Chapter 88

śrīkṛṣṇanārāyaṇa uvāca |
gārhasthye'pi prajñike padmāvati pramokṣaṇaṃ hyapi |
yauvanārdhaṃ brahmacaryaṃ pālayed yaḥ samucyate || 1 ||
[Analyze grammar]

tadardhaṃ vā tadardhārdhaṃ brahmacaryaṃ prapālayet |
lakṣārdhaṃ vā sahasrārdhaṃ śataṃ śatārdhameva vā || 2 ||
[Analyze grammar]

pañcaviṃśativarṣāṇi pālayed dvādaśābdikam |
vā ṣaḍabdāni varṣaṃ vā brahmacaryaṃ prapālayet || 3 ||
[Analyze grammar]

ṛtumātraṃ ca vā māsaṃ brahmacaryaṃ prapālayet |
vratottamaṃ hi tatproktaṃ yathābalaṃ pramokṣadam || 4 ||
[Analyze grammar]

evapatnīvrataṃ yadvā svargadaṃ mokṣadaṃ tataḥ |
ārtavaṃ cārtavaṃ dānaṃ brahmacaryaṃ hi madhyamam || 5 ||
[Analyze grammar]

tenā'pi balatulyaṃ vai prāpyate mokṣaṇaṃ khalu |
dharmā'dharmā'nabhijño ya ājñāśīlaparāyaṇaḥ || 6 ||
[Analyze grammar]

snehasevātimagnaśca gṛhī mokṣamavāpnuyāt |
naro vā yadi vā nārī gṛhadharmaparāyaṇau || 7 ||
[Analyze grammar]

devasādhvīsādhusevāparau mokṣaṃ pragacchataḥ |
yadvā kṛṣṇo hariḥ pṛthvyāṃ rāmo nārāyaṇaḥ prabhuḥ || 8 ||
[Analyze grammar]

prāvirbhāvaparaḥ syādvai tadā tadyogato drutam |
dayālostasya kṛpayā tacchakteḥ kṛpayāpi ca || 9 ||
[Analyze grammar]

pārṣadānāṃ ca bhaktānāṃ kṛpayā mucyate janaḥ |
kṛṣṇo vā kṛṣṇabhūtāni vicaranti bhuvastale || 10 ||
[Analyze grammar]

channarūpā bhikṣukā vai janakalyāṇahetave |
bhikṣārthaṃ cā'lakṣyacihnāḥ samāyānti gṛhigṛham || 11 ||
[Analyze grammar]

tadā bhikṣādānasevāyogaṃ labhed gṛhāśramī |
ajñāto jñānato vāpi mokṣamavāpnuyāt || 12 ||
[Analyze grammar]

tasmādvai gṛhibhirnityaṃ dātavyaṃ bhikṣukāya tu |
mokṣadānāṃ kvacid yogānmokṣaḥ syād gṛhadharmiṇām || 13 ||
[Analyze grammar]

satkārasya nidhānaṃ vai dārāśramo viśiṣyate |
bahupāpādiyukto'pi paropakāraśevadhiḥ || 14 ||
[Analyze grammar]

gṛhāśramo vijayate nityaśaḥ sādhusevanāt |
yadgṛhe sādhavo yānti svalpabhojanavāñcchayā || 15 ||
[Analyze grammar]

sādhupādarajobhūmirgārhasthyaṃ tad viśiṣyate |
sādhupādāmṛtaṃ yatra sādhuśiṣṭāśanaṃ tathā || 16 ||
[Analyze grammar]

sādhusamvāhanaṃ yatra mokṣasthānaṃ tu tadgṛham |
yatra devālayo devapūjā satāṃ nivāsanam || 17 ||
[Analyze grammar]

brahmakayā vaiṣṇavāśca tadeva mokṣamandiram |
yatra lakṣmīśca tulasī gaṃgā yamī sarasvatī || 18 ||
[Analyze grammar]

