Chapter 66

śrīnaranārāyaṇa uvāca |
śṛṇu badrīpriye devi kathāṃ gṛdhrasya mokṣadām |
pārāyaṇasthale nityaṃ satāmucchiṣṭabhojanam || 1 ||
[Analyze grammar]

gṛdhro jagdhvā tu madhyāhne muktimavāpa śāśvatīm |
nyagrodhaṣaṇḍe jaraṭhā gṛdhrā āsan śatādhikāḥ || 2 ||
[Analyze grammar]

ābālavṛddhāḥ sarve sma vaṭaṣaṇḍe vasanti vai |
uḍḍīyoḍḍīya gagane mārgayanti sma bhojanam || 3 ||
[Analyze grammar]

dūraṃ dūraṃ parākramya bhakṣayanti sma mārgitam |
teṣāṃ pārāyaṇakāle mahotsavaḥ sadā'bhavat || 4 ||
[Analyze grammar]

nityaṃ yatra bhojanāni kurvantyasaṃkhyamānavāḥ |
tatra pārāyaṇakṣetre bhojanānāṃ tu bhūmiṣu || 5 ||
[Analyze grammar]

ucchiṣṭāni patanti sma vividhānnāni badrike |
bharjitānnāni śākāni miṣṭānnāni patanti ca || 6 ||
[Analyze grammar]

vaiṣṇavānāṃ paṃktayo vai yatra bhavantyaharniśam |
sādhvīnāṃ paṃktayaścāpi sādhūnāṃ paṃktayastathā || 7 ||
[Analyze grammar]

bhavanti bhuñjate tatra prasādānnāni sādhavaḥ |
taducchiṣṭāni pātrebhyaḥ patitāni tu yāni vai || 8 ||
[Analyze grammar]

pātrocchiṣṭāni cānnāni gṛdhrāste śataśaḥ sadā |
paṃktyante bhuṃjate sarve tṛptā bhavanti cānvaham || 9 ||
[Analyze grammar]

ucchiṣṭakṣepaṇasthāne mahotkare'pi pakṣiṇaḥ |
prakṣiptocchiṣṭaparyuṣitānnaśākāni bhuṃjate || 10 ||
[Analyze grammar]

śṛṇu badrīpriye caitraśukladvādaśikādine |
svataḥprakāśo bhagavān vyāso madhyāhnake śubhe || 11 ||
[Analyze grammar]

bhuktvocchiṣṭaṃ pracikṣepa pārśve kṣetre sapātrakam |
gṛdhrastveko hi jaraṭho vaṭāduḍḍīya cāgamat || 12 ||
[Analyze grammar]

abhakṣayat taducchiṣṭaṃ kṛṣṇaprasādamiśritam |
tāvattasya samastāni naṣṭāni pātakāni vai || 13 ||
[Analyze grammar]

puṇyātmā tvabhavattūrṇaṃ karmāśayo'sya bhasmitaḥ |
bahūnāṃ paśyatāṃ pakṣī papāta bhūtale drutam || 14 ||
[Analyze grammar]

nirgatya pakṣidehāt sa divyadehaścaturbhujaḥ |
śrīhareḥ pārṣado bhūtvā'dṛśyata tatra cā'mbare || 15 ||
[Analyze grammar]

vismitāḥ sādhavaḥ sarve tathā'nye vaiṣṇavā api |
vīkṣya taṃ pārṣadarūpaṃ papracchuḥ sādhavastu tam || 16 ||
[Analyze grammar]

ko bhavān pakṣirūpo'pi pārṣadaṃ rūpamāptavān |
vada sarvaṃ yathātathyaṃ nivartaya kutūhalam || 17 ||
[Analyze grammar]

ityevaṃ pārṣadaḥ śrutvovāca sādhūn samutsukaḥ |
abhuvaṃ pūrvadeho'haṃ kauliko mānavo bhuvi || 18 ||
[Analyze grammar]

