Chapter 239

śrīkṛṣṇa uvāca |
rādhike'tha śṛṇu cānyaṃ camatkāraṃ hareḥ prabhoḥ |
kārtikaikādṛśīrātriprānte vyadhāttu yaṃ prabhuḥ || 1 ||
[Analyze grammar]

puṇḍarīko'bhavadrājā gaurjaro vaiṣṇavo mahān |
sarvadharmānvito rājyamapālayanmahītaṭe || 2 ||
[Analyze grammar]

prātaḥ pūjāṃ karotyeva viṣṇorlakṣmyāḥ suvastubhiḥ |
sādhūn vṛddhān pūjayitvā gṛhṇāti bhojanaṃ sadā || 3 ||
[Analyze grammar]

nityamatithayastasya gṛhe cāyānti yānti ca |
harernāmnāṃ bhajanaṃ ca kṛtvā tvannāni bhuṃjate || 4 ||
[Analyze grammar]

harerjayantikāhānāṃ karotyapi vratāni ca |
rājñā tena nije rājye śrāvitaḥ paṭahaḥ śubhaḥ || 5 ||
[Analyze grammar]

ekādaśyāstu yāvatyaḥ kāryā aśanavarjitāḥ |
sarvābhirvai prajābhiśca vṛddhabālāturān vinā || 6 ||
[Analyze grammar]

prajāḥ sarvāstadājñāṃ ca pālayantyeva sadvratāḥ |
vaiṣṇavyaśca prajāstasya bhajante ca vrate harim || 7 ||
[Analyze grammar]

sa rājā tīrthayātrārthaṃ tvaśvapaṭṭasaro yayau |
kārtikaikādaśī tena kṛtā kṣetre'kṣarābhidhe || 8 ||
[Analyze grammar]

kuṃkumavāpikāyāṃ sa daśamyāmabhigamya ca |
bhojayāmāsa sādhūṃśca viprāṃśca bālakṛṣṇakam || 9 ||
[Analyze grammar]

pūjayāmāsa bhaktyaiva lomaśaṃ carṣimaṇḍalam |
tīrthe'vagāhanaṃ cakre cakre devādidarśanam || 10 ||
[Analyze grammar]

vyalokayat sa nagarīṃ divyāṃ kuṃkumavāpikām |
pradakṣiṇāṃ cakārāpi sarovarasya sarvataḥ || 11 ||
[Analyze grammar]

taṭasthadevatāḥ sarvāḥ pūjayāmāsa vastubhiḥ |
rātrau tvārārtrikaṃ cakre sarovarasya bhūpatiḥ || 12 ||
[Analyze grammar]

viśrāntiṃ prāpa śālāyāṃ prātarutthāya satvaram |
kṛtāhnikaḥ kṛtasnānaḥ kṛtavipraprapūjanaḥ || 13 ||
[Analyze grammar]

kṛtatīrthavidhiḥ kṛṣṇadarśanārthaṃ yayau tadā |
pūjayāmāsa bāleśaṃ kṛṣṇanārāyaṇaṃ prabhum || 14 ||
[Analyze grammar]

dadau dānānyanantāni svarṇarūpyāmbarāṇi ca |
viprebhyaḥ pradadau tairthikebhyo rājā dhanāni ca || 16 ||
[Analyze grammar]

sādhubhyo'mbarapātrāṇi dīnebhyo'pekṣitāni vai |
godānāni dadau cāpi hyannadānānyapi nṛpaḥ || 16 ||
[Analyze grammar]

udyāpanaṃ vratasyāpi kārayāmāsa satphalam |
suvarṇaghaṭakādānādi svarṇamūrtipradānakam || 17 ||
[Analyze grammar]

dhanadhānyāmbarapātradānaṃ cakāra bhūpatiḥ |
lakṣmīnārāyaṇasaṃhitākathāśravaṇaṃ tathā || 18 ||
[Analyze grammar]

lomaśasyā''śrame gatvā cakāra divase nṛpaḥ |
ṛṣīṇāṃ sevanaṃ cakre sādhvīnāṃ sevanaṃ tathā || 19 ||
[Analyze grammar]

bhaktānāṃ vandanaṃ rājā cakre sāyaṃ prapūjanam |
ārārtrikaṃ cakārāpi rātrau jāgaraṇaṃ vyadhāt || 20 ||
[Analyze grammar]

nirjalaśca nirāhāraḥ sarvasārthasamanvitaḥ |
rātrau ca bhajanaṃ cakre tālīvādanapūrvakam || 21 ||
[Analyze grammar]

harekṛṣṇa bālakṛṣṇa parameśa pareśvara |
kāṃbhareya paramātman śrīmadgopālanandana || 22 ||
[Analyze grammar]

brahmapriyāpate lakṣmīpate rādhāpate prabho |
anādiśrīkṛṣṇanārāyaṇa svāmipate vibho || 23 ||
[Analyze grammar]

evaṃ cakāra bhajanaṃ raṭaṇaṃ kīrtanaṃ tadā |
dadhyau svahṛdaye sākṣād dṛṣṭaṃ śrīkṛṣṇavallabham || 24 ||
[Analyze grammar]

