Chapter 87

śrīpadmāvatīprajñe procatuḥ |
kṛṣṇanārāyaṇasvāmin yadyājñā mokṣadā matā |
ko viśeṣo bhogino vai tyāgino vada nau sphuṭam || 1 ||
[Analyze grammar]

śreṣṭho vede tathā loke tyāgāśramo gṛhāśramāt |
kimatrā''jñāṃkite tyāgāśrame śraiṣṭhye tu kāraṇam || 2 ||
[Analyze grammar]

gṛhāśramasya vai śraiṣṭhyaṃ vidyate vā na sarvathā |
tyāgāśramasya hīnatvaṃ vidyate vā na vā kvacit || 3 ||
[Analyze grammar]

gṛhāśrame ca ke doṣāstyāgāśrame ca ke guṇāḥ |
tyāgāśrame ca ke doṣā gṛhāśrame ca ke guṇāḥ || 4 ||
[Analyze grammar]

keṣāṃ saṃsāramagnatvaṃ svāśramasthāyināmapi |
ājñayā vartamānānāmapi naimnyaṃ na vā kvacit || 5 ||
[Analyze grammar]

kathaṃ dārā bandhanaṃ vai kathaṃ pumānna bandhanam |
pumān vā bandhanaṃ dārā na syāttu bandhanaṃ katham || 6 ||
[Analyze grammar]

mokṣaphalaṃ kadā kasya narasya vā striyā drutam |
gṛhasthasya tyāgino vā mokṣaḥ kasya mato drutam || 7 ||
[Analyze grammar]

gṛhasthasya tyāgino vā sādṛśyaṃ vidyate na vā |
vidharmitvaṃ sadharmitvaṃ kiyat tadvada nau prabho || 8 ||
[Analyze grammar]

dvayorvā gṛhadharmitvaṃ vidyate vā na vidyate |
dvayorvā tyāgadharmitvaṃ vidyate vā na vidyate || 9 ||
[Analyze grammar]

bhogyaṃ kiṃ kaśca bhoktā'sti ko'styabhoktā pṛthagjanaḥ |
kimabhogyaṃ tathā kṛṣṇa vada nau hitakṛdṛtam || 10 ||
[Analyze grammar]

śrīkṛṣṇanārāyaṇa uvāca |
śṛṇutaṃ hitakṛt sarveṣāṃ priye sahacārike |
pṛṣṭaṃ tattvaṃ samastaṃ vai yajjñātvā mokṣabhāg bhavet || 11 ||
[Analyze grammar]

vistareṇa pravakṣyāmi yathārthaṃ śṛṇutaṃ priye |
vakto badrīkaṇṭakaścaiko'paraḥ saralo'sti vai || 12 ||
[Analyze grammar]

vakro gṛhāśramo bodhyastyāgastu saralo mataḥ |
vakre bandhanamāpnoti sarale bandhanaṃ nahi || 13 ||
[Analyze grammar]

vakraḥ pāśasvarūpo'sti saralaḥ pāśavarjitaḥ |
samabhūsthitayoścāpi vaidharmyaṃ bahudhā matam || 14 ||
[Analyze grammar]

saralo'gādhatāmeti vakro nopaityagādhatām |
vakro vakti punarjanma saralastvapunarbhavam || 15 ||
[Analyze grammar]

vakraḥ svargāt patanaṃ ca saralaḥ śāśvatīṃ gatim |
vakro nārīsvarūpo'sti lajjayā''jñāprapālakaḥ || 16 ||
[Analyze grammar]

saralo'sti nararūpaḥ śāsakaśca sahāyadaḥ |
pattalādau saralaḥ prāk paścād viśati vakrakaḥ || 17 ||
[Analyze grammar]

bhajyate vā bahirvakraḥ saralaḥ pārago bhavet |
prajñe padmāvati dārāśramastyāgāśramāt pṛthak || 18 ||
[Analyze grammar]

uktadharmānuruddhaśca viśeṣabandhanapradaḥ |
vakraḥ praviṣṭaścaraṇe na niryāti nimajjati || 19 ||
[Analyze grammar]

saralaścākṛṣṭiyogānniryātyeva na majjati |
vakre bhaṃgā hi bahavaḥ sarale santi naiva te || 20 ||
[Analyze grammar]

saralastyāgamārgo vai vakro dārādilambanaḥ |
dāraśūnyastu tarati dāramagno nimajjati || 21 ||
[Analyze grammar]

