Chapter 236

śrīpuruṣottama uvāca |
śṛṇu nārāyaṇīśri tvaṃ saptadaśamahotsavam |
mama janmadivasasya caturvyūhaḥ kariṣyati || 1 ||
[Analyze grammar]

vāsudevastathāsaṃkarṣaṇo'niruddha ityapi |
pradyumnaśceti te sarve tatheśvarā maharṣayaḥ || 2 ||
[Analyze grammar]

kuṃkumavāpikākṣetre'kṣare divye mahāyate |
āgatya śvo nivatsyanti sannaddhāḥ santu sevikā || 3 ||
[Analyze grammar]

ūrjakṛṣṇasya saptamyāṃ cāndre māse tu noditāḥ |
lakṣmyaḥ sarvā brahmapatnyaḥ samārambhaṃ pracakrire || 4 ||
[Analyze grammar]

sabhādevyaḥ sabhāsthānaṃ sabhāsthānāni yāni ca |
pracakrire hi sahasā yeṣu sṛṣṭyabhibimbanam || 5 ||
[Analyze grammar]

śṛṃgāradevikā divyaśṛṃgārāṇi pracakrire |
dhāmadevyaḥ prakāśāni vanadevyo vanāni ca || 6 ||
[Analyze grammar]

udyānāni tarudevyo māyā dṛśyāni cakrire |
rasadevyo rasān sarvān gandhadevyaḥ sugandhinaḥ || 7 ||
[Analyze grammar]

sarasvatyo gāyanāni niśā svargaṃ pracakrire |
annapūrṇā gariṣṭāni miṣṭānnāni pracakrire || 8 ||
[Analyze grammar]

kalpalatāḥ puṣpapatradalāni saṃpracakrire |
kalpamaṇayo bhūṣāśca vahniḥ svarṇaṃ pracakrire || 9 ||
[Analyze grammar]

bhūdevī ramyaśayyāśca vāyurvai vāhanāni ca |
rasaśālāḥ kamalādyāḥ pānaśālāśca vāruṇī || 10 ||
[Analyze grammar]

lalitāśrīmahālakṣmīrdāsikābjā'bjamānayat |
viṣṇustu pārṣadān muktānānayannijasevakān || 11 ||
[Analyze grammar]

yajñanārāyaṇo yajñamaṇḍapān saṃvyadhād drutam |
oṣadhayaḥ samidhaścā''nayan sarvavidhā drutam || 12 ||
[Analyze grammar]

gāndharvā gāyakān vādyasahitān prasamānayan |
nartakyaścāpi kinnaryo'psarasaścāyayurdrutam || 13 ||
[Analyze grammar]

muktāvatārā īśeśā īśvarāścāyayustadā |
svāgatārthaṃ mahāsenāpatayaḥ śāṃkarādayaḥ || 14 ||
[Analyze grammar]

sotsāhāśca pratijagmurmaharṣayaḥ samāyayuḥ |
vāsudevādayo vyūhā nārāyaṇāstathā''yayuḥ || 15 ||
[Analyze grammar]

rudrā ajāḥ siddhajanā viṣṇavastatra cāyayuḥ |
īśvarāṇyaśca muktānyaḥ sarvā ramāḥ samāyayuḥ || 16 ||
[Analyze grammar]

rādhāsakhyo ramāsakhyo brāhmīsakhyaḥ samāyayuḥ |
vairājāśca hiraṇpuṃso māyātattvāni cāyayuḥ || 17 ||
[Analyze grammar]

devā devyaḥ pitaraśca dikpālā lokapālinaḥ |
ṛṣayo mānavā bhaktāḥ kāśyapāśca samāyayuḥ || 18 ||
[Analyze grammar]

dhārmikāḥ sādhavaḥ satyo brahmaśīlāḥ samāyayuḥ |
ṛgyajuḥsāmā'tharvāṇastīrthottamāni cāyayuḥ || 19 ||
[Analyze grammar]