āprātarbhajanaṃ kṛtvā dhyānamagno babhūva ha |
anugāśca yayuḥ sarve snānārthaṃ ca sarovare || 25 ||
[Analyze grammar]

rājā brāhme muhūrte svahṛdaye śrīnarāyaṇam |
dhyātvā so'haṃ ca so'haṃ ca so'haṃ so'haṃ jajāpa ha || 26 ||
[Analyze grammar]

so'haṃ haṃsaśca haṃsaśca haṃsahaṃsaṃ jajāpa ca |
bhagavān śrībālakṛṣṇaḥ śrutvā jāpaṃ hṛdi sthitaḥ || 27 ||
[Analyze grammar]

prasanno'bhūd drutaṃ smṛtvā haṃsarūpaṃ purātanam |
babhūva śīghraṃ tatraiva haṃsarūpo hariḥ svayam || 28 ||
[Analyze grammar]

śuklavarṇaḥ śuklakāntiḥ śuklahaṃsasvarūpavān |
divyamānuṣavaktraśca haṃsadehaḥ śriyā yutaḥ || 29 ||
[Analyze grammar]

rūpānurūpāvayavaḥ koṭikandarpasundaraḥ |
sarvavidyāśevadhiśca tathā vedādiśevadhiḥ || 30 ||
[Analyze grammar]

śanaiḥ śanaiśca padbhyāṃ sa cāyayau nṛpasannidhau |
rājā svahṛdaye deśaṃ dadarśa sarasastaṭam || 31 ||
[Analyze grammar]

haṃsamāyāntamevāpi lakṣmīṃ dadarśa pārśvagām |
āścaryapūrṇahṛdayaḥ premapūritavigrahaḥ || 32 ||
[Analyze grammar]

utthāya bhagavantaṃ taṃ cābhiyātuṃ tvarānvitaḥ |
abhavattāvadevā'sau jāgradbhāvaṃ gato'bhavat || 33 ||
[Analyze grammar]

netre conmīlya yāvatsa rādhe paśyati sannidhau |
paśyati sma mahātejaḥpuñjaṃ dikṣu samantataḥ || 34 ||
[Analyze grammar]

tejo yogye svake netre hyajāyetāṃ kṣaṇāntare |
tatastejogarbhake sa dadarśa jagatāṃ patim || 35 ||
[Analyze grammar]

śvetavarṇaṃ haṃsarūpaṃ hasantaṃ śrīsamanvitam |
utthāya sahasā rājā papāta daṇḍavat tadā || 36 ||
[Analyze grammar]

kṛtārtho'smītyabhidhāya mukhe pādarajo nyadhāt |
luluṇṭha bhūtale'syāpi pādayoḥ sannidhau muhuḥ || 37 ||
[Analyze grammar]

netrāśrūṇi mumocā'pi harṣeṇa mahatā nṛpaḥ |
lakṣmīḥ kamaṇḍalorvāri nṛpamūrdhyanyabhisiṣeca ha || 38 ||
[Analyze grammar]

prasādaṃ prāpya rājā tajjalaṃ harṣānvitaḥ papau |
kṛtakṛtyo'bhavatprāpya darśanaṃ prajagāda ha || 39 ||
[Analyze grammar]

ahobhāgyamahobhāgyaṃ rājadehasya me nvidam |
yaddṛṣṭau paramānandaḥ pūrṇabrahma pareśvara || 40 ||
[Analyze grammar]

haṃsarūpaḥ śriyāyuktaḥ sākṣātkaruṇayā''gataḥ |
pāvito'haṃ mokṣito'haṃ samuddhṛto'smi sāgarāt || 41 ||
[Analyze grammar]

ityuktvā caraṇau dhṛtvā haṃsasya maunamāvahat |
haṃsaḥ prāha varaṃ rājan vṛṇu yatte'bhivāñcchitam || 42 ||
[Analyze grammar]

rājā prāha hare cātra mokṣaṃ dehi pade naya |
name vāñcchā'sti rājyasya lokaiṣaṇā na vidyate || 43 ||
[Analyze grammar]

anyaiṣaṇāstu sampūrṇā vartante mokṣamāvaha |
yallābho yogināṃ nāsti yugakāle gate'pi ca || 44 ||
[Analyze grammar]

sa lābho'dya mayā prāptaścaikādaśīvratena ha |
tasmād dehi kṛpāsindho mokṣaṇaṃ sarvathā'tra me || 46 ||
[Analyze grammar]

rādhike rājavākyāni svīkṛtya parameśvaraḥ |
tathā'stviti hasanprāha tāvadrājānugādayaḥ || 47 ||
[Analyze grammar]

