Chapter 105

śrīkṛṣṇa uvāca |
śṛṇu tvaṃ rādhike paścād yajjātaṃ kathayāmi te |
kṛṣṇanārāyaṇaḥ prāha hemaśālāyanāya yat || 1 ||
[Analyze grammar]

kamaṇḍaluṃ gṛhītvā śrīhanumān vyomamārgagaḥ |
jalaṃ kāñcanagaṃgāyā ānayatpāvanaṃ drutam || 2 ||
[Analyze grammar]

dadau nārāyaṇāya drāṅ nārāyaṇo'ñjaliṃ dadau |
tāpasībhyāṃ tu śuṣkābhyāṃ yāvat tāvattu vai dvayoḥ || 3 ||
[Analyze grammar]

brahmarandhrāccetanasya sañcāro hṛdaye'bhavat |
prāṇo'pyasañcarad dehe netre coddhāṭya te tadā || 4 ||
[Analyze grammar]

puro vyalokayatāṃ śrīnārāyaṇaṃ pareśvaram |
prāpatustu paraṃ harṣaṃ vilokya puruṣottamam || 5 ||
[Analyze grammar]

sauvarṇamukuṭaṃ ratnamaṇimauktikaśobhitam |
dhārayantaṃ mastake sve vakrasnigdhajaṭāyute || 6 ||
[Analyze grammar]

karṇayoḥ kuṇḍale cāpi pārśvayoḥ śekharālikām |
lalāṭe tilakaṃ candraṃ netrayoḥ kajjalaṃ śubham || 7 ||
[Analyze grammar]

paritaḥ paridhiṃ śuklataijasaṃ tvānanasya vai |
hāsyayuktamukhaṃ kṛṣṇaṃ hārakaustubhaśobhitam || 8 ||
[Analyze grammar]

raśanāśṛṃkhalābhiśca kaṭakairurmikādibhiḥ |
aṅgulīyakakaṭakairveṣakusumahārakaiḥ || 9 ||
[Analyze grammar]

śobhitaṃ parameśānaṃ parabrahma janārdanam |
sarvaśobhāspadaṃ ramyaṃ kiśoraṃ svarṇarūpiṇam || 10 ||
[Analyze grammar]

campakābhaṃ vahnidhautadivyāmbaravirājitam |
śaṃkhacakragadāpadmavanamālāvibhūṣitam || 11 ||
[Analyze grammar]

varadānaṃ pradātuṃ vai tvāgataṃ kamalāpatim |
bhaktapatiṃ kṛpāpārāvāraṃ śāntamanoharam || 12 ||
[Analyze grammar]

punarjalena saṃprokṣya śāntayantaṃ tapo'nalam |
āhvayantaṃ kamaleti urvaśīti punaḥ punaḥ || 13 ||
[Analyze grammar]

vadantaṃ yuvayoḥ siddhiṃ dātuṃ cāgatavāniti |
varaṃ vṛṇuta kamale priye putri tathorvaśi || 14 ||
[Analyze grammar]

yuvābhyāṃ cātikaṣṭaṃ vai madarthaṃ prāptamityataḥ |
prasanno'smi dadāmyadya varaṃ bhavatyapekṣitam || 15 ||
[Analyze grammar]

tapoyogānnivartethāṃ kamale cakravāki ca |
śopasyā'nto bhavatvadya dadāmīṣṭatamaṃ ca vām || 16 ||
[Analyze grammar]

kamalā prāha bhagavan vivāhavidhinā tu mām |
gṛhāṇa nijapatnīṃ vai cāparādhaṃ kṣamasva me || 17 ||
[Analyze grammar]

yadyapyahaṃ sadā patnī tavā'smīti na guptatā |
tathāpi śivarājasya kanyāṃ māṃ vidhinā vaha || 18 ||
[Analyze grammar]

tathā'stviti hariḥ prāha yāhi pitṛgṛhaṃ priye |
pūrṇe dvādaśavarṣe te pitā mātā ca bāndhavau || 19 ||
[Analyze grammar]

