Chapter 13

śrīkṛṣṇa uvāca |
sarvairguṇairmahārāja rājasūyaṃ tvamarhasi |
jānatastveva te sarvaṃ kiṃcidvakṣyāmi bhārata || 1 ||
[Analyze grammar]

jāmadagnyena rāmeṇa kṣatraṃ yadavaśeṣitam |
tasmādavarajaṃ loke yadidaṃ kṣatrasaṃjñitam || 2 ||
[Analyze grammar]

kṛto'yaṃ kulasaṃkalpaḥ kṣatriyairvasudhādhipa |
nideśavāgbhistatte ha viditaṃ bharatarṣabha || 3 ||
[Analyze grammar]

ailasyekṣvākuvaṃśasya prakṛtiṃ paricakṣate |
rājānaḥ śreṇibaddhāśca tato'nye kṣatriyā bhuvi || 4 ||
[Analyze grammar]

ailavaṃśyāstu ye rājaṃstathaivekṣvākavo nṛpāḥ |
tāni caikaśataṃ viddhi kulāni bharatarṣabha || 5 ||
[Analyze grammar]

yayātestveva bhojānāṃ vistaro'tiguṇo mahān |
bhajate ca mahārāja vistaraḥ sa caturdiśam || 6 ||
[Analyze grammar]

teṣāṃ tathaiva tāṃ lakṣmīṃ sarvakṣatramupāsate |
so'vanīṃ madhyamāṃ bhuktvā mithobhedeṣvamanyata || 7 ||
[Analyze grammar]

caturyustvaparo rājā yasminnekaśato'bhavat |
sa sāmrājyaṃ jarāsaṃdhaḥ prāpto bhavati yonitaḥ || 8 ||
[Analyze grammar]

taṃ sa rājā mahāprājña saṃśritya kila sarvaśaḥ |
rājansenāpatirjātaḥ śiśupālaḥ pratāpavān || 9 ||
[Analyze grammar]

tameva ca mahārāja śiṣyavatsamupasthitaḥ |
vakraḥ karūṣādhipatirmāyāyodhī mahābalaḥ || 10 ||
[Analyze grammar]

aparau ca mahāvīryau mahātmānau samāśritau |
jarāsaṃdhaṃ mahāvīryaṃ tau haṃsaḍibhakāvubhau || 11 ||
[Analyze grammar]

dantavakraḥ karūṣaśca kalabho meghavāhanaḥ |
mūrdhnā divyaṃ maṇiṃ bibhradyaṃ taṃ bhūtamaṇiṃ viduḥ || 12 ||
[Analyze grammar]

muraṃ ca narakaṃ caiva śāsti yo yavanādhipau |
aparyantabalo rājā pratīcyāṃ varuṇo yathā || 13 ||
[Analyze grammar]

bhagadatto mahārāja vṛddhastava pituḥ sakhā |
sa vācā praṇatastasya karmaṇā caiva bhārata || 14 ||
[Analyze grammar]

snehabaddhastu pitṛvanmanasā bhaktimāṃstvayi |
pratīcyāṃ dakṣiṇaṃ cāntaṃ pṛthivyāḥ pāti yo nṛpaḥ || 15 ||
[Analyze grammar]

mātulo bhavataḥ śūraḥ purujitkuntivardhanaḥ |
sa te saṃnatimānekaḥ snehataḥ śatrutāpanaḥ || 16 ||
[Analyze grammar]

jarāsaṃdhaṃ gatastvevaṃ purā yo na mayā hataḥ |
puruṣottamavijñāto yo'sau cediṣu durmatiḥ || 17 ||
[Analyze grammar]

ātmānaṃ pratijānāti loke'sminpuruṣottamam |
ādatte satataṃ mohādyaḥ sa cihnaṃ ca māmakam || 18 ||
[Analyze grammar]

vaṅgapuṇḍrakirāteṣu rājā balasamanvitaḥ |
pauṇḍrako vāsudeveti yo'sau lokeṣu viśrutaḥ || 19 ||
[Analyze grammar]

caturyuḥ sa mahārāja bhoja indrasakho balī |
vidyābalādyo vyajayatpāṇḍyakrathakakaiśikān || 20 ||
[Analyze grammar]

bhrātā yasyāhṛtiḥ śūro jāmadagnyasamo yudhi |
sa bhakto māgadhaṃ rājā bhīṣmakaḥ paravīrahā || 21 ||
[Analyze grammar]

priyāṇyācarataḥ prahvānsadā saṃbandhinaḥ sataḥ |
bhajato na bhajatyasmānapriyeṣu vyavasthitaḥ || 22 ||
[Analyze grammar]

na kulaṃ na balaṃ rājannabhijānaṃstathātmanaḥ |
paśyamāno yaśo dīptaṃ jarāsaṃdhamupāśritaḥ || 23 ||
[Analyze grammar]

udīcyabhojāśca tathā kulānyaṣṭādaśābhibho |
jarāsaṃdhabhayādeva pratīcīṃ diśamāśritāḥ || 24 ||
[Analyze grammar]

