Chapter 102

śrīpuruṣottama uvāca |
gavārādhanasaṃjñaṃ ca vrataṃ kuryurvimuktaye |
pretasya vaṃśajā bhāryā putraḥ sambandhibāndhavāḥ || 1 ||
[Analyze grammar]

gavāṃ goṣṭhe nivasanaṃ gavāṃ śuśrūṣaṇaṃ tathā |
gavā'nvāhāramevāpi gavānvapānamityapi || 2 ||
[Analyze grammar]

gavānvaśayanaṃ cāpi goprākprabodhanaṃ tathā |
gosthalīmārjanādyaṃ ca daṃśādīnāṃ nivāraṇam || 3 ||
[Analyze grammar]

śādvalaghāsadānaṃ ca gavyāhārastathā'rhaṇam |
rakṣaṇaṃ sarvathā śaśvad goṣṭhe vāsaḥ sadā tathā || 4 ||
[Analyze grammar]

druhyenna manasā vāpi goṣu nityaṃ sukhapradaḥ |
arcayeta ramābuddhyā namaskāraiḥ prapūjayet || 5 ||
[Analyze grammar]

tryahamuṣṇaṃ pibenmūtraṃ tryahamuṣṇaṃ pibet payaḥ |
tryahaṃ ghṛtaṃ pibeduṣṇaṃ vāyubhakṣastryahaṃ bhavet || 6 ||
[Analyze grammar]

vahed ghṛtaṃ tu śirasā vahniṃ saṃjuhuyād ghṛtaiḥ |
ghṛtaṃ dadyāttathā'śnīyādghṛtena svasti vācayet || 7 ||
[Analyze grammar]

gavocchiṣṭayavabhakṣo brahmahatyāṃ vyapohati |
daityaiśca dānavairyuktāḥ prasahya bhojane surāḥ || 8 ||
[Analyze grammar]

āśitā nijabhakṣyāṇi tataḥ śuddhyarthameva ha |
gavārādhanasaṃjñaṃ vai vrataṃ māsakṛtaṃ kṛtam || 9 ||
[Analyze grammar]

tataḥ śuddhāḥ punardevāḥ saṃsiddhā nijakarmasu |
ato gāvaḥ pavitrāśca pāvanāḥ puṇyadāstathā || 10 ||
[Analyze grammar]

godānaṃ tacchubhaṃ datvā śuddhyati svargamaśnute |
agnimadhye gavāṃ madhye satāṃ madhye vasannapi || 11 ||
[Analyze grammar]

vipramadhye satīmadhye vedamadhye vasannapi |
yajñamadhye tīrthamadhye vasan śuddhyati pātakāt || 12 ||
[Analyze grammar]

gāvastuṣṭāḥ prayacchanti putraṃ dhanaṃ patiṃ priyām |
śṛṇu śrīśivarājñīśri purā śrīstvaṃ svabhāvataḥ || 13 ||
[Analyze grammar]

kāntaṃ vapurvinirmāya gomadhye saṃsthitā'bhavaḥ |
gāvaścāścaryasampannā vīkṣyate rūpasampadam || 14 ||
[Analyze grammar]

papracchustvāṃ kā'si kanye kuto'si rūpasundarī |
kathaṃ cātrā''gatā saumye vada cenmanyase hi naḥ || 15 ||
[Analyze grammar]

tadā tvaṃ gāḥ praṇamyaivoditavatī prasāditā |
viṣṇukāntā'smi bhadraṃ vaḥ śrīrnāmā'haṃ hareḥ priyā || 16 ||
[Analyze grammar]

mayā'bhipannā devādyā modante śāśvatīḥ samāḥ |
sūryaścandro mahendraśca vasavo devakoṭayaḥ || 17 ||
[Analyze grammar]

agnirāpo mayā''viṣṭāḥ smṛddhyudbhāvā bhavanti vai |
yānnāviśāmyahaṃ gāvaste vinaśyanti sarvathā || 18 ||
[Analyze grammar]

yatra dharmārthakāmāśca mayā juṣṭā hi tadgṛham |
modapramodaśāntyāḍhyaṃ mahānandabhṛtaṃ bhavet || 19 ||
[Analyze grammar]

icchāmi cāpi yuṣmāsu vastuṃ bhavata madyutāḥ |
strīvarge me sadā vastuṃ vāñcchā jātā'smi vai dhruvā || 20 ||
[Analyze grammar]

