Chapter 102

śrīkṛṣṇa uvāca |
śṛṇu tvaṃ rādhike yacca vaikuṇṭhe śapanottaram |
yadabhūt kamalākṛṣṇamadhye tu kathayāmi te || 1 ||
[Analyze grammar]

anādiśrīkṛṣṇanārāyaṇo hemāyanarṣaye |
yajjagāda tathā kanyā cakravākyai jagāda yat || 2 ||
[Analyze grammar]

tatsarvaṃ te kathayāmi nibodhekāgramānasā |
śāpaṃ śrutvā harirnārāyaṇakṛṣṇo janārdanaḥ || 3 ||
[Analyze grammar]

bhaktaduḥkhena duḥkhātmā hyanuktvā kamalāṃ tadā |
svayaṃ tvacintayat kṛṣṇo nyāyayuktaṃ śubhāspadam || 4 ||
[Analyze grammar]

aho vyaktestu vaicitryaṃ vilakṣaṇapadaṃ gatam |
sarvadā toṣayāmyenāṃ lakṣmīṃ hṛdayavāsinīm || 5 ||
[Analyze grammar]

kṣaṇaṃ dūraṃ karomyeva nahi kvacittathāpi sā |
atṛptā me mahānandādadhīreva prabhāṣate || 6 ||
[Analyze grammar]

madbhaktānāṃ kṛte cāpi sahate na kṣaṇaṃ satī |
madviyogaṃ na sahate sahate na cirāyanam || 7 ||
[Analyze grammar]

sadā saukhyaṃ dadāmyeva yathā''tmane tathā śriyai |
yathā śriyā viyogo me neṣṭastathā na sevinām || 8 ||
[Analyze grammar]

nārīṇāṃ tu svabhāvo'yaṃ svārthaścennahi pūryate |
kṣaṇe paravaj jāyeta phalaṃ duṣṭaṃ prayacchati || 9 ||
[Analyze grammar]

yadyapi naiva lakṣmīstu bhaktā tyājyā kadācana |
bhaktottamā'tibhaktā me patnī priyā sakhī svayam || 10 ||
[Analyze grammar]

śaṃkaro'pi yathā bhakto bhaktā satī ca kṛṣṇikā |
jayaścandro dhenupālastato bhaktottamā ramā || 11 ||
[Analyze grammar]

tathāpi bhaktavaryeṣu snehadarśanahetave |
bhaktāḥ snigdhā mama lakṣmyapekṣayā nitarāṃ sadā || 12 ||
[Analyze grammar]

bhaktaduḥkhapradā cet syāllakṣmīryadyapi me priyā |
bhaktārthaṃ santyajāmyenāṃ dṛṣṭāntaṃ kamalā svayam || 13 ||
[Analyze grammar]

bhavedatra vidhāne tu tathā kurve nidarśanam |
śāpaphalaṃ me lakṣmyā śca prāptaṃ bhavennidarśane || 14 ||
[Analyze grammar]

śikṣā'pi ca yathārthā syāt punarnaivaṃ caret kvacit |
ityevaṃ saṃvicāryaiva bhagavān śokamāvahan || 15 ||
[Analyze grammar]

bhaktaduḥkhena duḥkhātmā na vakti śrī na paśyati |
nirmanaska iva jāto nāpi hasati vai manāk || 16 ||
[Analyze grammar]

nordhvaṃ paśyati manasā mahodvigno vibhāsate |
yathā vai mātṛmaraṇe yathā patnīvināśane || 17 ||
[Analyze grammar]

yathaikaputranāśe vā śokastathā vibhāvyate |
yathā kṣaṇāntare gehaṃ tyaktvā yāsyati vā kvacit || 18 ||
[Analyze grammar]

yathā sarvasvanāśe vā bhagnamānasavān bhavet |
tathā vairāgyamāpanno nārāyaṇo vilokyate || 19 ||
[Analyze grammar]

