Chapter 54

śrīnaranārāyaṇa uvāca |
śṛṇu badrīpriye devi kanyāghnasya kathāṃ tathā |
yuddhapuramahārājye yuddharājo'bhavannṛpaḥ || 1 ||
[Analyze grammar]

dānadharmarataḥ puṇyakaraḥ sādhuprapūjakaḥ |
prajārakṣākaraścāpi garvamānabharo'bhavat || 2 ||
[Analyze grammar]

tatra prathā'bhavad badri kanyāhiṃsāmayī purā |
kanyāyā janma jāyeta kṣatriyasya gṛhe yadi || 3 ||
[Analyze grammar]

kanyābhrātā kasyacittu śālakaḥ syād bhaviṣyati |
kanyāpitā śvaśuraḥ syāt tadaniṣṭaṃ paraṃ yataḥ || 4 ||
[Analyze grammar]

kṣatriyaḥ śālako na syājjāmātṛśvaśuro na ca |
snuṣāśvaśuraḥ syādeva kutracit sā prathā'bhavat || 5 ||
[Analyze grammar]

ataḥ kanyā prahantavyā kṣatriyeṇa tu janmataḥ |
mānino yuddharājasya rājñyāṃ kanyā tvajāyata || 6 ||
[Analyze grammar]

rājñīprasūtikāle'pi dāsyāṃ putro'pyajāyata |
rājñīsnehena sā dāsī kanyānāśabhayena ca || 7 ||
[Analyze grammar]

kanyāṃ jagrāha datvā svaṃ putraṃ rājñyai susundaram |
putro'bhavannṛpatestu prakāśe'prasaracchubham || 8 ||
[Analyze grammar]

atiharṣeṇa rājñā vai kṛtaḥ putrotsavaḥ śubhaḥ |
kanyākumārau sadṛśau vṛddhimāptau śanaiḥ śanaiḥ || 9 ||
[Analyze grammar]

kanyāmānaṃ tu sā dāsī rājakanyāvadācarat |
rājñī cāpi tathā mānaṃ rājakanyāvadācarat || 10 ||
[Analyze grammar]

na tādṛśaṃ kumārasya prakṛtirhi balīyasī |
kumāro'pi mahān jāto dāsīṃ svamātaraṃ prati || 11 ||
[Analyze grammar]

dāsīṃ kṛtvā vartate saḥ kiṃkarīṃ mānavarjitām |
athaikadā snehamagnā dāsī rahaḥ svaputrakam || 12 ||
[Analyze grammar]

adhīrā prāha vṛttāntaṃ sarvaṃ jātaṃ yathātatham |
rājakanyāprarakṣārthaṃ vinimayastu janmataḥ || 13 ||
[Analyze grammar]

kṛta eva mayā putra kanyā rājñyāḥ suto'si me |
ato māṃ mātaraṃ garbhadhāriṇīṃ janmadāyinīm || 14 ||
[Analyze grammar]

viddhi vatsa prakāśaṃ māṃ kuru svaṃ kuśalaṃ kuru |
kanyāyāḥ kuśalaṃ cāpi prakāśe sati naiva ha || 15 ||
[Analyze grammar]

ato gopyaṃ samastaṃ tanmāṃ viddhi tava mātaram |
badrike strīhṛdayaṃ niṣṭhuraṃ bhinnakapāṭakam || 16 ||
[Analyze grammar]

kadācidbhidyate krodhāt kadācit snehato dhruvam |
tenā'nirghāritaṃ syādvai vyasanaṃ duḥsahaṃ tataḥ || 17 ||
[Analyze grammar]

strīto gopyaṃ gopanīyaṃ prakāśyaṃ na striyāḥ puraḥ |
athaivaṃ rājamātuśca putryāṃ sneho'tivartate || 18 ||
[Analyze grammar]

putrī vivāhayogyā sā jātā rājñīsamā śubhā |
tadā putrī pradeyā kva kasmai ceti vyacintayat || 19 ||
[Analyze grammar]

rājñī svayaṃ cāticintāparā'bhavat sutākṛte |
na dāsāya pradātavyā deyā kumārakāya vai || 20 ||
[Analyze grammar]

rājaputrāya dātavyā no ced rakṣyā kumārikā |
evaṃ vyacintayad rājñī kanyā varaṃ pratīkṣate || 21 ||
[Analyze grammar]

kadā me syād vivāho vai mātā kathaṃ na vakti tat |
ityevaṃ cintayānā sā papraccha mātaraṃ tvidam || 22 ||
[Analyze grammar]