nāmnā daṇḍāraṇiścāsaṃ hiṃsācauryaparāyaṇaḥ |
khādake nagare cāsaṃ mahākuṭumbavānaham || 19 ||
[Analyze grammar]

mama vṛddhasya vṛddho yastasya putrā daśā'bhavan |
daśānāṃ śataśaścāsan śatānāṃ tu sahasrakam || 20 ||
[Analyze grammar]

kanyakāśca tathā hyāsaṃstāsāṃ vaṃśāḥ sahasrakam |
khādakaṃ nagaraṃ sarvaṃ prāyaḥ kaulikaveśitam || 21 ||
[Analyze grammar]

te sarve'pi vayaṃ nityaṃ gṛhasthāḥ sukuṭumbinaḥ |
akaravāma vṛttyarthaṃ kṛṣikarmāṇi nityadā || 22 ||
[Analyze grammar]

duṣkāle coṣṇakāle vā kurmaścauryaṃ prasahya vā |
luṇṭanaṃ cāpaharaṇaṃ dhanā'nnā'mbarasampadām || 23 ||
[Analyze grammar]

viprāṇāṃ vāpi sādhūnāṃ kṣatrāṇāṃ cānyadehinām |
bhakṣayāmastadannādi dhārayāmo'mbarādikam || 24 ||
[Analyze grammar]

tena pāpena pāpiṣṭhā mṛtā vayaṃ tu ye ca ye |
vṛddhā bālā yuvāno vā narā nāryaśca te khalu || 25 ||
[Analyze grammar]

sarve vayaṃ vaṭe gṛdhrā ime jātāḥ sma vaṃśajāḥ |
yāmyaduḥkhānyanubhūya gṛdhrā jātā vaṭe tviha || 26 ||
[Analyze grammar]

teṣu sarveṣu vṛddho'haṃ cauro'bhavaṃ viśeṣataḥ |
corayitvā muhusteṣāṃ poṣaṇaṃ saṃvyadhāṃ tadā || 27 ||
[Analyze grammar]

tena yāmyamahākaṣṭaṃ muktvā'tra gṛdhratāṃ gataḥ |
vṛddhaḥ prācīnatamaśca bhavāmi bahuvatsaraḥ || 28 ||
[Analyze grammar]

vyāsasyocchiṣṭamāsādya hareḥ prasādamuttamam |
dagdhapāmā'bhavaṃ naṣṭavāsanaśca drutaṃ tviha || 29 ||
[Analyze grammar]

muktadaśāṃ gataścāsmi muktaḥ pakṣiśarīrataḥ |
prayāmi tvadya badarikāśramaṃ pāvanaṃ tataḥ || 30 ||
[Analyze grammar]

śvetadvīpaṃ prayāsyāmi vaikuṇṭhaṃ ca tataḥ param |
evaṃ me mokṣaṇaṃ jātaṃ prasādasyaiva bhakṣaṇāt || 31 ||
[Analyze grammar]

prasādasya tu māhātmyaṃ mayā vaktuṃ na śakyate |
mahāpāpāḥ prasādena mucyante cādhamā api || 32 ||
[Analyze grammar]

prasādasya tu māhātmyamati jānantyajādayaḥ |
matsyo bhūtvā svayaṃ brahmā cakhāda suprasādakam || 33 ||
[Analyze grammar]

surāḥ prasādamicchanti pitaraḥ sutarāṃ sadā |
pāpaghnaṃ puṇyadaṃ sattvavardhanaṃ mokṣadaṃ tathā || 34 ||
[Analyze grammar]

prāṇā yeṣāṃ na niryānti mṛtyuduḥkhajuṣāṃ yadi |
teṣāṃ prasādalābhena prāṇā niryānti vai drutam || 35 ||
[Analyze grammar]

bhūtapretapiśācānāṃ chāyā tasya na lumpati |
na bādhante ḍākinīśākinīpiśācikāśca tam || 36 ||
[Analyze grammar]

