Chapter 36

vaiśaṃpāyana uvāca |
tato vinaśanaṃ rājannājagāma halāyudhaḥ |
śūdrābhīrānprati dveṣādyatra naṣṭā sarasvatī || 1 ||
[Analyze grammar]

yasmātsā bharataśreṣṭha dveṣānnaṣṭā sarasvatī |
tasmāttadṛṣayo nityaṃ prāhurvinaśaneti ha || 2 ||
[Analyze grammar]

taccāpyupaspṛśya balaḥ sarasvatyāṃ mahābalaḥ |
subhūmikaṃ tato'gacchatsarasvatyāstaṭe vare || 3 ||
[Analyze grammar]

tatra cāpsarasaḥ śubhrā nityakālamatandritāḥ |
krīḍābhirvimalābhiśca krīḍanti vimalānanāḥ || 4 ||
[Analyze grammar]

tatra devāḥ sagandharvā māsi māsi janeśvara |
abhigacchanti tattīrthaṃ puṇyaṃ brāhmaṇasevitam || 5 ||
[Analyze grammar]

tatrādṛśyanta gandharvāstathaivāpsarasāṃ gaṇāḥ |
sametya sahitā rājanyathāprāptaṃ yathāsukham || 6 ||
[Analyze grammar]

tatra modanti devāśca pitaraśca savīrudhaḥ |
puṇyaiḥ puṣpaiḥ sadā divyaiḥ kīryamāṇāḥ punaḥ punaḥ || 7 ||
[Analyze grammar]

ākrīḍabhūmiḥ sā rājaṃstāsāmapsarasāṃ śubhā |
subhūmiketi vikhyātā sarasvatyāstaṭe vare || 8 ||
[Analyze grammar]

tatra snātvā ca dattvā ca vasu vipreṣu mādhavaḥ |
śrutvā gītaṃ ca taddivyaṃ vāditrāṇāṃ ca niḥsvanam || 9 ||
[Analyze grammar]

chāyāśca vipulā dṛṣṭvā devagandharvarakṣasām |
gandharvāṇāṃ tatastīrthamāgacchadrohiṇīsutaḥ || 10 ||
[Analyze grammar]

viśvāvasumukhāstatra gandharvāstapasānvitāḥ |
nṛttavāditragītaṃ ca kurvanti sumanoramam || 11 ||
[Analyze grammar]

tatra dattvā haladharo viprebhyo vividhaṃ vasu |
ajāvikaṃ gokharoṣṭraṃ suvarṇaṃ rajataṃ tathā || 12 ||
[Analyze grammar]

bhojayitvā dvijānkāmaiḥ saṃtarpya ca mahādhanaiḥ |
prayayau sahito vipraiḥ stūyamānaśca mādhavaḥ || 13 ||
[Analyze grammar]

tasmādgandharvatīrthācca mahābāhurariṃdamaḥ |
gargasroto mahātīrthamājagāmaikakuṇḍalī || 14 ||
[Analyze grammar]

yatra gargeṇa vṛddhena tapasā bhāvitātmanā |
kālajñānagatiścaiva jyotiṣāṃ ca vyatikramaḥ || 15 ||
[Analyze grammar]

utpātā dāruṇāścaiva śubhāśca janamejaya |
sarasvatyāḥ śubhe tīrthe vihitā vai mahātmanā |
tasya nāmnā ca tattīrthaṃ gargasrota iti smṛtam || 16 ||
[Analyze grammar]

tatra gargaṃ mahābhāgamṛṣayaḥ suvratā nṛpa |
upāsāṃ cakrire nityaṃ kālajñānaṃ prati prabho || 17 ||
[Analyze grammar]

tatra gatvā mahārāja balaḥ śvetānulepanaḥ |
vidhivaddhi dhanaṃ dattvā munīnāṃ bhāvitātmanām || 18 ||
[Analyze grammar]

uccāvacāṃstathā bhakṣyāndvijebhyo vipradāya saḥ |
nīlavāsāstato'gacchacchaṅkhatīrthaṃ mahāyaśāḥ || 19 ||
[Analyze grammar]

tatrāpaśyanmahāśaṅkhaṃ mahāmerumivocchritam |
śvetaparvatasaṃkāśamṛṣisaṃghairniṣevitam |
sarasvatyāstaṭe jātaṃ nagaṃ tāladhvajo balī || 20 ||
[Analyze grammar]

yakṣā vidyādharāścaiva rākṣasāścāmitaujasaḥ |
piśācāścāmitabalā yatra siddhāḥ sahasraśaḥ || 21 ||
[Analyze grammar]

