Chapter 85

śrīnaranārāyaṇa uvāca |
śṛṇu badrīpriye devi vahnirāto gururnṛpam |
hitamuvāca saṃgamya śeṣajīvanahetave || 1 ||
[Analyze grammar]

rājannandibhilla bhūpa nāśo'smākaṃ prajāyate |
kṛṣṇarakṣitasainyānāṃ nāśo nāsti na jāyate || 2 ||
[Analyze grammar]

ekena kubareṇaiva camūpā nava no hatāḥ |
daśasāhasrasainyaiśca navā'yutāni no hatāḥ || 3 ||
[Analyze grammar]

paśya nāśaṃ tato yuddhaṃ kuru vā śaraṇaṃ vraja |
mā garvaṃ vaha rājendra nāgavaśe'sti mādhavaḥ || 4 ||
[Analyze grammar]

nivartasva prajānāśāt sutarāṃ rājyanāśataḥ |
atitarāṃ svanāśācca nivartasva padaṃ vraja || 5 ||
[Analyze grammar]

ityevaṃ bodhitaścāpi nandibhillo'tigarvavān |
guro'nte'haṃ svayaṃ yuddhvā hatvā sarvān samantataḥ || 6 ||
[Analyze grammar]

vairaniryātanaṃ cāntaṃ kariṣye'haṃ kṣitīśvaraḥ |
jito bhokṣyāmi pṛthivīṃ mṛto bhokṣye'kṣaraṃ padam || 7 ||
[Analyze grammar]

bhayād yuddhāt kathañcittu nivartiṣye na sarvathā |
yuddhaṃ bhavatu satataṃ dharmavajro vijeṣyati || 8 ||
[Analyze grammar]

ityuktvā sahasā cājñāṃ dharmavajro cakāra saḥ |
daśasāhasrasainyāḍhye jayāśāprerito'budhaḥ || 9 ||
[Analyze grammar]

yāhi māraya tānsarvān dharmavajra mahattamān |
jahi nārāyaṇaṃ pūrvaṃ tatastu nāgavikramam || 10 ||
[Analyze grammar]

nandakubaraṃ paścācca bhindhi chindhi camūstataḥ |
eṣo'haṃ vratamāsthāyopasthito havane'nale || 11 ||
[Analyze grammar]

śatrunāśāya havanaṃ karomi yāhi ghātaya |
ityuccārya drutaṃ vahniśālāṃ viveśa bhillakaḥ || 12 ||
[Analyze grammar]

vahniṃ prajvālya cāvāhya svamāṃsaiḥ saṃjuhāva tam |
bāhumāṃsaṃ sakthimāṃsaṃ nikṛtyotkṛtya cā'nale || 13 ||
[Analyze grammar]

cikṣepa śatrunāśārthaṃ svāhā vahne sthiro bhava |
vadannevaṃ nandibhillaścakāra havanaṃ tadā || 14 ||
[Analyze grammar]

prasannā vahnayo mūrtāḥ saśastrāḥ sṛṣṭidāhakāḥ |
samutpeturanalādvai dudruvurnāgavikramam || 15 ||
[Analyze grammar]

nārāyaṇaṃ ca kubaraṃ sainyāni prati dudruvuḥ |
hāhākāro'bhavannāgasainyeṣu vīkṣya cānalān || 16 ||
[Analyze grammar]

jvālābhirvyāptadehāṃśca parasainyapradāhakān |
bhasmībhūtāni sainyāni rathān vāhān prakurvataḥ || 17 ||
[Analyze grammar]

mahākālastathārudraḥ śaktayaścājñayā hareḥ |
utpannānāgatān mūrtānagnīn dikṣu vidikṣu ca || 18 ||
[Analyze grammar]

bhakṣayāmāsuratyarthaṃ mahātejaḥsvarūpiṇaḥ |
vahnayo mūrtimantaste bhakṣyamāṇāstu cakriṇā || 19 ||
[Analyze grammar]

mahākālena rudreṇa śaktibhirbhakṣitāstathā |
parāvṛtyaiva bhillasyā'bhakṣayan pṛtanā'yutam || 20 ||
[Analyze grammar]

bhītāste vahnayaḥ kṛṣṇāt pradhāvya dūrato yayuḥ |
bhillasainyeṣu saṃkruddhā dāvānalaṃ pracakrire || 21 ||
[Analyze grammar]