ītirdhṛtiḥ śivā śaktirvedapatnyaḥ samāyayuḥ |
samudrāḥ kṛṣṇapatnyaśca rādhādyāśca samāyayuḥ || 20 ||
[Analyze grammar]

yoginyaḥ śāṃkarāḥ sarve gaṇāścāpi samāyayuḥ |
naranārāyaṇādyāśca tāpasāstatra cāyayuḥ || 21 ||
[Analyze grammar]

araṇyāni vanānyeva bhūgolāni samāyayuḥ |
caityāśca ṛtavaḥ kālāḥ vatsarādyāḥ samāyayuḥ || 22 ||
[Analyze grammar]

puruṣottamamāso'pi mahābherīṃ ninādayan |
āyayau cā'kṣare kṣetre sarvakalyāṇakṛcchubhaḥ || 23 ||
[Analyze grammar]

yogāḥ samāyayuryajñā bhaktiputrāḥ samāyayuḥ |
vimānānāṃ na pāro'sti gajānāṃ pakṣiṇāṃ tathā || 24 ||
[Analyze grammar]

vāhanānāṃ na pāro'sti sūtamāgadhadehinām |
bandīnāṃ bahurūpāṇāṃ manorañjanakāriṇām || 25 ||
[Analyze grammar]

ūrjasaptamikārātrāvāyayuḥ sarvadehinaḥ |
teṣāṃ svāgatamutkṛṣṭaṃ devyo devāḥ pracakrire || 26 ||
[Analyze grammar]

pārṣadāḥ sādhavaścāpi brahmapriyāḥ pracakrire |
pitā mātā ca bhaginī bhrātaraḥ saṃpracakrire || 27 ||
[Analyze grammar]

tathā samastaśiṣyāśca svayamārṣāśca īśvarāḥ |
lomaśādyāḥ ṛṣayaśca lālāyanādyāḥ sādhavaḥ || 28 ||
[Analyze grammar]

svāgataṃ bhojanaṃ pānaṃ pracakrire dadustathā |
sarvāḥ kāmadughā gāvaḥ payāṃsi ca dadustadā || 29 ||
[Analyze grammar]

sarvā dāsyo'pi dāsāśca mahīmānaprasevanam |
niśīthe cakrire tatra nyūnaṃ nā'bhūddhi kiṃcana || 30 ||
[Analyze grammar]

prātarutthāya ca lakṣmi cā'haṃ kṛṣṇanarāyaṇaḥ |
kṛtasnānaḥ kṛtaśṛṃgārakaḥ priyābhiranvitaḥ || 31 ||
[Analyze grammar]

mātrā pitrā vardhitaśca sabhāyāmagamaṃ drutam |
tadā vādyānyavādyanta vāsudevādayastathā || 32 ||
[Analyze grammar]

avatārā īśvarāśca hīśvarāṇyastu sarvaśaḥ |
muktāśca gopikā gopā āyayurmama maṇḍapam || 33 ||
[Analyze grammar]

divyasiṃhāsanasthasya kṛtvā me pūjanaṃ ca te |
ārārtrikaṃ vyadhuḥ sarve'kṣatakuṃkumacandrakān || 34 ||
[Analyze grammar]

cakruścāśīrvacanāni jagurviprā maharṣayaḥ |
dhāmakoṭyaśceśakoṭyo devarṣipitṛkoṭayaḥ || 35 ||
[Analyze grammar]

tatpatnyaścākṣatapuṣpairvardhayāmāsureva mām |
mānavāḥ sarvatīrthāni tattvāni vedavedikāḥ || 36 ||
[Analyze grammar]

sarasvatyaḥ śāradāśca lakṣmyaḥ sarvā mamā'rhaṇam |
cakruḥ sarvopadā me ca dadurdivyāḥ sabhāsthale || 37 ||
[Analyze grammar]

evaṃ madhyāhnaparyantaṃ pūjanaṃ bahuśobhanam |
jātaṃ me tatra cāyātaṃ sarvaṃ dāne dadāvaham || 38 ||
[Analyze grammar]

bhojanāni mahīmānebhyaśca dattāni vai tataḥ |
parihāraḥ kṛtaścāpi dakṣiṇāḥ prāpitāḥ śubhāḥ || 39 ||
[Analyze grammar]

pāritoṣikarūpāṇi dattāni yogyatā yathā |
rātrau vādyamahāgītinṛtyarañjanakādikam || 40 ||
[Analyze grammar]

abhavattvardharātryantaṃ virāmaśca tato'bhavat |
navamyāṃ ca mahīmānāḥ pūjitā bhojitāstathā || 41 ||
[Analyze grammar]

sammānitāśca prahitā yayurnijālayān prati |
evaṃ saptadaśe varṣārambhadine'ṣṭamītithau || 42 ||
[Analyze grammar]

kṛṣṇe corje mama janmajayantyutsavitā rame |
bhavatīnāṃ yaśaścedaṃ trisṛṣṭau samprakāśate || 43 ||
[Analyze grammar]

