Chapter 263

yudhiṣṭhira uvāca |
dharmamarthaṃ ca kāmaṃ ca vedāḥ śaṃsanti bhārata |
kasya lābho viśiṣṭo'tra tanme brūhi pitāmaha || 1 ||
[Analyze grammar]

bhīṣma uvāca |
atra te vartayiṣyāmi itihāsaṃ purātanam |
kuṇḍadhāreṇa yatprītyā bhaktāyopakṛtaṃ purā || 2 ||
[Analyze grammar]

adhano brāhmaṇaḥ kaścitkāmāddharmamavaikṣata |
yajñārthaṃ sa tato'rthārthī tapo'tapyata dāruṇam || 3 ||
[Analyze grammar]

sa niścayamatho kṛtvā pūjayāmāsa devatāḥ |
bhaktyā na caivādhyagacchaddhanaṃ saṃpūjya devatāḥ || 4 ||
[Analyze grammar]

tataścintāṃ punaḥ prāptaḥ katamaddaivataṃ nu tat |
yanme drutaṃ prasīdeta mānuṣairajaḍīkṛtam || 5 ||
[Analyze grammar]

atha saumyena vapuṣā devānucaramantike |
pratyapaśyajjaladharaṃ kuṇḍadhāramavasthitam || 6 ||
[Analyze grammar]

dṛṣṭvaiva taṃ mahātmānaṃ tasya bhaktirajāyata |
ayaṃ me dhāsyati śreyo vapuretaddhi tādṛśam || 7 ||
[Analyze grammar]

saṃnikṛṣṭaśca devasya na cānyairmānuṣairvṛtaḥ |
eṣa me dāsyati dhanaṃ prabhūtaṃ śīghrameva ca || 8 ||
[Analyze grammar]

tato dhūpaiśca gandhaiśca mālyairuccāvacairapi |
balibhirvividhaiścāpi pūjayāmāsa taṃ dvijaḥ || 9 ||
[Analyze grammar]

tataḥ svalpena kālena tuṣṭo jaladharastadā |
tasyopakāre niyatāmimāṃ vācamuvāca ha || 10 ||
[Analyze grammar]

brahmaghne ca surāpe ca core bhagnavrate tathā |
niṣkṛtirvihitā sadbhiḥ kṛtaghne nāsti niṣkṛtiḥ || 11 ||
[Analyze grammar]

āśāyāstanayo'dharmaḥ krodho'sūyāsutaḥ smṛtaḥ |
putro lobho nikṛtyāstu kṛtaghno nārhati prajām || 12 ||
[Analyze grammar]

tataḥ sa brāhmaṇaḥ svapne kuṇḍadhārasya tejasā |
apaśyatsarvabhūtāni kuśeṣu śayitastadā || 13 ||
[Analyze grammar]

śamena tapasā caiva bhaktyā ca nirupaskṛtaḥ |
śuddhātmā brāhmaṇo rātrau nidarśanamapaśyata || 14 ||
[Analyze grammar]

maṇibhadraṃ sa tatrasthaṃ devatānāṃ mahādyutim |
apaśyata mahātmānaṃ vyādiśantaṃ yudhiṣṭhira || 15 ||
[Analyze grammar]

tatra devāḥ prayacchanti rājyāni ca dhanāni ca |
śubhaiḥ karmabhirārabdhāḥ pracchidantyaśubheṣu ca || 16 ||
[Analyze grammar]

paśyatāmatha yakṣāṇāṃ kuṇḍadhāro mahādyutiḥ |
niṣpatya patito bhūmau devānāṃ bharatarṣabha || 17 ||
[Analyze grammar]

tatastu devavacanānmaṇibhadro mahāyaśāḥ |
uvāca patitaṃ bhūmau kuṇḍadhāra kimiṣyate || 18 ||
[Analyze grammar]

kuṇḍadhāra uvāca |
yadi prasannā devā me bhakto'yaṃ brāhmaṇo mama |
asyānugrahamicchāmi kṛtaṃ kiṃcitsukhodayam || 19 ||
[Analyze grammar]

