Chapter 53

śrīnaranārāyaṇa uvāca |
śṛṇu badrīpriye devi rājā''sīt śālamitrakaḥ |
kṣatriyo dharmaniṣṭhaśca prajāpālanatatparaḥ || 1 ||
[Analyze grammar]

dānadharmarato nityaṃ goviprasādhupūjakaḥ |
annasatraṃ gṛhe yasya vastrasatraṃ mahattathā |
dhanasatraṃ tathā yasya kośe'bhūd dīnarakṣakam || 2 ||
[Analyze grammar]

yasya grāme divyadevālayāḥ santi suśobhitāḥ |
viprāśca sādhavaḥ sādhvyo devasevāparāyaṇāḥ || 3 ||
[Analyze grammar]

vartante yasya nagare rāṣṭragrāmeṣu vai tathā |
jīvikājīvanāḥ sarve rājñā dattārthavṛttikāḥ || 4 ||
[Analyze grammar]

pratidevālayaṃ kṣetraṃ sasyānāṃ janakaṃ mahat |
mahatī vāṭikā cāpi godhanaṃ dāṃsadāsikāḥ || 5 ||
[Analyze grammar]

annavastrapradānaṃ ca prativarṣaṃ pṛthak tathā |
dhanadānaṃ pṛthak cāpi jīvikā pratimandiram || 6 ||
[Analyze grammar]

evaṃ rājye sarvato'sya dharmaśālāstathā'bhavan |
vṛkṣacchāyāśca mārgeṣu tathodyānāni mandire || 7 ||
[Analyze grammar]

vartante daivapuṣpārthaṃ jalakūpāḥ pratisthalam |
devapūjāpravāhāśca candanākṣatakuṃkumam || 8 ||
[Analyze grammar]

dhūpadīpasunaivedyaphalatāmbūlakāni ca |
rājakośāt prapadyante pratidevālayaṃ sadā || 9 ||
[Analyze grammar]

evaṃ pūrvaiḥ pūrvataraiḥ pūrvatamaiḥ sujīvikāḥ |
baddhā devārhaṇārthaṃ vai sarvathā pūrvajīvikāḥ || 10 ||
[Analyze grammar]

atha rājā vartamānaḥ śālāmitrastadā svayam |
bhakto bhūtvā parīkṣārthaṃ pūjākāle'nvahaṃ drutam || 11 ||
[Analyze grammar]

pratyekaṃ mandiraṃ yāti yātrākṣurbhikṣuko yathā |
vilokayati baddhāṃ tāṃ vyavasthāṃ pūjakaiḥ kṛtām || 2 ||
[Analyze grammar]

pūjakā naiva kurvanti pūjāṃ pūrvairyathā'rpitām |
yathāklṛptāṃ na kurvanti sevānaivedyakaṃ hyapi || 13 ||
[Analyze grammar]

ārārtrikaṃ na kurvanti kvacit kvacinna vandanam |
kutraciddhūpanaṃ naiva kutracinnaiva dīpanam || 14 ||
[Analyze grammar]

kutraciccandanaṃ naiva kutracinnaiva tūlasī |
kutracinna mahādeve snānapuṣpāmbarādikam || 15 ||
[Analyze grammar]

kutracinna harau kṛṣṇe bhūṣāmbaranivedanam |
kutracinna ravau devyāṃ pūjāśṛṃgāratarpaṇam || 16 ||
[Analyze grammar]

kutracinna nare nārāyaṇe naivedyakārpaṇam |
kutracinnaiva pūjā'sti nīrājanaṃ na jāyate || 17 ||
[Analyze grammar]

pūjakeṣu vyasanāni pratyakṣaṃ sa vyalokayat |
narānāryo dharmahīnā vartante mandirādiṣu || 18 ||
[Analyze grammar]

snānasatkarmahīnāśca pūjakā malināstathā |
svārthamātraparā naijodaraṃbharā vasanti ca || 19 ||
[Analyze grammar]

kvacittu mandire bhraṣṭācārā madyaparāyaṇāḥ |
vartante pūjakāśceti pratyakṣaṃ sa vyalokayat || 20 ||
[Analyze grammar]

vīkṣyaivaṃ nijarājye vai mandireṣu ghṛṇāsthitim |
vicāramakarod rājā buddhyā vivekamiśrayā || 21 ||
[Analyze grammar]

mama ye pūrvajā dattavanto dānāni jīvikāḥ |
dharmārthaṃ devapūjārthaṃ daivakāryārthamanvaham || 22 ||
[Analyze grammar]