kathaṃ mātarvivāhaṃ me naiva cintayasi kvacit |
tadā mātā dāsikā sā prāha rājñī niṣedhanam || 23 ||
[Analyze grammar]

karotyeva sadā putri tato'haṃ na vadāmi tat |
athaikadā sutā rājñyā dehasevāparāyaṇā || 24 ||
[Analyze grammar]

rahaḥ papraccha tāṃ rājñīṃ mātarnamāmi te muhuḥ |
pṛcchāmyahaṃ hṛdayasthaṃ mā doṣaṃ mayi kalpaya || 25 ||
[Analyze grammar]

madrahasyaṃ tu pṛcchāmi yathāvad vaktumarhasi |
kathaṃ vivāhayogyāyā vivāhaṃ me śubhapradam || 26 ||
[Analyze grammar]

kartuṃ na manyase niṣidhyase kathaṃ samucyatām |
śrutvā mātā rājamātā nijāṃ putrīṃ tu dāsikām || 27 ||
[Analyze grammar]

ākṛṣya bahudhā dhṛtvā vakṣasyaśrūṇyavāsṛjat |
tato dhairyaṃ samālambya jagāda putrikāṃ hitam || 18 ||
[Analyze grammar]

vatse matkukṣijā cāste nṛpasyāsi sutā śubhā |
kintu nikṛṣṭabhāgyā tvaṃ dāsyai mayā purā'rpitā || 29 ||
[Analyze grammar]

dāsīputro mayā prāptaḥ tvatsamakṣaṇajanmavān |
karomyevaṃ na ced rājā nihanyāt tvāṃ tu jīvanaḥ || 30 ||
[Analyze grammar]

rājā kasyāpi na syādvai śālakaḥ śvaśuro'thavā |
bhrātā te tvagrajaścānyo vartate rājadāyabhāg || 31 ||
[Analyze grammar]

rājyādhikāravāṃścāpi śālakaḥ sa kathaṃ bhavet |
pitā te ca śvaśuro vā kathaṃ syāt kasyacit khalu || 32 ||
[Analyze grammar]

tvaṃ kanyā me yadā jātā mayā guptā kṛtā na cet |
aśālakatvarakṣārthaṃ cā'śvaśuratvaguptaye || 33 ||
[Analyze grammar]

rājā tvāṃ nāśayettūrṇaṃ syāṃ putrī rahitā tvaham |
mayā prāptā tvekaputrī mukhadarśanadāyinī || 34 ||
[Analyze grammar]

mārayituṃ kathaṃ dadyāṃ gataiḥ prāṇaśatairapi |
vatse tadā mayā samyag cintitaṃ śreyase tava || 35 ||
[Analyze grammar]

prasūtaścā'bhavad dāsyāṃ putro'yaṃ yaḥ kumārakaḥ |
sa mayā snehabaddhāyā dāsyāḥ prāpto drutaṃ gṛhe || 36 ||
[Analyze grammar]

tasyai tvaṃ cārpitā vatse prāṇarakṣaṇahetave |
sā tvaṃ matkukṣijā putri vartase mama sannidhau || 37 ||
[Analyze grammar]

tāṃ tvāṃ rājakumārīṃ vai śreṣṭhāṃ madaṃgasaṃbhavām |
yasmai kasmai tu dāsāya dātuṃ kathaṃ samutsahe || 38 ||
[Analyze grammar]

tataḥ putri mayā dāsī niṣidhyate pradānake |
dāse dānaṃ nikṛṣṭaṃ yad rājaputre praśastakam || 39 ||
[Analyze grammar]

vada vatse rahaḥ proktaṃ tvatkṛte kiṃ karomyaham |
tvayā pṛṣṭaṃ tataḥ sarvaṃ mayoktaṃ mama putrike || 40 ||
[Analyze grammar]

vinā rājakumāraṃ tu kaumāryaṃ te varaṃ sadā |
tathāpyahaṃ yatiṣye vai putrike yacchubhaṃ bhavet || 41 ||
[Analyze grammar]

mā prakāśaya vṛttāntaṃ hānistena bhaviṣyati |
mama nāśastava nāśo rājadvārā bhaviṣyati || 42 ||
[Analyze grammar]

ityevaṃ śayane rājñī jagāda nijabālikām |
putrī jñātvā samastaṃ tanmātṛsevāparāyaṇā || 43 ||
[Analyze grammar]

viśeṣataḥ prajātā vai kumāro'pi prasūṃ prati |
evaṃ svābhāvikasnehe vinimayo'pyajāyata || 44 ||
[Analyze grammar]

