Chapter 51

śrīnaranārāyaṇa uvāca |
śṛṇu badrīpriye devi kathāṃ gurughnamokṣadām |
āsīt khanipure vipro nāmnā suraprasādakaḥ || 1 ||
[Analyze grammar]

mātāpitarau vārdhakye sutamekamavāpatuḥ |
buddhyā yuktaṃ ca vātsalyapātraṃ snehāspadaṃ param || 2 ||
[Analyze grammar]

lālayāmāsatuḥ samyak pālayāmāsaturbahu |
vardhayāmāsatuḥ khānapānādibhiḥ samāhitau || 3 ||
[Analyze grammar]

modayāmāsatuḥ putraṃ vastrabhūṣādibhistathā |
pāṭhayāmāsatuścāpi vipravidyāṃ ca vaidikīm || 4 ||
[Analyze grammar]

tathāpi badrike bhāgyaṃ yādṛśaṃ rekhayotthitam |
tādṛśaṃ bhujyate kāle bhogārthe samupasthitam || 5 ||
[Analyze grammar]

yadi pūrvakṛtaṃ puṇyaṃ putrajanmapradaṃ bhavet |
tadā putro jāyate'tha ṛṇā'pākaraṇāya saḥ || 6 ||
[Analyze grammar]

yadi puṇyaṃ na dīrghaṃ syājjīvanārthaṃ tathā sutaḥ |
utpadya maraṇaṃ caiti daivaṃ tādṛk hi nirmitam || 7 ||
[Analyze grammar]

yadi puṇyaṃ daśavarṣāyuṣyapradaṃ bhavettadā |
tāvanmātraṃ gṛhe sthitvā paralokāya yāti saḥ || 8 ||
[Analyze grammar]

yadi sevā'rthakaṃ puṇyaṃ pitroḥ putrasya cārjitam |
bhavettadā sutaḥ sevāṃ pitroḥ karoti vai dhruvām || 9 ||
[Analyze grammar]

yadi puṇyaṃ na sevārthaṃ pitṛbhyāṃ pālito'pi saḥ |
tadā pitarau santyajya paradeśaṃ paragṛham || 10 ||
[Analyze grammar]

parā'ṅkaṃ vā paravaśaṃ paraputratvametyapi |
sevate na suto naijaḥ pitarāvapyapuṇyataḥ || 11 ||
[Analyze grammar]

paraputraḥ sevate'pyapitarau puṇyayogataḥ |
karmabandho hi saṃsāro yatrarṇa tatra padyate || 12 ||
[Analyze grammar]

anṛṇaṃ na paśuścāpi sameti mānavaḥ kutaḥ |
badrike yad yadadṛṣṭajanyaṃ tad dūramityapi || 13 ||
[Analyze grammar]

sākṣātparamparayā vā tadarthamupayāti tam |
kanyā gaurgajahaṃsādyā jāyante parabhūmiṣu || 14 ||
[Analyze grammar]

prapadyante'dṛṣṭavantaṃ svāminaṃ parabhūsthitam |
annaṃ patraṃ phalaṃ puṣpaṃ kṣāraṃ salilamoṣadham || 15 ||
[Analyze grammar]

prajāyante'nyatra bhāgyavanto'nyatrā''pnuvanti tān |
tāpaḥ śaityaṃ payo mudrā'mbaraṃ bhūṣā ca hīrakaḥ || 16 ||
[Analyze grammar]

khanyantarodbhavāścāpi prāpnuvanti paraṃ janam |
evaṃ vai badrike loke karmasambandhayojitam || 17 ||
[Analyze grammar]

pravartate mahācakramagamyayogadāyakam |
yadarthaṃ yatate lokastallokārthaṃ na tiṣṭhati || 18 ||
[Analyze grammar]

yadarthe na yatate tat prasahyā''gatya tiṣṭhati |
evaṃvidhe'tra lokai vai jñānināṃ rāgaśūnyatā || 19 ||
[Analyze grammar]

aparigrahatā cāpi viśokatā vibaddhatā |
ātmārāmasukhitā ca brahmānandapadasthitiḥ || 20 ||
[Analyze grammar]

