Chapter 261

śrīkṛṣṇa uvāca |
śṛṇu tvaṃ rādhike paścādāśvapaṭṭalabhūpatiḥ |
pratyakṣaśrīharerbodhaṃ papraccha munaye tadā || 1 ||
[Analyze grammar]

aśvapāṭala uvāca |
mune yo'yamanādiśrīkṛṣṇanārāyaṇaḥ prabhuḥ |
pratyakṣo bhagavānāste tadbodhaṃ kāraya prabho || 2 ||
[Analyze grammar]

tannāmnā bhajanaṃ kurve sārthamāno yathā'nvaham |
śādhi sarvārthasampannaṃ bodhaṃ māṃ pārameśvaram || 3 ||
[Analyze grammar]

śrīlomaśa uvāca |
rājannaikāntikā bhaktā vidvāṃso vedapāragāḥ |
niruktāni harernāmnāṃ jānanti netare janāḥ || 4 ||
[Analyze grammar]

yato hyekāntinaḥ śreṣṭhā ye caivā'nanyadevatāḥ |
tadātmānastatparāstacchīlāstatsahakriyāḥ || 5 ||
[Analyze grammar]

kadā kutra kathaṃ nāma kena jātaṃ vidanti te |
pragṛṇanti tato bhaktāḥ pūrvaṃ prakāśitaṃ ca taiḥ || 6 ||
[Analyze grammar]

ādirjanmodbhavaścāpi dehendriyādiyojanam |
prāgvisargaḥ paścasarge yanmūrtau naiva vidyate || 7 ||
[Analyze grammar]

kālo'kṣaraṃ yadādau na yasmin kvacid vilīyate |
sarveṣāṃ svetareṣāṃ sa ādireva paraḥ prabhuḥ || 8 ||
[Analyze grammar]

nānyadādi hyabhūd yasya tasmādanādireva saḥ |
nityaśrīḥ śrayati yaṃ ca divyaśobhottamottamā || 9 ||
[Analyze grammar]

divyaveṣaśca racanā vāṇī sampadvibhūtikā |
aiśvaryāṇi guṇāḥ sarve śrīpadā yatra santi ha || 10 ||
[Analyze grammar]

tasmācchrīḥ sa śrītādātmyād ramālakṣmyādisaṃśrayaḥ |
śrīmān sa eva bhagavān prokto vai parameśvaraḥ || 11 ||
[Analyze grammar]

narāṇāmātmanāṃ yo'yamayanaṃ vai cirantanam |
nārāḥ sarvā divyarūpā śaktayastannivāsanam || 12 ||
[Analyze grammar]

arā māyā ca dāridryaṃ nāsti yatra hi muktigāḥ |
muktā narāstannivāso nārāyaṇaḥ sa vai mataḥ || 13 ||
[Analyze grammar]

karṣatyeva jagatsarvaṃ sarvāḥ sṛṣṭistanau kvacit |
nayatyeva layaṃ sarvaṃ kṛṣṇastena prakīrtitaḥ || 14 ||
[Analyze grammar]

kṛṣiḥ kalmaṣanāśaśca naśca nirvṛttirucyate |
tādṛśaḥ śrīkṛṣṇa evā'nādikṛṣṇanarāyaṇaḥ || 15 ||
[Analyze grammar]

kaṃ sukhaṃ śāśvataṃ yacca kaṃ vā brahmaparaṃ prabhum |
bibharti yā nije garbhe kaṃbharā hṛdaye ca vā || 16 ||
[Analyze grammar]

kaṃbharāyāḥ sutaścātra kāṃbhareyo harirhi saḥ |
gāḥ kiraṇāni kṛṣṇasya pālayatyeva yaḥ svayam || 17 ||
[Analyze grammar]

gāśca dhenūḥ pṛthivīṃ gāṃ gatiṃ divyāṃ ca rakṣati |
gopālaśca pitā tasya nando gopālanandanaḥ || 18 ||
[Analyze grammar]

purāṇi ca śarīrāṇi cetanāni jaḍāni ca |
upatyeva ca teṣu śrīharirvai puruṣottamaḥ || 19 ||
[Analyze grammar]