dārāstu kilakaḥ sthūlo bandhanāya ca śṛṅkhalā |
gadā garvavināśāya dārā daraṃ bhayasya ca || 22 ||
[Analyze grammar]

dārā mattamanaḥśāstrī dārāḥ svātantryarodhikā |
sattāyā mārdavakartrī dārā ruddhaguhātmikā || 23 ||
[Analyze grammar]

dārā vai kaṇṭakī vallī dārā gavākṣikāphalam |
dārā miṣṭaviṣatulyā dārā phutkāramūṣikā || 24 ||
[Analyze grammar]

dārā dīrghapathe yāturvighnakartrī cirāyatiḥ |
dārāścāntargatā lagnā naiva niryāti vai kvacit || 25 ||
[Analyze grammar]

bahirdārā naraṃ śīghraṃ conmattayati bhāminī |
bhrāntidā digbhramakartrī tamasyeva yunakti tam || 26 ||
[Analyze grammar]

saṃsāre maline kṣiptvā karoti malinaṃ naram |
vīkṣaṇaṃ premayuk kṛtvā hāpayatyeva mokṣaṇam || 27 ||
[Analyze grammar]

grāhye dhārye tathā bhogye yoge jāgrati vā svapau |
dārā mūrtiḥ puraḥprāpyā kṛṣṇamūrtivirodhinī || 28 ||
[Analyze grammar]

āvaraṇasvarūpā sā dārā narasya sarvathā |
prajñe padmāvati tyaktvā vanaṃ yānti virāgiṇaḥ || 29 ||
[Analyze grammar]

virāgiṇyo vanaṃ yānti tyaktvā tyāginaraṃ hyataḥ |
dārā vā dārako vāpi rāgī bandhanavān mataḥ || 30 ||
[Analyze grammar]

dārā vā dārako vāpi rāgaśūnyo vimucyate |
śṛṇutaṃ sahacāriṇyau santyājñā gṛhamedhinām || 31 ||
[Analyze grammar]

bahvyastā naiva pātyante gṛhasthaiḥ karmajālibhiḥ |
nā''rcayanti surān dīnānatithīn sādhusādhvikāḥ || 32 ||
[Analyze grammar]

na vṛddhānna mahīmānān narṣīn na gā na jantukān |
yathādharmaṃ nārcayanti patiṃ patnīṃ ca bālakān || 33 ||
[Analyze grammar]

na pūjyānnāpi mānyāṃśca na gurūn kuladevatāḥ |
na pitṝn naiva mātṝśca nā'dhyātmikānna yajñajān || 34 ||
[Analyze grammar]

nā''gantukānnā'bhyāgatānna śreṣṭhānna kaniṣṭhikān |
na māṃ na pārṣadānme'pi na śaktīrna vṛṣaṃ satīm || 35 ||
[Analyze grammar]

nā'rcayantyāśritāṃścāpi viprān vā bhikṣukānapi |
na paśūn pakṣiṇaścāpi nārcayanti yathārthataḥ || 36 ||
[Analyze grammar]

svārthamātraparā ye ca paropakṛtivarjitāḥ |
gṛhasthāścājñayā hīnā hīnāste sarvathā sadā || 37 ||
[Analyze grammar]

yadgehe na satāṃ pādā yadgehe na surālayaḥ |
yadgṛhe nāpi naivedyaṃ haraye te śmaśāninaḥ || 38 ||
[Analyze grammar]

yatra brahmārpaṇaṃ nāsti yatra sādhvarpaṇaṃ na ca |
yatra bhaktirharernāsti te sarve vai śmaśāninaḥ || 39 ||
[Analyze grammar]

yatra dāramayaṃ rājyaṃ bhogā dāraprasaṃgajāḥ |
dāradhyānaṃ dārapūjā te he nirayavāsinaḥ || 40 ||
[Analyze grammar]

evamājñāhīnadāraprasakto niraye'sti saḥ |
dārāśramastato hīnastasmāt tyāgaḥ sadottamaḥ || 41 ||
[Analyze grammar]

dārāśrame ṛṇaṃ daivaṃ paitryamārṣaṃ pravartate |
pūjāputrā'dhyayanaiśca nivartante hi nānyathā || 42 ||
[Analyze grammar]

