Chapter 260

śrīkṛṣṇa uvāca |
śṛṇu tvaṃ rādhike śrīmānaśvapāṭalabhūpatiḥ |
lomaśaṃ yatpunaścāpi papraccha sukhasādhanam || 1 ||
[Analyze grammar]

aśvapāṭala uvāca |
dattamiṣṭaṃ tapaścāpi guroḥ śuśrūṣaṇādikam |
yoginā'pi kṛtaṃ mokṣe niṣphalaṃ vā phalapradam || 2 ||
[Analyze grammar]

śrīlomaśa uvāca |
rājan kṛtaṃ kadācinna niṣphalaṃ ceha līyate |
phalaṃ bhuktvaiva sahasā līyate yogināmapi || 3 ||
[Analyze grammar]

sarveṣāṃ phalabhogo'sti karmaṇāṃ sarvasṛṣṭiṣu |
dāne kṛte na vai tatra bhogo dāturbhavediti || 4 ||
[Analyze grammar]

sarvakarmāṇi deyāni cārpaṇīyāni satpatau |
puṇyaṃ vā yadi vā pāpaṃ cārpitaṃ naiva bhujyate || || 1 ||
[Analyze grammar]

harāvarpitamevaitannairguṇyaṃ samapadyate |
arpaṇasya phalaṃ tatra hareḥ prasannatā bhavet || 6 ||
[Analyze grammar]

tayā bhaktasyā'rpayiturlabdhirhariśritātmatā |
harerdhāmni nivāsaḥ syānmokṣā''nandaḥ phalaṃ matam || 7 ||
[Analyze grammar]

prākṛtaṃ karma kṛṣṇe ced datta phalamaprākṛtam |
kṛṣṇā'narpitametadvai bhujyate ceśvarādiṣu || 8 ||
[Analyze grammar]

deveṣu mānaveṣvanyayoniṣūccāvacādiṣu |
kaluṣaṃ nīyate kleśe kartāraṃ prāptakālikam || 9 ||
[Analyze grammar]

dāridryāccāpi dāridryaṃ rogād rogaṃ bhayād bhayam |
durbhikṣādeva durbhikṣaṃ yānti vai pāpino muhuḥ || 10 ||
[Analyze grammar]

smṛddheḥ smṛddhiṃ pramodācca pramodaṃ ca divo divam |
sukhāt sukhaṃ prayāntyeva puṇyakṛto mahotsavān || 11 ||
[Analyze grammar]

adātāro hastahīnā vyālāḥ sarīsṛpādayaḥ |
jāyante tāmasā naijanāstikyaphaladehinaḥ || 12 ||
[Analyze grammar]

dātāro devatā vā ca sādhyāḥ sthānina īśvarāḥ |
priyadevā'tithiviprasādhavaḥ saṃbhavanti vai || 13 ||
[Analyze grammar]

adātāro janā loke dhānyeṣu pulakā iva |
gajabhuktakapitthā vā pūtyaṇḍā iva pakṣiṣu || 14 ||
[Analyze grammar]

yeṣāṃ dharmo na cāstikyaṃ na dānaṃ nāpyupakṛtiḥ |
udaraṃ bhariṇaste vai prāpsyanti nottaraṃ navam || 15 ||
[Analyze grammar]

bhuṃjate pāpamevā'tra svodaraṃbhariṇo janāḥ |
adattebhyo na dāsyanti cānye cānyeṣu janmasu || 16 ||
[Analyze grammar]

śvetākhyo nṛpatiḥ svarge na lebhe'nnaṃ jalaṃ tathā |
yadatra naiva dattaṃ vai dāne matvā'lpakaṃ hi tat || 17 ||
[Analyze grammar]

dattaṃ svarṇahīrakādi yānaṃ vāhanamityapi |
tatsarvaṃ tena labdhaṃ vai svarge nā'nnaṃ na vā jalam || 18 ||
[Analyze grammar]

kṣudhitaśca tataḥ svargādāgatya svaśavodbhavam |
bhasmalehaṃ vidhāyaiva tṛptyarthaṃ yatnamācarat || 19 ||
[Analyze grammar]