śrutvā gāvaśca bhavatīṃ prāhustvaṃ cañcalā hyasi |
sarvagāṃ tvāṃ na cecchāmo bhadraṃ te'nyatra gamyatām || 21 ||
[Analyze grammar]

śrutvā tvaṃ cā'rthitavatī kathaṃ māṃ nābhinandatha |
mahadugraṃ tapaḥ kṛtvā māṃ niṣevanti mānavāḥ || 22 ||
[Analyze grammar]

yakṣā asurā gandharvā īśvarā uragā surāḥ |
kathaṃ māṃ pratigṛhṇīdhvaṃ naiva yūyaṃ hi durlabhām || 23 ||
[Analyze grammar]

śrutvaivaṃ dhenavaḥ prāhuścalacittā'si sarvathā |
bahunā tu kimuktena tatastvāṃ varjayāmahe || 24 ||
[Analyze grammar]

śrutvaivaṃ tvaṃ coktavatī cāñcalyaṃ santyajāmyaham |
bhavatīnāṃ kṛte gāvo vastuṃ sthānaṃ prayacchatha || 25 ||
[Analyze grammar]

tato gāvaścoktavatyaḥ śakṛnmūtre vasa dhruvā |
omityavasastvaṃ lakṣmi gavāṃ mūtre ca śakṛti || 26 ||
[Analyze grammar]

gomūtraṃ gomayaṃ tasmāllakṣmi gṛhaṃ tavā'smi vai |
yatra tvaṃ tatra cā'haṃ ca nivasāmi na saṃśayaḥ || 27 ||
[Analyze grammar]

evaṃ jñātvā mahimānaṃ gāṃ prayacchanti ye janāḥ |
hutaśiṣṭāśinaste vai satriṇo'dhvariṇaśca te || 28 ||
[Analyze grammar]

ṛte dadhi ghṛtaṃ nā'tra yajñaḥ kaścit pravartate |
tato yajñasya yajñatvaṃ gomūlakaṃ pratiṣṭhitam || 29 ||
[Analyze grammar]

goputrāḥ satataṃ loke kṛṣiyogamupāsate |
utpādayanti dhānyāni pravartante makhāśca taiḥ || 30 ||
[Analyze grammar]

vahanti vividhān bhārān kṣuttṛṣādiprapīḍitāḥ |
sādhūṃśca dhārayantīha pṛṣṭhe ca śakaṭe'pi ca || 31 ||
[Analyze grammar]

golokaṃ sannayantyeva dattā dāne paretakam |
tasmāt sthānaṃ gavāmūrdhvaṃ svargāt satyāt tathaiśvarāt || 32 ||
[Analyze grammar]

golokaṃ vai gavāṃ sthānaṃ mama kṛṣṇasya mandiram |
godātā yāti golokaṃ kṛṣṇanārāyaṇālayam || 33 ||
[Analyze grammar]

anyacchṛṇu mahālakṣmi purā devayuge khalu |
aditistu tapastepe viṣṇuḥ putro bhavenmama || 34 ||
[Analyze grammar]

ekapādena tapatīṃ vīkṣya dakṣasutā tadā |
surabhīnāmikā cāpi tapastepe tayā saha || 35 ||
[Analyze grammar]

tadā gatvā svayaṃ brahmā'ditaye sadvaraṃ dadau |
viṣṇuḥ putraste bhavitā surakāryakaro hariḥ || 36 ||
[Analyze grammar]

surabhyai varadānaṃ ca dattavān viśvasṛṭ tadā |
dakṣasute tāpasi tvaṃ hyamarītvamavāpsyasi || 37 ||
[Analyze grammar]

