Chapter 233

śrīpuruṣottama uvāca |
śṛṇu nārāyaṇīśri tvaṃ garadasyāpi mokṣaṇam |
kāśamitre ramyadeśe śrīnagare sukhāvahe || 1 ||
[Analyze grammar]

jhillimāsaritastīre'bhavadbhakto lavādanaḥ |
kuṭumbavān vipravaryo'dhītavidyaḥ sudhārmikaḥ || 2 ||
[Analyze grammar]

khyātavaṃśī mahāmānaḥ śrīpurādhipamānitaḥ |
rājā śrīnagarasyā''sīnnāmnā śrīmānaveśvaraḥ || 3 ||
[Analyze grammar]

tena sammānito nityaṃ sabhāyāṃ kṛtaśekharaḥ |
nyāyālaye'pi mūrdhanyaḥ prajāyāṃ cātimānavān || 4 ||
[Analyze grammar]

lavādano'paro rājā rājeva vartate tadā |
kṛtarājyasamastā'bhyudayaḥ śikṣāvibhāgake || 5 ||
[Analyze grammar]

sainyasthānātikuśalo vyāpāre nipuṇastathā |
buddhimān vartate caivaṃ rājñyā'pyatīva mānitaḥ || 6 ||
[Analyze grammar]

evavidhaḥ pradhāno'yaṃ guruścāpi nṛpasya vai |
karoti rājyakāryāṇi rāṣṭrakāryāṇi yānyapi || 7 ||
[Analyze grammar]

nṛpe prajāyāṃ sainye vā rāṣṭre kṣatiṃ pravīkṣya saḥ |
niḥsaṃśayaḥ samānaśca buddhyā vārayati kṣatim || 8 ||
[Analyze grammar]

nṛpaṃ prajāśca sainyāni tvāpadgatāni rakṣati |
āstiko devavalloke mānapātraṃ sa vartate || 9 ||
[Analyze grammar]

nityaṃ sūryaṃ haraṃ viṣṇuṃ candramasaṃ ca vedhasam |
vahnimindraṃ suvarṇaṃ ca māyāṃ jīvaṃ sacārhati || 10 ||
[Analyze grammar]

daśāyatanabhakto'yaṃ daśadharmān karotyapi |
jaladānaṃ carmadānaṃ lakṣmīdānaṃ tu naikadhā || 11 ||
[Analyze grammar]

oṣadhyarpaṇamābhūṣārpaṇaṃ ghṛtārpaṇaṃ tathā |
dhanurdānaṃ svarṇadānaṃ kanyādānaṃ kathārpaṇam || 12 ||
[Analyze grammar]

evaṃ dharmān karotyeva tathā'nyānapi cocitān |
gṛhakṣetrālayavāṭyudyānārpaṇaṃ karotyapi || 13 ||
[Analyze grammar]

rājyalakṣmīvyayā''dānasamartho vartate mahān |
evaṃvidho'yaṃ bhaktaśca daśadevān prasevate || 14 ||
[Analyze grammar]

jñānavānapi dharmātmā kvacittāmasabhāvavān |
karoti tāmasaṃ kāryaṃ daṇḍe hiṃsātmakaṃ mahat || 15 ||
[Analyze grammar]

rājānaṃ rājaputraṃ vā svaputraṃ vā paraṃ prajāḥ |
daṇḍyaṃ daṇḍaṃ karotyeṣo dharmaśāstrānusārataḥ || 16 ||
[Analyze grammar]

atha kāle gate rājā prauḍho yuvā'tirājasaḥ |
mṛgayāyāṃ pravṛtto'bhūd vyavāye ca śanaiḥ śanaiḥ || 17 ||
[Analyze grammar]

prajāyāṃ savyavāyaṃ vai prasahya prakaroti hi |
tenā'sya mānaveśasya prajāsu nindanaṃ tathā || 18 ||
[Analyze grammar]

trāsaḥ prajāyate nityaṃ prajādharṣaṇakāraṇāt |
putrā nṛpaterabhavan pañca putryaśca viṃśatiḥ || 19 ||
[Analyze grammar]

rājñyaḥ saptā'bhavaṃścāpi yuvatyaśca tathāpi saḥ |
kāmanābalasaṃkṛṣṭo vyavāye vartate sadā || 20 ||
[Analyze grammar]

madyāsavapiśatādaścātipāpaparo'bhavat |
athā'sya nigrahārthaṃ vai prajā lavādanāya ha || 21 ||
[Analyze grammar]