yathā jitendrayagrāmo jitāntaḥkaraṇādikaḥ |
māyāpārasthitiścāste tathā nārāyaṇo'bhavat || 20 ||
[Analyze grammar]

lakṣmīrvihasya bahudhā hāvabhāvaiḥ samāyutā |
hastaṃ haste gṛhītvā'ti kṛtvā pracumbanaṃ muhuḥ || 21 ||
[Analyze grammar]

nārāyaṇaṃ samākṛṣya gṛhāntare ninīṣati |
nārāyaṇastu śavavat tathā prastaravattadā || 22 ||
[Analyze grammar]

jaḍavad bhaktaśokena sañjātaḥ parameśvaraḥ |
yadgṛhe nijabhaktānāmāśrayaḥ sukhado'sti vai || 23 ||
[Analyze grammar]

tadgṛhe yadi bhaktānāṃ śāpaduḥkhaṃ prajāyate |
tatra kiṃ me nivāsena vicāryetthaṃ jagāda tām || 24 ||
[Analyze grammar]

mā māṃ spṛśā'tra vāmoru mā khedaṃ kāraya vṛthā |
yadgṛhe mama bhaktānā śāpastatra na me spṛhā || 25 ||
[Analyze grammar]

yāhi tvaṃ śayane sādhvi na me śayyā sukhāvahā |
mahābhāgavatāḥ śaptāścāto duḥkhataraṃ nu kim || 26 ||
[Analyze grammar]

prāghūṇikāḥ sadā mānyāstatrāpi nijabhaktayaḥ |
madarthekṛtasarvasvāḥ pūjyā mānyāḥ sadā mama || 27 ||
[Analyze grammar]

madbhaktārtha sadā lakṣmi mālāmāvartayāmyaham |
madbhaktārthaṃ ca lokeṣu sarvadā'vatarāmyaham || 28 ||
[Analyze grammar]

naranārāyaṇaścā'smi tāpaso bhaktahetave |
kṣīrode śvetabhūmau cā'kṣarakṣetre narāyaṇaḥ || 29 ||
[Analyze grammar]

goloke cāpi vaikuṇṭhe'vyākṛte'mṛtadhāmani |
yatra vasanti me bhaktāstatra tiṣṭhāmi padmaje || 30 ||
[Analyze grammar]

ahaṃ bhaktagṛhāvāso bhaktaiḥ saha vihāravān |
bhaktālayo me vaikuṇṭho nānyadvai ruciraṃ mama || 31 ||
[Analyze grammar]

me bhaktānāṃ duḥkhaprāptau nimittaṃ madgṛhaṃ yadi |
tadā vaikuṇṭhanāmā'sya yathārthatāṃ prahanti vai || 32 ||
[Analyze grammar]

yadvai śāśvatasukhadaṃ dhāma me khyātamaiśvaram |
tad yadi duḥkhadaṃ janmapradaṃ cet kā vikuṇṭhatā || 33 ||
[Analyze grammar]

tatrāpi devadevasya śaṃkarasya priyasya me |
satyāśca mama bhaktāyāḥ śāpo mānavajanmadaḥ || 34 ||
[Analyze grammar]

kimataḥ paramaṃ duḥkhaṃ duṣkīrtipradamulbaṇam |
kṛṣṇāyāstava sakhyāśca jayacandrakayorapi || 35 ||
[Analyze grammar]

dhenupālasya ca tathā pārṣadasya nipātanam |
kathaṃ te cedṛśī buddhirakāṇḍatāṇḍavī priye || 36 ||
[Analyze grammar]

aprayojyaṃ proktavatī bhaktabhaktivirodhinī |
kadāpi na tvayā tvevaṃ kṛtaṃ kṛtaṃ tu śaṃkare || 37 ||
[Analyze grammar]

mayā kimatra kartavyaṃ virodhistrīyute gṛhe |
bhojanaṃ miṣṭamṛṣṭādi bhaktaṃ vinā viṣāyate || 38 ||
[Analyze grammar]