jāyante nirguṇatvaṃ ca māyāśūnyatvamityapi |
mokṣaṇaṃ te prāpnuvanti vivekino hi bhaktitaḥ || 21 ||
[Analyze grammar]

anyathā tu suyoge syāt sukhaṃ duḥkhaṃ viyogake |
karmabaddhaṃ sukhaṃ duḥkhaṃ yojanaṃ ca viyojanam || 22 ||
[Analyze grammar]

karmaśūnyasya mokṣaḥ syād durbhāgyasya na mokṣaṇam |
sarve'rthāḥ santi loke'tra durbhāgyā nāpnuvanti hi || 23 ||
[Analyze grammar]

vārdhakye putravattāpi daurbhāgye sukhadā na hi |
tathā suraprasādasya pitarāvativatsalau || 24 ||
[Analyze grammar]

preṣayāmāsatuḥ putramadhyayanārthamutsukau |
prabhāvarapuraṃ vidvadvipragṛhe hitāvahau || 25 ||
[Analyze grammar]

bahuvidyādilābhārtha yayau suraprasādakaḥ |
adhyetumadhikāṃ vidyāmāśā hi balavattarā || 26 ||
[Analyze grammar]

so'pi vidyecchayā tyaktvā mātaraṃ devanandinīm |
pitaraṃ devadharmāṇaṃ yayau gurorgṛhaṃ drutam || 27 ||
[Analyze grammar]

natvā guruṃ bhargacātvālakaṃ vṛttāntamāha tam |
guruḥ prasannacittaścādhyāpayāmāsa taṃ mudā || 28 ||
[Analyze grammar]

uvāsa bahuvarṣāṇi gurorgṛhe nirāmayaḥ |
niścinto nityapāṭhī ca mahodyamaparāyaṇaḥ || 29 ||
[Analyze grammar]

daivajñatā tattvavittvamātmavidyāṃ samārjayat |
vidvān kīrtiparipūrṇo jāto vidyāprabhāvavān || 30 ||
[Analyze grammar]

badrike sa tuvidyāptipuṇyavānapi sarvathā |
pitro sevāpuṇyahīnaḥ tayoḥ sevāṃ na labdhavān || 31 ||
[Analyze grammar]

adhityā'pi gṛhaṃ naiva yayau vidyābhimānavān |
kadaryasya gṛhaṃ yadvannaijaṃ gṛhaṃ na rocate || 32 ||
[Analyze grammar]

ato naiva yayau pitroḥ sevālābhaṃ na cāptavān |
sa lābhastu gataścā'sya tāvadvṛddhau tu tadgunahe || 33 ||
[Analyze grammar]

vārdhakyenā''mayavyāptāvabhūtā varapīḍitau |
sasmaratuḥ sutaṃ tvekaṃ vidvāsaṃ dūravāsinam || 34 ||
[Analyze grammar]

adhitvā nā''gataṃ preṣṭhaṃ tatyajatuśca jīvanam |
putraputretiputreti vadantau maraṇaṃ gatau || 35 ||
[Analyze grammar]

badrike bahupuṇyena pitroḥ sevā tu labhyate |
maraṇasya kṣaṇe putrā''syapradarśanamityapi || 36 ||
[Analyze grammar]

bahupuṇyena bhavati na bhavet karmahinayoḥ |
evaṃ pāpaṃ tu putrasya jātaṃ tadā tu badrike || 37 ||
[Analyze grammar]

pitrasevākṛtaṃ sarvaṃ mṛtyurniḥśvāsakāritam |
vidyādhanaṃ na vai śreṣṭhaṃ pitṛsevādisannidhau || 38 ||
[Analyze grammar]

pitṛsevā cātipuṇyatamā śreṣṭhā ca puṇyadā |
mokṣadā svargadā sarvapāpadhvaṃsavidhāyinī || 39 ||
[Analyze grammar]

sarvāpannāśinī badri pitṛsevottamottamā |
sā na labdhā sutaiścet sā parā hāniḥ prajanminām || 40 ||
[Analyze grammar]

sarvaṃ vināśitaṃ tena pitṛniḥśvāsabhasmitam |
apyanyāśīḥsahasrāṇi dahyanti pitṛśāpataḥ || 41 ||
[Analyze grammar]

