Chapter 278

śrīkṛṣṇa uvāca |
rādhike śrīkṛṣṇanārāyaṇasya maṃgalāni vai |
pratipaddivase nāryo jaguḥ prātaḥ śubhāni hi || 1 ||
[Analyze grammar]

vāditrāṇi samastāni tvavādyanta samastataḥ |
gṛhe gṛhāṃgaṇe raṃgavallyaḥ prapūritā janaiḥ || 2 ||
[Analyze grammar]

toraṇāni suramyāṇi navapallavabhāñji ca |
gṛhadvārṣu pramadābhirnihitāni samastataḥ || 3 ||
[Analyze grammar]

ghṛtadīpāḥ kṛtāścāpi dhvajāḥ patākikā dhṛtāḥ |
baddhā vyomapradeśeṣu bāvaṭā raṃgaśobhitāḥ || 4 ||
[Analyze grammar]

kuṃkumavāpikāśobhā samastā dhāmasadṛśī |
prajābhiḥ saṃprahṛṣṭābhirvihitā citrayojanaiḥ || 1 ||
[Analyze grammar]

rathyāśca rājamārgāśca gauṇamārgāḥ pratolikāḥ |
mārjitāśca jalaiḥ siktā raṃgacitraiśca citritāḥ || 6 ||
[Analyze grammar]

āpaṇāni kṛtānyeva toraṇaiḥ raṃgavallibhiḥ |
dadhnāṃ'kurairnāgavallīpatrairmaṃgalabhāñji ca || 7 ||
[Analyze grammar]

ālayāśca mandirāṇi prāsādāḥ saudhapaktayaḥ |
śālā viśālāścārāmāḥ śṛṃgāritā janaiḥ śubhāḥ || 8 ||
[Analyze grammar]

aśvapaṭṭasaraścāpi śṛṃgāritaṃ ca raṃgakaiḥ |
tāraṇaiḥ śubhadīpaiśca catvarā vimalīkṛtāḥ || 9 ||
[Analyze grammar]

vitardikā vedikāśca dvāraśākhāḥ sudurgakāḥ |
gopurāṇi ca ramyāṇi kalaśaiḥ saptasaṃkhyakaiḥ || 10 ||
[Analyze grammar]

sapatrapallavasūtraphalaiḥ śṛṃgāritāni vai |
bālakṛṣṇālayastatra candrakāntādibhiḥ śubhaḥ || 11 ||
[Analyze grammar]

kalpalatāsamārāmaiḥ phalivṛkṣādibhistadā |
sūryakāntādimaṇibhiḥ śṛṃgāritaḥ samantataḥ || 12 ||
[Analyze grammar]

sahasraikakalaśo yaḥ prāsādaḥ śrīharerhi saḥ |
śṛṃgārito'bhito navyaiḥ śobhādravyādibhistadā || 13 ||
[Analyze grammar]

vaikuṇṭhaṃ cāparaṃ vā kiṃ golokaścāparo'pi kim |
brahmadhāmā'paraṃ vā kiṃ cā'mṛtaṃ dhāma vetarat || 14 ||
[Analyze grammar]

svargaṃ vā'nyat samastaṃ kiṃ tarkitaḥ sa prajājanaiḥ |
evaṃvidhāyāṃ puryāṃ vai nāryo narā navāmbarāḥ || 15 ||
[Analyze grammar]

navabhūṣā navaraṃgā navaśṛṃgāraśobhanāḥ |
navotsāhā navabalā navarddhayo'bhavaṃstadā || 16 ||
[Analyze grammar]

navabhojanapānāśca navakīrtanagāyanāḥ |
navasaṃkalpakodārā navasadguṇaśālinaḥ || 17 ||
[Analyze grammar]

abhavan paśavaścāpi navotsāhāśca pakṣiṇaḥ |
dhenavo navadugdhāśca mahiṣyo navatejanāḥ || 18 ||
[Analyze grammar]

vṛṣabhā navavīryāśca gajādyā navakautukāḥ |
aśvādyā navaharṣāścā'bhavan vai pratipaddine || 19 ||
[Analyze grammar]

vṛkṣā navaphalāścāpi vallikā navapuṣpikāḥ |
śākhāḥ sarvanavarasāḥ sasyāni kaṇiśāni ca || 20 ||
[Analyze grammar]

