Chapter 70

vaiśaṃpāyana uvāca |
saṃjaye pratiyāte tu dharmarājo yudhiṣṭhiraḥ |
abhyabhāṣata dāśārhamṛṣabhaṃ sarvasātvatām || 1 ||
[Analyze grammar]

ayaṃ sa kālaḥ saṃprāpto mitrāṇāṃ me janārdana |
na ca tvadanyaṃ paśyāmi yo na āpatsu tārayet || 2 ||
[Analyze grammar]

tvāṃ hi mādhava saṃśritya nirbhayā mohadarpitam |
dhārtarāṣṭraṃ sahāmātyaṃ svamaṃśamanuyuñjmahe || 3 ||
[Analyze grammar]

yathā hi sarvāsvāpatsu pāsi vṛṣṇīnariṃdama |
tathā te pāṇḍavā rakṣyāḥ pāhyasmānmahato bhayāt || 4 ||
[Analyze grammar]

bhagavānuvāca |
ayamasmi mahābāho brūhi yatte vivakṣitam |
kariṣyāmi hi tatsarvaṃ yattvaṃ vakṣyasi bhārata || 5 ||
[Analyze grammar]

yudhiṣṭhira uvāca |
śrutaṃ te dhṛtarāṣṭrasya saputrasya cikīrṣitam |
etaddhi sakalaṃ kṛṣṇa saṃjayo māṃ yadabravīt || 6 ||
[Analyze grammar]

tanmataṃ dhṛtarāṣṭrasya so'syātmā vivṛtāntaraḥ |
yathoktaṃ dūta ācaṣṭe vadhyaḥ syādanyathā bruvan || 7 ||
[Analyze grammar]

apradānena rājyasya śāntimasmāsu mārgati |
lubdhaḥ pāpena manasā carannasamamātmanaḥ || 8 ||
[Analyze grammar]

yattaddvādaśa varṣāṇi vane nirvyuṣitā vayam |
chadmanā śaradaṃ caikāṃ dhṛtarāṣṭrasya śāsanāt || 9 ||
[Analyze grammar]

sthātā naḥ samaye tasmindhṛtarāṣṭra iti prabho |
nāhāsma samayaṃ kṛṣṇa taddhi no brāhmaṇā viduḥ || 10 ||
[Analyze grammar]

vṛddho rājā dhṛtarāṣṭraḥ svadharmaṃ nānupaśyati |
paśyanvā putragṛddhitvānmandasyānveti śāsanam || 11 ||
[Analyze grammar]

suyodhanamate tiṣṭhanrājāsmāsu janārdana |
mithyā carati lubdhaḥ saṃścaranpriyamivātmanaḥ || 12 ||
[Analyze grammar]

ito duḥkhataraṃ kiṃ nu yatrāhaṃ mātaraṃ tataḥ |
saṃvidhātuṃ na śaknomi mitrāṇāṃ vā janārdana || 13 ||
[Analyze grammar]

kāśibhiścedipāñcālairmatsyaiśca madhusūdana |
bhavatā caiva nāthena pañca grāmā vṛtā mayā || 14 ||
[Analyze grammar]

kuśasthalaṃ vṛkasthalamāsandī vāraṇāvatam |
avasānaṃ ca govinda kiṃcidevātra pañcamam || 15 ||
[Analyze grammar]

pañca nastāta dīyantāṃ grāmā vā nagarāṇi vā |
vasema sahitā yeṣu mā ca no bharatā naśan || 16 ||
[Analyze grammar]

na ca tānapi duṣṭātmā dhārtarāṣṭro'numanyate |
svāmyamātmani matvāsāvato duḥkhataraṃ nu kim || 17 ||
[Analyze grammar]

kule jātasya vṛddhasya paravitteṣu gṛdhyataḥ |
lobhaḥ prajñānamāhanti prajñā hanti hatā hriyam || 18 ||
[Analyze grammar]