mandireṣu pūjakā ye pūjikā yāśca santi vai |
na kurvanti yathārthaṃ te pūjanaṃ devatārcanam || 23 ||
[Analyze grammar]

vṛthā khādanti te sarve ghasāśino vṛṣojjhitāḥ |
yena dhyeyena tebhyo vā devebhyo dattajīvikāḥ || 24 ||
[Analyze grammar]

taddhyeyaṃ jāyate naiva devapūjā na jāyate |
vyasanāni pūjakāste samācaranti sarvathā || 25 ||
[Analyze grammar]

na tejo vidyate teṣāmānaneṣu manāgapi |
nistejaso vilokyante pūjakā mandireṣu vai || 26 ||
[Analyze grammar]

bhraṣṭācārā bhraṣṭadharmāḥ kadaryā iva dhūmriṇaḥ |
yatra pūjākarā bhraṣṭācārāḥ svodarapūrttikāḥ || 27 ||
[Analyze grammar]

vyasanābhibhūtacittā devāstatra vasanti na |
yatra vai pūjakāḥ snānahīnāśca malināntarāḥ || 28 ||
[Analyze grammar]

malivastrā malidehā devāstatra vasanti na |
yatra vai pūjakāḥ kāmikrodhilobhipratāriṇaḥ || 29 ||
[Analyze grammar]

asatyā'nṛtamithyāḍhyā devāstatra vasanti na |
satṛṣṇāḥ pūjakā yatra pramādā''lasyasaṃbharāḥ || 30 ||
[Analyze grammar]

nistrapāḥ svādhyāyahīnā devāstatra vasanti na |
pūjakāḥ snehahīnāśca bhaktisevojjhatāḥ khalāḥ || 31 ||
[Analyze grammar]

devagauravahīnāśca devāstatra vasanti na |
yatrā'rcakā vratahīnā nāstikyāḍambarānbitāḥ || 32 ||
[Analyze grammar]

mṛṣāvādā mṛṣākāryā devotsavādivarjitāḥ |
pūjāprakāraśūnyāśca devāstatra vasanti na || 33 ||
[Analyze grammar]

yatra gandhaḥ sugandho na dhūpo dīpo na vidyate |
yatra nīrājanaṃ nāsti devāstatra vasanti na || 34 ||
[Analyze grammar]

yatra śuddhirna pātrāṇāṃ jalaśuddhirna vidyate |
naivedyasya na vai śuddhirdevāstatra vasanti na || 35 ||
[Analyze grammar]

devagṛhasya śuddhirna śuddhiḥ siṃhāsanasya na |
devaśayyādiśuddhirna devāstatra vasanti na || 36 ||
[Analyze grammar]

mandire mārjanaṃ nāsti prakṣālanaṃ na vā kvācit |
dhūliniṣkāsanaṃ nāsti devāstatra vasanti na || 37 ||
[Analyze grammar]

nirmālyadūratā nāsti nūtnapuṣpārpaṇaṃ na ca |
nūtnaśṛṃgārabhūṣā na devāstatra vasanti na || 38 ||
[Analyze grammar]

nūtnaveṣārpaṇaṃ nāsti nūtnajalārpaṇaṃ na ca |
nūtnacandanacarcā na devāstatra vasanti na || 39 ||
[Analyze grammar]

nūtanā'kṣatakuṃkumatulasīphalaśarkarāḥ |
madhvājyādi nūtanaṃ na devāstatra vasanti na || 40 ||
[Analyze grammar]

yatropakaraṇaujjvalyaṃ vastraujjvalyaṃ na vidyate |
bhūṣaujjvalyaṃ bimbaujjvalyaṃ devāstatra vasanti na || 41 ||
[Analyze grammar]

andhakāro yatra śaityaṃ mahauṣṇyaṃ duṣṭavāyavaḥ |
kleśāḥ kalahā yatsthāne devāstatra vasanti na || 42 ||
[Analyze grammar]

pūjako brahmacārī na pācakaḥ śuddhivarjitaḥ |
stāvako bhāvaśūnyaśca devāstatra vasanti na || 43 ||
[Analyze grammar]

yaddevā'gre sopānatkā mānavā yānti sannidhau |
saśastrā garvayuktāśca devāstatra vasanti na || 44 ||
[Analyze grammar]

madyamāṃsāśanaṃ yatra durgandhibhakṣaṇādikam |
duṣṭapānādikaṃ yatra devāstatra vasanti na || 45 ||
[Analyze grammar]

