Chapter 63

śrīnaranārāyaṇa uvāca |
śṛṇu badrīśvari devi sarvādasya kathāṃ tathā |
mahīrāyapure tvāsīd duritaghoṣanāmakaḥ || 1 ||
[Analyze grammar]

pradhānapadabhāg vipraḥ sarvabhakṣī yathā janaḥ |
sarvādanaḥ sarvabhojī sarvahārīti viśrutaḥ || 2 ||
[Analyze grammar]

sarvā''dānaparaḥ pāpī pāpācāro'tidūṣitaḥ |
prasahya vā prasādena sarvaṃ gṛhṇāti sarvataḥ || 3 ||
[Analyze grammar]

nā'grāhyaṃ nā'bhakṣyamasya kimapyāsīcca kasyacit |
mlecchadharmā'bhavat pāpāt pāpisaṃgāt paśuryathā || 4 ||
[Analyze grammar]

pūrvaṃ sudharmakarmā'pi paścāt pradhānatāṃ gataḥ |
sarvadharmavihīno'bhūnnāstiko nindakaḥ khalaḥ || 5 ||
[Analyze grammar]

rājyadravyaṃ tathā pāpaṃ matibhedakaraṃ hi tat |
pāpamiśraṃ prajānāṃ tad dhanamannaṃ karādikam || 6 ||
[Analyze grammar]

daṇḍadravyaṃ nikṛṣṭaṃ ca cauradhanaṃ tato'pyadhaḥ |
ghātakānnaṃ gaṇikānnaṃ yathā'dhonāṇakaṃ tathā || 7 ||
[Analyze grammar]

tatprayogeṇa jaṭharā malinā malinaṃ manaḥ |
buddhermālinyamevāpi dharme nāstikyameva tat || 8 ||
[Analyze grammar]

satkarmaṇāṃ parityāgo duṣṭakarmānuvartanam |
devapūjāparityāgo mokṣamārgādivarjanam || 9 ||
[Analyze grammar]

abhakṣye ca tatastasya pravartanā prajāyate |
sarvāśano bhavet paścād vipro'pi rākṣaso yathā || 10 ||
[Analyze grammar]

evaṃ duritaghoṣo'pi badrike mānavo'pi san |
vipro'pi dhiṣṇyasaṃstho'pi dhikkṛtiṃ samupāgataḥ || 11 ||
[Analyze grammar]

militvā'tha samastābhiḥ prajābhiḥ sa nirākṛtaḥ |
vimānito nijagrāmānniṣkāsitaḥ kuṭumbayuk || 12 ||
[Analyze grammar]

tataḥ śokaṃ jagāmā'pi dharmatyāge hi dhikkṛtiḥ |
avamānaṃ prajābhyaśca devebhyo'pi sadā tathā || 13 ||
[Analyze grammar]

dhikkṛto mānavairnaiva paralokāya kalpyate |
na gatiḥ subhagā tasya dagdhabhāgyaśca kācana || 14 ||
[Analyze grammar]

rudanti pitaraścā'sya kuladevā ruṣanti ca |
dharmo ruṭhati lakṣmīśca pādau kṛtvā nivartate || 15 ||
[Analyze grammar]

sammānaḥ svāgataśceti śrīputrau viprakarṣagau |
sampado vividhā ramyā vilīyante hyadharmiṇaḥ || 16 ||
[Analyze grammar]

vighnāḥ kāryeṣu jāyante skhalanaṃ ca pade pade |
parājayaḥ samagreṣu naiṣphalyaṃ ceṣṭakarmasu || 17 ||
[Analyze grammar]

ārabdheṣu kṣatiścāpi prārabdheṣu śilāhatiḥ |
durbhikṣatvaṃ phaladeṣu niṣphaleṣu pravartanā || 18 ||
[Analyze grammar]

gṛhe kuṭumbavarge'pi kalistasya pade dhṛte |
nārīputrādyamānaṃ ca śvavṛttivattu jīvanam || 19 ||
[Analyze grammar]

grāme sūkaravadvṛttiḥ prakāśe'pyandhatā'sya ca |
hṛdaye'pi pāpapuñjād vahnijvalanamanvaham || 20 ||
[Analyze grammar]

