Chapter 104

śrīkṛṣṇa uvāca |
rādhike tatparaṃ hemaśālāyano narāyaṇam |
papraccha tu tapaḥ kīdṛk kṛtaṃ śaṃkarakanyayā || 1 ||
[Analyze grammar]

anādiśrīkṛṣṇanārāyaṇo jagāda tūttaram |
śivarājasutā cakravākīṃ śrīgaṇḍakītaṭe || 2 ||
[Analyze grammar]

uvāca parayā prītyā putri cāgaccha me gṛham |
ityuktā prayayau putrī hyurvaśī jananīgṛham || 3 ||
[Analyze grammar]

rājyagṛhe'tiramye sā pāliteva sutiṣṭhati |
janānāṃ sā tu sānnidhye naiva vadati kiñcana || 4 ||
[Analyze grammar]

nirjane bahudhā''lāpān mātrā saha karoti sā |
nadyāmudyānake vāṭyāṃ kṣetre saudhe sabhāgṛhe || 5 ||
[Analyze grammar]

pākagṛhe ca śayane kaṇagṛhe mahānase |
snānagṛhe samāje ca mandire svāminastathā || 6 ||
[Analyze grammar]

evamanyatra sarvatra sahagā corvaśī sadā |
mātrā saha dinakṣepaṃ karoti śāpakāraṇāt || 7 ||
[Analyze grammar]

śivarājasya vai bhaktyā satyā bhaktyā jayasya ca |
kṛṣṇāyāścāpi candrasya subhaktyā dhenupasya ca || 8 ||
[Analyze grammar]

nārāyaṇaḥ svayaṃ nityaṃ divyakiśorarūpavān |
prasannastadgṛhe yāti viyāti prāpya pūjanam || 9 ||
[Analyze grammar]

bhuṃkte dattaṃ tu naivedyaṃ jalaṃ pibati miṣṭakam |
tāmbūlaṃ cāpi gṛhṇāti vastrālaṃkārabhūṣaṇam || 10 ||
[Analyze grammar]

lakṣmyā ca kanyayā dattaṃ sarvamaśnāti bhāvataḥ |
urvaśyā'pi pradattaṃ ca pracchannaṃ janakāya yat || 11 ||
[Analyze grammar]

tat sarvaṃ cātibhaktyaiva gṛhṇāti bhagavān prabhuḥ |
nityamevaṃ gṛhyamāṇe kānte kāntā'tibhāvukī || 12 ||
[Analyze grammar]

nimagnā premavaśagā tvekānte prārthanāṃ śubhām |
cakāra svavivāhārthaṃ śāpanāśārthamityapi || 13 ||
[Analyze grammar]

kṛṣṇādīnāṃ pramuktyarthaṃtadā prāha narāyaṇaḥ |
mā śaighryaṃ vaha vāmoru nātidūraṃ kṣaṇaṃ tu tat || 14 ||
[Analyze grammar]

ityuktvā'dṛśyabhāvaṃ śrīnārāyaṇo'gamattataḥ |
urvaśī prāha sā kanyā tapasā sādhyate hariḥ || 15 ||
[Analyze grammar]

ityevaṃ bhagavānāha pitā te māṃ narāyaṇaḥ |
vad kīdṛk tapaḥ kāryaṃ kva gantavyaṃ himālaye || 16 ||
[Analyze grammar]

upadravā na yatra syustādṛśaṃ kiṃ sthalaṃ bhavet |
tvayā dṛṣṭaṃ bhavet putri vada darśaya tatsthalam || 17 ||
[Analyze grammar]

daityāścarākṣasāścāpi dānavā harivairiṇaḥ |
śaṃbhośca vairiṇo'raṇye vicaranti divāniśam || 18 ||
[Analyze grammar]

abalānāṃ mahatkaṣṭaṃ nirjane tu tapo'rjane |
tatra tvaṃ cakravākyāsse śyenebhyaste bhayaṃ sadā || 19 ||
[Analyze grammar]

ahaṃ kanyā vivāhārhā daityādibhyo bhayaṃ ca me |
tapaḥsiddhiryathā syādvai nirvighnā harituṣṭaye || 20 ||
[Analyze grammar]

tādṛk sthalaṃ vada putri yadi jānāsi parvate |
ityuktā tūrvaśī prāha mātaryāvān himālayaḥ || 21 ||
[Analyze grammar]

