Chapter 240

śrīkṛṣṇa uvāca |
śṛṇu tvaṃ rādhike cānyaṃ camatkāraṃ śriyaḥpateḥ |
kuṃkumavāpikākṣetre jātaṃ yogeśvaraṃ prati || 1 ||
[Analyze grammar]

vītihotro mahoyogī vane yogeśvaro'bhavat |
himācale badaryāṃ sa tapastepe'tidāruṇam || 2 ||
[Analyze grammar]

sarvayogakalāḥ prāpa yathā śaṃbhustathā'bhavat |
tena yogapratāpena dṛṣṭā vai divyacakṣuṣā || 3 ||
[Analyze grammar]

ketumāle kṛtā yajñāḥ kenāṭe'pi kṛtā makhāḥ |
amarīṇāṃ pradeśeṣu kṛtaṃ yaddhariṇā tu tat || 4 ||
[Analyze grammar]

ūrjākṛṣṇāṣṭamījanmamahotsavaśca yaḥ kṛtaḥ |
śāradāpūjanādyaṃ ca hyannakūṭamahotsavaḥ || 5 ||
[Analyze grammar]

etatsarvaṃ divyadṛṣṭyā vijñāya parameśvaram |
kāṃbhareyaṃ bālakṛṣṇaṃ draṣṭuṃ sākṣādupāyayau || 6 ||
[Analyze grammar]

āyayau kuṃkumavāpīkṣetre kṛṣṇanārāyaṇam |
sahasrarūpadhartā'sau vītihotraḥ samādhimān || 7 ||
[Analyze grammar]

mārgaśīrṣatṛtīyāyāmaśvapaṭṭasarastaṭe |
setumāśritya ca nyagrodhasyā'dho'dhānnijāsanam || 8 ||
[Analyze grammar]

sahasrarūpadhartā'sau saṃkalpya niṣasāda ha |
mama mūlasvarūpaṃ cāgatyā''śliṣyet ramāpatiḥ || 9 ||
[Analyze grammar]

tataḥ sahasrarūpaiścā''śliṣyenmā sa prabhuḥ punaḥ |
ṛṣabhasya kārayenye sadgurordarśane yadi || 10 ||
[Analyze grammar]

tadā'haṃ śrīhareragre nivatsye'tra sadā'nugaḥ |
mokṣaṃ prasādhayiṣye'tra badaryā na prayojanam || 11 ||
[Analyze grammar]

na guroraparasyāpi mokṣado hi gururyataḥ |
yatrātmano bhavetpuṣṭiryena tarati sāgaram || 132 ||
[Analyze grammar]

yasmāccātmamahāśāntistaṃ guruṃ tvāśrayejjanaḥ |
yasmātpāpavināśaśca yasmādajñānanāśanam || 13 ||
[Analyze grammar]

yasmād vṛttinirodhaśca vāsanākṣapaṇaṃ yataḥ |
yasmādātmaprakāśaśca taṃ guruṃ tvāśrayejjanaḥ || 14 ||
[Analyze grammar]

yasmācchikṣāmavāpyetaiśvaryaṃ camatkṛtiṃ tathā |
divyayabhāvamadhitiṣṭhettaṃ guruṃ tvāśrayejjanaḥ || 15 ||
[Analyze grammar]

guravo bahavaḥ santi laukikāścāpyalaukikāḥ |
laukikena hi lokasthāḥ kāryā vai guravo yathā || 15 ||
[Analyze grammar]

alaukikena śiṣyeṇā'laukikā guravo dhṛtāḥ |
mayā'pyalaukikaḥ so'yaṃ kartavyo bhagavān guruḥ || 17 ||
[Analyze grammar]

yatra sarvaṃ hi kartavyaṃ harau parisamāpyate |
mātā gururhi janudā pitā gururhi bījadaḥ || 18 ||
[Analyze grammar]

anye rakṣākarāḥ santi dehasya guravo hi te |
bhāṣājñānakarāścānye bāndhavādyāśca yoṣitaḥ || 19 ||
[Analyze grammar]

tathā śikṣākarāścānye vidyādānakarā api |
kalākauśalyaśikṣāyā dātāro guravo'pi ca || 20 ||
[Analyze grammar]

ta ete dehayātrāyāṃ bhavanti guravaḥ khalu |
ātmajñānaprado yastu viṣṇumantrapradaśca yaḥ || 21 ||
[Analyze grammar]

dharmavṛttiprado yaśca guruḥ śreṣṭho hi sammataḥ |
brahmasthitiprado yaśca yogasiddhipradaśca yaḥ || 22 ||
[Analyze grammar]

vaiśāradyaprado buddhau guruḥ śreṣṭhataro hi saḥ |
nirmalāṃ vāsanāṃ kṛtvā parameśapradarśakaḥ || 23 ||
[Analyze grammar]