ṣoḍaśasya tu varṣasya camatkārā mamā'tra vai |
tṛtīye dvāparasantānake saṃvarṇitā mama || 44 ||
[Analyze grammar]

anādiśrīkṛṣṇanārāyaṇaścā'haṃ pareśvaraḥ |
caritrāṇāṃ vidhātā ca kartā vaktā pralekhakaḥ || 45 ||
[Analyze grammar]

etattṛtīyakhaṇḍasya pārāyaṇaṃ karoti yaḥ |
tasya sampad vividhā syād vaṃśo vistāravān bhavet || 46 ||
[Analyze grammar]

sauvarṇe garuḍe dhṛtvā dadyād dvāparapustakam |
tena vai pṛthivīdānaṃ dattaṃ bhavenna saṃśayaḥ || 47 ||
[Analyze grammar]

asya kathākṣaṇe yadyat samarpyate'lpakaṃ hyapi |
anantaguṇitaṃ tatsyānmahāsvargapradaṃ bhavet || 48 ||
[Analyze grammar]

godānaṃ vāṭikādānaṃ svarṇaratnapradānakam |
kanyādānaṃ gṛhadānaṃ gajadānaṃ makhe'rpaṇam || 49 ||
[Analyze grammar]

sarvadānaphalaṃ tvasya dānena samprajāyate |
vimānadānaṃ nagarīdānaṃ vanārpaṇaṃ tathā || 50 ||
[Analyze grammar]

sarvasvā'rpaṇamevā'sya dānena samprajāyate |
brahmadānaṃ vedadānaṃ mokṣadānamathottamam || 51 ||
[Analyze grammar]

ātmasamarpaṇamasya dānena samprajāyate |
taranti pitaraścāpi bhavanti dhāmavāsinaḥ || 52 ||
[Analyze grammar]

sāmrājyā'rpaṇamevā'sya dānena samprajāyate |
rogā vighnāḥ praṇaśyanti duritāni hrasanti ca || 53 ||
[Analyze grammar]

durbhāgyāni vinaśyanti dvāparakhaṇḍadānataḥ |
saptāhaṃ pākṣikaṃ vāpi māsikaṃ vā pravācayet || 54 ||
[Analyze grammar]

sādhūn viprān bhojayecca śrotṝn vaktṝn yathādhanam |
sādhvī satīrbhojayeccā'nāthān dīnān samastataḥ || 55 ||
[Analyze grammar]

vācakaṃ varayānena bhrāmayennagare striyaḥ |
viprāśca bhūbhṛtaścāpi śreṣṭhinaśca prajājanāḥ || 56 ||
[Analyze grammar]

kumāryaḥ kalaśairvāribhṛtaiśca nārikelajaiḥ |
mauktikairāsinībhiśca suveṣairbhrāmayettathā || 57 ||
[Analyze grammar]

suvāsinyo gītikābhirakṣataiḥ puṣpakuṃkumaiḥ |
pūjayed vardhayeccāpi bhrāmayennagare tathā || 58 ||
[Analyze grammar]

mahādānāni dadyuśca vācakāya mahātmane |
yathā sādhuḥ prasannaḥ syāttattaddadyurhi sādhave || 59 ||
[Analyze grammar]

bhuktirmuktirbhavedasya śravaṇena ca divyatā |
vāsanānāṃ praṇāśaśca kalmaṣāṇāṃ layo bhavet || 60 ||
[Analyze grammar]

tāpatrayavināśaśca śāntistu śāśvatī bhavet |
putraṃ putrīṃ samīhānā dvāparakhaṇḍadānakam || 61 ||
[Analyze grammar]

nūtnaveṣṭanasahitaṃ svarṇamudrānvitaṃ caret |
śatrubhīstena naśyedvai rājabhayaṃ na jāyate || 62 ||
[Analyze grammar]

kārāgāravimuktaḥ syādasya dānena bhāvataḥ |
asādhyaṃ sādhyamevā'pi bhavedasya śruteriha || 63 ||
[Analyze grammar]