madhūni navapuṣṭāni tadā'bhavan samantataḥ |
viprāśca navaharṣā vai sādhavo navabhaktayaḥ || 21 ||
[Analyze grammar]

vidvāṃso navamatayastattvāni nūtanāni ca |
taijasāni navatejomanti tadā'bhavan khalu || 22 ||
[Analyze grammar]

viśeṣatastu lokānāṃ nirmalānyāntarāṇi vai |
bhāvodrekādabhavaṃśca śāśvatā''nandadāni hi || 13 ||
[Analyze grammar]

ityevaṃ rādhike kuṃkumavāpī nūtanā yathā |
navayauvanasampannā sarvaśṛṃgāraśobhitā || 24 ||
[Analyze grammar]

lakṣmīrdivyā navā cāyāsyatīti nūtanā'bhavat |
nūtanāyāḥ sapatnyā vai navaharṣopalabdhaye || 25 ||
[Analyze grammar]

anādiśrīkṛṣṇanārāyaṇasya snehabhūtaye |
maṇḍapaścākṣaradhāmno divyastatra samāyayau || 26 ||
[Analyze grammar]

neme śrībhagavantaṃ sa neme gopālakṛṣṇakam |
natvā ca mātaraṃ muktasvarūpo maṇḍapaḥ sa ca || 27 ||
[Analyze grammar]

anādiśrīkṛṣṇanārāyaṇasaṃkalpamātrataḥ |
divyaṃ muktasvarūpaṃ ca darśayitvā kṣaṇāntare || 28 ||
[Analyze grammar]

prārthayat paramātmānaṃ prasādayitumāgataḥ |
yathā''jñaṃ maṇḍapaṃ ramyaṃ bhavāmyakṣaradhāmagam || 29 ||
[Analyze grammar]

hariḥ prāha tathā'stvevaṃ tadarthaṃ vai smṛto bhavān |
karotu maṇḍapaṃ ramyaṃ yathā'kṣare'sti rājate || 30 ||
[Analyze grammar]

omityājñāṃ samagṛhya rādhike maṇḍapaḥ svayam |
mahāmukto maṇḍapātmā māṇḍapaṃ rūpamagrahīt || 31 ||
[Analyze grammar]

rūpadvayaṃ samagṛhya svalpaṃ ca mahadityapi |
svalpaṃ rūpaṃ bālakṛṣṇaprāsādāgre sthiraṃ hyabhūt || 32 ||
[Analyze grammar]

śataikakalaśāḍhyaṃ ca śatastaṃbhasuśobhitam |
sāptabhaumaṃ ca parito madhye cāmbaramārgavat || 33 ||
[Analyze grammar]

upari madhyakalaśenā'mūlyena virājitam |
yathā cāndrī kaumudī ca pṛthvyāṃ pūrṇātithau bhavet || 34 ||
[Analyze grammar]

tathāsya dhavalā kāntiḥ payonibhā samantataḥ |
ākṣare bhūtale tatra prāsaraccāndralokavat || 35 ||
[Analyze grammar]

madhye sūryamaṇiryatra naisargiko virājate |
sahasrakiraṇaiḥ saumyairmṛdubhiḥ saṃprakāśate || 36 ||
[Analyze grammar]

vidyunnālāni pārśveṣu pradīpakāntibhāñji ca |
dugdhadhāvalyabhāvanti vidyotante'bhitastadā || 37 ||
[Analyze grammar]

maṇayo naddhabhāvāśca śvetā raktāśca karburāḥ |
nīlāḥ pītāśca haritāḥ kapīśāścitrabhānavaḥ || 38 ||
[Analyze grammar]

pratikoṇaṃ praṇaddhāste prakāśante hi tārakāḥ |
yathā tathā vicitrāśca tatpārśve patravallikāḥ || 39 ||
[Analyze grammar]

oṣadhayaḥ patradīpāḥ prakāśante sthale sthale |
stambāḥ kuṇḍasamādhārāḥ kuṇḍāḥ paṭṭīvirājitāḥ || 40 ||
[Analyze grammar]

paṭṭikā jalavāhinyo guptatejaḥpraṇālikāḥ |
guptatejaḥpravāhāśca prakāśante yathāsthalam || 41 ||
[Analyze grammar]

