Chapter 23

gāndhāryuvāca |
eṣa śalyo hataḥ śete sākṣānnakulamātulaḥ |
dharmajñena satā tāta dharmarājena saṃyuge || 1 ||
[Analyze grammar]

yastvayā spardhate nityaṃ sarvatra puruṣarṣabha |
sa eṣa nihataḥ śete madrarājo mahārathaḥ || 2 ||
[Analyze grammar]

yena saṃgṛhṇatā tāta rathamādhiratheryudhi |
jayārthaṃ pāṇḍuputrāṇāṃ tathā tejovadhaḥ kṛtaḥ || 3 ||
[Analyze grammar]

aho dhikpaśya śalyasya pūrṇacandrasudarśanam |
mukhaṃ padmapalāśākṣaṃ vaḍairādaṣṭamavraṇam || 4 ||
[Analyze grammar]

eṣā cāmīkarābhasya taptakāñcanasaprabhā |
āsyādviniḥsṛtā jihvā bhakṣyate kṛṣṇa pakṣibhiḥ || 5 ||
[Analyze grammar]

yudhiṣṭhireṇa nihataṃ śalyaṃ samitiśobhanam |
rudantyaḥ paryupāsante madrarājakulastriyaḥ || 6 ||
[Analyze grammar]

etāḥ susūkṣmavasanā madrarājaṃ nararṣabham |
krośantyabhisamāsādya kṣatriyāḥ kṣatriyarṣabham || 7 ||
[Analyze grammar]

śalyaṃ nipatitaṃ nāryaḥ parivāryābhitaḥ sthitāḥ |
vāśitā gṛṣṭayaḥ paṅke parimagnamivarṣabham || 8 ||
[Analyze grammar]

śalyaṃ śaraṇadaṃ śūraṃ paśyainaṃ rathasattamam |
śayānaṃ vīraśayane śarairviśakalīkṛtam || 9 ||
[Analyze grammar]

eṣa śailālayo rājā bhagadattaḥ pratāpavān |
gajāṅkuśadharaḥ śreṣṭhaḥ śete bhuvi nipātitaḥ || 10 ||
[Analyze grammar]

yasya rukmamayī mālā śirasyeṣā virājate |
śvāpadairbhakṣyamāṇasya śobhayantīva mūrdhajān || 11 ||
[Analyze grammar]

etena kila pārthasya yuddhamāsītsudāruṇam |
lomaharṣaṇamatyugraṃ śakrasya balinā yathā || 12 ||
[Analyze grammar]

yodhayitvā mahābāhureṣa pārthaṃ dhanaṃjayam |
saṃśayaṃ gamayitvā ca kuntīputreṇa pātitaḥ || 13 ||
[Analyze grammar]

yasya nāsti samo loke śaurye vīrye ca kaścana |
sa eṣa nihataḥ śete bhīṣmo bhīṣmakṛdāhave || 14 ||
[Analyze grammar]

paśya śāṃtanavaṃ kṛṣṇa śayānaṃ sūryavarcasam |
yugānta iva kālena pātitaṃ sūryamambarāt || 15 ||
[Analyze grammar]

eṣa taptvā raṇe śatrūñśastratāpena vīryavān |
narasūryo'stamabhyeti sūryo'stamiva keśava || 16 ||
[Analyze grammar]

śaratalpagataṃ vīraṃ dharme devāpinā samam |
śayānaṃ vīraśayane paśya śūraniṣevite || 17 ||
[Analyze grammar]

karṇinālīkanārācairāstīrya śayanottamam |
āviśya śete bhagavānskandaḥ śaravaṇaṃ yathā || 18 ||
[Analyze grammar]

atūlapūrṇaṃ gāṅgeyastribhirbāṇaiḥ samanvitam |
upadhāyopadhānāgryaṃ dattaṃ gāṇḍīvadhanvanā || 19 ||
[Analyze grammar]

pālayānaḥ pituḥ śāstramūrdhvaretā mahāyaśāḥ |
eṣa śāṃtanavaḥ śete mādhavāpratimo yudhi || 20 ||
[Analyze grammar]

dharmātmā tāta dharmajñaḥ pāraṃparyeṇa nirṇaye |
amartya iva martyaḥ sanneṣa prāṇānadhārayat || 21 ||
[Analyze grammar]

