Chapter 118

śrīnārāyaṇīśrīruvāca |
bhagavan devadeveśeśvareśvareśvareśvara |
bhaṇḍanāśottaraṃ turyaprātaḥ tato'bhavacca kim || 1 ||
[Analyze grammar]

śrīpuruṣottama uvāca |
yuddhottaraṃ śramaṃ sarvadevīnāṃ lalitāramā |
apānudanmahālakṣmīḥ sudhāmṛtavilokanaiḥ || 2 ||
[Analyze grammar]

mānadānaiḥ pāritoṣikādidānairmahārhaṇaiḥ |
bhojanāni sudivyāni mahālakṣmīrdadau tadā || 3 ||
[Analyze grammar]

śṛṃgārāṇi samastāni divyāni pradadau tadā |
kṛtvā sarvāḥ svahṛdaye koṭyarbudābjamūrtikā || 4 ||
[Analyze grammar]

samakāle snehabharā samāślikṣat mahāramā |
mama putrya itiprāha muktānyo brāhmya īśikāḥ || 5 ||
[Analyze grammar]

sarvābhyaḥ pradadāmyevā'kṣaraṃ dhāma hi śāśvatam |
anādiśrīkṛṣṇanārāyaṇasya śāśvatīpriyāḥ || 6 ||
[Analyze grammar]

santu sadānandavetryo mahiṣyaśceti śārṅgiṇaḥ |
jagāda tābhyaḥ sarvābhyaścandrakāṃśca lalāṭake || 7 ||
[Analyze grammar]

vyadhānmālā dadau tābhya mama kaṇṣṭhe'rpaṇāya sā |
sarvābhistatra kaṇṭhe me mālā'rpitāstadā priyāḥ || 8 ||
[Analyze grammar]

koṭyarbudābjakanyāstā brāhmyo devyo madaṃśikāḥ |
jātā mama priyāḥ sarvā yā idānīṃ bhavanti me || 9 ||
[Analyze grammar]

sānnidhye tava vai lakṣmi vivāhitā mayā tadā |
kuṃkumavāpikākṣetre vartante yāstava priyāḥ || 10 ||
[Analyze grammar]

sapatnyaste svasāro vai madarthaṃ bhinnabhūbhavāḥ |
mamā''jñaptā hi mānuṣyo daivyaḥ paitryastathā'parāḥ || 11 ||
[Analyze grammar]

anekadehasampannā matpatnyaḥ santi tā imāḥ |
śṛṇu lakṣmi caturthe vai madhyāhne devatāgaṇāḥ || 12 ||
[Analyze grammar]

brahmā viṣṇuśca rudraśca mahendraśca bṛhaspatiḥ |
ādityā vasavo rudrā marutaḥ sādhyadevatāḥ || 13 ||
[Analyze grammar]

siddhāḥ kiṃpuruṣā yakṣā dikpālā lokapālakāḥ |
bhaktā daityā dānavā ye nāgāśca vaiṣṇavāstu ye || 14 ||
[Analyze grammar]

devapakṣā āsurā ye tāmasā rājasāśca ye |
sarve śrīvijayaṃ śrutvā vīkṣya devasukhaṃ tathā || 15 ||
[Analyze grammar]

sabhāyāṃ saṃhatāstatra sarvastrījātiśobhitāḥ |
tuṣṭavuḥ sahagandharvā'psarasaśca mahāramām || 16 ||
[Analyze grammar]

namo namaste parameśvarastrīmūrddhanyamūrte'rdhaharisvarūpe |
mahākṣare cākṣaradhāmavāse trisṛṣṭimātaḥ sunamo namaste || 17 ||
[Analyze grammar]

namo'vatārādisamagravāse namaḥ samasteśvarakoṭivāse |
namaḥ samagreśvarikānivāse muktānikāmuktagaṇādhivāse || 18 ||
[Analyze grammar]

tubhyaṃ namaḥ kṛṣṇanarāyaṇāṅge siddharṣisatpitrasude namaste |
sureśvarīvṛndasusevite te śrīmānavīrūpiṇi te namo'stu || 19 ||
[Analyze grammar]