taṃ dṛṣṭvā nāradenāpi tadarthaṃ śrāddhamuttamam |
tatputraiḥ kāritaṃ cānnajaladānādikaṃ bahu || 20 ||
[Analyze grammar]

tatastṛptimavāpā'sau rājā śvetābhidhaḥ khalu |
tasmād rājan karmabhūmau dattaṃ sarvamavāpyate || 21 ||
[Analyze grammar]

nā'dattaṃ prāpyate kvāpi tasmād deyaṃ vidhānataḥ |
kṛtaṃ karma sitaṃ kṛṣṇaṃ dhāvantamanudhāvati || 22 ||
[Analyze grammar]

tattadevottaraṃ bhuktaṃ lagnaṃ chāyeva cātmanaḥ |
karmāvṛtaṃ savikṣepaṃ samicchantaṃ sukhāyatim || 23 ||
[Analyze grammar]

vividhaṃ bhūtasaṃghātāvṛtaṃ kālo'pakarṣati |
naisargikāni puṣpāṇi phalāni śākhinaṃ yathā || 24 ||
[Analyze grammar]

tathā kālena tiṣṭhanti kṛtakarmāṇi dehinaḥ |
tatphalaṃ ca sukhaṃ duḥkhaṃ lābhā'lābhau kṣayā'kṣayau || 25 ||
[Analyze grammar]

mānāvamāne dāridryasmṛddhī cotsavaśocane |
āmṛtyanta pravartante nivartante na tāḍitāḥ || 26 ||
[Analyze grammar]

ātmanā cārjitaṃ kaṣṭaṃ garbhaśayyādikaṃ tataḥ |
punaḥ kṛtaṃ kṛtaṃ pūrvaṃ sarvaṃ bhuṃkte kramāt kramāt || 27 ||
[Analyze grammar]

yathā vatsaḥ svakāṃ dhenusahasreṣvapi mātaram |
mārgayatyeva karmo'pi svakartāraṃ prapadyate || 28 ||
[Analyze grammar]

kṣāreṇa vastramālinyaṃ savāriṇā viśīryate |
tapasā''ntaramālinyaṃ sadharmeṇa vilīyate || 29 ||
[Analyze grammar]

jale matsyapadaṃ naiva dṛśyate ca tapasvini |
tathā karmapadaṃ naiva bhāsate jñānaśevadhau || 30 ||
[Analyze grammar]

alamaprāptakaraṇairalaṃ kaṭhinasādhanaiḥ |
guroḥ śuśrūṣaṇenaiva sarvā siddhiḥ kare sthitā || 31 ||
[Analyze grammar]

tapasendriyarodhena siddhimāpnoti yādṛśīm |
tataḥ sahasraguṇitāṃ yogenā''pnoti mānavaḥ || 32 ||
[Analyze grammar]

tataścā'yutaguṇitāṃ prāpnoti kṛpayā guroḥ |
aśvamedhasahasrādiphalaṃ yogakalānibham || 33 ||
[Analyze grammar]

yogaṃ vinā vinā jñānaṃ vinā vijñānamityapi |
guroḥ sevāṃ vinā cāpi rājan mokṣo hi durlabhaḥ || 34 ||
[Analyze grammar]

gurorjñānaṃ samāsādya saṃsevya gurumuttamam |
bhaktiṃ kṛtvā harestūrṇaṃ mokṣaṃ paramamāpnuyāt || 35 ||
[Analyze grammar]

jñānavijñānaśuddhātmā gurvāśīrvādapeṭikā |
bhūtvā brahmavatī cāpi mokṣaṃ śīghramavāpnuyāt || 36 ||
[Analyze grammar]

prathame tvāśrame śīlī gurorvai kṛpayā drutam |
mokṣamāsādayatyeva kimanyāśramayatnakaiḥ || 37 ||
[Analyze grammar]

rājasāṃstāmasān bhāvān hitvā brahmavratāśrame |
sattvamārge samāsthāya paśyedātmānamātmanā || 38 ||
[Analyze grammar]

