Chapter 101

śrīnārāyaṇīśrīruvāca |
bhagavan yasya sādhūnāṃ yogastvatra babhūva na |
pretasya tasya coddhāraḥ kathaṃ syād vada taddhitam || 1 ||
[Analyze grammar]

śrīpuruṣottama uvāca |
śṛṇu śrīśivarājñīśri pretasya pṛṣṭhato janaiḥ |
śrāddhe santo bhojanīyāḥ pūjanīyāḥ suvastubhiḥ || 2 ||
[Analyze grammar]

vastrabhūṣāratnarūpyasuvarṇadhanavāhanaiḥ |
santoṣaṇīyāḥ santaśca viprāśca brahmavedinaḥ || 3 ||
[Analyze grammar]

godānāni pradeyāni gāvo vai tārikā sadā |
godānācchāśvatān lokān prāpnuyāt preta utthitaḥ || 4 ||
[Analyze grammar]

gaurhi nyāyāgatā dattā sadyastārayate kulam |
māndhātāraṃ purā prāha bṛhaspatiḥ śṛṇuṣva tat || 5 ||
[Analyze grammar]

santaṃ prapūjya vipraṃ ca guruṃ prapūjya gāṃ tathā |
pretanāmnā pradadyācca gāṃ pātrāya mahātmane || 6 ||
[Analyze grammar]

gaurme mātā pitā cokṣā tatra svargaṃ pratiṣṭhitam |
sāyaṃ goṣṭhe vratī sthitvā gosevādiparāyaṇaḥ || 7 ||
[Analyze grammar]

prātarutthāya godānaṃ kuryāt smṛtvā paretakam |
pretastūrṇaṃ divaṃ yāti kamale nātra saṃśayaḥ || 8 ||
[Analyze grammar]

vasedekāṃ niśāṃ gobhiḥ samasakhyaḥ samavrataḥ |
aikātmyabhāvayukto yaḥ kaluṣāt sa vimucyate || 9 ||
[Analyze grammar]

dogdhryaḥ savatsikā deyā prātaḥ sūryasya darśane |
yuvatyo rūpaśālinyo'mṛtagarbhāḥ prarohadāḥ || 10 ||
[Analyze grammar]

eno gāvaḥ praṇudantu svargayānāya santu me |
mātṛvanmāṃ prarakṣantu santvāśīrvādasampradāḥ || 11 ||
[Analyze grammar]

roganāśe pare mokṣe svarge smṛddhau sukhe dhane |
gāvaḥ prasannā udayaṃ dadatu śreyasāṃ pade || 12 ||
[Analyze grammar]

sarvadevāśrayāḥ puṇyā diśadhvaṃ gatimuttamām |
ātmanā manasā yuktā dadatvātmārpaṇaṃ phalam || 13 ||
[Analyze grammar]

arghyaṃ vastraṃ suparṇaṃ ca vasu tāvata odanān |
ūrdhvāsyāṃ suprasannāṃ gāṃ savatsāṃ vaiṣṇavīṃ dade || 14 ||
[Analyze grammar]

gopradātā samuccārya dadyāt phalaṃ labhet param |
godaḥ śīlīpūjakaśca dātā'rghasya ca sevakaḥ || 15 ||
[Analyze grammar]

sādhubhaktaḥ pitṛbhakto gurubhaktaḥ surārhakaḥ |
satyaśīlastāpasaśca na syurvai duḥkhinaḥ kvacit || 16 ||
[Analyze grammar]

snānābhyāsī kathāhṛṣṭo brahmabhajanatatparaḥ |
gosevāḍhyaśca catvāro vaiṣṇavā dhāmayoginaḥ || 17 ||
[Analyze grammar]

govratī gopradātā ca gavyāśano gavāyanaḥ |
vaiṣṇavaḥ paramo bodhyo gomātā viṣṇudaivatā || 18 ||
[Analyze grammar]

devavratī vedavratī govratī sādhusadvratī |
gomedhādivratī cāgryān vindate taijasā''layān || 19 ||
[Analyze grammar]

kāmadhenupradātā'tra kāmān sarvān mahotsavān |
havyakavyādibhugdattān bhuṃkte bhaumāṃśca taijasān || 20 ||
[Analyze grammar]

yavān pibed gavyayuktān kṣitau svapyād gavāyane |
śīlī dogdhrīṃ pradadyādgāṃ sarvayajñaphalaṃ labhet || 21 ||
[Analyze grammar]

sādhave sādhudīkṣārthaṃṃ putraṃ dadyācchubhakriyam |
tenāpi kṛtapuṇyenoddhriyante pretadehinaḥ || 22 ||
[Analyze grammar]

sādhvyai dadyāt kanyakāṃ ca satīṃ vairāgyaśālinīm |
yuvatīṃ jñānasampannāṃ saṃsāroddhāraśālinīm || 23 ||
[Analyze grammar]