śrīkambhare śrīlalitesanāthe santoṣikāmātaratho namaste |
gajānane'nantaramānurūpe mātarnamaste hariṇīsvarūpe || 20 ||
[Analyze grammar]

sarveśvari sarvaramādhināthe śrīmāṇikīpāśavatīpramode |
lakṣmīmahāsāgarabhāvike te brahmapriyāsthe satataṃ namaste || 21 ||
[Analyze grammar]

kāmādhināthe'rthitadānadakṣe cintāmaṇe citrajagatprasūte |
mokṣaprade bhāskaracandranetre mandasmite yogini te namo'stu || 22 ||
[Analyze grammar]

namo namo bhaṇḍamahāsuraghne samastadaityāntakakartri mātaḥ |
mudrādhināthe ca suyantrarūpe sarvaśrutiprodbhavike namaste || 23 ||
[Analyze grammar]

kṛṣṇe pare cakrasuṣaṭkasaṃsthe ṣaḍūrmihartri śramanāśike te |
ṣaḍbhāvaśūnye'ṣṭaguṇāśraye te mātarnamo mukhyasamastarājñi || 24 ||
[Analyze grammar]

kāntādhināthe kamale sunirmale |
kalādhināthe bhuvaneśvari priye |
rasāyane sarvarasādhivāsini |
divyasvarūpe ca namo'stvabhīkṣṇaśaḥ || 25 ||
[Analyze grammar]

sadāṇimādyaṣṭakasevanīye gopālakṛṣṇātmakamañcavāse |
devādhidevapramade savitri lokasya mātaḥ praṇamo namaste || 26 ||
[Analyze grammar]

vrahmapriyebrahmarame hariśri brahmātmike śrīlalite namaste |
brahmāmṛtasrotasi janmahantri brahmeśvari śrīlalite namaste || 27 ||
[Analyze grammar]

śubhāśraye śubhaprade'kṣarākhye hatārivarge lalite namaste |
sarvādhike sarvagate samastasiddhiprade śrīlalite namaste || 28 ||
[Analyze grammar]

sarvā'marā''kāṃkṣitapūrayitri |
varaprade śrīlalite namaste |
bindusthite bindusurūpiṇi śrī |
bṛhatkucā'mbhojavilolahāre || 29 ||
[Analyze grammar]

phalaprade kampalate'rkaśobhe sarojavaktre lalite namaste |
sāraikabhūme puruṣottami śrībhūpadmikā'jākamalātmike te || 30 ||
[Analyze grammar]

kṛpānidhāne surakāryaśālini |
śrīvaiṣṇavi śrīsakalāvatāriṇi |
sāraṃgaśāvākṣi manohare prasu |
mātarnamaste lalite'tisundari || 31 ||
[Analyze grammar]

śrīmanmahālakṣmi samṛddhidāyini |
vipannivāre'tisanātani prame |
tvayā samastaṃ bhuvanaṃ surakṣitaṃ |
bhaṇḍāsurādīn vinihatya saṃgare || 32 ||
[Analyze grammar]

śrīśaṃbhunā bhasmita eva manmatho |
bhasmotthabhaṇḍo'pi hataḥ punastvayā |
kāmasya bhasmā'pi subhasmitā yato |
niṣkāmatā nīratitā pradarśitā || 33 ||
[Analyze grammar]

sthūlaṃ śarīraṃ madanasya śaṃbhunā |
dagdhaṃ ca sūkṣmaṃ tu tataḥ punastvayā |
evaṃ śarīrobhayavarjitaṃ patiṃ |
vilokya tajjīvanamārthayad ratiḥ || 34 ||
[Analyze grammar]

tadā punaḥ kāraṇavarṣma kalpanā |
tmakaṃ yadāsīd bahuvāsanātmakam |
tasmādadṛśyaṃ ramaṇasya varṣma vai |
vyāptaṃ bṛhatkṛtya dadau ratistriyai || 35 ||
[Analyze grammar]

ratirnijaṃ kāntamanuttamaṃ punaḥ |
samastalokasthitikaṃ hṛdi sthitam |
adṛśyarūpaṃ prasamīkṣya rañjitā |
prasannatāpūrvakamāśliṣat patim || 36 ||
[Analyze grammar]

avarṣmarūpo hyapi varṣmakāryakṛt |
kāmo bhavatyā vihitastato hyasau |
tavājñayā vyāptimagācchivāpatau |
skando'bhavacchailasutāsuyogataḥ || 37 ||
[Analyze grammar]