bhīṣma uvāca |
tatastaṃ maṇibhadrastu punarvacanamabravīt |
devānāmeva vacanātkuṇḍadhāraṃ mahādyutim || 20 ||
[Analyze grammar]

uttiṣṭhottiṣṭha bhadraṃ te kṛtakāryaḥ sukhī bhava |
yāvaddhanaṃ prārthayate brāhmaṇo'yaṃ sakhā tava |
devānāṃ śāsanāttāvadasaṃkhyeyaṃ dadāmyaham || 21 ||
[Analyze grammar]

vicārya kuṇḍadhārastu mānuṣyaṃ calamadhruvam |
tapase matimādhatta brāhmaṇasya yaśasvinaḥ || 22 ||
[Analyze grammar]

kuṇḍadhāra uvāca |
nāhaṃ dhanāni yācāmi brāhmaṇāya dhanaprada |
anyamevāhamicchāmi bhaktāyānugrahaṃ kṛtam || 23 ||
[Analyze grammar]

pṛthivīṃ ratnapūrṇāṃ vā mahadvā dhanasaṃcayam |
bhaktāya nāhamicchāmi bhavedeṣa tu dhārmikaḥ || 24 ||
[Analyze grammar]

dharme'sya ramatāṃ buddhirdharmaṃ caivopajīvatu |
dharmapradhāno bhavatu mamaiṣo'nugraho mataḥ || 25 ||
[Analyze grammar]

maṇibhadra uvāca |
yadā dharmaphalaṃ rājyaṃ sukhāni vividhāni ca |
phalānyevāyamaśnātu kāyakleśavivarjitaḥ || 26 ||
[Analyze grammar]

bhīṣma uvāca |
tatastadeva bahuśaḥ kuṇḍadhāro mahāyaśāḥ |
abhyāsamakaroddharme tatastuṣṭāsya devatāḥ || 27 ||
[Analyze grammar]

maṇibhadra uvāca |
prītāste devatāḥ sarvā dvijasyāsya tathaiva ca |
bhaviṣyatyeṣa dharmātmā dharme cādhāsyate matiḥ || 28 ||
[Analyze grammar]

bhīṣma uvāca |
tataḥ prīto jaladharaḥ kṛtakāryo yudhiṣṭhira |
īpsitaṃ manaso labdhvā varamanyaiḥ sudurlabham || 29 ||
[Analyze grammar]

tato'paśyata cīrāṇi sūkṣmāṇi dvijasattamaḥ |
pārśvato'bhyāgato nyastānyatha nirvedamāgataḥ || 30 ||
[Analyze grammar]

brāhmaṇa uvāca |
ayaṃ na sukṛtaṃ vetti ko nvanyo vetsyate kṛtam |
gacchāmi vanamevāhaṃ varaṃ dharmeṇa jīvitum || 31 ||
[Analyze grammar]

bhīṣma uvāca |
nirvedāddevatānāṃ ca prasādātsa dvijottamaḥ |
vanaṃ praviśya sumahattapa ārabdhavāṃstadā || 32 ||
[Analyze grammar]

devatātithiśeṣeṇa phalamūlāśano dvijaḥ |
dharme cāpi mahārāja ratirasyābhyajāyata || 33 ||
[Analyze grammar]

tyaktvā mūlaphalaṃ sarvaṃ parṇāhāro'bhavaddvijaḥ |
parṇaṃ tyaktvā jalāhārastadāsīddvijasattamaḥ || 34 ||
[Analyze grammar]

vāyubhakṣastataḥ paścādbahūnvarṣagaṇānabhūt |
na cāsya kṣīyate prāṇastadadbhutamivābhavat || 35 ||
[Analyze grammar]

dharme ca śraddadhānasya tapasyugre ca vartataḥ |
kālena mahatā tasya divyā dṛṣṭirajāyata || 36 ||
[Analyze grammar]

