Chapter 132

śrīkṛṣṇa uvāca |
śṛṇu tvaṃ rādhike nārāyaṇanārāyaṇaprabhuḥ |
vimānenā'mbare'paśyat kālimāśanṛpakṣitim || 1 ||
[Analyze grammar]

kālimāsāgarayoge'paśyad viśālamaṇḍapam |
pañcāśadyojanāyāmaṃ yāvadyānānadīṃ śubham || 2 ||
[Analyze grammar]

vimānena bhuvo bhāge tathā dikṣu vidikṣu ca |
sarvatrā'bhūt prakāśo vai sūryakoṭisamaprabhaḥ || 3 ||
[Analyze grammar]

tadā tūryāṇyavādyanta jayaśabdāstathā'bhavan |
manuṣyāṇāṃ ca devānāmīśvarāṇāṃ ca dehinām || 4 ||
[Analyze grammar]

darśakāścāpyatha śīghraṃ dadruvustāṃ sthalīṃ śubhām |
vimānasyā'varohārhāṃ salājā'kṣatapuṣpiṇaḥ || 9 ||
[Analyze grammar]

samudrasya taṭe kṛṣṇo'vātārayadvimānakam |
avātatāra sa tasmātsvayaṃ tato nṛpādayaḥ || 6 ||
[Analyze grammar]

brahmapriyāstataḥ sarvā avaterurvimānataḥ |
pūjitā hāradānādyairlājākṣatairvivardhitāḥ || 7 ||
[Analyze grammar]

jayaśabdaiḥ satkṛtāśca namanaiḥ svāgatīkṛtāḥ |
dṛṣṭāḥ prajājanaiḥ sarve śrīkṛṣṇasahajāstadā || 8 ||
[Analyze grammar]

niṣāditāścāsaneṣu madhuparkaiśca bhāvitāḥ |
toṣitā jalapānādyairmiṣṭānnairbhojitāstathā || 9 ||
[Analyze grammar]

viśrāmitāstathā rātrau saṃvāhitāḥ sukhaṃ yathā |
nidrāpitāśca prāsādeṣvamūlyaśayanādiṣu || 10 ||
[Analyze grammar]

kālimāśena ca rājñā sakuṭumbena vai tadā |
sevito vanditaḥ kṛṣṇaḥ sakuṭumbo yathocitam || 11 ||
[Analyze grammar]

prātarjātaṃ prabubodha harirvādyādigītibhiḥ |
bandīkṛtāṃ stutiṃ śṛṇvan dantadhāvanamācarat || 12 ||
[Analyze grammar]

sugandhasalilādyaiśca sasnau nārāyaṇeśvaraḥ |
bhūṣāḥ sandhārayāmāsā'mbarayogamupāgataḥ || 13 ||
[Analyze grammar]

rājādyāḥ śrīhareḥ pūjāṃ cakrurvairājavaibhavaiḥ |
brahmapriyāstathā pūjāṃ cakrurvai pārameśvarīm || 14 ||
[Analyze grammar]

pañcamyāṃ tu śubhe kāle yayau sa yajñamaṇḍapam |
dadarśa yogyaṃ sarvaṃ cā'kārayallomaśena saḥ || 15 ||
[Analyze grammar]

tathā patnīvratenā'pi prāraṃbhaṃ ca kratostadā |
saṃkalpaṃ kārayāmāsa kālimāśaṃ nṛpaṃ kratau || 16 ||
[Analyze grammar]

prakoṣṭhau bandhayāmāsa svastivācanapūrvakam |
japahomapragītyādimantrārthaṃ brāhmaṇānṛṣīn || 17 ||
[Analyze grammar]

varayāmāsa devāṃśceśvarānīśān divigṛhān |
munīn sādhūn satīḥ sādhvīrdevīrdivyāśca kanyakāḥ || 18 ||
[Analyze grammar]