prasādabhakṣabhaktānāṃ nirmalānyāntarāṇyapi |
dhārmikāni pravartante tamaḥpāpakṣayāṇi ca || 37 ||
[Analyze grammar]

aprasādabhojino'tra dehaṃ sadā piśācakaḥ |
prasādabhakṣabhaktasya tanuḥ sadā tu devatā || 38 ||
[Analyze grammar]

prasādabhojane dehe devā vasanti nityaśaḥ |
prasādabhojināṃ divyaṃ śarīraṃ pāvanaṃ sadā || 39 ||
[Analyze grammar]

aprasādaprabhoktāraḥ pāpabhoktāra eva te |
bhūtapretapiśācānnaṃ prasādavarjitaṃ hi yat || 40 ||
[Analyze grammar]

prasādabhojināṃ nityaṃ kṛpā kṛṣṇasya jāyate |
kṛpayā sampadaḥ sarvā dehānte mokṣasampadaḥ || 41 ||
[Analyze grammar]

prasādabhojanaṃ nityaṃ nirguṇaṃ doṣavarjitam |
api svādabharaṃ sarvaṃ niḥsvādaṃ tat sadā matam || 42 ||
[Analyze grammar]

kṛṣṇārpitā rasāḥ sarve bhuktā badhnanti te nahi |
rūpāṇi yāni ramyāṇi surūpākṛtayaśca yāḥ || 43 ||
[Analyze grammar]

cākacakyayutāścāpi tejaḥprabhāsamanvitāḥ |
kṛṣṇārpitāstu tā bhuktā naiva badhnanti nirguṇāḥ || 44 ||
[Analyze grammar]

gandhā uccāvacā ye ye tailasārādayo'pi ca |
kastūrīkesarādyāśca karpūraṃ gandhasārakāḥ || 45 ||
[Analyze grammar]

kṛṣṇārpitā nirguṇāste bhuktā badhnanti naiva ha |
śabdā ramyāḥ svarthabharā manoharāśca narmadāḥ || 46 ||
[Analyze grammar]

susvarā utsavapūrṇā ākarṣakāśca tāninaḥ |
kṛṣṇārpitā nirguṇāste bhuktā badhnanti naiva ha || 47 ||
[Analyze grammar]

vāditrāṇi samastāni saṅgītāni ca gītayaḥ |
ālāpāścā'rpitāḥ kṛṣṇe nirguṇā bandhavarjitāḥ || 48 ||
[Analyze grammar]

sparśāśca komalāḥ snigdhā mṛdavaḥ śītalā api |
uṣṇā gamyā iṣṭavaryā mahānandapradāḥ sukhāḥ || 49 ||
[Analyze grammar]

cetanasthā jaḍasthā vā kṛṣṇārpitā na bandhadāḥ |
saṃyogā vividhāścāpi kaṭhinā śithilāśca ye || 50 ||
[Analyze grammar]

dravāścāpi samastā ye snehā ye ca mithaḥ śubhāḥ |
vijñānāni ca kāvyāni tarkāśca buddhayastathā || 51 ||
[Analyze grammar]

sukhaduḥkhe sarvavidhe sarvā icchāśca vāsanāḥ |
dveṣā yatnāḥ kriyāḥ sarvā dharmā'dharmādayo'pi ye || 52 ||
[Analyze grammar]

bhāvanāśca samastā vai sarvakarmāṇi yāni vai |
bhāvā abhāvāḥ śrīkṛṣṇe'rpitāste nirguṇāḥ sadā || 53 ||
[Analyze grammar]

tadbhoktāraṃ na badhnanti yato māyāvivarjitāḥ |
māyāsattvaṃ rajaścāpi tamo'haṃmamatādayaḥ || 54 ||
[Analyze grammar]

svatvaṃ nidrā ca tandrā ca kṛṣṇe'rpitā tu nirguṇāḥ |
naro nārī bālikā ca bālaḥ kanyā yuvā tathā || 55 ||
[Analyze grammar]