mayā dṛṣṭo'sti parito viharantyā suraiḥ saha |
kāścit sthalyastatra santi yatra vasanti mānavāḥ || 22 ||
[Analyze grammar]

droṇyastāḥ pārśvabhāgasthā araṇyavanamiśritāḥ |
bhūtāyanapradeśo'sti yatra vai śāṃkarīprajāḥ || 23 ||
[Analyze grammar]

nīpālayapradeśo'yaṃ yatra vai pārvatīprajāḥ |
tathā badarīdeśaśca yatra nārāyaṇīprajāḥ || 24 ||
[Analyze grammar]

tathā trivartadeśo'pi yatra tridevajāḥ prajāḥ |
tathā kāśmīradeśo'pi yatrāste kāśyapī prajā || 25 ||
[Analyze grammar]

tathā gāndharvadeśaśca cāraṇānāṃ pradeśakaḥ |
kinnarāṇāṃ pradeśāśca kiṃpuruṣabhūmayaḥ || 26 ||
[Analyze grammar]

satīśivasya kailāsastathā devādibhūmikāḥ | |
vidyante'saṃkhyakā mātaḥ parvate tu himālaye || 27 ||
[Analyze grammar]

tatra vighnā bhaveyurvai devamānavadaityajāḥ |
nirjanaṃ na sthalaṃ tatra kvā'pi saṃbhāvyate'mba vai || 28 ||
[Analyze grammar]

mayā tvekaṃ sthalaṃ dṛṣṭaṃ purā yannātidūragam |
droṇyāṃ yat kṛṣṇaśailasya yatrāste pūrvasṛṣṭijaḥ || 29 ||
[Analyze grammar]

hanumān brahmacārī ca rāmabhakto'titāpasaḥ |
yatra naivā'sti vighnānāṃ saṃbhavastasya sannidhau || 30 ||
[Analyze grammar]

kadalīnāṃ vane so'yaṃ mahābhāgavataḥ prabhuḥ |
nityaṃ sītādāsabhakto rājate nātigocaraḥ || 31 ||
[Analyze grammar]

kvacit śrībadarīṃ yāti kvacidgaurītapaḥsthalam |
gaurīśikharamevāpi kvacit kailāsaparvatam || 32 ||
[Analyze grammar]

kvacidvai kāñcanīṃ gaṃgāṃ gahare śṛṃgavartini |
yatra yatra hanumān sa prayāti ca vasatyapi || 33 ||
[Analyze grammar]

tatra naivā'sti vighnānāṃ mātarvai saṃbhavaḥ khalu |
gaṃgāmūle tu śikhare kalpalatā bhavanti ca || 34 ||
[Analyze grammar]

yad yadā ceṣyate tattat tadopasthitamāpyate |
hanūmadāśramastatra vartate sarvarakṣakaḥ || 35 ||
[Analyze grammar]

gantavyaṃ tatra śikhare tapaḥ kāryaṃ hi nirjane |
āvedayitvā kīnāśaṃ sthāsyāvastapase sadā || 36 ||
[Analyze grammar]

ityevaṃ niścayaṃ kṛtvā duḥkhinīkamalā sutā |
mātre nivedayāmāsa jānakyai tapa īhitam || 37 ||
[Analyze grammar]

mātarme vartate cecchā kartuṃ nārāyaṇaṃ patim |
sa māṃ prāha madarthaṃ vai tapaḥ kuru sukanyake || 38 ||
[Analyze grammar]

tato'haṃ tapaso'rtha vai gamiṣye tu himālayam |
gahanaṃ nirjanaṃ prāpya kariṣye tapa uttamam || 39 ||
[Analyze grammar]

tapaḥ siddhyuttaraṃ mātaścāgamiṣye tavā'ntikam |
śrutvā mātā śuśocā'ti komalā bālikā mama || 40 ||
[Analyze grammar]

kathaṃ pāraṃ tapasaḥ sā gamiṣyati hareḥ kṛte |
ityevaṃ cintayamānā sā jagād harāya tat || 41 ||
[Analyze grammar]

