Chapter 262

śrīkṛṣṇa uvāca |
śṛṇu tvaṃ rādhike rājā tvaśvapāṭalasaṃjñakaḥ |
lomaśena samaṃ somatīrthe vai prathamaṃ yayau || 1 ||
[Analyze grammar]

tatra snātvā ca vidhinā dattvā dānānyanekaśaḥ |
yūpasthalīṃ namaskṛtya rāmatīrthaṃ yayau tataḥ || 2 ||
[Analyze grammar]

aśvapāṭala uvāca |
kathaṃ tīrthamidaṃ jātaṃ maharṣe rāmanāmakam |
samāsena kathāmetāṃ praśrāvaya purātanīm || 3 ||
[Analyze grammar]

śrīlomaśa uvāca |
bhāṇavīryo'bhavat siṃhajñātīyo nṛpatiḥ purā |
gopanāthādikhaṇḍasya rājya karoti śobhanam || 4 ||
[Analyze grammar]

śatrujayapradeśāṃśca śāsti dharmadharo nṛpaḥ |
rāmarāmetirāmetirāmādityeti sarvadā || 5 ||
[Analyze grammar]

kṛṣṇakṛṣṇetikṛṣṇetikṛṣṇādityeti vai tathā |
japati svakuṭumbena sahito vaiṣṇavaḥ khalu || 6 ||
[Analyze grammar]

prajāstasya sukhasthānāḥ sukhālayāḥ sukhe sthitāḥ |
bhajante ca sadā rāmaṃ kṛṣṇaṃ govindamacyutam || 7 ||
[Analyze grammar]

dharmaṃ karoti nityaṃ ca bhāṇavīryo'tithāvapi |
sādhuṣu devakāryeṣu dānahomapradakṣiṇāḥ || 8 ||
[Analyze grammar]

evaṃ vai vartamānasyaikadā kaṣṭaṃ hi bhautikam |
samutpannaṃ bhāladeśanṛpo nāmnā kṣamābhṛtaḥ || 9 ||
[Analyze grammar]

vijayārthaṃ svasainyena niryayau cā'nusāgaram |
sābhramatīṃ samuttīrya dhavalākhyān pradeśakān || 10 ||
[Analyze grammar]

vijitya bhāṇavīryasya rāṣṭraṃ jetumupāyayau |
sainyaṃ kṣamābhṛtasyāpyuddhataṃ grāmān purāṇi ca || 11 ||
[Analyze grammar]

aṭati sma nijān kṛtvā pradeśān siṃharāyikām |
rājadhānīṃ vijetuṃ vai tūrṇamantikamāyayau || 12 ||
[Analyze grammar]

siṃharājyā nagaryā vai paritaḥ sainyacakrakam |
kṛtvā''vṛṇod rājadhānīṃ dūtaṃ cāpreṣayan nṛpam || 13 ||
[Analyze grammar]

rājavākyaṃ jagādāpi dūto gṛhāṇa vaśyatām |
yadvā yuddhaṃ pradehyatra rājyaṃ vā sakalaṃ tataḥ || 14 ||
[Analyze grammar]

bhāṇavīryo jagādāpi dūtaṃ kṣamābhṛtasya ha |
nā'nyāyo vidyate rājye nā'dharmo vidyate tathā || 15 ||
[Analyze grammar]

ījyate bhagavān rāmaḥ kṛṣṇaśca sarvadā mayā |
rakṣyante sādhavaḥ sarve pūjyante'tithayaḥ sadā || 16 ||
[Analyze grammar]

rājyaṃ rāmasya śaraṇe mayā'rpitaṃ vibhāvyate |
nā'trā'sti vaśyatā'nyasya yuddhaṃ naiva naraiḥ saha || 17 ||
[Analyze grammar]

rājyadānaṃ kṛtaṃ rāme kathamanyena bhujyate |
ahaṃ tu tatpradhāno'smi yotsyate bhagavān svayam || 18 ||
[Analyze grammar]

vada dāsye na vai rājyaṃ kariṣye'pi na vaśyatām |
yodhanaṃ bhagavāneva kariṣyati nijārthakam || 19 ||
[Analyze grammar]

sannaddho bhava rājendra garvaṃ mā vaha ceti vai |
vada kṣamābhṛtaṃ yadvā yāhi svabhavanaṃ prati || 20 ||
[Analyze grammar]

yadvā mitrasvarūpeṇa svāgataṃ te karomi ca |
yatheṣṭaṃ me punaścātrā''vedayeti vilokaye || 9 ||
[Analyze grammar]

