Chapter 64

śrīnaranārāyaṇa uvāca |
śṛṇu badrīpriye devi kathāṃ duritanāśinīm |
nyāyādhīśasya te vacmi paramokṣapradāyinīm || 1 ||
[Analyze grammar]

prasevanākhyanagare nyāyādhīśo'bhavad dvijaḥ |
nāmnā mukundasāvitro dharmādhyakṣo'tibuddhimān || 2 ||
[Analyze grammar]

samastanyāyaniṣṇāto vādavivādaśāntikṛt |
nirṇayaṃ pradadātyeva nyāyālayakṛtāsanaḥ || 3 ||
[Analyze grammar]

prajānāṃ hitakṛccāpi sa vādiprativādinoḥ |
luñcāṃ prāpyobhayayoścobhayalābhaṃ tu nirṇaye || 4 ||
[Analyze grammar]

pradarśya vādaśāntiṃ sa karotyeva visaṃśayām |
kintvevaṃ bahudhā luñcādhanaṃ saṃprāptavān param || 5 ||
[Analyze grammar]

pāpena pakṣaghātena rogeṇābhibhavaṃ gataḥ |
khadvāyāṃ sa sadā śete vāmāṃgaśūnyabhāgavān || 6 ||
[Analyze grammar]

parādhīno hyati jātaḥ patnībhṛtyakṛtakriyaḥ |
duḥkhamāpnoti hṛdaye śuśrāva bhṛtyavargataḥ || 7 ||
[Analyze grammar]

duḥkhanāśakaraṃ vākyaṃ kathāmāhātmyamuttamam |
ye prayānti kathāyāṃ vai rugṇāḥ pāpā adharmiṇaḥ || 8 ||
[Analyze grammar]

śuddhāḥ śrutvā kathāṃ yānti brahmadhāmā'kṣaraṃ hareḥ |
rogahīnāḥ prajāyante puṇyabhājo bhavantyapi || 9 ||
[Analyze grammar]

śrutvaivaṃ sa satīṃ patnīṃ prāha me mokṣaṇaṃ ca vā |
roganāśo yathā syādvai tathā vidhehi matkṛte || 46410 ||
[Analyze grammar]

sāpi śrutvā svāmivākyaṃ svāmiśreyaḥparā satī |
prajājanānāṃ vṛddhānāṃ sammatiṃ jagṛhe satī || 11 ||
[Analyze grammar]

kathaṃ patyuḥ roganāśaḥ pāpanāśaśca mokṣaṇam |
tat kartavyaṃ mayā tūrṇaṃ papraccheti mahājanān || 12 ||
[Analyze grammar]

mahājanā guṇagrāhā śreyase nyāyadāyinaḥ |
prāhuradya varaṃ śreyaḥ saṃhitāśravaṇaṃ matam || 13 ||
[Analyze grammar]

camatkārā nityanavāḥ śrūyante tu kathāsthale |
kalyāṇaṃ dehināṃ tatra karoti kṛpayā hariḥ || 14 ||
[Analyze grammar]

tamenaṃ nyāyakartāraṃ naya tatra kathāsthalīm |
kathāṃ śrutvā sato dṛṣṭvā natvā sabhāṃ samantataḥ || 15 ||
[Analyze grammar]

prapūjya paramātmānaṃ taveṣṭaṃ saṃbhaviṣyati |
patyuste sarvathā ceṣṭaṃ bhaviṣyati na saṃśayaḥ || 16 ||
[Analyze grammar]

ityuktā sā satī bhāryā nāmnā gayākṣiṇī yayau |
dravyaṃ bhṛtyān patiṃ nītvā narayāṇeḥ kathāsthalīm || 17 ||
[Analyze grammar]

mahodyānaṃ sthalīvāsaṃ kṛtvā snātvā suśobhanā |
patiṃ nītvā narayāne kathāmaṇḍapamāyayau || 18 ||
[Analyze grammar]

pakṣaghātā'bhibhūto'pi patirneme sabhājanān |
saṃhitāṃ vācakaṃ kṛṣṇamūrtiṃ neme ca lomaśam || 19 ||
[Analyze grammar]

ṛṣīn sādhūn praṇeme ca supto'pi narayānake |
tṛṇaṃ labdhvā mukhe pāpakṣamāṃ sadbhyo'pyayācata || 46420 ||
[Analyze grammar]

santo dayālavastasmai daduḥ pādajalāni ca |
prasādaṃ pradadustatra so'pi cakhāda satvaram || 21 ||
[Analyze grammar]

bhadrike tāvatā tasya dehe śaktirvyavardhata |
pakṣaṃ vāmaṃ suśaktaṃ saṃjātaṃ jāḍyavihīnakam || 22 ||
[Analyze grammar]

