Chapter 86

śrīśvetāyanavyāsa uvāca |
sanakādyā gurujanāḥ bhagavān kṛṣṇanandanaḥ |
bhaktakāryāṇi kṛtvaivaṃ svā''kṣarīṃ bhūmimāgataḥ || 1 ||
[Analyze grammar]

naranārāyaṇastvenāṃ kathāṃ badryai bhidhāya ca |
virarāma tathā badrī virarāma harismṛtiḥ || 2 ||
[Analyze grammar]

dadhyau dhyāne sadā badrīpriyā nārāyaṇaṃ patim |
tṛptā kathārasāsvādapūrṇā'bhavaddhi śāśvatī || 3 ||
[Analyze grammar]

athaitya kuṃkumavāpīmuvāsa svālaye hariḥ |
tataḥ kṛtvā sabhāṃ sarvaprajābhaktapriyānvitām || 4 ||
[Analyze grammar]

vṛttāntaṃ vijayasyā''ha vistareṇa sukhaśravam |
tatra nandibhillapatnī dilāvarīti vai satī || 5 ||
[Analyze grammar]

abhūd vṛttamimaṃ śrutvā prajñā padmāvatī priyā |
sahacaryau bhaginyau te patnyau śrīkṛṣṇasatprabhoḥ || 6 ||
[Analyze grammar]

papracchatuḥ sarvasabhyalābhārthaṃ vinayānvite |
praṇipatya patiṃ kāntaṃ svāminaṃ kṛṣṇamādhavam || 7 ||
[Analyze grammar]

anādiśrīkṛṣṇanārāyaṇaṃ svāminamacyutam |
kuṃkumavāpikānāthaṃ virājantaṃ sabhāpatim || 8 ||
[Analyze grammar]

śrīpadmāvatīprajñe ūcatuḥ |
bhagavan bhavatā proktā dilāvarī satīti yā |
kathaṃ dilāvarī nandibhillapatnī satī hyabhūt || 9 ||
[Analyze grammar]

śrīkṛṣṇanārāyaṇa uvāca |
bhavatībhyāṃ śubhaṃ pṛṣṭaṃ śṛṇutaṃ sahacārike |
nandibhille mṛte rājñī dilāvaryāṃ sthitā'bhavat || 10 ||
[Analyze grammar]

patibhaktā vyapaśyat sā nārāyaṇasya mandire |
japapūjanakāle svapatyurjayavicintanā || 11 ||
[Analyze grammar]

sākaṃ kṛṣṇena patyuśca mūrteḥ pūjāparāyaṇā |
chatramukuṭayuktāyāḥ patanaṃ sahasā kṣitau || 12 ||
[Analyze grammar]

patyurmūrteḥ prapatanaṃ vinā pratihataṃ drutam |
chatrasya patanaṃ cāpi mukuṭasyāpi vīkṣya sā || 13 ||
[Analyze grammar]

śuśoca patidharmā sā viveda patipātanam |
nandibhillo raṇe nūnaṃ mṛto dilāvarīpatiḥ || 14 ||
[Analyze grammar]

yadarthaṃ yadvijayārthaṃ tyaktā''hārajalāśanā |
kṛṣṇavrataparā patyuḥ pūjāparā'smi jāpikā || 15 ||
[Analyze grammar]

sā sarvā satkriyā me'dya patyū rakṣākarī na vai |
na satyāḥ satyamevā'pi patyū rakṣākaraṃ tviha || 16 ||
[Analyze grammar]

na pūjāyāḥ phalaṃ me'dya patyuḥ kṛte sahāyadam |
aho daive viparīte sarvaṃ bhavati niṣphalam || 17 ||
[Analyze grammar]

yatnāḥ sarve'pi viphalā viphalā devamānatāḥ |
vrataṃ bādhā ca niyamāḥ sarvaṃ bhavati niṣphalam || 18 ||
[Analyze grammar]

atha śrīkṛṣṇabhaktasya drohapāpaṃ baliṣṭhakam |
yadagre bhagavānāste tasya droho bhayaṃkaraḥ || 19 ||
[Analyze grammar]

na tatra devakāryāṇi śatroḥ sāhāyyadāni vai |
nandibhillo kṛtavān vai drohaṃ makhābhiyoginaḥ || 20 ||
[Analyze grammar]