tīrthatattvāni ditijān kāśyapīrvai prajāstathā |
varayāmāsa yogyāṃśca pratyakṣadehidevatāḥ || 19 ||
[Analyze grammar]

mukhyadevasthale śrīmatkṛṣṇanārāyaṇo'bhavat |
sabrahmaviṣṇurudrādyāḥ pratyakṣāḥ sthānadharmiṇaḥ || 20 ||
[Analyze grammar]

svasvasthāne'bhavaṃstatra dikpālā mātarastathā |
gṛhapālāḥ kṣetrapālā grahāścā'nye ca tāmasāḥ || 21 ||
[Analyze grammar]

te'pi tatrā'bhavan yogyasthale sthitā hi gocarāḥ |
vasavaśca tathā''dityā aśvinau sādhyasiddhijāḥ || 22 ||
[Analyze grammar]

viprāśca vaidikā ārṣāḥ surāśca pitarastathā |
ṛṣayaśceśvarāścāpi īśvarāṇyastathā gaṇāḥ || 23 ||
[Analyze grammar]

gaṇeśaḥ pārṣadāścāpi siddhayo muktakoṭayaḥ |
avatārāstathā sarve'vatārāṇāṃ ca yoṣitaḥ || 24 ||
[Analyze grammar]

yajñe pratyakṣarūpāste svasvasthāne virejire |
vedāścatvāra evāpi mūrtimanto'bhavaṃstadā || 25 ||
[Analyze grammar]

ṛcaśca gocarībhūtā mantrā mūrtimayāstathā |
vahnayaśca tathā mūrtā havyakavyādimūrtayaḥ || 26 ||
[Analyze grammar]

sarve'pi gocarāstatra yajñe vai vaiṣṇave pare |
upasthitāḥ samabhavan kriyāḥ kramāḥ samūrtayaḥ || 27 ||
[Analyze grammar]

vidhayo viniyogāśca pātrottamāḥ samūrtayaḥ |
sruksruvādyā mūrtimanto darbhādyā vrīhayo yavāḥ || 28 ||
[Analyze grammar]

godhūmāśca nivārāśca rasāḥ śārkaramākṣikāḥ |
samūrtāḥ sarva evaite'bhavannupasthitāstadā || 29 ||
[Analyze grammar]

samidho maṇḍalānyatra sthāpanāni ca vedikāḥ |
kuṇḍāḥ pālyaśca kāṇḍādyāḥ samūrtā hyabhavaṃstadā || 30 ||
[Analyze grammar]

yatra sākṣāddhariścāste sarvaśarīrasaṃyutaḥ |
tatra kā nyūnatā rādhe bhojyabhogyakriyādiṣu || 31 ||
[Analyze grammar]

athā'rcane gaṇeśasya jāte rudrādipūjane |
mātṛkāpūjanādau ca nivṛtte śrīhariḥ svayam || 32 ||
[Analyze grammar]

rājahastena kuṇḍe vai vahnyādhānaṃ vidhānataḥ |
kārayāmāsa ca tadā vedā nādān pracakrire || 33 ||
[Analyze grammar]

sākṣādagnistataḥ kuṇḍe jvālāmadhye vyarājata |
havyadānaṃ samantraṃ ca vahnau prāvartatā'rthitam || 34 ||
[Analyze grammar]

devarṣipitṛkāryādau nirvṛtte bhojanādikam |
miṣṭānnajalatāmbūlaprabhṛtyapi vyavartata || 35 ||
[Analyze grammar]

rātrau kathādikaṃ yatra jāyate sāttvataiḥ kṛtam |
punarnityavidhiścā'tha havanādi pravartate || 36 ||
[Analyze grammar]

evaṃ saptāhako yajño vyavartata mahotsavaḥ |
pauṣaśuklaikādaśikādine pūrṇo'bhavaddhi saḥ || 37 ||
[Analyze grammar]

madhyāhne dakṣiṇā datvā'ntimo homo'bhavattathā |
śrīphalānāmasaṃkhyaiśca vahniścānte'pyatṛpyata || 38 ||
[Analyze grammar]