śivarājo vicāryaiva yogenā''ha tu jānakīm |
yogyaṃ sā vakti kanyā'tra yataḥ sā'sti ramā svayam || 42 ||
[Analyze grammar]

tvaṃ cā'si dakṣaputrī vai satī cā'haṃ haraḥ svayam |
kṛṣṇādyā vaikuṇṭhavāsāḥ santi śāpavaśādiha || 43 ||
[Analyze grammar]

sarve'tra janimāpannā nārāyaṇaḥ sadā prage |
bhaktasnehādatra nityaṃ samāyāti pareśvaraḥ || 44 ||
[Analyze grammar]

tadvākyena priye kanyā ramā tapaḥ kariṣyati |
ramayā saha ca tato nārāyaṇasya śārṅgiṇaḥ || 45 ||
[Analyze grammar]

prāpte tu samaye patni vivāhaḥ saṃbhaviṣyati |
tato vayaṃ ramāśāpād vimuktāḥ syāma bhāmini || 46 ||
[Analyze grammar]

tadyogyaṃ sarvathā cāstu tapo nirvighnameva ca |
saphalaṃ tattapaścāstu hariścāstu sutāpatiḥ || 47 ||
[Analyze grammar]

eṣā yā cakravākyasti sā putrī corvaśī hareḥ |
śāpamuktā'pi tapasā bhaviṣyati na saṃśayaḥ || 48 ||
[Analyze grammar]

ityevaṃ śaṃbhvanumatā jānakī prāha putrikām |
vatse tvayā'rthitaḥ kānto nārāyaṇaḥ svayaṃ prabhuḥ || 49 ||
[Analyze grammar]

tapasā tattapaste'stu saphalaṃ samanoratham |
prāpayituṃ sthalīṃ yatra tapastvaṃ vai kariṣyasi || 50 ||
[Analyze grammar]

śivarājastathā cā'haṃ samāgacchāva īśvari |
apekṣitaṃ gṛhāṇā'tra muhūrtaṃ ca śubhaṃ tathā || 51 ||
[Analyze grammar]

rakṣārthaṃ vada dāsyāmi bhrātaraṃ yadi rocate |
tadā prāha ramā mātarmama kiṃcinna rocate || 52 ||
[Analyze grammar]

rakṣāṃ me tapasaḥ kṛṣṇo rakṣānāthaḥ kariṣyati |
vastu kiñcinna cecchāmi vanyaṃ yaddehasādhanam || 53 ||
[Analyze grammar]

śubho me'stu haraḥ sākṣāt kailāsavāsakṛt prabhuḥ |
rakṣā me'stu sadā mātā satī dakṣasutā mama || 54 ||
[Analyze grammar]

rakṣako me vaiṣṇavo'stu hanumān śaṃbhubālakaḥ |
sāhacarye cakravākī yorvaśī mama bālikā || 55 ||
[Analyze grammar]

himālayaḥ svayaṃ rakṣāṃ kariṣyati mamā'mbike |
svayaṃ me rakṣakaścāste varado'pi narāyaṇaḥ || 56 ||
[Analyze grammar]

nārāyaṇaṃ variṣye'haṃ mariṣye vā himālaye |
sādhayiṣye mano'bhīṣṭaṃ mokṣayiṣye tu śāpataḥ || 57 ||
[Analyze grammar]

ityevaṃ pūrvasaṃskārā jagāda mātaraṃ sutā |
tataḥ sā balavaccandre pṛṣṭvā saṃpūjya mātaram || 58 ||
[Analyze grammar]

pitaraṃ bāndhavān bālā svasāraṃ ca suhṛjjanān |
sakhījanān samāpṛcchya kṛtakautukamaṃgalā || 59 ||
[Analyze grammar]

jaṭāvalkalavastrāḍhyā śālagrāmaśilānvitā |
aparigrahasarvasvā tyaktvā rājyasya vaibhavān || 60 ||
[Analyze grammar]

vighneśaṃ ca satīṃ sūryaṃ natvā śivaṃ narāyaṇam |
kārtikasyaiva pūrṇāyāṃ yātrāṃ cakāra kanyakā || 61 ||
[Analyze grammar]

cakravākyā saha putrī yayau śīghraṃ vihāyasā |
tadā vādyānyavādyanta jayaśabdāstadābhavan || 62 ||
[Analyze grammar]

surāṇāṃ puṣpavṛṣṭiśca cāndanī vṛṣṭiruttamā |
pārṣadānāmabhavacca sahāyā maruto'bhavan || 63 ||
[Analyze grammar]

śakunānyabhavaṃstatra vyomni saubhāgyacihnitāḥ |
suradevyaśca militā gacchantyo badarīvanam || 64 ||
[Analyze grammar]

