Chapter 55

saṃjaya uvāca |
śrutvā ca rathanirghoṣaṃ siṃhanādaṃ ca saṃyuge |
arjunaḥ prāha govindaṃ śīghraṃ codaya vājinaḥ || 1 ||
[Analyze grammar]

arjunasya vacaḥ śrutvā govindo'rjunamabravīt |
eṣa gacchāmi sukṣipraṃ yatra bhīmo vyavasthitaḥ || 2 ||
[Analyze grammar]

āyāntamaśvairhimaśaṅkhavarṇaiḥ suvarṇamuktāmaṇijālanaddhaiḥ |
jambhaṃ jighāṃsuṃ pragṛhītavajraṃ jayāya devendramivogramanyum || 3 ||
[Analyze grammar]

rathāśvamātaṅgapadātisaṃghā bāṇasvanairnemikhurasvanaiśca |
saṃnādayanto vasudhāṃ diśaśca kruddhā nṛsiṃhā jayamabhyudīyuḥ || 4 ||
[Analyze grammar]

teṣāṃ ca pārthasya mahattadāsīddehāsupāpmakṣapaṇaṃ suyuddham |
trailokyahetorasurairyathāsīddevasya viṣṇorjayatāṃ varasya || 5 ||
[Analyze grammar]

tairastamuccāvacamāyudhaughamekaḥ praciccheda kirīṭamālī |
kṣurārdhacandrairniśitaiśca bāṇaiḥ śirāṃsi teṣāṃ bahudhā ca bāhūn || 6 ||
[Analyze grammar]

chatrāṇi vālavyajanāni ketūnaśvānrathānpattigaṇāndvipāṃśca |
te petururvyāṃ bahudhā virūpā vātaprabhagnāni yathā vanāni || 7 ||
[Analyze grammar]

suvarṇajālāvatatā mahāgajāḥ savaijayantīdhvajayodhakalpitāḥ |
suvarṇapuṅkhairiṣubhiḥ samācitāścakāśire prajvalitā yathācalāḥ || 8 ||
[Analyze grammar]

vidārya nāgāṃśca rathāṃśca vājinaḥ śarottamairvāsavavajrasaṃnibhaiḥ |
drutaṃ yayau karṇajighāṃsayā tathā yathā marutvānbalabhedane purā || 9 ||
[Analyze grammar]

tataḥ sa puruṣavyāghraḥ sūtasainyamariṃdama |
praviveśa mahābāhurmakaraḥ sāgaraṃ yathā || 10 ||
[Analyze grammar]

taṃ dṛṣṭvā tāvakā rājanrathapattisamanvitāḥ |
gajāśvasādibahulāḥ pāṇḍavaṃ samupādravan || 11 ||
[Analyze grammar]

tatrābhidravatāṃ pārthamārāvaḥ sumahānabhūt |
sāgarasyeva mattasya yathā syātsalilasvanaḥ || 12 ||
[Analyze grammar]

te tu taṃ puruṣavyāghraṃ vyāghrā iva mahārathāḥ |
abhyadravanta saṃgrāme tyaktvā prāṇakṛtaṃ bhayam || 13 ||
[Analyze grammar]

teṣāmāpatatāṃ tatra śaravarṣāṇi muñcatām |
arjuno vyadhamatsainyaṃ mahāvāto ghanāniva || 14 ||
[Analyze grammar]

te'rjunaṃ sahitā bhūtvā rathavaṃśaiḥ prahāriṇaḥ |
abhiyāya maheṣvāsā vivyadhurniśitaiḥ śaraiḥ || 15 ||
[Analyze grammar]

tato'rjunaḥ sahasrāṇi rathavāraṇavājinām |
preṣayāmāsa viśikhairyamasya sadanaṃ prati || 16 ||
[Analyze grammar]

te vadhyamānāḥ samare pārthacāpacyutaiḥ śaraiḥ |
tatra tatra sma līyante bhaye jāte mahārathāḥ || 17 ||
[Analyze grammar]