tato vai śrīharirmuktān bhojayāmāsa sarvaśaḥ |
brahmapriyāścāvatārānavatārapriyāstathā || 39 ||
[Analyze grammar]

dhāmadhāmanivāsāṃśca pārṣadān dāsadāsikāḥ |
īśvarānīśvarāṇīśca nārāyaṇān narāyaṇīḥ || 40 ||
[Analyze grammar]

tattvāni mūlamāyāṃ ca brahmādīn vyūhamūrtikāḥ |
pitṝn devān siddhasādhyān munīn yatīn prayoginaḥ || 41 ||
[Analyze grammar]

sādhūn sādhvīḥ sāṃkhyayogā''śritāśca divyadevikāḥ |
mānavān dikprapālāṃśca grahanakṣatratārakāḥ || 42 ||
[Analyze grammar]

viprān dehasthitān varṇān tathā''śramanivāsinaḥ |
vṛkṣavallī stṛṇastambān nadīrnadān sarāṃsi ca || 43 ||
[Analyze grammar]

akhātakhātasāmudrān dvīpān gahvaraparvatān |
talādilokavāsāṃśca jalasthalā'nilasthitān || 44 ||
[Analyze grammar]

vivarasthān bhūgarbhasthān mahīmānān samāgatān |
ā3 kīṭapataṃgādyān bhojayāmāsa keśavaḥ || 45 ||
[Analyze grammar]

nāsti kaścidanaśano jaḍā vā sthāvarā api |
cetanā jaḍatulyā vā budhā vā balino'pi vā || 46 ||
[Analyze grammar]

sāttvikā rājasā vāpi tāmasā api dehinaḥ |
svasya putrāsta eveti bhojitā hariṇā tadā || 47 ||
[Analyze grammar]

pāyitā jalapānādyairdakṣiṇābhiśca toṣitāḥ |
tato viśrāntimācakruḥ sarve śrīharisaṃyutāḥ || 48 ||
[Analyze grammar]

avabhṛthaṃ tataḥ kartuṃ yayau śrībhagavān hariḥ |
kālimā'bdhijalayoge vādyaghoṣapuraḥsaraḥ || 49 ||
[Analyze grammar]

gītikābhiḥ sarvadevyo yayuścāvabhṛthāya vai |
kālimājalamāviśya tathā'nye yānikājale || 50 ||
[Analyze grammar]

samudrasya jale cānye kūpavāpīsarassu ca |
sasnuḥ prāghūṇikāstatra yajñāntāvabhṛthe tadā || 51 ||
[Analyze grammar]

anādiśrīkṛṣṇanārāyaṇaṃ smṛtvā pareśvaram |
kāntaṃ śāntipradaṃ bhāntaṃ hṛdayeṣu nirantaram || 52 ||
[Analyze grammar]

mokṣadaṃ muktidaṃ nāthaṃ nārāyaṇeśvareśvaram |
brahmadhāmeśvaraṃ śrīmadbālakṛṣṇaṃ hariṃ prabhum || 53 ||
[Analyze grammar]

rājā tatra ca dānāni dadau kośoṣṭravājinām |
gajahaṃsagaruḍānāṃ vimānayānayāninām || 54 ||
[Analyze grammar]

svarṇarūpyakamāṇikyahīrakamauktikāni ca |
gṛhāṇyupaskarāṇyudyānānyaraṇyāni vāṭikāḥ || 55 ||
[Analyze grammar]

kṣetrāṇi cāpi pātrāṇi dadāvannāni sarvaśaḥ |
mahādānāni sarvāṇi dadau kālimakeśvaraḥ || 56 ||
[Analyze grammar]

evaṃ cā'vabhṛthaṃ kṛtvā tvāyayurnijamandire |
sāyaṃ pradadau bhojyāni pānāni vividhānyapi || 57 ||
[Analyze grammar]

