Chapter 185

vaiśaṃpāyana uvāca |
tataḥ sa pāṇḍavo bhūyo mārkaṇḍeyamuvāca ha |
kathayasveha caritaṃ manorvaivasvatasya me || 1 ||
[Analyze grammar]

mārkaṇḍeya uvāca |
vivasvataḥ suto rājanparamarṣiḥ pratāpavān |
babhūva naraśārdūla prajāpatisamadyutiḥ || 2 ||
[Analyze grammar]

ojasā tejasā lakṣmyā tapasā ca viśeṣataḥ |
aticakrāma pitaraṃ manuḥ svaṃ ca pitāmaham || 3 ||
[Analyze grammar]

ūrdhvabāhurviśālāyāṃ badaryāṃ sa narādhipaḥ |
ekapādasthitastīvraṃ cacāra sumahattapaḥ || 4 ||
[Analyze grammar]

avākśirāstathā cāpi netrairanimiṣairdṛḍham |
so'tapyata tapo ghoraṃ varṣāṇāmayutaṃ tadā || 5 ||
[Analyze grammar]

taṃ kadācittapasyantamārdracīrajaṭādharam |
vīriṇītīramāgamya matsyo vacanamabravīt || 6 ||
[Analyze grammar]

bhagavankṣudramatsyo'smi balavadbhyo bhayaṃ mama |
matsyebhyo hi tato māṃ tvaṃ trātumarhasi suvrata || 7 ||
[Analyze grammar]

durbalaṃ balavanto hi matsyaṃ matsyā viśeṣataḥ |
bhakṣayanti yathā vṛttirvihitā naḥ sanātanī || 8 ||
[Analyze grammar]

tasmādbhayaughānmahato majjantaṃ māṃ viśeṣataḥ |
trātumarhasi kartāsmi kṛte pratikṛtaṃ tava || 9 ||
[Analyze grammar]

sa matsyavacanaṃ śrutvā kṛpayābhipariplutaḥ |
manurvaivasvato'gṛhṇāttaṃ matsyaṃ pāṇinā svayam || 10 ||
[Analyze grammar]

udakāntamupānīya matsyaṃ vaivasvato manuḥ |
aliñjare prākṣipatsa candrāṃśusadṛśaprabham || 11 ||
[Analyze grammar]

sa tatra vavṛdhe rājanmatsyaḥ paramasatkṛtaḥ |
putravaccākarottasminmanurbhāvaṃ viśeṣataḥ || 12 ||
[Analyze grammar]

atha kālena mahatā sa matsyaḥ sumahānabhūt |
aliñjare jale caiva nāsau samabhavatkila || 13 ||
[Analyze grammar]

atha matsyo manuṃ dṛṣṭvā punarevābhyabhāṣata |
bhagavansādhu me'dyānyatsthānaṃ saṃpratipādaya || 14 ||
[Analyze grammar]

uddhṛtyāliñjarāttasmāttataḥ sa bhagavānmuniḥ |
taṃ matsyamanayadvāpīṃ mahatīṃ sa manustadā || 15 ||
[Analyze grammar]

tatra taṃ prākṣipaccāpi manuḥ parapuraṃjaya |
athāvardhata matsyaḥ sa punarvarṣagaṇānbahūn || 16 ||
[Analyze grammar]

dviyojanāyatā vāpī vistṛtā cāpi yojanam |
tasyāṃ nāsau samabhavanmatsyo rājīvalocana |
viceṣṭituṃ vā kaunteya matsyo vāpyāṃ viśāṃ pate || 17 ||
[Analyze grammar]

manuṃ matsyastato dṛṣṭvā punarevābhyabhāṣata |
naya māṃ bhagavansādho samudramahiṣīṃ prabho |
gaṅgāṃ tatra nivatsyāmi yathā vā tāta manyase || 18 ||
[Analyze grammar]

evamukto manurmatsyamanayadbhagavānvaśī |
nadīṃ gaṅgāṃ tatra cainaṃ svayaṃ prākṣipadacyutaḥ || 19 ||
[Analyze grammar]

sa tatra vavṛdhe matsyaḥ kiṃcitkālamariṃdama |
tataḥ punarmanuṃ dṛṣṭvā matsyo vacanamabravīt || 20 ||
[Analyze grammar]

gaṅgāyāṃ hi na śaknomi bṛhattvācceṣṭituṃ prabho |
samudraṃ naya māmāśu prasīda bhagavanniti || 21 ||
[Analyze grammar]

uddhṛtya gaṅgāsalilāttato matsyaṃ manuḥ svayam |
samudramanayatpārtha tatra cainamavāsṛjat || 22 ||
[Analyze grammar]

sumahānapi matsyaḥ sansa manormanasastadā |
āsīdyatheṣṭahāryaśca sparśagandhasukhaśca vai || 23 ||
[Analyze grammar]

yadā samudre prakṣiptaḥ sa matsyo manunā tadā |
tata enamidaṃ vākyaṃ smayamāna ivābravīt || 24 ||
[Analyze grammar]

bhagavankṛtā hi me rakṣā tvayā sarvā viśeṣataḥ |
prāptakālaṃ tu yatkāryaṃ tvayā tacchrūyatāṃ mama || 25 ||
[Analyze grammar]

acirādbhagavanbhaumamidaṃ sthāvarajaṅgamam |
sarvameva mahābhāga pralayaṃ vai gamiṣyati || 26 ||
[Analyze grammar]

saṃprakṣālanakālo'yaṃ lokānāṃ samupasthitaḥ |
tasmāttvāṃ bodhayāmyadya yatte hitamanuttamam || 27 ||
[Analyze grammar]