ātmanā paramātmānaṃ prāpako divyamokṣadaḥ |
brahmalokapreṣakaśca guruḥ śreṣṭhatamo hi saḥ || 24 ||
[Analyze grammar]

gakārastvandhamajñānaṃ rakāro jñānamujjvalam |
ajñānahā jñānadaśca gururgauravavānmataḥ || 25 ||
[Analyze grammar]

gamayatyakṣaraṃ dhāma ramavatyapi dhāminā |
guruḥ so'yaṃ mokṣadātā nānyaḥ śreṣṭhastato guruḥ || 26 ||
[Analyze grammar]

gururyogī brahmacārī dharmī jñānī virāgavān |
sādhuśīlo guruścāpi nārāyaṇaḥ paro guruḥ || 27 ||
[Analyze grammar]

bhuktidātā mokṣadātā sarvasvado harirguruḥ |
guroḥ sākṣātkārayitā gurorgururyato'tra saḥ || 28 ||
[Analyze grammar]

sa eva śrīhariścā'yaṃ muktānāṃ paramo guruḥ |
guruḥ sarvāvatārāṇāṃ satīnāṃ ca satāṃ guruḥ || 29 ||
[Analyze grammar]

īśvarāṇāṃ tathā dhāmnāṃ yogināṃ sargasamvidām |
pūrveṣāṃ sṛṣṭikartṝṇāṃ maharṣīṇāṃ dyuvāsinām || 30 ||
[Analyze grammar]

prajeśānāṃ karmaṭhānāṃ bhaktānāṃ ca paro guruḥ |
gurūṇāṃ yāvatāmagryo nārāyaṇagurorguruḥ || 31 ||
[Analyze grammar]

anādi śrīkṛṣṇanārāyaṇaḥ śrīkṛṣṇavallabhaḥ |
śrīkṛṣṇavallabhaḥ svāmī kāṃbhareyaḥ parātparaḥ || 32 ||
[Analyze grammar]

śrīmadgopālabālo'yaṃ svāmī vai sarvadehinām |
mayā labdhaḥ sa me pūrṇaṃ kariṣyatyeva mānasam || 33 ||
[Analyze grammar]

nivatsyāmi caraṇe'sya prāpsyāmi dhāma cākṣaram |
sañcintyeti vītihotro dhyānamagnaḥ sahasradhā || 34 ||
[Analyze grammar]

sahasrarūpavān jāto dṛṣṭvā taṃ mānavāstaṭe |
snātāro'guḥ parāścaryaṃ kasyemāni samāni vai || 35 ||
[Analyze grammar]

rūpāṇi ke cāgatā vai yogino'tra sahasraśaḥ |
samaveṣāḥ samadehāḥ samāṃgāḥ santi sadṛśāḥ || 36 ||
[Analyze grammar]

samakeśāḥ samadhyānāḥ samānaparimāṇakāḥ |
bhrātaro vā bhavantyete dhāmamuktā bhavanti vā || 37 ||
[Analyze grammar]

vadarīvāsino vā'pi śvetamuktāḥ kimāgatāḥ |
śaṃkarasya gaṇāḥ kiṃvā devāstāpasarūpiṇaḥ || 38 ||
[Analyze grammar]

sādhyā vā devatā yadvā meruvāsā hi tāpasāḥ |
ka ete tu bhaveyurvai candrāsyā bhāskaraprabhāḥ || 39 ||
[Analyze grammar]

dhyānayogā yogino vā yogeśvarāḥ sahasraśaḥ |
na vadanti na paśyanti na prāṇān cālayantyapi || 40 ||
[Analyze grammar]

sthiramaunāḥ sthiracittā īśvarāḥ syuśca kenvime |
ityeva tarkayanto vai kuṃkumavāpikājanāḥ || 41 ||
[Analyze grammar]