śveto gajaścaturdanto milito'vataran divaḥ |
hanūmān bālasūryābho mārge dṛṣṭipathaṃ gataḥ || 65 ||
[Analyze grammar]

yāsyan kāñcanagaṃgāṃ saḥ svāśramaṃ tu himālaye |
apṛcchat kanyake kutra gamyete vada no'dhunā || 66 ||
[Analyze grammar]

mamāśrame hyabhaktānāṃ praveśo nāsti sarvathā |
ramā prāha namaste'stu rāmanāmamahodadhe || 67 ||
[Analyze grammar]

mahābhāgavataśreṣṭha rāmapriya namo'stu te |
tāpasīnāṃ taporakṣākara bhakta namo'stu te || 68 ||
[Analyze grammar]

abhaktā nāsmi sītā'smi nārāyaṇapriyā ramā |
iyaṃ nārāyaṇaputrī cakravākyurvaśī sutā || 69 ||
[Analyze grammar]

sanatsujātaśāpena cakravākītanusthitā |
śāpamokṣaṇakāmeyaṃ tapastaptuṃ samicchati || 70 ||
[Analyze grammar]

ahaṃ lakṣmīḥ svayaṃ cā'smi tatho'rthaṃ yāmi vānara |
hanūmadāśramo yatra tvāste śṛṃge sugahvare || 71 ||
[Analyze grammar]

yatrā''ste kāṃcanagaṃgā kalpavallīsamāśrayā |
tatra yāmi tapo'rthaṃ te sannidhau harilabdhaye || 72 ||
[Analyze grammar]

śrutvaivaṃ tu ramāvākyaṃ hanūmān mātaraṃ drutam |
nanāma pādayoḥ śīghramahobhāgyamamanyata || 73 ||
[Analyze grammar]

śivarājasya jānakyā putrīṃ śrutvā tatastaram |
ānandaṃ prāptavāṃścāti sevāvān kiṃkaro'bhavat || 74 ||
[Analyze grammar]

śaṃkarasya sutaḥ sākṣāddhanūmān vānarottamaḥ | |
śaṃbhuputrīṃ svasāraṃ śrīṃ jñātvā''nandabharo'bhavat || 75 ||
[Analyze grammar]

svasṛputrīmurvaśīṃ ca jñātvā tāmabhyanandayat |
sarvāśramaṃ nītavāṃstatra kadalīvanaśobhitam || 76 ||
[Analyze grammar]

svalpaśṛṃgādhityakāyāṃ gahvare sarvadā sukhe |
kalpavallīsamāyukte sarvasiddhisamanvite || 77 ||
[Analyze grammar]

narbhaye rājyasadṛśe vāsaṃ dadau plavaṃgamaḥ |
dhūnī dadau tathā vahnikuṇḍaṃ dadau śubhāśrayam || 78 ||
[Analyze grammar]

kamaṇḍaluṃ valkalāni cāsanaṃ japamālikām |
śītoṣṇajalakuṇḍāni phalamūlajalāni ca || 79 ||
[Analyze grammar]

tathā nārāyaṇamūrtiṃ caturbhujāṃ dadau tadā |
tathopacārasarvasvaṃ dadau svasre hanūdharaḥ || 80 ||
[Analyze grammar]

evaṃ tadrakṣite deśe lakṣmīścakravatī tathā |
mārgakṛṣṇadvitīyātastapa ādyaṃjapātmakam || 81 ||
[Analyze grammar]

auṃ namaḥ śrīkṛṣṇanārāyaṇāya pataye svāhā |
mālābhistanmantrajapaṃ cakratustu divāniśam || 82 ||
[Analyze grammar]

snānaṃ kāñcanagaṃgāyāṃ sadā triṣavaṇaṃ hi te |
cakratuḥ prātarevaite natvā śrībhrātaraṃ kapim || 83 ||
[Analyze grammar]

pūjayitvā hariṃ nityavidhānatastataḥ punaḥ |
havanaṃ tvanale kṛtvā tepāte sajapaṃ mudā || 84 ||
[Analyze grammar]

cakrāte māsamātraṃ te kandāhāraṃ sakṛd divā |
rātrau bhūśayana kṛtvā cakrāte bhajanaṃ hareḥ || 85 ||
[Analyze grammar]

tato dvitīyamāse te phalāhāraṃ pracakratuḥ |
tṛtīye māsi te patrāhāraṃ cakraturādarāt || 86 ||
[Analyze grammar]

caturthe māsi te puṣpāhāraṃ cakraturutsuke |
pañcame māsi meghāmbupānaṃ cakraturambare || 87 ||
[Analyze grammar]

