Chapter 16

saṃjaya uvāca |
athānyaddhanurādāya balavadvegavattaram |
yudhiṣṭhiraṃ madrapatirviddhvā siṃha ivānadat || 1 ||
[Analyze grammar]

tataḥ sa śaravarṣeṇa parjanya iva vṛṣṭimān |
abhyavarṣadameyātmā kṣatriyānkṣatriyarṣabhaḥ || 2 ||
[Analyze grammar]

sātyakiṃ daśabhirviddhvā bhīmasenaṃ tribhiḥ śaraiḥ |
sahadevaṃ tribhirviddhvā yudhiṣṭhiramapīḍayat || 3 ||
[Analyze grammar]

tāṃstānanyānmaheṣvāsānsāśvānsarathakuñjarān |
kuñjarānkuñjarārohānaśvānaśvaprayāyinaḥ |
rathāṃśca rathibhiḥ sārdhaṃ jaghāna rathināṃ varaḥ || 4 ||
[Analyze grammar]

bāhūṃściccheda ca tathā sāyudhānketanāni ca |
cakāra ca mahīṃ yodhaistīrṇāṃ vedīṃ kuśairiva || 5 ||
[Analyze grammar]

tathā tamarisainyāni ghnantaṃ mṛtyumivāntakam |
parivavrurbhṛśaṃ kruddhāḥ pāṇḍupāñcālasomakāḥ || 6 ||
[Analyze grammar]

taṃ bhīmasenaśca śineśca naptā mādryāśca putrau puruṣapravīrau |
samāgataṃ bhīmabalena rājñā paryāpuranyonyamathāhvayantaḥ || 7 ||
[Analyze grammar]

tatastu śūrāḥ samare narendraṃ madreśvaraṃ prāpya yudhāṃ variṣṭham |
āvārya cainaṃ samare nṛvīrā jaghnuḥ śaraiḥ patribhirugravegaiḥ || 8 ||
[Analyze grammar]

saṃrakṣito bhīmasenena rājā mādrīsutābhyāmatha mādhavena |
madrādhipaṃ patribhirugravegaiḥ stanāntare dharmasuto nijaghne || 9 ||
[Analyze grammar]

tato raṇe tāvakānāṃ rathaughāḥ samīkṣya madrādhipatiṃ śarārtam |
paryāvavruḥ pravarāḥ sarvaśaśca duryodhanasyānumate samantāt || 10 ||
[Analyze grammar]

tato drutaṃ madrajanādhipo raṇe yudhiṣṭhiraṃ saptabhirabhyavidhyat |
taṃ cāpi pārtho navabhiḥ pṛṣatkairvivyādha rājaṃstumule mahātmā || 11 ||
[Analyze grammar]

ākarṇapūrṇāyatasaṃprayuktaiḥ śaraistadā saṃyati tailadhautaiḥ |
anyonyamācchādayatāṃ mahārathau madrādhipaścāpi yudhiṣṭhiraśca || 12 ||
[Analyze grammar]

tatastu tūrṇaṃ samare mahārathau parasparasyāntaramīkṣamāṇau |
śarairbhṛśaṃ vivyadhaturnṛpottamau mahābalau śatrubhirapradhṛṣyau || 13 ||
[Analyze grammar]

tayordhanurjyātalanisvano mahānmahendravajrāśanitulyanisvanaḥ |
parasparaṃ bāṇagaṇairmahātmanoḥ pravarṣatormadrapapāṇḍuvīrayoḥ || 14 ||
[Analyze grammar]

tau ceraturvyāghraśiśuprakāśau mahāvaneṣvāmiṣagṛddhināviva |
viṣāṇinau nāgavarāvivobhau tatakṣatuḥ saṃyugajātadarpau || 15 ||
[Analyze grammar]

tatastu madrādhipatirmahātmā yudhiṣṭhiraṃ bhīmabalaṃ prasahya |
vivyādha vīraṃ hṛdaye'tivegaṃ śareṇa sūryāgnisamaprabheṇa || 16 ||
[Analyze grammar]

tato'tividdho'tha yudhiṣṭhiro'pi susaṃprayuktena śareṇa rājan |
jaghāna madrādhipatiṃ mahātmā mudaṃ ca lebhe ṛṣabhaḥ kurūṇām || 17 ||
[Analyze grammar]