saṃghaśo vai samāyānti draṣṭuṃ kutūhalānvitāḥ |
kecinnamanti dṛṣṭvaiva praśaṃsanti vadanti ca || 42 ||
[Analyze grammar]

pratāpo'yaṃ bālakṛṣṇakṛpānāthasya vartate |
asya darśanalābhārthaṃ nityamāyānti yoginaḥ || 43 ||
[Analyze grammar]

adṛśyā īdṛśāḥ sarve'dhunā te dṛśyatāṃ gatāḥ |
rudrāḥ sahasraśaścāpi viṣṇavaśca sahasraśaḥ || 44 ||
[Analyze grammar]

sahasraśo'pi brahmāṇo draṣṭumāyānti sadvaram |
tathā maharṣayo nityaṃ pitaro devatāstathā || 45 ||
[Analyze grammar]

sādhyā viśve ca maruto draṣṭumāyānti nityaśaḥ |
tīrthānyapi samāyānti dikpālāḥ sṛṣṭipālakāḥ || 46 ||
[Analyze grammar]

athavā pārṣadā divyā golokādinivāsinaḥ |
samāyānti ca vaikuṇṭhapārṣadā api nityaśaḥ || 47 ||
[Analyze grammar]

grahanakṣatratārāśca sūryāścandrāḥ sahasraśaḥ |
vaimānikāḥ samāyānti lokāntarebhya ādṛtāḥ || 48 ||
[Analyze grammar]

vālakhilyāḥ samāyānti yadvā brahmasabhādvijāḥ |
kiṃ vā bhaveyurgāndharvā yakṣā vā dhanadāśca vā || 49 ||
[Analyze grammar]

cāraṇāḥ parvatavāsā munayo vā vanasthitāḥ |
paraṃ sādṛśyamevaiṣāmapūrvatvaṃ vigāhate || 50 ||
[Analyze grammar]

lalāṭe vaiṣṇavaṃ puṇḍraṃ mastake tāpasī jaṭā |
netramudrā yogapuṣṭāḥ khyāpayantyaṃśamācyutam || 51 ||
[Analyze grammar]

ye vā ke vā bhaveyuste sākṣātkṛtā yadatra te |
asmābhirdaivayogena puṇyavadbhiḥ subhāgyakaiḥ || 52 ||
[Analyze grammar]

avaśyameṣāṃ vijñānaṃ kṣaṇe'traiva bhaviṣyati |
ityevaṃ te vadantaśca prajāḥ saṃghaśa eva ha || 53 ||
[Analyze grammar]

prapaśyanti sarastīre sahasrayoginastadā |
atha śrīmadbālakṛṣṇo nārāyaṇagurorguruḥ || 54 ||
[Analyze grammar]

samāyayau sarastīre sannidhau yogināṃ tadā |
hārdaṃ jānaṃstadā tūrṇaṃ pravīkṣya mūlarūpiṇam || 55 ||
[Analyze grammar]

samuttolya samāhūya nāmnā taṃ vītihotraka |
uttiṣṭheti karo dhṛtvā kṛtvā vakṣasi yoginam || 56 ||
[Analyze grammar]

samāśliṣyaddhasaṃstūrṇaṃ svayaṃ sahasradhā'bhavat |
samutthitaiḥ sahasrasvarūpairāśliṣyadacyutaḥ || 57 ||
[Analyze grammar]

tatastūrṇaṃ hariścaikasvarūpaḥ sambabhūva ha |
vītihotro'pi sahasā tvekarūpo vyajāyata || 58 ||
[Analyze grammar]

āścaryacakitā lokā jayaśabdān pracakrire |
tāvacchrībālakṛṣṇo'pi babhūva ṛṣabho guruḥ || 59 ||
[Analyze grammar]

vṛddhaḥ śvetajaṭāyukto vivastro dhūlidhūsaraḥ |
vicitta iva conmatto jitasarvendriyo yatiḥ || 60 ||
[Analyze grammar]

svabhāvatejasā vyāpto brahmaniṣṭhāparaḥ pumān |
aprākṛta iva tvāste vimanā iva dehiṣu || 61 ||
[Analyze grammar]