vaṃśāḥ staṃbhāḥ puttalikāḥ kammānikāśca toraṇam |
śākhāḥ praśākhā vaṃśādyāḥ prakāśante pravāhakaiḥ || 42 ||
[Analyze grammar]

tejasāṃ nyūnatā nāsti prakāśante'kṣare yathā |
eka eva hi mukto'sau maṇḍapātmā yato'sti vai || 43 ||
[Analyze grammar]

tejāṃsi śītabhāvanti coṣṇabhāvanti vai tathā |
śītoṣṇabhāprabhāvanti cā'nuṣṇaśītabhāni ca || 44 ||
[Analyze grammar]

miṣṭāmṛtasparśavanti brahmānandapradāni ca |
sarvendriyāṇāmānandapradānyapi bhavanti ca || 45 ||
[Analyze grammar]

ityevaṃ dīpayukte'tra mahātejasvimaṇḍape |
staṃbheṣu kadalīrūpeṣvakhaṇḍapatrayogiṣu || 46 ||
[Analyze grammar]

śateṣvapi sāptabhaumasthiteṣu pravibhāgiṣu |
saptaraṃgāni divyāni veṣṭitānyambarāṇi vai || 47 ||
[Analyze grammar]

tanmadhye tejasāṃ vāse pravāhe sarvasṛṣṭayaḥ |
vilokyante staṃbhamadhye merau yathā surāśrayāḥ || 48 ||
[Analyze grammar]

kvacit staṃbhe hi munayaḥ kvacit siddhā bhavanti ca |
kvacittiṣṭhanti muktāśca haryākārā anantaśaḥ || 49 ||
[Analyze grammar]

kvacittiṣṭhantyavatārāḥ kvacittiṣṭhanti pārṣadāḥ |
kvacinmuktānikāḥ sādhvyo brahmapriyāḥ kvacit khalu || 50 ||
[Analyze grammar]

kvacitkṛṣṇasya golokaḥ kvacidvaikuṇṭhamityapi |
kvaciccā'vyākṛtaṃ dhāma kvacitprakāśate'mṛtam || 51 ||
[Analyze grammar]

kvacaddhiraṇmayaṃ dhāma kvacidvairājakaṃ sthalam |
kvacidbrāhmaṃ vaiṣṇavaṃ ca raudraṃ dhāma prakāśate || 52 ||
[Analyze grammar]

kvacitstaṃbhe satyalokaḥ kvacit pitṛnivāsanam |
kvacid devāśca dikpālāḥ kvacidviśvādhināyakāḥ || 53 ||
[Analyze grammar]

kvacitstaṃbhe virājante sūryacandrādayo grahāḥ |
kvacittiṣṭhanti vasavaścendrā maharṣayaḥ kvacit || 54 ||
[Analyze grammar]

kvacitstaṃbhe mānavāśca kvacid daityāśca dānavāḥ |
kvacitsamudrā nadyaścā''raṇyakāni vanāni ca || 55 ||
[Analyze grammar]

parvatāśca kvacitstaṃbhe kvacitpātālavāsinaḥ |
jaleśayāḥ kvacitstaṃbhe kvacitsthaleśayā api || 56 ||
[Analyze grammar]

kvacidbileśayāstatra dṛśyante'pi gajādayaḥ |
garuḍāḥ śukasārāśca menakāśca mayūrakāḥ || 57 ||
[Analyze grammar]

bhāsā haṃsāścātakāśca dṛśyante devayonayaḥ |
apsaraso brahmasaraso'pi kvacicca nartakāḥ || 58 ||
[Analyze grammar]

dṛśyante staṃbhagarbheṣu citrāvaliyuteṣu ca |
sṛṣṭitrayaṃ maṇḍape vai nihitaṃ cākṣarātmake || 59 ||
[Analyze grammar]

bhūtale svarṇabhūmau vai rājante divyabhūmikāḥ |
kvacijjalaṃ kvacittejaḥ kvacidbhūmirvirājate || 60 ||
[Analyze grammar]

kvacidbhavanti sāmudrāḥ kvacidvanāni santi ca |
kvacicca parvatāḥ santi sarāṃsi saritastathā || 61 ||
[Analyze grammar]

udyānāni suramyāṇi kvacicca nagarāṇyapi |
bhūgarbhe paridṛśyante copari samasattale || 62 ||
[Analyze grammar]

evaṃ kṣīrasamudraśca nārāyaṇastathā prabhuḥ |
madhye tu maṇḍape tatra bhūgarbhe dṛśyate hariḥ || 63 ||
[Analyze grammar]

staṃbhamūleṣu sarvatra dṛśyante vāstudevatāḥ |
maṇḍape'pi yathāsthānā lokyante kṣitigarbhake || 64 ||
[Analyze grammar]