nāgasya ca hareścāpi tatra pūjā mṛṣā mama |
jātā'dya viphalā sarvā svāmī raṇe hato mama || 21 ||
[Analyze grammar]

yadyevaṃ śrīkṛṣṇanārāyaṇaviṣṇo jagatprabho |
jagadguro satīsatyaṃ samārohatu māmiha || 22 ||
[Analyze grammar]

ityuktvā sā kare dhṛtvā jalaṃ mumoca bhūtale |
tāvattasyāḥ pādatale kuṃkumākte babhūvatuḥ || 23 ||
[Analyze grammar]

bhūmau mudrāpite pādatale'paśyad dilāvarī |
vīkṣya satyaṃ vrataṃ satyāḥ sākṣi patyurmṛtau tadā || 24 ||
[Analyze grammar]

kṛṣṇadhyānaparā sādhvī paticintāparāyaṇā |
kṣaṇaṃ ruroda lokārthaprakāśanaparāyaṇā || 25 ||
[Analyze grammar]

tāvat putryaśca dāsyaśca bhṛtyavargāḥ samāyayuḥ |
rodanasya tu yāthārthyaṃ jñātvā te'pi vimūrchitāḥ || 26 ||
[Analyze grammar]

tāvadvimānamārgeṇa dūtaḥ śokaparāyaṇaḥ |
dhvajaśūnyād vimānādvai pṛthvyāmavātatāra ha || 27 ||
[Analyze grammar]

parājayaṃ mṛtiṃ rājño jñātvā dūtamukhādapi |
dilāvarīsatī satyaṃ vahnimutpādya pādataḥ || 28 ||
[Analyze grammar]

tatraiva devadevasya catvare mandirāgrataḥ |
kṛṣṇamūrtyā patimūrtyā sākaṃ jajvāla muktaye || 29 ||
[Analyze grammar]

tatputryaḥ pañca sarvāstāḥ satya āsan kumārikāḥ |
aputrasya bhillarājño jalapradāstadā sutāḥ || 30 ||
[Analyze grammar]

vyalokayan vimānaṃ vai svarṇaṃ samāgataṃ drutam |
yatra rājā nandibhillaḥ kṛṣṇanārāyaṇānvitaḥ || 31 ||
[Analyze grammar]

āyayau śrīsatī neṃtuṃ dilāvarīṃ prabhasmitām |
dilāvarī divyadehā candrānanā vibhūṣitā || 32 ||
[Analyze grammar]

patyā ca hariṇā sākaṃ niṣasāda vimānake |
uvāca putrikāḥ pañca saha netuṃ hariṃ patim || 33 ||
[Analyze grammar]

haristāḥ putrikāḥ pañca jalenā'bhyukṣya satvaram |
divyadehā vidhāyaiva vimāne tāḥ samagrahīt || 34 ||
[Analyze grammar]

jayakārastadā tatra mahānāsījjaneṣvatha |
riktā sā nagarī jātā rājapatnīvivarjitā || 35 ||
[Analyze grammar]

athā'nyā dāsikā dāsāḥ prajāḥ kṣatrādijātijāḥ |
tannimittaṃ dānayajñaṃ dvādaśāhādi cakrire || 36 ||
[Analyze grammar]

gṛhasthā api karmāḍhyā bhaktyā yāntyakṣaraṃ padam |
kāmadharmaparāścāpi cet kṛṣṇājñāparāyaṇāḥ || 37 ||
[Analyze grammar]

labhante te mahārājyaṃ svargaṃ dhāmā'kṣaraṃ tathā |
kṛṣṇājñā viparītā ye te tu kaṣṭaṃ prayānti vai || 38 ||
[Analyze grammar]