īśvarītvaṃ ca gopītvamavāpsyasi savaṃśajā |
muktānītvaṃ tathā mokṣadātrītvaṃ saṃvrajiṣyasi || 38 ||
[Analyze grammar]

sṛṣṭitraye pūjyatamopariṣṭācca nivatsyasi |
gopradāstāṃśca golokān gopatervai prasādataḥ || 39 ||
[Analyze grammar]

vāsasthānānyavāpsyanti yatra vasanti dhenavaḥ |
bhūriśṛṃgā yatra gāvo yāsyanti vaṃśajāstathā || 40 ||
[Analyze grammar]

urugāyasya kṛṣṇasya taddhāma paramaṃ padam |
havyārpaṇādipuṇyena yā vai duhitarastava || 41 ||
[Analyze grammar]

devasevāprakartryaḥ syurnivatsyanti ca tatpade |
manasā cintitā bhogāḥ sampatsyante sukhāstava || 42 ||
[Analyze grammar]

godātṝṇāṃ pare lokāḥ sarvakāmasamanvitāḥ |
na yeṣu kramate mṛtyurna jarā na ca pāvakaḥ || 43 ||
[Analyze grammar]

na dāridryaṃ nā'śubhaṃ ca vidyate gopade kvacit |
tatra divyānyaraṇyāni divyāni bhavanāni ca || 44 ||
[Analyze grammar]

vimānāni sudivyāni kāmagāni bhavanti ca |
ghṛtakulyā dadhikulyāḥ payaḥkulyā bhavanti ca || 45 ||
[Analyze grammar]

puṣkariṇyo'mṛtānāṃ ca navanītā''drayo'pi ca |
śarkarāmadhususvādāḥ sudhācayā bhavanti ca || 46 ||
[Analyze grammar]

taruṇyo gopikā yatra bhavanti divyabhūṣitāḥ |
godātāraḥ prayāsyanti saurabhi tvatpadaṃ param || 47 ||
[Analyze grammar]

brahmacaryeṇa tapasā sevayā ca satāṃ hareḥ |
dānaiḥ puṇyairdamenāpi satyena tīrthasevanaiḥ || 48 ||
[Analyze grammar]

kṛṣṇanārāyaṇabhaktyā rādhābhaktyā viśeṣataḥ |
śakyaḥ samāsādayituṃ golokaḥ kṛṣṇaśobhitaḥ || 49 ||
[Analyze grammar]

gobhakto labhate sarvaṃ yatheṣṭaṃ kāmitaṃ śubham |
bhaktāḥ striyo labhante ca kāmitaṃ sarvamuttam || 50 ||
[Analyze grammar]

putrārthī labhate putraṃ kanyārthī kanyakāṃ tathā |
vittārthī labhate vittaṃ dharmārthī dharmamāpnuyāt || 51 ||
[Analyze grammar]

mokṣārthī prāpnuyānmokṣaṃ sampadarthī tu sampadaḥ |
vidyārthī cāpnuyād vidyāṃ sukhārthī labhate sukham || 52 ||
[Analyze grammar]

rasārthī labhate rasyaṃ dārḍhyārthī dṛḍhatāṃ tathā |
patyarthinī patiṃ śreṣṭhaṃ kāntārthī sundarīṃ śubhām || 53 ||
[Analyze grammar]

sutārthī labhate putrīṃ svargārthī svargamāpnuyāt |
gopradātā mahārājyaṃ labhate pārthivaṃ hyapi || 54 ||
[Analyze grammar]

aindraṃ padaṃ sūryapadaṃ cāndraṃ kauberakaṃ padam |
yāmyapadaṃ tathā dharmye vāhnyaṃ caiśamityapi || 55 ||
[Analyze grammar]

kailāsaṃ cāpi vaikuṇṭhaṃ vairājaṃ padamityapi |
labheta śreṣṭhagolokaṃ dhāmā'kṣaraṃ labheta ca || 56 ||
[Analyze grammar]