bhillo viveda havane śālāyāṃ nijavahnijam |
nijasainyavināśaṃ vai tadā hatamanā drutam || 22 ||
[Analyze grammar]

babhūva vahniṃ pādena tāḍayitvā krudhā''have |
śastrāstrabāṇabhūśuṇḍīgadāmudgarakhaḍgakaiḥ || 23 ||
[Analyze grammar]

sahitaḥ saratho yuddhe puro gatvā'hanad bahūn |
nāgayoddhṝn jaghānā'sau bāṇavṛṣṭyā'tighaṭṭayā || 24 ||
[Analyze grammar]

dharmavajrastadā caindrajālikaṃ rūpamādadhāt |
nāgarūpaṃ samagṛhya nārāyaṇarathaṃ yayau || 25 ||
[Analyze grammar]

āruroha rathaṃ natvā śrīkṛṣṇaṃ vallabhā''ryakam |
tāvacchrīdurgayā devyā gadayā prahato rathāt || 26 ||
[Analyze grammar]

nipapāta kṣitau tūrṇaṃ samutthāya gadādharaḥ |
khaḍgahasto dadhāvā'ti hantuṃ tu nāgavikramam || 27 ||
[Analyze grammar]

mahākālo gadayā taṃ pothayāmāsa tatkṣaṇam |
samutthāya drutaṃ khaḍgaṃ dhṛtvā drudrāva kūbaram || 28 ||
[Analyze grammar]

rudrastatra sthitastvenaṃ jaghāna mudgareṇa ha |
tasmāttāḍanavegācca kṣitāvuttānato'patat || 29 ||
[Analyze grammar]

samutthāya yayau naijaṃ rathaṃ yāvattu tāvatā |
kūbareṇa hataḥ sūto hatā aśvāḥ śarāṣṭakaiḥ || 30 ||
[Analyze grammar]

dagdho rathaśca vahnisrakśarairdharmavrajasya ha |
dharmavajro rathāttūrṇaṃ tvapasṛtya vimānake || 31 ||
[Analyze grammar]

vyomavāṭe copaviśya nāgasainyāni cā'hanat |
adhomukhairvahniśastrairgolārdhasāyakādibhiḥ || 32 ||
[Analyze grammar]

nandibhillo'pi sahasā vimānamadhiruhya ca |
śastravarṣāmakaroddhi vyomamārgāt samantataḥ || 33 ||
[Analyze grammar]

anye'pi śeṣayoddhāro vaimānikā vimānakaiḥ |
nandibhillājñayā śastravṛṣṭiṃ cakrustadā'mbarāt || 34 ||
[Analyze grammar]

atha vīkṣya kṛṣṇanārāyaṇo vimānayodhanam |
sahasā svavimānaiḥ svān yoddhumājñāṃ dadau tu khe || 35 ||
[Analyze grammar]

tadā badrīpriye nāgavikramo nandakūbaraḥ |
sainyeśvarā bhaṭāścāpi vimāneṣvadhiruhya ca || 36 ||
[Analyze grammar]

vaimānikaṃ mahāyuddhaṃ cakrire sarvanāśakam |
haristadā vicāryaiva durgāṃ tu gatirodhinīm || 37 ||
[Analyze grammar]

prāha śatruvimānānāṃ gatirodhān samācara |
nipātaya kṣitau śatruvimānāni samantataḥ || 38 ||
[Analyze grammar]

ityuktā rodhinīdurgā cādhyātmadevatātmikā |
nandibhillavimānānāṃ gatiṃ rurodha sarvathā || 39 ||
[Analyze grammar]

garimānāmadurgā ca gurvī gurvītamā svayam |
vimāneṣu mahābhāraṃ dadhāra teṣu vai drutam || 40 ||
[Analyze grammar]

avaterurnipetuśca kṣitau vimānakāni vai |
gantuṃ naiva samarthāni bhārākrāntāni sarvataḥ || 41 ||
[Analyze grammar]

tadgatā yoddhṛvargāśca hatāḥ śastrādibhistadā |
nāgavaimānikairbadri tataste śaraṇaṃ yayuḥ || 42 ||
[Analyze grammar]

dharmavajro'pi śaraṇaṃ cāyayau nāgavaikramam |
nandibhillo'sahamānaḥ khaḍgamādāya dīrghakam || 43 ||
[Analyze grammar]

hantuṃ nāgaṃ pradudrāva vimānamāruroha ca |
tāvattu kālakālena mahākālena vidhṛtaḥ || 44 ||
[Analyze grammar]