śrīpadmāvatīprajñe procatuḥ |
bhagavannau saṃśayo'tra taṃ nivartasva sarvathā |
gṛhastho dārasaṃyukto dārāḥ kāmasya bhūmikāḥ || 39 ||
[Analyze grammar]

kāmo doṣo vāsanāḍhyaḥ pāpātpāpataro hi saḥ |
kāmadharmā gṛhasthāśca kathaṃ muktiṃ prayānti te || 40 ||
[Analyze grammar]

devā ye kāmadharmāṇaḥ patnīyujo ratipriyāḥ |
kathaṃ te baddhadevā vai pareṣāṃ mokṣakāriṇaḥ || 41 ||
[Analyze grammar]

saṃśayaṃ nau kṛṣṇanārāyaṇasvāminnivāraya |
sarveṣāṃ hitalābhāya vijñe pracchāva īpate || 42 ||
[Analyze grammar]

iṣṭadevā devatābhiḥ sahitāḥ sarvapūjane |
pūjyante cāpyupāsyante svasvaśaktyaṃganāyutāḥ || 43 ||
[Analyze grammar]

te kathaṃ mokṣadā mokṣe sthitā vā strīsamanvitāḥ |
māyāyuktāḥ kathaṃ māyāpārāste pārayāyinaḥ || 44 ||
[Analyze grammar]

īśvarā īśvarībhiśca yuktāḥ kathaṃ nu mokṣadāḥ |
sarāgāṇāṃ na vai muktiḥ saṃśayaṃ nau nivāraya || 45 ||
[Analyze grammar]

śrīkṛṣṇanārāyaṇa uvāca |
tattvaṃ vadāmi samyag vāṃ śṛṇutaṃ sahacārike |
yajjñātvā saṃśayo naiva jāyetātra kadācana || 46 ||
[Analyze grammar]

sandeho'pi nivarteta sarvathā yasya śīlanāt |
yadā'nādikṛṣṇanārāyaṇaśrīkṛṣṇamādhavaḥ || 47 ||
[Analyze grammar]

ahamājñāmakṣarabrahmaṇe cakre tu sṛṣṭaye |
sā''jñā me śrīhareḥ śaktimūrtimatī svarūpiṇī || 48 ||
[Analyze grammar]

kṛṣṇanārāyaṇīrūpā muktānikeśvarī satī |
śrīmuktāśrīrdivyarūpā svāmisanmukhataḥ sthitā || 49 ||
[Analyze grammar]

sā patnī sā dharmapatnī sā śrutiḥ sā vidhāyinī |
sā rādhā śrīḥ ramā lakṣmīrlalitā mādhavī priyā || 50 ||
[Analyze grammar]

kamalā suguṇā padmā sāvitrī mañjulā ca sā |
haṃsā saṃjñā śivā nārāyaṇī brāhmī sarasvatī || 51 ||
[Analyze grammar]

sā''jñā nārī satīrūpā kṛṣṇecchāmūrtirūpiṇī |
sā līlā bhūrvibhūtiśca vāmāṃgaṃ sā maheśvarī || 52 ||
[Analyze grammar]

brahmapriyā māṇikī sā kārṣṇī kṛṣṇā haripriyā |
āgamī naigamī cidaṃśā sadyuktā''nandasaṃbhṛtā || 53 ||
[Analyze grammar]

tāḥ sarvā me harerājñāsvarūpāṇi bhavanti vai |
ājñā vidhisvarūpaśca vidhirdharmaśca satkriyā || 54 ||
[Analyze grammar]

ājñāyāṃ ye tu vartante muktā eva ta uttamāḥ |
ājñāyāṃ ye na vartante baddhāste dveṣarūpiṇaḥ || 55 ||
[Analyze grammar]

ājñā me mūrtayaḥ sarvā āvirbhavanti me hṛdaḥ |
hṛdaye me nivasanti tirobhavanti me hṛdi || 96 ||
[Analyze grammar]

ājñayā yoṣitā sākaṃ nityayukto'smi māpatiḥ |
ājñāyukto haristasmād divya eva na rāgavān || 557 ||
[Analyze grammar]

saṃkalpo divya evā'sti nārāyaṇasya me sadā |
ājñā saṃkalpasaṃbhāvyā divyā pumarthadāyinī || 58 ||
[Analyze grammar]

catvāraste pumarthā ca vai dharmārthakāmamuktayaḥ |
ājñayā pālyate dharmaścājñā dharmo vidhirmataḥ || 59 ||
[Analyze grammar]

gṛhasthadharmaḥ kāmāḍhyaścājñayā vidhinā kṛtaḥ |
na sa rāgāya bandhāya na dveṣāya prakalpyate || 60 ||
[Analyze grammar]

