāṃ sarveṣāmeva tattvataḥ || 11 ||
[Analyze grammar]

dānaśīlaṃ mṛduṃ dāntaṃ dharmakāmamanuvratam |
yattvāmupadhinā rājandyūtenāvañcayattadā |
na cāpatrapate pāpo nṛśaṃsastena karmaṇā || 12 ||
[Analyze grammar]

tathāśīlasamācāre rājanmā praṇayaṃ kṛthāḥ |
vadhyāste sarvalokasya kiṃ punastava bhārata || 13 ||
[Analyze grammar]

vāgbhistvapratirūpābhiratudatsakanīyasam |
ślāghamānaḥ prahṛṣṭaḥ sanbhāṣate bhrātṛbhiḥ saha || 14 ||
[Analyze grammar]

etāvatpāṇḍavānāṃ hi nāsti kiṃcidiha svakam |
nāmadheyaṃ ca gotraṃ ca tadapyeṣāṃ na śiṣyate || 15 ||
[Analyze grammar]

kālena mahatā caiṣāṃ bhaviṣyati parābhavaḥ |
prakṛtiṃ te bhajiṣyanti naṣṭaprakṛtayo janāḥ || 16 ||
[Analyze grammar]

etāścānyāśca paruṣā vācaḥ sa samudīrayan |
ślāghate jñātimadhye sma tvayi pravrajite vanam || 17 ||
[Analyze grammar]

ye tatrāsansamānītāste dṛṣṭvā tvāmanāgasam |
aśrukaṇṭhā rudantaśca sabhāyāmāsate tadā || 18 ||
[Analyze grammar]

na cainamabhyanandaṃste rājāno brāhmaṇaiḥ saha |
sarve duryodhanaṃ tatra nindanti sma sabhāsadaḥ || 19 ||
[Analyze grammar]

kulīnasya ca yā nindā vadhaścāmitrakarśana |
mahāguṇo vadho rājanna tu nindā kujīvikā || 20 ||
[Analyze grammar]

tadaiva nihato rājanyadaiva nirapatrapaḥ |
ninditaśca mahārāja pṛthivyāṃ sarvarājasu || 21 ||
[Analyze grammar]

īṣatkāryo vadhastasya yasya cāritramīdṛśam |
praskambhanapratistabdhaśchinnamūla iva drumaḥ || 22 ||
[Analyze grammar]

vadhyaḥ sarpa ivānāryaḥ sarvalokasya durmatiḥ |
jahyenaṃ tvamamitraghna mā rājanvicikitsithāḥ || 23 ||
[Analyze grammar]

sarvathā tvatkṣamaṃ caitadrocate ca mamānagha |
yattvaṃ pitari bhīṣme ca praṇipātaṃ samācareḥ || 24 ||
[Analyze grammar]

ahaṃ tu sarvalokasya gatvā chetsyāmi saṃśayam |
yeṣāmasti dvidhābhāvo rājanduryodhanaṃ prati || 25 ||
[Analyze grammar]

madhye rājñāmahaṃ tatra prātipauruṣikānguṇān |
tava saṃkīrtayiṣyāmi ye ca tasya vyatikramāḥ || 26 ||
[Analyze grammar]

bruvatastatra me vākyaṃ dharmārthasahitaṃ hitam |
niśamya pārthivāḥ sarve nānājanapadeśvarāḥ || 27 ||
[Analyze grammar]

tvayi saṃpratipatsyante dharmātmā satyavāgiti |
tasmiṃścādhigamiṣyanti yathā lobhādavartata || 28 ||
[Analyze grammar]

garhayiṣyāmi caivainaṃ paurajānapadeṣvapi |
vṛddhabālānupādāya cāturvarṇyasamāgame || 29 ||
[Analyze grammar]

śamaṃ cedyācamānastvaṃ na dharmaṃ tatra lapsyase |
kurūnvigarhayiṣyanti dhṛtarāṣṭraṃ ca pārthivāḥ || 30 ||
[Analyze grammar]

tasmiṃllokaparityakte kiṃ kāryamavaśiṣyate |
hate duryodhane rājanyadanyatkriyatāmiti || 31 ||
[Analyze grammar]

yātvā cāhaṃ kurūnsarvānyuṣmadarthamahāpayan |
yatiṣye praśamaṃ kartuṃ lakṣayiṣye ca ceṣṭitam || 32 ||
[Analyze grammar]

kauravāṇāṃ pravṛttiṃ ca gatvā yuddhādhikārikām |
niśāmya vinivartiṣye jayāya tava bhārata || 33 ||
[Analyze grammar]

sarvathā yuddhamevāhamāśaṃsāmi paraiḥ saha |
nimittāni hi sarvāṇi tathā prādurbhavanti me || 34 ||
[Analyze grammar]

mṛgāḥ śakuntāśca vadanti ghoraṃ hastyaśvamukhyeṣu niśāmukheṣu |
ghorāṇi rūpāṇi tathaiva cāgnirvarṇānbahūnpuṣyati ghorarūpān |
manuṣyalokakṣapaṇo'tha ghoro no cedanuprāpta ihāntakaḥ syāt || 35 ||
[Analyze grammar]

śastrāṇi patraṃ kavacānrathāṃśca nāgāndhvajāṃśca pratipādayitvā |
yodhāśca sarve kṛtaniśramāste bhavantu hastyaśvaratheṣu yattāḥ |
sāṃgrāmikaṃ te yadupārjanīyaṃ sarvaṃ samagraṃ kuru tannarendra || 36 ||
[Analyze grammar]

duryodhano na hyalamadya dātuṃ jīvaṃstavaitannṛpate kathaṃcit |
yatte purastādabhavatsamṛddhaṃ dyūte hṛtaṃ pāṇḍavamukhya rājyam || 37 ||
[Analyze grammar]