Chapter 116

śrīkṛṣṇa uvāca |
śṛṇu tvaṃ rādhike'nādikṛṣṇanārāyaṇasya vai |
janmamāsaḥ kārtiko vai kṛṣṇapakṣātmakaḥ śubhaḥ || 1 ||
[Analyze grammar]

aṣṭamīdivyadivasastrayodaśaḥ samāgataḥ |
tadutsavaṃ vidhātuṃ prāgjyotiṣāṃ vaiṣṇavā janāḥ || 2 ||
[Analyze grammar]

prācīnadeśabhaktāśca śyāmabrahmapradeśajāḥ |
trivittadeśajāścāpi kāśmerā''sāmavāsinaḥ || 3 ||
[Analyze grammar]

tathā'nye himadeśasthāḥ śaṃbhudeśasamudbhavāḥ |
narā nāryo bālakāśca bālikā vṛddhasevinaḥ || 4 ||
[Analyze grammar]

vimānairāyayustvaśvapaṭṭatīrthaṃ maharṣayaḥ |
sādhavaśca tathā satyaḥ pragṛhya vividhopadāḥ || 5 ||
[Analyze grammar]

āyayurbālakṛṣṇasya pūjārthaṃ vai samutsukāḥ |
uṣṭrālayapradeśācca tathā'briktapradeśajāḥ || 6 ||
[Analyze grammar]

ārabījapradeśācca kumārīkṣetrajāstathā |
anye vai cājanābhīyāḥ kacchadeśodbhavāstathā || 7 ||
[Analyze grammar]

āyayuḥ kṛṣṇapūjārthaṃ cotsukāḥ sopadādayaḥ |
prātarvai maṇḍapaṃ ramyaṃ cakre gopālakṛṣṇakaḥ || 8 ||
[Analyze grammar]

gajāsane bālakṛṣṇaḥ snātvā dhṛtvā'mbarāṇi ca |
śṛṃgārābhūṣaṇādīni dhṛtvā sadasi cāyayau || 9 ||
[Analyze grammar]

tatra devāḥ pitaraśca munayo'kṣaramuktigāḥ |
anyadhāmanivāsāśceśvarā devāśca mānavāḥ || 10 ||
[Analyze grammar]

āyayuḥ śrīharestasya pūjārthaṃ tasya saṃsadi |
avādyanta suvādyāni jayaśabdāstathā'bhavan || 11 ||
[Analyze grammar]

vireje śrībālakṛṣṇo vardhitaśca nijāsane |
samāje lomaśo vipraḥ pūjayāmāsa cācyutam || 12 ||
[Analyze grammar]

mukuṭaṃ dhārayāmāsa pradadau kuṇḍale tataḥ |
tilakaṃ sākṣatacandraṃ cakre bhāle harestataḥ || 13 ||
[Analyze grammar]

ārārtrikaṃ cakārā'sya puṣpahārān dadau gale |
āśīrvādān dadau paścāt pūjayāmāsurīśvarāḥ || 14 ||
[Analyze grammar]

rādhike ca tato lakṣmyo brahmapriyāstato'pi ca |
devyo gāndharvya āryāśca ṛṣipatnyastataḥ param || 15 ||
[Analyze grammar]

devā devyastathā vai prāgjyotiṣāṃ vaiṣṇavīprajā |
deśāntarāgatāścāpi mahīmānāśca taṃ prabhum || 16 ||
[Analyze grammar]

pūjayāmāsuratyarthaṃ divyaiḥ sarvopacārakaiḥ |
ārārtrikaṃ ca te cakrurdaduścāgre mahopadāḥ || 17 ||
[Analyze grammar]

vividhānyambarāṇyābhūṣaṇāni mauktikāni ca |
hārān suvarṇarūpyotthān hīrakān raśanāyutān || 18 ||
[Analyze grammar]

yānāni vāraṇāṃścāśvān alaṃkārāṃstathottamān |
dadurbhojyāni pānāni phalāni cāmṛtāni ca || 19 ||
[Analyze grammar]

evaṃ sampūjya te sarve bālakṛṣṇaṃ sumaṇḍape |
mātaraṃ śrīṃ ca gopālaṃ pitaraṃ śrīharistadā || 20 ||
[Analyze grammar]

natvā śrīlomaśaṃ carṣīn janarītyā gajāsanāt |
utthāya ca sabhāsaṃsthān vṛddhān praṇamya vai tataḥ || 21 ||
[Analyze grammar]