sthāvaraṃ jaṃgamaṃ tīrthaṃ tadeva mokṣamandiram |
yatra viṣṇuḥ śivo brahmā nārāyaṇo narāyaṇaḥ || 19 ||
[Analyze grammar]

yatrā'vatārāḥ kṛṣṇasya yatra yogijanālayaḥ |
caityadrumā devamūrtistadeva mokṣamandiram || 20 ||
[Analyze grammar]

ityevaṃ sarvathā śraiṣṭhyaṃ dārāśramasya bhūtale |
anyatrāpi tathā śraiṣṭhyaṃ santyuktāni tu yadgṛhe || 21 ||
[Analyze grammar]

dārāgṛhāśramo yasya paropakārahetave |
tadā śraiṣṭhyaṃ sarvato vai dārāśramasya mādhavi || 22 ||
[Analyze grammar]

api prajñe pravakṣyāmi tyāgāśramasya vai kvacit |
hīnatvam ṛddhiśūnyasya vyaktidoṣeṇa vā kvacit || 23 ||
[Analyze grammar]

upakārā'samartho vai ṛddhiśūnyāśramaḥ sa hi |
tyāgino na kṣitiścāsti na gṛhaṃ vāṭikā sutā || 24 ||
[Analyze grammar]

bhūdānaṃ vāṭikādānaṃ kanyādānaṃ gṛhārpaṇam |
svarṇadānaṃ ca godānaṃ dhanadānaṃ na jāyate || 25 ||
[Analyze grammar]

nā'nyeṣāṃ jīvikādānaṃ jāyante notsavāstathā |
nahi sampadrahitānāṃ gṛhe'śnanti sadā dvijāḥ || 26 ||
[Analyze grammar]

na cā''yānti makhe devā mahīmānā na yantyapi |
na bālā bālikāstasya pramodante prasaṃginaḥ || 27 ||
[Analyze grammar]

śūnyatulyaṃ tyāgino vai sthalamāsanamambaram |
manomodakaraṃ tyāge sarvaṃ śuṣkāyate yataḥ || 28 ||
[Analyze grammar]

na cullī kāśate kvāpi na vahnistṛptimetyapi |
peṣaṇī gāyati brāhme brahmanādaṃ na tu kvacit || 29 ||
[Analyze grammar]

nāpi kusūladhānyāni na piṣṭacintanaṃ tathā |
na navotpannalābhaśca yatrā''tithyaṃ na vartate || 30 ||
[Analyze grammar]

na śayyā nā''layaṃ saudhaṃ na gaurna kṣetramityapi |
navasasyakaṇāptiśca yatra svapne'pi nāsti hi || 31 ||
[Analyze grammar]

na nārīṇāṃ gītayaśca na dhanānāṃ pradānakam |
na prātarbālabhāṣādiśravaṇaṃ yatra vidyate || 3 ||
[Analyze grammar]

na nārījanaviśvāso nārīśūnye pravartate |
na saubhāgyaṃ na saṃskārā dharmayajñā bhavanti na || 33 ||
[Analyze grammar]

śuṣkāyate sadātyāgāśramo hīnotsavo yataḥ |
paryuṣitaṃ na paśavo bhakṣayanti yadāśrame || 34 ||
[Analyze grammar]

nāpi pipīlikādyāśca piṣṭamadanti yatsthale |
na miṣṭaṃ vidyate yatra makṣikā na vasanti ca || 35 ||
[Analyze grammar]

na mūṣakā vartayanti pārāvātā vasanti na |
na vṛddhā jalapānādi labhante guḍamiśritam || 36 ||
[Analyze grammar]

na strīṇāṃ yatra sammānaṃ devīnāṃ gaṇanā na ca |
dānaṃ yatra na cotkṛṣṭaṃ rūkṣastyāgāśramastataḥ || 37 ||
[Analyze grammar]