āyuyurvīkṣya tejāṃsi taṃ hariṃ samalokayan |
kṛtakṛtyā hi te jātā vīkṣya haṃsasvarūpiṇam || 47 ||
[Analyze grammar]

tāvat tatra samāyātaṃ vimānaṃ sūryavarculam |
rājā dehaṃ vihāyaiva muktadehamavāpa ha || 48 ||
[Analyze grammar]

caturbhujo viṣṇutulyo vimānastho'bhavat kṣaṇāt |
rājñī tasyāstadā śīghraṃ vimānaṃ svakareṇa vai || 49 ||
[Analyze grammar]

saha yātuṃ dadhāraiva sparśamāptā'pi sā tadā |
tyaktvā bhautikadehaṃ svaṃ divyadehā babhūva ha || 50 ||
[Analyze grammar]

vimānaṃ śīghramevāpi tatastatrā'mbare'bhavat |
haṃsaḥ śrībālakṛṣṇo'pi viṣṇuścaturbhujo'bhavat || 51 ||
[Analyze grammar]

tadvimānena rājānaṃ ninye vaikuṇṭhameva saḥ |
bālakṛṣṇasvarūpeṇa sarastīre sthito'bhavat || 52 ||
[Analyze grammar]

tejo vilīnatāṃ yātaṃ sārtho'pyāścaryamāptavān |
dehakriyāṃ pracakruśca sārthāḥ sarve nṛpānugāḥ || 53 ||
[Analyze grammar]

tato yayurnijaṃ deśaṃ putraṃ jagadurbhūbhṛtaḥ |
vṛttāntaṃ sarvamevainaṃ punaḥ śrutvā mumoda ha || 54 ||
[Analyze grammar]

rādhike haṃsatīrthaṃ tattvaśvapaṭṭasarojale |
abhavad dakṣiṇe pūrve koṇe muktipradaṃ śubham || 55 ||
[Analyze grammar]

snānāddānādavagāhājjalapānānniṣevaṇāt |
bhuktiḥ svargaṃ ca muktiśca bhaveyurnātra saṃśayaḥ || 56 ||
[Analyze grammar]

ātmajñānaṃ bhavettatra snānātpānājjalasya ca |
yajñapuṇyaṃ bhaveccāpi haṃsatīrthe'nnadānataḥ || 57 ||
[Analyze grammar]

dvādaśyāṃ tvekasādhorhi bhojanātpuṇyamuttamam |
śatasādhubhojanasya puṇyaṃ bhavenna saṃśayaḥ || 58 ||
[Analyze grammar]

ekādaśyāṃ phaladānāt svarṇadānasamaṃ phalam |
svarṇadānād rājasūyasamaṃ cātra bhavet phalam || 59 ||
[Analyze grammar]

śṛṇu tvaṃ rādhike tvanyaṃ camatkāraṃ mahāprabhoḥ |
rolākhyaścotkalarājastīrthārthaṃ somanāthakam || 60 ||
[Analyze grammar]

samāyayau svasainyena bahumāsaiḥ śanaiḥ śanaiḥ |
somanāthaṃ mahātīrthaṃ kṛtvā prācīsarasvatīm || 61 ||
[Analyze grammar]

mūladvārikikātīrthaṃ kṛtvā ca vāmanasthalīm |
bhadrāvatīmahātīrthaṃ kṛtvā kuṃkumavāpikām || 62 ||
[Analyze grammar]

aśvapaṭṭasarastīraṃ pūrṇimāyāṃ samāyayau |
sāyamāgatya vidhinā kṛtvā tīrthaṃ jalaṃ pāpau || 63 ||
[Analyze grammar]

sainyaṃ tṛptaṃ jalapānād rātrau bhojanamāpa saḥ |
devā''rārtrikanādāṃścā'śṛṇot sādhukṛtān stavān || 64 ||
[Analyze grammar]