āpattayaḥ paritaścāgatyainaṃ tvardayantyapi |
harerbhaktiṃ satāṃ sevāṃ guroḥ prāptiṃ haranti ca || 21 ||
[Analyze grammar]

dānaṃ vrataṃ tīrthayātrāṃ virundhanti kṣaṇe kṣaṇe |
abhyudayaṃ paraṃ śreyaḥ kalyāṇaṃ nāśayantyapi || 22 ||
[Analyze grammar]

kiṃ bahunā badrike'sya puruṣārthā viyanti ca |
nirarthakā hi sarve te tato yātyadhamāṃ gatim || 23 ||
[Analyze grammar]

evaṃ vicārya bahudhā kalyāṇamārgaṇaṃ vyadhāt |
śuśrāva janamukhataḥ pārāyaṇamahotsavam || 24 ||
[Analyze grammar]

camatkārān hareścāpi pāpināṃ pāpanāśakān |
mokṣadān divyatā''dhānān śuśrāva sakuṭumbakaḥ || 25 ||
[Analyze grammar]

tatra gantuṃ tadā buddhimakarot sa nirāśrayaḥ |
sajjo'bhavad drutaṃ cāśvaśakaṭyoṣṭrā'nasā tathā || 26 ||
[Analyze grammar]

yogyavastūnyupakaraṇāni cādāya satvaram |
pratasthe sakuṭumbaḥ sa smarannārāyaṇaṃ harim || 27 ||
[Analyze grammar]

śarkarānagaraṃ prāpya gatyā sabhāsumaṇḍapam |
mahodyāne kṛtāvāsaḥ kṛtasnānavidhistataḥ || 28 ||
[Analyze grammar]

dhṛtopadaḥ sakuṭumbo yayau vyāsāsanaṃ mudā |
sāyaṃ pūjāṃ pracakāra saṃhitāvyāsayormudā || 29 ||
[Analyze grammar]

lomaśādestataḥ pūjāṃ kṛtvā natvā sato janān |
sabhāyāṃ śravaṇārthaṃ sa upāviveśa mānitaḥ || 30 ||
[Analyze grammar]

kathānte sa pracakre nīrājanaṃ bhāvapūrvakam |
kṛṣṇapādāmṛtaṃ cāpi papau prasādamāśa ca || 3 ||
[Analyze grammar]

pūtātmā sahasā jāto mantraṃ jagrāha lomaśāt |
oṃ namaḥ śrīkṛṣṇanārāyaṇāya pataye svāhā || 32 ||
[Analyze grammar]

prabhonārāyaṇaśrīmanmādhavīnrāyaṇa prabho |
jayākṛṣṇalalitāśrīkṛṣṇarādhāpate vibho || 33 ||
[Analyze grammar]

evaṃ śrīkṛṣṇadhunyaṃ ca jagrāha lomaśādapi |
nityaṃ cakre nāmadhunyaṃ satāṃ sevanamanvaham || 34 ||
[Analyze grammar]

kathāyāḥ śravaṇaṃ cāpi pāpakṣayo'bhavattataḥ |
lomaśasyopadeśena brahmakūrcavrataṃ vyadhāt || 35 ||
[Analyze grammar]

māsāntaṃ tasya manasi vyajāyata śubheṣaṇā |
tyāgidīkṣāgrahaṇecchā prabalā saṃvyajāyata || 36 ||
[Analyze grammar]

prārthayat sa vyāsadevaṃ so'pi dīkṣāṃ dadau tataḥ |
prāyaścittottaraṃ śrāddhaṃ kārayitvā vidhānataḥ || 37 ||
[Analyze grammar]

havanādi tataḥ kṛtvā kṛṣṇanārāyaṇārhaṇam |
pañcagavyaṃ tataḥ prāśayitvā yajñopavītakam || 38 ||
[Analyze grammar]

dadau mantrān śaraṇaṃ tu prathamaṃ rakṣaṇaṃ tataḥ |
brahmamantraṃ tata ātmanivedanaṃ tataḥ param || 39 ||
[Analyze grammar]

sarvasamarpaṇaṃ cāpi dadau kāṣāyavastrakam |
samastaveṣaṃ pradadau viprāya tatstriyai tathā || 40 ||
[Analyze grammar]

putrebhyaśca caturbhyo'pi saptaputrībhya ityapi |
dīkṣāṃ kaṇṭhīṃ taulasīṃ ca mūrtiṃ pūjārthamityapi || 41 ||
[Analyze grammar]