teṣāṃ catuḥśatānvīrānyatamānānmahārathān |
arjuno niśitairbāṇairanayadyamasādanam || 18 ||
[Analyze grammar]

te vadhyamānāḥ samare nānāliṅgaiḥ śitaiḥ śaraiḥ |
arjunaṃ samabhityajya dudruvurvai diśo bhayāt || 19 ||
[Analyze grammar]

teṣāṃ śabdo mahānāsīddravatāṃ vāhinīmukhe |
mahaughasyeva bhadraṃ te girimāsādya dīryataḥ || 20 ||
[Analyze grammar]

tāṃ tu senāṃ bhṛśaṃ viddhvā drāvayitvārjunaḥ śaraiḥ |
prāyādabhimukhaḥ pārthaḥ sūtānīkāni māriṣa || 21 ||
[Analyze grammar]

tasya śabdo mahānāsītparānabhimukhasya vai |
garuḍasyeva patataḥ pannagārthe yathā purā || 22 ||
[Analyze grammar]

taṃ tu śabdamabhiśrutya bhīmaseno mahābalaḥ |
babhūva paramaprītaḥ pārthadarśanalālasaḥ || 23 ||
[Analyze grammar]

śrutvaiva pārthamāyāntaṃ bhīmasenaḥ pratāpavān |
tyaktvā prāṇānmahārāja senāṃ tava mamarda ha || 24 ||
[Analyze grammar]

sa vāyuvegapratimo vāyuvegasamo jave |
vāyuvadvyacaradbhīmo vāyuputraḥ pratāpavān || 25 ||
[Analyze grammar]

tenārdyamānā rājendra senā tava viśāṃ pate |
vyabhrāmyata mahārāja bhinnā nauriva sāgare || 26 ||
[Analyze grammar]

tāṃ tu senāṃ tadā bhīmo darśayanpāṇilāghavam |
śarairavacakartograiḥ preṣayiṣyanyamakṣayam || 27 ||
[Analyze grammar]

tatra bhārata bhīmasya balaṃ dṛṣṭvātimānuṣam |
vyatrasyanta raṇe yodhāḥ kālasyeva yugakṣaye || 28 ||
[Analyze grammar]

tathārditānbhīmabalānbhīmasenena bhārata |
dṛṣṭvā duryodhano rājā idaṃ vacanamabravīt || 29 ||
[Analyze grammar]

sainikānsa maheṣvāso yodhāṃśca bharatarṣabha |
samādiśadraṇe sarvānhata bhīmamiti sma ha |
tasminhate hataṃ manye sarvasainyamaśeṣataḥ || 30 ||
[Analyze grammar]

pratigṛhya ca tāmājñāṃ tava putrasya pārthivāḥ |
bhīmaṃ pracchādayāmāsuḥ śaravarṣaiḥ samantataḥ || 31 ||
[Analyze grammar]

gajāśca bahulā rājannarāśca jayagṛddhinaḥ |
rathā hayāśca rājendra parivavrurvṛkodaram || 32 ||
[Analyze grammar]

sa taiḥ parivṛtaḥ śūraiḥ śūro rājansamantataḥ |
śuśubhe bharataśreṣṭha nakṣatrairiva candramāḥ || 33 ||
[Analyze grammar]

sa rarāja tathā saṃkhye darśanīyo narottamaḥ |
nirviśeṣaṃ mahārāja yathā hi vijayastathā || 34 ||
[Analyze grammar]

tatra te pārthivāḥ sarve śaravṛṣṭīḥ samāsṛjan |
krodharaktekṣaṇāḥ krūrā hantukāmā vṛkodaram || 35 ||
[Analyze grammar]

sa vidārya mahāsenāṃ śaraiḥ saṃnataparvabhiḥ |
niścakrāma raṇādbhīmo matsyo jālādivāmbhasi || 36 ||
[Analyze grammar]

hatvā daśa sahasrāṇi gajānāmanivartinām |
nṛṇāṃ śatasahasre dve dve śate caiva bhārata || 37 ||
[Analyze grammar]

pañca cāśvasahasrāṇi rathānāṃ śatameva ca |
hatvā prāsyandayadbhīmo nadīṃ śoṇitakardamām || 38 ||
[Analyze grammar]