niṣiddhācaraṇaṃ yatra vihitatyajanaṃ tathā |
pūjākālaniyamo na devāstatra vasanti na || 46 ||
[Analyze grammar]

devavādyāni pātrāṇi cāmarādīni santi na |
mantrā yatra na vidyante devāstatra vasanti na || 47 ||
[Analyze grammar]

mānavā mandire devagṛhe svapanti yatra ca |
sahanivāsanaṃ nityaṃ devāstatra vasanti na || 48 ||
[Analyze grammar]

devānāṃ gauravaṃ yatra pālyate mānavairnahi |
pṛṣṭhe devā manuṣyāṇāṃ devāstatra vasanti na || 49 ||
[Analyze grammar]

śvānaśca śūkarā yatra gṛhe bhramanti vānarāḥ |
bhraṣṭajīvā yatra santi devāstatra vasanti na || 50 ||
[Analyze grammar]

pāpināṃ pādasañcāraḥ sparśo devasya sarvadā |
bhraṣṭavastvarpaṇaṃ yatra devāstatra vasanti na || 51 ||
[Analyze grammar]

ādaro bhāvanā nāsti prema sneho na vidyate |
pūjakasyāṃ na cā''stikyaṃ devāstatra vasanti na || 52 ||
[Analyze grammar]

yaddevāgre grāmyavārtā dehakāryāṇi yatpuraḥ |
yadagre cittamālinyaṃ devāstatra vasanti na || 53 ||
[Analyze grammar]

vidhihīnā pratiṣṭhā cā'jalapuṣpaṃ prapūjanam |
stutihīnaḥ praveśaśca devāstatra vasanti na || 54 ||
[Analyze grammar]

pūjakasya tapo yatra pūjā śreṣṭhā prajāyate |
ābhirūpyaṃ yatra mūrterdevāstatra vasanti vai || 55 ||
[Analyze grammar]

sādhavaḥ pūjakā yatra brahmacaryaparāyaṇāḥ |
sādhvyo vā dīkṣitāḥ śītavratāstatra hi devatāḥ || 56 ||
[Analyze grammar]

ātmaśuddhirbhāvaśuddhirdravyaśuddhiḥ samastikā |
pūjāśuddhirbhaktaśuddhirdevāstatra vasanti vai || 57 ||
[Analyze grammar]

vidyamānāsu sarvāsu jīvikāsvapi ye narāḥ |
pūjotsavānna kurvanti devāstatra vasanti na || 58 ||
[Analyze grammar]

apūjā vā nyūnapūjā bhraṣṭapūjāstu devatāḥ |
ruṣṭā khananti vaṃśān vai sthāpakasya nṛpasya ca || 59 ||
[Analyze grammar]

vilokyante mayā sarvadevālayeṣu rāṣṭrake |
pūjakā bhraṣṭapūjāste doṣaṃ kurvanta mandire || 60 ||
[Analyze grammar]

doṣabhāgo bhave'nyasmin nṛpateḥ śāsakasya ca |
tasmātte śikṣaṇīyā vai rājājñayā mayā'dhunā || 61 ||
[Analyze grammar]

vicāryetthaṃ navaṃ kṛtvā niyamaṃ saprakāśakam |
śrāvayāmāsa sarvatra devārcanārthamanvaham || 62 ||
[Analyze grammar]

adyā''rabhya tu devānāṃ pūjanaṃ vidhinā tu ye |
sarvathā na kariṣyanti rājā vṛttiṃ hariṣyati || 63 ||
[Analyze grammar]

ityevaṃ nijarāṣṭre vai śrāvayāmāsa sarvathā |
bhūtvā śrībadrike vṛttihānerbhayāttu kecana || 64 ||
[Analyze grammar]

vidhivat pūjanaṃ cārebhire bhaktiyutā narāḥ |
ye khalāśca śaṭhāścāsan pramādamohagarvitāḥ || 65 ||
[Analyze grammar]

nāstikyamithyāvādāśca mṛṣādevādivādinaḥ |
te tu cittaṃ dadurnaiva pūjādau paramātmanaḥ || 66 ||
[Analyze grammar]

rājñā nirīkṣakenaiṣāṃ vṛttayaḥ saṃhṛtāstataḥ |
daṇḍitāḥ kecana duṣṭā niṣkāsitāśca kecana || 67 ||
[Analyze grammar]

utthāpitā bhagnabimbā apahṛtāśca jīvikāḥ |
jīrṇadevālayāstena nītā vai śūnyatāṃ tadā || 68 ||
[Analyze grammar]