vṛddho vṛddhā'rpitāḥ kṛṣṇe nirguṇā mokṣabhāginaḥ |
gāvo vṛṣā gajā uṣṭrā aśvā ajāḥ prajāstathā || 56 ||
[Analyze grammar]

gṛhaṃ sarvopakaraṇaṃ bhogyajātaṃ samastakam |
veṣā bhūṣāḥ sampadaśca yānāni vāhanānyapi || 57 ||
[Analyze grammar]

raktāni maṇayaścāpi kaṇāḥ patrāṇi sarvathā |
phalapuṣpāṇyarpitāni kṛṣṇe nirbandhanāni vai || 98 ||
[Analyze grammar]

snānaṃ dhyānaṃ dhāraṇā ca pūjā sevā pradānakam |
vrataṃ tīrthaṃ puṇyamiṣṭaṃ vāpīkūpataḍāgakam || 59 ||
[Analyze grammar]

sarvaṃ kṛṣṇārpitaṃ divyaṃ nirguṇaṃ bandhavarjitam |
pravāso bhāravāhitvaṃ bhṛtyatā dāsatā kṛtiḥ || 60 ||
[Analyze grammar]

śilpitā kārutā kṛṣṇasamarpitaṃ tu nirguṇam |
kalākauśalyamatyarthaṃ navā''viṣkaraṇānyapi || 61 ||
[Analyze grammar]

sādhanānyutsavānāṃ ca pratimāśca pṛthagvidhāḥ |
śṛṃgārāṇi nirguṇāni kṛṣṇe'rpitāni sarvathā || 62 ||
[Analyze grammar]

pācanaṃ karṣaṇaṃ yānaṃ kartanaṃ lavanaṃ tathā |
sīvanaṃ cāpi sandhānaṃ kṛṣṇārpitaṃ tu nirguṇam || 63 ||
[Analyze grammar]

śvasanaṃ darpaṇaṃ sparśaḥ svādaśca ghrāṇanaṃ tathā |
bhogaḥ phalaṃ samastaṃ ca kṛṣṇārpitaṃ tu nirguṇam || 64 ||
[Analyze grammar]

vapanaṃ secanaṃ cābhyavardhanaṃ rakṣaṇaṃ tathā |
poṣaṇaṃ grahaṇaṃ sarvaṃ kṛṣṇārpitaṃ tu nirguṇam || 65 ||
[Analyze grammar]

mañjanaṃ kṣuvanaṃ cāpi mroḍanaṃ troṭanaṃ tathā |
hasanaṃ ramaṇaṃ cāpi kṛṣṇārpitaṃ tu nirguṇam || 66 ||
[Analyze grammar]

vihāraśca samāptiścārambho vistāraṇaṃ tathā |
saṃkocaśca vikāsaśca kṛṣṇā'rpitāṃstu nirguṇāḥ || 67 ||
[Analyze grammar]

jṛṃbhaṇaṃ pakṣaṇaṃ cāpi nimeṣonmeṣaṇe tathā |
svapanaṃ kūrdanaṃ pātaḥ kṛṣṇā'rpitāstu nirguṇāḥ || 68 ||
[Analyze grammar]

dhāvanaṃ kramaṇaṃ nyāsaḥ sthairyamuḍuyanaṃ layaḥ |
prakāśanaṃ yaśaḥ kīrtiḥ kṛṣṇā'rpitāstu nirguṇāḥ || 69 ||
[Analyze grammar]

kaṇḍanī peṣaṇī cullī jalakuṃbhī ca mārjanī |
vardhanī śayanī koṣṭhī kṛṣṇā'rpitāstu nirguṇāḥ || 70 ||
[Analyze grammar]

mastakaṃ netrakarṇoraḥkaṇṭhahastodarādayaḥ |
jaghanorusakthijānujaṃghāpādādayastathā || 71 ||
[Analyze grammar]

kṛṣṇārpitāṅgasarvasvaṃ nirguṇaṃ mokṣadaṃ bhavet |
rugṇatā svāsthyamudayo vṛddhirhāniḥ praśāsanam || 72 ||
[Analyze grammar]