gṛhāśramo'napatyānāmapatyārthaṃ praśasyate |
tasmin kṛte'napatyatvaṃ nirayāya prakalpyate || 43 ||
[Analyze grammar]

jīvikābhāvanālakṣyaṃ dāragṛhaṃ tu dehinām |
samastānāṃ tu varṇānāṃ gṛhāśramo hi bhojyadaḥ || 44 ||
[Analyze grammar]

bhojyadāne cā'samartho gṛhāśramo vṛthāśramaḥ |
kaṇḍanī peṣaṇī cullī jalakuṃbhī ca mārjanī || 45 ||
[Analyze grammar]

pañcasūnāḥ sadārāṇāṃ svargarodhāḥ prapātinaḥ |
kāmo lobho rasāsvādaḥ paiśunyaṃ svārthagauravam || 46 ||
[Analyze grammar]

mānaṃ kaliścāvamānaṃ doṣā vasanti hāriṣu |
ahaṃkāraḥ pramohaścā''saktiśca vāsanā ratiḥ || 47 ||
[Analyze grammar]

mṛṣā''ḍambara udvego doṣā vasanti dāriṣu |
anaudārthaṃ saṃgrahaśca grahaṇaṃ cā'nivartanam || 48 ||
[Analyze grammar]

pravṛttiścā'pyasantoṣo doṣā vasanti dāriṣu |
mālinyaṃ sūtakaṃ hānirbhayaṃ muhuḥ pravāsanam || 49 ||
[Analyze grammar]

dāsyaṃ parāśrayatvaṃ ca doṣā vasanti dāriṣu |
mṛṣā praśaṃsanaṃ nindā svāyattīkaraṇaśramāḥ || 50 ||
[Analyze grammar]

āśāpāśā navanavā doṣā vasanti dāriṣu |
grahapitṛpretapīḍā kumelotthaprapīḍanam || 51 ||
[Analyze grammar]

rogakṣudhātṛṣājanyabalakṣayādiduḥkhitā |
bhogayogyopakaraṇānāmalābho daridratā || 52 ||
[Analyze grammar]

tiraskāro nṛpādīnāṃ karādānaṃ prasahya vai |
prasaṃgotsavamodādāvasāmarthyaṃ ca bhikṣutā || 53 ||
[Analyze grammar]

atiśayo nikaṭānāṃ saṃśayo dūravāsinām |
viyogo viprakṛṣṭānāṃ doṣā vasanti dāriṣu || 54 ||
[Analyze grammar]

aviśvāsaḥ svajanānāṃ pareṣāṃ dhanahāritā |
samūhā''vāsavaśatā doṣā vasanti dāriṣu || 55 ||
[Analyze grammar]

tato gṛhāśramo bhārye pade pade'ghaduḥkhakṛt |
svargasaṃśāyakaścāpi mokṣasaṃśāyako'pi ca || 56 ||
[Analyze grammar]

dārāśrame ye doṣāste tyāginaḥ prāyaśo guṇāḥ |
tyāgāśramastataḥ śreṣṭhaḥ savarṇavarjitaḥ śubhaḥ || 57 ||
[Analyze grammar]

dārāśrame prajāyante ṛṇinaḥ putraputrikāḥ |
ṛṇaṃ datvā ciramārgaṃ prayānti nā'bhiyanti te || 58 ||
[Analyze grammar]

dārāśrame'rpaṇabuddhiḥ saṃkocaṃ bhajate sadā |
ātmavivekavijñānaṃ sthitiṃ labhate vā na vā || 59 ||
[Analyze grammar]

ātmani śrīkṛṣṇanārāyaṇopāstirbhavenna vā |
mokṣo vā vṛṣa evāpi sandigdhā vai gṛhāśrame || 60 ||
[Analyze grammar]

tataḥ padmāvati prajñe nārāyaṇo narānvitaḥ |
tyāgāśramaṃ prabhajāmi sarvabandhanavarjitam || 61 ||
[Analyze grammar]

māyāraso gṛhasthānāṃ tyāgināṃ bhagavadrasaḥ |
ādyānāṃ sānta evā'sti tyāgināṃ śāśvato rasaḥ || 62 ||
[Analyze grammar]

niścintatā tyāgināṃ vai yātrāmātrajuṣāṃ bhuvi |
sātiśayādihīnatvaṃ sarvabhayādiśūnyatā || 63 ||
[Analyze grammar]