evaṃ kṛtavatā sāṅgā vṛttihartṛtvapātakam |
pūjakānāṃ kuṭumbānāṃ niḥśvāsāḥ śapathāni ca || 69 ||
[Analyze grammar]

utpāditāni bhāgena bhāgena puṇyamarjitam |
śāpastu sahasā hanti puṇyaṃ cireṇa rakṣati || 70 ||
[Analyze grammar]

jīvikāharaṇe pāpaṃ jāyate sarvanāśakam |
jīrṇasya jīvikā naiva hartavyā vai kadācana || 71 ||
[Analyze grammar]

jīrṇoddhāraḥ prakartavyaḥ kartavyā riktatā na tu |
śūnyatāyāḥ phalaṃ śūnyaṃ kartustatra prajāyate || 72 ||
[Analyze grammar]

badrike tasya bhūpasya jīvikāharaṇasya vai |
pāpaṃ śāpasya cāyātaṃ tūrṇaṃ duḥkhapradaṃ tadā || 73 ||
[Analyze grammar]

rājā rogeṇa saṃvyāpto jalodareṇa sarvathā |
ajīrṇena ca rogeṇa hyatisāreṇa vai rujā || 74 ||
[Analyze grammar]

abhibhūto'bhavanmandāgninā jāṭharavartinā |
bhojanaṃ nā'sya pacati vamanaṃ vai prajāyate || 75 ||
[Analyze grammar]

jalodaraṃ vardhate ca raktaṃ jale vivarttate |
śuṣkāyante'sya māṃsāni raktotsargo bhavatyapi || 76 ||
[Analyze grammar]

udaraṃ garbhiṇītulyaṃ galitau pādahastakau |
piṃgatā'syā'bhavaddehe śaktihāso'bhavattathā || 77 ||
[Analyze grammar]

apācanaṃ mahārogo badrike maraṇāntakaḥ |
śālamitro bhūpatistu śreṣṭhauṣadhānyakārayat || 78 ||
[Analyze grammar]

tathāpi daivaroṣeṇa śāpenā''ptā hi rugṇatā |
manāgapi na naṣṭā sā vṛddhiṃ gatā dine dine || 79 ||
[Analyze grammar]

jīvikāharaṇaṃ sarvapāpādhikaṃ hi pātakam |
atraiva bhujyate badri hartavyā naiva jīvikā || 80 ||
[Analyze grammar]

rājñaḥ patnī jayālakṣmīrnāmnā sāpi tathā rujā |
raktasrāvavatī nityaṃ jātā ca durbalā satī || 81 ||
[Analyze grammar]

rājā śokaṃ samāpannaścauṣadhaṃ na guṇāyate |
śuśrāva saṃhitāvārtācamatkāraṃ tadā kṣaṇe || 82 ||
[Analyze grammar]

janā ye tīrthayātrārthaṃ yānti vai śarkarāpuram |
saṃhitāyāścamatkāraṃ varṇayanti tu te kathām || 83 ||
[Analyze grammar]

pāpināṃ mokṣaṇaṃ cāpi sākṣācca darśanaṃ hareḥ |
śuśrāva varṇitaṃ sarvaṃ janairmāhātmyamuttamam || 84 ||
[Analyze grammar]

tūrṇaṃ sajjo'bhavad gantuṃ saṃhitāśravaṇāya saḥ |
parimeyā'nugo rājñyā samaṃ śrotuṃ kathāṃ yayau || 85 ||
[Analyze grammar]

bahubhirdakṣiṇābhiścopadābhirvācakaṃ munim |
pūjayāmāsa nṛpatirgatvā kathāsthalaṃ drutam || 86 ||
[Analyze grammar]

āśīrvādān samagṛhya rājñyā samaṃ ca lomaśam |
pupūja bhāvato rājā lomaśo vīkṣya durbalam || 87 ||
[Analyze grammar]

nīrugṇo bhava nṛpate nīrugṇā patnikā tava |
pāpaśūnyāvubhau bhūtvā yātaṃ kārṣṇaṃ paraṃ padam || 88 ||
[Analyze grammar]

asāraḥ khalu saṃsāraḥ sārastasmāttu mokṣaṇam |
jīvanaṃ sarvathā pāpaṃ puṇyaṃ saṃsāramokṣaṇam || 89 ||
[Analyze grammar]

evamāśīrvacanaistau drutaṃ duritavarjitau |
sañjātau tadvarṣmaṇośca rogau tatraiva nirgatau || 90 ||
[Analyze grammar]