nāsti yuddhe kṛtī kaścinna vidvānna parākramī |
yatra śāṃtanavo bhīṣmaḥ śete'dya nihataḥ paraiḥ || 22 ||
[Analyze grammar]

svayametena śūreṇa pṛcchyamānena pāṇḍavaiḥ |
dharmajñenāhave mṛtyurākhyātaḥ satyavādinā || 23 ||
[Analyze grammar]

pranaṣṭaḥ kuruvaṃśaśca punaryena samuddhṛtaḥ |
sa gataḥ kurubhiḥ sārdhaṃ mahābuddhiḥ parābhavam || 24 ||
[Analyze grammar]

dharmeṣu kuravaḥ kaṃ nu pariprakṣyanti mādhava |
gate devavrate svargaṃ devakalpe nararṣabhe || 25 ||
[Analyze grammar]

arjunasya vinetāramācāryaṃ sātyakestathā |
taṃ paśya patitaṃ droṇaṃ kurūṇāṃ gurusattamam || 26 ||
[Analyze grammar]

astraṃ caturvidhaṃ veda yathaiva tridaśeśvaraḥ |
bhārgavo vā mahāvīryastathā droṇo'pi mādhava || 27 ||
[Analyze grammar]

yasya prasādādbībhatsuḥ pāṇḍavaḥ karma duṣkaram |
cakāra sa hataḥ śete nainamastrāṇyapālayan || 28 ||
[Analyze grammar]

yaṃ purodhāya kurava āhvayanti sma pāṇḍavān |
so'yaṃ śastrabhṛtāṃ śreṣṭho droṇaḥ śastraiḥ pṛthakkṛtaḥ || 29 ||
[Analyze grammar]

yasya nirdahataḥ senāṃ gatiragnerivābhavat |
sa bhūmau nihataḥ śete śāntārciriva pāvakaḥ || 30 ||
[Analyze grammar]

dhanurmuṣṭiraśīrṇaśca hastāvāpaśca mādhava |
droṇasya nihatasyāpi dṛśyate jīvato yathā || 31 ||
[Analyze grammar]

vedā yasmācca catvāraḥ sarvāstrāṇi ca keśava |
anapetāni vai śūrādyathaivādau prajāpateḥ || 32 ||
[Analyze grammar]

vandanārhāvimau tasya bandibhirvanditau śubhau |
gomāyavo vikarṣanti pādau śiṣyaśatārcitau || 33 ||
[Analyze grammar]

droṇaṃ drupadaputreṇa nihataṃ madhusūdana |
kṛpī kṛpaṇamanvāste duḥkhopahatacetanā || 34 ||
[Analyze grammar]

tāṃ paśya rudatīmārtāṃ muktakeśīmadhomukhīm |
hataṃ patimupāsantīṃ droṇaṃ śastrabhṛtāṃ varam || 35 ||
[Analyze grammar]

bāṇairbhinnatanutrāṇaṃ dhṛṣṭadyumnena keśava |
upāste vai mṛdhe droṇaṃ jaṭilā brahmacāriṇī || 36 ||
[Analyze grammar]

pretakṛtye ca yatate kṛpī kṛpaṇamāturā |
hatasya samare bhartuḥ sukumārī yaśasvinī || 37 ||
[Analyze grammar]

agnīnāhṛtya vidhivaccitāṃ prajvālya sarvaśaḥ |
droṇamādhāya gāyanti trīṇi sāmāni sāmagāḥ || 38 ||
[Analyze grammar]

kiranti ca citāmete jaṭilā brahmacāriṇaḥ |
dhanurbhiḥ śaktibhiścaiva rathanīḍaiśca mādhava || 39 ||
[Analyze grammar]

śastraiśca vividhairanyairdhakṣyante bhūritejasam |
ta ete droṇamādhāya śaṃsanti ca rudanti ca || 40 ||
[Analyze grammar]

sāmabhistribhirantaḥsthairanuśaṃsanti cāpare |
agnāvagnimivādhāya droṇaṃ hutvā hutāśane || 41 ||
[Analyze grammar]

gacchantyabhimukhā gaṅgāṃ droṇaśiṣyā dvijātayaḥ |
apasavyāṃ citiṃ kṛtvā puraskṛtya kṛpīṃ tadā || 42 ||
[Analyze grammar]