hrīrhatā bādhate dharmaṃ dharmo hanti hataḥ śriyam |
śrīrhatā puruṣaṃ hanti puruṣasyāsvatā vadhaḥ || 19 ||
[Analyze grammar]

asvato hi nivartante jñātayaḥ suhṛdartvijaḥ |
apuṣpādaphalādvṛkṣādyathā tāta patatriṇaḥ || 20 ||
[Analyze grammar]

etacca maraṇaṃ tāta yadasmātpatitādiva |
jñātayo vinivartante pretasattvādivāsavaḥ || 21 ||
[Analyze grammar]

nātaḥ pāpīyasīṃ kāṃcidavasthāṃ śambaro'bravīt |
yatra naivādya na prātarbhojanaṃ pratidṛśyate || 22 ||
[Analyze grammar]

dhanamāhuḥ paraṃ dharmaṃ dhane sarvaṃ pratiṣṭhitam |
jīvanti dhanino loke mṛtā ye tvadhanā narāḥ || 23 ||
[Analyze grammar]

ye dhanādapakarṣanti naraṃ svabalamāśritāḥ |
te dharmamarthaṃ kāmaṃ ca pramathnanti naraṃ ca tam || 24 ||
[Analyze grammar]

etāmavasthāṃ prāpyaike maraṇaṃ vavrire janāḥ |
grāmāyaike vanāyaike nāśāyaike pravavrajuḥ || 25 ||
[Analyze grammar]

unmādameke puṣyanti yāntyanye dviṣatāṃ vaśam |
dāsyameke nigacchanti pareṣāmarthahetunā || 26 ||
[Analyze grammar]

āpadevāsya maraṇātpuruṣasya garīyasī |
śriyo vināśastaddhyasya nimittaṃ dharmakāmayoḥ || 27 ||
[Analyze grammar]

yadasya dharmyaṃ maraṇaṃ śāśvataṃ lokavartma tat |
samantātsarvabhūtānāṃ na tadatyeti kaścana || 28 ||
[Analyze grammar]

na tathā bādhyate kṛṣṇa prakṛtyā nirdhano janaḥ |
yathā bhadrāṃ śriyaṃ prāpya tayā hīnaḥ sukhaidhitaḥ || 29 ||
[Analyze grammar]

sa tadātmāparādhena saṃprāpto vyasanaṃ mahat |
sendrāngarhayate devānnātmānaṃ ca kathaṃcana || 30 ||
[Analyze grammar]

na cāsminsarvaśāstrāṇi prataranti nigarhaṇām |
so'bhikrudhyati bhṛtyānāṃ suhṛdaścābhyasūyati || 31 ||
[Analyze grammar]

taṃ tadā manyurevaiti sa bhūyaḥ saṃpramuhyati |
sa mohavaśamāpannaḥ krūraṃ karma niṣevate || 32 ||
[Analyze grammar]

pāpakarmātyayāyaiva saṃkaraṃ tena puṣyati |
saṃkaro narakāyaiva sā kāṣṭhā pāpakarmaṇām || 33 ||
[Analyze grammar]

na cetprabudhyate kṛṣṇa narakāyaiva gacchati |
tasya prabodhaḥ prajñaiva prajñācakṣurna riṣyati || 34 ||
[Analyze grammar]

prajñālābhe hi puruṣaḥ śāstrāṇyevānvavekṣate |
śāstranityaḥ punardharmaṃ tasya hrīraṅgamuttamam || 35 ||
[Analyze grammar]

hrīmānhi pāpaṃ pradveṣṭi tasya śrīrabhivardhate |
śrīmānsa yāvadbhavati tāvadbhavati pūruṣaḥ || 36 ||
[Analyze grammar]

dharmanityaḥ praśāntātmā kāryayogavahaḥ sadā |
nādharme kurute buddhiṃ na ca pāpeṣu vartate || 37 ||
[Analyze grammar]