muhuḥ samprārthayāmāsurdharmadaṇḍapradānakam |
lavādanaḥ śuśocāpi rājadroho bhavettathā || 22 ||
[Analyze grammar]

adaṇḍe tu prajādrohaḥ kartavyamatra kiṃ mayā |
evaṃ vicāryamāṇe ca mārgaḥ śanairabudhyata || 23 ||
[Analyze grammar]

yuvarājāya dātavyaṃ rājyaṃ rājā nirarthakaḥ |
śāsanīyaḥ svayameva bhaviṣyatyapasattayā || 24 ||
[Analyze grammar]

lavādanenaikadā tu rājñe sattvasthitāya ca |
āveditaṃ śubhaṃ vākyaṃ jñānagoṣṭhyā hitāvaham || 25 ||
[Analyze grammar]

asāraḥ khalu saṃsārastatra sāro hi mokṣaṇam |
sevayā tu satāṃ yadvā nārāyaṇasamāśrayāt || 26 ||
[Analyze grammar]

pāpanāśastathā mokṣaḥ prajāyate hi dehinām |
rājyaṃ sampad bāndhavāśca prāṇayāne hyupāgate || 27 ||
[Analyze grammar]

na rakṣanti mahārājaṃ cakravartinamityapi |
rakṣatyeva kṛto dharmo nā'dharmo rakṣati kvacit || 28 ||
[Analyze grammar]

dharma eva pare loke sevitaḥ sevate janam |
adharmo bādhate tvatra pare loke'pi śatruvat || 29 ||
[Analyze grammar]

nivṛttiṃ prāpya bhagavān bhajanīyo hitaiṣiṇā |
putre yogye dhuraṃ datvā mokṣaḥ sādhyaḥ sukhārthinā || 30 ||
[Analyze grammar]

kāmānāṃ naiva sīmā'sti vardhante tṛṣṇayā saha |
pātayanti niraye te'rdayanti jvālayanti ca || 31 ||
[Analyze grammar]

kāmāṃstyaktvā hṛdayasthān nārāyaṇārpaṇaṃ caret |
vyavahārasya bhakteśca kāmānāṃ na saha sthitiḥ || 32 ||
[Analyze grammar]

bhaktiṃ kartuṃ vyavahāraṃ kāmāṃstyajet vṛṣārthavān |
tasmād rājyaṃ kumārāya deyaṃ śānteśvarāya te || 33 ||
[Analyze grammar]

jyeṣṭhaputrāya yogyāya śobhanaṃ tad bhaviṣyati |
śrutvā rājā'ntare vahnijvālayeva hyadahyata || 34 ||
[Analyze grammar]

satṛṣṇasya viṣaṃ sarvaṃ cāmṛtaṃ hyapi padmaje |
hitavākyaṃ tyāgavākyaṃ viṣāyate na saṃśayaḥ || 35 ||
[Analyze grammar]

sa tu nītyā'vadattaṃ svapradhānaṃ gurumuttamam |
lavādana guro yogyaṃ bhavatā me niveditam || 36 ||
[Analyze grammar]

tathāpi kasyacit kālasyā'nte dāsyāmi tattathā |
putre tu yogyatā pakvā tāvadrājye bhaviṣyati || 37 ||
[Analyze grammar]

abhyāsena tato rājyaṃ dāsye śaighryaṃ na vidyate |
ityuttarito gururāṇ maunamāpyā'namannṛpam || 38 ||
[Analyze grammar]

rājā'pi kaitavaṃ nityamacintayannijārthakam |
guruścā'yaṃ rājyaguruḥ pradhānaśca sabhādhipaḥ || 39 ||
[Analyze grammar]

utsādanīyaḥ sthānādvai sthāpanīyo'paro guruḥ |
tadā me bhavitā kṣemaṃ kuśalaṃ sarvadā tathā || 40 ||
[Analyze grammar]

vicāryetthaṃ trimāsānte sthānād dūrīcakāra tam |
lavādano'pi daivecchāṃ matvā'tyajannijaṃ padam || 41 ||
[Analyze grammar]

nivṛttiṃ prāpya devān sa hyabhajad daśa tān sadā |
rājā vyavardhata cātivyavāye svaprajāsu vai || 42 ||
[Analyze grammar]

prasahya kanyakā nītvā prajāyāstu surūpiṇīḥ |
karoti kāmanāṃ tāsu vimuñcati kṛtārthakaḥ || 43 ||
[Analyze grammar]