svasā tvete prayāsyanti kāśīvāsārthameva tu |
tatrā'haṃ prasamāgatya grahīṣye tvāmaninditām || 20 ||
[Analyze grammar]

tatra tvāmudvahiṣyāmi neṣyāmi mama mandiram |
jalaṃ piba phalaṃ bhuṃkṣva meṃ'ke niṣīda vai rame || 21 ||
[Analyze grammar]

ityuktā sā tapastyaktvā nārāyaṇāntikaṃ yayau |
aṃke niṣadya kāntaṃ taṃ samāśliṣat kṣaṇaṃ ramā || 22 ||
[Analyze grammar]

dattaṃ phalaṃ jalaṃ cāpi putrīṃ vihāya padmajā |
nā'grahīdatha bhagavānurvaśīṃ prāha putrike || 23 ||
[Analyze grammar]

śīghramāyāhi bhuṃkṣvedaṃ phalaṃ piba jalaṃ tataḥ |
putrī prāha pitanaivaṃ grahīṣye tu phalaṃ jalam || 24 ||
[Analyze grammar]

pitaryadi prasanno'si tapaḥ pūrṇaṃ ca me yadi |
bhakteṣṭadātā'si nā'deyaṃ vidyate yadi || 25 ||
[Analyze grammar]

apātrabhṛtavāryatra śikhare tapasaḥ sthale |
prāpayā'nyat salilaṃ na pibāmi dehinā'rpitam || 26 ||
[Analyze grammar]

yadyevaṃ na dadāsyatra vāri tarhi pibāmi na |
prāṇān jahyāṃ śikhare'tra tvadagre jalamantarā || 27 ||
[Analyze grammar]

viśvaṃbhareti ca pitastava nāma prasiddhyati |
bhaktavatsalanāmā ca bhaktārthaṃ śrīviyogavān || 28 ||
[Analyze grammar]

mama mātā ramā lakṣmīṃ tyaktavān dhāmasaṃsthitām |
tato'haṃ yadi bhaktā'smi putrī snehasya pātrikā || 29 ||
[Analyze grammar]

vātsalyena prayuktastvaṃ kiṃ karoṣi vilokaye |
mayā vṛṣṭijalaṃ pātrā'bhṛtaṃ cātra samiṣyate || 30 ||
[Analyze grammar]

tat pibāmi tataḥ śāpānmokṣaṇaṃ cāstu me pitaḥ |
ityuktvā nā''gatā cā'ṅke jalārthaṃ tūrvaśī sutā || 31 ||
[Analyze grammar]

sarvaṃ tyajati bhaktārthaṃ madarthaṃ ki tyajatyayam |
pito madbhaktivaśatāṃ prāptaśced bhagavān svayam || 35 ||
[Analyze grammar]

vicāryetthaṃ haṭhānnaivā'gamat pituḥ samīpataḥ |
pitā nārāyaṇaḥ prāha sute tatra jalāptaye || 33 ||
[Analyze grammar]

vṛṣṭyā droṇyāṃ saṃbhṛtāyāṃ jalaṃ śṛṃgagataṃ bhavet |
ucchrite vṛṣṭisalile śikharānnimnabhūmikāḥ || 34 ||
[Analyze grammar]

sarvā magnā jaleṣu syuḥ prāṇināṃ pralayo bhavet |
tatpāpaṃ te bhavet putri tato'trā''gatya vai piba || 35 ||
[Analyze grammar]

urvaśī prāha bhagavan varadānavacastava |
abhīṣṭadānavākyaṃ cet satyaṃ tvatra jalaṃ naya || 36 ||
[Analyze grammar]

yadi satyaṃ na te vākyaṃ yāhi kurve tapaḥ pitaḥ |
atraiva tu mayā peyaṃ jalaṃ nānyatra kutracit || 37 ||
[Analyze grammar]

apātrasaṃsthitaṃ peyaṃ sthiraṃ peyaṃ na cañcalam |
na vā divyaṃ bindurūpaṃ tbambarāt prapatat kila || 38 ||
[Analyze grammar]