trasānāṃ sthāvarāṇāṃ ca yacceṅgaṃ yacca neṅgati |
tasya sarvasya saṃprāptaḥ kālaḥ paramadāruṇaḥ || 28 ||
[Analyze grammar]

nauśca kārayitavyā te dṛḍhā yuktavaṭākarā |
tatra saptarṣibhiḥ sārdhamāruhethā mahāmune || 29 ||
[Analyze grammar]

bījāni caiva sarvāṇi yathoktāni mayā purā |
tasyāmārohayernāvi susaṃguptāni bhāgaśaḥ || 30 ||
[Analyze grammar]

nausthaśca māṃ pratīkṣethāstadā munijanapriya |
āgamiṣyāmyahaṃ śṛṅgī vijñeyastena tāpasa || 31 ||
[Analyze grammar]

evametattvayā kāryamāpṛṣṭo'si vrajāmyaham |
nātiśaṅkyamidaṃ cāpi vacanaṃ te mamābhibho || 32 ||
[Analyze grammar]

evaṃ kariṣya iti taṃ sa matsyaṃ pratyabhāṣata |
jagmatuśca yathākāmamanujñāpya parasparam || 33 ||
[Analyze grammar]

tato manurmahārāja yathoktaṃ matsyakena ha |
bījānyādāya sarvāṇi sāgaraṃ pupluve tadā |
nāvā tu śubhayā vīra mahormiṇamariṃdama || 34 ||
[Analyze grammar]

cintayāmāsa ca manustaṃ matsyaṃ pṛthivīpate |
sa ca taccintitaṃ jñātvā matsyaḥ parapuraṃjaya |
śṛṅgī tatrājagāmāśu tadā bharatasattama || 35 ||
[Analyze grammar]

taṃ dṛṣṭvā manujendrendra manurmatsyaṃ jalārṇave |
śṛṅgiṇaṃ taṃ yathoktena rūpeṇādrimivocchritam || 36 ||
[Analyze grammar]

vaṭākaramayaṃ pāśamatha matsyasya mūrdhani |
manurmanujaśārdūla tasmiñśṛṅge nyaveśayat || 37 ||
[Analyze grammar]

saṃyatastena pāśena matsyaḥ parapuraṃjaya |
vegena mahatā nāvaṃ prākarṣallavaṇāmbhasi || 38 ||
[Analyze grammar]

sa tatāra tayā nāvā samudraṃ manujeśvara |
nṛtyamānamivormībhirgarjamānamivāmbhasā || 39 ||
[Analyze grammar]

kṣobhyamāṇā mahāvātaiḥ sā naustasminmahodadhau |
ghūrṇate capaleva strī mattā parapuraṃjaya || 40 ||
[Analyze grammar]

naiva bhūmirna ca diśaḥ pradiśo vā cakāśire |
sarvamāmbhasamevāsītkhaṃ dyauśca narapuṃgava || 41 ||
[Analyze grammar]

evaṃbhūte tadā loke saṃkule bharatarṣabha |
adṛśyanta saptarṣayo manurmatsyaḥ sahaiva ha || 42 ||
[Analyze grammar]

evaṃ bahūnvarṣagaṇāṃstāṃ nāvaṃ so'tha matsyakaḥ |
cakarṣātandrito rājaṃstasminsalilasaṃcaye || 43 ||
[Analyze grammar]

tato himavataḥ śṛṅgaṃ yatparaṃ puruṣarṣabha |
tatrākarṣattato nāvaṃ sa matsyaḥ kurunandana || 44 ||
[Analyze grammar]

tato'bravīttadā matsyastānṛṣīnprahasañśanaiḥ |
asminhimavataḥ śṛṅge nāvaṃ badhnīta māciram || 45 ||
[Analyze grammar]

sā baddhā tatra taistūrṇamṛṣibhirbharatarṣabha |
naurmatsyasya vacaḥ śrutvā śṛṅge himavatastadā || 46 ||
[Analyze grammar]

tacca naubandhanaṃ nāma śṛṅgaṃ himavataḥ param |
khyātamadyāpi kaunteya tadviddhi bharatarṣabha || 47 ||
[Analyze grammar]

athābravīdanimiṣastānṛṣīnsahitāṃstadā |
ahaṃ prajāpatirbrahmā matparaṃ nādhigamyate |
matsyarūpeṇa yūyaṃ ca mayāsmānmokṣitā bhayāt || 48 ||
[Analyze grammar]

manunā ca prajāḥ sarvāḥ sadevāsuramānavāḥ |
sraṣṭavyāḥ sarvalokāśca yacceṅgaṃ yacca neṅgati || 49 ||
[Analyze grammar]

tapasā cātitīvreṇa pratibhāsya bhaviṣyati |
matprasādātprajāsarge na ca mohaṃ gamiṣyati || 50 ||
[Analyze grammar]

ityuktvā vacanaṃ matsyaḥ kṣaṇenādarśanaṃ gataḥ |
sraṣṭukāmaḥ prajāścāpi manurvaivasvataḥ svayam |
pramūḍho'bhūtprajāsarge tapastepe mahattataḥ || 51 ||
[Analyze grammar]

tapasā mahatā yuktaḥ so'tha sraṣṭuṃ pracakrame |
sarvāḥ prajā manuḥ sākṣādyathāvadbharatarṣabha || 52 ||
[Analyze grammar]

ityetanmātsyakaṃ nāma purāṇaṃ parikīrtitam |
ākhyānamidamākhyātaṃ sarvapāpaharaṃ mayā || 53 ||
[Analyze grammar]

ya idaṃ śṛṇuyānnityaṃ manoścaritamāditaḥ |
sa sukhī sarvasiddhārthaḥ svargalokamiyānnaraḥ || 54 ||
[Analyze grammar]