dūto gatvā jagādedaṃ yathoktaṃ ca tataḥ sa ca |
kṣamābhṛto'preṣayacca dūtaṃ sajjo bhaveti ca || 22 ||
[Analyze grammar]

yuddhaṃ kṛtvā gṛhīṣye'haṃ rājyaṃ mā madamāvaha |
nahi nārāyaṇo yuddhe rakṣiṣyati prabhaktakam || 23 ||
[Analyze grammar]

iti saṃpreṣayitvaiva dūtaṃ yuddhasya sūcakān |
bherībyaṃgulaśaṃkhānāṃ ninādān samakārayat || 24 ||
[Analyze grammar]

yantraśabdān vividhāṃścā'kārayat durgasannidhau |
durgapālān gopurasthān dvārarakṣakarāṃstathā || 25 ||
[Analyze grammar]

bandhayitvā svavaśagān kṛtvā kṣamābhṛto nṛpaḥ |
praviveśa nagaryāṃ vai siṃharājyāṃ sasainyakaḥ || 26 ||
[Analyze grammar]

prajāstresuḥ kampamānāḥ sasmaruḥ rāmamacyutam |
kṛṣṇanārāyaṇaṃ devaṃ rakṣakaṃ parameśvaram || 27 ||
[Analyze grammar]

rājasaudhaṃ pragatvaiva kṣamābhṛto balānvitaḥ |
bhāṇavīryād bāhuyuddhaṃ yayāce rāṣṭrakaṃ ca vā || 28 ||
[Analyze grammar]

bhāṇavīryo mahābhaktaḥ samadṛg vai kṣamābhṛtam |
svāgatena samadṛṣṭyā'mānayacca jagau tadā || 29 ||
[Analyze grammar]

rājan yuddhe manuṣyāṇāṃ nāśo hiṃsā bhavediti |
jayo vā'pajayo vā'pi mayi tvayi bhaviṣyati || 30 ||
[Analyze grammar]

svasvarājye sthitau cā'vāṃ vijayasthau na saṃśayaḥ |
nahi tṛṣṇākhyatantūnāṃ vicchedo'nto bhaviṣyati || 31 ||
[Analyze grammar]

bhaja kṛṣṇaṃ hariṃ rāmaṃ vṛthā kleśaṃ ca mā vaha |
na me rājyaṃ na te rājyaṃ na kṣitiḥ saha yāsyati || 32 ||
[Analyze grammar]

na sainyaṃ bāndhavā bhṛtyā dhanāni rāṣṭrakaṃ prajāḥ |
saha yāsyanti maraṇe mṛtau na kṣaṇanirṇayaḥ || 33 ||
[Analyze grammar]

mayā kṛṣṇārpitaṃ rājyaṃ na me rājyaṃ viśiṣyate |
rāmarājye vṛthā gṛdhnāṃ mā samāvaha pārthiva || 34 ||
[Analyze grammar]

bāhuyuddhaṃ balaṃ pṛthvyā na te me'pi kathaṃcana |
śastrayuddhaṃ hi sainyasya parasyaiva balaṃ hi tat || 35 ||
[Analyze grammar]

balaṃ rāmāt prasaṃpādyaṃ yadbalaṃ sahagaṃ bhavet |
tadvinā cā'phalaṃ sarvaṃ balaṃ nirbalameva tat || 36 ||
[Analyze grammar]

kṣamābhṛta uvāca |
rājā bhūtvā sādhuvādān vadasyeva hi nirbalaḥ |
neyaṃ rājakule sādho rītiryaśaskarī kvacit || 37 ||
[Analyze grammar]

nātra rāmo na vai kṛṣṇo na yuddhe rakṣako hariḥ |
balajayyaṃ bhaved rāṣṭraṃ yuddhadharmaḥ sanātanaḥ || 38 ||
[Analyze grammar]

dehi yuddhena vā rājyaṃ śaraṇāgatimāvaha |
anyathā tvāṃ nigaḍe vai kṛtvā neṣye tamogṛham || 39 ||
[Analyze grammar]

bhāṇavīrya uvāca |
nigaḍā racitāḥ śrīmadrāmeṇa na tvayā nṛpa |
duṣṭārthe nigaḍā yogyā yadyahaṃ tādṛśastathā || 40 ||
[Analyze grammar]

nigaḍe saṃbhaviṣyāmi mā cintāṃ tatra vai kuru |
aduṣṭasya na nigaḍo yathā te rocate kuru || 41 ||
[Analyze grammar]

pareśvareṇa racitā bhūmirjalaṃ ca vahnayaḥ |
vāyuḥ prāṇā gaganaṃ ca śabdādyāścendriyāṇi ca || 42 ||
[Analyze grammar]