rātrau viśrāntimāsādya tato nidrāvaśo'bhavat |
suptaṃ sainyaṃ cotthitaṃ ca prātastaṭākaprāṅtaṭe || 65 ||
[Analyze grammar]

udyānaḥ phalapūṣpāṇāmāsīttatrāśvaśūṇḍhinaḥ |
udyādyāḥ paśavo rājñastṛṇāni carituṃ yayuḥ || 66 ||
[Analyze grammar]

udyānavṛkṣaḥ paśubhirbhakṣitā nāśitā api |
rājā sūryodaye bhūtvā vinidro'śvasaro yayau || 67 ||
[Analyze grammar]

snānaṃ dānaṃ vidhiṃ kṛtvā svaniveśamupāyayau |
tāvannityaṃ prapūjāṃ sa yasyāḥ karoti bhūpatiḥ || 68 ||
[Analyze grammar]

śrīnṛsiṃhapratimāyāḥ sā tatra'dṛśyatāṃ gatā |
rājā śuśoca manasā'parāddhaṃ tvatra vai mayā || 69 ||
[Analyze grammar]

nānyathā pratimālopo bhavedevaṃ na saṃśayaḥ |
sa tu tuṣṭāva nṛhariṃ hṛdayena vidūyatā || 70 ||
[Analyze grammar]

kathaṃ nātha kṛpāpārāvāra ruṣṭo'dya vai mayi |
na jāne tvaparāddhaṃ kiṃ mayā'tra yadgato bhavān || 71 ||
[Analyze grammar]

mariṣyāmyadanaṃ tyaktvā grahīṣye na jalaṃ phalam |
aparāddhurbhavedeva prāyaścittamidaṃ mama || 72 ||
[Analyze grammar]

evaṃ pravadite tena vyomavāṇī hyajāyata |
atra rājan phalapuṣpodyānaṃ pūrvadiśi dhruvam || 73 ||
[Analyze grammar]

kṛṣṇavallabhakṛṣṇasya vidyate paramātmanaḥ |
tannāśastvatpaśvādyairvai kriyate paśya mā ciram || 74 ||
[Analyze grammar]

nivāraya drutaṃ tāṃśca mahodyānaṃ prakāraya |
aparāddhaṃ tvayā tvetacchṛṇu cānyattvayā kṛtam || 75 ||
[Analyze grammar]

atra pūjā tvayā śrīmadbālakṛṣṇasya no kṛtā |
ahaṃ yasyā'vatāro'smi sa me'vatārakāraṇam || 76 ||
[Analyze grammar]

tamapūjya mama pūjā yadi syāt te'parādhanam |
tato'haṃ vilayaṃ prāptaḥ pūrvaṃ taṃ tvaṃ prapūjaya || 77 ||
[Analyze grammar]

tato māṃ sampūjayā'tra tena tuṣṭo bhavāmi te |
mama mūrti sthāpayā'tra tvaśvapaṭṭasarastaṭe || 78 ||
[Analyze grammar]

mandire śobhane tatra nivatsye kṛṣṇasannidhau |
udyānasya prarakṣyārthaṃ vanyarakṣārthamityapi || 79 ||
[Analyze grammar]

tato'haṃ vai tvayā sārdhamāgamiṣyāmi nā'nyathā |
ityukto rādhike rājā vyomavāṇīṃ prapūjya ca || 80 ||
[Analyze grammar]

tūrṇaṃ sainyāntikaṃ gatvā vārayāmāsa tān paśūn |
vīkṣya bhagnaṃ samudyānaṃ paraṃ śokaṃ jagāma saḥ || 81 ||
[Analyze grammar]

vṛttāntaṃ sainyapālebhyo vinivedya tato drutam |
ājñāpyodyānarakṣārthaṃ navodyānābhiklṛptaye || 82 ||
[Analyze grammar]

śīghraṃ prāsādanirmityai tathā''jñāṃ sampradāya ca |
pūjāsāmagrikāyukto bālakṛṣṇālayaṃ yayau || 83 ||
[Analyze grammar]

rolamāyāntamāvīkṣya hasan jagāda satpatiḥ |
rola rājan kadā tvasmin kṣetre prāpto bhavān vada || 84 ||
[Analyze grammar]

kaścinnirāmayaṃ te'sti tava sainyasya vai punaḥ |
kaccit sukhinaḥ paśavo mānavā yātrikāstava || 85 ||
[Analyze grammar]

bhojanaṃ madgṛhe tvadya gṛhāṇa tvaṃ nareśvara |
ityukto rolarājaḥ saḥ vimucyā'śrūṇi cāha tam || 86 ||
[Analyze grammar]