vacane hṛdaye dehe kriyāsvapi samantataḥ |
svasvamātṛsnehabhāvo vyavardhata tayostadā || 45 ||
[Analyze grammar]

athaikadā nṛpo naije śayane nidrito'bhavat |
madhyarātrau nṛpanidrā naṣṭā jāgarito nṛpaḥ || 46 ||
[Analyze grammar]

rājñī nṛpasya śayyāyāṃ suptā''sīt svapnanidritā |
svapne jajalpa nṛpateḥ śṛṇvato daivanoditā || 47 ||
[Analyze grammar]

aho putri mama putri mā rājñe tvaṃ nivedaya |
rājñīputrīti caivā'si kumāro dāsikāsutaḥ || 48 ||
[Analyze grammar]

aho dāsi hyaho dāsi mā kasmaicinnivedaya |
kumāro dāsikāputraḥ kumārī nṛpaputrikā || 49 ||
[Analyze grammar]

rājā śrutvā mahāścaryaṃ gataḥ satyārthavismitaḥ |
mohito vākyabodhena ṛtārthaṃ samacintayat || 50 ||
[Analyze grammar]

nirṇayārthaṃ tvekadā tu dāsyai sauvarṇaśṛṃkhalām |
dadau papraccha dāsīṃ sa vada cānyadabhīpsitam || 51 ||
[Analyze grammar]

prasanno'smi sevayā te kiṃ dadāmyaparaṃ dhanam |
prāsādaṃ vāṭikāṃ kṣetraṃ grāmaṃ vā kiṃ dadāmi te || 52 ||
[Analyze grammar]

dāsī prasannavadanā badrike hrasvabuddhitaḥ |
yayāce naiva vāṭīṃ vā kṣetraṃ grāmaṃ dhanaṃ gṛham || 53 ||
[Analyze grammar]

na me sarvaṃ rocate vai rājaṃstṛptāsmi sarvathā |
yadi deyo varo mahyaṃ yayāce tu kumārayoḥ || 54 ||
[Analyze grammar]

dvitīyāya kumārāya rājyaṃ dehi samastakam |
yadvā'rdhaṃ dehi nṛpate jyeṣṭhāyā'rdhaṃ pradehyapi || 55 ||
[Analyze grammar]

rājā śrutvā pakṣavākyaṃ papraccha kāraṇaṃ tadā |
pralobhya bahuratnādyairdāsī jagāda kāraṇam || 56 ||
[Analyze grammar]

putro madgarbhasaṃbhūto vartate sa kumārakaḥ |
putrī tvatpatnikājanyā vartate sā kumārikā || 57 ||
[Analyze grammar]

dehi rājyaṃ cārdhamapi rājan putrāya me śubham |
badrike sā'bhavad dāsī kṣatriyā bhṛtyakarmiṇī || 58 ||
[Analyze grammar]

nāmnā prabhāvatī devī putrastasyāstu bhūpajaḥ |
kṣatriyo'bhūd dvitīyaḥ saḥ sā'to rājyamayācata || 59 ||
[Analyze grammar]

akathyaṃ kathitaṃ sarvaṃ lobhavṛttyā bhujiṣyayā |
snehavṛttyā sute naije kathitaṃ raha uttamam || 60 ||
[Analyze grammar]

atha rājā viditvaiva kumāraṃ dāsikāsutam |
kumārīṃ nijaputrīṃ ca khyātāṃ tāṃ dāsikāsutām || 61 ||
[Analyze grammar]

kiṃkartavyapramūḍho'tivihvalaḥ so'bhavat sadā |
śālakena na vai bhāvya jyeṣṭhakumārakeṇa vai || 62 ||
[Analyze grammar]

śvaśureṇa na vai bhāvyaṃ mayā cānyanṛpasya vai |
vārtā prasiddhimāpannā'vaśyaṃ prakāśameṣyati || 63 ||
[Analyze grammar]

rājyādhikārī jyeṣṭho'sti cārdhasya yāvato'pi vā |
dāsīputrāya dāsye ced rājye'niṣṭaṃ bhaviṣyati || 64 ||
[Analyze grammar]

mamā'niṣṭaṃ bhaveccāpi tatastat kāryameva na |
kanyākumārayoḥ prāṇapralayo'tra śubho mataḥ || 65 ||
[Analyze grammar]

viṣādisaṃprayogeṇa tūrṇaṃ dvayoḥ paretatā |
bhaviṣyati na sandehaḥ kartavyaṃ śreṣṭhamatra tat || 66 ||
[Analyze grammar]