ārogyaṃ labhate godo yaśaḥ kīrtiṃ labheta ca |
gajavājisurabhīśca labheta gopradaḥ khalu || 57 ||
[Analyze grammar]

rūpaṃ ratnāni vastrāṇi maiṇīn sauvarṇaśevadhim |
labhate gopradātā vai smṛtaṃ godānakālikam || 58 ||
[Analyze grammar]

apamṛtyurvinaśyecca pretatvaṃ dūrato vrajet |
pāpāni saṃpraṇaśyeyurgodātuśca smṛtasya ca || 59 ||
[Analyze grammar]

ityevaṃ varadānāni dadau brahmā hi dhenave |
na kiñcid durlabhaṃ lakṣmi gobhaktasya bhavediha || 60 ||
[Analyze grammar]

siddhayaścāṇimādyāśca sarveśvaryādisampadaḥ |
yāvantaśca camatkārā bhavanti dhenude rame || 61 ||
[Analyze grammar]

vedapuṇyaṃ makhapuṇyaṃ kanyāpuṇyaṃ ca dakṣiṇā |
bhūmipuṇyaṃ svarṇapuṇyaṃ godānena prajāyate || 62 ||
[Analyze grammar]

godānena samaṃ deyaṃ suvarṇaṃ dakṣiṇātmakam |
aprāptāyāṃ mūrtimatyāṃ deyā dhenurhi kānakī || 63 ||
[Analyze grammar]

sadā bhūmergavāmarthaṃ deyaṃ suvarṇamityapi |
svarṇaṃ gauḥ pṛthivī ceti trīṇi dānāni padmaje || 64 ||
[Analyze grammar]

pretamuktikarāṇyeva bhavanti nātra saṃśayaḥ |
gāśca bhūmiṃ ca vittaṃ ca datvā pāpī prapūyate || 65 ||
[Analyze grammar]

ajo'gnirvaruṇo meṣaḥ sūryo'śvaḥ prāg vyajāyata |
tattaddānāni vai pretamuktaye'pi bhavanti hi || 66 ||
[Analyze grammar]

kuṃjarāśca mṛgā nāgā mahiṣāścāsurā hi te |
āsurayonimuktyarthaṃ hastyādidānamuttamam || 67 ||
[Analyze grammar]

kukkuṭaśca varāhāśca rākṣasāḥ parikīrtitāḥ |
rakṣoyonivimuktyarthaṃ tattaddānaṃ praśasyate || 68 ||
[Analyze grammar]

iḍā gāvaḥ payaḥ somo bhūmirajāyataiva ha |
pretādīnāṃ vimuktyarthaṃ gobhūdānaṃ praśasyate || 69 ||
[Analyze grammar]

agnirhi devatā svarṇaṃ devatā śasyate tataḥ |
svarṇadānaṃ paraṃ proktaṃ devadānaṃ śubhapradam || 70 ||
[Analyze grammar]

agnyabhāve tu kurute vahnisthāneṣu kāṃcanam |
kuśastambe juhotyagniṃ suvarṇaṃ tatra ca sthite || 71 ||
[Analyze grammar]

viprahaste sādhuhaste darbhastambe'jakarṇake |
apsu kāṣṭhe suvarṇe ca juhotyagnerasannidhau || 72 ||
[Analyze grammar]

hute prītikarīmṛddhiṃ śrīpatiḥ samprayacchati |
nityaṃ dadāti sauvarṇaṃ yathāśakti tu yojanaḥ || 73 ||
[Analyze grammar]

brahmavāyvāgnisomānāṃ sālokyamupayāti saḥ |
mātā pitā sutaśceti gārhasthyaṃ tryātmakaṃ śubham || 74 ||
[Analyze grammar]