peyaṃ śītasugandhāḍhyaṃ bhaktaṃ vinā'nalāyate |
vastraṃ saumyaṃ ca kauśeyaṃ vinā bhaktaṃ śarāyate || 39 ||
[Analyze grammar]

bhūṣaṇaṃ svarṇaratnādi vinā bhaktaṃ jhaṣāyate |
sugandhatailavāsādi na bhakte kardamāyate || 40 ||
[Analyze grammar]

sarvaṃ jvālāyate saukhyaṃ me hṛdi bhaktamantarā |
lakṣmi śaṃbhuṃ vinā cāhaṃ dahyāmi śāpavaibhavāt || 41 ||
[Analyze grammar]

bhaktaśāpaḥ sa me śāpo macchāpastattavāpi ca |
aṃśā'rdhāṃgasvabhāvatvād duḥkhado nātra saṃśayaḥ || 42 ||
[Analyze grammar]

tvaṃ na jānāsi māhātmyaṃ madbhaktānāṃ mahattamam |
sanatkumāro jānāti bhaktamāhātmyamucchritam || 43 ||
[Analyze grammar]

yadi netre na paśyetāṃ madbhaktān māmupasthitān |
niṣkāsya golakābhyāṃ te dūrīkaromi sarvadā || 44 ||
[Analyze grammar]

yadi me mastakaṃ naiva namate bhaktayogine |
galāt saṃchidya dūraṃ tannikṣipāmi na saṃśayaḥ || 45 ||
[Analyze grammar]

yadi karṇau śṛṇuyātāṃ naiva bhaktavacāṃsi me |
tau mūlāt saṃchidya dūre nikṣipāmi na saṃśayaḥ || 46 ||
[Analyze grammar]

yadi nāsā bhaktagandhaṃ naiva gṛhṇāti me tadā |
sañchidya mūlato nāsāṃ dūraṃ kṣipāmi padmaje || 47 ||
[Analyze grammar]

yadi jihvā bhaktagāthāṃ naiva gāyati sarvadā |
yadi vā rasanā bhaktārpitaṃ rasaṃ na ṛcchati || 48 ||
[Analyze grammar]

tadā mūlād viniṣkāsya jihvāṃ tyajāmi nityadā |
yadi cauṣṭhau bhaktadattaṃ tāmbūlādi na ṛcchataḥ || 49 ||
[Analyze grammar]

yadi dantā na bhaktairyaccarvayanti samarpitam |
tadauṣṭhadantakān śastraiśchedayitvā tyajāmi vai || 50 ||
[Analyze grammar]

yadi hastau svabhaktānāṃ sevāyāṃ nopayoginau |
chindyāmāmūlatastau saṃtyajeyaṃ kāṣṭhavattu tau || 51 ||
[Analyze grammar]

vakṣo yadi na bhaktānāmāśleṣe copayogavat |
tadā vakṣaḥ samutpāṭya tyajāmi gartake sadā || 52 ||
[Analyze grammar]

yadi me hṛdaye bhaktā vaseyurna kadācana |
hṛdayaṃ raktasahitaṃ niṣkāsya saṃkṣipāmi hi || 53 ||
[Analyze grammar]

yadyudaraṃ me pacanaṃ bhaktārpitasya neṣyate |
vibhidya sarvaṃ tvaritaṃ tyajāmi nātra saṃśayaḥ || 54 ||
[Analyze grammar]

yadi tvaṅ mama bhaktānāṃ sparśaṃ saṃrocate na vai |
utpāṭya varṣmaṇastūrṇa nikṣipāmi mahānale || 55 ||
[Analyze grammar]

yadi vīryaṃ balaṃ liṅgaṃ bhaktānāṃ sukhakṛnna me |
tadā vināśya tatsarvaṃ ṣaṇḍhatvaṃ prakaromi me || 56 ||
[Analyze grammar]

yadi corū prabhaktānāmupaveśārthameva na |
tadā tyaktvā kabandho vai bhavāmi bhaktakāraṇāt || 57 ||
[Analyze grammar]