kaupīnavalkalabhasmajñānaghanaṃ yadāśrame |
na kṣudhānāśakaṃ tadvai rūkṣastyāgāśramastataḥ || 38 ||
[Analyze grammar]

nagnāstu saṃhatā yatra maryādā'dhomukhāyate |
ātmāmṛtābhimagnāśca bāhyāmṛtavivardhitāḥ || 39 ||
[Analyze grammar]

rūkṣadehāḥ śuṣkarāgā vidyante yatra tāpasāḥ |
duḥkhasahāśca jaṭilā mālākeśavibhūṣaṇāḥ || 40 ||
[Analyze grammar]

vṛkṣagṛhanivāsāśca phaliśākhiprabhojanāḥ |
patrapātrāḥ karatumbā māyānāśaparāyaṇāḥ || 41 ||
[Analyze grammar]

vicitratilakaśṛṃgā mṛttikābhasmacandanāḥ |
dhūnīvahnisahāyāśca mattakanakasevinaḥ || 42 ||
[Analyze grammar]

pratīkṣamāṇā vasatiṃ cāyāntīṃ deyasaṃbhṛtām |
śvānaḥ kākāḥ sadocchiṣṭaṃ prāpnuvanti na yatra ca || 43 ||
[Analyze grammar]

na bhūtayajño bhavati satṛṣṇaḥ śāntimeti na |
na lābhaṃ labhate loke rūkṣastyāgāśramo hi saḥ || 44 ||
[Analyze grammar]

prajñe padmāvati tyāgo muktānāmabhayaṃkaraḥ |
yathā tathā dehabhājāṃ tyāgo'pi cābhayaṃkaraḥ || 45 ||
[Analyze grammar]

nirbhayatve vitṛṣṇatve kalikleśavivarjite |
dānaśūnye'pi rūkṣe'pi tyāgāśrame viśeṣatā || 46 ||
[Analyze grammar]

haryāśrayo harau sthānaṃ harerdhyānaṃ ca dhāraṇā |
haryarthaṃ sarvakarmāṇi śraiṣṭhyaṃ tyāgāśrame tataḥ || 47 ||
[Analyze grammar]

na cintā gṛhadehāderna patnyā na sutādiṣu |
nāsaktirdhanavāṭyādau sūtakaṃ yatra nāsti ca || 48 ||
[Analyze grammar]

śokasnānaṃ na vai yatra yatropārjanamasti na |
na śramo na vyavahāro na mānaṃ cāvamānanam || 49 ||
[Analyze grammar]

ṛṇaṃ na nāpi daṇḍo'sti na rakṣaṇasya cintanam |
na moho vibhramo naiva na pātragṛhamārjanam || 50 ||
[Analyze grammar]

na daivaṃ bhautikaṃ vāpi yasyodvejanamasti ca |
nātmīyaṃ parakīyaṃ vā pāratantryaṃ na hiṃsanam || 51 ||
[Analyze grammar]

nāsti caurabhayaṃ nāsti yāmyabhīrmṛtyubhīrna ca |
nahi viplavacintā ca na paścadāyacintanam || 52 ||
[Analyze grammar]

na deharogacintā'pi nirapekṣasya yoginaḥ |
na rāgo jīvane yasya na tvarā maraṇe tathā || 53 ||
[Analyze grammar]

na puṣṭau na ratāvicchā na vikārāśca mānasāḥ |
yataḥ śāntiśca nirvighnā nārāyaṇābhiyoginī || 54 ||
[Analyze grammar]

yatra kṛṣṇārthacintā ca yatra nārāyaṇāśrayaḥ |
yatra satāṃ saṃgamāśca satsaṃgo yatra yoginām || 55 ||
[Analyze grammar]

brahmadhyānaratānāṃ ca sevā yatra ca darśanam |
śravaṇaṃ yanmukhebhyaśca nāmnāṃ harermuhurmuhuḥ || 56 ||
[Analyze grammar]