ṣaṣṭhe māsi tu bāṣpāṇāmaśanaṃ cakraturmudā |
saptame cakratuḥ sādhvyau kṛṣṇārthaṃ pavanāśanam || 88 ||
[Analyze grammar]

aṣṭame śvāsamātreṇa tasthatuścetanānvite |
navame māsi taruvat tvekapādena saṃsthite || 89 ||
[Analyze grammar]

daśame māsi ca tayordehayoḥ kāṣṭhatulyatā |
ekādaśe tato māsi vahnistu tapasodbhavaḥ || 90 ||
[Analyze grammar]

samutthito mahājvālaścātmaśaktyā bhayaṃkaraḥ |
vyānaśe sarvato dikṣu brahmāṇḍe nāśakārakaḥ || 91 ||
[Analyze grammar]

aṇurūpaiścātidāhairjāvāntaṃ prāṇanāśakaḥ |
āścaryaṃ prāpa hanumān rāmakṛṣṇeti vai japan || 92 ||
[Analyze grammar]

rakṣāyāṃ vartate tatra sevako haribhaktakaḥ |
vijñāya bhagavān lakṣmyāstapasaścātikāṣṭhatām || 93 ||
[Analyze grammar]

urvaśyāścāpi tapasaḥ parāṃ kāṣṭhāṃ vilokya ca |
nārāyaṇaḥ svayaṃ tatra drāgeva ca samāyayau || 94 ||
[Analyze grammar]

padbhyāṃ samāyayau premṇā patnyāstapo vilokitum |
phalaṃ dātuṃ tapasaśca tapo'ntārthaṃ samāyayau || 95 ||
[Analyze grammar]

koṭisūryasamaṃ kṛṣṇaṃ nārāyaṇaṃ vilokya ca |
hanumān daṇḍavaccakre tathā svāgatamuttamam || 96 ||
[Analyze grammar]

āsanaṃ madhuparkaṃ ca pūjanaṃ phalapuṣpakaiḥ |
sunaivedyaṃ jalaṃ śītaṃ dadau nārāyaṇāya saḥ || 97 ||
[Analyze grammar]

naivedyaṃ ca jalaṃ naiva bubhuje śrīnarāyaṇaḥ |
yāvallakṣmīścorvaśī ca na bhuñjāte phalaṃ jalam || 98 ||
[Analyze grammar]

atha gatvā sannidhau drāguvāca parameśvaraḥ |
aho lakṣmyāstathorvaśyāḥ kīdṛśaṃ tapa uttamam || 99 ||
[Analyze grammar]

yadvarṣmaṇoranalā vai sūryasamāḥ kṣaranti hi |
brahmāṇḍadāhaśaktā vai mahāpralayasadṛśāḥ || 100 ||
[Analyze grammar]

śāpasya pratikāro'dya pūrṇo jāto na śiṣyate |
dadāmyābhyāṃ bodhayitvā yadiṣṭaṃ sukhadaṃ tayoḥ || 101 ||
[Analyze grammar]

iti vicintya bhagavān hanumantamuvāca ha |
yāhyetayoścetanārthaṃ jalaṃ kāṃcanagāṃgakam || 102 ||
[Analyze grammar]

śīghramānaya pātre'smin mā ciraṃ kuru bhaktarāṭ |
ityuktvā bhagavānāste kṣaṇaṃ maunaṃ samādhimān || 103 ||
[Analyze grammar]

ityevaṃ rādhike svāmikṛṣṇanārāyaṇaḥ patiḥ |
nārāyaṇasvarūpeṇa phalaṃ dātuṃ samāyayau || 104 ||
[Analyze grammar]

hemaśālāyanādyāstacchrutvā''ścaryaṃ paraṃ gatāḥ |
acintayannaho lakṣmyāścorvaśyāstapa uttamam || 105 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne mātāpitrājñāṃ gṛhītvā lakṣmyurvaśyostapo'rthaṃ himālaye hanumadāśramagamanaṃ tapaḥ varṣānte tapaḥphalaṃ dātuṃ tatra nārāyaṇasyasākṣādgamanamityādinirūpaṇanāmā caturadhikaśata |
tamo'dhyāyaḥ || 104 ||
[Analyze grammar]