ahaṃ cettava bhaktāsmi bhaktāvākyaṃ prapūraya |
avākyapūraṇe te syātpāpaṃ tvasatyavāgbhavam || 39 ||
[Analyze grammar]

mṛṣā'bhīṣṭapradaṃ vākyaṃ noccāryaṃ vā kadācana |
śaṃkarārthaṃ kṛtaṃ sarvaṃ madarthe na kathaṃ pitaḥ || 40 ||
[Analyze grammar]

kṛṣṇārthaṃ ca kṛtaṃ sarve madarthaṃ na kathaṃ pitaḥ |
kṛṣṇanārāyaṇasvāmin janārdana kṛpālaya || 41 ||
[Analyze grammar]

māṃ bhaktāṃ śikhare cātra pānīyaṃ na dadāsi cet |
saṃkariṣye tapaścograṃ sarvasaṃsārabhasmakṛt || 42 ||
[Analyze grammar]

bahūnāṃ dehināṃ nāśe tava pāpaṃ bhaviṣyati |
jalamagne jagatyeva mama pāpaṃ yathoditam || 43 ||
[Analyze grammar]

kimatra cātivaktavyaṃ pāpanāśakaro bhavān |
vartate'tra tathāpyatra pāpabhītiṃ dadāti cet || 44 ||
[Analyze grammar]

pitaḥ pāpavināśārthaṃ kastvāṃ vai saṃbhajiṣyati |
puṣpodyānāni naivedyamiṣṭānnāni tvadarśakam || 45 ||
[Analyze grammar]

kaḥ kariṣyati te'rthaṃ vai yadi pāpaṃ na nāśyase |
pāpahantā bhaved bhīruḥ pāpī kaṃ śaraṇaṃ vrajet || 46 ||
[Analyze grammar]

ityukto bhagavānāha pibedaṃ pātumicchasi |
tvayā'rthitaṃ jalaṃ tatra nāgamiṣyati putrike || 587 ||
[Analyze grammar]

lakṣmi tvaṃ ca jalaṃ tvetad piba cet pātumicchasi |
eṣo'nyathā tu gacchāmi yatheṣṭaṃ cara bhāmini || 48 ||
[Analyze grammar]

ityuktvā bhagavāṃstatra kṣaṇādantaradhīyata |
lakṣmīḥ putrīṃ vinā naiva papau vāri manāgapi || 49 ||
[Analyze grammar]

putrī jalaṃ na jagrāha yatheṣṭaṃ nārpitaṃ yataḥ |
ityevaṃ ca jalā'pāne punastapaḥ pracakratuḥ || 50 ||
[Analyze grammar]

putrīṃ vihāya vai mātā gantuṃ gṛhaṃ śaśāka na |
punarghoraṃ tapaścograṃ jalārthaṃ te pracakratuḥ || 51 ||
[Analyze grammar]

sarvaṃ dadāti bhaktārthaṃ jalaṃ dadāti nau na kim |
ityevaṃ te viniścitya tṛṣite tapasi sthite || 52 ||
[Analyze grammar]

nārāyaṇena caikātmyaṃ kṛtvā saṃyamasādhanaiḥ |
tapaste ceratuścograṃ śuṣkakaṇṭhauṣṭhatāluke || 93 ||
[Analyze grammar]

cakratuste tapaścograṃ māsaṃ caikātmyayogataḥ |
tadā putryāstathā patnyāstṛṣāyogāddharestṛṣā || 54 ||
[Analyze grammar]

vavṛdhe pratidivasaṃ kaṇṭhadāho'pyajāyata |
bhaktairbhaktābhiratyarthaṃ pāyitaṃ jalamamṛtam || 55 ||
[Analyze grammar]

punaḥ punaḥ sa pibati nārāyaṇo jalāñjalīn |
tathāpyasya tṛṣāyāstu nirodho naiva jāyate || 56 ||
[Analyze grammar]