ahrīko vā vimūḍho vā naiva strī na punaḥ pumān |
nāsyādhikāro dharme'sti yathā śūdrastathaiva saḥ || 38 ||
[Analyze grammar]

hrīmānavati devāṃśca pitṝnātmānameva ca |
tenāmṛtatvaṃ vrajati sā kāṣṭhā puṇyakarmaṇām || 39 ||
[Analyze grammar]

tadidaṃ mayi te dṛṣṭaṃ pratyakṣaṃ madhusūdana |
yathā rājyātparibhraṣṭo vasāmi vasatīrimāḥ || 40 ||
[Analyze grammar]

te vayaṃ na śriyaṃ hātumalaṃ nyāyena kenacit |
atra no yatamānānāṃ vadhaścedapi sādhu tat || 41 ||
[Analyze grammar]

tatra naḥ prathamaḥ kalpo yadvayaṃ te ca mādhava |
praśāntāḥ samabhūtāśca śriyaṃ tāmaśnuvīmahi || 42 ||
[Analyze grammar]

tatraiṣā paramā kāṣṭhā raudrakarmakṣayodayā |
yadvayaṃ kauravānhatvā tāni rāṣṭrāṇyaśīmahi || 43 ||
[Analyze grammar]

ye punaḥ syurasaṃbaddhā anāryāḥ kṛṣṇa śatravaḥ |
teṣāmapyavadhaḥ kāryaḥ kiṃ punarye syurīdṛśāḥ || 44 ||
[Analyze grammar]

jñātayaśca hi bhūyiṣṭhāḥ sahāyā guravaśca naḥ |
teṣāṃ vadho'tipāpīyānkiṃ nu yuddhe'sti śobhanam || 45 ||
[Analyze grammar]

pāpaḥ kṣatriyadharmo'yaṃ vayaṃ ca kṣatrabāndhavāḥ |
sa naḥ svadharmo'dharmo vā vṛttiranyā vigarhitā || 46 ||
[Analyze grammar]

śūdraḥ karoti śuśrūṣāṃ vaiśyā vipaṇijīvinaḥ |
vayaṃ vadhena jīvāmaḥ kapālaṃ brāhmaṇairvṛtam || 47 ||
[Analyze grammar]

kṣatriyaḥ kṣatriyaṃ hanti matsyo matsyena jīvati |
śvā śvānaṃ hanti dāśārha paśya dharmo yathāgataḥ || 48 ||
[Analyze grammar]

yuddhe kṛṣṇa kalirnityaṃ prāṇāḥ sīdanti saṃyuge |
balaṃ tu nītimātrāya haṭhe jayaparājayau || 49 ||
[Analyze grammar]

nātmacchandena bhūtānāṃ jīvitaṃ maraṇaṃ tathā |
nāpyakāle sukhaṃ prāpyaṃ duḥkhaṃ vāpi yadūttama || 50 ||
[Analyze grammar]

eko hyapi bahūnhanti ghnantyekaṃ bahavo'pyuta |
śūraṃ kāpuruṣo hanti ayaśasvī yaśasvinam || 51 ||
[Analyze grammar]

jayaścaivobhayordṛṣṭa ubhayośca parājayaḥ |
tathaivāpacayo dṛṣṭo vyapayāne kṣayavyayau || 52 ||
[Analyze grammar]

sarvathā vṛjinaṃ yuddhaṃ ko ghnanna pratihanyate |
hatasya ca hṛṣīkeśa samau jayaparājayau || 53 ||
[Analyze grammar]

parājayaśca maraṇānmanye naiva viśiṣyate |
yasya syādvijayaḥ kṛṣṇa tasyāpyapacayo dhruvam || 54 ||
[Analyze grammar]

antato dayitaṃ ghnanti kecidapyapare janāḥ |
tasyāṅga balahīnasya putrānbhrātṝnapaśyataḥ |
nirvedo jīvite kṛṣṇa sarvataścopajāyate || 55 ||
[Analyze grammar]

ye hyeva vīrā hrīmanta āryāḥ karuṇavedinaḥ |
ta eva yuddhe hanyante yavīyānmucyate janaḥ || 56 ||
[Analyze grammar]

hatvāpyanuśayo nityaṃ parānapi janārdana |
anubandhaśca pāpo'tra śeṣaścāpyavaśiṣyate || 57 ||
[Analyze grammar]