tyāgaṃ vīkṣya kṣaṇaṃ vṛttiḥ śāntimeti hi māyinām |
parāvṛttya mano yatra viśatyeva hṛdīśvare || 57 ||
[Analyze grammar]

bhāsate'ṇumahānandakaṇikā tu sudhottamā |
jñānadhyānāmṛtapānaistṛptiryatra tu yoginām || 58 ||
[Analyze grammar]

sādhvyaśca sādhavo yatra kuṭumbino na cetare |
na yatra vāsanākhyaśca saṃsāro vidyate manāk || 59 ||
[Analyze grammar]

gatirmokṣasya yatrāsti muktiryatra praluṇṭhati |
tīrthāni yatra cāgatya pūyante rajasā satām || 60 ||
[Analyze grammar]

māyā divyā'pi satsaṃgājjāyate vai yadāśrame |
māyāmayaṃ samastaṃ vai satāṃ yogena dīvyati || 61 ||
[Analyze grammar]

nairguṇyaṃ yat samāsādya brāhmaṃ samparivartate |
tasmācchraiṣṭhyaṃ tu rūkṣe'pi tyāgāśrame'rthamokṣiṇām || 62 ||
[Analyze grammar]

caturthā'rthaparā yatra divyā devā hi sādhavaḥ |
sarvapāpaviloptāraḥ pāvanāḥ parameśvarāḥ || 63 ||
[Analyze grammar]

saṃsāratāpadagdhānāṃ brahmaśāntipravarṣakāḥ |
uddhārakā bhayātkaṣṭāt sarveṣṭapūrakāstathā || 64 ||
[Analyze grammar]

milanti sādhavo yatra tyāgāśrame haripriyāḥ |
tatastyāgāśramaḥ śreṣṭhaḥ śramitānāṃ nivṛttaye || 65 ||
[Analyze grammar]

yathā sūryaprataptānā chāyā viśrāntihetukā |
tathā saṃsārataptānāṃ santaḥ śāntipradāyakāḥ || 66 ||
[Analyze grammar]

hariṃ vinā satāṃ sevāṃ vinā ca bhaktimantarā |
ātmabhāvaṃ vinā śāntiṃ dhyānaṃ vinā'nyadujjhitam || 67 ||
[Analyze grammar]

rakṣitaṃ rakṣaṇīyaṃ vai tyāgāśrame parāśrame |
tatastyāgāśramaḥ śreṣṭho mokṣasannidhigocaraḥ || 68 ||
[Analyze grammar]

hariḥ sākṣāt surāḥ sākṣāt sākṣānmuktāśca pārṣadāḥ |
sādhubhiḥ saha tiṣṭhanti tasmāt tyāgaḥ sadottamaḥ || 69 ||
[Analyze grammar]

ākṣaraḥ paramānande hyutsavā bhuktakoṭikāḥ |
kuṭumbaṃ cācyutaṃ yatra tasmāt tyāgaḥ sadottamaḥ || 70 ||
[Analyze grammar]

nartanaṃ bhagavadarthe vyāpārāḥ kṛṣṇatuṣṭaye |
ārambhā yatra muktyarthāstasmāt tyāgaḥ sadottamaḥ || 71 ||
[Analyze grammar]

makhā bhāgavatā yatra prasādaśca satāṃ hareḥ |
kṛṣirmāyāmalahantrī tasmāt tyāgaḥ sadottamaḥ || 72 ||
[Analyze grammar]

jīvanaṃ cātmasiddhyarthaṃ pravṛttiḥ kṛṣṇatuṣṭaye |
brahmagṛhaprayāṇaṃ ca tasmāt tyāgaḥ sadottamaḥ || 73 ||
[Analyze grammar]

yena tyaktaṃ samastaṃ vai samastairujjhitaḥ sa vai |
tyāgaḥ svātmārpaṇaṃ kṛṣṇe sarvārpaṇaṃ hi muktaye || 74 ||
[Analyze grammar]

