Chapter 284

parāśara uvāca |
eṣa dharmavidhistāta gṛhasthasya prakīrtitaḥ |
tapovidhiṃ tu vakṣyāmi tanme nigadataḥ śṛṇu || 1 ||
[Analyze grammar]

prāyeṇa hi gṛhasthasya mamatvaṃ nāma jāyate |
saṅgāgataṃ naraśreṣṭha bhāvaistāmasarājasaiḥ || 2 ||
[Analyze grammar]

gṛhāṇyāśritya gāvaśca kṣetrāṇi ca dhanāni ca |
dārāḥ putrāśca bhṛtyāśca bhavantīha narasya vai || 3 ||
[Analyze grammar]

evaṃ tasya pravṛttasya nityamevānupaśyataḥ |
rāgadveṣau vivardhete hyanityatvamapaśyataḥ || 4 ||
[Analyze grammar]

rāgadveṣābhibhūtaṃ ca naraṃ dravyavaśānugam |
mohajātā ratirnāma samupaiti narādhipa || 5 ||
[Analyze grammar]

kṛtārtho bhogato bhūtvā sa vai ratiparāyaṇaḥ |
lābhaṃ grāmyasukhādanyaṃ ratito nānupaśyati || 6 ||
[Analyze grammar]

tato lobhābhibhūtātmā saṅgādvardhayate janam |
puṣṭyarthaṃ caiva tasyeha janasyārthaṃ cikīrṣati || 7 ||
[Analyze grammar]

sa jānannapi cākāryamarthārthaṃ sevate naraḥ |
bālasnehaparītātmā tatkṣayāccānutapyate || 8 ||
[Analyze grammar]

tato mānena saṃpanno rakṣannātmaparājayam |
karoti yena bhogī syāmiti tasmādvinaśyati || 9 ||
[Analyze grammar]

tapo hi buddhiyuktānāṃ śāśvataṃ brahmadarśanam |
anvicchatāṃ śubhaṃ karma narāṇāṃ tyajatāṃ sukham || 10 ||
[Analyze grammar]

snehāyatananāśācca dhananāśācca pārthiva |
ādhivyādhipratāpācca nirvedamupagacchati || 11 ||
[Analyze grammar]

nirvedādātmasaṃbodhaḥ saṃbodhācchāstradarśanam |
śāstrārthadarśanādrājaṃstapa evānupaśyati || 12 ||
[Analyze grammar]

durlabho hi manuṣyendra naraḥ pratyavamarśavān |
yo vai priyasukhe kṣīṇe tapaḥ kartuṃ vyavasyati || 13 ||
[Analyze grammar]

tapaḥ sarvagataṃ tāta hīnasyāpi vidhīyate |
jitendriyasya dāntasya svargamārgapradeśakam || 14 ||
[Analyze grammar]

prajāpatiḥ prajāḥ pūrvamasṛjattapasā vibhuḥ |
kvacitkvacidvrataparo vratānyāsthāya pārthiva || 15 ||
[Analyze grammar]

ādityā vasavo rudrāstathaivāgnyaśvimārutāḥ |
viśvedevāstathā sādhyāḥ pitaro'tha marudgaṇāḥ || 16 ||
[Analyze grammar]

yakṣarākṣasagandharvāḥ siddhāścānye divaukasaḥ |
saṃsiddhāstapasā tāta ye cānye svargavāsinaḥ || 17 ||
[Analyze grammar]

ye cādau brahmaṇā sṛṣṭā brāhmaṇāstapasā purā |
te bhāvayantaḥ pṛthivīṃ vicaranti divaṃ tathā || 18 ||
[Analyze grammar]

martyaloke ca rājāno ye cānye gṛhamedhinaḥ |
mahākuleṣu dṛśyante tatsarvaṃ tapasaḥ phalam || 19 ||
[Analyze grammar]

kauśikāni ca vastrāṇi śubhānyābharaṇāni ca |
vāhanāsanayānāni sarvaṃ tattapasaḥ phalam || 20 ||
[Analyze grammar]

manonukūlāḥ pramadā rūpavatyaḥ sahasraśaḥ |
vāsaḥ prāsādapṛṣṭhe ca tatsarvaṃ tapasaḥ phalam || 21 ||
[Analyze grammar]