sarvātmabhūtamātmānaṃ pareśaṃ cātmani sthitam |
vīkṣya sarvasthitaṃ taṃ ca karmabandhaṃ prahāpayet || 39 ||
[Analyze grammar]

abdhiṃ meghā vihāyaiva yathā yānti sthalīṃ prati |
muktāstathā bhuvaṃ hitvā yānti brahmasthalīṃ prati || 40 ||
[Analyze grammar]

jyotirātmani saṃyuktaṃ sarvadeheṣu rājate |
tapasā śakyate draṣṭuṃ bhaktyā ca kṛpayā'pi ca || 41 ||
[Analyze grammar]

svasmād bhayaṃ pareṣāṃ na parebhyaḥ svasya no bhayam |
dveṣarāgavihīnasya parabrahma prakāśate || 42 ||
[Analyze grammar]

pāpabhāvavihīnasya brahmabhāvayutasya ha |
ātmaniṣṭhāsthitasyaiva parabrahma prakāśate || 43 ||
[Analyze grammar]

ātmānaṃ śrīharau yuktvā tyaktvā māyāṃ tu mohinīm |
brahmahrade nimagnasya parabrahma prakāśate || 44 ||
[Analyze grammar]

bāhye tathā''ntare tvādye samavṛttimupāgataḥ |
viṣame'pi samaścāste brahma sampadyate tadā || 45 ||
[Analyze grammar]

stutiṃ nindām ayaḥ svarṇaṃ sukhaduḥkhe priyā'priye |
arthā'narthau ca śītoṣṇe jīvanaṃ maraṇaṃ tathā || 46 ||
[Analyze grammar]

naijaṃ paraṃ jaḍaṃ caityaṃ bāhyamāntaramityapi |
yadekṣeta samatvena brahma sampadyate tadā || 47 ||
[Analyze grammar]

tamovyāptaṃ gahvaraṃ ca yathā paśyet svatejasā |
tathā''tmajñānadīpena brahma śakyaṃ nirīkṣitum || 48 ||
[Analyze grammar]

nāsti jñānasamaṃ cakṣurnāsti brahmasamaṃ gṛham |
nāsti tṛṣṇāsamaṃ duḥkhaṃ nāsti toṣasamaṃ sukham || 49 ||
[Analyze grammar]

vāsanāyā vinirvṛttiḥ satataṃ brahmaśīlatā |
sādhuvṛttiḥ satāṃ sevā śreya etat pramokṣadam || 50 ||
[Analyze grammar]

saṃgī bhūtvā yadi kaścinmanyetā'haṃ sukhīti ca |
nā'yaṃ sukhīti mantavyaḥ saṃgo hi duḥkhasaṃbhṛtaḥ || 51 ||
[Analyze grammar]

saktasya buddhiścalati mohajālaṃ tanoti ca |
jālabaddhasya parito duḥkhopadā milanti vai || 52 ||
[Analyze grammar]

śreyoghātakarau cobhau kāmakrodhau hi dehinaḥ |
rāgadveṣātmakau tau ca doṣau nirayado matau || 53 ||
[Analyze grammar]

ātmānaṃ satataṃ rakṣet tābhyāṃ samāhitaḥ śubhaḥ |
tābhyāṃ hīnaḥ sadā sādhustābhyāṃ hīnā satī tadā || 54 ||
[Analyze grammar]

yayostyāge mahāṃstyāgaḥ sarvatyāgī sa jāyate |
tābhyāmasajjamāno yaḥ sa cāpnotyakṣaraṃ padam || 55 ||
[Analyze grammar]

tābhyāṃ hīno bhūtahīnaḥ saṃghātakarṣaṇojjhitaḥ |
sa vimuktaḥ paraṃśreyo na cireṇā'titiṣṭhati || 56 ||
[Analyze grammar]

akaiṃcanyaṃ susantoṣo nirāśīstvamacāpalam |
etatproktaṃ śreya eva tenā''pnuyātparaṃ padam || 57 ||
[Analyze grammar]

parigrahe bhavecchokastacchūnye śocanaṃ katham |
nirguṇaṃ nāśrayante'bhijanāḥ paurāśca rāṣṭrajāḥ || 58 ||
[Analyze grammar]