vītihotro'pi ca gurumṛṣabhaṃ vīkṣya daṇḍavat |
cakāra bahudhā tatra tuṣṭāva parameśvaram || 69 ||
[Analyze grammar]

tvaṃ gurustvaṃ cāntarātmā ṛṣabhastvaṃ ca yogirāṭa |
yogeśvaro bhavāneva tvaṃ ceśastvaṃ pareśvaraḥ || 63 ||
[Analyze grammar]

tvaṃ muktastvaṃ mahāmukto mukteśvaro bhavānapi |
akṣaraṃ tvaṃ bhavān brahma parabrahma bhavānapi || 64 ||
[Analyze grammar]

bhagavān kṛṣṇa evāsi kṛṣṇanārāyaṇo'si ca |
anādiśrīkṛṣṇanārāyaṇastvaṃ parameśvaraḥ || 65 ||
[Analyze grammar]

avatārāḥ ṛṣabhādyāstavaiva śrīpate vibho |
rādhāpatistvamevā'si lakṣmīpatistvameva ca || 66 ||
[Analyze grammar]

vāsudevīpatistvaṃ ca nārāyaṇīpatistathā |
muktapatirbrahmapatirdhāmapatistvameva ca || 67 ||
[Analyze grammar]

mahākālasya hetustvaṃ mahāviṣṇośca kāraṇam |
sadāśivasya hetustvaṃ vairājasya ca kāraṇam || 68 ||
[Analyze grammar]

bhūmā tvaṃ pūruṣasaṃjñaḥ puruṣottama ityapi |
brahmaviṣṇumaheśānāṃ rudrāṇāṃ sarjako bhavān || 69 ||
[Analyze grammar]

devānāṃ lokapālānāṃ pitṝṇāṃ sarjako bhavān |
maharṣīṇāṃ yatīnāṃ ca sādhūnāṃ sarjakaḥ satām || 70 ||
[Analyze grammar]

satīnāṃ kamalādyānāṃ patiḥ pātā ca vai bhavān |
surāṇāṃ mānavānāṃ ca paśūnāṃ pakṣiṇāṃ tathā || 71 ||
[Analyze grammar]

vallīnāṃ ca drumāṇāṃ ca sarjakastvaṃ rasapradaḥ |
kāmadhenukāmavallīcintāmaṇyādisarjakaḥ || 72 ||
[Analyze grammar]

yakṣarakṣaḥpiśācānāṃ sarjakastvaṃ khacāriṇām |
vārijānāṃ vanasthānāṃ bhūgarbhāṇāṃ prasarjakaḥ || 73 ||
[Analyze grammar]

daityānāṃ dānavānāṃ ca sarjakastvaṃ janārdanaḥ |
dīnā'nāthadaridrānāṃ rakṣakaḥ poṣako bhavān || 74 ||
[Analyze grammar]

āśritānāmannadātā śaraṇyaścārtidehinām |
kāmukānāṃ kāmadātā sakāmānāṃ prapūrakaḥ || 75 ||
[Analyze grammar]

tvaṃ nārī tvaṃ naraścāsse tvaṃ garbhastvaṃ kumārakaḥ |
tvaṃ bījaṃ tvaṃ sasyarūpastvaṃ puṣpaṃ phalamityapi || 76 ||
[Analyze grammar]

tvamindrastvamindriyastvaṃ nidrā tvaṃ jāgaro bhavān |
tvaṃ suṣuptirmahānandastvaṃ prītistvaṃ ratistathā || 77 ||
[Analyze grammar]

manmathastvaṃ manojanyo manaḥsaṃstho bhavānapi |
jñānaṃ jñātā jñeyameva tvamevā'si pareśvara || 78 ||
[Analyze grammar]

tvam ṛtustvaṃ dinaṃ rātristvamudyogo virāmakaḥ |
tvaṃ viśvāsaścāśrayaśca tvaṃ mātā ca pitā guruḥ || 79 ||
[Analyze grammar]

dhanaṃ dhānyaṃ tvamevā'si śaktirbalaṃ tvameva ca |
nītirbhaktirvṛṣo rāgo vairāgyaṃ ca tvameva ha || 80 ||
[Analyze grammar]

tvaṃ prāṇastvaṃ jīvanaṃ ca naikadhā caikadhā bhavān |
prakāśastvaṃ pravṛttistvaṃ nirodhastvaṃ guṇātmakaḥ || 81 ||
[Analyze grammar]