śarīraṃ racitaṃ tena rājyaṃ tenaiva nirmitam |
rājapadaṃ pradattaṃ ca tenaiva paramātmanā || 43 ||
[Analyze grammar]

yasya rājyaṃ jagat sarvaṃ yaddattaṃ prakaromyaham |
rājyaṃ rājan karomyevaṃ taddattaṃ tvaṃ sukhī bhava || 44 ||
[Analyze grammar]

mā ca gṛdhaḥ parasyā'nnaṃ pareśasya kare sthitam |
cātitṛṣṇo jano naśyet samūlaḥ saparigrahaḥ || 45 ||
[Analyze grammar]

rājñā kārye sadā ceśadattād deyaṃ parātmane |
pūjane'rpaṇamevā'tra tvaṃ tathā bhaktimāvaha || 46 ||
[Analyze grammar]

anādadāno gṛhṇāno rājaṃstvaṃ doṣamugrakam |
mā savahā'tra bhūmau vai mānave mokṣasādhane || 47 ||
[Analyze grammar]

paśya rājan rājyabhūmau karṣukā yadi vatsare |
dvivatsarayośca vā trivatsareṣu karādikam || 48 ||
[Analyze grammar]

yadi naiva dadatyeva rājñe te doṣabhāginaḥ |
rājadaṇḍyā bhaveyuste gṛhānniṣkāsitāstathā || 49 ||
[Analyze grammar]

kṣetravāṭīvihīnāśca bhaveyuḥ rājyadaṇḍitāḥ |
karadānena nirdoṣāḥ karā'dānena doṣiṇaḥ || 50 ||
[Analyze grammar]

karṣukasya gṛhavāṭīkṣetrodyānādikaṃ ca yat |
nṛpasyaiva bhavatyeva karā''dānanimittakam || 51 ||
[Analyze grammar]

karṣukastatra kṛṣyādyairjīvatyeva karapradaḥ |
karṣukeṇa nṛpo naiva vismartavyaḥ kadācana || 52 ||
[Analyze grammar]

yadi rājā vismṛtaḥ syāt karṣuko daṇḍabhāg bhavet |
karaṃ datvā nṛpaṃ smṛtvā jīvatyeva hyabādhitaḥ || 53 ||
[Analyze grammar]

evameva jagad rājan rājyaṃ śrīparamātmanaḥ |
pṛthivī nirmitā tena jalaṃ tejo'nilo'nalaḥ || 54 ||
[Analyze grammar]

śarīraṃ nirmitaṃ tena dravyamannaṃ rasādayaḥ |
narā nāryaḥ putrapaśuvṛkṣavallīgṛhādayaḥ || 55 ||
[Analyze grammar]

divā rātriḥ sūryacandrau sukhaṃ śamaḥ kuṭumbakam |
sampadbhojyaṃ ca peyaṃ ca sarvaṃ tasyaiva rāṣṭrakam || 56 ||
[Analyze grammar]

tasmai rājñe samarpyo vai kasmai yajñātmako hi saḥ |
anivedyā'samarpyā'pi karaṃ nārāyaṇasya vai || 57 ||
[Analyze grammar]

karṣukāśca vayaṃ sarve bhuṃkṣvahe cedanarpitam |
tarhi daṇḍasya pātrāṇi bhavema nātra saṃśayaḥ || 58 ||
[Analyze grammar]

tasmād rājan nahi pṛthvī te me vāpi kadācana |
pṛthvyāṃ sthitaiśca vā'smābhiḥ karṣukatvena pālyate || 59 ||
[Analyze grammar]

sa eva samrāḍ rājā'sti mā yuddhaṃ kuru pārthiva |
mayā vā tena sākaṃ vā bhuñjīthāstena te'rpitam || 60 ||
[Analyze grammar]

tena vāsyamidaṃ sarvaṃ yat kiñcijjagatyāṃ hi tat |
tena dattaṃ prabhuñjīthā mā gṛdhoḥ yatparasya vai || 61 ||
[Analyze grammar]

naijaṃ muktvā'rpayitvaiva haraye mokṣamāvaha |
mokṣarājyaṃ paraṃ rājyaṃ prāpnuhīti nibodha me || 62 ||
[Analyze grammar]