śoṇitodāṃ rathāvartāṃ hastigrāhasamākulām |
naramīnāmaśvanakrāṃ keśaśaivalaśādvalām || 39 ||
[Analyze grammar]

saṃchinnabhujanāgendrāṃ bahuratnāpahāriṇīm |
ūrugrāhāṃ majjapaṅkāṃ śīrṣopalasamākulām || 40 ||
[Analyze grammar]

dhanuṣkāśāṃ śarāvāpāṃ gadāparighaketanām |
yodhavrātavatīṃ saṃkhye vahantīṃ yamasādanam || 41 ||
[Analyze grammar]

kṣaṇena puruṣavyāghraḥ prāvartayata nimnagām |
yathā vaitaraṇīmugrāṃ dustarāmakṛtātmabhiḥ || 42 ||
[Analyze grammar]

yato yataḥ pāṇḍaveyaḥ pravṛtto rathasattamaḥ |
tatastato'pātayata yodhāñśatasahasraśaḥ || 43 ||
[Analyze grammar]

evaṃ dṛṣṭvā kṛtaṃ karma bhīmasenena saṃyuge |
duryodhano mahārāja śakuniṃ vākyamabravīt || 44 ||
[Analyze grammar]

jaya mātula saṃgrāme bhīmasenaṃ mahābalam |
asmiñjite jitaṃ manye pāṇḍaveyaṃ mahābalam || 45 ||
[Analyze grammar]

tataḥ prāyānmahārāja saubaleyaḥ pratāpavān |
raṇāya mahate yukto bhrātṛbhiḥ parivāritaḥ || 46 ||
[Analyze grammar]

sa samāsādya saṃgrāme bhīmaṃ bhīmaparākramam |
vārayāmāsa taṃ vīro veleva makarālayam |
sa nyavartata taṃ bhīmo vāryamāṇaḥ śitaiḥ śaraiḥ || 47 ||
[Analyze grammar]

śakunistasya rājendra vāme pārśve stanāntare |
preṣayāmāsa nārācānrukmapuṅkhāñśilāśitān || 48 ||
[Analyze grammar]

varma bhittvā tu sauvarṇaṃ bāṇāstasya mahātmanaḥ |
nyamajjanta mahārāja kaṅkabarhiṇavāsasaḥ || 49 ||
[Analyze grammar]

so'tividdho raṇe bhīmaḥ śaraṃ hemavibhūṣitam |
preṣayāmāsa sahasā saubalaṃ prati bhārata || 50 ||
[Analyze grammar]

tamāyāntaṃ śaraṃ ghoraṃ śakuniḥ śatrutāpanaḥ |
ciccheda śatadhā rājankṛtahasto mahābalaḥ || 51 ||
[Analyze grammar]

tasminnipatite bhūmau bhīmaḥ kruddho viśāṃ pate |
dhanuściccheda bhallena saubalasya hasanniva || 52 ||
[Analyze grammar]

tadapāsya dhanuśchinnaṃ saubaleyaḥ pratāpavān |
anyadādatta vegena dhanurbhallāṃśca ṣoḍaśa || 53 ||
[Analyze grammar]

taistasya tu mahārāja bhallaiḥ saṃnataparvabhiḥ |
caturbhiḥ sārathiṃ hyārcchadbhīmaṃ pañcabhireva ca || 54 ||
[Analyze grammar]

dhvajamekena ciccheda chatraṃ dvābhyāṃ viśāṃ pate |
caturbhiścaturo vāhānvivyādha subalātmajaḥ || 55 ||
[Analyze grammar]

tataḥ kruddho mahārāja bhīmasenaḥ pratāpavān |
śaktiṃ cikṣepa samare rukmadaṇḍāmayasmayīm || 56 ||
[Analyze grammar]