guṇātītastvamevā'si sarvasiddhiguṇāśrayaḥ |
āścaryaṃ tvaṃ camatkārastvamaiśvaryaṃ prabhutvakam || 82 ||
[Analyze grammar]

tvaṃ bhūrjalaṃ bhavāṃstejo'nilastvaṃ tvaṃ tathā'nalaḥ |
tvaṃ khaṃ tvaṃ mātrakaṃ tvaṃ ca buddhittvaṃ caiṣaṇātrayam || 83 ||
[Analyze grammar]

tvaṃ parīkṣā titikṣā tvaṃ tvaṃ bubhukṣā mumukṣatā |
tvaṃ snehastvaṃ dhyānavṛttistvaṃ samādhiḥ parātparaḥ || 84 ||
[Analyze grammar]

upāstistvaṃ cittacaityaṃ tvaṃ jāḍyaṃ tvaṃ tathā'ṇutā |
tvaṃ sāmyaṃ tvaṃ ca vaiṣamyaṃ tvameva sarvameva ha || 85 ||
[Analyze grammar]

ahaṃ tvaṃ vītihotrastvaṃ tvaṃ guruḥ ṛṣabhastathā |
tavaivāṃ'śakalā''veśavibhūtisṛṣṭijaṃ tvidam || 86 ||
[Analyze grammar]

yat kiṃcid dṛśyate cāpi bhujyate līyate'pi ca |
yasmād yatra ca yenāpi yadarthaṃ ca tvameva saḥ || 87 ||
[Analyze grammar]

tasmai kṛṣṇāya nāthāya brahmaṇe parabrahmaṇe |
samarpayāmi cātmānaṃ vītihotrābhidhaṃ sadā || 88 ||
[Analyze grammar]

dānameva na tu nyāsaṃ nāpi kusīdakaṃ tathā |
yatheṣṭaviniyogārhaṃ samarpayāmi māṃ tvaham || 89 ||
[Analyze grammar]

iti stutvā rādhike sampapāta pādayorhareḥ |
vītihotraścā'tha kṛṣṇastamutthāpayadūrdhvakam || 90 ||
[Analyze grammar]

samāśliṣya punarhastau datvā tasya ca mūrdhani |
nyayuṃkta varalābhārthaṃ vītihotraṃ hariryadā || 91 ||
[Analyze grammar]

vītihotrastadā prāha sthāsye'tra tavapādayoḥ |
ante mokṣaṃ gamiṣyasyakṣaraṃ dhāma tava prabho || 92 ||
[Analyze grammar]

dehi vāsaṃ sadā cātra tathāstūvāca vai hariḥ |
rādhike tanmahattīrtham ṛṣabhākhyaṃ sarovare || 93 ||
[Analyze grammar]

vītihotrābhidhaṃ tīrthaṃ sahasrayogitīrthakam |
evaṃ nāmnā tadevāsīt prasiddhaṃ mokṣadaṃ śubham || 94 ||
[Analyze grammar]

harirbabhūva sahasā bālakṛṣṇasvarūpadhṛk |
prayayau ca nijāvāsaṃ vītihotrastaṭe sthitaḥ || 95 ||
[Analyze grammar]

vaṭavṛkṣaṃ samāśliṣya tāpaso janadarśanaḥ |
tatra tīrthe kṛtasnānāḥ prāpsyanti paramāṃ gatim || 96 ||
[Analyze grammar]

yogasiddhimavāpsyanti yogābhyāsaṃ vinā'pi ca |
rādhike tatra saṃsnānānnāśameṣyanti pātakam || 97 ||
[Analyze grammar]

ārdraṃ śuṣkaṃ mahatsvalpaṃ parapīḍākaraṃ ca yat |
sarvaṃ naśyati pāpaṃ tajjalapānādapi drutam || 038 ||
[Analyze grammar]

tatrā'nnadānataḥ syāttu vājimedhasamaṃ phalam |
ṛṣabhasyā''layakarturmama dhāmā'kṣaraṃ bhavet || 99 ||
[Analyze grammar]

ityeva bhagavānāha rādhike tīrthavaibhavam |
paṭhanācchravaṇāccāsya bhavettattīrthajaṃ phalam || 100 ||
[Analyze grammar]