vijñāya nirguṇaṃ śāntaṃ kāntā'pi vimanāyate |
māyāpi nirguṇaṃ śāntaṃ tyaktvā saṃgaṃ vilīyate || 59 ||
[Analyze grammar]

nirāmiṣaṃ na valganti sāmiṣā rāgiṇo'mbare |
udāsīnaṃ na bhāṣante bhāṣayantyapi naiva ca || 60 ||
[Analyze grammar]

prajñātṛptaṃ jñānatṛptaṃ brahmānandapariplutam |
bhramamohasukhā lokāstyajanti ca vicittavat || 61 ||
[Analyze grammar]

anto nāsti pipāsāyāstuṣṭirvai paramaṃ sukham |
prajñāsantoṣamāsādya brahmānandapluto bhavet || 62 ||
[Analyze grammar]

adhyātmakuśalairvāsaṃ vyavahāraṃ ca yogibhiḥ |
maitrīṃ brahmavidāṃ śreṣṭhaiḥ kṛtvā brahmasukhaṃ labhet || 63 ||
[Analyze grammar]

sarvathā rājasā lokāstāmasāścārdhasāttvikāḥ |
gurvāśīrvādarahitā dṛśyante nirayārhaṇāḥ || 64 ||
[Analyze grammar]

vañcanāyāṃ kṛtavāsā hiṃsāyāṃ kṛtamānasāḥ |
anādṛtya guruṃ dharmaṃ jīyante nirayāya taiḥ || 65 ||
[Analyze grammar]

pūrṇasāttvikavargeṣu śrīḥ kaṃcidupatiṣṭhate |
yatra nārāyaṇavāsastatra siddhiḥ pramokṣaṇam || 66 ||
[Analyze grammar]

uparyupari lokasya sarvo gantuṃ samīhate |
yatate bhinnamārgeṇa na ca yāti yatheṣṭakam || 67 ||
[Analyze grammar]

tasmād rājan yogamārgaṃ harermārgaṃ parātparam |
samālambya prayātavyaṃ kṛpāpātheyayoginā || 68 ||
[Analyze grammar]

na tu yogamṛte śakyaṃ prāptuṃ brahma sanātanam |
vinā yogaṃ karmabandhaḥ kṣeptuṃ śakyo'pi naiva ca || 69 ||
[Analyze grammar]

rājan kṛṣṇe cittavāso yogaḥ paramamokṣadaḥ |
rājan kṛṣṇe cātmavāso muktiḥ sā śāśvatī matā || 70 ||
[Analyze grammar]

naro nārāyaṇaścāpi hariḥ kṛṣṇaśca dharmajāḥ |
bhrātaro'pi parabrahma dhyātvā tanmayatāṃ gataḥ || 71 ||
[Analyze grammar]

kapilaḥ ṛṣabho dattaḥ sanakādyāśca nāradaḥ |
pṛthuśca vāmanaḥ parśurāmo rāmādayastathā || 72 ||
[Analyze grammar]

śvetavyāsādayaścānye brahmaviṣṇumaheśvarāḥ |
sādhayitvā parabrahmayogaṃ tanmayatāṃ gatāḥ || 73 ||
[Analyze grammar]

nirvāṇaṃ sarvadharmāṇāṃ nivṛttiḥ paramā matā |
anādiśrīkṛṣṇanārāyaṇe'rpitā kriyā hi sā || 74 ||
[Analyze grammar]

śrīrlakṣmīḥ kamalā rādhā bhūrlīlā pārvatī satī |
ramā kṛṣṇā māṇikī ca gaṃgā durgā sarasvatī || 75 ||
[Analyze grammar]

ramā jayā ca virajā brahmapriyādikāśca yāḥ |
sādhayitvā parabrahmayogaṃ tanmayatāṃ gatāḥ || 76 ||
[Analyze grammar]

yajñaḥ pravṛttirūpo'sti pare deve samarpitaḥ |
nivṛttirūpa evā'yaṃ tvayā rājan vinirmitaḥ || 77 ||
[Analyze grammar]

