Chapter 35

vaiśaṃpāyana uvāca |
tasmānnadīgataṃ cāpi udapānaṃ yaśasvinaḥ |
tritasya ca mahārāja jagāmātha halāyudhaḥ || 1 ||
[Analyze grammar]

tatra dattvā bahu dravyaṃ pūjayitvā tathā dvijān |
upaspṛśya ca tatraiva prahṛṣṭo musalāyudhaḥ || 2 ||
[Analyze grammar]

tatra dharmaparo hyāsīttritaḥ sa sumahātapāḥ |
kūpe ca vasatā tena somaḥ pīto mahātmanā || 3 ||
[Analyze grammar]

tatra cainaṃ samutsṛjya bhrātarau jagmaturgṛhān |
tatastau vai śaśāpātha trito brāhmaṇasattamaḥ || 4 ||
[Analyze grammar]

janamejaya uvāca |
udapānaṃ kathaṃ brahmankathaṃ ca sumahātapāḥ |
patitaḥ kiṃ ca saṃtyakto bhrātṛbhyāṃ dvijasattamaḥ || 5 ||
[Analyze grammar]

kūpe kathaṃ ca hitvainaṃ bhrātarau jagmaturgṛhān |
etadācakṣva me brahmanyadi śrāvyaṃ hi manyase || 6 ||
[Analyze grammar]

vaiśaṃpāyana uvāca |
āsanpūrvayuge rājanmunayo bhrātarastrayaḥ |
ekataśca dvitaścaiva tritaścādityasaṃnibhāḥ || 7 ||
[Analyze grammar]

sarve prajāpatisamāḥ prajāvantastathaiva ca |
brahmalokajitaḥ sarve tapasā brahmavādinaḥ || 8 ||
[Analyze grammar]

teṣāṃ tu tapasā prīto niyamena damena ca |
abhavadgautamo nityaṃ pitā dharmarataḥ sadā || 9 ||
[Analyze grammar]

sa tu dīrgheṇa kālena teṣāṃ prītimavāpya ca |
jagāma bhagavānsthānamanurūpamivātmanaḥ || 10 ||
[Analyze grammar]

rājānastasya ye pūrve yājyā hyāsanmahātmanaḥ |
te sarve svargate tasmiṃstasya putrānapūjayan || 11 ||
[Analyze grammar]

teṣāṃ tu karmaṇā rājaṃstathaivādhyayanena ca |
tritaḥ sa śreṣṭhatāṃ prāpa yathaivāsya pitā tathā || 12 ||
[Analyze grammar]

taṃ sma sarve mahābhāgā munayaḥ puṇyalakṣaṇāḥ |
apūjayanmahābhāgaṃ tathā vidvattayaiva tu || 13 ||
[Analyze grammar]

kadāciddhi tato rājanbhrātarāvekatadvitau |
yajñārthaṃ cakratuścittaṃ dhanārthaṃ ca viśeṣataḥ || 14 ||
[Analyze grammar]

tayościntā samabhavattritaṃ gṛhya paraṃtapa |
yājyānsarvānupādāya pratigṛhya paśūṃstataḥ || 15 ||
[Analyze grammar]

somaṃ pāsyāmahe hṛṣṭāḥ prāpya yajñaṃ mahāphalam |
cakruścaiva mahārāja bhrātarastraya eva ha || 16 ||
[Analyze grammar]

tathā tu te parikramya yājyānsarvānpaśūnprati |
yājayitvā tato yājyāṃllabdhvā ca subahūnpaśūn || 17 ||
[Analyze grammar]

yājyena karmaṇā tena pratigṛhya vidhānataḥ |
prācīṃ diśaṃ mahātmāna ājagmuste maharṣayaḥ || 18 ||
[Analyze grammar]

tritasteṣāṃ mahārāja purastādyāti hṛṣṭavat |
ekataśca dvitaścaiva pṛṣṭhataḥ kālayanpaśūn || 19 ||
[Analyze grammar]

tayościntā samabhavaddṛṣṭvā paśugaṇaṃ mahat |
kathaṃ na syurimā gāva āvābhyāṃ vai vinā tritam || 20 ||
[Analyze grammar]

tāvanyonyaṃ samābhāṣya ekataśca dvitaśca ha |
yadūcaturmithaḥ pāpau tannibodha janeśvara || 21 ||
[Analyze grammar]

trito yajñeṣu kuśalastrito vedeṣu niṣṭhitaḥ |
anyāstrito bahutarā gāvaḥ samupalapsyate || 22 ||
[Analyze grammar]

tadāvāṃ sahitau bhūtvā gāḥ prakālya vrajāvahe |
trito'pi gacchatāṃ kāmamāvābhyāṃ vai vinākṛtaḥ || 23 ||
[Analyze grammar]

teṣāmāgacchatāṃ rātrau pathisthāne vṛko'bhavat |
tathā kūpo'vidūre'bhūtsarasvatyāstaṭe mahān || 24 ||
[Analyze grammar]

atha trito vṛkaṃ dṛṣṭvā pathi tiṣṭhantamagrataḥ |
tadbhayādapasarpanvai tasminkūpe papāta ha |
agādhe sumahāghore sarvabhūtabhayaṃkare || 25 ||
[Analyze grammar]

tritastato mahābhāgaḥ kūpastho munisattamaḥ |
ārtanādaṃ tataścakre tau tu śuśruvaturmunī || 26 ||
[Analyze grammar]

taṃ jñātvā patitaṃ kūpe bhrātarāvekatadvitau |
vṛkatrāsācca lobhācca samutsṛjya prajagmatuḥ || 27 ||
[Analyze grammar]