śīlaparāyaṇāṃ gṛhidharmarāgavivarjitām |
tyāgavṛttiṃ tathā''cāryāṇīsthānaśobhanāṃ śubhām || 24 ||
[Analyze grammar]

rājā dadyāttu gurave dāsīṃ dāsaṃ dvijāya ca |
dvijaputraṃ pradadyācca vipraṃ dadyāt subhūbhṛte || 25 ||
[Analyze grammar]

yo bhavedvai gurutulyo vidyāsatsaṃgaśevadhiḥ |
tādṛcchīlasvabhāvasya dānaṃ kuryād dvijasya ca || 26 ||
[Analyze grammar]

viprakumāradānaṃ tu mataṃ godānasadṛśam |
uddhārako bhavedvipraśceha paratra sarvadā || 27 ||
[Analyze grammar]

vipraputrasya pitre vai dadyāt svarṇaṃ dhanaṃ bahu |
evaṃ viprasutaṃ krītvā dadyād dānaṃ dvijātaye || 28 ||
[Analyze grammar]

yajñakāryanirvahārthaṃ pāṭhaśālārthamityapi |
rājyagurutvalābhārthaṃ gṛhṇīyāccānapatyakaḥ || 29 ||
[Analyze grammar]

sutadānaṃ sutādānaṃ godānaṃ svarṇadānakam |
ātmadānaṃ mokṣadānaṃ mokṣadāni matāni vai || 30 ||
[Analyze grammar]

vatsalāṃ sattvasampannāṃ taruṇīṃ ca vibhūṣitām |
gatvā gāṃ ca sutāṃ dāne sarvapuṇyaiḥ suyujyate || 31 ||
[Analyze grammar]

duḥkhadāridryalokān sa gāṃ datvā naiva gacchati |
dantahīnā valīyuktā līnakṣīrā ṛtukṣayā || 32 ||
[Analyze grammar]

jaraṭhā rogiṇī ruṣṭā duṣṭā deyā na karhicit |
sarvāsu kapilā śreṣṭhā sā dātavyā viśeṣataḥ || 33 ||
[Analyze grammar]

devāḥ sūryaśca vai vṛṣṭiṃ kurvanti yajñatarpitāḥ |
yajñīyaṃ karma gavyaiśca jāyate dugdhasarpiṣā || 34 ||
[Analyze grammar]

prajāpatiḥ svayaṃ tṛptimagacchat sarpiṣā purā |
golokasthagavāṃ paścādasṛjallokamātṛkāḥ || 35 ||
[Analyze grammar]

suvarṇavarṇāḥ kapilāḥ sravantīrdugdhanirjharān |
kṣīrā'mṛtaṃ sravantyetā dhenavo jīvabhojanam || 36 ||
[Analyze grammar]

dadau tāśca ṛṣibhyo'tha devebhyaḥ sa prajāpatiḥ |
mānavebhyo dadau cāpi dugdhādhvarādihetave || 37 ||
[Analyze grammar]

viprebhyaḥ pradadau cāpi daivakāryārthasiddhaye |
kapilānāṃ pradānaṃ vai tataḥ śreṣṭhatamaṃ matam || 38 ||
[Analyze grammar]

dugdhadāḥ puṇyadāḥ prāṇapradāḥ pretapramokṣadāḥ |
gāśca datvā sarvakāmapradaḥ syādiha vā pare || 39 ||
[Analyze grammar]

havyaṃ kavyaṃ tarpaṇaṃ ca śāntiṃ yānaṃ tathā'mbaram |
vṛddhabālāditṛptiṃ cā''pnuyād gopradamānavaḥ || 40 ||
[Analyze grammar]

gāvaḥ surabhigandhinyastathā guggulagandhayaḥ |
gāvaḥ pratiṣṭhā lokānāṃ gāvaḥ svastyayanaṃ mahat || 41 ||
[Analyze grammar]

