Chapter 56

dhṛtarāṣṭra uvāca |
tato bhagneṣu sainyeṣu bhīmasenena saṃyuge |
duryodhano'bravītkiṃ nu saubalo vāpi saṃjaya || 1 ||
[Analyze grammar]

karṇo vā jayatāṃ śreṣṭho yodhā vā māmakā yudhi |
kṛpo vā kṛtavarmā ca drauṇirduḥśāsano'pi vā || 2 ||
[Analyze grammar]

atyadbhutamidaṃ manye pāṇḍaveyasya vikramam |
yathāpratijñaṃ yodhānāṃ rādheyaḥ kṛtavānapi || 3 ||
[Analyze grammar]

kurūṇāmapi sarveṣāṃ karṇaḥ śatruniṣūdanaḥ |
śarma varma pratiṣṭhā ca jīvitāśā ca saṃjaya || 4 ||
[Analyze grammar]

tatprabhagnaṃ balaṃ dṛṣṭvā kaunteyenāmitaujasā |
rādheyānāmadhirathaḥ karṇaḥ kimakarodyudhi || 5 ||
[Analyze grammar]

putrā vā mama durdharṣā rājāno vā mahārathāḥ |
etanme sarvamācakṣva kuśalo hyasi saṃjaya || 6 ||
[Analyze grammar]

saṃjaya uvāca |
aparāhṇe mahārāja sūtaputraḥ pratāpavān |
jaghāna somakānsarvānbhīmasenasya paśyataḥ |
bhīmo'pyatibalaḥ sainyaṃ dhārtarāṣṭraṃ vyapothayat || 7 ||
[Analyze grammar]

drāvyamāṇaṃ balaṃ dṛṣṭvā bhīmasenena dhīmatā |
yantāramabravītkarṇaḥ pāñcālāneva mā vaha || 8 ||
[Analyze grammar]

madrarājastataḥ śalyaḥ śvetānaśvānmahājavān |
prāhiṇoccedipāñcālānkarūṣāṃśca mahābalaḥ || 9 ||
[Analyze grammar]

praviśya ca sa tāṃ senāṃ śalyaḥ parabalārdanaḥ |
nyayacchatturagānhṛṣṭo yatra yatraicchadagraṇīḥ || 10 ||
[Analyze grammar]

taṃ rathaṃ meghasaṃkāśaṃ vaiyāghraparivāraṇam |
saṃdṛśya pāṇḍupāñcālāstrastā āsanviśāṃ pate || 11 ||
[Analyze grammar]

tato rathasya ninadaḥ prādurāsīnmahāraṇe |
parjanyasamanirghoṣaḥ parvatasyeva dīryataḥ || 12 ||
[Analyze grammar]

tataḥ śaraśataistīkṣṇaiḥ karṇo'pyākarṇaniḥsṛtaiḥ |
jaghāna pāṇḍavabalaṃ śataśo'tha sahasraśaḥ || 13 ||
[Analyze grammar]

taṃ tathā samare karma kurvāṇamatimānuṣam |
parivavrurmaheṣvāsāḥ pāṇḍavānāṃ mahārathāḥ || 14 ||
[Analyze grammar]

taṃ śikhaṇḍī ca bhīmaśca dhṛṣṭadyumnaśca pārṣataḥ |
nakulaḥ sahadevaśca draupadeyāḥ sasātyakāḥ |
parivavrurjighāṃsanto rādheyaṃ śaravṛṣṭibhiḥ || 15 ||
[Analyze grammar]

sātyakistu tataḥ karṇaṃ viṃśatyā niśitaiḥ śaraiḥ |
atāḍayadraṇe śūro jatrudeśe narottamaḥ || 16 ||
[Analyze grammar]