kṛṣṇanārāyaṇamūrtiṃ śrīyutāṃ pradadau tadā |
nāmajapaṃ mahādīkṣāmādāya te pracakrire || 42 ||
[Analyze grammar]

jayakāro'bhavatteṣāṃ sarvamanyacchubhaṃ tathā |
abhavadvai mahādānādikaṃ tatra tu dīkṣaṇe || 43 ||
[Analyze grammar]

evaṃ tyāgāśrame tasthurnāmnā saddhoṣaṇāyanaḥ |
patnī nāmnā mahāsatyāyanī bhāgavatottamā || 44 ||
[Analyze grammar]

putrā nāmnā tu vairāgyāyanaḥ śaṃbhvāyanastathā |
yogāyanastathā jñānāyanaścetyabhavaṃstathā || 45 ||
[Analyze grammar]

putryaḥ sādhvyaḥ sapta nāmnā prajñāyanī kṛtāyanī |
sevāyanī tathā sattvāyanī rāmāyaṇī tathā || 46 ||
[Analyze grammar]

bodhāyanī ca pratibhāyanīti vaiṣṇavītamāḥ |
sarve te cābhajan kṛṣṇanārāyaṇaṃ prabheśvaram || 47 ||
[Analyze grammar]

kālena te yayurdhāmā'kṣaraṃ śrīparamātmanaḥ |
evaṃpratāpā badari saṃhitāyāḥ kathā parā || 48 ||
[Analyze grammar]

pāpināṃ pāpalayadā mahāpuṇyapradā tathā |
ante mokṣapradā divyā śāśvatānandadāyinī || 49 ||
[Analyze grammar]

anādiśrīkṛṣṇanārāyaṇaprāptipradā śubhā |
svargamuktipradā sampatpradā sarvarddhisampradā || 50 ||
[Analyze grammar]

śṛṇu badrīpriye devi kathāṃ cānyāṃ supāvanīm |
dardurākhye pure tvāsīd vipro'mātyo'tibuddhimān || 51 ||
[Analyze grammar]

nāmnā dharmabhaṭo rāṣṭrayogakṣemakaraḥ sadā |
sa śuśrāva manuṣyebhyo māhātmyaṃ bahulaṃ yataḥ || 52 ||
[Analyze grammar]

kathāyāḥ śravaṇe tena vāñcchā tasya vyajāyata |
sapatnīko yayau tvekahastinā vāhanena saḥ || 53 ||
[Analyze grammar]

parimeyā'nugo nītvā dhanaṃ tu svarṇarūpyakam |
snātvā tīrthajale gatvā kathāmaṇḍapamuttamam || 54 ||
[Analyze grammar]

pūjāṃ cakre saṃhitāyā vyāsasya lomaśasya ca |
satāṃ satīnāṃ sādhūnāṃ pūjāṃ cakre sa yoginām || 55 ||
[Analyze grammar]

upadāśca nyadhāttatra svaprakāśasya sannidhau |
svarṇaṃ rūpyaṃ ratnamaṇīn mauktikānuttamānapi || 56 ||
[Analyze grammar]

patnī pupūja vai tatra saṃhitāṃ vācakaṃ gurum |
sādhvīśca pūjayāmāsa dadau tābhyo'mbarāṇi ca || 57 ||
[Analyze grammar]

dhanāni phalapuṣpāṇi bhojanāni dadāvapi |
nīrājanaṃ pracakrāte hyubhau svarṇasya dakṣiṇām || 58 ||
[Analyze grammar]

nyadhātāṃ sthālikāyāṃ ca cakraturdaṇḍavanmudā |
niṣedatuḥ sabhāyāṃ tau mānitau ca maharṣibhiḥ || 59 ||
[Analyze grammar]

śuśruvatuḥ kathāṃ divyā manoniḥsaṃgakāriṇīm |
vairāgyotpādikāṃ sādhusevāmāhātmyabodhinīm || 60 ||
[Analyze grammar]

bhaktiśikṣāpradāṃ kṛṣṇe snehadāṃ dāsyadāyinīm |
kathānte tu mahodyāne saudhe tau yayaturmudā || 61 ||
[Analyze grammar]

evaṃ praśāntahṛdayābūṣaturdinapañcakam |
tāvat satāṃ satīnāṃ ca cakrāte sevanaṃ mudhā || 62 ||
[Analyze grammar]

pāvanau tau sevayā ca pāvitau punareva ha |
prapāvitau ca kathayā bhaktyā nītau ca divyatām || 63 ||
[Analyze grammar]