muktirvai śāśvatānandamagnatā'kṣaradhāmani |
atrā'pyanubhavastādṛṅ muktaḥ sa tyāgavān guruḥ || 75 ||
[Analyze grammar]

ye ye'rthā iṣṭatāpannāste te tyāge hyakalmaṣāḥ |
siddhyanti sarvathā sādhvi prajñe mādhavi siddhavat || 76 ||
[Analyze grammar]

tatastyāgāśramaḥ śreṣṭhaḥ pūjyo mānyaśca mokṣadaḥ |
phalaṃ śreṣṭhaṃ na vai puṣpaṃ na patraṃ nāpi mañjarī || 77 ||
[Analyze grammar]

phale pakvarasaḥ śreṣṭho rase miṣṭāmlako rasaḥ |
śreṣṭho nārāyaṇo miṣṭaścāmlastatrātiraktatā || 78 ||
[Analyze grammar]

snehabhaktidharaḥ kṛṣṇaḥ prāpyastyāgena cottamaḥ |
kevalastu parastyāgo na śreṣṭho bhajanaṃ vinā || 79 ||
[Analyze grammar]

upāsanāṃ vinā tyāgaḥ pāṣāṇatvāya kalpate |
sevāṃ dhyānaṃ vinā tyāgaścāgaskaro na saṃśayaḥ || 80 ||
[Analyze grammar]

jñānaṃ vinā tathā tyāgaścāgaskaro'sti sarvathā |
gurorājñāṃ vinā tyāgo vairāgyamantarā tathā || 81 ||
[Analyze grammar]

āgaskaraḥ sa vijñeyaḥ prāptiśūnyo phale mṛṣā |
saṃsāratyajanaṃ sārthaṃ yadyātmā harimāpnuyāt || 82 ||
[Analyze grammar]

na prāptistu hareryena prāptānāṃ yatra nāśanam |
pumarthā niṣphalā yatra sa tyāgaścā''ga eva ha || 83 ||
[Analyze grammar]

jñānaṃ copāsanā bhaktirdivyatā śrīharismṛtiḥ |
mokṣasthitirguṇāstyāge sādhutā muktatā'pi ca || 84 ||
[Analyze grammar]

kevalastu mahātyāgo doṣa evāsti dehinaḥ |
prastaro'pi mahātyāge tiṣṭhatyeva sa tādṛśaḥ || 85 ||
[Analyze grammar]

tyāge maurkhyaṃ ca garvaśca mānaṃ ca jaḍatā tathā |
phalecchā tyaktasājātyagocarā dūṣaṇāni vai || 86 ||
[Analyze grammar]

upavāsī pāraṇāyāṃ dviguṇaṃ grasate yadi |
pūrvadine'pi dviguṇaṃ tadopavāsitā mṛṣā || 87 ||
[Analyze grammar]

tyāgī paścācchataguṇaṃ gṛhṇāti svarjanaṃ tapaḥ |
satyamaiśvaralokaṃ ca tadā tyāgaphalaṃ nu kim || 88 ||
[Analyze grammar]

anityaṃ tu prāgabhavat paścādanityamityapi |
dvayoḥ paryavasānaṃ tu nāśe tyāgo vivartate || 89 ||
[Analyze grammar]

doṣastyāge mahān so'sti yaduttamābhirāgitā |
prāptaṃ tyaktaṃ cādhruvaṃ tat prāptavyaṃ svaṃ tathā'dhruvam || 90 ||
[Analyze grammar]

dhruvaṃ nā''lambitaṃ brahma tyāge tredhāpi dūṣaṇam |
tyajanād vā'pyabhiyogād brahma sampadyate yayā || 91 ||
[Analyze grammar]

sevayopāsanayā vā''jñayā jñānena vā tathā |
tyāgena vidhinā vāpi sa tyāgo bhoga eva vā || 92 ||
[Analyze grammar]

brahmaprado yataḥ śreṣṭho guṇa eva sa uttamaḥ |
kṛṣṇecchādhīnavāñchātmatyāga uttama eva saḥ || 93 ||
[Analyze grammar]

mokṣasthityanubhāvātmatyāga uttama eva saḥ |
tadvinā dūṣaṇaṃ tyāgo bhāra eva sa kevalaḥ || 94 ||
[Analyze grammar]