śikhaṇḍī pañcaviṃśatyā dhṛṣṭadyumnaśca pañcabhiḥ |
draupadeyāścatuḥṣaṣṭyā sahadevaśca saptabhiḥ |
nakulaśca śatenājau karṇaṃ vivyādha sāyakaiḥ || 17 ||
[Analyze grammar]

bhīmasenastu rādheyaṃ navatyā nataparvaṇām |
vivyādha samare kruddho jatrudeśe mahābalaḥ || 18 ||
[Analyze grammar]

tataḥ prahasyādhirathirvikṣipandhanuruttamam |
mumoca niśitānbāṇānpīḍayansumahābalaḥ |
tānpratyavidhyadrādheyaḥ pañcabhiḥ pañcabhiḥ śaraiḥ || 19 ||
[Analyze grammar]

sātyakestu dhanuśchittvā dhvajaṃ ca puruṣarṣabhaḥ |
athainaṃ navabhirbāṇairājaghāna stanāntare || 20 ||
[Analyze grammar]

bhīmasenastu taṃ kruddho vivyādha triṃśatā śaraiḥ |
sārathiṃ ca tribhirbāṇairājaghāna paraṃtapaḥ || 21 ||
[Analyze grammar]

virathāndraupadeyāṃśca cakāra puruṣarṣabhaḥ |
akṣṇornimeṣamātreṇa tadadbhutamivābhavat || 22 ||
[Analyze grammar]

vimukhīkṛtya tānsarvāñśaraiḥ saṃnataparvabhiḥ |
pāñcālānahanacchūraścedīnāṃ ca mahārathān || 23 ||
[Analyze grammar]

te vadhyamānāḥ samare cedimatsyā viśāṃ pate |
karṇamekamabhidrutya śarasaṃghaiḥ samārdayan |
tāñjaghāna śitairbāṇaiḥ sūtaputro mahārathaḥ || 24 ||
[Analyze grammar]

etadatyadbhutaṃ karṇe dṛṣṭavānasmi bhārata |
yadekaḥ samare śūrānsūtaputraḥ pratāpavān || 25 ||
[Analyze grammar]

yatamānānparaṃ śaktyāyodhayattāṃśca dhanvinaḥ |
pāṇḍaveyānmahārāja śarairvāritavānraṇe || 26 ||
[Analyze grammar]

tatra bhārata karṇasya lāghavena mahātmanaḥ |
tutuṣurdevatāḥ sarvāḥ siddhāśca paramarṣayaḥ || 27 ||
[Analyze grammar]

apūjayanmaheṣvāsā dhārtarāṣṭrā narottamam |
karṇaṃ rathavaraśreṣṭhaṃ śreṣṭhaṃ sarvadhanuṣmatām || 28 ||
[Analyze grammar]

tataḥ karṇo mahārāja dadāha ripuvāhinīm |
kakṣamiddho yathā vahnirnidāghe jvalito mahān || 29 ||
[Analyze grammar]

te vadhyamānāḥ karṇena pāṇḍaveyāstatastataḥ |
prādravanta raṇe bhītāḥ karṇaṃ dṛṣṭvā mahābalam || 30 ||
[Analyze grammar]

tatrākrando mahānāsītpāñcālānāṃ mahāraṇe |
vadhyatāṃ sāyakaistīkṣṇaiḥ karṇacāpavaracyutaiḥ || 31 ||
[Analyze grammar]

tena śabdena vitrastā pāṇḍavānāṃ mahācamūḥ |
karṇamekaṃ raṇe yodhaṃ menire tatra śātravāḥ || 32 ||
[Analyze grammar]

tatrādbhutaṃ paraṃ cakre rādheyaḥ śatrukarśanaḥ |
yadekaṃ pāṇḍavāḥ sarve na śekurabhivīkṣitum || 33 ||
[Analyze grammar]

yathaughaḥ parvataśreṣṭhamāsādyābhipradīryate |
tathā tatpāṇḍavaṃ sainyaṃ karṇamāsādya dīryate || 34 ||
[Analyze grammar]

karṇo'pi samare rājanvidhūmo'gniriva jvalan |
dahaṃstasthau mahābāhuḥ pāṇḍavānāṃ mahācamūm || 35 ||
[Analyze grammar]

śirāṃsi ca mahārāja karṇāṃścañcalakuṇḍalān |
bāhūṃśca vīro vīrāṇāṃ ciccheda laghu ceṣubhiḥ || 36 ||
[Analyze grammar]

hastidantāntsarūnkhaḍgāndhvajāñśaktīrhayāngajān |
rathāṃśca vividhānrājanpatākā vyajanāni ca || 37 ||
[Analyze grammar]

akṣeṣāyugayoktrāṇi cakrāṇi vividhāni ca |
ciccheda śatadhā karṇo yodhavratamanuṣṭhitaḥ || 38 ||
[Analyze grammar]