śūnyabhāvaṃ vihāyaiva caitanyasaṃbhṛtaṃ hyabhūt |
utthāya sahasā khaṣṭvāmadhyataḥ sa sabhāṃ prati || 23 ||
[Analyze grammar]

cakāra daṇḍavadbhūmau vidan māhātmyamuttamam |
nīrugṇatvaṃ darśanāttu tatkālaṃ samajāyata || 24 ||
[Analyze grammar]

tataḥ pūjāṃ cakārāpi dhanaratnādibhistadā |
vyāsapūjāṃ kathāmūrtipūjāṃ lomaśapūjanam || 25 ||
[Analyze grammar]

saṃhitāpūjanaṃ sādhusādhvīprapajūnaṃ tathā |
dvijarṣipūjanaṃ cakre bhūridānādidakṣiṇam || 26 ||
[Analyze grammar]

kathāṃ śuśrāva ca tataścaivaṃ nityaṃ cakāra ha |
mahimānaṃ vivedāpi kathāyā navajīvane || 27 ||
[Analyze grammar]

mṛtyormukhānmahārogānmuktiḥ kathāprabhāvataḥ |
satāmāśīrvacanaiśca viveda strīyuto hi saḥ || 28 ||
[Analyze grammar]

nyāyākṣiṇī tathā nyāyādhīśaḥ sādhuniṣevaṇam |
nityaṃ pracakratustatra nijāvāse muhurmuhuḥ || 29 ||
[Analyze grammar]

akurvātāṃ vicāraṃ ca maraṇād rakṣaṇaṃ tviha |
jātaṃ tasmājjīvanaṃ vai dātavyaṃ kṛṣṇalabdhaye || 46430 ||
[Analyze grammar]

na gantavyaṃ gṛhe cetaḥ sthātavyaṃ sādhumaṇḍale |
śrotavyā śrīsaṃhitāyāḥ kathā sarvārthadāyinī || 31 ||
[Analyze grammar]

sevanīyāḥ sādhavaśca toṣaṇīyā maharṣayaḥ |
tāraṇīyo nijātmā ca prāptavyaṃ paramaṃ padam || 32 ||
[Analyze grammar]

api nyāyo hi jagatāṃ kṛto'pi koṭilakṣadhā |
ātmanyāyaḥ kṛtaścenna kṛtaṃ kimapi tena na || 33 ||
[Analyze grammar]

toṣitā vādavivadāḥ kaliprāyā janā api |
api kṛṣṇastoṣito na kṛtaṃ sarvaṃ nirarthakam || 34 ||
[Analyze grammar]

rañjitāḥ kalikartāraḥ śamitā māyikā janāḥ |
santaśced rañjitā naiva kṛtaṃ sarvaṃ nirarthakam || 35 ||
[Analyze grammar]

arjitaṃ nāṇakaṃ koṭiḥ vardhitāḥ sampado jaḍāḥ |
arjitaṃ nā''tmakalyāṇaṃ kṛtaṃ sarvaṃ nirarthakam || 36 ||
[Analyze grammar]

sevitāḥ strīmahīmānāḥ satkṛtāśca kuṭumbinaḥ |
sevitāścet sādhavo na kṛtaṃ sarvaṃ nirarthakam || 37 ||
[Analyze grammar]

vanditā dravyadātāro bhojitā lampaṭā janāḥ |
nā'tithayaḥ pūjitāścet kṛtaṃ sarvaṃ nirarthakam || 38 ||
[Analyze grammar]

smṛtā nityaṃ kalahiṇaḥ vitaṇḍā uditāḥ sadā |
nārāyaṇo neritaścet kṛtaṃ sarvaṃ nirarthakam || 39 ||
[Analyze grammar]

poṣito nijadehaśca saṃskṛtā mūrdhajāḥ sadā |
saṃskṛtaṃ na hṛdayaṃ cet kṛtaṃ sarvaṃ nirarthakam || 46440 ||
[Analyze grammar]

ādhattaṃ bāhyavijñānaṃ vistāritāśca kalpanāḥ |
kṛṣṇadhyānaṃ na cādhattaṃ kṛtaṃ sarvaṃ nirarthakam || 41 ||
[Analyze grammar]

nirṇayā laukikā dattāḥ sattāḥ bhuktā tu māyikī |
ātmamokṣo niścito na kṛtaṃ sarvaṃ nirarthakam || 42 ||
[Analyze grammar]