bhrātṛbhyāṃ paśulubdhābhyāmutsṛṣṭaḥ sa mahātapāḥ |
udapāne mahārāja nirjale pāṃsusaṃvṛte || 28 ||
[Analyze grammar]

trita ātmānamālakṣya kūpe vīruttṛṇāvṛte |
nimagnaṃ bharataśreṣṭha pāpakṛnnarake yathā || 29 ||
[Analyze grammar]

buddhyā hyagaṇayatprājño mṛtyorbhīto hyasomapaḥ |
somaḥ kathaṃ nu pātavya ihasthena mayā bhavet || 30 ||
[Analyze grammar]

sa evamanusaṃcintya tasminkūpe mahātapāḥ |
dadarśa vīrudhaṃ tatra lambamānāṃ yadṛcchayā || 31 ||
[Analyze grammar]

pāṃsugraste tataḥ kūpe vicintya salilaṃ muniḥ |
agnīnsaṃkalpayāmāsa hotre cātmānameva ca || 32 ||
[Analyze grammar]

tatastāṃ vīrudhaṃ somaṃ saṃkalpya sumahātapāḥ |
ṛco yajūṃṣi sāmāni manasā cintayanmuniḥ |
grāvāṇaḥ śarkarāḥ kṛtvā pracakre'bhiṣavaṃ nṛpa || 33 ||
[Analyze grammar]

ājyaṃ ca salilaṃ cakre bhāgāṃśca tridivaukasām |
somasyābhiṣavaṃ kṛtvā cakāra tumulaṃ dhvanim || 34 ||
[Analyze grammar]

sa cāviśaddivaṃ rājansvaraḥ śaikṣastritasya vai |
samavāpa ca taṃ yajñaṃ yathoktaṃ brahmavādibhiḥ || 35 ||
[Analyze grammar]

vartamāne tathā yajñe tritasya sumahātmanaḥ |
āvignaṃ tridivaṃ sarvaṃ kāraṇaṃ ca na budhyate || 36 ||
[Analyze grammar]

tataḥ sutumulaṃ śabdaṃ śuśrāvātha bṛhaspatiḥ |
śrutvā caivābravīddevānsarvāndevapurohitaḥ || 37 ||
[Analyze grammar]

tritasya vartate yajñastatra gacchāmahe surāḥ |
sa hi kruddhaḥ sṛjedanyāndevānapi mahātapāḥ || 38 ||
[Analyze grammar]

tacchrutvā vacanaṃ tasya sahitāḥ sarvadevatāḥ |
prayayustatra yatrāsau tritayajñaḥ pravartate || 39 ||
[Analyze grammar]

te tatra gatvā vibudhāstaṃ kūpaṃ yatra sa tritaḥ |
dadṛśustaṃ mahātmānaṃ dīkṣitaṃ yajñakarmasu || 40 ||
[Analyze grammar]

dṛṣṭvā cainaṃ mahātmānaṃ śriyā paramayā yutam |
ūcuścātha mahābhāgaṃ prāptā bhāgārthino vayam || 41 ||
[Analyze grammar]

athābravīdṛṣirdevānpaśyadhvaṃ māṃ divaukasaḥ |
asminpratibhaye kūpe nimagnaṃ naṣṭacetasam || 42 ||
[Analyze grammar]

tatastrito mahārāja bhāgāṃsteṣāṃ yathāvidhi |
mantrayuktānsamadadātte ca prītāstadābhavan || 43 ||
[Analyze grammar]

tato yathāvidhi prāptānbhāgānprāpya divaukasaḥ |
prītātmāno dadustasmai varānyānmanasecchati || 44 ||
[Analyze grammar]

sa tu vavre varaṃ devāṃstrātumarhatha māmitaḥ |
yaścehopaspṛśetkūpe sa somapagatiṃ labhet || 45 ||
[Analyze grammar]

tatra cormimatī rājannutpapāta sarasvatī |
tayotkṣiptastritastasthau pūjayaṃstridivaukasaḥ || 46 ||
[Analyze grammar]

tatheti coktvā vibudhā jagmū rājanyathāgatam |
tritaścāpyagamatprītaḥ svameva nilayaṃ tadā || 47 ||
[Analyze grammar]

kruddhaḥ sa tu samāsādya tāvṛṣī bhrātarau tadā |
uvāca paruṣaṃ vākyaṃ śaśāpa ca mahātapāḥ || 48 ||
[Analyze grammar]

paśulubdhau yuvāṃ yasmānmāmutsṛjya pradhāvitau |
tasmādrūpeṇa teṣāṃ vai daṃṣṭriṇāmabhitaścarau || 49 ||
[Analyze grammar]

bhavitārau mayā śaptau pāpenānena karmaṇā |
prasavaścaiva yuvayorgolāṅgūlarkṣavānarāḥ || 50 ||
[Analyze grammar]

ityukte tu tadā tena kṣaṇādeva viśāṃ pate |
tathābhūtāvadṛśyetāṃ vacanātsatyavādinaḥ || 51 ||
[Analyze grammar]

tatrāpyamitavikrāntaḥ spṛṣṭvā toyaṃ halāyudhaḥ |
dattvā ca vividhāndāyānpūjayitvā ca vai dvijān || 52 ||
[Analyze grammar]

udapānaṃ ca taṃ dṛṣṭvā praśasya ca punaḥ punaḥ |
nadīgatamadīnātmā prāpto vinaśanaṃ tadā || 53 ||
[Analyze grammar]