arjanaṃ vyavahāraśca kṛṣṇā'rpitāstu nirguṇāḥ |
vyāpāro vikrayo vinimayaḥ krayo'pahāritā || 73 ||
[Analyze grammar]

bhikṣā copārjanaṃ vṛttirjīvikā''yavyayau tathā |
sadasad yat samastaṃ tat kṛṣṇārpitaṃ tu nirguṇam || 74 ||
[Analyze grammar]

strīpuṃnapuṃsakabhāvā dhātavaśca pravartanā |
nivartanādyāḥ śrīkṛṣṇārpitā nirguṇamuktidāḥ || 75 ||
[Analyze grammar]

bandhaśūnyā harāvarpaṇamāptāḥ sarvasampadaḥ |
mokṣāyaiva prajāyante kṛṣṇaprasannatāpradāḥ || 76 ||
[Analyze grammar]

yasya dravyaṃ kṛṣṇaśūnyaṃ naiva naiva guṇāstathā |
yasya karma kṛṣṇaśūnyaṃ naiva naiva tathā'stitā || 77 ||
[Analyze grammar]

na jīvanaṃ kṛṣṇaśūnyaṃ na prāṇāḥ kṛṣṇavarjitāḥ |
na caitanyaṃ kṛṣṇaśūnyaṃ na varṇaḥ kṛṣṇavarjitaḥ || 78 ||
[Analyze grammar]

nāśramaḥ śrīkṛṣṇaśūnyo na tyāgaḥ kṛṣṇavarjitaḥ |
na dīkṣā śrīkṛṣṇaśūnyā na mṛtyuḥ kṛṣṇavarjitaḥ || 79 ||
[Analyze grammar]

neṣaṇāḥ śrīkṛṣṇaśūnyāstasya sarvaṃ hi nirguṇam |
divyaṃ kṛṣṇārthakaṃ sarvaṃ sarvaṃ mokṣapradaṃ hi tat || 80 ||
[Analyze grammar]

kṛṣṇaprasannatādaṃ tat tasya sarvaṃ virājate |
so'pi prasādapātraṃ śrīkṛṣṇārpitastadīyakaḥ || 81 ||
[Analyze grammar]

kṛṣṇatādātmyamāpto vai mahābhāgavato hi saḥ |
koṭikalyāṇabhūmiḥ saḥ sarvakalyāṇado'pi saḥ || 82 ||
[Analyze grammar]

adharmoddhārakaḥ sa syādaṃśāvatāra eva saḥ |
sādhuḥ sa eva śrīkṛṣṇasampadvān mukta uttamaḥ || 83 ||
[Analyze grammar]

brahmaiva sa tu vijñeyo yaḥ śrīkṛṣṇārthakaḥ sadā |
mūrtiḥ sā śrīkṛṣṇanārāyaṇavāsārthamandiram || 84 ||
[Analyze grammar]

taddehaḥ śrīkṛṣṇadehastanmanaḥ kṛṣṇamānasam |
tadindriyāṇi śrīkṛṣṇendriyāṇyeva na vai pṛthak || 85 ||
[Analyze grammar]

tatkriyāḥ śrīkṛṣṇanārāyaṇakriyā na cetarāḥ |
tatsarvasvaṃ kṛṣṇa eva tatpūjā kṛṣṇapūjanam || 86 ||
[Analyze grammar]

tatsevā śrīkṛṣṇasevā sa eva kṛṣṇamūrtikaḥ |
tasya prasannatā kṛṣṇaprasannatā na saṃśayaḥ || 87 ||
[Analyze grammar]

tadvākyaṃ kṛṣṇavacanaṃ tadāśīḥ kṛṣṇakīrtitā |
tasya prāptiḥ kṛṣṇaprāptirnāsti bhedo manāgapi || 88 ||
[Analyze grammar]