ājñādharmaḥ kāmadharmo devānāṃ nahi bandhakṛt |
ājñādharmo mānavānāṃ svadharme śreyasāṃ pradaḥ || 61 ||
[Analyze grammar]

ājñā dharmaśca nārīṇāṃ pātivratyaṃ paro mataḥ |
pātivratye sthitā nārī brahmalokaṃ prayāti vai || 62 ||
[Analyze grammar]

patnīvrate sthito nā ca brahmalokaṃ samaśnute |
avatārā īśvarāśca pitaro mānavāḥ surāḥ || 63 ||
[Analyze grammar]

anye'pi dehinaścājñāsthitāste mokṣabhāginaḥ |
prajārthamājñayā kāmasteṣāṃ pumartha eva saḥ || 64 ||
[Analyze grammar]

ājñādharmo dharmadevaścārthe prayojane śubhe |
pumarthe'nvayatāṃ yāti sattvasampatsvarūpiṇi || 65 ||
[Analyze grammar]

sattvārthaḥ kāmasaṃkalpe dharmiṇyanvayatāṃ tathā |
yāti tena hi saṃkalpaḥ kāmo niṣkāma eva ha || 66 ||
[Analyze grammar]

rāgadveṣarahitaḥ sa kāmo na vāsanāmayaḥ |
na bhogaparamaḥ kāmo na doṣaparamastathā || 67 ||
[Analyze grammar]

ājñāpālanamātrārthaḥ kāmo bhavati dharmadaḥ |
ṛtāvupeyād bhāryāṃ vai patiṃ gacchedṛtūttaram || 68 ||
[Analyze grammar]

evamājñā dharmarūpā kāmakriyā hi maithunam |
ratiḥ sā cā''nandadā'pi rāgadveṣavivarjitā || 69 ||
[Analyze grammar]

vidhinā gocarā sā tu tato bandhanavarjitā |
māyāhīnā pāpahīnā dharmāḍhyā sā ratikriyā || 70 ||
[Analyze grammar]

ājñādharmeṇa sahitaścā'rthaḥ kāmaśca muktaye |
sahāyāste prajāyante prayuktāścājñayā tu ye || 71 ||
[Analyze grammar]

bhavatyo yā dharmapatnyaḥ sarvā ājñāsvarūpikāḥ |
bhavatyo vidhayaḥ sarve hyājñāsvarūpasaṃbhavāḥ || 72 ||
[Analyze grammar]

bhavatyo yā vadhūḥ patnī bhāryā cājñāsthitāḥ sadā |
patyuścājñāsvarūpāstāḥ patyājñāmūrtayo hi tāḥ || 73 ||
[Analyze grammar]

ājñāsthā vartamānā yā nāryo kāmaprabhogadāḥ |
api cājñāvaśāstasmānnaiva bandhāya tāḥ kvacit || 74 ||
[Analyze grammar]

yatra bandho na cāstyeva tatra muktiḥ kare sthitā |
saṃkalpo dharmapautraḥ sa kāmaputraḥ pramuktaye || 75 ||
[Analyze grammar]

mānavānāṃ tu yā nārya ājñāsarvasvasaṃsthitāḥ |
tā eva mokṣadāyinyaḥ patyuḥ svāsāṃ kuṭumbinām || 76 ||
[Analyze grammar]

anājñāvartamānāstu māyābandhanadā hi tāḥ |
mokṣabhraṃśavidhāyinyo vidhiśūnyā yato hi tāḥ || 77 ||
[Analyze grammar]

devānāṃ devatā devyastattaddevāṃgasaṃbhavāḥ |
tattadājñāsvarūpiṇyo vedājñoktā'dhidevatāḥ || 78 ||
[Analyze grammar]

tāstathā strīsvarūpiṇyo vartamānāḥ surapriyāḥ |
surabhogapradātryastāḥ sarvā bandhanavarjitāḥ || 79 ||
[Analyze grammar]

yatrā''jñā tatra bandho na na rāgo dveṣa eva na |
kṛṣṇājñā nirguṇo dharmo naiṣkarmyaṃ bandhakṛnnahi || 80 ||
[Analyze grammar]

