Chapter 12

vaiśaṃpāyana uvāca |
ṛṣestadvacanaṃ śrutvā niśaśvāsa yudhiṣṭhiraḥ |
cintayanrājasūyāptiṃ na lebhe śarma bhārata || 1 ||
[Analyze grammar]

rājarṣīṇāṃ hi taṃ śrutvā mahimānaṃ mahātmanām |
yajvanāṃ karmabhiḥ puṇyairlokaprāptiṃ samīkṣya ca || 2 ||
[Analyze grammar]

hariścandraṃ ca rājarṣiṃ rocamānaṃ viśeṣataḥ |
yajvānaṃ yajñamāhartuṃ rājasūyamiyeṣa saḥ || 3 ||
[Analyze grammar]

yudhiṣṭhirastataḥ sarvānarcayitvā sabhāsadaḥ |
pratyarcitaśca taiḥ sarvairyajñāyaiva mano dadhe || 4 ||
[Analyze grammar]

sa rājasūyaṃ rājendra kurūṇāmṛṣabhaḥ kratum |
āhartuṃ pravaṇaṃ cakre manaḥ saṃcintya so'sakṛt || 5 ||
[Analyze grammar]

bhūyaścādbhutavīryaujā dharmamevānupālayan |
kiṃ hitaṃ sarvalokānāṃ bhavediti mano dadhe || 6 ||
[Analyze grammar]

anugṛhṇanprajāḥ sarvāḥ sarvadharmavidāṃ varaḥ |
aviśeṣeṇa sarveṣāṃ hitaṃ cakre yudhiṣṭhiraḥ || 7 ||
[Analyze grammar]

evaṃ gate tatastasminpitarīvāśvasañjanāḥ |
na tasya vidyate dveṣṭā tato'syājātaśatrutā || 8 ||
[Analyze grammar]

sa mantriṇaḥ samānāyya bhrātṝṃśca vadatāṃ varaḥ |
rājasūyaṃ prati tadā punaḥ punarapṛcchata || 9 ||
[Analyze grammar]

te pṛcchyamānāḥ sahitā vaco'rthyaṃ mantriṇastadā |
yudhiṣṭhiraṃ mahāprājñaṃ yiyakṣumidamabruvan || 10 ||
[Analyze grammar]

yenābhiṣikto nṛpatirvāruṇaṃ guṇamṛcchati |
tena rājāpi sankṛtsnaṃ samrāḍguṇamabhīpsati || 11 ||
[Analyze grammar]

tasya samrāḍguṇārhasya bhavataḥ kurunandana |
rājasūyasya samayaṃ manyante suhṛdastava || 12 ||
[Analyze grammar]

tasya yajñasya samayaḥ svādhīnaḥ kṣatrasaṃpadā |
sāmnā ṣaḍagnayo yasmiṃścīyante saṃśitavrataiḥ || 13 ||
[Analyze grammar]

darvīhomānupādāya sarvānyaḥ prāpnute kratūn |
abhiṣekaṃ ca yajñānte sarvajittena cocyate || 14 ||
[Analyze grammar]

samartho'si mahābāho sarve te vaśagā vayam |
avicārya mahārāja rājasūye manaḥ kuru || 15 ||
[Analyze grammar]

ityevaṃ suhṛdaḥ sarve pṛthakca saha cābruvan |
sa dharmyaṃ pāṇḍavasteṣāṃ vacaḥ śrutvā viśāṃ pate |
dhṛṣṭamiṣṭaṃ variṣṭhaṃ ca jagrāha manasārihā || 16 ||
[Analyze grammar]

śrutvā suhṛdvacastacca jānaṃścāpyātmanaḥ kṣamam |
punaḥ punarmano dadhre rājasūyāya bhārata || 17 ||
[Analyze grammar]

sa bhrātṛbhiḥ punardhīmānṛtvigbhiśca mahātmabhiḥ |
dhaumyadvaipāyanādyaiśca mantrayāmāsa mantribhiḥ || 18 ||
[Analyze grammar]

yudhiṣṭhira uvāca |
iyaṃ yā rājasūyasya samrāḍarhasya sukratoḥ |
śraddadhānasya vadataḥ spṛhā me sā kathaṃ bhavet || 19 ||
[Analyze grammar]