vicāryetthaṃ yuddharājo viṣaṃ mārakamulbaṇam |
dāpayāmāsa kanyāyai kumārāya ca guptitaḥ || 67 ||
[Analyze grammar]

guptistatrā'bhavannāmnā ghaṭamālā'bhidhā'nugā |
dāsī rājñaḥ karmakartrī khasajātisamudbhavā || 68 ||
[Analyze grammar]

tathā bhojanavelāyāṃ viṣaṃ prayojitaṃ tayoḥ |
rājñī dāsī mātarau te jānīto na viṣārpaṇam || 69 ||
[Analyze grammar]

maraṇaṃ yannimittena likhitaṃ tadbhavatyapi |
jīvanaṃ yannimittena likhitaṃ tadbhavatyapi || 70 ||
[Analyze grammar]

bhuktavantau sutāputrau bhojanaṃ viṣamiśritam |
vyasū jātau ca tau tatra tāvadabhyāgato dvijaḥ || 71 ||
[Analyze grammar]

sādhuryatiścamatkārī viṣahauṣadhibodhavān |
tadoṣadhirasagūṭīyuto bhraman samāyayau || 72 ||
[Analyze grammar]

daivena prerito nāmnā jīvanāyanasaṃjñakaḥ |
atithirbhojanamātravāñcchayā tatra cāgataḥ || 73 ||
[Analyze grammar]

tāvat sa śrutavān rājye prakāśaṃ maraṇaṃ dvayoḥ |
rājā tūrṇaṃ dahanāya preṣayāmāsa tau tadā || 74 ||
[Analyze grammar]

tathā jāte yatiḥ sādhurjñātvā mṛtau sutāsutau |
rājaśmaśānapārśveṇa nirgato'yaṃ tu vaiṣṇavaḥ || 75 ||
[Analyze grammar]

jñātvā dehau nīlavarṇau tūrṇamoṣadhagūṭikām |
niṣkāsya sandadau tayoroṣṭhayośca jalaṃ dadau || 76 ||
[Analyze grammar]

oṃ namaḥ śrīkṛṣṇanārāyaṇāya svāmine svāhā |
mantramenaṃ dadau tābhyāṃ śmaśāne tāvadeva tu || 77 ||
[Analyze grammar]

utthitau śāntagaralau svasthau rogavivarjitau |
prabhonārāyaṇasvāmin kṛṣṇanārāyaṇa prabho || 78 ||
[Analyze grammar]

nāmadhunyaṃ dadau tābhyāmājīvayad dayānidhiḥ |
atha rājñaḥ krūrakarma jñātvā yayau nṛpaṃ prati || 79 ||
[Analyze grammar]

rājannaitat tvayā duṣṭaṃ krūraṃ kṛtaṃ tu pāpakam |
kanyāhatyā kumārasya hatyā prakāritā tvayā || 80 ||
[Analyze grammar]

yatiścāhaṃ vinirbhīkastvāṃ daṇḍayitumīśvaraḥ |
hāhākāro vartate'dya rājñā viṣeṇa māritau || 81 ||
[Analyze grammar]

kiṃ rājyena tava rājan pāpātipāpakāriṇaḥ |
yogyo nā'si sadā rājan tavā''yuḥ kṣīṇatāṃ gatam || 82 ||
[Analyze grammar]

yāmyaloke tava vāsaściraṃ kaṣṭo bhaviṣyati |
paśya kanyākumārābhyāṃ dattaṃ śāpaṃ tu gocaram || 83 ||
[Analyze grammar]

mriyatāṃ yuddharājo'yaṃ mārako nau viṣeṇa vai |
śāpo'yaṃ mūrtimānāste tava prāṇaharastviha || 84 ||
[Analyze grammar]

idānīṃ te gatirnāsti vinā mṛtyuṃ parā bhuvi |
hatyāpāpaṃ tava jātaṃ mṛtyuste'yamupāgataḥ || 85 ||
[Analyze grammar]

ityukte tatra cāyāto yamadūto bhayaṃkaraḥ |
pāśahasto vikarālo vahniṃ samudgiran mukhāt || 86 ||
[Analyze grammar]

yatiṃ taṃ vaiṣṇavaṃ natvā kanyākumārarakṣakam |
pāśena pāpinaṃ duṣṭaṃ babandha nṛpatiṃ tu saḥ || 87 ||
[Analyze grammar]

rājā parādhīnadeho vyajāyata tadā'budhaḥ |
mūrchāmavāpa sahasā''kruśan mudgaramāritaḥ || 88 ||
[Analyze grammar]

viṣapāśairnibaddhaśca viyojayituṃ varṣmaṇaḥ |
tāvadrājā hṛdayena yatiṃ taṃ śaraṇaṃ gataḥ || 89 ||
[Analyze grammar]

nārāyaṇaṃ tathā smṛtvā śrīkṛṣṇaśaraṇaṃ gataḥ |
kṣamāmayācata tatra mūrchito'pi nijātmani || 90 ||
[Analyze grammar]