keśeṣu mastake vahni nāgavikramarūpiṇā |
khaḍgena tatkarau chitvā pātitau khaḍgabhūṣaṇau || 45 ||
[Analyze grammar]

gadayā pothitaḥ so'pi papāta raṇamūrdhani |
mahāśaktyā bhinnavakṣā mumurṣuḥ stavanaṃ vyadhāt || 46 ||
[Analyze grammar]

nandibhilla uvāca |
namo namaste nijarakṣakāya namo namaste'nyavināśakāya |
namo namaste śivasaṃgrahāya kalādhināthāya namonamaste || 47 ||
[Analyze grammar]

namo namaste bahumohanāya namo'tigarviṣṭhasuśāsakāya |
namo hṛdisthāya pareśvarāya cā'nādinārāyaṇa te namo'stu || 48 ||
[Analyze grammar]

namo'kṣareśāya parāvarāya namo namaste'khilakāraṇāya |
namaḥ samastāṃgajatattvagarbhaprapūrakāyācyuta te namo'stu || 49 ||
[Analyze grammar]

namo'vatārinnavatāradhartre hyanantamuktā'bhiniṣevitāya |
anādikṛṣṇāya pareśvarāya nārāyaṇāyeti namo'stu tubhyam || 50 ||
[Analyze grammar]

śrīkāntarūpāya rameśvarāya rādhādhināthāya namo namaste |
namo'stu te śrīpurapālakāya bhūmannamaste laliteśvarāya || 51 ||
[Analyze grammar]

sarveśvarīśāya samastasarveśvareśvareśāya namo'stu tubhyam |
vairājanāthāya jaganniyantremāyeśvarāyā'cyuta tenamo'stu || 52 ||
[Analyze grammar]

pitṝrṣidevarṣiśarīrakāya carācarāntaḥstha ca te namo'stu |
śrīmāṇikīpāśavatīścarāyapraśādhināthāya namo'stu tubhyama || 53 ||
[Analyze grammar]

brahmapriyāvāmanivāsakāya haripriyādyābhirabhiṣṭutāya |
kṛtasthalī kuṃkumavāpikāya gopālabālāya namo namaste || 54 ||
[Analyze grammar]

śrīkaṃbharāmātṛbhavāya kṛṣṇanārāyaṇaśrīśa ca te namo'stu |
sādhusvarūpāya makhātmakāya svāminnamaste raṇarañjanāya || 55 ||
[Analyze grammar]

janmasthitibhraṃśakarāya viṣṇo jiṣṇo namaste parameśvarāya |
sadbhaktalabhyāya kṛpāvaśāya śaktāya kālāya namo bhavāya || 56 ||
[Analyze grammar]

rudrāya bāṇāya rathāya śāstre yamāya dharmāya namo dvijāya |
prāṇāyajīvāya tadātmanete'nvitāyariktāyanamo'vyayāya || 57 ||
[Analyze grammar]

nāgasvarūpāya madantakāya hṛdyāya nirvāṇakarāya dhātre |
śīghraṃ śaraṇyaṃ tvamabhiprapadya nayā'kṣaraṃ mokṣapadaṃ hare mām || 58 ||
[Analyze grammar]

kṛtāparādhaṃ bahugarvadṛbdhaṃ paraśriyaṃ vīkṣya sadā jvalantam |
raṇe sthitaṃ prāṇagatiṃ tyajantaṃ kṣamāpya sarvaṃ naya mokṣaṇaṃ te || 59 ||
[Analyze grammar]

sarvajña sarveśa samastacakṣuḥsamastakarṇā'tmamanassu saṃstha |
divyaṃnijaṃ darśanamatra dehi mṛtānsamastāṃśca samuddharā'tra || 60 ||
[Analyze grammar]

hare'gnirātena vibodhitena mayāpi garvādavamānitastvam |
atoṣadāvānalamadhyamāptaṃ samuddhara śrīśa vidhehi divyam || 61 ||
[Analyze grammar]

svargaṃ yathā vā narakaṃ madarthaṃ yadasti tatte'rpitamatra kṛṣṇa |
prapannajīvaṃ paralokayānaṃ nayā'kṣaraṃ dhāma vināśya pāpam || 62 ||
[Analyze grammar]

hare kṛṣṇa hare viṣṇo kṛṣṇanārāyaṇa prabho |
tavāsmīti tavāsmīti mokṣaṃ mā naya mādhava || 63 ||
[Analyze grammar]