kṣamābhṛta uvāca |
bhūpapatho mokṣapatho jñānapathaḥ pṛthak trayaḥ |
yuddhapatho nṛpāṇāṃ vai tatra jñānaṃ na yujyate || 63 ||
[Analyze grammar]

sarvaṃ nārāyaṇasyaiva balavān yaḥ sa vindate |
bhuṃkte rājyaṃ samṛddhaṃ ced rājadharmo hi yodhanam || 64 ||
[Analyze grammar]

eṣa tvāṃ nigaḍe kṛtvā rājan harāmi rāṣṭrakam |
ityuktvā sahasā kṣamābhṛto babandha bhāṇakam || 65 ||
[Analyze grammar]

sakuṭumbaṃ ca sāmātyaṃ kośaṃ ca rājamandiram |
bhāṇavīryo hare rāma rāmakṛṣṇa harehare || 66 ||
[Analyze grammar]

bālakṛṣṇa kṛṣṇakṛṣṇa lakṣmīnātha harehare |
evaṃ cakāra bhajanaṃ nigaḍastho'pi nirbhayaḥ || 67 ||
[Analyze grammar]

kuṭumbaṃ bhajanaṃ cakre nirbhayaṃ bhagavadbalam |
kṣamābhṛtaśca mumude rājyaṃ prāptamakaṇṭakam || 68 ||
[Analyze grammar]

bhaktapriyo hi bhagavān bhaktasāhāyyadaḥ prabhuḥ |
vaikuṇṭhasthaḥ prabhuḥ śrīmān sitāpatiḥ pareśvaraḥ || 69 ||
[Analyze grammar]

śuśrāva bhajanaṃ tasya bhāṇavīryasya cottamam |
sitā prāha hariṃ tatra kimidaṃ kīrtanaṃ bahu || 70 ||
[Analyze grammar]

śrūyate tīvrasaṃvegaṃ kānta kena samīritam |
rāmādityastadā prāha paśya lakṣmi svabhaktakam || 71 ||
[Analyze grammar]

nigaḍasthaṃ bhāṇavīryaṃ surāṣṭre siṃharājake |
pattane ca nije kṣamābhṛtena nihitaḥ khalu || 72 ||
[Analyze grammar]

sitā'paśyannigaḍasthaṃ bhaktaṃ rājānameva sā |
utthāya sahasā rāmaṃ samutthāya sapārṣadā || 73 ||
[Analyze grammar]

ājagāma kṣaṇāt pṛthvyāṃ cāśvapaṭṭasaro'ntikam |
anādiśrīkṛṣṇanārāyaṇaṃ brahmapriyāstathā || 74 ||
[Analyze grammar]

saha nītvā sitā rāmaṃ sainyaṃ vyaracayattadā |
caturaṃgaṃ ca yuddhārthaṃ vyomagaṃ śīghragāmi ca || 75 ||
[Analyze grammar]

bhaktasya rakṣaṇārthaṃ vai yuddhatūryāṇyavādayat |
siṃharājīnagaryāstu prākārasya samantataḥ || 76 ||
[Analyze grammar]

cakravyūhaṃ pṛtanāyāḥ kṛtvā kṣamābhṛtaṃ nṛpam |
cetayāmāsa yuddhārthaṃ so'pi sainyena saṃyutaḥ || 77 ||
[Analyze grammar]

yuddhārthaṃ tvāyayau śīghraṃ saṃgrāmo'bhūnmaholbaṇaḥ |
daśasāhasrayoddhāraḥ kṣamābhṛtasya bheditāḥ || 78 ||
[Analyze grammar]

śarairbāṇaistomaraiśca vajraiścakraiḥ kṛpāṇakaiḥ |
kṣamābhṛto dhṛto jīvasahaḥ pāśairmahābhaṭaiḥ || 79 ||
[Analyze grammar]

bhāṇavīryaṃ ca nirbandhaṃ cakāra hi sitā svayam |
kṛṣṇanārāyaṇo rāmastasmai dadau svadarśanam || 80 ||
[Analyze grammar]

brahmapriyā daduścāpi darśanaṃ nṛpayoṣite |
kuṭumbāya prajābhyaścāśīrvādān lomaśo dadau || 81 ||
[Analyze grammar]

ahaṃ rājan lomaśo vai mantraṃ dade'sya vaiṣṇavam |
rājyaṃ bhaktāya dattvaiva kṣamābhṛtaṃ nibadhya ca || 82 ||
[Analyze grammar]

visṛjya tasya deśaṃ ca kuṃkumakṣetrakaṃ prati |
bhāṇavīryaṃ savaṃśaṃ ca rāmādityaṃ sapārṣadam || 83 ||
[Analyze grammar]