bālakṛṣṇodito rājā kālimeśaḥ sukhānvitaḥ |
rātrau lakṣmīrmahālakṣmīḥ kanyārūpā hareḥ kathām || 58 ||
[Analyze grammar]

lakṣmīnārāyaṇasaṃhitāyā vyāsāsanasthitā |
bālakṛṣṇājñayā ramyāṃ vācayāmāsa saṃsadi || 59 ||
[Analyze grammar]

tatrā''gatāḥ samudrasya patnyo nadyaśca devikāḥ |
pupūjustāṃ mahālakṣmīṃ tataḥ śrīkambharāsatīm || 60 ||
[Analyze grammar]

ratnādyairvividhairvastubhiśca hārairmanoharaiḥ |
vastrabhūṣābhirevāpi śubhaṃ divyābhirarcanam || 61 ||
[Analyze grammar]

cakrurārārtrikaṃ cāpi vanadevyo'pi vai tadā |
yajñapatnyaḥ samagrāśca devapatnyastathā tadā || 62 ||
[Analyze grammar]

pitṛpatnyaḥ siddhapatnya īśapatnyastathā śriyaḥ |
pūjāṃ cakrurbrahmapatnyo dhāmapatnyastathā tadā || 63 ||
[Analyze grammar]

harermātuḥ kambharāyā lakṣmyāḥ pūjāṃ vyadhurmudā |
sarvasṛṣṭinivāsinyo devyaḥ pūjāṃ vyadhuḥ śubhām || 64 ||
[Analyze grammar]

parihāraṃ kathāyāśca pūjāyāścāpi nāmabhiḥ |
śrīpatiṃ śrīgopaputraṃ sarvāvatārakāraṇam || 65 ||
[Analyze grammar]

kaṃbharābālakaṃ kṛṣṇaṃ nārāyaṇaṃ ramāpatim |
sarvakāmapatiṃ rādhāpatiṃ śrīmāṇikīpatim || 66 ||
[Analyze grammar]

brahmavidyāramānāthaṃ lakṣmīpatiṃ satāṃ patim |
bālakṛṣṇaṃ brahmapriyāpatiṃ kāntaṃ bhajāmahe || 67 ||
[Analyze grammar]

ityevaṃ kīrtanaṃ ramyaṃ cakruḥ sarvesabhāsadaḥ |
atha viśrāntilābhārthaṃ prasādagrahaṇottaram || 68 ||
[Analyze grammar]

ārārtrikaṃ kathayāśca cakrurnijālayān yayuḥ |
nidrāṃ vai jagṛhuḥ sarve yathā jāgaraṇaśritām || 69 ||
[Analyze grammar]

dvādaśyāṃ naityakaṃ kṛtvā rājā pūjārthamāyayau |
bālakṛṣṇaṃ nijātmānaṃ pūjayāmāsa bhāvataḥ || 70 ||
[Analyze grammar]

aṣṭottaraśatadravyaiḥ rājñyaścāpi samarcayan |
viṃśatisaṃkhyakarājñyaścārārtrika mahad vyadhuḥ || 71 ||
[Analyze grammar]

tadā ca kanyakāstāsāṃ śate dve mumuhurharau |
divyarūpe koṭikoṭikandarpasundare prabhau || 72 ||
[Analyze grammar]

varayāmāsurevaitā varamālā dadurgale |
rājñyaḥ sarvāśca tāstatrārpayāmāsuśca kanyakāḥ || 73 ||
[Analyze grammar]

anādiśrīkṛṣṇanārāyaṇāya paramātmane |
jagrāha śrīharistāśca rājā'pi yautakaṃ dadau || 74 ||
[Analyze grammar]

vimānaṃ yojanāyāmaṃ caturdantāṃśca hastinaḥ |
garuḍān pradadau vāhān sapakṣān vyomacāriṇaḥ || 75 ||
[Analyze grammar]