apaśyatāṃ niśāyāṃ tau nidrāyāṃ mādhavīśvaram |
anādiśrīkṛṣṇanārāyaṇaṃ śrīkṛṣṇacandrakam || 64 ||
[Analyze grammar]

kṣaṇenā'dṛśyatāṃ prāptaṃ divyaṃ śriyā yutaṃ harim |
atha tau sujñātakṛṣṇamahimānau prage drutam || 65 ||
[Analyze grammar]

utthāya darśanaṃ svāpnaṃ parasparaṃ mudā''hatuḥ |
prasannau tau mithaḥ śrutvā kṛṣṇadarśanamuttamam || 66 ||
[Analyze grammar]

mene dharmabhaṭo bhāgyaṃ dhanyaṃ naijaṃ tadā khalu |
patnī nāmnā śīlayānī mene bhāgyaṃ paraṃ nijam || 67 ||
[Analyze grammar]

snātvā sampūjya deveśaṃ yayatustau kathāsthalam |
tatra kathā'ntike'mātyasannidhau śīlayānikā || 68 ||
[Analyze grammar]

gatvā prapūjya taṃ vyāsaṃ dṛṣṭvā śrīkṛṣṇasannibham |
nārāyaṇasamaṃ vyāsaṃ svaprakāśaṃ samuttamam || 69 ||
[Analyze grammar]

devavaccojjvalaṃ yogyamupāveṣṭuṃ gajāsane |
saṃkalpaṃ vidadhe tatra tāvad rājā'pi tadvidham || 70 ||
[Analyze grammar]

saṃkalpaṃ vidadhe vyāsaṃ gajasthaṃ lokituṃ mudā |
prakāśaṃ prāhatustau ca svaprakāśaṃ samutsukau || 71 ||
[Analyze grammar]

vyāsastathāstviti prāha kathānte tau mudā tadā |
gajaṃ śṛṃgāritaṃ svarṇāmbālikāsahitaṃ śubham || 72 ||
[Analyze grammar]

ānayāmāsaturdivyaṃ piśaṃgaṃ lambadantinam |
tatastau śrīvyāsadevaṃ niṣādya vāraṇopari || 73 ||
[Analyze grammar]

ṛṣiṃ ca lomaśaṃ cāpi niṣādya tatra vāraṇe |
dharmabhaṭo dadhe svarṇacāmaraṃ lomaśopari || 74 ||
[Analyze grammar]

śīlayānī dadhe svarṇacāmaraṃ vācakopari |
vādyanādairjayanādaiḥ sādhvīsādhusukīrtanaiḥ || 72 ||
[Analyze grammar]

vanditau pūjitau mārge bhaktābhivardhitau sumaiḥ |
sindhutaṭaṃ yayatustau gajenā'mātyavāñcchayā || 76 ||
[Analyze grammar]

jalapānādikaṃ kṛtvā snātvā'mātyālayaṃ tataḥ |
yayatustatra tau patnīpatī pupūjaturgurū || 77 ||
[Analyze grammar]

ārārtrikaṃ vyadhātāṃ ca svarṇapātre dhanāni ca |
kambalāni vicitrāṇi kauśeyānyambarāṇi ca || 78 ||
[Analyze grammar]

maṇiratnādihārāṃśca hīrakāḍhyavibhūṣaṇam |
bahudhā suvibhūṣāśca phalapuṣpādi sampadaḥ || 79 ||
[Analyze grammar]

dadatustau tataḥ pādārcanaṃ śrīcandanādibhiḥ |
cakraturbhāvataścārārtrikaṃ stutiṃ ca daṇḍavat || 80 ||
[Analyze grammar]

praṇāmān cakratuścātha tato mantraṃ tu vācakāt |
oṃ namaḥ śrīkṛṣṇanārāyaṇāya pataye svāhā || 81 ||
[Analyze grammar]

jjagṛhatustathā nāma śrīkṛṣṇacandraketi ca |
prabhonārāyaṇa śrīmādhavīnārāyaṇaprabho || 82 ||
[Analyze grammar]

jayākṛṣṇalalitānrāyaṇa rādhāpate vibho |
nāmadhunyaṃ jagṛhatustato pādajalaṃ śubham || 83 ||
[Analyze grammar]

prasādaṃ jagṛhatuśca niṣādya vāraṇopari |
mahotsavayutau vyāsagurū cāmararājitau || 84 ||
[Analyze grammar]