śākhādevā vilokyante dvāradevā bhavantyapi |
toraṇasya tathā sakhyaḥ paryo devyaḥ sraganvitāḥ || 65 ||
[Analyze grammar]

vilokyante citrakammānikādhārāḥ suyauvanāḥ |
suveṣāḥ sāmbarabhūṣā divyālokaprakāśitāḥ || 66 ||
[Analyze grammar]

madhye dīpapradīpāśca lambante vartulāśritāḥ |
pratolyāṃ samarājante devyo hāsyarasānvitāḥ || 67 ||
[Analyze grammar]

ratijātistriyaḥ sarvā vividhāścetanā iva |
virājante vartulāgre darśanādhārasaṃsthitāḥ || 68 ||
[Analyze grammar]

gāyakāścāpi gāndharvā vidyante yugalātmakāḥ |
dhvajābhiḥ samprakāśante maṇḍapāntarabhūmikāḥ || 69 ||
[Analyze grammar]

koṇe koṇe kalaśāśca sauvarṇāḥ sapta sapta ca |
ekasūtre sthāpitāśca śobhante sūryabhāsvarāḥ || 70 ||
[Analyze grammar]

phalaśākhāśca lambante staṃbhastambāśrayāstathā |
rajjvastatra praṇaddhāśca maṇimauktikmālikāḥ || 71 ||
[Analyze grammar]

vaicitryaṃ dṛśyate cā'tra maṇḍape darśane'bhitaḥ |
ekataḥ koṭilakṣmyaścaikato vai koṭirādhikāḥ || 72 ||
[Analyze grammar]

ekataśca sarasvatyaścaikataḥ koṭidurgikāḥ |
dṛśyante sāyudhāḥ sarvāḥ sarvābharaṇabhūṣitāḥ || 73 ||
[Analyze grammar]

toraṇoparibhūmīnāṃ sarvasṛṣṭimanoharāḥ |
tadūrdhvaṃ pārṣadāścāpi gopāścāpi svarūpiṇaḥ || 74 ||
[Analyze grammar]

gāndharvāścāpi sakalā gaṇāśca śāṃkarāstathā |
āyudhāni ca divyāni yāni sṛṣṭitraye'pi tu || 75 ||
[Analyze grammar]

vidyante tāni sarvāṇi tadūrdhve saṃsthitāni vai |
tadūrdhve dhruvabhāgāśca sūryadvādaśakānvitāḥ || 76 ||
[Analyze grammar]

tejo'mbarasamṛddhāśca dyotante vṛttatānikāḥ |
catuṣkikāstathā ramyā maṇḍovarāḥ samujjvalāḥ || 77 ||
[Analyze grammar]

sopānāni samastāni svarṇarūpyāstarāṇi ca |
bhittikāḥ paṭavastrāṇāṃ ratnānāṃ svarṇapatriṇām || 78 ||
[Analyze grammar]

vitānāni samastāni dyotante kauśikāni ca |
yathā yathordhvabhūmau ca divyaṃ vaikuṇṭhamanyakam || 79 ||
[Analyze grammar]

vikāsitaṃ mahodyāne rāsaramaṇaśobhitam |
gajasiṃhagaruḍādivāhanāni dyuvāsinām || 80 ||
[Analyze grammar]

yāni śreṣṭhāni ramyāṇi śubhāni tatra santi ca |
tāni sarvāṇyūrdhvabhūmau nihitāni kramādiva || 81 ||
[Analyze grammar]

kalpavallīkalpavṛkṣakalpadīpānvitaḥ śubhaḥ |
kalpatejoviśiṣṭaśca kalpabhūphaladastathā || 82 ||
[Analyze grammar]

maṇḍapo hyabhavat so'yaṃ kalpamauktikamālyavān |
kalpavāyusukhasparśaḥ kalpagandhavirājitaḥ || 83 ||
[Analyze grammar]

kalpāmbarapradaḥ kalpatāmbūlavallikā'nvitaḥ |
kalpapānapradātā ca kalpasvalpavimānakaḥ || 84 ||
[Analyze grammar]