śayanāni ca mukhyāni bhojyāni vividhāni ca |
abhipretāni sarvāṇi bhavanti kṛtakarmaṇām || 22 ||
[Analyze grammar]

nāprāpyaṃ tapasā kiṃcittrailokye'sminparaṃtapa |
upabhogaparityāgaḥ phalānyakṛtakarmaṇām || 23 ||
[Analyze grammar]

sukhito duḥkhito vāpi naro lobhaṃ parityajet |
avekṣya manasā śāstraṃ buddhyā ca nṛpasattama || 24 ||
[Analyze grammar]

asaṃtoṣo'sukhāyaiva lobhādindriyavibhramaḥ |
tato'sya naśyati prajñā vidyevābhyāsavarjitā || 25 ||
[Analyze grammar]

naṣṭaprajño yadā bhavati tadā nyāyaṃ na paśyati |
tasmātsukhakṣaye prāpte pumānugraṃ tapaścaret || 26 ||
[Analyze grammar]

yadiṣṭaṃ tatsukhaṃ prāhurdveṣyaṃ duḥkhamihocyate |
kṛtākṛtasya tapasaḥ phalaṃ paśyasva yādṛśam || 27 ||
[Analyze grammar]

nityaṃ bhadrāṇi paśyanti viṣayāṃścopabhuñjate |
prākāśyaṃ caiva gacchanti kṛtvā niṣkalmaṣaṃ tapaḥ || 28 ||
[Analyze grammar]

apriyāṇyavamānāṃśca duḥkhaṃ bahuvidhātmakam |
phalārthī satpathatyaktaḥ prāpnoti viṣayātmakam || 29 ||
[Analyze grammar]

dharme tapasi dāne ca vicikitsāsya jāyate |
sa kṛtvā pāpakānyeva nirayaṃ pratipadyate || 30 ||
[Analyze grammar]

sukhe tu vartamāno vai duḥkhe vāpi narottama |
svavṛttādyo na calati śāstracakṣuḥ sa mānavaḥ || 31 ||
[Analyze grammar]

iṣuprapātamātraṃ hi sparśayoge ratiḥ smṛtā |
rasane darśane ghrāṇe śravaṇe ca viśāṃ pate || 32 ||
[Analyze grammar]

tato'sya jāyate tīvrā vedanā tatkṣayātpunaḥ |
budhā yena praśaṃsanti mokṣaṃ sukhamanuttamam || 33 ||
[Analyze grammar]

tataḥ phalārthaṃ carati bhavanti jyāyaso guṇāḥ |
dharmavṛttyā ca satataṃ kāmārthābhyāṃ na hīyate || 34 ||
[Analyze grammar]

aprayatnāgatāḥ sevyā gṛhasthairviṣayāḥ sadā |
prayatnenopagamyaśca svadharma iti me matiḥ || 35 ||
[Analyze grammar]

mānināṃ kulajātānāṃ nityaṃ śāstrārthacakṣuṣām |
dharmakriyāviyuktānāmaśaktyā saṃvṛtātmanām || 36 ||
[Analyze grammar]

kriyamāṇaṃ yadā karma nāśaṃ gacchati mānuṣam |
teṣāṃ nānyadṛte loke tapasaḥ karma vidyate || 37 ||
[Analyze grammar]

sarvātmanā tu kurvīta gṛhasthaḥ karmaniścayam |
dākṣyeṇa havyakavyārthaṃ svadharmaṃ vicarennṛpa || 38 ||
[Analyze grammar]

yathā nadīnadāḥ sarve sāgare yānti saṃsthitim |
evamāśramiṇaḥ sarve gṛhasthe yānti saṃsthitim || 39 ||
[Analyze grammar]