na duṣyatyanilo nāgnirna suvarṇaṃ na codadhiḥ |
na dugdhaṃ nā'mṛtaṃ nātapo gauḥ sādhurna neśvaraḥ || 42 ||
[Analyze grammar]

gāvo dhanaṃ nityalabhyaṃ gāvaḥ puṣṭiḥ sanātanī |
gāvo lakṣmyāḥ paraṃ mūlaṃ sampadāṃ mūlameva tāḥ || 43 ||
[Analyze grammar]

annaṃ hi paramaṃ gosthaṃ devānāṃ paramaṃ haviḥ |
svāhāvaṣaṭ gosthitau ca goṣu dattaṃ hi śāśvatam || 44 ||
[Analyze grammar]

gāvo yajñaphalaṃ cāpi goṣu yajñāḥ pratiṣṭhitāḥ |
gobhyo rasāḥ pravardhante bālāḥ pāyasajīvinaḥ || 45 ||
[Analyze grammar]

yāni kāni tu pāpāni svalpānyatikṛtāni vā |
dhenuṃ dadati ye te vai taranti yānti mokṣaṇam || 46 ||
[Analyze grammar]

kapilāṃ ye prayacchanti savatsāṃ kāṃsyadohanām |
sabhūṣāṃ vastrasaṃvītāmubhau lokau jayanti te || 47 ||
[Analyze grammar]

śaṃkarāya purā kṛṣṇo vṛṣabhaṃ pradadau tataḥ |
vṛṣabhasya pradānaṃ vai pravṛttaṃ tūttamaṃ bhuvi || 48 ||
[Analyze grammar]

yuvānamucchritaṃ śvetaṃ bhūriśṛṃgamalaṅakṛtam |
vṛṣabhaṃ ye prayacchanti bhavantyaiśvaryaśālinaḥ || 49 ||
[Analyze grammar]

gāḥ smṛtvā ca hariṃ santaṃ smṛtvā svapyāt sadā niśi |
utthāya tān smareccāpi namasyet puṣṭimāpnuyāt || 50 ||
[Analyze grammar]

aniṣṭaṃ svapnamālakṣya gāṃ muhuḥ samprakīrtayet |
gokarīṣaiḥ pācayecca gomayaiḥ śuddhimācaret || 51 ||
[Analyze grammar]

goghṛtena juhuyācca ghṛtena svasti vācayet |
ghṛtaṃ dadyād ghṛtaṃ prāśnīyāt gavāṃ puṣṭimaśnute || 52 ||
[Analyze grammar]

gaurme cāgre sadā cāstu pṛṣṭhe pārśve sadā'stu ca |
sarvaratnamayī dhenuṃ tāṃ dadāmi śubhāptaye || 53 ||
[Analyze grammar]

gāvo māmupatiṣṭhantu hemaśṛṃgyaḥ payomucaḥ |
surabhyaḥ saurabheyyaśca gāvaḥ paśyantu māṃ sadā || 54 ||
[Analyze grammar]

gāvaḥ satyo devatāśca sādhvyo lakṣmyaḥ pativratāḥ |
santo muktā īśvarāśca guravaḥ sādhavaḥ śurāḥ || 55 ||
[Analyze grammar]

bhaktiḥ puṇyaṃ vṛṣaḥ sevā dattaṃ taptaṃ hyupakṛtam |
mahābhayeṣu rakṣanti sameṣu viṣameṣu ca || 56 ||
[Analyze grammar]

śṛṇu lakṣmi paśavo'pi dhenavo bhuvamāgatāḥ |
tapaścakruḥ purā sarvā gacchema śreṣṭhatāmiti || 57 ||
[Analyze grammar]

sarvābhyo dakṣiṇābhyo'pi vayaṃ śreṣṭhatamā tviti |
sarvapāpapraṇāśinyo limpāmo dūṣaṇairna ca || 58 ||
[Analyze grammar]

asmadgavyādibhiḥ sarvo janaḥ pūyeta vai tathā |
śakṛtā cāpi mūtreṇa pūtāḥ syuḥ sarvadehinaḥ || 59 ||
[Analyze grammar]

godātāraśca golokaṃ gaccheyuriti padmaje |
tāpasībhyo varān brahmā dadau dhenubhya uttamān || 60 ||
[Analyze grammar]

evaṃ bhavata yoginyo lokāṃstārayateti ca |
sarvathā ca pavitrāḥ stho mokṣadā bhavateti ca || 61 ||
[Analyze grammar]