śraddhā mṛṣā vivādeṣu kṛtā naije ca gaurave |
kṛṣṇanārāyaṇe cenna kṛtā sarvā nirarthikā || 43 ||
[Analyze grammar]

sammānaṃ bahudhā labdhaṃ svāgataṃ cāti vīkṣitam |
mānitaścenna kṛṣṇena mānaṃ cānyannirarthakam || 44 ||
[Analyze grammar]

tāḍitā daṇḍitā duṣṭāḥ kārāgāre nipātitāḥ |
kāmādayo daṇḍitā na daṇḍaścānyo nirarthakaḥ || 45 ||
[Analyze grammar]

mocitāḥ pīḍitā lokā vipado vinivāritāḥ |
svasya yāmyaṃ vāritaṃ na kṛtaṃ sarvaṃ nirarthakam || 46 ||
[Analyze grammar]

gatayo bahudhā klṛptā mārgāścānye'vadhāritāḥ |
brahmamārgo dhṛtaścenna kṛtaṃ sarvaṃ nirarthakam || 47 ||
[Analyze grammar]

dattaṃ bahubhyo lokebhyo na dattaṃ paramātmane |
bhaktebhyo na na yajñebhyo dattamanyannirarthakam || 48 ||
[Analyze grammar]

arjitā bahudhā ṛddhiḥ kīrtiḥ khyātiḥ pratiṣṭhikā |
na tvarjitā kṛpā kārṣṇī tadarjitaṃ nirarthakam || 49 ||
[Analyze grammar]

kośe surakṣitaṃ svarṇaṃ rajataṃ peṭikāsu ca |
hṛdi kṛṣṇo na nihito rakṣitaṃ tannirarthakam || 46450 ||
[Analyze grammar]

ārohitāni yānāni vāhanānyādṛtāni ca |
śrīkṛṣṇasya vimānaṃ nā''dṛtaṃ sarvaṃ nirarthakam || 51 ||
[Analyze grammar]

rājyaṃ prapālikaṃ samyak prajāḥ samyaṅnibhālitāḥ |
dṛṣṭo nārāyaṇaścenna dṛṣṭaṃ sarvaṃ nirarthakam || 52 ||
[Analyze grammar]

śrutaṃ saṃśayitaṃ sarvaṃ mataṃ mṛṣābhivardhitam |
na śrutā na matā kṛṣṇakathā sarvaṃ nirarthakam || 53 ||
[Analyze grammar]

dīnā'nāthā āśvasitā bhṛtyādyāḥ svāśrayīkṛtāḥ |
bhaktā nāśvāsitā divyā āśrayādi nirarthakam || 94 ||
[Analyze grammar]

vyākhyātānyanyatattvāni bhautikāni kṣaṇe kṣaṇe |
kṛṣṇatattvaṃ na cākhyātaṃ gataṃ sarvaṃ nirarthakam || 55 ||
[Analyze grammar]

likhitā rājapadakā yojitā pāśavī kalā |
nātmā saṃyojitaḥ kṛṣṇe yojanā sā nirarthikā || 56 ||
[Analyze grammar]

apyabdhayaḥ kṣālitāścā''loḍitā nyāyakoṭayaḥ |
vāsanā jvālitā naiva śramaḥ sarvo nirarthakaḥ || 57 ||
[Analyze grammar]

śatravaḥ sajjitāścāpi baliṣṭhāśca virodhinaḥ |
kāmanā na jitā yena jayastasya nirarthakāḥ || 58 ||
[Analyze grammar]

sarve tvadhītamevāpi vācitaṃ puṣkalaṃ sadā |
nā'dhītaṃ śrīharernāma raṭanā sā nirarthikā || 59 ||
[Analyze grammar]

preṣitāni tu patrāṇi lagnāni yojitānyapi |
kṛṣṇalagnaṃ na cāpannaṃ sarvamanyannirarthakam || 46460 ||
[Analyze grammar]

striyo vivāhitā bahvyaḥ pravāhitāśca dakṣiṇāḥ |
saṃvāhitā gajā haṃsā nā''hitāḥ kṛṣṇavaiṣṇavāḥ || 61 ||
[Analyze grammar]

kṛṣṇanārāyaṇo naiva dhṛto vakṣasi keśavaḥ |
tadā nirarthakaṃ sarvaṃ bhārarūpaṃ hi vāhitam || 62 ||
[Analyze grammar]