vaiśaṃpāyana uvāca |
evamuktāstu te tena rājñā rājīvalocana |
idamūcurvacaḥ kāle dharmātmānaṃ yudhiṣṭhiram |
arhastvamasi dharmajña rājasūyaṃ mahākratum || 20 ||
[Analyze grammar]

athaivamukte nṛpatāvṛtvigbhirṛṣibhistathā |
mantriṇo bhrātaraścāsya tadvacaḥ pratyapūjayan || 21 ||
[Analyze grammar]

sa tu rājā mahāprājñaḥ punarevātmanātmavān |
bhūyo vimamṛśe pārtho lokānāṃ hitakāmyayā || 22 ||
[Analyze grammar]

sāmarthyayogaṃ saṃprekṣya deśakālau vyayāgamau |
vimṛśya samyakca dhiyā kurvanprājño na sīdati || 23 ||
[Analyze grammar]

na hi yajñasamārambhaḥ kevalātmavipattaye |
bhavatīti samājñāya yatnataḥ kāryamudvahan || 24 ||
[Analyze grammar]

sa niścayārthaṃ kāryasya kṛṣṇameva janārdanam |
sarvalokātparaṃ matvā jagāma manasā harim || 25 ||
[Analyze grammar]

aprameyaṃ mahābāhuṃ kāmājjātamajaṃ nṛṣu |
pāṇḍavastarkayāmāsa karmabhirdevasaṃmitaiḥ || 26 ||
[Analyze grammar]

nāsya kiṃcidavijñātaṃ nāsya kiṃcidakarmajam |
na sa kiṃcinna viṣahediti kṛṣṇamamanyata || 27 ||
[Analyze grammar]

sa tu tāṃ naiṣṭhikīṃ buddhiṃ kṛtvā pārtho yudhiṣṭhiraḥ |
guruvadbhūtagurave prāhiṇoddūtamañjasā || 28 ||
[Analyze grammar]

śīghragena rathenāśu sa dūtaḥ prāpya yādavān |
dvārakāvāsinaṃ kṛṣṇaṃ dvāravatyāṃ samāsadat || 29 ||
[Analyze grammar]

darśanākāṅkṣiṇaṃ pārthaṃ darśanākāṅkṣayācyutaḥ |
indrasenena sahita indraprasthaṃ yayau tadā || 30 ||
[Analyze grammar]

vyatītya vividhāndeśāṃstvarāvānkṣipravāhanaḥ |
indraprasthagataṃ pārthamabhyagacchajjanārdanaḥ || 31 ||
[Analyze grammar]

sa gṛhe bhrātṛvadbhrātrā dharmarājena pūjitaḥ |
bhīmena ca tato'paśyatsvasāraṃ prītimānpituḥ || 32 ||
[Analyze grammar]

prītaḥ priyeṇa suhṛdā reme sa sahitastadā |
arjunena yamābhyāṃ ca guruvatparyupasthitaḥ || 33 ||
[Analyze grammar]

taṃ viśrāntaṃ śubhe deśe kṣaṇinaṃ kalyamacyutam |
dharmarājaḥ samāgamya jñāpayatsvaṃ prayojanam || 34 ||
[Analyze grammar]

yudhiṣṭhira uvāca |
prārthito rājasūyo me na cāsau kevalepsayā |
prāpyate yena tatte ha viditaṃ kṛṣṇa sarvaśaḥ || 35 ||
[Analyze grammar]

yasminsarvaṃ saṃbhavati yaśca sarvatra pūjyate |
yaśca sarveśvaro rājā rājasūyaṃ sa vindati || 36 ||
[Analyze grammar]

taṃ rājasūyaṃ suhṛdaḥ kāryamāhuḥ sametya me |
tatra me niścitatamaṃ tava kṛṣṇa girā bhavet || 37 ||
[Analyze grammar]

keciddhi sauhṛdādeva doṣaṃ na paricakṣate |
arthahetostathaivānye priyameva vadantyuta || 38 ||
[Analyze grammar]

priyameva parīpsante kecidātmani yaddhitam |
evaṃprāyāśca dṛśyante janavādāḥ prayojane || 39 ||
[Analyze grammar]

tvaṃ tu hetūnatītyaitānkāmakrodhau vyatītya ca |
paramaṃ naḥ kṣamaṃ loke yathāvadvaktumarhasi || 40 ||
[Analyze grammar]