gavāṃ svarṇasya pṛthvyāśca dānaṃ tryātmakamuttamam |
śraddhāsnehaścādaraśca tredhā'tithiprasādakṛt || 75 ||
[Analyze grammar]

tathā bhūgosuvarṇāni paralokapradāni vai |
bhavanaṃ sampado vṛttistredhā saukhyaprasādhanam || 76 ||
[Analyze grammar]

dhenubhūkanakānyevaṃ dāne saukhyapradāni vai |
jñānaṃ śāntiśca nivṛttistrayaścānandahetavaḥ || 77 ||
[Analyze grammar]

dhenukṣitisvarṇakāni mahānandapradāni vai |
bhaktirhariśca mokṣaśca sambaddhāste trayaḥ sadā || 78 ||
[Analyze grammar]

sādhuḥ śīlaṃ kṣamā ceti sambaddhāste trayo'pi ca |
tathā dāne svarṇadhenubhuvo baddhā hi nityaśaḥ || 79 ||
[Analyze grammar]

bhuktidā muktidāścāpi pretoddhārakarāstathā |
svargadāḥ pāpapuñjānāṃ nāśakā puṇyadāstrayaḥ || 80 ||
[Analyze grammar]

goyajñātma gavāṃ dānaṃ pitṛyajñaṃ tu tarpaṇam |
satāṃ yajñaṃ bhojanaṃ ca datvā sauvarṇadakṣiṇām || 81 ||
[Analyze grammar]

nārāyaṇabaliṃ kṛtvā nīlapucchāditarpaṇam |
kārayitvā'bhyarthitasya dānaṃ pretaṃ pramokṣayet || 82 ||
[Analyze grammar]

ityevaṃ kathitā lakṣmi pretamuktiḥ śubhodbhavā |
mokṣaśāstrakṛtaṃ cāpi pārāyaṇaṃ pramocayet || 83 ||
[Analyze grammar]

nāmasaṃkīrtanaṃ cāpi hyakhaṇḍabhajanaṃ mama |
satāṃ karajatoyaṃ ca muktidaṃ pretayonitaḥ || 84 ||
[Analyze grammar]

avabhṛthaṃ pavitraṃ ca snānaṃ śrāddhaṃ śubhe kṣaṇe |
sādhūnāṃ darśanaṃ cāpi sparśanaṃ ca nideśanam || 85 ||
[Analyze grammar]

muktidaṃ pretayonestu tīrthavāriniṣevaṇam |
yatra kvāpi gataścāpi mucyate bhajanāddhareḥ || 86 ||
[Analyze grammar]

yakṣo vā rākṣaso vāpi bhūtaḥ pretaḥ piśācakaḥ |
sarpo vā paśudeho'pi yāmyo vā vāyudehavān || 87 ||
[Analyze grammar]

ḍākinī vā śākinī vā bhūtī piśācinī ca vā |
vetālinī vā vetālo yatra kvāpi gato'pi vā || 88 ||
[Analyze grammar]

sādhūnāṃ darśanaṃ yadvā prasādaṃ śrīhareśca vā |
labhate vā jalaṃ cāpi mucyate nātra saṃśayaḥ || 89 ||
[Analyze grammar]

santo hi tārakā loke pāpānāṃ nāśakāstathā |
kalmaṣāṇāṃ hārakāśca divyatāmokṣasampradāḥ || 90 ||
[Analyze grammar]

gosvarṇavahnidevebhyaḥ śreṣṭhāḥ santaḥ sadā rame |
satāṃ yogo mama yogaḥ sarvapumarthadaḥ khalu || 91 ||
[Analyze grammar]

ekadā puṣkaso nāmnā bhāruṇḍo madyapānakṛt |
māṃsādaḥ śīlahīnaśca steno mṛto vanāntare || 92 ||
[Analyze grammar]