api veṣā dhṛtā ramyā dhṛtā bhūṣā suśobhitāḥ |
kṛṣṇakaṇṭhī dhṛtā naiva dhṛtaṃ sarvaṃ nirarthakam || 63 ||
[Analyze grammar]

pītaṃ bhuktaṃ bahu miṣṭamāsvāditā rasā parāḥ |
prasādo na harerbhukto bhuktaṃ sarvaṃ tu pāpakṛt || 64 ||
[Analyze grammar]

sugandhādi samastaṃ saṃyojitaṃ varṣmahetave |
kṛṣṇārthaṃ yojitaṃ naiva tat sarvaṃ pāpadaṃ kṛtam || 65 ||
[Analyze grammar]

utsavā vihitāścānye daivotsavāḥ kṛtā nahi |
satāṃ mahotsavāstyaktāstasya sarvaṃ nirarthakam || 66 ||
[Analyze grammar]

svajanmāhāni satataṃ pālitānyaparāṇyapi |
kṛṣṇajanmadinaṃ cenna pālitaṃ tena kiṃ kṛtam || 67 ||
[Analyze grammar]

āyuḥ saṃkṣapitaṃ sarvaṃ dehaḥ karmasu dharṣitaḥ |
rāgo na dharṣito dveṣo na dharṣito vṛthāśramaḥ || 68 ||
[Analyze grammar]

vibhājitā nijā sampat putrādyāśca vibhājitāḥ |
bhajito na harikṛṣṇo bhaktaṃ sarvaṃ viḍambanam || 69 ||
[Analyze grammar]

āvṛtaṃ nagaraṃ sarvamāvṛtānīndriyāṇyapi |
nā''vṛtaṃ hṛt śrīkṛṣṇena sarvamāvṛtamāvṛtam || 46470 ||
[Analyze grammar]

anugrahītā bahavo mocitā vipadāṃ mukhāt |
nijātmā mocito naiva mocanaṃ tannirarthakam || 71 ||
[Analyze grammar]

mātā pitā suhṛd bandhuḥ pūjitāḥ sevitāstathā |
sādhavaḥ sevitāścenna mokṣamārgo'sya durghaṭaḥ || 72 ||
[Analyze grammar]

pitarastarpitā dīnā bhojitā vanditāḥ surāḥ |
nopāsitaḥ kṛṣṇanārāyaṇo gurvī tu sā kṣatiḥ || 73 ||
[Analyze grammar]

āsāditāni dhiṣṇyāni mānapatrāṇi śobhanāḥ |
padavyaścāpi saṃlabdhā nāptaṃ kṛṣṇapadāmbujam || 74 ||
[Analyze grammar]

nāpyāptamāsanaṃ kṛṣṇapādāsanasamīpagam |
tadā nāptaṃ tvantatastu kiñcit śūnyamivā'bhavat || 75 ||
[Analyze grammar]

sarvaṃ śūnye gataṃ tasya kṛṣṇahīnasya dehinaḥ |
ataḥ kṛṣṇaḥ prāpaṇīyaḥ sarvamanyannirarthakam || 76 ||
[Analyze grammar]

atraiva sarvadā kṛṣṇakathālābhārthamuttamā |
vasatiḥ rocate tasmādvasitavyamihā'dhunā || 77 ||
[Analyze grammar]

vicāryetthaṃ mithaḥ patnīpatī tatra nivāsanam |
cakraturbadrike kṛṣṇanārāyaṇārpitātmakau || 78 ||
[Analyze grammar]

jagṛhatuśca tau mantraṃ nāmadhunyaṃ tadā mudā |
oṃ namaḥ śrīkṛṣṇanārāyaṇāya pataye svāhā || 79 ||
[Analyze grammar]

prabhonārāyaṇaśrīmādhavīnārāyaṇaprabho |
jayākṛṣṇalalitānrāyaṇarādhāpate vibho || 46480 ||
[Analyze grammar]

svaprakāśo hi bhagavān mantraṃ datvā ca taulasīm |
dadau kaṇṭhīṃ bhajanārthaṃ mālikāṃ pratimāṃ dadau || 81 ||
[Analyze grammar]

tatastau kṛṣṇacittau vai pratīkṣete pramokṣaṇam |
māsānte śrīkṛṣṇanārāyaṇo vimānamāsthitaḥ || 82 ||
[Analyze grammar]