jīvane maraṇe sāmyā buddhistu tyāgināṃ yataḥ |
samaloṣṭāśmakanakasnehānāṃ cātmavartinām || 64 ||
[Analyze grammar]

nityānande citsadātmanyavatiṣṭhanti ye saṭā |
vrahmānandaparāstṛptāstyāginaścātmamūrtayaḥ || 65 ||
[Analyze grammar]

atra dehādimanto'pi dehasevāvivarjitāḥ |
jīvanto'pi harau magnā jīvanmuktā videhinaḥ || 66 ||
[Analyze grammar]

doṣaśūnyā guravaste paramokṣapradāyinaḥ |
līlāpravṛttimantaste māyātyāgātiśobhanāḥ || 67 ||
[Analyze grammar]

viśeṣo'yaṃ tyāgināṃ vai gṛhasthebhyo mama priye |
gṛhasthānāṃ tu yā ājñāstā yadi svalpakhaṇḍitāḥ || 68 ||
[Analyze grammar]

gṛhāśramastato nyūno yataḥ śakto na pālane |
tyāgāśramastu haryartho mokṣārthaḥ paramārthakaḥ || 69 ||
[Analyze grammar]

gṛhāśramastu bhogārthaścājñābhaṃgaparāyaṇaḥ |
kāmabhoge duṣṭapāne duṣṭāśane tu jantavaḥ || 70 ||
[Analyze grammar]

naisargāt sampravartante vimaryādā viśeṣataḥ |
mānavādīṃstādṛśān vai nivartayanti cājñayā || 71 ||
[Analyze grammar]

vedādyā vidhirūpā vai hyājñākarā nivartakāḥ |
ājñāmukhā niṣedhanti vidhivat tanniṣedhakāḥ || 72 ||
[Analyze grammar]

mā kurvantu viṣayāṇāṃ bhogāniti muhurmuhuḥ |
upadiśanti tān lokā avamatya patanti ca || 73 ||
[Analyze grammar]

dāragrahasvabhāvo'yaṃ yatrājñāpi prahīyate |
tasmād gṛhāśramācchreṣṭhastyāgaścājñāparāyaṇaḥ || 74 ||
[Analyze grammar]

śṛṇutaṃ sahacāriṇyau śraiṣṭhyaṃ gṛhāśramasya tu |
dampatī vā naro nārī tvekavāram ṛtūttaram || 75 ||
[Analyze grammar]

garbhārthaṃ bhogamādatte bālajanmottaraṃ punaḥ |
ṛtudharme samāpanne garbhārthaṃ gamanaṃ punaḥ || 76 ||
[Analyze grammar]

ekavāraṃ garbhadānaṃ yugāntare samāntare |
evaṃ tau vartamānau vai sādhvīsādhū prakīrtitau || 77 ||
[Analyze grammar]

putraputrīyutau dārāśramau śreṣṭhau sadā matau |
brahmacaryavratasthau ca brahmaśīlanatatparau || 78 ||
[Analyze grammar]

adhyātmacintakau hiṃsāsteyādidoṣavarjitau |
yathāptilābhasantuṣṭau yātrāmātraparāyaṇau || 79 ||
[Analyze grammar]

svalpasarvopakaraṇāvetau śreṣṭhau gṛhāśramau |
patraiḥ puṣpaiḥ phalairannaibrahmayajñaparāyaṇau || 80 ||
[Analyze grammar]

devayajñapitṛyajñaparau cātithipūjakau |
sādhusādhvīyatiyogisevāsatsaṃgaśīlinau || 81 ||
[Analyze grammar]

śaucavratatapastuṣṭiparau kleśavivarjitau |
brahmā'rpitakriyākāṇḍau kartavyavṛttiyojitau || 82 ||
[Analyze grammar]

ājñāmātrānusandhānau bhogavṛttivivarjitau |
japakīrtanamagnau ca navadhābhaktiśobhitau || 83 ||
[Analyze grammar]