avatārāsta evoktā lokoddhārakarā bhuvi |
taṃ bhajantu mahārājaṃ kṛṣṇanārāyaṇaṃ prabhum || 89 ||
[Analyze grammar]

prayāmyahaṃ viśālāṃ ca prasādamātrabhojanaḥ |
svasti vo'stu kṛṣṇanārāyaṇaśrīnāthavallabhaḥ || 90 ||
[Analyze grammar]

hatyuktvā badrike gṛdhro divyo badrīśvaraṃ yayau |
naranārāyaṇaṃ māṃ tu prāptastapaścakāra ha || 91 ||
[Analyze grammar]

tataḥ śvetadvīpadhāma yayau nārāyaṇāśritam |
tato yayau sa vaikuṇṭhaṃ prāptapūrṇamanorathaḥ || 92 ||
[Analyze grammar]

atha tasmād brahmadhāma prayāsyatyakṣaraṃ padam |
prabhonārāyaṇakṛṣṇanārāyaṇeti vai japan || 93 ||
[Analyze grammar]

ityevaṃ badrike jāto mokṣastasya prasādataḥ |
tasmāt sarvaṃ karaṇīyaṃ kāraṇīyaṃ prasādajam || 94 ||
[Analyze grammar]

athā'nye śataśo gṛdhrā vaṭe prasādabhojinaḥ |
kaulikasya purā sambandhino gṛdhragatiṃ gatāḥ || 95 ||
[Analyze grammar]

te'pi nityaṃ bhuṃjate sma prasādaṃ sādhuyoginām |
tena kṣapitakarmāṇo'bhavan puṇyābhibhāginaḥ || 96 ||
[Analyze grammar]

dehāṃstiryagjātijātān tyaktvā divyaśarīriṇaḥ |
bhūtvā śrībadarīnāthaṃ yayurdivyāśramaṃ tu nau || 97 ||
[Analyze grammar]

tatra taptvā tapaste ca yayuḥ śvetālayaṃ hareḥ |
tatra nārāyaṇasevāṃ kṛtvā vaikuṇṭhakaṃ yayuḥ || 98 ||
[Analyze grammar]

te'pi yāsyanti paramaṃ dhāmā'kṣaraṃ tataḥ param |
prajñānārāyaṇapadmāśrīnārāyaṇajāpinaḥ || 99 ||
[Analyze grammar]

badri prasādavat kṛṣṇasattāṃ dhuliṃ ca pāvanīm |
satāṃ pādajalaṃ pūtaṃ pītvā yānti paraṃ divam || 100 ||
[Analyze grammar]

satāṃ prasevayā pūtā na kalpante bhavāya te |
satāṃ mūrtiḥ kṛṣṇamūrtiḥ kathā kṛṣṇavacaḥ śubham || 101 ||
[Analyze grammar]

kṛṣṇārpitaṃ vaiṣṇavaṃ vai tat sevyaṃ netarat kvacit |
bhuktirmuktirbhavettena śrīkṛṣṇāptirbhavetsadā || 102 ||
[Analyze grammar]

paṭhanācchravaṇādasya tiryagyonipradaṃ tvagham |
naśyatyeva paraṃ puṇyaṃ jāyate nātra saṃśayaḥ || 103 ||
[Analyze grammar]

kṛṣṇe bhaktirjāyate'pi satsu prītiḥ prajāyate |
sarvārpaṇādibhāvaḥ syāt tanmayatvaṃ tato bhavet || 104 ||
[Analyze grammar]

iti śrīlakṣmīnārāyaṇīyasaṃhitāyāṃ caturthe tiṣyasantāne pūrvajanmani daṇḍāraṇināmakaulikasya gṛdhrajanmani kathāsthale bhagavatsādhuprasādocchiṣṭabhojino mokṣaṇaṃ tatsambandhigṛdhrāṇāmapi prasādabhojanena mokṣaṇamityādinirūpaṇanāmā ṣaṭṣaṣṭitamo'dhyāyaḥ || 66 ||
[Analyze grammar]