parabrahma strīsahitaścāvatārāḥ priyānvitāḥ |
īśvarā īśikāyuktā devāśca devatānvitāḥ || 81 ||
[Analyze grammar]

mānavā mānavīyuktā ye tvājñārthaparāyaṇāḥ |
ājñā nārāyaṇī hyeṣāṃ bahurūpā pravartikā || 82 ||
[Analyze grammar]

bhaktyājñā ca makhājñā ca vivāhājñā sadārikā |
sṛṣṭyājñā dharmakarmājñā vidhyājñā mokṣadā sadā || 83 ||
[Analyze grammar]

yadājñā sā tu vidyā'sti vidyā vai mokṣadā matā |
anājñā sā tvavidyā'sti māyā sā bandhatā matā || 84 ||
[Analyze grammar]

patidharmaparā nārī patyājñārūpavartinī |
mokṣasthaiva tu sā nārāyaṇīśrutisvarūpiṇī || 85 ||
[Analyze grammar]

mokṣadā sā sadā cājñārūpiṇī patidharmiṇī |
prajñā padmāvatī tvevaṃ cājñāsthā naiva kāmataḥ || 86 ||
[Analyze grammar]

kāmo na rāgajasteṣāṃ tato dveṣo na yujyate |
vāsanā naiva teṣāṃ ca dūṣaṇaṃ naiva bandhanam || 87 ||
[Analyze grammar]

śrīkṛṣṇecchānukūlyena vartanaṃ mokṣadaṃ bhavet |
vartanaṃ tādṛśaṃ kṛṣṇaprasannatāpradaṃ bhavet || 88 ||
[Analyze grammar]

prasannatā mokṣadā'sti harerme'tra na saṃśayaḥ |
ātmā prasannatāyukto mokṣaṃ vindati cā'śnute || 89 ||
[Analyze grammar]

na hyeṣā prakṛtirjaivī yā''jñā śrīparamātmanaḥ |
na vikāro na vā māyā svecchāśarīriṇaḥ prabhoḥ || 90 ||
[Analyze grammar]

patnī yā sā smṛtiścā''jñā prajñā vidyā kalā śrutiḥ |
dhṛtirniṣṭhā kriyā cecchā jñaptirjñā śaktirīśvarī || 91 ||
[Analyze grammar]

ātmaśaktiśca sā bhāryā muktiḥ sā vidhinoditā |
naiṣā māyā vikṛtirna vāsanā na na bandhanam || 92 ||
[Analyze grammar]

purā kṛṣṇamukhādājñā cāvirbhūtā sanātanī |
vedavaktrā mahābhāgā jagatāṃ sthitidāyinī || 93 ||
[Analyze grammar]

tāmājñāṃ saṃpraviśyaiva patnīvanto'pi mokṣiṇaḥ |
ājñātadāśrayayośca bhinnatā nāsti vastutaḥ || 94 ||
[Analyze grammar]

dvidhā'sau rūpamāsthāya sthita eva hariḥ prabhuḥ |
vijñāyetthaṃ na badhyante niḥsaṃśayā bhavantyapi || 95 ||
[Analyze grammar]

yadā vidvānnasaṃgaḥ syādājñayā paramātmanaḥ |
tadā muktiḥ kṣaṇādasya nānyathā karmakoṭibhiḥ || 96 ||
[Analyze grammar]

varṇāśramakramo loke kṛtaḥ śrīparameṣṭhinā |
bhūtavivṛddhaye tatra krame tiṣṭhanti mokṣiṇaḥ || 97 ||
[Analyze grammar]

akrame ye prayāntyeva te baddhā naiva muktaye |
ājñayā ca prasādena kṣaṇānmuktirna saṃśayaḥ || 98 ||
[Analyze grammar]

garbhastho jāyamāno vā bālo vā taruṇo'pi vā |
vṛddho vā mukta evā'sti prasādājñāsamanvitaḥ || 99 ||
[Analyze grammar]

udbhijaścāṇḍajaścāpi svedajo vā vidhisthitaḥ |
prasādānme śrīharervai mucyate nā'tra saṃśayaḥ || 100 ||
[Analyze grammar]

kṛṣṇājñaiṣā sthitā rādhā hyanayā muktirākṣarī |
ājñā lakṣmīsvarūpā ca nārāyaṇī nareśvarī || 101 ||
[Analyze grammar]