tena tvaṃ sarvayajñānāṃ phalaṃ vai labdhavān param |
yadatrā''gatya bhagavānanādiśrīnarāyaṇaḥ || 78 ||
[Analyze grammar]

prātareva dadau tubhyaṃ darśanaṃ parameśvaraḥ |
devāḥ sarve harau tṛpte tṛptāstavā'dhvare nṛpa || 79 ||
[Analyze grammar]

kṛtakṛtyo bhavasyadya puruṣārthacatuṣṭaye |
svasti te'stu ca lokānāṃ sevādharmajuṣāṃ sadā || 80 ||
[Analyze grammar]

aśvapāṭala uvāca |
kathaṃ yajñeṣvagraharo bhagavān samajāyata |
kathaṃ yajñe ca bhāgārhā devatā hariṇā kṛtāḥ || 81 ||
[Analyze grammar]

śrīlomaśa upāca |
yathāvṛttaṃ hi kalpādau sṛṣṭyārambhe ca tacchṛṇu |
devatā brahmaṇā sārdhamṛṣayaśca tapodhanāḥ || 82 ||
[Analyze grammar]

tejovṛddhīcchayā jagmuḥ kṣīrodottaragaṃ taṭam |
tapaścakruścordhvadṛṣṭibāhavaścaikapatsthitāḥ || 83 ||
[Analyze grammar]

sahasravatsarānte te śuśruvuścāmbarīṃ giram |
bhobhoḥ sabrahmakā devāḥ ṛṣayaśca tapodhanāḥ || 84 ||
[Analyze grammar]

pravṛttikāryaṃ kartavyaṃ yuṣmadbalābhivardhanam |
mamārādhanatapasaḥ phalaṃ bhokṣyatha cottamam || 85 ||
[Analyze grammar]

yūyaṃ sarve yajadhvaṃ māṃ kalpayadhvaṃ mamāṃśakam |
adhvare ca bhajadhvaṃ māṃ matsevā hi balapradā || 86 ||
[Analyze grammar]

rājaṃste bhuvamāgatya kṛṣṇamaṇijanuṃ śubhām |
surāṣṭrākhyāṃ makhaṃ cakruścātra yatra tvayā kṛtaḥ || 87 ||
[Analyze grammar]

ahamāsaṃ tadā tvatra maharṣimaṇḍale nṛpa |
prathamo'tra kraturdivyo devādibhiḥ kṛtastadā || 88 ||
[Analyze grammar]

vedadṛṣṭena vidhinā vaiṣṇavaḥ sārvamedhikaḥ |
tatra satre svayaṃ brahmā harerbhāgamakalpayat || 89 ||
[Analyze grammar]

devā devarṣayaścāpi harerbhāgānakalpayan |
svasvabhāgerdadhuḥ sarve yajñāya paramātmane || 90 ||
[Analyze grammar]

te kārtayugadharmāṇo bhāgā divyāstadā'bhavan |
arpitāḥ śrīharau sarve brahmarūpāstadā'bhavan || 91 ||
[Analyze grammar]

te bhāgā muktapuruṣā astuvan parameśvaram |
ādityavarṇaṃ tamasaḥ parastāt puruṣottamam || 92 ||
[Analyze grammar]

varadānāya devebhyastataḥ sa varado hariḥ |
aśarīro'mbare sthitvā babhāṣā'śvasaro'ntikam || 93 ||
[Analyze grammar]

yena yaḥ kalpito bhāgaḥ sa sarvo māmupāgataḥ |
prasanno'haṃ varaṃ vo'tra dadāmi baladāyakam || 94 ||
[Analyze grammar]

yūyaṃ sarve svayaṃ yajñairyajamānāḥ sudakṣiṇaiḥ |
yuge yuge bhaviṣyadhvaṃ pravṛttiphalabhāginaḥ || 95 ||
[Analyze grammar]

bhavadyajñānusāreṇa ye yakṣyanti pare janāḥ |
bhavadbhāgān kalpayitvā te yāsyanti phalaṃ param || 96 ||
[Analyze grammar]