bṛhatvādvyāpakatvācca paratvād brahma yaḥ paraḥ |
parabrahma hariścaiva sa eva bhagavān svayam || 20 ||
[Analyze grammar]

paramāṇi samagrāṇyaiśvaryāṇi santi tatra ca |
parameśvara evā'sau pareśvara prasiddhyati || 21 ||
[Analyze grammar]

kṣaraṃ māyātmakaṃ sarvaṃ tatparaṃ dhāma cākṣaram |
tadatīto hariḥ so'yamakṣarātīta ucyate || 22 ||
[Analyze grammar]

avatārā harerevāvirbhavanti samastataḥ |
avatārī svayaṃ teṣāṃ mūlaṃ śrīharirucyate || 23 ||
[Analyze grammar]

hariścāyaṃ haratyeva bhaktānāṃ mānasāni vai |
haratyeva ca duḥkhāni hariścāyaṃ prakīrtitaḥ || 24 ||
[Analyze grammar]

haraḥ saṃkarṣaṇaścāsājjāyate kāryakṛtprabhuḥ |
harī tena tathoktaścaiśvaryavān bhagavānapi || 25 ||
[Analyze grammar]

vasatyayaṃ samasteṣu dīvyatyevāntarasthitaḥ |
vāsudevaḥ sa vai proktaḥ parameśaḥ sanātanaḥ || 26 ||
[Analyze grammar]

prakṛtiryasya vāñcchā'sti śaktiḥ śālo'pi vai tathā |
māyā yā prakṛtistasya dhavo mādhava eva saḥ || 27 ||
[Analyze grammar]

kālātmā'pi prabhuḥ proktaḥ sarvasarjanaśaktimān |
viśanti sṛṣṭayo yatra yasmādvā viṣṇureva saḥ || 28 ||
[Analyze grammar]

veveṣṭi vyāpnoti caiṣo vyāpako viṣṇurucyate |
damanena janā ūrdhvamṛcchanti dhāma me param || 29 ||
[Analyze grammar]

tena dāmodaraḥ kṛṣṇo dāne mode ramatyayam |
keśāstadaṃśavaḥ proktāstadvān kṛṣṇo hi keśavaḥ || 30 ||
[Analyze grammar]

agniḥ somo mama rūpe mukhaṃ rasaśca tāvubhau |
agniṣṭomastato nāma nārāyaṇaḥ svayaṃ kratuḥ || 31 ||
[Analyze grammar]

agniḥ kṣatraṃ dvijaḥ somastayoraikyaṃ haro hariḥ |
agnirnārī naraḥ somaścāgniṣṭomo narāyaṇaḥ || 32 ||
[Analyze grammar]

naṣṭāṃ gāṃ pṛthivīṃ cāyamavindacca purā tataḥ |
govinda iti vikhyāto gopālo goprapālanāt || 33 ||
[Analyze grammar]

hṛṣīkānīndriyāṇyeṣa īśate sa haristataḥ |
hṛṣīkeśaḥ samabhavat hṛṣīkā tapasāṃ sthale || 34 ||
[Analyze grammar]

adhaḥ sarvaṃ paraṃ sarvaṃ paśyatyadhokṣajastataḥ |
vṛṣodharmastannivāsaḥ kapirvārāharūpyayam || 35 ||
[Analyze grammar]

ramante yoginastatra rāmo ramaṇavān prabhuḥ |
guṇakarmānuyogena nāmnāmasyāstyanantakam || 36 ||
[Analyze grammar]

anādiśrīkṛṣṇanārāyaṇaṃ brahmaparaṃ bhaja |
bālarūpaḥ svayaṃ kṛṣṇaḥ kuṃkumavāpikā'kṣare || 37 ||
[Analyze grammar]

kṣetre virājate yastaṃ bālakṛṣṇaṃ sadā bhaja |
bāmāyā layametyatra kṛṣṇe'to bālakṛṣṇakaḥ || 38 ||
[Analyze grammar]