ākrośaśca prajāsveva vyavardhatātiroṣataḥ |
rājā'yaṃ nāśanīyo vai pradhānasya vivāsakaḥ || 44 ||
[Analyze grammar]

ekaśabdaḥ śrūyate vai sarvaprajāsu sarvathā |
prajāvyavāyavyasanī nāśanīyaḥ nṛpo'pi vai || 41 ||
[Analyze grammar]

anyathā mahatī hānirbhavedeva prajāsu vai |
itiniścitya ca sarve prajāgryāstu lavādanam || 46 ||
[Analyze grammar]

mimilurnṛpanāśāya daivena noditā hi te |
lavādanena sahitā yayuḥ senāpatiṃ prati || 47 ||
[Analyze grammar]

sūryakāntābhidhaṃ cāpi kathāyāmāsurudvratam |
rājño vināśanaṃ syādvai yadi dharme na yāti saḥ || 48 ||
[Analyze grammar]

bhavān prajānāṃ śāstā'pi nītimāśrayatu dhruvām |
rājā'yaṃ rājyapadato'vatārya eva sarvathā || 49 ||
[Analyze grammar]

sūryakānto marmavākyaṃ śrutvā tathā'stu cā'vadat |
atha sarve yayuḥ śānteśvaraṃ tu yuvarājakam || 50 ||
[Analyze grammar]

rājā'yaṃ vipathe tvāste padayogyo na vidyate |
avatārya padāt tvaṃ ca sthāpyaḥ prajābhirādarāt || 51 ||
[Analyze grammar]

anyathā mahatī hānirbhaviṣyatīti viddhi vaḥ |
kumāro'pi tathā'stvevaṃ prāhā'tha mahiṣīṃ prati || 52 ||
[Analyze grammar]

śreṣṭhottamāṃ prati sarve'kathayannitinirṇayam |
sāpi daivavaśāttathāstvevaṃ prāha vivekinī || 53 ||
[Analyze grammar]

atha prajābhirmahatī sabhā kṛtā nivṛttaye |
tatra rājñī tathā rājñyaḥ kumārāśca prajottamāḥ || 54 ||
[Analyze grammar]

senāpatiḥ pradhānaścāyayurnirṇayahetave |
pradhānāya navīnāya nirṇayaṃ te nyavedayan || 55 ||
[Analyze grammar]

gartamaṇiḥ pradhānastu nirṇayaṃ nā'bhyamodayat |
utthāya prayayau bhūpaṃ nyavedayadaniṣṭakam || 56 ||
[Analyze grammar]

rājā roṣeṇa sahasā gartamaṇimuvāca ha |
kārāgāre prakarotu senāpati kumārakam || 57 ||
[Analyze grammar]

rājñīṃ prajāḥ pūrvapradhānaṃ ca tathā virodhinaḥ |
śrutvā gartamaṇinā vai rājabhaṭā nṛpājñayā || 58 ||
[Analyze grammar]

prahitā nigaḍe kartuṃ rājavirodhino drutam |
śataśo'tha rājabhaṭā dudruvuḥ paritastadā || 59 ||
[Analyze grammar]

vidhṛtā bahavastatra kṛtāśca nigaḍeṣu vai |
atha lavādanastatra rājñīṃ rājakumārakam || 60 ||
[Analyze grammar]

senāpatiṃ prasaṃprāpya mantraṇāṃ saṃvidhāya saḥ |
garaṃ tīvratamaṃ nītvā rājānaṃ śaraṇaṃ yayau || 61 ||
[Analyze grammar]

puṣpahāraṃ sagaralaṃ kaṇṭhe rājño nyadhāttadā |
rājā sugandhamāsādya śanairmūrcchāmavāpa ha || 62 ||
[Analyze grammar]

mṛtastūrṇaṃ tato gartamaṇiḥ saṃbhraṃśitaḥ padāt |
lavādanaḥ pradhānasya pade prajābhirādṛtaḥ || 63 ||
[Analyze grammar]

kārāgārasthitāḥ sarve lavādanena mocitāḥ |
śānteśvaro yuvarājo rājadhiṣṇye'bhiṣecitaḥ || 64 ||
[Analyze grammar]

mānaveśo mṛtaśceti ghoṣitaṃ vai prajāsvapi |
rājñyastāśca kumārāśca nṛpaurdhvadaihikaṃ vyadhuḥ || 65 ||
[Analyze grammar]

yajño nṛpasya śuddhyarthaṃ kṛtavān sa lavādanaḥ |
viprā anāthāḥ santaśca sādhvyaśca kanyakāstathā || 66 ||
[Analyze grammar]

prajājanā bhojitāśca toṣitāḥ svarṇadānakaiḥ |
godānairgṛhadānaiśca kanyādānaiḥ kumārakāḥ || 67 ||
[Analyze grammar]