dīyamānāṃśca vo bhāgān tān yūyaṃ samavāpsyatha |
yuge yuge bhaviṣyadhvaṃ pravṛttiphalabhāginaḥ || 97 ||
[Analyze grammar]

pravṛttirnivṛttirūpā mayyarpitā bhaviṣyati |
yathā bhavadbhirye bhāgāḥ kalpitāścātra te tathā || 98 ||
[Analyze grammar]

bhāgā bhāgapradāttṝṇāṃ kalpyante tvadhvare mayā |
yūyaṃ lokān bhāvayadhvaṃ yajñabhāgaphalapradāḥ || 99 ||
[Analyze grammar]

mama bhāgaphalaṃ prāpya balaṃ yūyaṃ makhe surāḥ |
muhuścāpyāyitabalā lokān vai dhārayiṣyatha || 100 ||
[Analyze grammar]

yūyaṃ vai bhāvitā yajñaiḥ sarvayajñeṣu mānavaiḥ |
bhāvayiṣyatha māṃ caiṣā bhāvanā mama vo matā || 101 ||
[Analyze grammar]

sā vidhyarthasvarūpā vai vedavākye mayā''hitā |
yajñān kṛtvā makhe bhuktvā cintayadhvaṃ prajāhitam || 102 ||
[Analyze grammar]

vasiṣṭhādyāḥ ṛṣayaśca sanakādyā maharṣayaḥ |
brahmādyā īśvarāścāpi ādityādyāśca devatāḥ || 103 ||
[Analyze grammar]

anye'pi mānavādyāśca yajñamārge'dhikāriṇaḥ |
gacchadhvaṃ svānadhikārān vartayadhvaṃ mahāmakhān || 104 ||
[Analyze grammar]

pravartantāṃ kriyāyajñāḥ prādiśyata vidhīṃstathā |
idaṃ kṛtayugaṃ nāma kālaḥ śreṣṭhaḥ pravartate || 105 ||
[Analyze grammar]

catuṣpāt sakalo dharmaḥ pravartate'tra daivikaḥ |
ityuktvā brahmaṇe kṛṣṇo naijaṃ rūpamadarśayat || 106 ||
[Analyze grammar]

hayagrīvasvarūpaṃ vai vedānāvartayat śubham |
pariṣvajyā''ha ca brahman bhāraṃ tvayi kṣipāmyaham || 107 ||
[Analyze grammar]

asahye surakārye'haṃ jñānadaste muhurmuhuḥ |
prāvirbhāvaṃ gamiṣyāmītyuktvā cāntaradhīyata || 108 ||
[Analyze grammar]

hayagrīvamahātīrthaṃ tat sarasi vyajāyata |
tatra snānājjalapānād vedavijñānavān bhavet || 109 ||
[Analyze grammar]

brahmā jagāma svalokaṃ devā jagmurdivādikam |
evaṃ rājan hariryajñe'graharaḥ samajāyata || 110 ||
[Analyze grammar]

devabhāgān dadau cāpi pravṛttiṃ ca nivartanam |
naiṣkarmyaṃ baladaṃ kṛṣṇaḥ svayaṃ cakāra vai tadā || 111 ||
[Analyze grammar]

eṣa eva parabrahmā'nādikṛṣṇanarāyaṇaḥ |
kathitaste jagatāṃ me mokṣadaḥ kambharāsutaḥ || 112 ||
[Analyze grammar]

kriyatāṃ madvaco rājan sevyatāṃ bālakṛṣṇakaḥ |
gīyatāṃ satataṃ kṛṣṇaḥ pūjyatāṃ cāntare sthitaḥ || 113 ||
[Analyze grammar]

gamyatāṃ cākṣaraṃ dhāma bhujyatāṃ śāśvataṃ sukham |
ityupādiśya ca rādhe lomaśo virarāma ha || 114 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne lomaśagītāyāṃ yogino'pi datteṣṭaguruśuśrūṣādiphalāvāptiryajñe harerdevatānāṃ ca bhāgādyutpattirityādinirūpaṇa |
nāmā ṣaṣṭyadhikadviśatatamo'dhyāyaḥ || 260 ||
[Analyze grammar]