lakṣmīrvasatu gośakṛti tān varān dadāmyaham |
evaṃ datvā varān brahmā yayau satyaṃ tataśca tāḥ || 62 ||
[Analyze grammar]

prātarnamasyāḥ pūjyāśca sarvathā puṣṭidāḥ śubhāḥ |
lokakalyāṇakāriṇyo babhūvurbhavatārikāḥ || 63 ||
[Analyze grammar]

samānavatsāṃ kapilāṃ dhenuṃ datvā payasvinīm |
saumyāṃ bhūṣāmbarayutāṃ brahmaloke mahīyate || 64 ||
[Analyze grammar]

lohitāṃ tādṛśīṃ datvā sūryaloke mahīyate |
śabalāṃ tādṛśīṃ datvā somaloke mahīyate || 65 ||
[Analyze grammar]

śvetāṃ ca tādṛśīṃ datvā śakraloke mahīyate |
kṛṣṇāṃ ca tādṛśīṃ datvā vahniloke mahīyate || 66 ||
[Analyze grammar]

dhūmrāṃ ca tādṛśīṃ datvā dharmaloke mahīyate |
pāṇḍurāṃ tādṛśīṃ datvā vāruṇaṃ lokamaśrute || 67 ||
[Analyze grammar]

vādalavarṇāṃ gāṃ datvā vāyuloke mahīyate |
hiraṇyavarṇāṃ piṃgākṣīṃ datvā kuberatāmiyāt || 68 ||
[Analyze grammar]

pītāṃ datvā tādṛśīṃ tu pitṛloke mahīyate |
karburāṃ tādṛśīṃ datvā viśvadevaḥ prajāyate || 69 ||
[Analyze grammar]

gaurīṃ ca tādṛśīṃ datvā vasulokamavāpnuyāt |
pāṇḍukambalavarṇāṃ gāṃ datvā sādhyasuro bhavet || 70 ||
[Analyze grammar]

viśālapṛṣṭhāṃ datvā gāṃ marullokān prapadyate |
ratnāḍhyāṃ tādṛśīṃ datvā gandharvatāmavāpnuyāt || 71 ||
[Analyze grammar]

anaḍvāhaṃ mahokṣaṃ vā sarvaratnairalaṃkṛtam |
datvā yuvānaṃ tu loke prajāpatermahīyate || 72 ||
[Analyze grammar]

godātā yāti paramaṃ svargaṃ golokamityapi |
vimānenā'rkavarṇena vṛṣayānena vā'mbare || 73 ||
[Analyze grammar]

svarge taṃ gopradātāraṃ sahasrasurayoṣitaḥ |
sevante satataṃ prātarbodhayanti sukīrtanaiḥ || 74 ||
[Analyze grammar]

yāvanti dhenuromāṇi tāvadvarṣāṇi modate |
dhenudaśca tato bhūmau gobhūpālo bhavatyapi || 75 ||
[Analyze grammar]

ghṛtakṣīrapradā gāvo ghṛtadehā ghṛtodbhavāḥ |
ghṛtanadyo ghṛtāvarttāḥ santu me satataṃ gṛhe || 76 ||
[Analyze grammar]

gāvo me hṛdaye nityaṃ gāvo nābhyāṃ tathātmani |
gāvaḥ sarvatra dehe me gāvo vasantu mānase || 77 ||
[Analyze grammar]

ghṛtaṃ tāsāṃ mama dehendriyaprāṇeṣu tiṣṭhati |
gāvaḥ santvagrato me ca pṛṣṭhataḥ santu dhenavaḥ || 78 ||
[Analyze grammar]

sarvataḥ santu gāvo me gomadhye'haṃ vasāmi hi |
evaṃbhāvayamānasya kṣīyante pāpakoṭayaḥ || 79 ||
[Analyze grammar]

yatra kānakasaudhāśca svarṇāgamo hyamāpakaḥ |
devyo gāndharvakuśalā yatrā'mṛtaṃ samṛddhayaḥ || 80 ||
[Analyze grammar]

dadhikulyā ghṛtakulyā payaḥkulyāśca yatra ca |
navanītakulyā yatra tatra yānti gavāṃ pradāḥ || 81 ||
[Analyze grammar]