sārvajñyaṃ bahudhā tvasya śravaṇena prajāyate |
vallabhāryaḥkṛṣṇanārāyaṇaḥ svāmī mahāprabhuḥ || 64 ||
[Analyze grammar]

rādhālakṣmīpatiḥ padmāvatīśrīmāṇikīpatiḥ |
prajñāmuktāpatirnityaṃ sphuret svahṛdaye śravāt || 65 ||
[Analyze grammar]

sākṣānmileddhi varṣānte śṛṇuyānnityameva tam |
miled rahasi viśvātmā svapne milenna saṃśayaḥ || 66 ||
[Analyze grammar]

āpatkāle rakṣayecca dvāparakhaṇḍasaṃsmṛteḥ |
lakṣmīnārāyaṇasaṃhiteyaṃ me pratimā'sti hi || 67 ||
[Analyze grammar]

khaṇḍo'yaṃ dvāparasantāno me'styudaramāntaram |
spṛṣṭvā dhyātvā sevayitvā manmūrtiṃ labhate'kṣare || 68 ||
[Analyze grammar]

yeṣāṃ yāsāṃ bhaved vāñcchā sākṣād yogyasya me hṛdi |
taistābhiśca kathā śravyā japtavyaśca manurmama || 69 ||
[Analyze grammar]

oṃ namaḥ śrīkṛṣṇanārāyaṇāya pataye svāhā |
āgatyā'haṃ yatheṣṭaṃ vai sukhaṃ dāsye ca darśanam || 70 ||
[Analyze grammar]

lakṣajapena siddhyedvai mantro'yaṃ mama nāmavān |
daśāṃśahomaḥ kartavyo bhāvanīyo'māntare || 71 ||
[Analyze grammar]

kaustubhakirīṭayuktaḥ sarvabhūṣāvibhūṣitaḥ |
prasannavadano lakṣmi kāntaḥ kandarpasundaraḥ || 72 ||
[Analyze grammar]

trailokye nāsti tadvastu yadvastu na dadāmyaham |
sṛṣṭitraye'pi tannāsti yanna bhaktāya sandade || 73 ||
[Analyze grammar]

siṃhāsanaṃ tathāṅkaṃ ca dhāmā'kṣaraṃ madāsanam |
mamaiśvaryāṇi sarvāṇi dadāmi mantrajāpine || 74 ||
[Analyze grammar]

etallakṣmi hṛdayaṃ me kṛpā me'nugrahaśca me |
sarvaṃ yatheṣṭaṃ dāsye vai tādātmyamantrajāpine || 75 ||
[Analyze grammar]

kalpavṛkṣāḥ kāmadughāḥ kalpavallyaśca yā matāḥ |
kalpastambāstathā cintāmaṇayo'kṣayapātrikā || 76 ||
[Analyze grammar]

padmacihnaṃ camatkārāḥ siddhayaścāpi sarvaśaḥ |
bhavanti hṛdaye tvasya tādātmyamantrajāpinaḥ || 77 ||
[Analyze grammar]

śṛṇoti dvāparasantānakaṃ japati manmanum |
śāśvataṃ puṇyamevā'sya kalpasiddhiśca śāśvatī || 78 ||
[Analyze grammar]

avyāhatagatistasya hyanāvaraṇadarśanam |
mantrasiddhyā jāyate vai madicchayā na saṃśayaḥ || 79 ||
[Analyze grammar]

devatvaṃ vā munitvaṃ vā siddhatvaṃ ceśatāṃ ca vā |
avatāratvamevā'pi dvāparasya śravāllabhet || 80 ||
[Analyze grammar]

bhūmapadaṃ śivapadaṃ hiraṇmayapadaṃ tathā |
mahāpuruṣadhiṣṇyaṃ vā dvāparasya śravāllabhet || 81 ||
[Analyze grammar]