śūrasenā bhadrakārā bodhāḥ śālvāḥ paṭaccarāḥ |
sustharāśca sukuṭṭāśca kuṇindāḥ kuntibhiḥ saha || 25 ||
[Analyze grammar]

śālveyānāṃ ca rājānaḥ sodaryānucaraiḥ saha |
dakṣiṇā ye ca pāñcālāḥ pūrvāḥ kuntiṣu kośalāḥ || 26 ||
[Analyze grammar]

tathottarāṃ diśaṃ cāpi parityajya bhayārditāḥ |
matsyāḥ saṃnyastapādāśca dakṣiṇāṃ diśamāśritāḥ || 27 ||
[Analyze grammar]

tathaiva sarvapāñcālā jarāsaṃdhabhayārditāḥ |
svarāṣṭraṃ saṃparityajya vidrutāḥ sarvatodiśam || 28 ||
[Analyze grammar]

kasyacittvatha kālasya kaṃso nirmathya bāndhavān |
bārhadrathasute devyāvupāgacchadvṛthāmatiḥ || 29 ||
[Analyze grammar]

astiḥ prāptiśca nāmnā te sahadevānuje'bale |
balena tena sa jñātīnabhibhūya vṛthāmatiḥ || 30 ||
[Analyze grammar]

śraiṣṭhyaṃ prāptaḥ sa tasyāsīdatīvāpanayo mahān |
bhojarājanyavṛddhaistu pīḍyamānairdurātmanā || 31 ||
[Analyze grammar]

jñātitrāṇamabhīpsadbhirasmatsaṃbhāvanā kṛtā |
dattvākrūrāya sutanuṃ tāmāhukasutāṃ tadā || 32 ||
[Analyze grammar]

saṃkarṣaṇadvitīyena jñātikāryaṃ mayā kṛtam |
hatau kaṃsasunāmānau mayā rāmeṇa cāpyuta || 33 ||
[Analyze grammar]

bhaye tu samupakrānte jarāsaṃdhe samudyate |
mantro'yaṃ mantrito rājankulairaṣṭādaśāvaraiḥ || 34 ||
[Analyze grammar]

anāramanto nighnanto mahāstraiḥ śataghātibhiḥ |
na hanyāma vayaṃ tasya tribhirvarṣaśatairbalam || 35 ||
[Analyze grammar]

tasya hyamarasaṃkāśau balena balināṃ varau |
nāmabhyāṃ haṃsaḍibhakāvityāstāṃ yodhasattamau || 36 ||
[Analyze grammar]

tāvubhau sahitau vīrau jarāsaṃdhaśca vīryavān |
trayastrayāṇāṃ lokānāṃ paryāptā iti me matiḥ || 37 ||
[Analyze grammar]

na hi kevalamasmākaṃ yāvanto'nye ca pārthivāḥ |
tathaiva teṣāmāsīcca buddhirbuddhimatāṃ vara || 38 ||
[Analyze grammar]

atha haṃsa iti khyātaḥ kaścidāsīnmahānnṛpaḥ |
sa cānyaiḥ sahito rājansaṃgrāme'ṣṭādaśāvaraiḥ || 39 ||
[Analyze grammar]

hato haṃsa iti proktamatha kenāpi bhārata |
tacchrutvā ḍibhako rājanyamunāmbhasyamajjata || 40 ||
[Analyze grammar]

vinā haṃsena loke'sminnāhaṃ jīvitumutsahe |
ityetāṃ matimāsthāya ḍibhako nidhanaṃ gataḥ || 41 ||
[Analyze grammar]

tathā tu ḍibhakaṃ śrutvā haṃsaḥ parapuraṃjayaḥ |
prapede yamunāmeva so'pi tasyāṃ nyamajjata || 42 ||
[Analyze grammar]

tau sa rājā jarāsaṃdhaḥ śrutvāpsu nidhanaṃ gatau |
svapuraṃ śūrasenānāṃ prayayau bharatarṣabha || 43 ||
[Analyze grammar]

tato vayamamitraghna tasminpratigate nṛpe |
punarānanditāḥ sarve mathurāyāṃ vasāmahe || 44 ||
[Analyze grammar]

yadā tvabhyetya pitaraṃ sā vai rājīvalocanā |
kaṃsabhāryā jarāsaṃdhaṃ duhitā māgadhaṃ nṛpam || 45 ||
[Analyze grammar]