dharmakāryairmakhe rājā mṛtaḥ puṇyena yojitaḥ |
yamapūryāṃ ca sūrmyādiyātanā bahuduḥkhadāḥ || 68 ||
[Analyze grammar]

bhuktvā svargaṃ yayau paścānmakhapuṇyena vai nṛpaḥ |
yuvarājo'bhavad rājā rājyaṃ dharmyaṃ vyadhāddhi saḥ || 69 ||
[Analyze grammar]

sādhubhakto'bhavannityaṃ nārāyaṇaparāyaṇaḥ |
sahasrasādhavastasya bhuṃjate nityameva tu || 70 ||
[Analyze grammar]

karoti rājyaṃ dharmyaṃ ca lavādanā'numoditaḥ |
atha sādhūttamo nāmnā kiṃśukāyanasadguruḥ || 71 ||
[Analyze grammar]

ātmaniṣṭho bhagavanniṣṭhito lavādanaṃ gurum |
tathā śānteśvaraṃ bhūpaṃ senānī sūryakāntakam || 72 ||
[Analyze grammar]

prajāgryāṃścopādideśa hitaṃ kalyāṇadaṃ tadā |
karmabhirdehino loke jāyante ca viyanti ca || 73 ||
[Analyze grammar]

dharmo jñānaṃ virāgaśca bhaktirharau ca sādhuṣu |
kṛtaṃ yat sevanaṃ puṇyaṃ dānaṃ saha prayāti vai || 74 ||
[Analyze grammar]

dharmī nṛpaḥ pitṛtulyo'dharmī daṇḍyastu śatruvat |
dharmiṇā bhūbhṛtā śreyaḥ prajānāṃ nityadā bhavet || 75 ||
[Analyze grammar]

sāghusevāvidhātā vai rājā prajāsu rājate |
biḍālabakavṛttistu prajābhiḥ paribhūyate || 76 ||
[Analyze grammar]

yastu nirmalahṛt kṛṣṇasevāparo jitendriyaḥ |
prajārakṣākaro bhūpo vardhate'nugrahaiḥ satām || 77 ||
[Analyze grammar]

bālye kaścit sādhudharmā yauvane viparītakṛt |
bālye duṣṭo'pi kaścittu yauvane dhārmiko bhavet || 78 ||
[Analyze grammar]

satāṃ samāgamairdehī tvābālyājjīvanāvadhim |
satpumāneva jāyeta śreyomārgasthitaḥ sadā || 79 ||
[Analyze grammar]

asatpumānasatsaṃgādasannevā'bhivardhate |
sahavāsavyavahārakhānapānāpamānataḥ || 80 ||
[Analyze grammar]

guṇā aguṇā dṛśyante bāle yuni viśeṣataḥ |
bālye puṇyapratāpena dharmī yunyapi sabhavet || 81 ||
[Analyze grammar]

śamena manasaḥ śāntirdamena bāhyavājinām |
tābhyāṃ doṣāḥ pradātavyāḥ kāmakrodhādayo'khilāḥ || 82 ||
[Analyze grammar]

ubhāvetau tyāgināṃ ca gṛhiṇāṃ hitakāriṇau |
sādhusevāparāṇāṃ tu doṣā naśyanti mūlataḥ || 83 ||
[Analyze grammar]

jīvo vivekanipuṇo nāśayed doṣamaṇḍalam |
sākṣī kṛṣṇaścāntarātmā prāpayeddhāma cottamam || 84 ||
[Analyze grammar]

kalyāṇamūrtirbhagavān jīvānāṃ śreyase bhuvi |
prāvirbhavati śrīkāntastaṃ prasevya vimucyate || 85 ||
[Analyze grammar]

yadyapi śrīharirdhāmni sthita eva tu muktidaḥ |
samartho'sti tathāpyatra premibhaktā bhavanti ye || 86 ||
[Analyze grammar]

nāryo narāḥ premiṇo vai teṣāṃ yo viraho hareḥ |
asahyaḥ kṣaṇamātraṃ tu tannāśāya yathā sukham || 87 ||
[Analyze grammar]

tebhyo dātuṃ bhaktivaśo bhaktecchāpūraṇāya ca |
tadihānupramodādipūraṃ rūpaṃ dadhāti saḥ || 88 ||
[Analyze grammar]

yogaṃ datvā pūrayati bhaktasarvamanorathān |
sajātīyo hi bhavati premavṛddhyarthameva ha || 89 ||
[Analyze grammar]