śvetadvīpe kṣīravārdhau vaikuṇṭhe badarīvane |
akṣare cāmṛte cāvyākṛte cānyatra yatra ca || 57 ||
[Analyze grammar]

nārāyaṇaḥ svayaṃ tvāste tatra tatra tu sarvathā |
asaṃkhyabalapāne'pi tṛṣā nivartate na vai || 58 ||
[Analyze grammar]

jalaṃ pītvā svayaṃ nārāyaṇaḥ śramamavāptavān |
udaraṃ saṃbhṛtaṃ vārbhiḥ kaṇṭhaḥ śuṣkāyate muhuḥ || 59 ||
[Analyze grammar]

urvaśyāstṛṣitāyāstu tathā lakṣmyāstapo bahu |
vegena vardhate nārāyaṇaḥ śāntiṃ na vindati || 60 ||
[Analyze grammar]

tṛṣādāhāgninā dagdho vicitta iva vartate |
utthāyotthāya patati conmatta iva dhāvati || 61 ||
[Analyze grammar]

mūrchāṃ prāpnoti tṛṣito nidrāṃ sukhaṃ na vindati |
kvacidutthāya salile vārdhau patati vai muhuḥ || 62 ||
[Analyze grammar]

bhaktābhiḥ sevakaiścāpi pavanaiḥ sevito jalaiḥ |
siktaścāpi na śaityaṃ sa prāpnoti parameśvaraḥ || 63 ||
[Analyze grammar]

sarvāntarātmanaścaivaṃ jāte tṛṣātiśoṣaṇe |
antaḥsthitasya dehā vai sarve sthāvarajaṅgamāḥ || 64 ||
[Analyze grammar]

avāpuḥ śoṣaṇaṃ cāti tṛṣājanyaṃ jagattraye |
īśvarāḥ ṛṣayo devāḥ pitaro mānavāḥ khagāḥ || 65 ||
[Analyze grammar]

paśavo jalagāḥ sarve daityādyā api sarvaśaḥ |
tṛṣādoṣairhatā bhrāntā dhāvanti ca patanti ca || 66 ||
[Analyze grammar]

trailokyaṃ tṛṣitaṃ sarvaṃ tadā nāśonmukhaṃ hyabhūt |
jalārtipānakartṛtve tundanāśe vināśanam || 67 ||
[Analyze grammar]

jalā'pāne kaṇṭhaśoṣaḥ pāne'pi śoṣaṇaṃ tathā |
ubhayathā'pi nāśo'tra jagatāṃ samupasthitaḥ || 68 ||
[Analyze grammar]

tadā brahmā haro viṣṇuḥ kṛtvā samādhimeva te |
jñātvā hetuṃ tṛṣāyāstu ramorvaśotṛṣātapaḥ || 69 ||
[Analyze grammar]

śīghraṃ yayurbhūtale te saurāṣṭre'kṣarabhūtale |
aśvapaṭṭasaraḥkṣetre yatrā'nādinarāyaṇaḥ || 70 ||
[Analyze grammar]

vartate kuṃkumavāpīkṣetre nijālaye prabhuḥ |
sarvāvatāratṛṣayā mūrchitastṛṣito bhṛśam || 71 ||
[Analyze grammar]

brahmādyāstṛṣitāścāpi mṛtyusaṃyogino'pi te |
yathākathaṃcidbhagavatpādayoḥ patitāstathā || 72 ||
[Analyze grammar]

śuṣkakaṇṭhauṣṭhatālvādyā mṛtyukṣaṇagatā iva |
trūṭitayā tadā vāṇyā jagaduḥ parameśvaram || 73 ||
[Analyze grammar]

