Chapter 74

yudhiṣṭhira uvāca |
visrambhito'haṃ bhavatā dharmānpravadatā vibho |
pravakṣyāmi tu saṃdehaṃ tanme brūhi pitāmaha || 1 ||
[Analyze grammar]

vratānāṃ kiṃ phalaṃ proktaṃ kīdṛśaṃ vā mahādyute |
niyamānāṃ phalaṃ kiṃ ca svadhītasya ca kiṃ phalam || 2 ||
[Analyze grammar]

damasyeha phalaṃ kiṃ ca vedānāṃ dhāraṇe ca kim |
adhyāpane phalaṃ kiṃ ca sarvamicchāmi veditum || 3 ||
[Analyze grammar]

apratigrāhake kiṃ ca phalaṃ loke pitāmaha |
tasya kiṃ ca phalaṃ dṛṣṭaṃ śrutaṃ yaḥ saṃprayacchati || 4 ||
[Analyze grammar]

svakarmaniratānāṃ ca śūrāṇāṃ cāpi kiṃ phalam |
satye ca kiṃ phalaṃ proktaṃ brahmacarye ca kiṃ phalam || 5 ||
[Analyze grammar]

pitṛśuśrūṣaṇe kiṃ ca mātṛśuśrūṣaṇe tathā |
ācāryaguruśuśrūṣāsvanukrośānukampane || 6 ||
[Analyze grammar]

etatsarvamaśeṣeṇa pitāmaha yathātatham |
vettumicchāmi dharmajña paraṃ kautūhalaṃ hi me || 7 ||
[Analyze grammar]

bhīṣma uvāca |
yo vrataṃ vai yathoddiṣṭaṃ tathā saṃpratipadyate |
akhaṇḍaṃ samyagārabdhaṃ tasya lokāḥ sanātanāḥ || 8 ||
[Analyze grammar]

niyamānāṃ phalaṃ rājanpratyakṣamiha dṛśyate |
niyamānāṃ kratūnāṃ ca tvayāvāptamidaṃ phalam || 9 ||
[Analyze grammar]

svadhītasyāpi ca phalaṃ dṛśyate'mutra ceha ca |
ihaloke'rthavānnityaṃ brahmaloke ca modate || 10 ||
[Analyze grammar]

damasya tu phalaṃ rājañśṛṇu tvaṃ vistareṇa me |
dāntāḥ sarvatra sukhino dāntāḥ sarvatra nirvṛtāḥ || 11 ||
[Analyze grammar]

yatrecchāgāmino dāntāḥ sarvaśatruniṣūdanāḥ |
prārthayanti ca yaddāntā labhante tanna saṃśayaḥ || 12 ||
[Analyze grammar]

yujyante sarvakāmairhi dāntāḥ sarvatra pāṇḍava |
svarge tathā pramodante tapasā vikrameṇa ca || 13 ||
[Analyze grammar]

dānairyajñaiśca vividhairyathā dāntāḥ kṣamānvitāḥ |
dātā kupyati no dāntastasmāddānātparo damaḥ || 14 ||
[Analyze grammar]

yastu dadyādakupyanhi tasya lokāḥ sanātanāḥ |
krodho hanti hi yaddānaṃ tasmāddānātparo damaḥ || 15 ||
[Analyze grammar]

adṛśyāni mahārāja sthānānyayutaśo divi |
ṛṣīṇāṃ sarvalokeṣu yānīto yānti devatāḥ || 16 ||
[Analyze grammar]

damena yāni nṛpate gacchanti paramarṣayaḥ |
kāmayānā mahatsthānaṃ tasmāddānātparo damaḥ || 17 ||
[Analyze grammar]

adhyāpakaḥ parikleśādakṣayaṃ phalamaśnute |
vidhivatpāvakaṃ hutvā brahmaloke narādhipa || 18 ||
[Analyze grammar]

adhītyāpi hi yo vedānnyāyavidbhyaḥ prayacchati |
gurukarmapraśaṃsī ca so'pi svarge mahīyate || 19 ||
[Analyze grammar]

kṣatriyo'dhyayane yukto yajane dānakarmaṇi |
yuddhe yaśca paritrātā so'pi svarge mahīyate || 20 ||
[Analyze grammar]

vaiśyaḥ svakarmanirataḥ pradānāllabhate mahat |
śūdraḥ svakarmanirataḥ svargaṃ śuśrūṣayārcchati || 21 ||
[Analyze grammar]