kalpaśayyāstaraṇaśca kalpaparyaṃkarājitaḥ |
kalpagendukakaśipupradaḥ kalpopasādhanaḥ || 85 ||
[Analyze grammar]

kalpabṛsīkalpamṛdvāsanasiṃhāsanānvitaḥ |
kalpapīṭhasabhāśobhaḥ kalpapaṭṭikamaṇḍitaḥ || 86 ||
[Analyze grammar]

kalpaśavaraṇairvakrairakhaṇḍāmbarakairyutaḥ |
kācatoraṇayuktaśca maṇiratnāditoraṇaḥ || 87 ||
[Analyze grammar]

maṇiratnānvitakapāṭāḍhyapeṭikabhittikaḥ |
preṃkhādolādisaṃśobhatpārśvabhūmivirājitaḥ || 88 ||
[Analyze grammar]

vidyuddarśanayantraiśca vidyudvāgyantrakairyutaḥ |
vidyucchrāvaṇayantraiśca cāndrasparśasuyantravān || 89 ||
[Analyze grammar]

kalpavedhe kṛtakalpaṃ cānukalpavivartanaḥ |
kālakalpanayantrāḍhyaḥ sarvajñatvapravartakaḥ || 90 ||
[Analyze grammar]

piṇḍe brahmāṇḍake cakrottameṣu yogakalpavān |
kalpayantrātmatūryādisvaragītiprakāśanaḥ || 91 ||
[Analyze grammar]

piṇḍabrahmāṇḍasarvasvadarśakayantraśobhitaḥ |
kāmatṛptipradasparśottamacamatkṛtipradaḥ || 92 ||
[Analyze grammar]

smṛtamātrasya ceṣṭasya kṣaṇamātreṇa sampradaḥ |
prācyasṛṣṭyāścaryayutaḥ saccidānandacetanaḥ || 93 ||
[Analyze grammar]

śāśvatā''nandadātā ca ghaṇṭaśaṃkhamṛdaṃgavān |
bhogyajātahradayukto'mṛtavārdhisusaṃbhṛtaḥ || 94 ||
[Analyze grammar]

sarvasṛṣṭisthitā yā yā yādṛśyāḥ pramadottamāḥ |
tāstāḥ sarvā bhinnarūpāśrayāstatra vidhāpitāḥ || 95 ||
[Analyze grammar]

koṇe māṇikyanāmā ca staṃbho yatra suvarṇajaḥ |
raktaraṃgābhisaṃśobhaścatuḥkarṇasumastakaḥ || 96 ||
[Analyze grammar]

pūjitaḥ sindūrapuṣpairakṣataiḥ kamalādibhiḥ |
tathā vai cāndanapaṭṭikāyāṃ cākṣatamaṇḍale || 97 ||
[Analyze grammar]

vārdhinīkalaśaḥ svarṇaḥ sajalaḥ pūjikāyutaḥ |
kaṇṭhasūtrāmbaraśobho madhye jalena pūritaḥ || 98 ||
[Analyze grammar]

cūtā'śokasucampakanāgavallīdalānvitaḥ |
saśrīphalaḥ saratnaśca sadhātuḥ śobhanaḥ kṛtaḥ || 99 ||
[Analyze grammar]

gaṇeśena suvarṇena pūjitena surājitaḥ |
siddhibuddhisahitena śubhalābhānvitena ca || 100 ||
[Analyze grammar]

ityevaṃ maṇḍapastatra divyamukto babhūva ha |
loke bhedena yāḥ śobhāstatra tena kṛtāḥ svayam || 101 ||
[Analyze grammar]

rādhike varṇanaṃ yasya kartuṃ naiva praśakyate |
sarvamāṃgalikāṃ'kurā'kṣatakuṃkumapātravān || 102 ||
[Analyze grammar]

pūjāsatkāravastūpasampatsāmagrikābhṛtaḥ |
dedīpyamāno hyabhavad bālakṛṣṇālayā'gragaḥ || 103 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne mārgaśuklapratipadi prātarmaṃgalāni kuṃkumavāpīsarasoḥ śobhā divyāṃgaṇamaṇḍapaśobhetyādinirūpaṇanāmā'ṣṭasaptatyadhikadviśatatamo'dhyāyaḥ || 278 ||
[Analyze grammar]