mūrtimantau jagadaturjīvikāharaṇotthitau |
āvāṃ rogau cātisārau prāṇaharau dvayorapi || 91 ||
[Analyze grammar]

svastato'dya yuvayorāyuṣyaṃ śeṣaṃ na vidyate |
lomaśasya saṃhitāyā vācakasya harerbalāt || 92 ||
[Analyze grammar]

nirgatau yuvayordehābhyāṃ tathāpi mṛtidhruvā |
tato dānāni sarvāṇi datvā labdhvā manuṃ hareḥ || 93 ||
[Analyze grammar]

bhaktiṃ kṛtvā yātamevā'kṣaraṃ padaṃ prabhorhareḥ |
ityuktvā yayatū rogau rājā rājñī drutaṃ tadā || 94 ||
[Analyze grammar]

rājyārpaṇaṃ kumāre ca kṛtvā patreṇa vai tadā |
datvā dānāni sarvāṇi pradatvā jīvikā punaḥ || 95 ||
[Analyze grammar]

nairṛṇyaṃ sarvathā kṛtvā prāpya mantraṃ tu lomaśāt |
bhaktiṃ kṛtvā māsamātramuṣitvā tau kathāntike || 96 ||
[Analyze grammar]

śodhayitvā nijātmānau sādhūn saṃsevya bhāvataḥ |
oṃ namaḥ śrīkṛṣṇanārāyaṇāya pataye svāhā || 97 ||
[Analyze grammar]

prabhonārāyaṇa śrīśavedīnārāyaṇa prabho |
anādiśrīkṛṣṇanārāyaṇa śrīkānta sadvibho || 98 ||
[Analyze grammar]

evaṃ mantraṃ ca bhajanaṃ cakraturbhṛtyasaṃghinau |
ekāgramānasau bhūtvā kṣapayitvā tu vāsanāḥ || 99 ||
[Analyze grammar]

hareḥ prāsādikaṃ jagdhvā pāvayitvā samastakam |
sajjau babhūvaturgantuṃ mokṣe dhāmā'kṣaraṃ hareḥ || 100 ||
[Analyze grammar]

phālgunasyā'site pakṣe tvekādaśyāṃ kathottaram |
prage divyaṃ vimānaṃ vai sauvarṇaṃ paramātmanaḥ || 101 ||
[Analyze grammar]

vyomnaścāvātarat tatra sarveṣāṃ paśyatāṃ śubham |
badrike śrīkṛṣṇanārāyaṇastasmādviniryayau || 102 ||
[Analyze grammar]

pasparśa tau pāṇinā ca vimucya dehataḥ pṛthak |
divyamuktau divyadehau vidhāya sahasā prabhuḥ || 103 ||
[Analyze grammar]

nidhāya svavimāne tau yayau dhāmā'kṣaraṃ nijam |
evaṃ tau vṛttihartārau tathāpi puṇyakāriṇau || 104 ||
[Analyze grammar]

devārthaṃ kṛtasarvasvau pāvayitvā prabhuḥ punaḥ |
śrāvayitvā kathāṃ naijāṃ ninye mokṣadaṃ nijam || 105 ||
[Analyze grammar]

badrike jayakāro'bhūttadā sarvatra bhūtale |
rājā rājñī gatau mokṣaṃ saṃhitāyāḥ kathābalāt || 106 ||
[Analyze grammar]

kathāṃ śrotuṃ samāyānti samantato'yutā'yutam |
manuṣyāḥ kṛṣṇacittāste labhante sveṣṭamuttamam || 107 ||
[Analyze grammar]

paṭhanācchravaṇādasya smaraṇādapi badrike |
bhuktirmuktiśceṣṭasiddhiḥ svargaṃ dīrghaṃ ca labhyate || 108 ||
[Analyze grammar]

vāsanānāṃ kṣayaścāpi śuddhirnijātmanastathā |
dhāmnyakṣare gatiḥ sthānaṃ śāśvataṃ sukhamāpyate || 109 ||
[Analyze grammar]

iti śrīlakṣmīnārāyaṇīyasaṃhitāyāṃ caturthe tiṣyasantāne śālamitranṛpaterdevajīvikā'paharaṇena tadrājñyāśca mahātisārarugṇatā''yurnāśaśceti vedanottaraṃ saṃhitākathāśravaṇārthaṃ gatayostatra muktirityādinirūpaṇanāmā tripañcāśattamo'dhyāyaḥ || 53 ||
[Analyze grammar]