gāyatrī ca satī durgā sāvitrī vaiṣṇavīśvarī |
devyaḥ sarvāśca yā vedeṣvadhidevyaḥ prakīrtitāḥ || 102 ||
[Analyze grammar]

sarvāstā muktirūpā vai muktidāḥ samupāsitāḥ |
api jaivī priyā cājñāsthitā svāmivṛṣasthitā || 103 ||
[Analyze grammar]

kṛṣṇaprasannatāṃ prāpya mokṣadā sā prajāyate |
prajñe padmāvatī kāmakṣetraṃ nārīmayaṃ sadā || 104 ||
[Analyze grammar]

ājñāpālanamagnaṃ cenmokṣakṣetraṃ taducyate |
atra vāṃ saṃśayo mā'stu vāsanādveṣarāgajaḥ || 105 ||
[Analyze grammar]

ājñāṃ nītvā harirloke sapatnīkaḥ pravartate |
īśvarā devatāḥ santaścājñāpatnīyujo'malāḥ || 106 ||
[Analyze grammar]

naiṣkarmyabhāvamāpannā muktāste mokṣadāḥ sadā |
mokṣasthā bandhahīnāste līlā trayāvidhāyinaḥ || 107 ||
[Analyze grammar]

aśāstrajñāstamomagnā ye tu cājñāvikhaṇḍinaḥ |
te svakalpanakairmāṃ vai dūṣayantyadhamā janāḥ || 108 ||
[Analyze grammar]

devān śaktiyutān pāpā anājñākarmacāriṇaḥ |
paśuvṛttā mama cājñāṃ vihāya mattagāminaḥ || 109 ||
[Analyze grammar]

viraktavādinaścāpi tathā'raṇyanivāsinaḥ |
aparigrahamagnāśca dveṣaśūnyatvavādinaḥ || 110 ||
[Analyze grammar]

api bhavanti parameśvare ceśvariṇīyute |
rāgadveṣāḍhyavacanā yugaladrohakāriṇaḥ || 111 ||
[Analyze grammar]

svakalpitāśāvṛttāśca tatrāepyapūrṇavartinaḥ |
ato duṣṭāḥ pāśavanto na mucyante kadācana || 112 ||
[Analyze grammar]

ityevaṃ mādhavi vacmi prajñe nārāyaṇaḥ svayam |
yathārthaṃ lokahitakṛd ājñāpatnī na bandhadā || 113 ||
[Analyze grammar]

iṣṭadevā devatāścāpyupāsante svayambhuvaḥ |
ājñāmūrtisvarūpāste mokṣadā mokṣiṇo hi te || 114 ||
[Analyze grammar]

nārī yadyapi māyā'sti yā śāstrājñāvivarjitā |
vidhiśūnyā yato māyā sājñā nārāyaṇī tu sā || 115 ||
[Analyze grammar]

nārāyaṇānna mad bhedo nārāyaṇyā abhinnayoḥ |
nārāyaṇo mokṣado'haṃ nārāyaṇyapi mokṣadā || 116 ||
[Analyze grammar]

ājñāyāṃ vartamānānāṃ māyā sadā nivartate |
māyā divyā bhavatyeva mokṣadā bandhanāśinī || 117 ||
[Analyze grammar]

paṭhanācchravaṇādasya nāstikyaṃ vinivartate |
divyatā jāyate dṛṣṭyāṃ citte jīve nijātmani || 118 ||
[Analyze grammar]

ājñābhogo mokṣaṇaṃ ca svargametad dvayaṃ priye |
ājñā'ṅkitasya jāyeta mādhavi nātra saṃśayaḥ || 119 ||
[Analyze grammar]

iti śrīlakṣmīnārāyaṇīyasaṃhitāyāṃ caturthe tiṣyasantāne gṛhagītāyāṃ nandibhillapatnyā dilāvaryāḥ satītvaṃ sastrīkadeveśvarāvatārādīnāṃ parameśājñātmakastrīsvarūpasevināṃ mokṣasthitirmokṣadātṛtva |
mityādinirūpaṇanāmā ṣaḍaśītitamo'dhyāyaḥ || 86 ||
[Analyze grammar]