anyaśāpasahasrāṇi naśyanti tatprasādataḥ |
badrike puṇyahīnasya suraprasādakasya ha || 42 ||
[Analyze grammar]

pitrasevodbhavaṃ pāpaṃ hānidaṃ samajāyata |
vidyādhyāpayiturdveṣaṃ tata ārabhata dvijaḥ || 43 ||
[Analyze grammar]

bhargacātvālako vidyāguruḥ khyāto'bhavaddhyati |
sahate na sa tāṃ khyātiṃ duṣṭabhāvo'timānavān || 44 ||
[Analyze grammar]

guruṃ sa nindati nityaṃ vidyāyāṃ gauravaṃ gataḥ |
guroḥ kīrtiṃ khaṇḍayati gato'nyatra sabhādiṣu || 45 ||
[Analyze grammar]

evaṃ pāpena liptaḥ sa viśeṣeṇā'pyajāyata |
duṣṭā buddhirutthitā'sya vidvānahaṃ na cā'paraḥ || 46 ||
[Analyze grammar]

gururmayā samo nāsti tadā'nyasya tu kā kathā |
evaṃ svaṃ gauravaṃ vakti cintayatyeva tādṛśam || 47 ||
[Analyze grammar]

manasā vacasā nindāṃ dveṣaṃ karoti sadguroḥ |
karmaṇā'pi kratau śraiṣṭhyaṃ naijaṃ vijñāpayatyapi || 48 ||
[Analyze grammar]

karmakāṇḍe ca vijñāne garvaṃ karoti cordhvagam |
badrike nāśamāyāti puṇyaṃ sarvaṃ gurudviṣaḥ || 49 ||
[Analyze grammar]

vidyā bhāgyaṃ sampadaśca yaśo nāśaṃ prayānti ca |
pāpaṃ bhramo vicittatvamunmattatā bhavanti ca || 50 ||
[Analyze grammar]

aunmatyena tu doṣeṇa sahito'pi gurorgṛhe |
vasatyeva sa taṃ dveṣṭi guruṃ ced dṛṣṭigocaram || 51 ||
[Analyze grammar]

putravat pālitaṃ śiṣyaṃ dayālurgurudevatā |
na niṣkāsayati sthānād vātsalyaṃ hi nirodhakṛt || 52 ||
[Analyze grammar]

unmatto'pi mahāvidvānnavyavastho vivekavān |
pāpābhibhūtahṛdayaḥ pāpanaṣṭavicāravān || 53 ||
[Analyze grammar]

ekadā svaguruṃ suptaṃ gatvā hastakuṭhārakaḥ |
ciccheda mastakaṃ rātrau nanarta cittavarjitaḥ || 54 ||
[Analyze grammar]

nṛtyaghoṣaṃ samākarṇya tatra bhāryā gurostadā |
tathā śiṣyā apare ca samāyayustadantike || 55 ||
[Analyze grammar]

tāvat kuṭhārahastaṃ taṃ vīkṣya bhāsaṃ prapedire |
vīkṣya hataṃ guruṃ sarve rurudurmuktakaṇṭhinaḥ || 56 ||
[Analyze grammar]

hāhākāro mahān jātaścāśrameṣu dvijātiṣu |
vicittasyā'tiduṣṭatvaṃ jñātvā śāpāndadustadā || 57 ||
[Analyze grammar]

aho hatyā kṛtā'nena duṣṭena gṛhavāsinā |
mahācāṇḍālatulyena so'pi hato'stu tattathā || 58 ||
[Analyze grammar]

gurorhatyā mahāhatyā śatastrīhatyayā samā |
strīhatyā tu śatabhrūṇahatyātulyā nigadyate || 59 ||
[Analyze grammar]

bhrūṇahatyā śatamatsyahatyāsamā nigadyate |
matsyahatyā śatavṛkṣahatyāsamā bhavatyapi || 60 ||
[Analyze grammar]

vṛkṣahatyā śatastambanāśasamā prakīrtyate |
pitā bījapradaḥ śreṣṭho mātā garbhasya rakṣiṇī || 61 ||
[Analyze grammar]