yadi pādau mama bhaktān prati yāto na vai tadā |
kuṭhāreṇa vinicchidya pādahīno bhavāmi vai || 58 ||
[Analyze grammar]

deho me yadi bhaktānāṃ saukhyārthaṃ na prajāyate |
tathā prodbhāvya vahniṃ ca karomi bhasmasānnanu || 59 ||
[Analyze grammar]

guṇā buddhyādayaścāpi yadi bhaktā''śritā na me |
guṇāṃstyaktvā nirguṇaśca vasāmi gahane vane || 60 ||
[Analyze grammar]

vahunoktenā'tra kiṃ te tvaṃ yadi bhaktarodhinī |
bhaktakleśakarī bhaktivighnakarī pravartase || 61 ||
[Analyze grammar]

bhaktaduḥkhakarī vāpi bhaktaśāntivirodhinī |
tvāṃ tyajāmi rame tarhi kimanyanna tyajāmi vai || 62 ||
[Analyze grammar]

sarvaṃ tyajāmi sarvasvaṃ bhaktārthaṃ nātra me spṛhā |
bhaktanāśe vinaṣṭaṃ me sarvamavehi padmaje || 63 ||
[Analyze grammar]

bhakte tu rakṣite sarvaṃ rakṣitaṃ mama viddhi tu |
aho śrīśaṃkaraḥ kutra mānavo vai bhaviṣyati || 64 ||
[Analyze grammar]

aho satī priyā tasya mānavī kva bhaviṣyati |
aho kṛṣṇā priyā dāsī bhaktā vā kva janiṣyati || 65 ||
[Analyze grammar]

aho vai dhenupālo'pi jayaścandrastathā rame |
tava śāpena bhūmau te bhaviṣyantyasukhasthale || 66 ||
[Analyze grammar]

yāvajjānāmi naiteṣāṃ sthitiṃ janmavatāṃ rame |
tāvat sukhaṃ na me cāsti gacchāmi yatra te'pyaham || 67 ||
[Analyze grammar]

ityuktvā kamalāṃ tyaktvā tyaktvā śrīkamalākaram |
tyaktvā siṃhāsanaṃ ramyaṃ prāsādaṃ dhāma cojjvalam || 68 ||
[Analyze grammar]

vaikuṇṭhaṃ sarvathā tyaktvā tyaktvā snehapadaṃ hariḥ |
niryayau vimanā bhūtvā tyaktvā garuḍamityapi || 69 ||
[Analyze grammar]

paścādanavalokyaiva brahmāṇḍe bhūtalaṃ yayau |
rorūyamāṇāṃ nā'paśyat lakṣmīṃ prāṇātivallabhām || 70 ||
[Analyze grammar]

nātha nātha vyāharantīṃ śrīharirbhūtalaṃ yayau |
adṛśyo'vyaktadehaśca maṇijanye'tra bhūtale || 71 ||
[Analyze grammar]

aśvapaṭṭasaraḥkṣetre'kṣarakṣetre hyavātarat |
anādiśrīkṛṣṇanārāyaṇaḥ śrīpuruṣottamaḥ || 72 ||
[Analyze grammar]

parabrahmā''kṣarā'tīto'vatārāṇāṃ niyāmakaḥ |
kṣetre kuṃkumavāpyākhye kaṃbharāśrīgṛhe tadā || 73 ||
[Analyze grammar]

śrīmadgopālakṛṣṇasya gṛhe divyarddhisaṃyute |
nārāyaṇā''gamanasya nimittenā'pyavātarat || 74 ||
[Analyze grammar]

anādiśrīkṛṣṇanārāyaṇe śrīpuruṣottame |
āgatya līnatāṃ prāpya tasthau cā'śvasaro'ntike || 75 ||
[Analyze grammar]

tato'nādikṛṣṇanārāyaṇasyā''deśato bhuvi |
yathāvajñātarūpo'sau gaveṣaṇārthamuttare || 76 ||
[Analyze grammar]