sahasragopradātā tu svarge deveśvaro bhavet |
lakṣagodānakṛt samrāṭ trailokyasya bhaved rame || 82 ||
[Analyze grammar]

koṭigodānakartā tu vaikuṇṭhaṃ yāti mokṣabhāk |
arbudagopradātā tu golokaṃ yāti mokṣabhāg || 83 ||
[Analyze grammar]

abjadhenupradātā tvakṣaraṃ dhāma prayāti vai |
daśagodānataḥ preto mucyate sṛṣṭibandhanāt || 84 ||
[Analyze grammar]

mātaraṃ pitaraṃ smṛtvā patnīṃ smṛtvā pitāmahān |
godātā tatkulānyekādaśoddhārayati dhruvam || 85 ||
[Analyze grammar]

gāṃ smṛtvā tiladānena jaladānena vāpi ca |
pretasya yamaloke vai nirasyati tu yātanāḥ || 86 ||
[Analyze grammar]

mātaro dugdhadātryo me devavāsā hi dhenavaḥ |
gāvo māmupatiṣṭhantāmiti nityaṃ prakīrtayet || 87 ||
[Analyze grammar]

godānaṃ paramaṃ puṇyaṃ phalaṃ ca śāśvataṃ yataḥ |
kartavyaṃ nā'vaśiṣyeta svargārthaṃ gopradāyinaḥ || 88 ||
[Analyze grammar]

gāvo dāne yamuddiṣṭāstārayanti hi taṃ janam |
dhārayanti bālakāṃśca vardhayanti payo'mṛtaiḥ || 89 ||
[Analyze grammar]

gāvo vai mānave loke svarge satye bhavanti vai |
aiśvare cāpi vaikuṇṭhe goloke ca bhavanti hi || 90 ||
[Analyze grammar]

akṣare bhūriśṛṃgāśca gāvo'yāso vasanti vai |
gāvo yajñasya yajñatvaṃ daivataṃ dyusadāmapi || 91 ||
[Analyze grammar]

gāvaḥ pratiṣṭhā bhūtānāṃ gāvaḥ puṇyaṃ parāyaṇam |
gāvaḥ samāsata satraṃ siṣāsantyaḥ śaphāṃstathā || 92 ||
[Analyze grammar]

śṛṃgāṇi cāpi daśame māsi vedhāstato dadau |
tāsāṃ śṛṃgāṇyajāyanta yāsāṃ yādṛṅmatāni vai || 93 ||
[Analyze grammar]

gāvastejo mahad divyaṃ pālayanti susādhavaḥ |
sukṛtinaḥ puṇyabhājo gavāṃ sevāratāḥ surāḥ || 94 ||
[Analyze grammar]

yatra drumā miṣṭarasā madhusrāvaphalānvitāḥ |
madhusugandhipuṣpāśca bhūmirmaṇimayī tathā || 95 ||
[Analyze grammar]

yatra kāñcanabhūbhāgāḥ sukhadāḥ kāmadāstathā |
sarvavidhairutpalaiśca bhānti yatra jalāśayāḥ || 96 ||
[Analyze grammar]

kesarā yatra vartante saurabhāḍhyā marudgatāḥ |
ṣaḍrasāḥ phalinaḥ stambāḥ śākāni ca madhūni ca || 97 ||
[Analyze grammar]

muktāphullā vallayaśca saphalāścā'mṛtapradāḥ |
sauvarṇā girayo yatra nityanūtanaśobhinaḥ || 98 ||
[Analyze grammar]

navarūpadharā nāryo sevante muktakoṭikāḥ |
sarvakāmāḥ sarasāḥ sarvabhogā bhavanti ca || 99 ||
[Analyze grammar]

yatra cāndanāraṇyāni ramante tatra gopradāḥ |
sarvasaṃkalpasamṛddhā niḥśokā bhāgyavarddhitāḥ || 100 ||
[Analyze grammar]

vimāneṣu vicitreṣu mahodyāneṣu yānti ca |
modante gopradātāra upakrīḍanti sarvaśaḥ || 101 ||
[Analyze grammar]

viharanti strījanaiśca pūjyante svargibhistathā |
modaṃ pramodamānandān sukhāni bhuñjate'nvaham || 102 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne sādhūnāṃ yogahīnasya pretasyoddharaṇe godānaṃ heturitigomāhātmyādinirūpaṇanāmaikā'dhikaśatatamo'dhyāyaḥ || 101 ||
[Analyze grammar]