śeṣo hi balamāsādya na śeṣamavaśeṣayet |
sarvocchede ca yatate vairasyāntavidhitsayā || 58 ||
[Analyze grammar]

jayo vairaṃ prasṛjati duḥkhamāste parājitaḥ |
sukhaṃ praśāntaḥ svapiti hitvā jayaparājayau || 59 ||
[Analyze grammar]

jātavairaśca puruṣo duḥkhaṃ svapiti nityadā |
anirvṛtena manasā sasarpa iva veśmani || 60 ||
[Analyze grammar]

utsādayati yaḥ sarvaṃ yaśasā sa viyujyate |
akīrtiṃ sarvabhūteṣu śāśvatīṃ sa niyacchati || 61 ||
[Analyze grammar]

na hi vairāṇi śāmyanti dīrghakālakṛtānyapi |
ākhyātāraśca vidyante pumāṃścotpadyate kule || 62 ||
[Analyze grammar]

na cāpi vairaṃ vaireṇa keśava vyupaśāmyati |
haviṣāgniryathā kṛṣṇa bhūya evābhivardhate || 63 ||
[Analyze grammar]

ato'nyathā nāsti śāntirnityamantaramantataḥ |
antaraṃ lipsamānānāmayaṃ doṣo nirantaraḥ || 64 ||
[Analyze grammar]

pauruṣeyo hi balavānādhirhṛdayabādhanaḥ |
tasya tyāgena vā śāntirnivṛttyā manaso'pi vā || 65 ||
[Analyze grammar]

atha vā mūlaghātena dviṣatāṃ madhusūdana |
phalanirvṛttiriddhā syāttannṛśaṃsataraṃ bhavet || 66 ||
[Analyze grammar]

yā tu tyāgena śāntiḥ syāttadṛte vadha eva saḥ |
saṃśayācca samucchedāddviṣatāmātmanastathā || 67 ||
[Analyze grammar]

na ca tyaktuṃ tadicchāmo na cecchāmaḥ kulakṣayam |
atra yā praṇipātena śāntiḥ saiva garīyasī || 68 ||
[Analyze grammar]

sarvathā yatamānānāmayuddhamabhikāṅkṣatām |
sāntve pratihate yuddhaṃ prasiddhamaparākramam || 69 ||
[Analyze grammar]

pratighātena sāntvasya dāruṇaṃ saṃpravartate |
tacchunāmiva gopāde paṇḍitairupalakṣitam || 70 ||
[Analyze grammar]

lāṅgūlacālanaṃ kṣveḍaḥ pratirāvo vivartanam |
dantadarśanamārāvastato yuddhaṃ pravartate || 71 ||
[Analyze grammar]

tatra yo balavānkṛṣṇa jitvā so'tti tadāmiṣam |
evameva manuṣyeṣu viśeṣo nāsti kaścana || 72 ||
[Analyze grammar]

sarvathā tvetaducitaṃ durbaleṣu balīyasām |
anādaro virodhaśca praṇipātī hi durbalaḥ || 73 ||
[Analyze grammar]

pitā rājā ca vṛddhaśca sarvathā mānamarhati |
tasmānmānyaśca pūjyaśca dhṛtarāṣṭro janārdana || 74 ||
[Analyze grammar]

putrasnehastu balavāndhṛtarāṣṭrasya mādhava |
sa putravaśamāpannaḥ praṇipātaṃ prahāsyati || 75 ||
[Analyze grammar]

tatra kiṃ manyase kṛṣṇa prāptakālamanantaram |
kathamarthācca dharmācca na hīyemahi mādhava || 76 ||
[Analyze grammar]