codayatyeva rājendra pativyasanaduḥkhitā |
patighnaṃ me jahītyevaṃ punaḥ punarariṃdama || 46 ||
[Analyze grammar]

tato vayaṃ mahārāja taṃ mantraṃ pūrvamantritam |
saṃsmaranto vimanaso vyapayātā narādhipa || 47 ||
[Analyze grammar]

pṛthaktvena drutā rājansaṃkṣipya mahatīṃ śriyam |
prapatāmo bhayāttasya sadhanajñātibāndhavāḥ || 48 ||
[Analyze grammar]

iti saṃcintya sarve sma pratīcīṃ diśamāśritāḥ |
kuśasthalīṃ purīṃ ramyāṃ raivatenopaśobhitām || 49 ||
[Analyze grammar]

punarniveśanaṃ tasyāṃ kṛtavanto vayaṃ nṛpa |
tathaiva durgasaṃskāraṃ devairapi durāsadam || 50 ||
[Analyze grammar]

striyo'pi yasyāṃ yudhyeyuḥ kiṃ punarvṛṣṇipuṃgavāḥ |
tasyāṃ vayamamitraghna nivasāmo'kutobhayāḥ || 51 ||
[Analyze grammar]

ālokya girimukhyaṃ taṃ mādhavītīrthameva ca |
mādhavāḥ kuruśārdūla parāṃ mudamavāpnuvan || 52 ||
[Analyze grammar]

evaṃ vayaṃ jarāsaṃdhādāditaḥ kṛtakilbiṣāḥ |
sāmarthyavantaḥ saṃbandhādbhavantaṃ samupāśritāḥ || 53 ||
[Analyze grammar]

triyojanāyataṃ sadma triskandhaṃ yojanādadhi |
yojanānte śatadvāraṃ vikramakramatoraṇam |
aṣṭādaśāvarairnaddhaṃ kṣatriyairyuddhadurmadaiḥ || 54 ||
[Analyze grammar]

aṣṭādaśa sahasrāṇi vrātānāṃ santi naḥ kule |
āhukasya śataṃ putrā ekaikastriśatāvaraḥ || 55 ||
[Analyze grammar]

cārudeṣṇaḥ saha bhrātrā cakradevo'tha sātyakiḥ |
ahaṃ ca rauhiṇeyaśca sāmbaḥ śaurisamo yudhi || 56 ||
[Analyze grammar]

evamete rathāḥ sapta rājannanyānnibodha me |
kṛtavarmā anādhṛṣṭiḥ samīkaḥ samitiṃjayaḥ || 57 ||
[Analyze grammar]

kahvaḥ śaṅkurnidāntaśca saptaivaite mahārathāḥ |
putrau cāndhakabhojasya vṛddho rājā ca te daśa || 58 ||
[Analyze grammar]

lokasaṃhananā vīrā vīryavanto mahābalāḥ |
smaranto madhyamaṃ deśaṃ vṛṣṇimadhye gatavyathāḥ || 59 ||
[Analyze grammar]

sa tvaṃ samrāḍguṇairyuktaḥ sadā bharatasattama |
kṣatre samrājamātmānaṃ kartumarhasi bhārata || 60 ||
[Analyze grammar]

na tu śakyaṃ jarāsaṃdhe jīvamāne mahābale |
rājasūyastvayā prāptumeṣā rājanmatirmama || 61 ||
[Analyze grammar]

tena ruddhā hi rājānaḥ sarve jitvā girivraje |
kandarāyāṃ girīndrasya siṃheneva mahādvipāḥ || 62 ||
[Analyze grammar]

so'pi rājā jarāsaṃdho yiyakṣurvasudhādhipaiḥ |
ārādhya hi mahādevaṃ nirjitāstena pārthivāḥ || 63 ||
[Analyze grammar]

sa hi nirjitya nirjitya pārthivānpṛtanāgatān |
puramānīya baddhvā ca cakāra puruṣavrajam || 64 ||
[Analyze grammar]

vayaṃ caiva mahārāja jarāsaṃdhabhayāttadā |
mathurāṃ saṃparityajya gatā dvāravatīṃ purīm || 65 ||
[Analyze grammar]

yadi tvenaṃ mahārāja yajñaṃ prāptumihecchasi |
yatasva teṣāṃ mokṣāya jarāsaṃdhavadhāya ca || 66 ||
[Analyze grammar]

samārambho hi śakyo'yaṃ nānyathā kurunandana |
rājasūyasya kārtsnyena kartuṃ matimatāṃ vara || 67 ||
[Analyze grammar]

ityeṣā me matī rājanyathā vā manyase'nagha |
evaṃ gate mamācakṣva svayaṃ niścitya hetubhiḥ || 68 ||
[Analyze grammar]