sthūla kāmasya jayasya kartā |
śaṃbhusvarūpo bhavatīti bodhyaḥ |
sūkṣmasya kāmasya jayasya kartā |
lakṣmīsvarūpo bhavatīti bodhyaḥ || 38 ||
[Analyze grammar]

kuvāsanā'naṃgajayasyakartā nārāyaṇaścordhvagatirhiṃ bodhyaḥ |
evaṃ tvayā bodhitameva sarvebhyo naḥ pareśeśvari muktaye naḥ || 39 ||
[Analyze grammar]

iti stutvā pūjayitvā niṣedurhṛṣṭamānasāḥ |
utsavaṃ tannimittaṃ ca cakruḥ sarve raṇājire || 40 ||
[Analyze grammar]

tadrājyaṃ lalitālakṣmīrdadau ratīśvarāya ca |
kāmarūpaḥ svayaṃ kāmo bhūtvā rājyaṃ cakāra ha || 41 ||
[Analyze grammar]

navalakṣādhipo jātaḥ kāmo ratipatiḥ prabhuḥ |
prītimān śrīmahālakṣmībhakto nārāyaṇānugaḥ || 42 ||
[Analyze grammar]

sa mayā'dya dhṛto lakṣmi bhavatīnāṃ pratuṣṭaye |
divyo me bhakta evā'sau mukto vai vartate guṇaḥ || 43 ||
[Analyze grammar]

satyakāmasvarūpo'sau brahmapriyāsukhapradaḥ |
anantarūpamāpannaḥ saguṇo'pi trilokiṣu || 44 ||
[Analyze grammar]

vyāpako vartate lakṣmi kṛpayā te ratīśvaraḥ |
atha devāśca pitaro mahātmāno maharṣayaḥ || 45 ||
[Analyze grammar]

yayuḥ sarve nijān lokān mahālakṣmīḥ sadāsikā |
mahāvaikuṇṭharūpāyāṃ kāñcīpuryāṃ sadā'vasat || 46 ||
[Analyze grammar]

dvitīyena svarūpeṇa mahāviṣṇorgṛhaṃ yayau |
tṛtīyena svarūpeṇa kaṃbharāśrīrhi vartate || 47 ||
[Analyze grammar]

caturthena svarūpeṇa gajānanā pravartate |
śrīlalitā'bhidhā saiṣā saurāṣṭre'nubhaviṣyati || 48 ||
[Analyze grammar]

anantā hyavatārāśca bhaviṣyanti tataḥ param |
agamyāścāpyavarṇyāśca divyā mokṣapradāḥ sadā || 49 ||
[Analyze grammar]

anādinī mahāśaktirbrāhmī śrīpuruṣottamī |
jñeyaṃ mātā kambharā me mahālakṣmīḥ pravidyate || 50 ||
[Analyze grammar]

śvaśrūṃ tāṃ sevaya lakṣmi mokṣadāṃ muktidāṃ sadā |
praseve'haṃ sadā tāṃ ca namāmi mātaraṃ muhuḥ || 51 ||
[Analyze grammar]

mātṛsevāparāṇāṃ na gatirduṣṭā bhavet kvacit |
mātṛsevā mahāvighnadaityanāśanakāriṇī || 52 ||
[Analyze grammar]

śṛṇu lakṣmi tathā'nyatra mandirāṇi śubhāni vai |
mahālakṣmyā mama māturlalitāyā vadāmi te || 53 ||
[Analyze grammar]

yatra ṣoḍaśadhā bhinnā nivāsaṃ prakaroti sā |
racitāni samastāni mayena viśvakarmaṇā || 54 ||
[Analyze grammar]

merau tathā ca niṣadhe hemakūṭe himācale |
gandhamāde ca nīlādrau meṣādrau śṛṃgaparvate || 55 ||
[Analyze grammar]

mahendre ceti bhaumāni mandirāṇi śubhāni vai |
navaitāni tu tīrthāni mokṣadāni hi santi tu || 56 ||
[Analyze grammar]

audakāni tu cānyāni saptasindhugatāni vai |
lavaṇe caikṣave saure ghārte dādhne ca pāyase || 57 ||
[Analyze grammar]