īdṛśe hyarthakṛcchre'sminkamanyaṃ madhusūdana |
upasaṃpraṣṭumarhāmi tvāmṛte puruṣottama || 77 ||
[Analyze grammar]

priyaśca priyakāmaśca gatijñaḥ sarvakarmaṇām |
ko hi kṛṣṇāsti nastvādṛksarvaniścayavitsuhṛt || 78 ||
[Analyze grammar]

vaiśaṃpāyana uvāca |
evamuktaḥ pratyuvāca dharmarājaṃ janārdanaḥ |
ubhayoreva vāmarthe yāsyāmi kurusaṃsadam || 79 ||
[Analyze grammar]

śamaṃ tatra labheyaṃ cedyuṣmadarthamahāpayan |
puṇyaṃ me sumahadrājaṃścaritaṃ syānmahāphalam || 80 ||
[Analyze grammar]

mocayeyaṃ mṛtyupāśātsaṃrabdhānkurusṛñjayān |
pāṇḍavāndhārtarāṣṭrāṃśca sarvāṃ ca pṛthivīmimām || 81 ||
[Analyze grammar]

yudhiṣṭhira uvāca |
na mamaitanmataṃ kṛṣṇa yattvaṃ yāyāḥ kurūnprati |
suyodhanaḥ sūktamapi na kariṣyati te vacaḥ || 82 ||
[Analyze grammar]

sametaṃ pārthivaṃ kṣatraṃ suyodhanavaśānugam |
teṣāṃ madhyāvataraṇaṃ tava kṛṣṇa na rocaye || 83 ||
[Analyze grammar]

na hi naḥ prīṇayeddravyaṃ na devatvaṃ kutaḥ sukham |
na ca sarvāmaraiśvaryaṃ tava rodhena mādhava || 84 ||
[Analyze grammar]

bhagavānuvāca |
jānāmyetāṃ mahārāja dhārtarāṣṭrasya pāpatām |
avācyāstu bhaviṣyāmaḥ sarvaloke mahīkṣitām || 85 ||
[Analyze grammar]

na cāpi mama paryāptāḥ sahitāḥ sarvapārthivāḥ |
kruddhasya pramukhe sthātuṃ siṃhasyevetare mṛgāḥ || 86 ||
[Analyze grammar]

atha cette pravarteranmayi kiṃcidasāṃpratam |
nirdaheyaṃ kurūnsarvāniti me dhīyate matiḥ || 87 ||
[Analyze grammar]

na jātu gamanaṃ tatra bhavetpārtha nirarthakam |
arthaprāptiḥ kadācitsyādantato vāpyavācyatā || 88 ||
[Analyze grammar]

yudhiṣṭhira uvāca |
yattubhyaṃ rocate kṛṣṇa svasti prāpnuhi kauravān |
kṛtārthaṃ svastimantaṃ tvāṃ drakṣyāmi punarāgatam || 89 ||
[Analyze grammar]

viṣvaksena kurūngatvā bhāratāñśamayeḥ prabho |
yathā sarve sumanasaḥ saha syāmaḥ sucetasaḥ || 90 ||
[Analyze grammar]

bhrātā cāsi sakhā cāsi bībhatsormama ca priyaḥ |
sauhṛdenāviśaṅkyo'si svasti prāpnuhi bhūtaye || 91 ||
[Analyze grammar]

asmānvettha parānvettha vetthārthaṃ vettha bhāṣitam |
yadyadasmaddhitaṃ kṛṣṇa tattadvācyaḥ suyodhanaḥ || 92 ||
[Analyze grammar]

yadyaddharmeṇa saṃyuktamupapadyeddhitaṃ vacaḥ |
tattatkeśava bhāṣethāḥ sāntvaṃ vā yadi vetarat || 93 ||
[Analyze grammar]