ātmajñānaparāvātmasaṃśīlanaparāyaṇau |
dhyānamagnau kṛṣṇanārāyaṇasmaraṇajīvanau || 84 ||
[Analyze grammar]

sarvā'ciccitkṛṣṇabodhau kṛṣṇadṛṣṭiprakāśanau |
upārjanaparau yogyayatnakau saktivarjitau || 85 ||
[Analyze grammar]

rāgaśūnyau dveṣaśūnyau tryavasthāguṇavarjitau |
etādṛśau naro nārī śreṣṭhau dāragṛhāśramau || 86 ||
[Analyze grammar]

yadgṛhe bālakā bālāḥ satyaḥ sādhvyaśca sādhavaḥ |
bhikṣukā yatayaḥ siddhā bhuñjate dīnakiṃkarāḥ || 87 ||
[Analyze grammar]

anāthāśca mahīmānā āgantukāśca vaiṣṇavāḥ |
abhyāgatāścātithayo yātrālavo vanasthitāḥ || 88 ||
[Analyze grammar]

rājāno rājavargāśca prajāvargā narāḥ striyaḥ |
sūtamāgadhacārāśca dāsavargāścaturthakāḥ || 89 ||
[Analyze grammar]

paśavaḥ pakṣiṇaścāpi yādāṃsi jantavastathā |
bhuñjate yatpradattaṃ vai sarvādhāro gṛhāśramaḥ || 90 ||
[Analyze grammar]

dārāśrame mahādānaṃ śreṣṭhaṃ surārpaṇādikam |
bhūvastrasvarṇapātrānnakanyāgogṛhadānakam || 91 ||
[Analyze grammar]

sarvavastupradānaṃ ca śreṣṭhaṃ dārāśrame sadā |
sādhūnāṃ devatānāṃ ca ṛṣīṇāṃ pitṛyoginām || 92 ||
[Analyze grammar]

pūjanaṃ bhojanaṃ yatra śreṣṭho dārāśramastataḥ |
vaṃśavistārasantāno dāragṛhaiḥ pravartate || 93 ||
[Analyze grammar]

vaṃśe santo mokṣagāśca sādhvyo bhavanti bhāvini |
tadyogena gṛhasthānāmuddhāraḥ śreṣṭhatā tataḥ || 94 ||
[Analyze grammar]

vināvaṃśaṃ na vai sṛṣṭisthitiḥ sā strīsamudbhavā |
tasmānnārī vaṃśadā vai gṛhiṇaḥ śreṣṭhatā tataḥ || 95 ||
[Analyze grammar]

nārī cājñāmayī yasya tasya mokṣaḥ kare sthitaḥ |
śreṣṭho dārāśramo nityaṃ yadyājñāsṛpiṇī priyā || 96 ||
[Analyze grammar]

kṛṣṇanārāyaṇo yasya dārā'rpaṇaṃ dhanārpaṇam |
dehagṛhādyarpaṇaṃ ca sarvārpaṇaṃ narāyaṇe || 97 ||
[Analyze grammar]

sampadāmarpaṇaṃ sarvasādhanārpaṇamityapi |
kriyārpaṇaṃ tathendriyakṛtyarpaṇaṃ harau mayi || 98 ||
[Analyze grammar]

manaścittamatīnāṃ cārpaṇaṃ nijātmanā mayi |
pratyarpaṇaṃ harau yasyā ājñārpaṇaṃ tathā mayi || 92 ||
[Analyze grammar]

kāmaratyarpaṇaṃ kṛṣṇe putraputryarpaṇaṃ harau |
yasyāḥ sarvārpaṇaṃ śrīśe śreṣṭhau dārāśramau hi tau || 100 ||
[Analyze grammar]

evaṃ dārāśramaḥ śreṣṭhaḥ sarvecchāpūrako'smyaham |
pūrayitvā samastecchānivartakaśca śāntidaḥ || 101 ||
[Analyze grammar]

kṛṣṇo nārāyaṇaḥ svāmī bhavāmyaiśvaryadastathā |
prajñe padmāvati cāhaṃ tatra nirguṇatāpradaḥ || 102 ||
[Analyze grammar]

bhuktirmuktipradaḥ śreṣṭho vaiṣṇavaḥ sa gṛhāśramaḥ |
kānte dve tatpathāsaktā yānti dhāmā'kṣaraṃ param || 103 ||
[Analyze grammar]

iti śrīlakṣmīnārāyaṇīyasaṃhitāyāṃ caturthe tiṣyasantāne gṛhagītāyāṃ gṛhāśramasya nikṛṣṭatotkṛṣṭate tyāgāśramasyotkṛṣṭatā cetyādinirūpaṇanāmā saptāśītitamo'dhyāyaḥ || 87 ||
[Analyze grammar]