yayau nijālayaṃ pitṛsammataḥ puruṣottamaḥ |
mahīmānān bhojayitvā śrīmadgopālakṛṣṇakaḥ || 22 ||
[Analyze grammar]

visarjayāmāsa lokān svasvān satīśca vai tataḥ |
pūjayāmāsa lakṣmīśrīkambharā bhāvatastadā || 23 ||
[Analyze grammar]

bhojayitvā ca tā visarjayāmāsa nijālayān |
evaṃ trayodaśasaṃkhyaḥ śrīharerjananotsavaḥ || 24 ||
[Analyze grammar]

susampanno mahīmānā yayurnaijān pradeśakān |
dvitīye'hnyabhavattatrāścaryaṃ saṃśṛṇu rādhike || 25 ||
[Analyze grammar]

dattātreyeṇa guruṇā bhagavatā parātmanā |
preṣitaḥ śarabhaḥ kaścit kṛṣṇanārāyaṇāntikam || 26 ||
[Analyze grammar]

āyayau tatra mokṣārthaṃ tuṣṭāva śrīhariṃ tataḥ |
divyadehaśca vai bhūtvā yayau dhāmā'kṣarābhidham || 27 ||
[Analyze grammar]

śrīrādhikovāca |
ka āsīccharabhaḥ kṛṣṇa dattātreyeṇa noditaḥ |
vada me tatkathāṃ sarvāṃ śrotumicchāmi sarvaśaḥ || 28 ||
[Analyze grammar]

śrīkṛṣṇa uvāca |
śṛṇu rādhe kathayāmi śarabhasya kathāṃ śubhām |
samīraṇo'bhavad rājā sūryavaṃśasamudbhavaḥ || 29 ||
[Analyze grammar]

ājanābhasya khaṇḍasya paścimāyā bhuvaḥ śubhaḥ |
gaurjarāṇāṃ ca kacchānāṃ saurāṣṭrāṇāṃ nṛpādhipaḥ || 30 ||
[Analyze grammar]

prajāpālanakaruṇo bhakto nārāyaṇasya ca |
dharmakarmaparo nityaṃ dānahomaparāyaṇaḥ || 31 ||
[Analyze grammar]

akhaṇḍakīrtimānāsīd dīnarakṣāparastathā |
gobhūbrāhmaṇasādhūnāṃ rakṣākaraḥ prarakṣakaḥ || 32 ||
[Analyze grammar]

yasya rājye kadācidvai durbhikṣaṃ nā'bhavatpurā |
śaraṇāgatarakṣākṛt deśarakṣākarastathā || 33 ||
[Analyze grammar]

dhanurdharaḥ svayaṃ nityaṃ devasevāṃ karoti ca |
rājadhānyabhavattasya śatruṃjītānadītaṭe || 34 ||
[Analyze grammar]

kuṇḍalākhyā mahādivyā nagarī vipraśobhitā |
kṣatrīyavaiśyaśūdrādisaumyaprajānivāsitā || 35 ||
[Analyze grammar]

yajñayāgaparā yatra viprāśca vedaghoṣiṇaḥ |
sādhavo yatayo yatra kṛṣṇadhyānaparāstathā || 36 ||
[Analyze grammar]

vanino'pi na yadrājye kaṣṭaṃ vindanti kutracit |
nāryo narāśca sukhino yadāśraye'bhavan sadā || 37 ||
[Analyze grammar]

samīraṇasya rājye vai viśeṣo'yamabhūt sadā |
prātarninādyate nityaṃ paṭaho rājapūruṣaiḥ || 38 ||
[Analyze grammar]

dīno'ndhaḥ kṛpaṇaḥ kaścinnirādhāro nirāśrayaḥ |
niranno'nāthabālo vā vṛddho vā bhikṣuko'pi vā || 39 ||
[Analyze grammar]

nārī nirāśrayā vṛddhā vidhavā cā'kuṭumbinī |
sādhuḥ sādhvī yoginī vā tāpasī dhanavarjitā || 40 ||
[Analyze grammar]

daridro vā'dhano vā ca ṣaṇḍho vā ṣaṇḍhikā tathā |
prātarāgatya maddvāre gṛhṇātu cānnabhojanam || 41 ||
[Analyze grammar]

mama grāme ca nagare pattane ca prajāsu ca |
yatra yatra mamā'nnānāmāgārāṇi bhavanti vai || 42 ||
[Analyze grammar]

tatra tatra samāgatya gṛhṇātu cānnabhojanam |
vastraṃ pātraṃ pragṛhṇātu bhajatāṃ puruṣottamam || 43 ||
[Analyze grammar]