himālayāśraye deśe nīpālayapradeśake |
kailāsadhāmarājye ca śivarājaṃ kumārakam || 77 ||
[Analyze grammar]

anveṣya śaṃkaraṃ bhaktaṃ tatra tasthāvagocaraḥ |
tataḥ satīṃ mārgayituṃ ṣaṇmāṇḍavyapurīṃ yayau || 78 ||
[Analyze grammar]

tatra kanyā jānakīti nāmnā satī ca sā'bhavat |
tatrāpi vartate nārāyaṇo'dṛśyo'nugapriyaḥ || 79 ||
[Analyze grammar]

tayorvivāhato jātā kṛṣṇā jayaśca candrakaḥ |
dhenupālaḥ śivarājabhrātā ca tatra saṃsthitaḥ || 80 ||
[Analyze grammar]

nārāyaṇaśca tadbhaktaiḥ sārdhaṃ saṃvasati prabhuḥ |
aprakāśaḥ saha bhuṃkte ramate vartate'niśam || 81 ||
[Analyze grammar]

kvacidāyātyakṣaraṃ ca kṣetraṃ tvaśvasarovaram |
kvacittatra śivarājagṛhe tiṣṭhati bhaktitaḥ || 82 ||
[Analyze grammar]

ityevaṃ bhagavān lakṣmīṃ tyaktvā bhaktārthameva tu |
samāyayau ca brahmāṇḍe bhaktamadhye nivāsakṛt || 83 ||
[Analyze grammar]

atha vaikuṇṭhagā lakṣmīrjñātvā svāṃ pravihāya tu |
vaikuṇṭhaṃ cāsanaṃ dhāmālayaṃ tyaktvā narāyaṇaḥ || 84 ||
[Analyze grammar]

jagāma cirayātrārthaṃ bhaktārthaṃ mānave bhave |
śuśoca bahudhā tatra ruroda śūnyavadgṛhe || 85 ||
[Analyze grammar]

tuṣṭāva bahudhā vāṇyā doṣānnijān jagāda ca |
ahaṃ vai cañcalā lakṣmīrduḥkhadoṣānukāriṇī || 86 ||
[Analyze grammar]

garvādīnāṃ sadā heturdīnānāmasahāyinī |
pāpā'nyāpakṛtāṃ gehe vāso me bahudhā mataḥ || 87 ||
[Analyze grammar]

hiṃsā'nṛtādidoṣāṇāṃ gṛhaṃ cādharmapuṣṭidā |
māyākāpaṭyabhogādisthānaṃ pūjyāvamānanam || 88 ||
[Analyze grammar]

śīlahāniḥ śuddhihānistṛṣṇā rāgo'tigṛdhnatā |
cauryaṃ prasahyatā cādhikṣepo doṣā madāśrayāḥ || 89 ||
[Analyze grammar]

cañcalā na sthirā kvāpi vaimanasyavidhāyinī |
sarvaharatagatā cā'smi tathāpi karuṇālayaḥ || 90 ||
[Analyze grammar]

bhagavān māṃ svahṛdaye rakṣatyatikṛpāvaśaḥ |
na māṃ niṣkāsya bhuṃkte'pi svayaṃ bhogān dayāparaḥ || 91 ||
[Analyze grammar]

sarvaṃ datvā tu me kṛṣṇaḥ svayaṃ gehādvinirgataḥ |
kīdṛśaṃ cāsya sāralyaṃ na me duḥkhaṃ prayacchati || 92 ||
[Analyze grammar]

na māṃ tiraskarotyalpaṃ sahate'vinayaṃ mama |
aśuddhāṃ māṃ sadā bhaktāṃ bhaktyadhīnaḥ prarakṣati || 93 ||
[Analyze grammar]

pātivratyaṃ na me samyak tathāpi bhagavān svayam |
patnīvrataparo bhūtvā'vatyadhikaṃ nijādapi || 94 ||
[Analyze grammar]