śīghraṃ nātha ramāyāścorvaśyāḥ prāpaya vai jalam |
avṛṣṭijaṃ cā'pātrasthaṃ cā'nyā'spṛṣṭamanāhutam || 74 ||
[Analyze grammar]

anyathā vai jagat sarvaṃ kṣaṇānte vā vinaśyati |
sarvanāśe samutpanne svalpanāśo hitāvahaḥ || 75 ||
[Analyze grammar]

yadi dṛśyeta ca tadā svalpa tyaktvā parānavet |
śīghraṃ vṛṣṭyā himaśaile śikhare vānarāśrame || 76 ||
[Analyze grammar]

ramorvaśītapobhūmau jalaṃ prāpaya ceṣṭakṛt |
ityarthitaḥ suraiḥ kṛṣṇanārāyaṇaḥ pareśvaraḥ || 77 ||
[Analyze grammar]

drutaṃ meghān samāhūyā''jñāpayāmāsa vṛṣṭaye |
meghā vṛṣṭiṃ pracakruśca sambhūya dvādaśaiva te || 78 ||
[Analyze grammar]

droṇīścopatyakāḥ kṣetraṃ śailaprākāramadhyagam |
sarvaṃ tvāplāvayāmāsurāśṛṃgāntaṃ jalairlayaḥ || 79 ||
[Analyze grammar]

varyavarti mahān ghoro droṇyāṃ vai paśupakṣiṇām |
araṇyāni nimagnāni magno hanumadāśramaḥ || 80 ||
[Analyze grammar]

daśayojanavistāraḥ sarvo magnaḥ pradeśakaḥ |
jalaṃ śikharaparyentaṃ saṃmataṃ kṣitipātrake || 81 ||
[Analyze grammar]

nimnadeśā nimnabhāgā nimnāni śikharāṇi ca |
droṇyaśca gahvarāṇyeva nimagnāni jalairlaye || 82 ||
[Analyze grammar]

lakṣmyurvaśyoḥ pādayośca jalaṃ sāmudrajaṃ yathā |
tayoḥ prāptaṃ ca śikhare tapaḥsthalyāṃ puraḥ sthitam || 83 ||
[Analyze grammar]

tadā nārāyaṇo devā gatvā ca prārthayanmuhuḥ |
jalapānārthametābhyāṃ te pānaṃ cakratustadā || 84 ||
[Analyze grammar]

tṛṣā nārāyaṇānāṃ ca drāgeva nivṛtā'bhavat |
dehināṃ sthāvarāṇāṃ jaṅgamānāmapi sarvaśaḥ || 85 ||
[Analyze grammar]

tṛṣā śāntā'bhavattūrṇaṃ jalāni harivāñcchayā |
pṛthvyāṃ samapasasnuśca divyā meghā yayurlayam || 86 ||
[Analyze grammar]

śrīśṛṃgaṃ corvaśīśṛṃgaṃ khyātaṃ tattapasaḥ sthalam |
lakṣmīvanaṃ cakravākīvanaṃ khyātamabhūd vanam || 87 ||
[Analyze grammar]

lakṣmīgaṃgorvaśīgaṃgā khyātā gaṃgā tu kāṃcanī |
hanumadgahvaraṃ cāpi nārāyaṇaguhābhidham || 88 ||
[Analyze grammar]

jalaṃ sarovaraṃ lakṣmīsarovaramabhūttataḥ |
kāṃcanagaṃgātīrthaṃ ca brahmagaṃgā'dhikaṃ hyabhūt || 89 ||
[Analyze grammar]

kuśyāṃ kāṃcanagaṃgāyāṃ jalānyāsan gatāni vai |
nimnadeśeṣu lokānāmadhairyaṃ jaladarśanāt || 90 ||
[Analyze grammar]

jātaṃ jalalayaḥ syādvai gantavyamitaratra tu |
evaṃ kolāhalo jāto deśeṣu saritāṃ jalaiḥ || 91 ||
[Analyze grammar]

tanmiṣeṇa tato lokāḥ kāśīṃ śrīpuruṣottamam |
kṣetraṃ ca kauravaṃ kṣetraṃ yayuryātrānimittataḥ || 92 ||
[Analyze grammar]