gururjñānapradānena muktido hi tayoḥ paraḥ |
saṃsārārṇavamagnānāmuddhārakṛdgururhariḥ || 62 ||
[Analyze grammar]

mokṣaṃ karoti jīvānāṃ pāpāni kṣālayatyapi |
kṛṣṇavadrakṣaṇaṃ māyāpāśāt karoti sadguruḥ || 63 ||
[Analyze grammar]

sa vai śreṣṭhatamaścā''ste'saṃkhyaprāṇipramokṣakṛt |
nārāyaṇasya vijñānaṃ paricayaṃ dadātyapi || 64 ||
[Analyze grammar]

nayatyagre gatiṃ gacchannākarṣayan prapannakam |
sākṣī yo dharmakarmādau yāmyakaṣṭanivārakaḥ || 65 ||
[Analyze grammar]

brahmānandapradātā ca guruḥ śreṣṭhatamo'dhikaḥ |
gurormukhe caturvedā jihvāyāṃ śāradā satī || 66 ||
[Analyze grammar]

gāyatrī cauṣṭhayostasya sāvitrī kaṇṭhavartinī |
mastake brahmanirvāṇaṃ bhāle rudrasthalī guroḥ || 67 ||
[Analyze grammar]

bhrūmadhye tu bhavaścāste brahmā bhūkuṭimadhyagaḥ |
viṣṇurgurostu hṛdaye sūryacandrau tu netrayoḥ || 68 ||
[Analyze grammar]

karṇayorvartate śabdabrahma śāśvatamakṣaram |
hastayorindradevādyā nāsāyāmaśvinīsutaḥ || 69 ||
[Analyze grammar]

golokaścāpi vaikuṇṭhastanayorvartate guroḥ |
udaye tvamṛtaṃ dhāma nābhāvavyākṛtaṃ padam || 70 ||
[Analyze grammar]

jaghane satyalokaṃ ca gupte brahmavrataṃ guroḥ |
kaṭyāṃ hiraṇyagarbho'sti pṛṣṭhe meruḥ surālayaḥ || 71 ||
[Analyze grammar]

nitambayormahāpṛthvī prakṛtirgahvare'sti ca |
sakthnoḥ śvetadvīpadugdhodadhī staḥ śrīguroḥ sadā || 72 ||
[Analyze grammar]

jānvoḥ sutalavāsāśca jaṃghayordivyaśaktayaḥ |
pādayoḥ śrīguroḥ sarvatīrthānyabhivasanti vai || 73 ||
[Analyze grammar]

pitaraścā'sya keśeṣu siddhāścā'sya tvaci sthitāḥ |
prāṇe puṇyāni sarvāṇi mokṣo guroḥ kare sthitaḥ || 74 ||
[Analyze grammar]

guroḥ prasāde svargāṇi saṃkalpe sampadaḥ sthitāḥ |
guroḥ kriyāyāṃ vai cintāmaṇayaḥ kāmadhenavaḥ || 75 ||
[Analyze grammar]

sevāyāṃ kalpavṛkṣāśca vacane kalpavallayaḥ |
icchāyāmakṣayapātraṃ guroḥ snehe hariḥ svayam || 76 ||
[Analyze grammar]

guroḥ śaraṇe muktiśca gurvāsane śriyaḥ puram |
gurormūrtiḥ parabrahma vāsudevo gurau sthitaḥ || 77 ||
[Analyze grammar]

śrīkṛṣṇo'sti gurutādātmyatāṃ prāptaḥ pareśvaraḥ |
sarvakāmaprapūraḥ śrīsadgururbadrike bhuvi || 78 ||
[Analyze grammar]

vinā guruṃ na nistāro bhavārṇavaraṇasya vai |
agurūṇāṃ dehināṃ tu gatiḥ kutrāpi nāsti vai || 79 ||
[Analyze grammar]

tasmād guruṃ śrayed bhaktyā sarvasvārpaṇasevayā |
gurughnaḥ sarvavidyāghnaḥ sarvadevādināśakaḥ || 80 ||
[Analyze grammar]

svargamokṣarddhisampadghnaścātmaghno brahmahā mataḥ |
sarvapumarthahāḥ proktaḥ sarvaśaktivighātakaḥ || 81 ||
[Analyze grammar]

gatirnāsti sthitirnāsti sthānaṃ nāsti gurorhanaḥ |
yaśo nāsti sukhaṃ nāsti sarvathā dhig gurorhanaḥ || 82 ||
[Analyze grammar]

sarvapāpāni lokānāṃ naśyanti gurusannidhau |
gurordveṣātmakaṃ pāpaṃ kṛṣṇāgre'pi na naśyati || 83 ||
[Analyze grammar]