tato muhūrtādiva pārthivendro labdhvā saṃjñāṃ krodhasaṃraktanetraḥ |
śatena pārthaṃ tvarito jaghāna sahasranetrapratimaprabhāvaḥ || 18 ||
[Analyze grammar]

tvaraṃstato dharmasuto mahātmā śalyasya kruddho navabhiḥ pṛṣatkaiḥ |
bhittvā hyurastapanīyaṃ ca varma jaghāna ṣaḍbhistvaparaiḥ pṛṣatkaiḥ || 19 ||
[Analyze grammar]

tatastu madrādhipatiḥ prahṛṣṭo dhanurvikṛṣya vyasṛjatpṛṣatkān |
dvābhyāṃ kṣurābhyāṃ ca tathaiva rājñaściccheda cāpaṃ kurupuṃgavasya || 20 ||
[Analyze grammar]

navaṃ tato'nyatsamare pragṛhya rājā dhanurghorataraṃ mahātmā |
śalyaṃ tu viddhvā niśitaiḥ samantādyathā mahendro namuciṃ śitāgraiḥ || 21 ||
[Analyze grammar]

tatastu śalyo navabhiḥ pṛṣatkairbhīmasya rājñaśca yudhiṣṭhirasya |
nikṛtya raukme paṭuvarmaṇī tayorvidārayāmāsa bhujau mahātmā || 22 ||
[Analyze grammar]

tato'pareṇa jvalitārkatejasā kṣureṇa rājño dhanurunmamātha |
kṛpaśca tasyaiva jaghāna sūtaṃ ṣaḍbhiḥ śaraiḥ so'bhimukhaṃ papāta || 23 ||
[Analyze grammar]

madrādhipaścāpi yudhiṣṭhirasya śaraiścaturbhirnijaghāna vāhān |
vāhāṃśca hatvā vyakaronmahātmā yodhakṣayaṃ dharmasutasya rājñaḥ || 24 ||
[Analyze grammar]

tathā kṛte rājani bhīmaseno madrādhipasyāśu tato mahātmā |
chittvā dhanurvegavatā śareṇa dvābhyāmavidhyatsubhṛśaṃ narendram || 25 ||
[Analyze grammar]

athāpareṇāsya jahāra yantuḥ kāyācchiraḥ saṃnahanīyamadhyāt |
jaghāna cāśvāṃścaturaḥ sa śīghraṃ tathā bhṛśaṃ kupito bhīmasenaḥ || 26 ||
[Analyze grammar]

tamagraṇīḥ sarvadhanurdharāṇāmekaṃ carantaṃ samare'tivegam |
bhīmaḥ śatena vyakiraccharāṇāṃ mādrīputraḥ sahadevastathaiva || 27 ||
[Analyze grammar]

taiḥ sāyakairmohitaṃ vīkṣya śalyaṃ bhīmaḥ śarairasya cakarta varma |
sa bhīmasenena nikṛttavarmā madrādhipaścarma sahasratāram || 28 ||
[Analyze grammar]

pragṛhya khaḍgaṃ ca rathānmahātmā praskandya kuntīsutamabhyadhāvat |
chittvā ratheṣāṃ nakulasya so'tha yudhiṣṭhiraṃ bhīmabalo'bhyadhāvat || 29 ||
[Analyze grammar]

taṃ cāpi rājānamathotpatantaṃ kruddhaṃ yathaivāntakamāpatantam |
dhṛṣṭadyumno draupadeyāḥ śikhaṇḍī śineśca naptā sahasā parīyuḥ || 30 ||
[Analyze grammar]

athāsya carmāpratimaṃ nyakṛntadbhīmo mahātmā daśabhiḥ pṛṣatkaḥ |
khaḍgaṃ ca bhallairnicakarta muṣṭau nadanprahṛṣṭastava sainyamadhye || 31 ||
[Analyze grammar]

tatkarma bhīmasya samīkṣya hṛṣṭāste pāṇḍavānāṃ pravarā rathaughāḥ |
nādaṃ ca cakrurbhṛśamutsmayantaḥ śaṅkhāṃśca dadhmuḥ śaśisaṃnikāśān || 32 ||
[Analyze grammar]