bālānajñānasaṃvyāptān janānādiśya satpatham |
karṣatyakṣaradhāmakṣmāṃ paraṃ sukhaṃ dadāti ca || 39 ||
[Analyze grammar]

bālakṛṣṇo harikṛṣṇaḥ śrīkṛṣṇaḥ puruṣottamaḥ |
anādiśrīkṛṣṇanārāyaṇo brahmapriyāpatiḥ || 40 ||
[Analyze grammar]

satāṃ patirmuktapatiḥ sarvapatirjanārdanaḥ |
bhaktapatirnijapatiḥ sevyatāṃ prāpyatāṃ nṛpa || 41 ||
[Analyze grammar]

aśvapāṭala uvāca |
aho jñānamaho bodhaścāho'mṛtaṃ rasāyanam |
pāyitaṃ me muro'jasraṃ divyaṃ divyavimuktidam || 42 ||
[Analyze grammar]

taponidhe tvayoktaṃ me nārāyaṇakathāmṛtam |
īdṛśo bhagavān mahyaṃ darśito bodhito'ntare || 43 ||
[Analyze grammar]

anādiśrīkṛṣṇanārāyaṇaḥ sākṣānnibhālitaḥ |
agniṣomātmakaḥ so'yaṃ bhagavāṃstarpito mayā || 44 ||
[Analyze grammar]

prasāditastathā sākṣāt samāsādita eva saḥ |
na tato'sti paraḥ kaścinna tatsamo'sti vetaraḥ || 45 ||
[Analyze grammar]

tatkathātulyamākhyānaṃ nānyat sṛṣṭitraye'pi vai |
vidyate phaladaṃ sarvatīrthānāṃ pāvanaṃ param || 46 ||
[Analyze grammar]

na cātrā'lpa mama puṇyaṃ vardhitaṃ bhavatā bahu |
kuṃkumakṣmāṃ samāsādya yenā'haṃ dṛṣṭavān harim || 47 ||
[Analyze grammar]

ityevaṃ rādhike matvā kṛtakṛtyaṃ nija nṛpaḥ |
papāta daṇḍavadbhūmau lomaśaṃ svaguruṃ prati || 48 ||
[Analyze grammar]

lomaśastaṃ tadā prāha harṣāśrupulakāṃcitam |
dhanyo'styanugṛhīto'sti yadbhavān dṛṣṭavān harim || 49 ||
[Analyze grammar]

adṛśyadarśane tatra taddayaiva hi kāraṇam |
avatārī hi bhagavān durdarśaḥ puruṣottamaḥ || 50 ||
[Analyze grammar]

nā'sya bhaktāt priyataro lokaṃ kaścana vidyate |
tataḥ svayaṃ darśitavān svamātmānaṃ nṛpottama || 51 ||
[Analyze grammar]

tasmāduttiṣṭhate rājan kṣamā yā vai kṣitau sthitā |
tasmāduttiṣṭhate raso yenā''po rasasaṃbhṛtāḥ || 52 ||
[Analyze grammar]

tasmāduttiṣṭhate rūpaṃ yenā'rkādyāḥ surūpiṇaḥ |
tasmāduttiṣṭhate sparśo yena prāṇāḥ suyoginaḥ || 53 ||
[Analyze grammar]

tasmāduttiṣṭhate śabdo yena lokā gṛṇanti ca |
tasmāduttiṣṭhate manaḥ prakāśaguṇadhārakam || 54 ||
[Analyze grammar]

tasmāduttiṣṭhate buddhistattvanirṇayakāriṇī |
buddhyā viditvā taṃ kṛṣṇaṃ kṣetrajñaṃ sāttvatāṃ nṛpa || 55 ||
[Analyze grammar]

viśanti paramātmānaṃ hṛdayasthaṃ samāhitāḥ |
bhajainaṃ parameśaṃ taṃ rājan kṛṣṇanarāyaṇam || 56 ||
[Analyze grammar]

daivataṃ paramaṃ yajñaṃ parātmānaṃ sanātanam |
īṣyate sarvayajñeṣu nityaṃ so'yaṃ jagatpatiḥ || 57 ||
[Analyze grammar]

ye yajanti surān pitṝn gurūn sādhūṃstathā'tithīn |
gāśca viprān dīnajanān kṣitiṃ satīṃ ca mātaram || 58 ||
[Analyze grammar]