te sarve hyaśanaṃ tyaktvā phalaṃ tasya vanaspateḥ |
vrataiśca niyamaiścaiva kāle kāle sma bhuñjate || 22 ||
[Analyze grammar]

prāptaiśca niyamaistaistairvicarantaḥ pṛthakpṛthak |
adṛśyamānā manujairvyacaranpuruṣarṣabha || 23 ||
[Analyze grammar]

evaṃ khyāto narapate loke'sminsa vanaspatiḥ |
tatra tīrthaṃ sarasvatyāḥ pāvanaṃ lokaviśrutam || 24 ||
[Analyze grammar]

tasmiṃśca yaduśārdūlo dattvā tīrthe yaśasvinām |
tāmrāyasāni bhāṇḍāni vastrāṇi vividhāni ca || 25 ||
[Analyze grammar]

pūjayitvā dvijāṃścaiva pūjitaśca tapodhanaiḥ |
puṇyaṃ dvaitavanaṃ rājannājagāma halāyudhaḥ || 26 ||
[Analyze grammar]

tatra gatvā munīndṛṣṭvā nānāveṣadharānbalaḥ |
āplutya salile cāpi pūjayāmāsa vai dvijān || 27 ||
[Analyze grammar]

tathaiva dattvā viprebhyaḥ paribhogānsupuṣkalān |
tataḥ prāyādbalo rājandakṣiṇena sarasvatīm || 28 ||
[Analyze grammar]

gatvā caiva mahābāhurnātidūraṃ mahāyaśāḥ |
dharmātmā nāgadhanvānaṃ tīrthamāgamadacyutaḥ || 29 ||
[Analyze grammar]

yatra pannagarājasya vāsukeḥ saṃniveśanam |
mahādyutermahārāja bahubhiḥ pannagairvṛtam |
yatrāsannṛṣayaḥ siddhāḥ sahasrāṇi caturdaśa || 30 ||
[Analyze grammar]

yatra devāḥ samāgamya vāsukiṃ pannagottamam |
sarvapannagarājānamabhyaṣiñcanyathāvidhi |
pannagebhyo bhayaṃ tatra vidyate na sma kaurava || 31 ||
[Analyze grammar]

tatrāpi vidhivaddattvā viprebhyo ratnasaṃcayān |
prāyātprācīṃ diśaṃ rājandīpyamānaḥ svatejasā || 32 ||
[Analyze grammar]

āplutya bahuśo hṛṣṭasteṣu tīrtheṣu lāṅgalī |
dattvā vasu dvijātibhyo jagāmāti tapasvinaḥ || 33 ||
[Analyze grammar]

tatrasthānṛṣisaṃghāṃstānabhivādya halāyudhaḥ |
tato rāmo'gamattīrthamṛṣibhiḥ sevitaṃ mahat || 34 ||
[Analyze grammar]

yatra bhūyo nivavṛte prāṅmukhā vai sarasvatī |
ṛṣīṇāṃ naimiṣeyāṇāmavekṣārthaṃ mahātmanām || 35 ||
[Analyze grammar]

nivṛttāṃ tāṃ saricchreṣṭhāṃ tatra dṛṣṭvā tu lāṅgalī |
babhūva vismito rājanbalaḥ śvetānulepanaḥ || 36 ||
[Analyze grammar]

janamejaya uvāca |
kasmātsarasvatī brahmannivṛttā prāṅmukhī tataḥ |
vyākhyātumetadicchāmi sarvamadhvaryusattama || 37 ||
[Analyze grammar]

kasmiṃśca kāraṇe tatra vismito yadunandanaḥ |
vinivṛttā saricchreṣṭhā kathametaddvijottama || 38 ||
[Analyze grammar]

vaiśaṃpāyana uvāca |
pūrvaṃ kṛtayuge rājannaimiṣeyāstapasvinaḥ |
vartamāne subahule satre dvādaśavārṣike |
ṛṣayo bahavo rājaṃstatra saṃpratipedire || 39 ||
[Analyze grammar]

uṣitvā ca mahābhāgāstasminsatre yathāvidhi |
nivṛtte naimiṣeye vai satre dvādaśavārṣike |
ājagmurṛṣayastatra bahavastīrthakāraṇāt || 40 ||
[Analyze grammar]