miṣṭe ceti samudre vai mandirāṇi bhavanti hi |
ratnahīrakamaṇibhiḥ sannaddhāni bhavanti hi || 58 ||
[Analyze grammar]

viśālāni cocchritāni mahodyānayutāni vai |
pāresahasrāstaravaḥ sadāpuṣpāḥ sadāphalāḥ || 59 ||
[Analyze grammar]

sadāpallavaśobhāḍhyāḥ sadā saurabhasaṃkulāḥ |
nānāṛtusamāviṣṭā lakṣmyāḥ śṛṃgārahetavaḥ || 60 ||
[Analyze grammar]

amṛtaṃ syānmadhurasaḥ puṣpāṇi ca vibhūṣaṇam |
pītāmbarāṇi divyāni pravālānyeva tāni ca || 61 ||
[Analyze grammar]

etādṛśāḥ kalpavṛkṣā mandirāgre bhavanti ca |
kalpavāpyaḥ kalpaśālā haricandanavāṭikāḥ || 62 ||
[Analyze grammar]

mandāradrumavāṭyaśca pārijātādivāṭikāḥ |
kadambataruvāṭyaśca bhavanti divyaśarkarāḥ || 63 ||
[Analyze grammar]

cintāmaṇigṛhāṇyeva mahālakṣmyā bhavanti tu |
mātaṃgo vai purā lakṣmi maharṣirbhaktisevakaḥ || 64 ||
[Analyze grammar]

upāsanāṃ mahālakṣmyāścakre tāpasadharmavān |
mahālakṣmīḥ prasannā'smai dadau saṃkalpasiddhikāḥ || 65 ||
[Analyze grammar]

tuṣṭāva gocarāṃ lakṣmīṃ harṣito bhaktisamplutaḥ |
mātastvatsmṛtimātreṇa sarvāśca mama siddhayaḥ || 66 ||
[Analyze grammar]

jātā evā'ṇimādyāstāḥ sarvāścānyā vibhūtayaḥ |
prāpaṇīyaṃ na me kiñcidasti vai bhuvanatraye || 67 ||
[Analyze grammar]

kintu nityaṃ darśanaṃ me yathā syāt tattathā kuru |
ityuktā ca mahālakṣmīḥ svapne mātaṃgayoṣite || 68 ||
[Analyze grammar]

tāpicchamañjarīmekāṃ dadau karṇā'vataṃsataḥ |
siddhimatī ca sā patnī garbhavatī tato'bhavat || 69 ||
[Analyze grammar]

viṣṇuśyāmeti sā putrī śyāmā sā nāmadhāriṇī |
abhavat siddhimatyāstu garbhājjanmavatī hi sā || 70 ||
[Analyze grammar]

tataḥ śyāmā mahālakṣmīṃ samupāsya virājate |
mahālakṣmyāḥ sannidhau vai sevāyāṃ sarvadā sakhī || 71 ||
[Analyze grammar]

tayā prasevyamānā sā saśyāmā vaiṣṇavī matā |
ghanaśyāmā dvitīyā'pi sevikā vartate tathā || 72 ||
[Analyze grammar]

meghaputrī cāmbarād vai mahālakṣmīṃ prasevate |
tā lalitā'rhaṇadhyānajapastotraparāyaṇāḥ || 73 ||
[Analyze grammar]

madhuśrīrmādhavaścopāsete pārameśvarīm |
śukraśrīśca śuciśrīścopāsete pārameśvarīm || 74 ||
[Analyze grammar]

nabhaḥśrīśca nabhasyaśrīrupāsete pareśvarīm |
iṣaśrīśca tathorjaśrīrupāsete pareśvarīm || 75 ||
[Analyze grammar]

sahaḥśrīśca sahasyaśrīrupāsete pareśvarīm |
tapaḥśrīśca tapasyaśrīrupāsete pareśvarīm || 76 ||
[Analyze grammar]

vāsantaśaktayo lakṣmyaḥ sevante pārameśvarīm |
lalitāpūjanadhyānajapastotraparāyaṇāḥ || 77 ||
[Analyze grammar]

lalitāyāṃ bhaktiyuktā vartante divyayoṣitaḥ |
sudivyāḥ pakṣiṇastatra pārṣadāḥ siddhisevitāḥ || 78 ||
[Analyze grammar]