śokaṃ cakāra bahudhā yāmyabaddho vaśaṃgataḥ |
lokairdṛṣṭastathā dūto vikarālo'drisannibhaḥ || 91 ||
[Analyze grammar]

prajāśca rājavargāśca saṃhitāstatra vai drutam |
śrutvā jñātvā paraṃ kaṣṭaṃ kanyākumārabhūbhṛtām || 92 ||
[Analyze grammar]

aniṣṭaṃ paramaṃ jñātvā śokaṃ sarve pracakrire |
sādhumaiśvaryayuktaṃ taṃ jñātvā rājñī tu pādayoḥ || 93 ||
[Analyze grammar]

nāmnā nārāyaṇīdevī tuṣṭāva sādhumīśvaram |
kṛpānātha kṛpāmūrte dayālo hitakṛt sadā || 94 ||
[Analyze grammar]

haritulya mahāyogin matpatiṃ svasthamāvaha |
putrikā rakṣitā cāpi kumāro rakṣitastvayā || 95 ||
[Analyze grammar]

kṛpayainaṃ patiṃ me'pi prarakṣayā'pi pāpinam |
pāpāḥ pāpaṃ prakurvanti puṇyāḥ puṇyaṃ dadatyapi || 96 ||
[Analyze grammar]

pāpaṃ matsvāminaścātrā'gaṇayitvā'vanaṃ kuru |
pāpanāśo bhavedyena mokṣaṇaṃ ca tathā bhavet || 97 ||
[Analyze grammar]

tathā tvaṃ bhagavannatra kurvasmākaṃ hitāvaham |
eṣā'haṃ tava dāsyasmi vākyaṃ me pratipālaya || 98 ||
[Analyze grammar]

ityuktvā caraṇau dhṛtvā sādhoḥ rājñī jaḍā'bhavat |
jīvanāyanasādhuḥ sa kṛtvā haste jalaṃ tadā || 99 ||
[Analyze grammar]

rājñyā mukhe dadau rājñī svasthā'bhavat sukhasthitā |
tato gatvā nṛpasyāpi mukhe jalaṃ dadau sa hi || 100 ||
[Analyze grammar]

oṃ namaḥ śrīkṛṣṇanārāyaṇāya svāmine svāhā |
prabhonārāyaṇa śrīśarvarīnārāyaṇa prabho || 101 ||
[Analyze grammar]

anādiśrīkṛṣṇanārāyaṇa śrīkānta sadvibho |
evaṃ mantraṃ nāmadhunyaṃ dadau vāriyutaṃ tadā || 102 ||
[Analyze grammar]

yāmyadūtaśca taṃ tūrṇaṃ nṛpaṃ tyaktvā yayau tataḥ |
rājā bubodha sahasā yatiṃ neme tu rakṣakam || 103 ||
[Analyze grammar]

kanyāghnaṃ ca kumāraghnaṃ sādhuryāmyād rarakṣa tam |
badrike ca tadā sarve śokaṃ vihāya sarvathā || 104 ||
[Analyze grammar]

prasannamānasā jātā jagṛhire manuṃ sataḥ |
nāmadhunyaṃ jagṛhire sahasraśo narāḥ striyaḥ || 105 ||
[Analyze grammar]

vārtā sā yuddhanagare prāsarad vāyuveginī |
hāhākārasamā śāntistadā punarajāyata || 106 ||
[Analyze grammar]

iti śrīlakṣmīnārāyaṇīyasaṃhitāyāṃ caturthe tiṣyasantāne yuddhapatanarājño yuddharājasyaviṣaprayogāt kanyākumārayorvyasutve'pi jīvanāyanasādhuyaugena punarjīvitatā śāpena yuddharājasyā''yurvināśena yāmyadūtāgamo mṛtyuśca pāpaphalaṃ sādhukṛtaṃ rakṣaṇaṃ cetyādinirūpaṇanāmā catuṣpañcāśattamo'dhyāyaḥ || 54 ||
[Analyze grammar]