naisargadīpamaṇikān dāsān dāsīstadā dadau |
dve śate dve śate cāpi jagrāha kaṃbharāsutaḥ || 76 ||
[Analyze grammar]

kanyakāḥ parameśaṃ taṃ patiṃ prāpya manoharam |
sarvā mumudire'tyarthaṃ prāptavyaṃ nāvaśiṣyate || 77 ||
[Analyze grammar]

evaṃ yajñottaraṃ kṛṣṇo dvādaśyāṃ pūjanottaram |
dadau rājñe svacaraṇau hṛdaye mastake karau || 78 ||
[Analyze grammar]

rājñyai cāpi dadau hāraṃ pauṣpaṃ prāsādikaṃ hariḥ |
rājñībhyaścāpi sarvābhyo dadau hārān sahīrakān || 79 ||
[Analyze grammar]

iyeṣa darśanaṃ dātuṃ naijaṃ pareśabodhakam |
drāgeva sahasā tejomaṇḍalaṃ prāvirāsa ha || 80 ||
[Analyze grammar]

śrīharerabhitastejaḥ pravāhāḥ nissaranti hi |
vyāpnuvanti tadā''kāśe koṭyarbudaraviprakhāḥ || 81 ||
[Analyze grammar]

tadā cakṣūṃṣi sarveṣāṃ sarvāsāṃ militāni vai |
dadau divyāṃ harirdṛṣṭiṃ tejaḥsahāṃ sudarśanām || 82 ||
[Analyze grammar]

atha rājakuṭumbaṃ tat tathā prajājanā api |
dadṛśuḥ śrīparameśaṃ parākṣaraparaṃ vibhum || 83 ||
[Analyze grammar]

dhāmadhāmādhimuktaiśca sevitaṃ brāhmikādibhiḥ |
avatārairīśvaraiśca suraiḥ siddhaiśca mānavaiḥ || 84 ||
[Analyze grammar]

rūparūpānuvayavaṃ kiśoraṃ śyāmasundaram |
kāmagarvaharaṃ kāntaṃ rādhālakṣmīprasevitam || 85 ||
[Analyze grammar]

dvibhujaṃ sundaraṃ kṛṣṇaṃ bālakṛṣṇaṃ manoharam |
prapūraṃ yovanabharaṃ sarvaśaktisamanvitam || 86 ||
[Analyze grammar]

mayūrapicchamukuṭaṃ svarṇakuṇḍalarājitam |
sakaustubhahārarājatpronnatavakṣasaṃ vibhum || 87 ||
[Analyze grammar]

svarṇabhūṣānvitaṃ vaṃśīdharaṃ vakrasthiraṃ manāk |
tataścaturbhujaṃ śaṃkhacakragadābjaśobhitam || 88 ||
[Analyze grammar]

dṛṣṭvā tato dvibhujaṃ ca nijakanyādisevitam |
svarājyasthaṃ saudhabhājaṃ sānnidhye saṃvirājitam || 89 ||
[Analyze grammar]

evaṃ dṛṣṭvā drutaṃ sarve samādhiṃ pravihāya tāḥ |
dadṛśuḥ śrīhariṃ cāgre tadāścaryaparāmuhuḥ || 90 ||
[Analyze grammar]

ātmanāṃ menire rājñyo rājā prajāḥ kṛtātmatām |
athā'nye darśanārthaṃ vai samāgacchanti bhūbhṛtaḥ || 91 ||
[Analyze grammar]

pañcarājyāni śāsanto rājñīyutā hariṃ prabhum |
arcayāmāsuratyarthaṃ tato maharṣayo'pi ca || 92 ||
[Analyze grammar]

sādhavaśca surā martyā daityā bhakteśvarā api |
sarvalokanivāsāścāgatya pupūjuracyutam || 93 ||
[Analyze grammar]

rāśiyānapradeśānāṃ śibirājyasya cāpi yāḥ |
anyadvīpaprajāścāpi pupūjurīśvareśvaram || 94 ||
[Analyze grammar]