sā bhīmabhujanirmuktā nāgajihveva cañcalā |
nipapāta rathe tūrṇaṃ saubalasya mahātmanaḥ || 57 ||
[Analyze grammar]

tatastāmeva saṃgṛhya śaktiṃ kanakabhūṣaṇām |
bhīmasenāya cikṣepa kruddharūpo viśāṃ pate || 58 ||
[Analyze grammar]

sā nirbhidya bhujaṃ savyaṃ pāṇḍavasya mahātmanaḥ |
papāta ca tato bhūmau yathā vidyunnabhaścyutā || 59 ||
[Analyze grammar]

athotkruṣṭaṃ mahārāja dhārtarāṣṭraiḥ samantataḥ |
na tu taṃ mamṛṣe bhīmaḥ siṃhanādaṃ tarasvinām || 60 ||
[Analyze grammar]

sa saṃgṛhya dhanuḥ sajyaṃ tvaramāṇo mahārathaḥ |
muhūrtādiva rājendra chādayāmāsa sāyakaiḥ |
saubalasya balaṃ saṃkhye tyaktvātmānaṃ mahābalaḥ || 61 ||
[Analyze grammar]

tasyāśvāṃścaturo hatvā sūtaṃ caiva viśāṃ pate |
dhvajaṃ ciccheda bhallena tvaramāṇaḥ parākramī || 62 ||
[Analyze grammar]

hatāśvaṃ rathamutsṛjya tvaramāṇo narottamaḥ |
tasthau visphārayaṃścāpaṃ krodharaktekṣaṇaḥ śvasan |
śaraiśca bahudhā rājanbhīmamārcchatsamantataḥ || 63 ||
[Analyze grammar]

pratihatya tu vegena bhīmasenaḥ pratāpavān |
dhanuściccheda saṃkruddho vivyādha ca śitaiḥ śaraiḥ || 64 ||
[Analyze grammar]

so'tividdho balavatā śatruṇā śatrukarśanaḥ |
nipapāta tato bhūmau kiṃcitprāṇo narādhipa || 65 ||
[Analyze grammar]

tatastaṃ vihvalaṃ jñātvā putrastava viśāṃ pate |
apovāha rathenājau bhīmasenasya paśyataḥ || 66 ||
[Analyze grammar]

rathasthe tu naravyāghre dhārtarāṣṭrāḥ parāṅmukhāḥ |
pradudruvurdiśo bhītā bhīmājjāte mahābhaye || 67 ||
[Analyze grammar]

saubale nirjite rājanbhīmasenena dhanvinā |
bhayena mahatā bhagnaḥ putro duryodhanastava |
apāyājjavanairaśvaiḥ sāpekṣo mātulaṃ prati || 68 ||
[Analyze grammar]

parāṅmukhaṃ tu rājānaṃ dṛṣṭvā sainyāni bhārata |
viprajagmuḥ samutsṛjya dvairathāni samantataḥ || 69 ||
[Analyze grammar]

tāndṛṣṭvātirathānsarvāndhārtarāṣṭrānparāṅmukhān |
javenābhyapatadbhīmaḥ kirañśaraśatānbahūn || 70 ||
[Analyze grammar]

te vadhyamānā bhīmena dhārtarāṣṭrāḥ parāṅmukhāḥ |
karṇamāsādya samare sthitā rājansamantataḥ |
sa hi teṣāṃ mahāvīryo dvīpo'bhūtsumahābalaḥ || 71 ||
[Analyze grammar]

bhinnanaukā yathā rājandvīpamāsādya nirvṛtāḥ |
bhavanti puruṣavyāghra nāvikāḥ kālaparyaye || 72 ||
[Analyze grammar]

tathā karṇaṃ samāsādya tāvakā bharatarṣabha |
samāśvastāḥ sthitā rājansaṃprahṛṣṭāḥ parasparam |
samājagmuśca yuddhāya mṛtyuṃ kṛtvā nivartanam || 73 ||
[Analyze grammar]