nārāyaṇa kṛpāsindho'parāddhaṃ te mayā'tra vai |
udyāno nāśitaḥ sainyapaśubhistatkṣamāṃ kuru || 87 ||
[Analyze grammar]

kārayiṣyāmi codyānaṃ kārayiṣyāmi mandiram |
nṛsiṃhasya tava mūrteḥ sthāpanaṃ sarvadā tviha || 88 ||
[Analyze grammar]

kṣetrodyānasya rakṣārthaṃ yāsyāmi ca svarāṣṭrakam |
tava pūjāṃ vinā kṛṣṇa nṛsiṃho me layaṃ gataḥ || 89 ||
[Analyze grammar]

tamimaṃ me'parāddhaṃ prakṣamasva puruṣottama |
ityuktvā rādhike śrīmadbālakṛṣṇaṃ samārcayat || 90 ||
[Analyze grammar]

rājaveṣāmbarabhūṣāgandhamālā'kṣatādibhiḥ |
daṇḍavat pracakārā'tha naivedyaṃ piṇḍakān dadau || 91 ||
[Analyze grammar]

tāmbūlakaṃ dadau cāpi prasādaṃ jagṛhe hareḥ |
kṣamitaṃ ceti hariṇā prokto nijālayaṃ yayau || 92 ||
[Analyze grammar]

tāvannṛsiṃhabhagavān mūrtirūpo nijāsane |
prakaṭībhūya nṛpateḥ pūjāṃ jagrāha bhāvataḥ || 93 ||
[Analyze grammar]

rājā'pi kārayāmāsa mandiraṃ sudṛḍhaṃ navam |
nṛsiṃhaṃ sthāpayāmāsa mandire vṛttikāṃ dadau || 94 ||
[Analyze grammar]

udyānaṃ ropayitvā ca niyujya rakṣakaṃ tataḥ |
yayau cotkaladeśaṃ sa rādhike kṛṣṇabhaktimān || 95 ||
[Analyze grammar]

evaṃ nṛsiṃhatīrthaṃ tat sarovarajale'bhavat |
rolatīrthaṃ suramyaṃ tanmandiraṃ nṛharestathā || 96 ||
[Analyze grammar]

sarvaṃ tīrthamayaṃ cā'bhūd bālakṛṣṇapratāpataḥ |
tatra snānaprakartāro bhuktiṃ muktiṃ śubhāṃ gatim || 97 ||
[Analyze grammar]

yāsyantyeva hi dātāro phalānāṃ śākhiropiṇaḥ |
puṣpastabakaropāśca mahodyānavidhāyinaḥ || 98 ||
[Analyze grammar]

prayāsyanti hi te sarve brahmadhāmā'kṣaraṃ ghruvam |
vṛkṣamūle jalasekaprakartāro'pi mānavāḥ || 99 ||
[Analyze grammar]

svargaṃ prāpya ciraṃ bhuktvā yāsyanti tvakṣaraṃ mama |
paṭhanācchravaṇāccāsyodyānaropaphalaṃ bhavet || 100 ||
[Analyze grammar]

aśvapaṭṭasaraḥkṣetre yatra kvāpi kṣitau taṭe |
vṛkṣavallīropiṇo ye te yāsyanti parāṃ gatim || 101 ||
[Analyze grammar]

avaṃśā vaṃśamāpsyanti nirdhanā dhaninastathā |
arasā rasapūrṇāśca bhaviṣyanti drupālanāt || 102 ||
[Analyze grammar]

dhanadhānyasamṛddhāśca phalamiṣṭānnabhojinaḥ |
bhaviṣyanti vṛkṣaropādaśvapaṭṭasarontike || 103 ||
[Analyze grammar]

rādhike vṛkṣapātāro bhavantyete mama priyāḥ |
vaneṣu vallavīvrāte phale puṣpe vasāmyaham || 104 ||
[Analyze grammar]

vṛkṣarakṣakalokānāṃ gṛhe lakṣmīsamanvitaḥ |
vasāmyahaṃ na sandehastannāśe'pasarāmi hi || 105 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne kārtikaikādaśīvratena puṇḍarīkanṛpaterhaṃsarūpahariṃ prāptasya mokṣaḥ aśvapaṭṭasarasi haṃsatīrtham colarājñā'pi nṛsiṃhayogenā'śvapaṭṭasarastīre nṛsiṃhasthāpanaṃ nṛsiṃhatīrthaṃ cetyādinirūpaṇanāmā navatriṃśadadhikadviśatatamo'dhyāyaḥ || 239 ||
[Analyze grammar]