kṛpaiva sā harerbodhyā bhaktajātīyajanmani |
asaṃkhyadivyasadguṇaiśvaryapratāpatejasā || 90 ||
[Analyze grammar]

pūrayannaranārīṇāṃ manāṃsi tadvaśe sthitaḥ |
putratvena patitvena suhṛttvena sakhitvataḥ || 91 ||
[Analyze grammar]

pitṛmātṛsatītvena sādhutvena pravartate |
śiṣyatvena gurutvena nṛpatvena ca vartate || 92 ||
[Analyze grammar]

sukhayitvā yatheṣṭaṃ tān dharmasthāpanamuttamam |
āsurāṇāṃ vināśaṃ ca kurvaṃstadānuṣaṃgikam || 93 ||
[Analyze grammar]

tirobhavati bhaktānāṃ tṛptyuttaraṃ nijecchayā |
anādiśrīkṛṣṇanārāyaṇaḥ śrīkambharātmajaḥ || 94 ||
[Analyze grammar]

gopālabālaḥ śrīkṛṣṇo bhaktyā grāhyaḥ śriyaḥ patiḥ |
kāmaṃ krodhaṃ chalaṃ lobhaṃ mānamirṣyāṃ ca matsaram || 95 ||
[Analyze grammar]

tyaktvā pāpāni sandahya bhajettaṃ māṇakīpatim |
bhaktyā satāṃ sevayā ca sa prabhuḥ samprasīdati || 96 ||
[Analyze grammar]

agnidasya garadasya nārīhatyodbhavasya ca |
pāpaṃ naśyati kṛṣṇasya sevayā tatsatāmapi || 97 ||
[Analyze grammar]

bālaghnasya dhenuhatyodbhavasya nṛpanāśinaḥ |
mātṛghnasya tathā pāpaṃ līyate kṛṣṇasevinaḥ || 98 ||
[Analyze grammar]

oṃ namaḥ śrīkṛṣṇanārāyaṇāya svāmine svāhā |
japantu satataṃ mantraṃ pāpaśuddhirbhaviṣyati || 99 ||
[Analyze grammar]

ityuktvā kamale kiṃśukāyanaḥ pradadau manum |
lakṣaprajābhyastatraiva sarvān vyadhāt suvaiṣṇavān || 100 ||
[Analyze grammar]

anādiśrīkṛṣṇanārāyaṇaṃ bhejuśca māṃ hi te |
lavādano daśadevairmāṃ tataḥ puruṣottamam || 101 ||
[Analyze grammar]

viśeṣeṇā'bhajat sarve cānye rājaprajādayaḥ |
bhejurmāṃ śrīkṛṣṇanārāyaṇaṃ cātmanivedinaḥ || 102 ||
[Analyze grammar]

sādhavaḥ prayayurbadrīnārāyaṇaṃ tataḥ khalu |
lavādanasya vārdhakye sevayā tuṣṭatāṃ gataḥ || 103 ||
[Analyze grammar]

ahaṃ lakṣmi puro divyamūrtirāvirbabhūva ha |
garadasya mahatpāpaṃ vidhūya divyavarṣmaṇā || 104 ||
[Analyze grammar]

divyamuktaṃ vidhāyaivā'nayaṃ dhāmā'kṣaraṃ mama |
rājñīḥ sarvāstathā senāpatiṃ ca nṛpatiṃ navam || 105 ||
[Analyze grammar]

bhaktyā tuṣṭo'nayaṃ sarvānakṣaraṃ kramaśaḥ padam |
prajāśca bhaktisampannāḥ pāvanīścānayaṃ padam || 106 ||
[Analyze grammar]

evaṃ mayā samastāste sādhudvārā vimocitāḥ |
māyābandhanarahitāḥ kṛtā lakṣmi pare'kṣare || 107 ||
[Analyze grammar]

garadānamahatpāpaṃ sarvaṃ bhaktyā layaṃ gatam |
evaṃ bhaktyā vilīyante pāpāni sarvathā rame || 108 ||
[Analyze grammar]

bhuktiṃ muktiṃ prayāntyeva bhajanasya balānmama |
paṭhanācchravaṇādasya bhuktirmuktirbhavet sadā || 109 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne lavādanākhyapradhānasya rājñe garadasya bhagavadbhaktyā kiṃśukāyanasādhusevayā ca tasya ca rājñīnāṃ ca prajānāṃ ca mokṣaṇamityādinirūpaṇanāmā trayastriṃśatyadhikadviśatatamo'dhyāyaḥ || 233 ||
[Analyze grammar]