tenātha śabdena vibhīṣaṇena tavābhitaptaṃ balamaprahṛṣṭam |
svedābhibhūtaṃ rudhirokṣitāṅgaṃ visaṃjñakalpaṃ ca tathā viṣaṇṇam || 33 ||
[Analyze grammar]

sa madrarājaḥ sahasāvakīrṇo bhīmāgragaiḥ pāṇḍavayodhamukhyaiḥ |
yudhiṣṭhirasyābhimukhaṃ javena siṃho yathā mṛgahetoḥ prayātaḥ || 34 ||
[Analyze grammar]

sa dharmarājo nihatāśvasūtaṃ krodhena dīptajvalanaprakāśam |
dṛṣṭvā tu madrādhipatiṃ sa tūrṇaṃ samabhyadhāvattamariṃ balena || 35 ||
[Analyze grammar]

govindavākyaṃ tvaritaṃ vicintya dadhre matiṃ śalyavināśanāya |
sa dharmarājo nihatāśvasūte rathe tiṣṭhañśaktimevābhikāṅkṣan || 36 ||
[Analyze grammar]

taccāpi śalyasya niśamya karma mahātmano bhāgamathāvaśiṣṭam |
smṛtvā manaḥ śalyavadhe yatātmā yathoktamindrāvarajasya cakre || 37 ||
[Analyze grammar]

sa dharmarājo maṇihemadaṇḍāṃ jagrāha śaktiṃ kanakaprakāśām |
netre ca dīpte sahasā vivṛtya madrādhipaṃ kruddhamanā niraikṣat || 38 ||
[Analyze grammar]

nirīkṣito vai naradeva rājñā pūtātmanā nirhṛtakalmaṣeṇa |
abhūnna yadbhasmasānmadrarājastadadbhutaṃ me pratibhāti rājan || 39 ||
[Analyze grammar]

tatastu śaktiṃ rucirogradaṇḍāṃ maṇipravālojjvalitāṃ pradīptām |
cikṣepa vegātsubhṛśaṃ mahātmā madrādhipāya pravaraḥ kurūṇām || 40 ||
[Analyze grammar]

dīptāmathaināṃ mahatā balena savisphuliṅgāṃ sahasā patantīm |
praikṣanta sarve kuravaḥ sametā yathā yugānte mahatīmivolkām || 41 ||
[Analyze grammar]

tāṃ kālarātrīmiva pāśahastāṃ yamasya dhātrīmiva cograrūpām |
sabrahmadaṇḍapratimāmamoghāṃ sasarja yatto yudhi dharmarājaḥ || 42 ||
[Analyze grammar]

gandhasragagryāsanapānabhojanairabhyarcitāṃ pāṇḍusutaiḥ prayatnāt |
saṃvartakāgnipratimāṃ jvalantīṃ kṛtyāmatharvāṅgirasīmivogrām || 43 ||
[Analyze grammar]

īśānahetoḥ pratinirmitāṃ tāṃ tvaṣṭrā ripūṇāmasudehabhakṣām |
bhūmyantarikṣādijalāśayāni prasahya bhūtāni nihantumīśām || 44 ||
[Analyze grammar]

ghaṇṭāpatākāmaṇivajrabhājaṃ vaiḍūryacitrāṃ tapanīyadaṇḍām |
tvaṣṭrā prayatnānniyamena kḷptāṃ brahmadviṣāmantakarīmamoghām || 45 ||
[Analyze grammar]

balaprayatnādadhirūḍhavegāṃ mantraiśca ghorairabhimantrayitvā |
sasarja mārgeṇa ca tāṃ pareṇa vadhāya madrādhipatestadānīm || 46 ||
[Analyze grammar]

hato'syasāvityabhigarjamāno rudro'ntakāyāntakaraṃ yatheṣum |
prasārya bāhuṃ sudṛḍhaṃ supāṇiṃ krodhena nṛtyanniva dharmarājaḥ || 47 ||
[Analyze grammar]

tāṃ sarvaśaktyā prahitāṃ sa śaktiṃ yudhiṣṭhireṇāprativāryavīryām |
pratigrahāyābhinanarda śalyaḥ samyagghutāmagnirivājyadhārām || 48 ||
[Analyze grammar]

