Chapter 106

lomaśa uvāca |
te taṃ dṛṣṭvā hayaṃ rājansaṃprahṛṣṭatanūruhāḥ |
anādṛtya mahātmānaṃ kapilaṃ kālacoditāḥ |
saṃkruddhāḥ samadhāvanta aśvagrahaṇakāṅkṣiṇaḥ || 1 ||
[Analyze grammar]

tataḥ kruddho mahārāja kapilo munisattamaḥ |
vāsudeveti yaṃ prāhuḥ kapilaṃ munisattamam || 2 ||
[Analyze grammar]

sa cakṣurvivṛtaṃ kṛtvā tejasteṣu samutsṛjan |
dadāha sumahātejā mandabuddhīnsa sāgarān || 3 ||
[Analyze grammar]

tāndṛṣṭvā bhasmasādbhūtānnāradaḥ sumahātapāḥ |
sagarāntikamāgacchattacca tasmai nyavedayat || 4 ||
[Analyze grammar]

sa tacchrutvā vaco ghoraṃ rājā munimukhodgatam |
muhūrtaṃ vimanā bhūtvā sthāṇorvākyamacintayat |
ātmānamātmanāśvāsya hayamevānvacintayat || 5 ||
[Analyze grammar]

aṃśumantaṃ samāhūya asamañjaḥsutaṃ tadā |
pautraṃ bharataśārdūla idaṃ vacanamabravīt || 6 ||
[Analyze grammar]

ṣaṣṭistāni sahasrāṇi putrāṇāmamitaujasām |
kāpilaṃ teja āsādya matkṛte nidhanaṃ gatāḥ || 7 ||
[Analyze grammar]

tava cāpi pitā tāta parityakto mayānagha |
dharmaṃ saṃrakṣamāṇena paurāṇāṃ hitamicchatā || 8 ||
[Analyze grammar]

yudhiṣṭhira uvāca |
kimarthaṃ rājaśārdūlaḥ sagaraḥ putramātmajam |
tyaktavāndustyajaṃ vīraṃ tanme brūhi tapodhana || 9 ||
[Analyze grammar]

lomaśa uvāca |
asamañjā iti khyātaḥ sagarasya suto hyabhūt |
yaṃ śaibyā janayāmāsa paurāṇāṃ sa hi dārakān |
khureṣu krośato gṛhya nadyāṃ cikṣepa durbalān || 10 ||
[Analyze grammar]

tataḥ paurāḥ samājagmurbhayaśokapariplutāḥ |
sagaraṃ cābhyayācanta sarve prāñjalayaḥ sthitāḥ || 11 ||
[Analyze grammar]

tvaṃ nastrātā mahārāja paracakrādibhirbhayaiḥ |
asamañjobhayādghorāttato nastrātumarhasi || 12 ||
[Analyze grammar]

paurāṇāṃ vacanaṃ śrutvā ghoraṃ nṛpatisattamaḥ |
muhūrtaṃ vimanā bhūtvā sacivānidamabravīt || 13 ||
[Analyze grammar]

asamañjāḥ purādadya suto me vipravāsyatām |
yadi vo matpriyaṃ kāryametacchīghraṃ vidhīyatām || 14 ||
[Analyze grammar]

evamuktā narendreṇa sacivāste narādhipa |
yathoktaṃ tvaritāścakruryathājñāpitavānnṛpaḥ || 15 ||
[Analyze grammar]

etatte sarvamākhyātaṃ yathā putro mahātmanā |
paurāṇāṃ hitakāmena sagareṇa vivāsitaḥ || 16 ||
[Analyze grammar]

aṃśumāṃstu maheṣvāso yaduktaḥ sagareṇa ha |
tatte sarvaṃ pravakṣyāmi kīrtyamānaṃ nibodha me || 17 ||
[Analyze grammar]

sagara uvāca |
pituśca te'haṃ tyāgena putrāṇāṃ nidhanena ca |
alābhena tathāśvasya paritapyāmi putraka || 18 ||
[Analyze grammar]

tasmādduḥkhābhisaṃtaptaṃ yajñavighnācca mohitam |
hayasyānayanātpautra narakānmāṃ samuddhara || 19 ||
[Analyze grammar]

lomaśa uvāca |
aṃśumānevamuktastu sagareṇa mahātmanā |
jagāma duḥkhāttaṃ deśaṃ yatra vai dāritā mahī || 20 ||
[Analyze grammar]