ityevaṃ paṭahastasya prātarnadati bodhayan |
mānavā nirdhanāstasya bhuñjate'nnaṃ sthale sthale || 44 ||
[Analyze grammar]

bhuktvā tṛpyanti satataṃ dadatyāśīrvacāṃsi ca |
evaṃ puṇyayuto rājā tvekadā bhṛtyamaṇḍalam || 45 ||
[Analyze grammar]

gṛhītvā prayayau vyāghrāraṇyaṃ vihartumutsukaḥ |
bhṛtyāśca gajaghoṭāśca dāsā api yayuḥ saha || 46 ||
[Analyze grammar]

madhyāraṇye dīrghikāyāstaṭe vṛkṣeṣu vai tadā |
nivāsaṃ gajaghoṭādeḥ kārayitvā sa bhūpatiḥ || 47 ||
[Analyze grammar]

rājadharmeṇa mṛgayāṃ kartuṃ vanaṃ viveśa ha |
bhṛtyā api yayuḥ kecit sārdhaṃ rājñā savāhanāḥ || 48 ||
[Analyze grammar]

gavayaṃ saṃvilokyaiva rājā pṛṣṭhamanuvrajan |
araṇye gavayenā'yaṃ viveśa gahane mudhā || 49 ||
[Analyze grammar]

dhanurdharo'śvamārūḍho vegād rājā paśupriyaḥ |
nadīṃ ramyāṃ prāpa tatra jalapūravatīṃ śubhām || 50 ||
[Analyze grammar]

tasyāstīre'bhavat tatrāśramo ramyo'tisundaraḥ |
phalapuṣpādiyuktānāṃ vṛkṣāṇāṃ sughaṭāsu vai || 51 ||
[Analyze grammar]

munīnāṃ cātiviśvāsumṛgapakṣyādiśobhanaḥ |
hiṃsrāṇāṃ hiṃsravṛttyādiśāntikṛccātinirmalaḥ || 52 ||
[Analyze grammar]

muniśiṣyaiḥ praśiṣyaiśca sevito brahmadhāmavat |
kāmakrodhātilobhānāṃ doṣāṇāṃ yatra nodbhavaḥ || 53 ||
[Analyze grammar]

māyā'nṛtādidoṣāśca paśuṣvapi na yatra vai |
pakṣiṇo madhurān rāvān gāyanti sma drumādiṣu || 54 ||
[Analyze grammar]

vedavākyāni ca śukā mayūrā militāstadā |
kokilā rājahaṃsāśca pragāyanti svabhāṣayā || 55 ||
[Analyze grammar]

devā devyo'pi nākācca yatrā''gatya vasanti hi |
ṛṣiṃ natvā prayāntyeva manvānāḥ kṛtakṛtyatām || 56 ||
[Analyze grammar]

etādṛśe cāśrame tu pārṣṇigṛho mahāmuniḥ |
tapaḥ karoti vipulaṃ lokakalyāṇahetave || 57 ||
[Analyze grammar]

grīṣme pañcāgnimadhye ca niṣīdati nirantaram |
varṣāyāṃ bhūtale varṣādhārāsveva niṣīdati || 58 ||
[Analyze grammar]

śaitye jale kṛtā''vāso divā tiṣṭhati sarvathā |
rātrau vṛkṣatale tatra vartate vai nirāvṛtau || 59 ||
[Analyze grammar]

kvacitphala kvacitpuṣpaṃ kvacinmunyannamityapi |
kvacijjalaṃ kvacitpānīyakaṃ gṛhṇāti vārdalam || 60 ||
[Analyze grammar]

nirāhāraḥ kvattvāste bhajate śrīnarāyaṇam |
susvāmiśrīkṛṣṇanārāyaṇa saṃbhajate hṛdi || 61 ||
[Analyze grammar]

tādṛśo'yaṃ muniryatra vṛkṣe'dho vartate tadā |
tasya puraḥ sa gavayaḥ samāgatyā'tibhītitaḥ || 62 ||
[Analyze grammar]

abhavat susthirastatra ṛṣeḥ śaraṇamāśritaḥ |
rājā dūrādanāvīkṣyā''śramaṃ taṃ ca muniṃ tathā || 63 ||
[Analyze grammar]

mṛgayālagnacitto'sau jaghāna gavayaṃ balāt |
śareṇa tīkṣṇadhāreṇa hyudarāntaḥpraveśinā || 64 ||
[Analyze grammar]