māṃ vihāya na bhukte'sau na vai pibati vāryapi |
māṃ vinā yatra pakvānnaṃ kṛtaṃ tvanyena tat khalu || 95 ||
[Analyze grammar]

naiva paśyati gṛhṇāti naiva naivā'tti keśavaḥ |
pācakeṣu praveśo me yadā syāccettadā hariḥ || 96 ||
[Analyze grammar]

bhuṃkte naivedyamāptānnaṃ nānyathā vai kvaciddhariḥ |
vastraṃ ratnaṃ jalaṃ pātraṃ tāmbūlamannamañjanam || 97 ||
[Analyze grammar]

bhūṣaṇaṃ candanaṃ svarṇe yānaṃ vāhanamīśatā |
āsanaṃ śayanaṃ vastu copadāḥ phalamarpaṇam || 98 ||
[Analyze grammar]

sarva māmasamarpyā'yaṃ me nātho bhukta eva na |
aho vicārataḥ kṛṣṇaḥ śreṣṭhaḥ patnīvratasthitaḥ || 99 ||
[Analyze grammar]

cañcalā'pi snehapātraṃ nedṛśyahaṃ pativratā |
aho me sarvasaubhāgyaṃ vinā kāntaṃ hi niṣphalam || 100 ||
[Analyze grammar]

vaikuṇṭhaṃ sampadaḥ sarvā bhogyajātaṃ ca niṣphalam |
dāsā dāsyo vāṭikāśca vimānodyānabhūmayaḥ || 101 ||
[Analyze grammar]

saudhaprāsādakalaśā gajā'śvarathadhenavaḥ |
bhūṣāmbarā'mṛtapānaṃ kāntaṃ vinā hi niṣphalam || 10 ||
[Analyze grammar]

gṛhātkānto viniryāto mamaiva doṣakāraṇāt |
aho mṛtā kathaṃ nā'haṃ kathaṃ śavo bhavāmi na || 103 ||
[Analyze grammar]

kāntaṃ vinā śa vaścā'smi jīvanaṃ niṣphalaṃ yataḥ |
ityevaṃ vilalāpeyaṃ kṛṣṇanārāyaṇaprabho || 104 ||
[Analyze grammar]

nātha śmaśānasadṛśaṃ vaikuṇṭhaṃ tvāṃ vinā mama |
ityuktvā nipapāteyaṃ siṃhāsanasamīpataḥ || 109 ||
[Analyze grammar]

mūrchāṃ kṣaṇaṃ samāsādya punarutthāya vegataḥ |
kānta kānteti cākrośaṃ kurvāṇā dvāramāgatā || 106 ||
[Analyze grammar]

mūrchayā'ṅganabhāge sā punaḥ papāta nirbalā |
tāvat sakhyaḥ samāyātāḥ kimidaṃ kimidaṃ bruvāḥ || 107 ||
[Analyze grammar]

tarkayantyo'pyaniṣṭaṃ ca tacchokenā'tiśokitāḥ |
duḥkhitāḥ pavanādyaiśca jalasecanakaistathā || 108 ||
[Analyze grammar]

puṣpārpaṇādibhiścāpi mūrchāmapānudaṃstu tāḥ |
papracchuḥ kimakāle te duḥkhametadupasthitam || 109 ||
[Analyze grammar]

prāha lakṣmīrhariḥ kvāpi vaikuṇṭhānniryayau ciram |
māṃ vihāya ca sarvāśca bhaktā bhaktān narāyaṇaḥ || 110 ||
[Analyze grammar]

śrutvaivaṃ vajrapātābhaṃ vaco lakṣmyāstu tā api |
mūrchāmavāpuratyugrāṃ śrutvā'niṣṭaṃ ca rādhike || 111 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne śrīlakṣmyāḥ śaṃbhvādau śāpottaraṃ śrīnārāyaṇasya kamalāṃ tyaktvā vaikuṇṭhānnirgama ityādinirūpaṇanāmā |
dvyadhikaśatatamo'dhyāyaḥ || 102 ||
[Analyze grammar]