sa tu tenaiva mārgeṇa samudraṃ praviveśa ha |
apaśyacca mahātmānaṃ kapilaṃ turagaṃ ca tam || 21 ||
[Analyze grammar]

sa dṛṣṭvā tejaso rāśiṃ purāṇamṛṣisattamam |
praṇamya śirasā bhūmau kāryamasmai nyavedayat || 22 ||
[Analyze grammar]

tataḥ prīto mahātejāḥ kalipoṃ'śumato'bhavat |
uvāca cainaṃ dharmātmā varado'smīti bhārata || 23 ||
[Analyze grammar]

sa vavre turagaṃ tatra prathamaṃ yajñakāraṇāt |
dvitīyamudakaṃ vavre pitṝṇāṃ pāvanepsayā || 24 ||
[Analyze grammar]

tamuvāca mahātejāḥ kapilo munipuṃgavaḥ |
dadāni tava bhadraṃ te yadyatprārthayase'nagha || 25 ||
[Analyze grammar]

tvayi kṣamā ca dharmaśca satyaṃ cāpi pratiṣṭhitam |
tvayā kṛtārthaḥ sagaraḥ putravāṃśca tvayā pitā || 26 ||
[Analyze grammar]

tava caiva prabhāvena svargaṃ yāsyanti sāgarāḥ |
pautraśca te tripathagāṃ tridivādānayiṣyati |
pāvanārthaṃ sāgarāṇāṃ toṣayitvā maheśvaram || 27 ||
[Analyze grammar]

hayaṃ nayasva bhadraṃ te yajñiyaṃ narapuṃgava |
yajñaḥ samāpyatāṃ tāta sagarasya mahātmanaḥ || 28 ||
[Analyze grammar]

aṃśumānevamuktastu kapilena mahātmanā |
ājagāma hayaṃ gṛhya yajñavāṭaṃ mahātmanaḥ || 29 ||
[Analyze grammar]

so'bhivādya tataḥ pādau sagarasya mahātmanaḥ |
mūrdhni tenāpyupāghrātastasmai sarvaṃ nyavedayat || 30 ||
[Analyze grammar]

yathā dṛṣṭaṃ śrutaṃ cāpi sāgarāṇāṃ kṣayaṃ tathā |
taṃ cāsmai hayamācaṣṭa yajñavāṭamupāgatam || 31 ||
[Analyze grammar]

tacchrutvā sagaro rājā putrajaṃ duḥkhamatyajat |
aṃśumantaṃ ca saṃpūjya samāpayata taṃ kratum || 32 ||
[Analyze grammar]

samāptayajñaḥ sagaro devaiḥ sarvaiḥ sabhājitaḥ |
putratve kalpayāmāsa samudraṃ varuṇālayam || 33 ||
[Analyze grammar]

praśāsya suciraṃ kālaṃ rājyaṃ rājīvalocanaḥ |
pautre bhāraṃ samāveśya jagāma tridivaṃ tadā || 34 ||
[Analyze grammar]

aṃśumānapi dharmātmā mahīṃ sāgaramekhalām |
praśaśāsa mahārāja yathaivāsya pitāmahaḥ || 35 ||
[Analyze grammar]

tasya putraḥ samabhavaddilīpo nāma dharmavit |
tasmai rājyaṃ samādhāya aṃśumānapi saṃsthitaḥ || 36 ||
[Analyze grammar]

dilīpastu tataḥ śrutvā pitṝṇāṃ nidhanaṃ mahat |
paryatapyata duḥkhena teṣāṃ gatimacintayat || 37 ||
[Analyze grammar]

gaṅgāvataraṇe yatnaṃ sumahaccākaronnṛpaḥ |
na cāvatārayāmāsa ceṣṭamāno yathābalam || 38 ||
[Analyze grammar]

tasya putraḥ samabhavacchrīmāndharmaparāyaṇaḥ |
bhagīratha iti khyātaḥ satyavāganasūyakaḥ || 39 ||
[Analyze grammar]

abhiṣicya tu taṃ rājye dilīpo vanamāśritaḥ |
tapaḥsiddhisamāyogātsa rājā bharatarṣabha |
vanājjagāma tridivaṃ kālayogena bhārata || 40 ||
[Analyze grammar]