ityuktvā maunamādāya kṛtāñjalirhṛdantare |
viveśa nandibhillo vai smaran dhyāyan prabhuṃ patim || 64 ||
[Analyze grammar]

badrike'tha tadā kṛṣṇanārāyaṇo nijād rathāt |
utplutya nandibhillāya dātuṃ darśanamāyayau || 65 ||
[Analyze grammar]

netrayorgocaraḥ kṛṣṇo'bhavad divyasvarūpavān |
hastena kalpitaṃ vāri nandibhillamukhe'dadāt || 66 ||
[Analyze grammar]

dagdhapāpastadā nandibhillaḥ pītvā harerjalam |
tyaktvā dilāvarīṃ pṛthvīṃ vimānenā'kṣaraṃ yayau || 67 ||
[Analyze grammar]

divyadeho harerdāso dhāmnyakṣare vyarājata |
tathā tatra raṇe naṣṭā hatā ye tān kṛpāvaśaḥ || 68 ||
[Analyze grammar]

kṛṣṇanārāyaṇo mokṣe ninye vaikuṇṭhaprabhṛtau |
nandibhillasya nāśena tatsainyāni drutaṃ hareḥ || 69 ||
[Analyze grammar]

śaraṇaṃ tvāyayuḥ śeṣamānavā bhayavihvalāḥ |
vijayasya mahāśaṃkhanādaṃ cakāra kūbaraḥ || 70 ||
[Analyze grammar]

nāgavikrama evā''jau dhvajaṃ cakāra cāmbare |
kṛṣṇanārāyaṇastatra dadhmau śaṅkhaṃ jayārthadam || 71 ||
[Analyze grammar]

sainyāni śrīkṛṣṇarakṣitāni dadhmurhi vārijān |
bherīśca tāḍayāmāsurvyadhurmahotsavāṃstathā || 72 ||
[Analyze grammar]

jayo nāgasya ca harerjayo'pi kubarasya ca |
kālarudrā'jaśaktīnāṃ vijayo'stītyaghoṣayan || 73 ||
[Analyze grammar]

viremuryuddhataḥ sarve badrike lūnikātaṭe |
viśaśramuryathāsthānaṃ śavānāṃ mārgaṇaṃ tathā || 74 ||
[Analyze grammar]

mṛtānāṃ jīvatāṃ cāpi vyavasthāṃ cakrire bhaṭāḥ |
sajīvāḥ śrīkṛṣṇanārāyaṇena kṛpayā drutam || 75 ||
[Analyze grammar]

spṛṣṭāḥ kareṇa yugapat tāvatsvarūpadhāriṇā |
naurujaścā'kṣatāścāpi svasthāḥ pūrṇā'savo'bhavan || 76 ||
[Analyze grammar]

atha ye tu śavāstatra nadyāṃ garteṣu gahvare |
bhūtale raṇabhūmau ca teṣāmantyavidhiḥ kṛtaḥ || 77 ||
[Analyze grammar]

athotsavaṃ nāgarājaścakāra yuddhapattane |
vijayotsavamāsādya dadau dānāni sarvaśaḥ || 78 ||
[Analyze grammar]

prajāḥ pradadurupadā rājñe jayanimittikāḥ |
kṛṣṇasya pūjanaṃ cakrurjayapradāya cakriṇe || 79 ||
[Analyze grammar]

atha badrīpriye kṛṣṇanārāyaṇaḥ pumuttamaḥ |
iyeṣa nāgarājāya dātuṃ dilāvarīṃ purīm || 80 ||
[Analyze grammar]

nāgavikramarājānaṃ prāha kṛṣṇastathecchayā |
rājan rājyaṃ himaśailād vindhyācalāntakaṃ śubham || 81 ||
[Analyze grammar]

nandibhillasya sāmrājyaṃ tvayi nyastuṃ hi kāṃkṣaye |
bhava sajjastatastūrṇaṃ yuddhasainyasamastakaḥ || 82 ||
[Analyze grammar]