śrīkṛṣṇo gurvadhīno'sti rādhālakṣmyādikā api |
gurvadhīnā devatāśca sarvātivāhikīprabhāḥ || 84 ||
[Analyze grammar]

gurustvanargalaṃ divyaṃ kapāṭaṃ paramokṣiṇām |
gururvidyutprakāśo'sti mahādīpo'ntaraprabhaḥ || 85 ||
[Analyze grammar]

taddhāte sarvaghātānāṃ jāyante'ghāni ghātinām |
tatsevane sarvasevāphalānyabhimilanti ca || 86 ||
[Analyze grammar]

tatprasāde sarvaprasannatā bhavanti sevinaḥ |
gurorlābhe sarvalābhā gurorhāne layo mahān || 87 ||
[Analyze grammar]

gurormūrtiḥ sadā divyā tvāśikhānakhamadbhutā |
nārāyaṇaḥ pṛthaṅ nāsti gurormūrteḥ kadācana || 88 ||
[Analyze grammar]

pūjayā sadguroḥ kṛṣṇanārāyaṇaḥ prapūjyate |
bhojanena guroḥ kṛṣṇanārāyaṇo bhunakti ca || 89 ||
[Analyze grammar]

jalapānena ca guroḥ kṛṣṇastṛpto pibatyapaḥ |
gurordehasya sevābhiḥ sevyate parameśvaraḥ || 90 ||
[Analyze grammar]

gurornāśena yāvatyaḥ sevā naṣṭā bhavanti vai |
evaṃ tena dvijenāpi gurorhatyā kṛtā yataḥ || 91 ||
[Analyze grammar]

sarvaṃ tasyā'bhavad badri vinaṣṭaṃ śubhasaṃjñitam |
vicitto jaḍavanmūrkha unmatto buddhivarjitaḥ || 92 ||
[Analyze grammar]

bhraman mārge vane'raṇye niryayau sa gurorgṛhāt |
śarkarānagaraṃ prāpto daivātpūrvānukarmataḥ || 93 ||
[Analyze grammar]

kathāsthānaṃ yayau vidvāṃstasthau kṣaṇaṃ mudaṃ yayau |
saṃhitāyāḥ kathāṃ śrutvā pītvā'mṛtaṃ harestadā || 94 ||
[Analyze grammar]

prasādānnaṃ mahāpaṃktau bubhuje ca kathāmakhe |
satāṃ maharṣivaryāṇāṃ darśanaṃ prāptavān mudā || 95 ||
[Analyze grammar]

guruhatyākṛtaṃ pāpaṃ śanaiḥ śanairnyavartata |
manasaḥ svasthatā jātā dehabhānaṃ vyavartata || 96 ||
[Analyze grammar]

unmādo'sya layaṃ prāpto vicittatā sucittatā |
jātā tataḥ saśokena lomaśaṃ śaraṇaṃ yayau || 97 ||
[Analyze grammar]

nyavedayat samastaṃ tat pāpaṃ duḥkhaṃ viśodhanam |
lomaśo brahmakūrcākhyaṃ vrataṃ tasmai dadau tadā || 98 ||
[Analyze grammar]

māsaṃ cakre palāśādipatrāṇāṃ vahninā kṛtam |
gavyānāṃ kvathitaṃ vāri papau śuddhiṃ jagāma saḥ || 99 ||
[Analyze grammar]

kathāyāḥ śravaṇenā'sau niṣpāpaḥ sādhusevayā |
vipro jātastato mantramasmai śrīlomaśo dadau || 100 ||
[Analyze grammar]

