Chapter 26

vaiśaṃpāyana uvāca |
dvaipāyanavacaḥ śrutvā kupite ca dhanaṃjaye |
vyāsamāmantrya kaunteyaḥ pratyuvāca yudhiṣṭhiraḥ || 1 ||
[Analyze grammar]

na pārthivamidaṃ rājyaṃ na ca bhogāḥ pṛthagvidhāḥ |
prīṇayanti mano me'dya śoko māṃ nardayatyayam || 2 ||
[Analyze grammar]

śrutvā ca vīrahīnānāmaputrāṇāṃ ca yoṣitām |
paridevayamānānāṃ śāntiṃ nopalabhe mune || 3 ||
[Analyze grammar]

ityuktaḥ pratyuvācedaṃ vyāso yogavidāṃ varaḥ |
yudhiṣṭhiraṃ mahāprājñaṃ dharmajño vedapāragaḥ || 4 ||
[Analyze grammar]

na karmaṇā labhyate cintayā vā nāpyasya dātā puruṣasya kaścit |
paryāyayogādvihitaṃ vidhātrā kālena sarvaṃ labhate manuṣyaḥ || 5 ||
[Analyze grammar]

na buddhiśāstrādhyayanena śakyaṃ prāptuṃ viśeṣairmanujairakāle |
mūrkho'pi prāpnoti kadācidarthānkālo hi kāryaṃ prati nirviśeṣaḥ || 6 ||
[Analyze grammar]

nābhūtikāle ca phalaṃ dadāti śilpaṃ na mantrāśca tathauṣadhāni |
tānyeva kālena samāhitāni sidhyanti cedhyanti ca bhūtikāle || 7 ||
[Analyze grammar]

kālena śīghrāḥ pravivānti vātāḥ kālena vṛṣṭirjaladānupaiti |
kālena padmotpalavajjalaṃ ca kālena puṣyanti nagā vaneṣu || 8 ||
[Analyze grammar]

kālena kṛṣṇāśca sitāśca rātryaḥ kālena candraḥ paripūrṇabimbaḥ |
nākālataḥ puṣpaphalaṃ nagānāṃ nākālavegāḥ sarito vahanti || 9 ||
[Analyze grammar]

nākālamattāḥ khagapannagāśca mṛgadvipāḥ śailamahāgrahāśca |
nākālataḥ strīṣu bhavanti garbhā nāyāntyakāle śiśiroṣṇavarṣāḥ || 10 ||
[Analyze grammar]

nākālato mriyate jāyate vā nākālato vyāharate ca bālaḥ |
nākālato yauvanamabhyupaiti nākālato rohati bījamuptam || 11 ||
[Analyze grammar]

nākālato bhānurupaiti yogaṃ nākālato'staṃ girimabhyupaiti |
nākālato vardhate hīyate ca candraḥ samudraśca mahormimālī || 12 ||
[Analyze grammar]

atrāpyudāharantīmamitihāsaṃ purātanam |
gītaṃ rājñā senajitā duḥkhārtena yudhiṣṭhira || 13 ||
[Analyze grammar]

sarvānevaiṣa paryāyo martyānspṛśati dustaraḥ |
kālena paripakvā hi mriyante sarvamānavāḥ || 14 ||
[Analyze grammar]

ghnanti cānyānnarā rājaṃstānapyanye narāstathā |
saṃjñaiṣā laukikī rājanna hinasti na hanyate || 15 ||
[Analyze grammar]

hantīti manyate kaścinna hantītyapi cāpare |
svabhāvatastu niyatau bhūtānāṃ prabhavāpyayau || 16 ||
[Analyze grammar]

naṣṭe dhane vā dāre vā putre pitari vā mṛte |
aho kaṣṭamiti dhyāyañśokasyāpacitiṃ caret || 17 ||
[Analyze grammar]

sa kiṃ śocasi mūḍhaḥ sañśocyaḥ kimanuśocasi |
paśya duḥkheṣu duḥkhāni bhayeṣu ca bhayānyapi || 18 ||
[Analyze grammar]