yāmyairnīto yamapūryāṃ narakeṣu nipātitaḥ |
tatpatnyā tu kṛtaṃ tīrthe godānaṃ svarṇamalpitam || 93 ||
[Analyze grammar]

pretasya sarvapāpāni dūrībhūtāni tatkṣaṇāt |
pretaḥ svargaṃ yayau tūrṇaṃ pāpāni surabhīṃ yayuḥ || 94 ||
[Analyze grammar]

surabhī sā''ha pāpāni nāśayituṃ tu vedhase |
puṣkasasya tu pāpāni mayi lagnāni dānataḥ || 95 ||
[Analyze grammar]

māyā nāśayitavyāni kutra gatvā pitarvada |
śrutvā brahmā''ha tāṃ gāṃ ca yāhi sanatkumārakam || 96 ||
[Analyze grammar]

sādhuṃ śīlavrataṃ drāk sa nāśayiṣyatyaghāni te |
śrūtvā gatvā surabhyenaṃ sādhuṃ neme tathā''rthayat || 97 ||
[Analyze grammar]

pāpanāśārthamevā'pi sādhuḥ pādajalaṃ dadau |
papau sā surabhī gauśca naṣṭānyaghāni satvaram || 98 ||
[Analyze grammar]

tataḥ surabhī brahmāṇaṃ prayayau saṃskṛtā satā |
jagāda ślokān santuṣṭā natvā śrīvedhasaṃ gurum || 99 ||
[Analyze grammar]

dhanyā vai sādhavo loke śīlino rāgavarjitāḥ |
amāyikā divyarūpāḥ pāpanāśo yadāśrayāt || 100 ||
[Analyze grammar]

tīrthānāṃ kāmadhenūnāṃ satīnāṃ ca tapasvinām |
viprāṇāṃ yāni pāpāni tāni naśyanti sādhuṣu || 101 ||
[Analyze grammar]

pitṝṇāṃ ca surāṇāṃ ca maharṣīṇāṃ ca yoṣitām |
dehināṃ yāni pāpāni tāni naśyanti sādhuṣu || 102 ||
[Analyze grammar]

rājñāṃ rakṣasāṃ yakṣāṇāṃ bhūtānāṃ yāmyavāsinām |
asadgatīnāṃ pāpāni naśyantyeva hi sādhuṣu || 103 ||
[Analyze grammar]

kāmināṃ krodhināṃ cāpi lobhināṃ mohināṃ tathā |
ghātināṃ yāni pādyāni tāni naśyanti sādhuṣu || 104 ||
[Analyze grammar]

hatyānāṃ paśumārāṇāṃ krūrāṇāṃ prāṇarodhinām |
viśvāsahaṇāṃ pāpāni naśyantyeva hi sādhuṣu || 105 ||
[Analyze grammar]

gaṇikānāṃ puṃścalīnāṃ dhvajināṃ cakriṇāṃ tathā |
śastriṇāṃ cāpi vaidyānāṃ naśyantyaghāni sādhuṣu || 106 ||
[Analyze grammar]

śritaghnānāṃ bālaghnānāmagnidānāṃ viṣādinām |
viṣadānāṃ vanaghnānāṃ naśyantyaghāni sādhuṣu || 107 ||
[Analyze grammar]

ityuktvā prayayau goṣṭhaṃ lakṣmi surabhī suvratā |
paṭhanācchravaṇādasya naśyeyuḥ pāpakoṭayaḥ || 108 ||
[Analyze grammar]

iti śrīlakṣmīnārāyaṇīyasahitāyāṃ tṛtīye dvāparasantāne gavārādhananāmavrataṃ gośakṛnmūtrayorlakṣmīvāso godānavividhaphalāni pretoddhārakāṇi sādhvāśrayaḥ sarvoddhārakaścetyādinirūpaṇanāmā dvyadhikaśatatamo'dhyāyaḥ || 102 ||
[Analyze grammar]