śṛṇutaṃ mādhavi sādhvi prajñe tyāge tu bhūṣaṇam |
audāsīnyaṃ bādhitānuvṛttistu dūṣaṇaṃ tathā || 95 ||
[Analyze grammar]

karmatyāgo bhūṣaṇaṃ vai kṛṣṇatyāgastu dūṣaṇam |
nārītyāgo bhūṣaṇaṃ satkriyātyāgastu dūṣaṇam || 96 ||
[Analyze grammar]

doṣatyāgo bhūṣaṇaṃ vai guṇatyāgastu dūṣaṇam |
gṛhiṇāṃ dūṣaṇaṃ tyāgo bhūṣaṇaṃ bhogasampadaḥ || 97 ||
[Analyze grammar]

tyāgināṃ dūṣaṇaṃ bhogo bhūṣaṇaṃ bhogavarjanam |
mama bhaktiḥ satāṃ sevā devā devā'rhā'tithipūjanam || 98 ||
[Analyze grammar]

sudhārmikaṃ tu dāmpatyaṃ bhūṣaṇāni tu dāriṇām |
ātmaniṣṭha mayi niṣṭhā tadanā'saktavṛttitā || 99 ||
[Analyze grammar]

nityabhaktiśca satsaṃgastyāgināṃ bhūṣaṇāni vai |
kṣamā bhūṣaṇaṃ sādhūnāṃ satkāro gṛhiṇāṃ tu tat || 100 ||
[Analyze grammar]

sādhvīnāṃ bhūṣaṇaṃ śīlaṃ mamā''jñā bhaktabhūṣaṇam |
bhūṣaṇaṃ sthānināṃ dānaṃ dhyānaṃ bhūṣā tu yoginām || 101 ||
[Analyze grammar]

tyāgavatāṃ tvanāsaktirbhūṣaṇaṃ gṛhiṇāṃ satī |
aśraddhā tyāgināṃ doṣo dehābhimāna ityapi || 102 ||
[Analyze grammar]

ālasyaṃ dharmahīnatvaṃ nāstikyaṃ dūṣaṇāni vai |
viṣayāṇāṃ sevanecchā dūṣaṇaṃ paramaṃ tu tat || 103 ||
[Analyze grammar]

dhyānāśrame dhane vāñcchā dūṣaṇaṃ tyāgināṃ sadā |
kuṭumbiṣu snehavṛttistyāgināṃ dūṣaṇaṃ param || 104 ||
[Analyze grammar]

dāridryaṃ tu gṛhasthānāṃ doṣakṛd dūṣaṇaṃ mahat |
tṛṣṇā doṣo hi sarveṣāṃ rājñāṃ tu bhūṣaṇaṃ matā || 105 ||
[Analyze grammar]

jñānināṃ jñānatṛṣṇā'pi bhūṣaṇaṃ tyāgavat sadā |
bhaktānāṃ bhaktitṛṣṇā'pi mama tṛṣṇā'tibhūṣaṇam || 106 ||
[Analyze grammar]

iti śrīlakṣmīnārāyaṇīyasaṃhitāyāṃ caturthe tiṣyasantāne gṛhagītāyāṃ gṛhasthasya mokṣopāyāḥ tyāgāśrame rūkṣatā niścintatā sukhitā ca yathārthatyāgo yathārthā doṣāśca guṇatā doṣatā |
cetyādinirūpaṇanāmā'ṣṭā'śītitamo'dhyāyaḥ || 88 ||
[Analyze grammar]