ṛṣīn sevāparān bhṛtyān patnīṃ patiṃ ca bālakān |
pūjyānanāthān raṃkāṃśca paśūn patatriṇastathā || 59 ||
[Analyze grammar]

stambān vṛkṣān pakṣiṇaśca viṣṇumeva yajanti te |
antargataḥ sa bhagavān sarvapiṇḍe vyavasthitaḥ || 60 ||
[Analyze grammar]

gṛhṇāti śraddhayā dattaṃ jīvatṛptiṃ samāvahat |
anādiśrīkṛṣṇanārāyaṇaḥ so'yaṃ śrutau śrutaḥ || 61 ||
[Analyze grammar]

bhaja taṃ paramātmānaṃ rājan pratyakṣagocaram |
ya eṣa gururasmākaṃ kaṃbharānandanastviha || 62 ||
[Analyze grammar]

ko yāyāt taṃ vinā cātra sarvatra kṣitimaṇḍale |
prakuryācca mahāyajñān tārayenmocayejjanān || 63 ||
[Analyze grammar]

kathaṃ vinā taṃ śrīkṛṣṇaṃ sarvajaganmanoharam |
vṛṇuyuḥ kanyakā rājñāṃ sahasraśaśca koṭiśaḥ || 64 ||
[Analyze grammar]

kathaṃ devāśca ṛṣayaśceśvarāśceśvareśvarāḥ |
āgatya pūjanaṃ kuryurmakheṣvasya hariṃ vinā || 65 ||
[Analyze grammar]

kathaṃ rādhāramālakṣmīkamalādyāśca koṭiśaḥ |
kṛṣṇapatnyaścāsya sevāṃ kuryurnārāyaṇaṃ vinā || 66 ||
[Analyze grammar]

kathaṃ cihnāni sarvāṇi sṛṣṭitrayordhvagāni vai |
nārāyaṇaṃ vinā'syaiva mūrtau bhaveyurañjasā || 67 ||
[Analyze grammar]

sa vai vedanidhiḥ kṛṣṇastapasāṃ nidhireva ca |
yogajñānanidhiścā'yaṃ sarvodaraḥ sa eva ca || 68 ||
[Analyze grammar]

parabrahmaparā vedāḥ parabrahmaparā makhāḥ |
parabrahmaparo mokṣaḥ parabrahmaparaṃ tapaḥ || 69 ||
[Analyze grammar]

parabrahmaparaṃ satyaṃ parabrahmaparamṛtam |
parabrahmaparaṃ puṇyaṃ parabrahmaparā gatiḥ || 70 ||
[Analyze grammar]

pravṛttinivṛttidharmaḥ parabrahmaparāyaṇaḥ |
parabrahmātmako gandhaḥ pṛthvyāṃ śreṣṭhatamo nṛpa || 71 ||
[Analyze grammar]

parabrahmaparā cāpāṃ guṇā rasātmakāḥ śubhāḥ |
parabrahmaparaṃ rūpaṃ jyotiṣāṃ rūpiṇāṃ tathā || 72 ||
[Analyze grammar]

parabrahmātmakaḥ sparśaḥ sarvaspṛśyasthito'nugaḥ |
parabrahmātmakaḥ śabdaḥ sarvaśabdyānupāvṛtaḥ || 73 ||
[Analyze grammar]

parabrahmaparaṃ cittaṃ mano'haṃ buddhirīśvarī |
parabrahmātmikā mātrāḥ parabrahmātmakā guṇāḥ || 74 ||
[Analyze grammar]

parabrahmātmakaḥ kālaḥ parabrahmaparā kṛtiḥ |
kīrtiḥ śrīrdevatā lakṣmīḥ parabrahmaparā ca bhūḥ || 75 ||
[Analyze grammar]