lalitāmantrajaptāro lalitā''jñāparāḥ sadā |
cāraṇyaścāraṇāścāpi vartante devakoṭayaḥ || 79 ||
[Analyze grammar]

gāyanti lalitādevyā gītibandhān muhurmuhuḥ |
gandharvā'psarasāṃ vṛndā gāyanti vallakīsvanaiḥ || 80 ||
[Analyze grammar]

sukumārasvarūpāśca śrīlakṣmībhaktiśālinaḥ |
yoginaścāpi yoginyo vaiṣṇavyo bhaktisaṃbhṛtāḥ || 81 ||
[Analyze grammar]

sevante lalitālakṣmīṃ dhyāyantyapiyathāyatham |
svasaubhāgyavivṛddhyarthaṃ prajapanti ca tanmanum || 82 ||
[Analyze grammar]

kinnarāḥ kimpuruṣāśca kinnaryādiyutāḥ sadā |
nṛtyantaścāpi gāyantaḥ sevante puruṣottamīm || 83 ||
[Analyze grammar]

lalitāparameśvaryā bhaktā ye mānavottamāḥ |
divyadehā prasevante śrīlakṣmīṃ mātaraṃ sadā || 84 ||
[Analyze grammar]

pātālavāsino ye ye śrīlakṣmyarcanasādhakāḥ |
te siddhamūrtayastatra vasanti sukhabhoginaḥ || 85 ||
[Analyze grammar]

lalitāmantrajaptāro lalitāśāstradīkṣitāḥ |
lalitāpūjakāsteṣu śrīnagareṣu santi hi || 86 ||
[Analyze grammar]

tatra ye jñānino bhaktā mahālakṣmīparāyaṇāḥ |
bhaktāḍhyā brahmarūpāśca te viśantyākṣaraṃ padam || 87 ||
[Analyze grammar]

jayā''khyā lalitājyeṣṭhā nayatyevākṣaraṃ padam |
anādiśrīkṛṣṇanārāyaṇāgre saṃvasanti te || 88 ||
[Analyze grammar]

devalokanivāsāśca sastrīkā śrīpurottame |
vasanti bhaktisampannāḥ śrīlakṣmīnāmajāpakāḥ || 89 ||
[Analyze grammar]

siddhā divyarṣayaścāpi pavanābhyāsino'pare |
mārutāśca divyamuktāḥ sevante pārameśvarīm || 90 ||
[Analyze grammar]

nidhayaḥ ṛddhayaścāpi bhūtayaśca vibhūtayaḥ |
divyā vasanti tatraiva sevante puruṣottamīm || 91 ||
[Analyze grammar]

kāmadughāśca vai bahvyo dugdhapraṇidhigarvitāḥ |
lalitāprītiniratāḥ sevante laliteśvarīm || 92 ||
[Analyze grammar]

rudrāṇyaśca tathā rudrāḥ sarvābharaṇabhūṣitāḥ |
parivārāśca rudrasya sevante laliteśvarīm || 93 ||
[Analyze grammar]

te sarve sumahātmāno vaiṣṇavottamavigrahāḥ |
śrīdevyā dhyānaniṣṇātāḥ śrīlakṣmīmantrajāpinaḥ || 94 ||
[Analyze grammar]

śrīlakṣmyāśca mahābhaktāḥ sevante puruṣottamīm |
śatarudrā bhaktiyuktāḥ sevante divyavaiṣṇavāḥ || 95 ||
[Analyze grammar]

aryamā viśvasṛṭ sarvamuniyuktaśca sevate |
marīcyādyāḥ prasevante lalitāśrīṃ pareśvarīm || 96 ||
[Analyze grammar]

vidyāḥ sarvāścopavidyāḥ sevante tāṃ sahasraśaḥ |
kalāḥ sarvāḥ kumāryaśca sevante māṃ pareśvarīm || 97 ||
[Analyze grammar]

śrīpatirvai tathā viṣṇuḥ sevate tāṃ sanātanaḥ |
caturdhā daśadhā caiva tathā dvādaśadhā prabhuḥ || 98 ||
[Analyze grammar]

vibhinnamūrtiḥ satataṃ sevate mādhavaḥ sadā |
daśāvatāradevāśca tāṃ tu māṇikyamaṇḍape || 99 ||
[Analyze grammar]