saśaro gavayastatrā''krośaṃ kṛtvā ṛṣeḥ puraḥ |
nipapāta yathā putrastathā rakṣārthameva tu || 65 ||
[Analyze grammar]

dīnavattaṃ muniṃ paśyan tadā dīnena cakṣuṣā |
patitaṃ śarasahitaṃ vīkṣya pārṣṇigṛho muniḥ || 66 ||
[Analyze grammar]

dayāluḥ śīghramevainaṃ paśuṃ pasparśa pāṇinā |
jalaṃ dadau mukhe tasyā'paśyallagnaṃ śaraṃ tadā || 67 ||
[Analyze grammar]

tathā trāsena hariṇān palāyanaparān paśūn |
parito dhāvamānāṃśca vilokya kaṣṭamāptavān || 68 ||
[Analyze grammar]

aho mamāśrame ko'yaṃ ghātakaścādya saṃgataḥ |
paśūnāṃ trāsakṛd duṣṭo nirmaryādo'tidāruṇaḥ || 69 ||
[Analyze grammar]

nirdoṣaṃ gavayaṃ yo'tra jaghāna prāṇata śaraiḥ |
evaṃ yāvanmuniśreṣṭho vicāraṃ prakaroti hi || 70 ||
[Analyze grammar]

tāvadrājā turaṃgasthastatra sṛtyā samāgataḥ |
dadarśa brāhmaṇaṃ mālājaṭāśmaśrudharaṃ śubham || 71 ||
[Analyze grammar]

patitaṃ pādavikṣepān kurvantaṃ gavayaṃ tathā |
manasā mṛdubhāvena tadāśramaprasaṃgataḥ || 72 ||
[Analyze grammar]

dūyamānaḥ sa vai rājā pārṣṇigṛhaṃ pravīkṣya ca |
āyātaścāśvamābaddhya vṛkṣamūle padakramaiḥ || 73 ||
[Analyze grammar]

bhītaḥ papāta sa ṛṣeḥ pādayoḥ śīghrameva tu |
tāvad ṛṣistamuvāca kathaṃ duṣṭa hataḥ paśuḥ || 74 ||
[Analyze grammar]

tvayā vyādhena nirdoṣo mamā'raṇyanivāsakṛt |
duṣṭastvaṃ dṛśyase rājā kṛtyaṃ karoṣi hiṃsrakam || 75 ||
[Analyze grammar]

vyādhavat krūrakarmā tvaṃ munīnāmāśrameṣvapi |
duṣṭakāryaṃ prakartuṃ kiṃ lajjase na narādhipa || 76 ||
[Analyze grammar]

śareṇa bhagnā hariṇā mamāśramanivāsināḥ |
gavayo'yaṃ mṛtaścātra bhavatyeva kṣaṇāntare || 77 ||
[Analyze grammar]

śare vikarṣaṇaṃ prāpte nā'sya prāṇo'vatiṣṭhati |
paśya pāpa nijaṃ putraṃ kathaṃ ghātayase na vai || 78 ||
[Analyze grammar]

mṛgayā te na vai yogyā ṛṣiviśvastajantuṣu |
mṛgāḥ putrā mama tulyā mamā''śramasamīpataḥ || 79 ||
[Analyze grammar]

tava bhītyā dudruvuvai prāṇarakṣaṇavāñcchayā |
śareṇa bhagnā hariṇā mamāśramasamīpataḥ || 80 ||
[Analyze grammar]

śarabho bhava rājendra vanā''vāso'tikaṣṭavān |
punarnaivaṃ daṇḍaśikṣaḥ kariṣyasi vadhaṃ kvacit || 81 ||
[Analyze grammar]

ityuktaḥ ṛṣiṇā rājā tatraiva śarabho'bhavat |
vihāya mānavaṃ rūpaṃ pāśavaṃ rūpamāptavān || 82 ||
[Analyze grammar]

ityevaṃ sa ṛṣiṇā vai śapto rājā samīraṇaḥ |
śarabhaḥ sa paśurbhūtvā tadāśramād viniryayau || 83 ||
[Analyze grammar]

śāpamokṣaṇamatraiva prārthayituṃ na cā'vadat |
bhītaścātīva doṣeṇa kopenā'pi ṛṣestadā || 84 ||
[Analyze grammar]