ātmāpi cāyaṃ na mama sarvāpi pṛthivī mama |
yathā mama tathānyeṣāmiti paśyanna muhyati || 19 ||
[Analyze grammar]

śokasthānasahasrāṇi harṣasthānaśatāni ca |
divase divase mūḍhamāviśanti na paṇḍitam || 20 ||
[Analyze grammar]

evametāni kālena priyadveṣyāṇi bhāgaśaḥ |
jīveṣu parivartante duḥkhāni ca sukhāni ca || 21 ||
[Analyze grammar]

duḥkhamevāsti na sukhaṃ tasmāttadupalabhyate |
tṛṣṇārtiprabhavaṃ duḥkhaṃ duḥkhārtiprabhavaṃ sukham || 22 ||
[Analyze grammar]

sukhasyānantaraṃ duḥkhaṃ duḥkhasyānantaraṃ sukham |
na nityaṃ labhate duḥkhaṃ na nityaṃ labhate sukham || 23 ||
[Analyze grammar]

sukhamante hi duḥkhānāṃ duḥkhamante sukhasya ca |
tasmādetaddvayaṃ jahyādya icchecchāśvataṃ sukham || 24 ||
[Analyze grammar]

yannimittaṃ bhavecchokastāpo vā duḥkhamūrchitaḥ |
āyāso vāpi yanmūlastadekāṅgamapi tyajet || 25 ||
[Analyze grammar]

sukhaṃ vā yadi vā duḥkhaṃ priyaṃ vā yadi vāpriyam |
prāptaṃ prāptamupāsīta hṛdayenāparājitaḥ || 26 ||
[Analyze grammar]

īṣadapyaṅga dārāṇāṃ putrāṇāṃ vā carāpriyam |
tato jñāsyasi kaḥ kasya kena vā kathameva vā || 27 ||
[Analyze grammar]

ye ca mūḍhatamā loke ye ca buddheḥ paraṃ gatāḥ |
ta eva sukhamedhante madhyaḥ kleśena yujyate || 28 ||
[Analyze grammar]

ityabravīnmahāprājño yudhiṣṭhira sa senajit |
parāvarajño lokasya dharmavitsukhaduḥkhavit || 29 ||
[Analyze grammar]

sukhī parasya yo duḥkhe na jātu sa sukhī bhavet |
duḥkhānāṃ hi kṣayo nāsti jāyate hyaparātparam || 30 ||
[Analyze grammar]

sukhaṃ ca duḥkhaṃ ca bhavābhavau ca lābhālābhau maraṇaṃ jīvitaṃ ca |
paryāyaśaḥ sarvamiha spṛśanti tasmāddhīro naiva hṛṣyenna kupyet || 31 ||
[Analyze grammar]

dīkṣāṃ yajñe pālanaṃ yuddhamāhuryogaṃ rāṣṭre daṇḍanītyā ca samyak |
vittatyāgaṃ dakṣiṇānāṃ ca yajñe samyagjñānaṃ pāvanānīti vidyāt || 32 ||
[Analyze grammar]

rakṣanrāṣṭraṃ buddhipūrvaṃ nayena saṃtyaktātmā yajñaśīlo mahātmā |
sarvāṃllokāndharmamūrtyā caraṃścāpyūrdhvaṃ dehānmodate devaloke || 33 ||
[Analyze grammar]

jitvā saṃgrāmānpālayitvā ca rāṣṭraṃ somaṃ pītvā vardhayitvā prajāśca |
yuktyā daṇḍaṃ dhārayitvā prajānāṃ yuddhe kṣīṇo modate devaloke || 34 ||
[Analyze grammar]

samyagvedānprāpya śāstrāṇyadhītya samyagrāṣṭraṃ pālayitvā ca rājā |
cāturvarṇyaṃ sthāpayitvā svadharme pūtātmā vai modate devaloke || 35 ||
[Analyze grammar]

yasya vṛttaṃ namasyanti svargasthasyāpi mānavāḥ |
paurajānapadāmātyāḥ sa rājā rājasattamaḥ || 36 ||
[Analyze grammar]