sā tasya marmāṇi vidārya śubhramuro viśālaṃ ca tathaiva varma |
viveśa gāṃ toyamivāprasaktā yaśo viśālaṃ nṛpaterdahantī || 49 ||
[Analyze grammar]

nāsākṣikarṇāsyaviniḥsṛtena prasyandatā ca vraṇasaṃbhavena |
saṃsiktagātro rudhireṇa so'bhūtkrauñco yathā skandahato mahādriḥ || 50 ||
[Analyze grammar]

prasārya bāhū sa rathādgato gāṃ saṃchinnavarmā kurunandanena |
mahendravāhapratimo mahātmā vajrāhataṃ śṛṅgamivācalasya || 51 ||
[Analyze grammar]

bāhū prasāryābhimukho dharmarājasya madrarāṭ |
tato nipatito bhūmāvindradhvaja ivocchritaḥ || 52 ||
[Analyze grammar]

sa tathā bhinnasarvāṅgo rudhireṇa samukṣitaḥ |
pratyudgata iva premṇā bhūmyā sa narapuṃgavaḥ || 53 ||
[Analyze grammar]

priyayā kāntayā kāntaḥ patamāna ivorasi |
ciraṃ bhuktvā vasumatīṃ priyāṃ kāntāmiva prabhuḥ |
sarvairaṅgaiḥ samāśliṣya prasupta iva so'bhavat || 54 ||
[Analyze grammar]

dharmye dharmātmanā yuddhe nihato dharmasūnunā |
samyagghuta iva sviṣṭaḥ praśānto'gnirivādhvare || 55 ||
[Analyze grammar]

śaktyā vibhinnahṛdayaṃ vipraviddhāyudhadhvajam |
saṃśāntamapi madreśaṃ lakṣmīrnaiva vyamuñcata || 56 ||
[Analyze grammar]

tato yudhiṣṭhiraścāpamādāyendradhanuṣprabham |
vyadhamaddviṣataḥ saṃkhye khagarāḍiva pannagān |
dehāsūnniśitairbhallai ripūṇāṃ nāśayankṣaṇāt || 57 ||
[Analyze grammar]

tataḥ pārthasya bāṇaughairāvṛtāḥ sainikāstava |
nimīlitākṣāḥ kṣiṇvanto bhṛśamanyonyamarditāḥ |
saṃnyastakavacā dehairvipatrāyudhajīvitāḥ || 58 ||
[Analyze grammar]

tataḥ śalye nipatite madrarājānujo yuvā |
bhrātuḥ sarvairguṇaistulyo rathī pāṇḍavamabhyayāt || 59 ||
[Analyze grammar]

vivyādha ca naraśreṣṭho nārācairbahubhistvaran |
hatasyāpacitiṃ bhrātuścikīrṣuryuddhadurmadaḥ || 60 ||
[Analyze grammar]

taṃ vivyādhāśugaiḥ ṣaḍbhirdharmarājastvaranniva |
kārmukaṃ cāsya ciccheda kṣurābhyāṃ dhvajameva ca || 61 ||
[Analyze grammar]

tato'sya dīpyamānena sudṛḍhena śitena ca |
pramukhe vartamānasya bhallenāpāharacchiraḥ || 62 ||
[Analyze grammar]

sakuṇḍalaṃ taddadṛśe patamānaṃ śiro rathāt |
puṇyakṣayamiva prāpya patantaṃ svargavāsinam || 63 ||
[Analyze grammar]

tasyāpakṛṣṭaśīrṣaṃ taccharīraṃ patitaṃ rathāt |
rudhireṇāvasiktāṅgaṃ dṛṣṭvā sainyamabhajyata || 64 ||
[Analyze grammar]

vicitrakavace tasminhate madranṛpānuje |
hāhākāraṃ vikurvāṇāḥ kuravo vipradudruvuḥ || 65 ||
[Analyze grammar]