ṛṣīṇāṃ bahulatvāttu sarasvatyā viśāṃ pate |
tīrthāni nagarāyante kūle vai dakṣiṇe tadā || 41 ||
[Analyze grammar]

samantapañcakaṃ yāvattāvatte dvijasattamāḥ |
tīrthalobhānnaravyāghra nadyāstīraṃ samāśritāḥ || 42 ||
[Analyze grammar]

juhvatāṃ tatra teṣāṃ tu munīnāṃ bhāvitātmanām |
svādhyāyenāpi mahatā babhūvuḥ pūritā diśaḥ || 43 ||
[Analyze grammar]

agnihotraistatasteṣāṃ hūyamānairmahātmanām |
aśobhata saricchreṣṭhā dīpyamānaiḥ samantataḥ || 44 ||
[Analyze grammar]

vālakhilyā mahārāja aśmakuṭṭāśca tāpasāḥ |
dantolūkhalinaścānye saṃprakṣālāstathāpare || 45 ||
[Analyze grammar]

vāyubhakṣā jalāhārāḥ parṇabhakṣāśca tāpasāḥ |
nānāniyamayuktāśca tathā sthaṇḍilaśāyinaḥ || 46 ||
[Analyze grammar]

āsanvai munayastatra sarasvatyāḥ samīpataḥ |
śobhayantaḥ saricchreṣṭhāṃ gaṅgāmiva divaukasaḥ || 47 ||
[Analyze grammar]

tataḥ paścātsamāpeturṛṣayaḥ satrayājinaḥ |
te'vakāśaṃ na dadṛśuḥ kurukṣetre mahāvratāḥ || 48 ||
[Analyze grammar]

tato yajñopavītaiste tattīrthaṃ nirmimāya vai |
juhuvuścāgnihotrāṇi cakruśca vividhāḥ kriyāḥ || 49 ||
[Analyze grammar]

tatastamṛṣisaṃghātaṃ nirāśaṃ cintayānvitam |
darśayāmāsa rājendra teṣāmarthe sarasvatī || 50 ||
[Analyze grammar]

tataḥ kuñjānbahūnkṛtvā saṃnivṛttā saridvarā |
ṛṣīṇāṃ puṇyatapasāṃ kāruṇyājjanamejaya || 51 ||
[Analyze grammar]

tato nivṛtya rājendra teṣāmarthe sarasvatī |
bhūyaḥ pratīcyabhimukhī susrāva saritāṃ varā || 52 ||
[Analyze grammar]

amoghā gamanaṃ kṛtvā teṣāṃ bhūyo vrajāmyaham |
ityadbhutaṃ mahaccakre tato rājanmahānadī || 53 ||
[Analyze grammar]

evaṃ sa kuñjo rājendra naimiṣeya iti smṛtaḥ |
kurukṣetre kuruśreṣṭha kuruṣva mahatīḥ kriyāḥ || 54 ||
[Analyze grammar]

tatra kuñjānbahūndṛṣṭvā saṃnivṛttāṃ ca tāṃ nadīm |
babhūva vismayastatra rāmasyātha mahātmanaḥ || 55 ||
[Analyze grammar]

upaspṛśya tu tatrāpi vidhivadyadunandanaḥ |
dattvā dāyāndvijātibhyo bhāṇḍāni vividhāni ca |
bhakṣyaṃ peyaṃ ca vividhaṃ brāhmaṇānpratyapādayat || 56 ||
[Analyze grammar]

tataḥ prāyādbalo rājanpūjyamāno dvijātibhiḥ |
sarasvatītīrthavaraṃ nānādvijagaṇāyutam || 57 ||
[Analyze grammar]

badareṅgudakāśmaryaplakṣāśvatthavibhītakaiḥ |
panasaiśca palāśaiśca karīraiḥ pīlubhistathā || 58 ||
[Analyze grammar]

sarasvatītīraruhairbandhanaiḥ syandanaistathā |
parūṣakavanaiścaiva bilvairāmrātakaistathā || 59 ||
[Analyze grammar]

atimuktakaṣaṇḍaiśca pārijātaiśca śobhitam |
kadalīvanabhūyiṣṭhamiṣṭaṃ kāntaṃ manoramam || 60 ||
[Analyze grammar]

vāyvambuphalaparṇādairdantolūkhalikairapi |
tathāśmakuṭṭairvāneyairmunibhirbahubhirvṛtam || 61 ||
[Analyze grammar]

svādhyāyaghoṣasaṃghuṣṭaṃ mṛgayūthaśatākulam |
ahiṃsrairdharmaparamairnṛbhiratyantasevitam || 62 ||
[Analyze grammar]

saptasārasvataṃ tīrthamājagāma halāyudhaḥ |
yatra maṅkaṇakaḥ siddhastapastepe mahāmuniḥ || 63 ||
[Analyze grammar]