oṃ namaḥ śrīkṛṣṇanārāyaṇāya svāmine svāhā |
kṛṣṇanārāyaṇasvāmin śrīharevallabha prabho || 101 ||
[Analyze grammar]

anādi śrīkṛṣṇanārāyaṇa padmāvatīprabho |
evaṃ sa bhajanaṃ cakre dhyānaniṣṭho harau sthitaḥ || 102 ||
[Analyze grammar]

tīvrasaṃvegamāpannaḥ smṛtvā hatyāṃ guroḥ svayam |
pitṛtyāgaṃ tathā smṛtvā mahāśokamagāttathā || 103 ||
[Analyze grammar]

rātrindivaṃ bhajanaṃ sa cakāra pārameśvaram |
virāgabhāvamāpannaḥ prātilomyamavāpa saḥ || 104 ||
[Analyze grammar]

sarvā vṛttīḥ parāvṛttya pratyāhāraṃ paraṃ gataḥ |
dhārayāmāsa satataṃ prabhuṃ kṛṣṇaṃ mahāprabhum || 105 ||
[Analyze grammar]

dadhyau kṛṣṇaṃ ramākāntaṃ gopālabālakaṃ hṛdi |
samādhau śrīpatiṃ badri sākṣāt prāpā'tivegavān || 106 ||
[Analyze grammar]

māghaśuklaikādaśyāṃ sa prātaḥ snātvā kathāsthalam |
bhajannāma raṭan prāpa tasthau vyāsaṃ vyalokayan || 107 ||
[Analyze grammar]

pupūja mantrasahito vyāsaṃ ca saṃhitāṃ tathā |
śuśrāva ca sabhāsaṃsthaḥ kathānte kīrtanottaram || 108 ||
[Analyze grammar]

śīghraṃ samādhimāpannaḥ prāṇāḥ saṃkucitā drutam |
papāta deho bhūmau vai śrotṝṇāṃ paśyatāṃ satām || 109 ||
[Analyze grammar]

vimānamambarād divyamavātarat samujjvalam |
kṛṣṇanārāyaṇastasmād bahirāgatya taṃ dvijam || 110 ||
[Analyze grammar]

divyarūpaṃ sumuktaṃ ca vidhāya divyavigraham |
nītvā vimānake tūrṇaṃ hasan dhāmā'kṣaraṃ yayau || 111 ||
[Analyze grammar]

āścaryaṃ paramaṃ jātaṃ kathāśravaṇakāriṇām |
aho gurughnaviprasya śaraṇyo bhagavān prabhuḥ || 112 ||
[Analyze grammar]

śaraṇāgatarakṣākṛt pāpaṃ vidhūya sarvathā |
vipraṃ bhaktaṃ nijaṃ dhāma ninye dehiṣu vatsalaḥ || 113 ||
[Analyze grammar]

etādṛśī kṛpā tasya ghaṭate paramātmanaḥ |
jīvāstu sarvathā pāpāḥ santi vai pāpakāriṇaḥ || 114 ||
[Analyze grammar]

kupālurbhagavānasti kṛpālavaśca sādhavaḥ |
vinā vinimayaṃ vā ca karamṛṇaṃ vinā khalān || 115 ||
[Analyze grammar]

duṣṭān pāpān pāvayitvā preṣayantyakṣaraṃ padam |
evaṃ vai badrike kṛṣṇo mokṣaṃ dadāti sevine || 116 ||
[Analyze grammar]

paṭhanācchravaṇādasya smaraṇāccintanādapi |
bhuktimuktiḥ śubhaṃ svargaṃ bhavedeva na saṃśayaḥ || 117 ||
[Analyze grammar]

iti śrīlakṣmīnārāyaṇīyasaṃhitāyāṃ caturthe tiṣyasantāne suraprasādanāmakaviprasya mātāpitṛsevāvihīnasya vidyāpradaguruhatyāvidhāyino'pi śrīlakṣmīnārāyaṇasaṃhitākathāśravaṇena satāṃ sevayā pāpanāśo muktiścetyādinirūpaṇanāmaikapañcāśattatamo'dhyāyaḥ || 51 ||
[Analyze grammar]