tatra bhārata karṇena nihatairgajavājibhiḥ |
agamyarūpā pṛthivī māṃsaśoṇitakardamā || 39 ||
[Analyze grammar]

viṣamaṃ ca samaṃ caiva hatairaśvapadātibhiḥ |
rathaiśca kuñjaraiścaiva na prājñāyata kiṃcana || 40 ||
[Analyze grammar]

nāpi sve na pare yodhāḥ prājñāyanta parasparam |
ghore śarāndhakāre tu karṇāstre ca vijṛmbhite || 41 ||
[Analyze grammar]

rādheyacāpanirmuktaiḥ śaraiḥ kāñcanabhūṣitaiḥ |
saṃchāditā mahārāja yatamānā mahārathāḥ || 42 ||
[Analyze grammar]

te pāṇḍaveyāḥ samare karṇena sma punaḥ punaḥ |
abhajyanta mahārāja yatamānā mahārathāḥ || 43 ||
[Analyze grammar]

mṛgasaṃghānyathā kruddhaḥ siṃho drāvayate vane |
karṇastu samare yodhāṃstatra tatra mahāyaśāḥ |
kālayāmāsa tatsainyaṃ yathā paśugaṇānvṛkaḥ || 44 ||
[Analyze grammar]

dṛṣṭvā tu pāṇḍavīṃ senāṃ dhārtarāṣṭrāḥ parāṅmukhīm |
abhijagmurmaheṣvāsā ruvanto bhairavānravān || 45 ||
[Analyze grammar]

duryodhano hi rājendra mudā paramayā yutaḥ |
vādayāmāsa saṃhṛṣṭo nānāvādyāni sarvaśaḥ || 46 ||
[Analyze grammar]

pāñcālāpi maheṣvāsā bhagnā bhagnā narottamāḥ |
nyavartanta yathā śūrā mṛtyuṃ kṛtvā nivartanam || 47 ||
[Analyze grammar]

tānnivṛttānraṇe śūrānrādheyaḥ śatrutāpanaḥ |
anekaśo mahārāja babhañja puruṣarṣabhaḥ || 48 ||
[Analyze grammar]

tatra bhārata karṇena pāñcālā viṃśatī rathāḥ |
nihatāḥ sādayaḥ krodhāccedayaśca paraḥśatāḥ || 49 ||
[Analyze grammar]

kṛtvā śūnyānrathopasthānvājipṛṣṭhāṃśca bhārata |
nirmanuṣyāngajaskandhānpādātāṃścaiva vidrutān || 50 ||
[Analyze grammar]

āditya iva madhyāhne durnirīkṣyaḥ paraṃtapaḥ |
kālāntakavapuḥ krūraḥ sūtaputraścacāra ha || 51 ||
[Analyze grammar]

evametānmahārāja naravājirathadvipān |
hatvā tasthau maheṣvāsaḥ karṇo'rigaṇasūdanaḥ || 52 ||
[Analyze grammar]

yathā bhūtagaṇānhatvā kālastiṣṭhenmahābalaḥ |
tathā sa somakānhatvā tasthāveko mahārathaḥ || 53 ||
[Analyze grammar]

tatrādbhutamapaśyāma pāñcālānāṃ parākramam |
vadhyamānāpi karṇena nājahū raṇamūrdhani || 54 ||
[Analyze grammar]

rājā duḥśāsanaścaiva kṛpaḥ śāradvatastathā |
aśvatthāmā kṛtavarmā śakuniścāpi saubalaḥ |
nyahananpāṇḍavīṃ senāṃ śataśo'tha sahasraśaḥ || 55 ||
[Analyze grammar]

karṇaputrau ca rājendra bhrātarau satyavikramau |
anāśayetāṃ balinaḥ pāñcālānvai tatastataḥ |
tatra yuddhaṃ tadā hyāsītkrūraṃ viśasanaṃ mahat || 56 ||
[Analyze grammar]

tathaiva pāṇḍavāḥ śūrā dhṛṣṭadyumnaśikhaṇḍinau |
draupadeyāśca saṃkruddhā abhyaghnaṃstāvakaṃ balam || 57 ||
[Analyze grammar]

evameṣa kṣayo vṛttaḥ pāṇḍavānāṃ tatastataḥ |
tāvakānāmapi raṇe bhīmaṃ prāpya mahābalam || 58 ||
[Analyze grammar]