parabrahmaparā bhūtirlīlā sarasvatī satī |
parabrahmaparāḥ sarvāḥ ṛco brahmapriyāstathā || 76 ||
[Analyze grammar]

parabrahmaparaṃ jñānaṃ yogastyāgaḥ śubhā kriyāḥ |
kāraṇāni samastāni parabrahmaparāṇi ca || 77 ||
[Analyze grammar]

tattvaṃ jijñāsamānānāṃ paraṃ tattvaṃ pareśvaraḥ |
sarveṣāṃ sa vijānāti manīṣitaṃ paraḥ prabhuḥ || 78 ||
[Analyze grammar]

daivaṃ paitryaṃ tapo dānaṃ sarvāśrayo hariḥ svayam |
sarvabhūtakṛtāvāsaḥ kuṃkumavāpikā''layaḥ || 79 ||
[Analyze grammar]

akṣarabrahmavāsaśca bālakṛṣṇaḥ sa eva saḥ |
anādiśrīkṛṣṇanārāyaṇo nārāyaṇeśvaraḥ || 80 ||
[Analyze grammar]

sa vai hyekāntinaḥ sarvān prīṇāti bhagavān hariḥ |
vidhikṛtāṃ supūjāṃ ca gṛhṇāti bhagavān svayam || 81 ||
[Analyze grammar]

ekāntino hi manujāḥ prayānti śrīhareḥ padam |
ekāntadharmasarvasvaṃ parabrahmaparāyaṇam || 82 ||
[Analyze grammar]

sammitaṃ sāmavedena puraivādau kṛte yuge |
dhāryate bālakṛṣṇena nārāyaṇeśvareṇa ha || 83 ||
[Analyze grammar]

nārāyaṇo yajñadharmaṃ svarṇarekhānadītaṭe |
nārāyaṇahrade daivaṃ paitryaṃ nyavartayat purā || 84 ||
[Analyze grammar]

ṛṣayo devatādyāśca somo'pi mānavāstathā |
makhadharmaṃ purākalpe nyavartayan hariśritāḥ || 85 ||
[Analyze grammar]

rudraḥ kṛte yuge nārāyaṇadharmaṃ hyapālayat |
aśikṣayattathā viprān cādye kṛte yuge haraḥ || 86 ||
[Analyze grammar]

suparṇākhyamaharṣiśca prāpya śrīpuruṣottamāt |
yajñadharmaṃ pṛthivyāṃ saḥ prāvartayata sadvidhim || 87 ||
[Analyze grammar]

samudro yajñadharmāṃśca tataḥ prāvartayannṛpa |
athā''raṇyakanāmā'pi muniḥ prāvartayattataḥ || 88 ||
[Analyze grammar]

manustato yajñadharmān prāvartayata sāttvavān |
sanatkumāro bhagavān prāvartayata tatparān || 89 ||
[Analyze grammar]

vīraṇaḥ suvrataścāpi barhiṣadaśca dakṣakaḥ |
vivasvān sthāpitavanto dharmamenaṃ sanātanam || 90 ||
[Analyze grammar]

sarvārpaṇātmako dharmaḥ sāttvato duṣkaro janaiḥ |
dhāryate'nādikṛṣṇena sthāpyate ca punaḥ kṣitau || 91 ||
[Analyze grammar]

anādiśrīkṛṣṇanārāyaṇena makharūpavān |
sarvārpaṇātmako dharmo bhūgole sthāpite nṛpa || 92 ||
[Analyze grammar]

sa eva bhagavāṃlloke saṃsthāpya dharmamācyutam |
yathecchati tathā paścāt krīḍati śāsti vai prajāḥ || 93 ||
[Analyze grammar]

evamekāntadharmaste kathito nṛpasattama |
ekāntinaḥ kṣitau rājan bhavanti durlabhā janāḥ || 94 ||
[Analyze grammar]

yadyekāntibhirākīrṇaṃ jagat syād vaiṣṇavaṃ mithaḥ |
bhaved brahmapuraṃ cātra kṛtaṃ yugaṃ vidoṣakam || 95 ||
[Analyze grammar]