āyāmi yāmunīṃ ramyāṃ purīṃ dilāvarīṃ prati |
tatrā'bhiṣeko bhavataḥ kartavyo'sti mayā nṛpa || 83 ||
[Analyze grammar]

badrike kṛṣṇavacanaṃ prāpyeva nāgavikramaḥ |
tūrṇaṃ sainyayutaḥ kṛṣṇayuto dilāvarīṃ purīm || 84 ||
[Analyze grammar]

yayau tatra nandibhillīsabhāsamājamāhvayat |
prakāśaṃ prāha rājā'sau sarvasamājasannidhau || 85 ||
[Analyze grammar]

yuddhe kṛṣṇasahāyena mayā prāptā dilāvarī |
nagarī madhyakhaṇḍasthā yāmunīsadṛśī purī || 86 ||
[Analyze grammar]

himavadvindhyayormadhye rājyaṃ śrīkṛṣṇasātkṛtam |
mayā bhaktena vai kṛṣṇo rājyaṃ karotu sarvathā || 87 ||
[Analyze grammar]

ityevaṃ nāgarājo vai bhillīsabhāsamājake |
vyājahāra tadā kṛṣṇaḥ prakāśaṃ pratyabodhayat || 88 ||
[Analyze grammar]

śṛṇvantu sarvarājyeṣṭāḥ prajā rājā sukhāvaham |
mayā bhaktasya nāgasya yajñaḥ prakāritaḥ śubhaḥ || 89 ||
[Analyze grammar]

aprasahya yaśastasya nandibhillo raṇaṃ vyadhāt |
jito nāgena sahasā nāgarājyaṃ tatastvidam || 90 ||
[Analyze grammar]

dilāvarīpurīrājye sāmrājye nāgavikramam |
abhiṣiñcāmi kṛṣṇo'haṃ sa samrāḍasti vo'dhunā || 91 ||
[Analyze grammar]

ityuktvā śrīkṛṣṇanārāyaṇo bhillisabhāsane |
sāmrājyamukuṭaṃ kṛṣṇo dadau nāgāya mastake || 92 ||
[Analyze grammar]

mahāsāmrājyamāsādya nāgarājo'pi badrike |
dadau dānāni viprebhyo grāmān deśāṃśca vāṭikā || 93 ||
[Analyze grammar]

svarṇaratnagṛhakṣetradhenuvājigajādikān |
kanyādānāni ca dadau tathā dhanāni sampadaḥ || 94 ||
[Analyze grammar]

mṛdhe mṛtānāṃ śreyo'rthaṃ śrāddhayajñaṃ cakāra saḥ |
evaṃ rājyadhvajaṃ rājālaye cā''ropya mādhavaḥ || 95 ||
[Analyze grammar]

kṛtvā samrāṇmahābhūpaṃ nāgavikramaṇaṃ nṛpam |
vyavasthāṃ kārayāmāsa rājyasya śobhanāṃ hariḥ || 96 ||
[Analyze grammar]

sainyapebhya upadādi dadau bhaṭebhya ityapi |
toṣayāmāsa bhagavān sarvadehibhya āpaṇaiḥ || 97 ||
[Analyze grammar]

parihāraṃ cakāraiva nāgāhvaye pure prabhuḥ |
nāganāmnā purī nāgāhvayā khyātiṃ gamiṣyati || 98 ||
[Analyze grammar]

bhillīsabhābhidhānena bhillīnāmnā'pi sā purī |
dilāvarīsatīnāmnā dilāvarī bhaviṣyati || 99 ||
[Analyze grammar]

tannāmnā nagarī sāpi dilāvarīti yāmunī |
rājadhānī śāśvatīyaṃ kalpāntā saṃbhaviṣyati || 100 ||
[Analyze grammar]

ityevaṃ badrike sarvaṃ vyavasthāpya narāyaṇaḥ |
vimānenā''yayau naijāṃ kuṃkumavāpikāpurīm || 101 ||
[Analyze grammar]

paṭhanācchravaṇādasya smaraṇāt pāpasaṃhṛtiḥ |
bhuktirmuktistathā śāntirmiledante'kṣaraṃ padam || 102 ||
[Analyze grammar]

iti śrīlakṣmīnārāyaṇīyasaṃhitāyāṃ caturthe tiṣyasantāne dharmavajrādisenāpatīnāṃ nāgavikramaśaraṇāgamaḥ vimānayuddhaṃ nandibhillanṛpamṛtyukālīnastavanam śrīkṛṣṇanārāyaṇakṛtamokṣaṇam dilāvarīsāmrājyaṃ nāgavikrame bhagavatā nihitaṃ cetyādinirūpaṇanāmā pañcāśītitamo'dhyāyaḥ || 85 ||
[Analyze grammar]