śivarājo jānakī ca kṛṣṇā jayaśca candrakaḥ |
dhenupālaṃ pradāyaiva rājyaṃ kāśīṃ yayustadā || 93 ||
[Analyze grammar]

deśāntareṣu ye dāsā dāsyo vaikuṇṭhavāsinaḥ |
prākaṭyaṃ jagṛhuste'pi kāśyāmāgatya cottare || 94 ||
[Analyze grammar]

varaṇāyāstaṭe ramye nyūṣuścāmravaṇeṣu te |
phalidrumasamākīrṇe puṣpavallyādigandhite || 95 ||
[Analyze grammar]

kāśīrājasya sainyaiścādhiśritodyānaśobhite |
kāśīrājasya sauvarṇe prāsāde varaṇātaṭe || 96 ||
[Analyze grammar]

sarvopaskārasaṃyukte kāśīrājena mānitāḥ |
satkṛtāḥ svāgataiścāti śatahastivimānakaiḥ || 97 ||
[Analyze grammar]

bahuvādyādibhiścāpi lakṣaśairmānavaiḥ suraiḥ |
vidvadbhirbrāhmaṇairbrāhmairbṛhaspatipurogamaiḥ || 98 ||
[Analyze grammar]

devībhiḥ śaktibhiścāpi gaṇairvīrairasaṃkhyakaiḥ |
sarvatīrthaiśca yatibhiḥ satībhiścāpsarogaṇaiḥ || 99 ||
[Analyze grammar]

pūjitaṃ śivarājasya kuṭumbaṃ guptamānavam |
nityāvāsaṃ sāptabhaume saudhe suvarṇanirmite || 100 ||
[Analyze grammar]

kalpavallīsamāyukte cakāra śaṃbhumānitam |
satīpatiḥ svayaṃ kāśīviśvanātho'nnapūrṇikā || 101 ||
[Analyze grammar]

śaṃbhordāsyastathā dāsāḥ śaṃbhurūpaṃ kuṭumbakam |
śivarājaṃ śivaṃ caivāśliṣya svāgatamācarat || 102 ||
[Analyze grammar]

madhuparkaṃ cāmṛtādi dadau jaharṣa cāpyati |
evaṃ vāsaṃ cakāraitat kuṭumbaṃ harivāñcchayā || 103 ||
[Analyze grammar]

sarvaṃ kālena bhavati yathā kṛṣṇaḥ samicchati |
vaiṣṇavāḥ pārṣadāścā'nye pārṣadānyaśca yāḥ striyaḥ || 104 ||
[Analyze grammar]

mānavyaścā'bhavaṃstāśca kāśikānṛpamānitāḥ |
śaṃbhunā mānitāścāpi nyūṣuḥ rājā''layeṣvadhi || 105 ||
[Analyze grammar]

anādiśrīkṛṣṇanārāyaṇaṃ smaranta eva te |
naranārāyaṇaṃ cāpi lakṣmīnārāyaṇaṃ tathā || 106 ||
[Analyze grammar]

lakṣmīṃ ca tāpasīṃ devyaḥ smarantyo nyūṣureva ca |
rādhike corvaśīlakṣmyau sasmaratuḥ kuṭumbakam || 107 ||
[Analyze grammar]

cakravākyabhavacchāpānmuktā kanyā ramāsamā |
urvaśītisvarūpāḍhyā neme svapitaraṃ harim || 108 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne nārāyaṇaprokṣitajalena tapasi lakṣmīcakravākyoḥ prāṇasaṃcāre sati cakravākī śikhare jalapānaṃ tato mokṣaṃ ca vavre harirvṛṣṭibhirdeśaṃ nimajjayitvā śikhare jalaṃ dadau pītvā śāpamuktiḥ vṛṣṭibhayāt |
śivarājakuṭumbasya vaikuṇṭhīyapārṣadādīnāṃ mānavarūpāṇāṃ kāśyāmāgatya varaṇātaṭe kāśīrājasaudheṣu cāmravaṇe vāsādiḥ śaṃbhukṛtasatkārādi cetinirūpaṇanāmā pañcā'dhikaśatatamo'dhyāyaḥ || 105 ||
[Analyze grammar]