yatra caikāntinaḥ santi parabrahmaparāyaṇāḥ |
narā nāryaḥ paśavaśca pakṣiṇo devatādayaḥ || 96 ||
[Analyze grammar]

sarve varṇā vaiṣṇavāśca tatrā'kṣarapadaṃ matam |
adharmastatra nāstyeva nādharmavaṃśajā api || 97 ||
[Analyze grammar]

naranārīvyavahārāḥ sarve syurmuktakoṭijāḥ |
vaikuṣṭhaṃ vā ca goloko śveto vā badarīvanam || 98 ||
[Analyze grammar]

bhavettatra yadi kṣmāyāṃ sarve caikāntino janāḥ |
sāttvatā bhaktimanto vai bhaveyurmuktaye dhruvam || 99 ||
[Analyze grammar]

manīṣitaṃ hyavāpyaiva bhajeyuḥ puruṣottamam |
ekāntabhaktāḥ satataṃ parabrahmaparāyaṇāḥ || 100 ||
[Analyze grammar]

teṣāṃ haryaṃkaniṣṭhānāṃ yogakṣemavaho hariḥ |
jāyamānaṃ janaṃ naijaṃ kṛtvā yaṃ vīkṣate hariḥ || 101 ||
[Analyze grammar]

sāttvataḥ sa bhavedatra dharmaikāntikavān sa ca |
parabrahmātmake mokṣe tato yāti parāṃ gatim || 102 ||
[Analyze grammar]

nārāyaṇena dṛṣṭo yaḥ pratibuddho bhaveddhi saḥ |
nātmecchayā tathā rājan pratibuddho bhavet kvacit || 103 ||
[Analyze grammar]

pravṛttilakṣaṇairyuktaṃ naivekṣati hariḥ svayam |
paśyantyenaṃ mahāmāyā brahmā devāśca mānavāḥ || 104 ||
[Analyze grammar]

tataste vikṛtāḥ sarve māyābaddhā bhavanti vai |
te yadi sāttvatānāṃ vai sevāṃ kurvanti bhāvataḥ || 105 ||
[Analyze grammar]

tadā kālāntare prāpya nairguṇyaṃ yānti cākṣaram |
yadvā sāttvatasaṃghāte kṛpayā sāttvatekṣitāḥ || 106 ||
[Analyze grammar]

bhaveyuste yadā caikāntikasādhukṛpekṣitāḥ |
tadā teṣāṃ hṛdayasya parivartanamāśu vai || 107 ||
[Analyze grammar]

bhaviṣyati na sandeho'thavā prasādabhojanaiḥ |
harervā haribhaktānāṃ jalānnagrāsabhojanaiḥ || 108 ||
[Analyze grammar]

śuddhā buddhirnirguṇābhimukhī śanaiḥ prajāyate |
niṣkalmaṣā prasannā ca tataḥ sāttvatamaṇḍale || 109 ||
[Analyze grammar]

nivāsena śanaiḥ sāttvatatvamāsādya mokṣaṇam |
gamiṣyanti na sandehaḥ kṛpāsādhyā sthitirhi sā || 110 ||
[Analyze grammar]

ityuktvā virarāmaiva maharṣirlomaśastataḥ |
rādhike'śvapaṭṭalaśca pupūja lomaśaṃ munim || 111 ||
[Analyze grammar]

bahusāmagrikābhiśca kṛtakṛtyo babhūva ha |
aśvapaṭṭasarasaścottare tīrthābhivāñcachayā || 112 ||
[Analyze grammar]

lomaśaṃ prārthayattena lomaśena samaṃ tataḥ |
sarastīrthāni ca yayau sarvasārthasamanvitaḥ || 113 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne lomaśagītāyāṃ lomaśakṛtamaśvapāṭalāyā'nādiśrīkṛṣṇanārāyaṇasākṣādbhagavattvabodhanaṃ parabrahmaparāyaṇadharmabodhanaṃ cetyādinirūpaṇanāmaikaṣaṣṭhyadhikadviśatatamo'dhyāyaḥ || 261 ||
[Analyze grammar]