śalyānujaṃ hataṃ dṛṣṭvā tāvakāstyaktajīvitāḥ |
vitresuḥ pāṇḍavabhayādrajodhvastāstathā bhṛśam || 66 ||
[Analyze grammar]

tāṃstathā bhajyatastrastānkauravānbharatarṣabha |
śinernaptā kiranbāṇairabhyavartata sātyakiḥ || 67 ||
[Analyze grammar]

tamāyāntaṃ maheṣvāsamaprasahyaṃ durāsadam |
hārdikyastvarito rājanpratyagṛhṇādabhītavat || 68 ||
[Analyze grammar]

tau sametau mahātmānau vārṣṇeyāvaparājitau |
hārdikyaḥ sātyakiścaiva siṃhāviva madotkaṭau || 69 ||
[Analyze grammar]

iṣubhirvimalābhāsaiśchādayantau parasparam |
arcirbhiriva sūryasya divākarasamaprabhau || 70 ||
[Analyze grammar]

cāpamārgabaloddhūtānmārgaṇānvṛṣṇisiṃhayoḥ |
ākāśe samapaśyāma pataṃgāniva śīghragān || 71 ||
[Analyze grammar]

sātyakiṃ daśabhirviddhvā hayāṃścāsya tribhiḥ śaraiḥ |
cāpamekena ciccheda hārdikyo nataparvaṇā || 72 ||
[Analyze grammar]

tannikṛttaṃ dhanuḥ śreṣṭhamapāsya śinipuṃgavaḥ |
anyadādatta vegena vegavattaramāyudham || 73 ||
[Analyze grammar]

tadādāya dhanuḥ śreṣṭhaṃ variṣṭhaḥ sarvadhanvinām |
hārdikyaṃ daśabhirbāṇaiḥ pratyavidhyatstanāntare || 74 ||
[Analyze grammar]

tato rathaṃ yugeṣāṃ ca chittvā bhallaiḥ susaṃyataiḥ |
aśvāṃstasyāvadhīttūrṇamubhau ca pārṣṇisārathī || 75 ||
[Analyze grammar]

madrarāje hate rājanvirathe kṛtavarmaṇi |
duryodhanabalaṃ sarvaṃ punarāsītparāṅmukham || 76 ||
[Analyze grammar]

tatpare nāvabudhyanta sainyena rajasā vṛte |
balaṃ tu hatabhūyiṣṭhaṃ tattadāsītparāṅmukham || 77 ||
[Analyze grammar]

tato muhūrtātte'paśyanrajo bhaumaṃ samutthitam |
vividhaiḥ śoṇitasrāvaiḥ praśāntaṃ puruṣarṣabha || 78 ||
[Analyze grammar]

tato duryodhano dṛṣṭvā bhagnaṃ svabalamantikāt |
javenāpatataḥ pārthānekaḥ sarvānavārayat || 79 ||
[Analyze grammar]

pāṇḍavānsarathāndṛṣṭvā dhṛṣṭadyumnaṃ ca pārṣatam |
ānartaṃ ca durādharṣaṃ śitairbāṇairavākirat || 80 ||
[Analyze grammar]

taṃ pare nābhyavartanta martyā mṛtyumivāgatam |
athānyaṃ rathamāsthāya hārdikyo'pi nyavartata || 81 ||
[Analyze grammar]

tato yudhiṣṭhiro rājā tvaramāṇo mahārathaḥ |
caturbhirnijaghānāśvānpatribhiḥ kṛtavarmaṇaḥ |
vivyādha gautamaṃ cāpi ṣaḍbhirbhallaiḥ sutejanaiḥ || 82 ||
[Analyze grammar]

aśvatthāmā tato rājñā hatāśvaṃ virathīkṛtam |
samapovāha hārdikyaṃ svarathena yudhiṣṭhirāt || 83 ||
[Analyze grammar]

tataḥ śāradvato'ṣṭābhiḥ pratyavidhyadyudhiṣṭhiram |
vivyādha cāśvānniśitaistasyāṣṭābhiḥ śilīmukhaiḥ || 84 ||
[Analyze grammar]

evametanmahārāja yuddhaśeṣamavartata |
tava durmantrite rājansahaputrasya bhārata || 85 ||
[Analyze grammar]

tasminmaheṣvāsavare viśaste saṃgrāmamadhye kurupuṃgavena |
pārthāḥ sametāḥ paramaprahṛṣṭāḥ śaṅkhānpradadhmurhatamīkṣya śalyam || 86 ||
[Analyze grammar]

yudhiṣṭhiraṃ ca praśaśaṃsurājau purā surā vṛtravadhe yathendram |
cakruśca nānāvidhavādyaśabdānninādayanto vasudhāṃ samantāt || 87 ||
[Analyze grammar]