netuṃ samāyayau tau tu caitrasyā'mādine hariḥ |
ujjvalaḥ śvetavasanaḥ svarṇabhūṣāvibhūṣitaḥ || 83 ||
[Analyze grammar]

uvāca tau samāyātaṃ dhāmā'kṣaraṃ paraṃ mama |
uktamātrau dampatī tau svarṇarūpyādidānakam || 84 ||
[Analyze grammar]

cakraturyānadānaṃ tāvadhyāroḍhuṃ vimānakam |
kṛtakramau ca yāvattu tāvad vimūrchitau drutam || 85 ||
[Analyze grammar]

tyaktadehau labdhadivyasvarūpau saṃbabhūvatuḥ |
sarveṣāṃ paśyatāṃ badri vimānamadhyatiṣṭhatām || 86 ||
[Analyze grammar]

puṣpavṛṣṭirvyomamārgājjayaśabdā janavrajāt |
abhavan bahulāstatra tāvad vimānamambare || 87 ||
[Analyze grammar]

ūrdhvaṃ jagāma sahasā divyaṃ dhāmā'kṣaraṃ prati |
tiro'bhavad viprakṛṣṭaṃ mahāścaryamabhūddhi tat || 88 ||
[Analyze grammar]

evaṃ śrībadrike bhaktau tyaktasarvapravartanau |
snehabhaktyā yayatuḥ śrīkṛṣṇanārāyaṇālayam || 89 ||
[Analyze grammar]

tayorbhṛtyajanāstatra tayoścakruḥ pradāhanam |
tataste'pi harerbhaktiṃ nāma mantraṃ ca jagṛhuḥ || 46490 ||
[Analyze grammar]

bhejuḥ śrīparamātmānaṃ kṛṣṇanārāyaṇaṃ prabhum |
kṣapitāghā gatakleśā nirmalāḥ sādhusevinaḥ || 91 ||
[Analyze grammar]

abhavaṃste kṛpāpātrāṇyanvahaṃ śrīkathāparāḥ |
prāptavairāgyavegāśca dhyānabhajanayoginaḥ || 92 ||
[Analyze grammar]

vaiṣṇavāḥ paramā bhūtvā labdhvā''śīrvādamuttamam |
yayurgṛhāṇi naijāni smarantaḥ parameśvaram || 93 ||
[Analyze grammar]

pakvakālena te sarve satsaṃginaḥ śubhāśayāḥ |
kṣīṇavāsanāḥ saṃlagnā śrīharau mokṣasanmukhāḥ || 94 ||
[Analyze grammar]

pratīkṣante sma deveśaṃ prabhuṃ kṛṣṇaṃ narāyaṇam |
tāvat teṣāṃ śreyase vai vimānaṃ tvāgataṃ divaḥ || 95 ||
[Analyze grammar]

yayuste'pi harerdhāma kṛṣṇavimānavāhitāḥ |
prasevane pure sarve vyapaśyan svavimānakam || 96 ||
[Analyze grammar]

divyaṃ divyaśrīharyāḍhyaṃ divyamuktādhivāsitam |
darśakā nijabhāgyāni menire mokṣabhāñji ha || 97 ||
[Analyze grammar]

bhajanaṃ te vyadhuḥ svāmin kṛṣṇanārāyaṇaprabho |
kālena kṣīṇapāpāśca prayātāste paraṃ padam || 98 ||
[Analyze grammar]

evaṃ badrīpriye mokṣaṃ gatau nyāyādhikāriṇau |
nyāyākṣiṇī ca mukundasāvitraḥ satkathāśravāt || 99 ||
[Analyze grammar]

paṭhanācchravaṇādasya smaraṇāt sevanāt satām |
bhuktirmuktirbhaved badri svargaṃ sveṣṭaṃ bhavedapi || 464100 ||
[Analyze grammar]

sarvadivyaguṇāścāpi divyā sampadvarā api |
divyadhāmanivāsaśca divyaśrīkṛṣṇayogitā || 101 ||
[Analyze grammar]

divyatā sarvathā syācchrīsaṃhitāśravaṇādiha |
prāptavyaṃ sarvamāpyeta na nyūnaṃ tasya vidyate || 102 ||
[Analyze grammar]

iti śrīlakṣmīnārāyaṇīyasaṃhitāyāṃ caturthe tiṣyasantāne nyāyakarturmukundasāvitraviprasya nyāyākṣiṇyāstatpatnyāśca kathāśravaṇādibhirmokṣaṇamityādinirūpaṇanāmā catuṣṣaṣṭittamo'dhyāyaḥ || 64 ||
[Analyze grammar]