śūrā bahuvidhāḥ proktāsteṣāmarthāṃśca me śṛṇu |
śūrānvayānāṃ nirdiṣṭaṃ phalaṃ śūrasya caiva ha || 22 ||
[Analyze grammar]

yajñaśūrā dame śūrāḥ satyaśūrāstathāpare |
yuddhaśūrāstathaivoktā dānaśūrāśca mānavāḥ || 23 ||
[Analyze grammar]

buddhiśūrāstathaivānye kṣamāśūrāstathāpare |
ārjave ca tathā śūrāḥ śame vartanti mānavāḥ || 24 ||
[Analyze grammar]

taistaistu niyamaiḥ śūrā bahavaḥ santi cāpare |
vedādhyayanaśūrāśca śūrāścādhyāpane ratāḥ || 25 ||
[Analyze grammar]

guruśuśrūṣayā śūrāḥ pitṛśuśrūṣayāpare |
mātṛśuśrūṣayā śūrā bhaikṣyaśūrāstathāpare || 26 ||
[Analyze grammar]

sāṃkhyaśūrāśca bahavo yogaśūrāstathāpare |
araṇye gṛhavāse ca śūrāścātithipūjane |
sarve yānti parāṃllokānsvakarmaphalanirjitān || 27 ||
[Analyze grammar]

dhāraṇaṃ sarvavedānāṃ sarvatīrthāvagāhanam |
satyaṃ ca bruvato nityaṃ samaṃ vā syānna vā samam || 28 ||
[Analyze grammar]

aśvamedhasahasraṃ ca satyaṃ ca tulayā dhṛtam |
aśvamedhasahasrāddhi satyameva viśiṣyate || 29 ||
[Analyze grammar]

satyena sūryastapati satyenāgniḥ pradīpyate |
satyena māruto vāti sarvaṃ satye pratiṣṭhitam || 30 ||
[Analyze grammar]

satyena devānprīṇāti pitṝnvai brāhmaṇāṃstathā |
satyamāhuḥ paraṃ dharmaṃ tasmātsatyaṃ na laṅghayet || 31 ||
[Analyze grammar]

munayaḥ satyaniratā munayaḥ satyavikramāḥ |
munayaḥ satyaśapathāstasmātsatyaṃ viśiṣyate |
satyavantaḥ svargaloke modante bharatarṣabha || 32 ||
[Analyze grammar]

damaḥ satyaphalāvāptiruktā sarvātmanā mayā |
asaṃśayaṃ vinītātmā sarvaḥ svarge mahīyate || 33 ||
[Analyze grammar]

brahmacaryasya tu guṇāñśṛṇu me vasudhādhipa |
ā janmamaraṇādyastu brahmacārī bhavediha |
na tasya kiṃcidaprāpyamiti viddhi janādhipa || 34 ||
[Analyze grammar]

bahvyaḥ koṭyastvṛṣīṇāṃ tu brahmaloke vasantyuta |
satye ratānāṃ satataṃ dāntānāmūrdhvaretasām || 35 ||
[Analyze grammar]

brahmacaryaṃ dahedrājansarvapāpānyupāsitam |
brāhmaṇena viśeṣeṇa brāhmaṇo hyagnirucyate || 36 ||
[Analyze grammar]

pratyakṣaṃ ca tavāpyetadbrāhmaṇeṣu tapasviṣu |
bibheti hi yathā śakro brahmacāripradharṣitaḥ |
tadbrahmacaryasya phalamṛṣīṇāmiha dṛśyate || 37 ||
[Analyze grammar]

mātāpitroḥ pūjane yo dharmastamapi me śṛṇu |
śuśrūṣate yaḥ pitaraṃ na cāsūyetkathaṃcana |
mātaraṃ vānahaṃvādī gurumācāryameva ca || 38 ||
[Analyze grammar]

tasya rājanphalaṃ viddhi svarloke sthānamuttamam |
na ca paśyeta narakaṃ guruśuśrūṣurātmavān || 39 ||
[Analyze grammar]