kāmacāṭakadeśīyā ālāyutāyanāḥ prajāḥ |
pūrvabhūdeśīyalokāḥ pupūjuḥ parameśvaram || 95 ||
[Analyze grammar]

riṅgajalaprajāścāpi pakṣavātaprajājanāḥ |
māloṣṭhadvīpavāsāśca sphuṭākṣadvīpavāsinaḥ || 96 ||
[Analyze grammar]

thurāyasadvīpavāsāḥ kūṭalānanivāsinaḥ |
svairanārīdvīpavāsā kṣemīyānanivāsinaḥ || 97 ||
[Analyze grammar]

evamanyāḥ prajāścāpi pupūjuḥ parameśvaram |
sādhurlālāsanaḥ kaścid rādhe pūrvābdhimadhyagaḥ || 98 ||
[Analyze grammar]

dvīpastho vyomamārgeṇa kṛṣṇaṃ draṣṭuṃ samāyayau |
pādayoḥ patitaścāpi yayāce bhojanaṃ haraiḥ || 99 ||
[Analyze grammar]

haristasmai dadau śreṣṭhaṃ pāyasaṃ pūrikādikam |
bubhuje sādhuvaryo'sau tāvad dundubhayo divi || 100 ||
[Analyze grammar]

vineduḥ śaṃkhaninadāścā'bhavan vai nisargataḥ |
jalaṃ pītvā samudgāraṃ mumoca tṛptisūcakam || 101 ||
[Analyze grammar]

tāvat tūryāṇi sarvāṇi tvavādyanta nisargataḥ |
apreryamāṇānyaniśaṃ camatkāro'yamadbhutaḥ || 102 ||
[Analyze grammar]

dṛṣṭo lokaistadā rājā kālimeśa uvāca ha |
bālakṛṣṇa haresvāmin kṛṣṇanārāyaṇaprabho || 103 ||
[Analyze grammar]

kimidaṃ jāyate śīghraṃ vāditrāṇi nivāraya |
bhayaṃ me jāyate kṛṣṇa śrutvā''kasmikagarjanāḥ || 104 ||
[Analyze grammar]

hariḥ prāha bhayaṃ nāsti sādhurme bhaktarāḍayam |
kalpāntarāt tapaḥ kurvan lālāsane'bdhimadhyake || 105 ||
[Analyze grammar]

yogāsane sadī cāste jñātvā māmatra cāgataḥ |
tadbhukte pūrṇatāṃ yātā yajñaḥ pañca mayā kṛtāḥ || 106 ||
[Analyze grammar]

ekasmin sāttvate tṛpte trailokyaṃ tṛptameva hi |
yajñāntasūcakaḥ so'yaṃ saccidānandamūrtikaḥ || 107 ||
[Analyze grammar]

mukto me vartate harṣāyante tūryāṇi tena vai |
ityuktvā sa hariścakre vāditranādarodhanam || 108 ||
[Analyze grammar]

sādhurbhuktvā ca digvāsā yayau dvīpaṃ lalāsanam |
paṭhanācchravaṇāccāsya bhuktirmuktirbhaved dhruvam || 109 ||
[Analyze grammar]

kṛṣṇaikāntamanaskānāṃ sanmānantu jaḍā api |
kurvanti sarvatattvāni yathā vādyāni sañjaguḥ || 110 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne kālimeśanṛparājye kālimābdhisaṃgame pañcamaviṣṇuyāgaḥ avabhṛthaṃ bhojanaṃ kathānakaṃ pūjanaṃ śatadvayakanyādānaṃ divyadarśanaṃ naikadvīpīyaprajākṛtapūjanaṃ sādhulālāsanabhojanaṃ nisargaśaṃkhādininādāścetyādivarṇananāmā dvātriṃśadadhikaśatatamo'dhyāyaḥ || 132 ||
[Analyze grammar]