śīghraṃ tadāśramaṃ tyaktvā siṃhāraṇyaṃ viveśa ha |
duḥkhātiduḥkhasaṃmagnaḥ sukhaṃ nā'vāpa kutracit || 85 ||
[Analyze grammar]

jātismaraḥ sadā svasya duḥkhāntaṃ kartumeva tu |
cintayatyeva satataṃ caran vane muhurmuhuḥ || 86 ||
[Analyze grammar]

rājabhṛtyāstu vai jñātvā vṛttāntaṃ taṃ tataḥ kila |
bhītā nijaprāṇārakṣāṃ jñātvā gṛhān drutaṃ yayuḥ || 87 ||
[Analyze grammar]

gavaye ca ṛṣiṇaiva mantrapuṣpāñjalistadā |
sandhinyā sahitaḥ kṣiptastenojjīvanamāhitam || 88 ||
[Analyze grammar]

rājā śāpanivṛttyarthaṃ bhramitvā tadvanaṃ tataḥ |
pārṣṇigṛhaṃ samāgatya prārthayāmāsa mokṣaṇam || 89 ||
[Analyze grammar]

ṛṣiḥ prāha mahāraṇye pātālīye sarovare |
raivatādriḥ samāgatya nijā''vāsaṃ kariṣyati || 90 ||
[Analyze grammar]

tatra vai bhagavān sākṣād dattātreyo mahāprabhuḥ |
śikhare tu janaihīne tvagamye vyomagāmini || 91 ||
[Analyze grammar]

svayaṃ tapo mahaccograṃ kariṣyati yadā tadā |
śailadroṇyāṃ tvayā tatra sthitena bhagavān hi saḥ || 92 ||
[Analyze grammar]

dṛṣṭaścārādhitaścāpi kṛpayā tvāṃ suneṣyati |
kṣetraṃ kuṃkumavāpyākhyaṃ tatra sthāsyati cā'trijaḥ || 93 ||
[Analyze grammar]

aśvapaṭṭasarastīre paścime tapasā harim |
anādiśrīkṛṣṇanārāyaṇamārādhayaṃstadā || 94 ||
[Analyze grammar]

dattātreyasya kṛpayā'nādikṛṣṇanarāyaṇam |
vīkṣya tvaṃ tatpādayośca pītvā jalaṃ prasādajam || 95 ||
[Analyze grammar]

śīghraṃ śāpānmama mukto bhaviṣyasi na saṃśayaḥ |
ityuktaḥ sa tu rājarṣiḥ śarabhasya tu dehavān || 96 ||
[Analyze grammar]

araṇyaṃ prayayau tasmānmahāsarovarāntike |
tataḥ kālāntare tatra raivatādriḥ samāyayau || 97 ||
[Analyze grammar]

tatraiva bhagavānatriputrastapaścacāra ha |
śikhare taṃ dadarśā'sau śarabho japamācarat || 98 ||
[Analyze grammar]

dattātreyo dayāluḥ sa cainamādāya tadgṛham |
samāyāto'sti bhagavānaśvapaṭṭasarovare || 99 ||
[Analyze grammar]

adṛśyastiṣṭhati cāsya śāpamokṣārthameva tu |
dattātreyābhidhaṃ tīrthaṃ tadatrā'śvasarovare || 100 ||
[Analyze grammar]

śāpapāpavināśārthaṃ vartate pāvanaṃ hi tat |
tatra vai śarabho gatvā'nādikṛṣṇanarāyaṇam || 101 ||
[Analyze grammar]

vīkṣya pādajalaṃ pītvā śāpānmokṣamavāptavān |
rājarūpaṃ śubhaṃ prāptastato'pi tīrthavīryataḥ || 102 ||
[Analyze grammar]

divyarūpo'tra bhūtvaivā'kṣaraṃ lokaṃ yayau śubham |
ityevaṃ rādhike cāśvasarovaraṃ varaṃ sadā || 103 ||
[Analyze grammar]

sāyaṃ sa śarabhaḥ pītvā jalaṃ pādajalaṃ hareḥ |
muktiṃ jagāma paramāṃ brāhmīṃ divyāṃ tu śāśvatīm || 104 ||
[Analyze grammar]

paṭhanācchravaṇāccāsya bhuktirmuktirbhavedapi |
sakāmānāṃ vaṃśavṛddhirduḥkhamuktirbhavedapi || 105 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne prabhostrayodaśajanmadinotsavaḥ samīraṇarājño mṛgayārthaṃ gatasya vane pārṣṇigṛharṣiśāpena śarabhatvaṃ tato raivatādrau dattātreyadvārā kuṃkumavāpīkṣetre mokṣaṇam aśvapaṭṭasarasi dattātreyatīrthaṃ cetyādinirūpaṇanāmā ṣaḍdaśādhikaśatatamo'dhyāyaḥ || 116 ||
[Analyze grammar]