śṛṇuyācchrīkṛṣṇanārāyaṇe kṛtvā manaḥsthiram |
mahotsavena śṛṇuyāccatuḥpumarthadaṃ bhavet || 82 ||
[Analyze grammar]

nityaṃ phalāni dhānyāni vastrāṇi bhūṣaṇāni ca |
nityopayogivastūni dadyāt saṃśṛṇuyāt kathām || 83 ||
[Analyze grammar]

nindakānāṃ bhayaṃ tyaktvā nāstikānāṃ bhayaṃ tathā |
viruddhānāṃ bhayaṃ tyaktvā śṛṇuyādvai mamā''śraye || 84 ||
[Analyze grammar]

yatrā'haṃ tatra vijayo yatrā'haṃ tatra cotsavāḥ |
yatrā'haṃ rakṣaṇaṃ tatra macchūnye bhayamasti hi || 85 ||
[Analyze grammar]

śrutvā śrutvā rasavettryo bhavantu buddhayo hi vaḥ |
anādiśrīkṛṣṇanārāyaṇasya mama gocarāḥ || 86 ||
[Analyze grammar]

adhyāyaṃ vā'pyaikapadyaṃ ye śroṣyanti samāhitāḥ |
teṣāṃ tāsāṃ tārako'haṃ kṛṣṇo'smi bhavasāgarāt || 87 ||
[Analyze grammar]

api pāpā nīcadehā nīcakarmāṇa eva vā |
anācārāḥ satāṃ yogād yathā śuddhyanti sarvathā || 88 ||
[Analyze grammar]

tathā'sya śravaṇāt pāpāḥ praśuddhyanti na saṃśayaḥ |
madyogānnirguṇāḥ sarve śrotāraḥ saṃbhavanti hi || 89 ||
[Analyze grammar]

atra mānavarūpāste muktā muktānikā matāḥ |
kathāsthānaṃ tvakṣaraṃ me dhāma bodhyaṃ na māyikam || 90 ||
[Analyze grammar]

vaktā'sti mama rūpo'sya vadāmyahaṃ na saṃśayaḥ |
śloke śloke mayā lakṣmi kṛpā pravarṣitā tviha || 91 ||
[Analyze grammar]

api manāk hariṃ kāntaṃ pratyabhiyānti bhāvataḥ |
tān pratyahaṃ śataguṇamabhiyāmi pramoditaḥ || 92 ||
[Analyze grammar]

kṛteṣu sarvayajñeṣu yadyāpanna vyapohati |
smarenmāṃ mama tādātmyamantraṃ japenmuhurmuhuḥ || 93 ||
[Analyze grammar]

sarvāpado vinaśyanti pratijñeyaṃ mayoditā |
etaddvāparasantānakhaṇḍaśravaṇamānatām || 94 ||
[Analyze grammar]

kuryādvā vipadāṃ nāśaḥ saṃkalpakaraṇād bhavet |
ekatastu kathāḥ sarvā ekatastu manurmama || 95 ||
[Analyze grammar]

manurviśiṣyate lakṣmi kathāyuktastu kiṃ punaḥ |
śaṃ vo'stu śrīkṛṣṇanārāyaṇasya karuṇālavāt || 96 ||
[Analyze grammar]

ācāryaḥ kambharāputro'stu śaṃ gopālanandanaḥ |
santuṣṭā'nujasaumyaśrīprajñāsārvajñyasaṃbhṛtaḥ || 97 ||
[Analyze grammar]

sarvajñaḥ sarvavit sarvāntarātmā sarvakāraṇam |
śaṃ vo'stu śvetavyāsādiryāvadvyāseśvaro hariḥ || 98 ||
[Analyze grammar]

sarvadharmāśrayaḥ sarvāśramaḥ sarvārthavarṇavān |
śaṃ vo'stu sarvakakṣāḍhyaḥ sarvakhanīśvaro'gragaḥ || 99 ||
[Analyze grammar]

yadvāsāt khalu saurāṣṭraṃ saurāṣṭratāṃ bhajatyati |
so'haṃ so'yaṃ sākṣaparokṣakaḥ śaṃ vo'stu śāśvatam || 100 ||
[Analyze grammar]

ākṣarakuṃkumavāpīkṣetre lomaśasaṃśrite |
devadeveśvaraḥ śaṃ vo brahmeśo'stu hariḥ sadā || 101 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne'nādiśrīkṛṣṇanārāyaṇasya saptadaśajanmadinajayantyutsavo dvāparasantānakathāśravaṇadānamantrajapamahimā cetyādinirūpaṇanāmā ṣaṭtriṃśadadhikadviśatatamo'dhyāyaḥ || 236 ||
[Analyze grammar]