Chapter 278

mārkaṇḍeya uvāca |
atha madrādhipo rājā nāradena samāgataḥ |
upaviṣṭaḥ sabhāmadhye kathāyogena bhārata || 1 ||
[Analyze grammar]

tato'bhigamya tīrthāni sarvāṇyevāśramāṃstathā |
ājagāma piturveśma sāvitrī saha mantribhiḥ || 2 ||
[Analyze grammar]

nāradena sahāsīnaṃ dṛṣṭvā sā pitaraṃ śubhā |
ubhayoreva śirasā cakre pādābhivandanam || 3 ||
[Analyze grammar]

nārada uvāca |
kva gatābhūtsuteyaṃ te kutaścaivāgatā nṛpa |
kimarthaṃ yuvatīṃ bhartre na caināṃ saṃprayacchasi || 4 ||
[Analyze grammar]

aśvapatiruvāca |
kāryeṇa khalvanenaiva preṣitādyaiva cāgatā |
tadasyāḥ śṛṇu devarṣe bhartāraṃ yo'nayā vṛtaḥ || 5 ||
[Analyze grammar]

mārkaṇḍeya uvāca |
sā brūhi vistareṇeti pitrā saṃcoditā śubhā |
daivatasyeva vacanaṃ pratigṛhyedamabravīt || 6 ||
[Analyze grammar]

āsīcchālveṣu dharmātmā kṣatriyaḥ pṛthivīpatiḥ |
dyumatsena iti khyātaḥ paścādandho babhūva ha || 7 ||
[Analyze grammar]

vinaṣṭacakṣuṣastasya bālaputrasya dhīmataḥ |
sāmīpyena hṛtaṃ rājyaṃ chidre'sminpūrvavairiṇā || 8 ||
[Analyze grammar]

sa bālavatsayā sārdhaṃ bhāryayā prasthito vanam |
mahāraṇyagataścāpi tapastepe mahāvrataḥ || 9 ||
[Analyze grammar]

tasya putraḥ pure jātaḥ saṃvṛddhaśca tapovane |
satyavānanurūpo me bharteti manasā vṛtaḥ || 10 ||
[Analyze grammar]

nārada uvāca |
aho bata mahatpāpaṃ sāvitryā nṛpate kṛtam |
ajānantyā yadanayā guṇavānsatyavānvṛtaḥ || 11 ||
[Analyze grammar]

satyaṃ vadatyasya pitā satyaṃ mātā prabhāṣate |
tato'sya brāhmaṇāścakrurnāmaitatsatyavāniti || 12 ||
[Analyze grammar]

bālasyāśvāḥ priyāścāsya karotyaśvāṃśca mṛnmayān |
citre'pi ca likhatyaśvāṃścitrāśva iti cocyate || 13 ||
[Analyze grammar]

rājovāca |
apīdānīṃ sa tejasvī buddhimānvā nṛpātmajaḥ |
kṣamāvānapi vā śūraḥ satyavānpitṛnandanaḥ || 14 ||
[Analyze grammar]

nārada uvāca |
vivasvāniva tejasvī bṛhaspatisamo matau |
mahendra iva śūraśca vasudheva kṣamānvitaḥ || 15 ||
[Analyze grammar]

aśvapatiruvāca |
api rājātmajo dātā brahmaṇyo vāpi satyavān |
rūpavānapyudāro vāpyatha vā priyadarśanaḥ || 16 ||
[Analyze grammar]

nārada uvāca |
sāṅkṛte rantidevasya sa śaktyā dānataḥ samaḥ |
brahmaṇyaḥ satyavādī ca śibirauśīnaro yathā || 17 ||
[Analyze grammar]

yayātiriva codāraḥ somavatpriyadarśanaḥ |
rūpeṇānyatamo'śvibhyāṃ dyumatsenasuto balī || 18 ||
[Analyze grammar]

sa dāntaḥ sa mṛduḥ śūraḥ sa satyaḥ sa jitendriyaḥ |
sa maitraḥ so'nasūyaśca sa hrīmāndhṛtimāṃśca saḥ || 19 ||
[Analyze grammar]

nityaśaścārjavaṃ tasminsthitistasyaiva ca dhruvā |
saṃkṣepatastapovṛddhaiḥ śīlavṛddhaiśca kathyate || 20 ||
[Analyze grammar]

aśvapatiruvāca |
guṇairupetaṃ sarvaistaṃ bhagavanprabravīṣi me |
doṣānapyasya me brūhi yadi santīha kecana || 21 ||
[Analyze grammar]

nārada uvāca |
eko doṣo'sya nānyo'sti so'dya prabhṛti satyavān |
saṃvatsareṇa kṣīṇāyurdehanyāsaṃ kariṣyati || 22 ||
[Analyze grammar]

rājovāca |
ehi sāvitri gaccha tvamanyaṃ varaya śobhane |
tasya doṣo mahāneko guṇānākramya tiṣṭhati || 23 ||
[Analyze grammar]

yathā me bhagavānāha nārado devasatkṛtaḥ |
saṃvatsareṇa so'lpāyurdehanyāsaṃ kariṣyati || 24 ||
[Analyze grammar]

sāvitryuvāca |
sakṛdaṃśo nipatati sakṛtkanyā pradīyate |
sakṛdāha dadānīti trīṇyetāni sakṛtsakṛt || 25 ||
[Analyze grammar]

dīrghāyuratha vālpāyuḥ saguṇo nirguṇo'pi vā |
sakṛdvṛto mayā bhartā na dvitīyaṃ vṛṇomyaham || 26 ||
[Analyze grammar]

manasā niścayaṃ kṛtvā tato vācābhidhīyate |
kriyate karmaṇā paścātpramāṇaṃ me manastataḥ || 27 ||
[Analyze grammar]

nārada uvāca |
sthirā buddhirnaraśreṣṭha sāvitryā duhitustava |
naiṣā cālayituṃ śakyā dharmādasmātkathaṃcana || 28 ||
[Analyze grammar]

nānyasminpuruṣe santi ye satyavati vai guṇāḥ |
pradānameva tasmānme rocate duhitustava || 29 ||
[Analyze grammar]

rājovāca |
avicāryametaduktaṃ hi tathyaṃ bhagavatā vacaḥ |
kariṣyāmyetadevaṃ ca gururhi bhagavānmama || 30 ||
[Analyze grammar]

nārada uvāca |
avighnamastu sāvitryāḥ pradāne duhitustava |
sādhayiṣyāmahe tāvatsarveṣāṃ bhadramastu vaḥ || 31 ||
[Analyze grammar]

mārkaṇḍeya uvāca |
evamuktvā khamutpatya nāradastridivaṃ gataḥ |
rājāpi duhituḥ sarvaṃ vaivāhikamakārayat || 32 ||
[Analyze grammar]