tasya buddhiḥ prādurāsīdyadi dadyāṃ mahaddhanam |
tuṣṭaḥ kasmaicidevāhaṃ na mithyā vāgbhavenmama || 37 ||
[Analyze grammar]

tataḥ prahṛṣṭavadano bhūya ārabdhavāṃstapaḥ |
bhūyaścācintayatsiddho yatparaṃ so'bhyapadyata || 38 ||
[Analyze grammar]

yadi dadyāmahaṃ rājyaṃ tuṣṭo vai yasya kasyacit |
sa bhavedacirādrājā na mithyā vāgbhavenmama || 39 ||
[Analyze grammar]

tasya sākṣātkuṇḍadhāro darśayāmāsa bhārata |
brāhmaṇasya tapoyogātsauhṛdenābhicoditaḥ || 40 ||
[Analyze grammar]

samāgamya sa tenātha pūjāṃ cakre yathāvidhi |
brāhmaṇaḥ kuṇḍadhārasya vismitaścābhavannṛpa || 41 ||
[Analyze grammar]

tato'bravītkuṇḍadhāro divyaṃ te cakṣuruttamam |
paśya rājñāṃ gatiṃ vipra lokāṃścāvekṣa cakṣuṣā || 42 ||
[Analyze grammar]

tato rājñāṃ sahasrāṇi magnāni niraye tadā |
dūrādapaśyadvipraḥ sa divyayuktena cakṣuṣā || 43 ||
[Analyze grammar]

kuṇḍadhāra uvāca |
māṃ pūjayitvā bhāvena yadi tvaṃ duḥkhamāpnuyāḥ |
kṛtaṃ mayā bhavetkiṃ te kaśca te'nugraho bhavet || 44 ||
[Analyze grammar]

paśya paśya ca bhūyastvaṃ kāmānicchetkathaṃ naraḥ |
svargadvāraṃ hi saṃruddhaṃ mānuṣeṣu viśeṣataḥ || 45 ||
[Analyze grammar]

bhīṣma uvāca |
tato'paśyatsa kāmaṃ ca krodhaṃ lobhaṃ bhayaṃ madam |
nidrāṃ tandrīṃ tathālasyamāvṛtya puruṣānsthitān || 46 ||
[Analyze grammar]

kuṇḍadhāra uvāca |
etairlokāḥ susaṃruddhā devānāṃ mānuṣādbhayam |
tathaiva devavacanādvighnaṃ kurvanti sarvaśaḥ || 47 ||
[Analyze grammar]

na devairananujñātaḥ kaścidbhavati dhārmikaḥ |
eṣa śakto'si tapasā rājyaṃ dātuṃ dhanāni ca || 48 ||
[Analyze grammar]

bhīṣma uvāca |
tataḥ papāta śirasā brāhmaṇastoyadhāriṇe |
uvāca cainaṃ dharmātmā mahānme'nugrahaḥ kṛtaḥ || 49 ||
[Analyze grammar]

kāmalobhānubandhena purā te yadasūyitam |
mayā snehamavijñāya tatra me kṣantumarhasi || 50 ||
[Analyze grammar]

kṣāntameva mayetyuktvā kuṇḍadhāro dvijarṣabham |
saṃpariṣvajya bāhubhyāṃ tatraivāntaradhīyata || 51 ||
[Analyze grammar]

tataḥ sarvānimāṃllokānbrāhmaṇo'nucacāra ha |
kuṇḍadhāraprasādena tapasā yojitaḥ purā || 52 ||
[Analyze grammar]

vihāyasā ca gamanaṃ tathā saṃkalpitārthatā |
dharmācchaktyā tathā yogādyā caiva paramā gatiḥ || 53 ||
[Analyze grammar]

devatā brāhmaṇāḥ santo yakṣā mānuṣacāraṇāḥ |
dhārmikānpūjayantīha na dhanāḍhyānna kāminaḥ || 54 ||
[Analyze grammar]

suprasannā hi te devā yatte dharme ratā matiḥ |
dhane sukhakalā kāciddharme tu paramaṃ sukham || 55 ||
[Analyze grammar]