prāpayāmāsatuḥ sthānaṃ saṃhitāmaṇḍapaṃ punaḥ |
evaṃ śrīkṛṣṇacandrasya svarūpaṃ vyāsamanvaham || 89 ||
[Analyze grammar]

bhāvabhaktyā siṣevāte tau dvau tallagnamānasau |
śṛṇu badrīpriye devi camatkāraṃ harestataḥ || 86 ||
[Analyze grammar]

vidyamāne vāraṇe'pi tvādāya divyavāraṇam |
tameva vāraṇaṃ kṛṣṇaścāruhya śrīsamanvitaḥ || 87 ||
[Analyze grammar]

tayaiva divyakānakyā'mbālikayā virājitam |
tau dvau dharmabhaṭaṃ śīlayānīṃ netuṃ hariḥ svayam || 88 ||
[Analyze grammar]

samāyayau vyomasṛtyā ghaṇṭānādena nādayan |
ambaraṃ tejasā sarvaṃ dhavalayan kṛpānidhiḥ || 89 ||
[Analyze grammar]

caitrakṛṣṇadvādaśyāṃ vai paśyatāṃ divyacakṣuṣām |
kathottaraṃ tu madhyānte tvāyayau bhagavān prabhuḥ || 90 ||
[Analyze grammar]

uvāca prahasan dharmabhaṭa ehi paraṃ padam |
śīlayāni samāyāhi muktipadaṃ paraṃ padam || 91 ||
[Analyze grammar]

śrutvā śrībhagavadvākyaṃ tyaktasaṃsārabandhanau |
ubhau sajjāvabhavatāṃ tūrṇaṃ dhṛtvā kare jalam || 92 ||
[Analyze grammar]

hastidānādi sarvaṃ śrīvyāsadevāya ca tadā |
dharmabhaṭaḥ śīlayānī dadatuśca dhanādikam || 93 ||
[Analyze grammar]

anādiśrīkṛṣṇanārāyaṇecchayā tu badrike |
divyadehau muktarūpāvajāyatāṃ manoharau || 94 ||
[Analyze grammar]

vāraṇaṃ cāruruhatuḥ puṣpavṛṣṭistadā'bhavat |
paśyatāṃ sarvalokānāṃ gajena vyomagāminā || 95 ||
[Analyze grammar]

harirnināya tau tūrṇaṃ nijaṃ dhāmā'kṣaraṃ śubham |
jayakārastadā sarvalokeṣu prābhavanmuhuḥ || 96 ||
[Analyze grammar]

camatkāraṃ samākarṇya janā vismayamāpnuvan |
bhakto'mātyo yayau dhāmā'kṣaraṃ dhanyajanurbhuvi || 97 ||
[Analyze grammar]

dhanyā sā śīlayānī ca patyā sārdhaṃ yayau divam |
ityevaṃ praśaśaṃsurvai mānavāḥ sarvataḥ sthitāḥ || 98 ||
[Analyze grammar]

badrike saṃhitāyāstu śravaṇena pramokṣaṇam |
nūnaṃ prajāyate sarvapāpānāṃ cātmanāṃ tathā || 99 ||
[Analyze grammar]

paṭhanācchravaṇādasya cintanādapi mokṣaṇam |
iṣṭasiddhiḥ samastā ca bhuktirmuktistathā bhavet || 100 ||
[Analyze grammar]

yatra kṣaṇe yadā kṛṣṇo yaddeśe cābhiyāti vai |
gantavyaṃ tena sākaṃ vai māyāṃ tyaktvā'tibandhinīm || 101 ||
[Analyze grammar]

kartavyaṃ tu tadevā'sti yanmāyāmokṣaṇaṃ vrataiḥ |
bhaktyā dhāmā'kṣaraprāptistatra śrīharisevanam || 102 ||
[Analyze grammar]

iti śrīlakṣmīnārāyaṇīyasaṃhitāyāṃ caturthe tiṣyasantāne duritaghoṣanāmakasya pradhānasya sakuṭumbasya kathāśravaṇena tyāgidīkṣāgrahaṇaṃ dharmabhaṭanāmakā'mātyasya śīlayānīpatnīsahitasya kathāśravaṇena mokṣaṇaṃ cetyādinirūpaṇanāmā triṣaṣṭitamo'dhyāyaḥ || 63 ||
[Analyze grammar]