ānāyyā'śvasarovārau snāpayāmāsa śuddhaye |
hatānāṃ mokṣaṇaṃ prādād bhagavāna bālakṛṣṇakaḥ || 84 ||
[Analyze grammar]

rāmādityaḥ samuvāsa sapārṣadagaṇastadā |
ādṛtaḥ satkṛtaścāpi sarasyatrā''plavaṃ vyadhāt || 85 ||
[Analyze grammar]

tattīrthaṃ rāmatīrthaṃ vai rājannetat tato'bhavat |
sitātīrthaṃ muktitīrthaṃ sarasyetannigadyate || 86 ||
[Analyze grammar]

bhāṇavīryeṇa vai cātra mandiraṃ kāritaṃ śubham |
rāmādityo hi sitayā sahitaścātra śobhate || 87 ||
[Analyze grammar]

pārṣadaiḥ sahitaścāpi dhṛtakārmukahetikaḥ |
evaṃ bhaktasya rakṣā vai kṛtā śrīparamātmanā || 88 ||
[Analyze grammar]

bhāṇatīrthaṃ tathā khyātaṃ vaikuṇṭhatīrthamityapi |
īśānataḥ paścime vai vartate somatīrthakāt || 89 ||
[Analyze grammar]

atra snāhi jalaṃ pītvā tarpitvā bhaktitaḥ pitṝn |
dehi dānāni viprebhyaḥ sadbhyaḥ satībhya ityapi || 90 ||
[Analyze grammar]

sarvadānaphalaṃ cātra lapsyase tvalpadānataḥ |
pṛthvīdānaphalaṃ cātra phalamātrapradānataḥ || 91 ||
[Analyze grammar]

svargadānaphalaṃ cātra dhenudānapradānataḥ |
lakṣmīdānaphalaṃ cātra kanyādānapradānataḥ || 92 ||
[Analyze grammar]

mokṣadānaphalaṃ cātrā'bhayadānapradānataḥ |
ityukto rādhike rājā bhāṇavīryo mahābalaḥ || 93 ||
[Analyze grammar]

bhaktarāḍ vidhinā snānadānārhaṇāni saṃvyadhāt |
dhyānaṃ cakre kṣaṇaṃ rāmādityasya paramātmanaḥ || 94 ||
[Analyze grammar]

rāmasya darśanaṃ tasya tejomadhye hṛdantare |
jātaṃ tutoṣa rājā'pi lomaśo'pi samādhinā || 95 ||
[Analyze grammar]

dadarśa divyadṛṣṭyā vai smāritaḥ kṛṣṇavallabhaḥ |
dṛṣṭaḥ sākṣāttato rāmo'ntardhānaṃ prajagāma ha || 96 ||
[Analyze grammar]

ityevaṃ cetanaṃ tīrthaṃ rāmādityābhidhaṃ param |
rādhike smaraṇāccāpi rāmadarśanakārakam || 97 ||
[Analyze grammar]

pāpatāpaharaṃ śatrusaṃkaṭādivināśakam |
vaikuṇṭhavāsadaṃ ramyaṃ viṣṇośca mandiraṃ śubham || 98 ||
[Analyze grammar]

yatra mṛtāḥ paśavo'pi yānti vaikuṇṭhamuttamam |
yatra snātā narā nāryo yānti vaikuṇṭhamuttamam || 99 ||
[Analyze grammar]

yatra rāmahrade snātvā prayānti satyataḥ param |
sakāmāḥ suralokaṃ vā niṣkāmāścākṣaraṃ padam || 100 ||
[Analyze grammar]

prayānti rādhike sampūjitāḥ pārṣadasattamaiḥ |
śravaṇātpaṭhanāccāsya tatsarvaṃ phalamāpnuyāt || 101 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne lomaśagītāyāmaśvapāṭalo rāmādityatīrthaṃ prāpya bhāṇavīryabhaktakathāṃ śrutvā vidhinā snānadānādikaṃ cakāra rājñoḥ mithaḥ saṃvādaścetyādinirūpaṇanāmā dvāṣaṣṭyadhikadviśatatamo'dhyāyaḥ || 262 ||
[Analyze grammar]