śaṃkhacakragadāpadmadhrāḥ sevante pareśvarīm |
nārāyaṇaḥ keśavaśca govindo mādhavastathā || 100 ||
[Analyze grammar]

sevante śrīmahālakṣmīṃ lalitāṃ mātaraṃ satīm |
āgamā mūrtimantaśca sevante śrīpareśvarīm || 101 ||
[Analyze grammar]

sarvajñaśca mahādevaḥ satyā samaṃ prasevate |
graharāśigaṇāḥ sarve nakṣatrāṇyapi tārakāḥ || 102 ||
[Analyze grammar]

taijasyaḥ śaktayaścāpyupāsate parameśvarīm |
candro nakṣatrasahitaścopāste parameśvarīm || 103 ||
[Analyze grammar]

lalitāyā japairdhyānaiḥ stotraiḥ pūjāśatairapi |
aśvinyādiyutaścandraḥ sevate parameśvarīm || 104 ||
[Analyze grammar]

śṛṃgārakamalāścānyā nānābhūṣaṇabhūṣitāḥ |
upāsate mahālakṣmīṃ lalitāśrīṃ vaśaṃvadāḥ || 105 ||
[Analyze grammar]

vahnirnijāṃganāyuktaḥ sevate parameśvarīm |
dhūmrārciruṣṇā jvalinī jvālinī visphulliṅginī || 106 ||
[Analyze grammar]

suśrīḥ surūpā kapilā havyakavyavahāḥ striyaḥ |
sevante vahniyuktāstā mahālakṣmīṃ pareśvarīm || 107 ||
[Analyze grammar]

sūryaśca tapinī tāpī dhūmrā jvālā ruciḥ kṣamā |
suṣumṇā bodhinī bhogā marīcirdhāriṇī tathā || 108 ||
[Analyze grammar]

viśvetidvādaśaśaktisahitaḥ sevate tu tām |
candrakalā amṛtā mānadā pūṣṇā ratirdhṛtiḥ || 109 ||
[Analyze grammar]

tuṣṭiḥ puṣṭiścandrikā śrīḥ kāntirjyotsnāṃ'gadā śaśā |
prītiḥ pūrṇā'mṛtā pūrṇā sevante parameśvarīm || 110 ||
[Analyze grammar]

puṣṭiḥ ṛddhiḥ sthitirmedhā kāntirlakṣmīrdyutirdhṛtiḥ |
jarā siddhiriti brahmakalāḥ sevanta īśvarīm || 111 ||
[Analyze grammar]

sthitiśca pālinī śāntiśceśvarī kāmikā tatiḥ |
varadā hlādinī prītirdīrghā ceti hareḥ kalāḥ || 112 ||
[Analyze grammar]

viṣṇunā saha sevante śrīlakṣmīṃ lalitāṃ sadā |
tīkṣṇā raudrī bhayā nidrā tandrā kṣut krodhinī trapā || 113 ||
[Analyze grammar]

utkārī mṛtyurityetā raudryaḥ kalā harānvitāḥ |
sevante śrīmahālakṣmīlalitāṃ kambharāsatīm || 114 ||
[Analyze grammar]

nivṛttiśca pratiṣṭhā ca vidyā śāntiśca dīpikā |
indirā rocikā muktā parā sūkṣmā'mṛtā kalā || 115 ||
[Analyze grammar]

jñānā vyāptā vyomikā vyādhinī ṣoḍaśa cārikāḥ |
sevante tāṃ mahālakṣmīṃ mātaraṃ puruṣottamīm || 116 ||
[Analyze grammar]

ityevaṃ śrīpure mātuḥ sevikāḥ kathitāstava |
nāmaśruteḥ pāpahānirmokṣo bhaktimato bhavet || 117 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne śrīlalitāmahālakṣmyā vijayanimittapūjanaṃ mahālakṣmīstotraṃ vijetrīṇāṃ pāritoṣikādi kāmarūpāṇi mahālakṣmyāḥ ṣoḍaśamandirāṇi tatratyaśobhā śaktisevetyādinirūpaṇanāmā aṣṭādaśādhikaśatatamo'dhyāyaḥ || 118 ||
[Analyze grammar]