Chapter 93

śrīkṛṣṇa uvāca |
rādhike śrīvāsudevastvāha saṃkarṣaṇādikān |
anādiśrīkṛṣṇanārāyaṇasya paramātmanaḥ || 1 ||
[Analyze grammar]

sthitisthāpakaśaktyākhyaḥ kālaḥ putro layaṃkaraḥ |
harate sarvamevaiṣo māyāvaiṣamyamityapi || 2 ||
[Analyze grammar]

kṣobhaṃ karoti caivaiṣastadā māyā pramāthinī |
prasūte viṣamāvasthāṃ mahāpūruṣayogataḥ || 3 ||
[Analyze grammar]

māyā kālaḥ pūruṣaśca parameśvaraśaktayaḥ |
tābhyaḥ sarvamidaṃ jātaṃ tasmāttā brahmarūpikāḥ || 4 ||
[Analyze grammar]

tajjātaṃ brahmarūpaṃ ca jagat sarvaṃ tu tattanu |
tatra sarvatra evā'syākṣarasya brahmaṇaḥ khalu || 5 ||
[Analyze grammar]

pāṇipādākṣiśravaṇānanamastakanābhayaḥ |
ataḥ sarvaṃ samāvṛtya tiṣṭhatyakṣarameva tat || 6 ||
[Analyze grammar]

sarvendriyaguṇābhāsaṃ divyendriyasamanvitam |
sarvādhāraṃ mahānandaṃ pramāṇātītagocaram || 7 ||
[Analyze grammar]

sarvopamānarahitaṃ sarvāvāsaṃ parāmṛtam |
abhinnaṃ bhinnasaṃsthānaṃ śāśvataṃ dhruvamakṣaram || 8 ||
[Analyze grammar]

nirguṇaṃ paramaṃ jyotirnirvikalpamasīmakam |
sa ātmā sarvabhūtānāṃ sa bāhyābhyantaraḥ sthitaḥ || 9 ||
[Analyze grammar]

tatrāste sarvagaḥ śāntastadātmā parameśvaraḥ |
tena vyāptamidaṃ viśvaṃ jīveśamuktavāsitam || 10 ||
[Analyze grammar]

tasyecchayā'pyahaṃ jāto vāsudevaḥ pareśvara |
matto yūyaṃ mūrtayaśca traya eva japoṣalāḥ || 11 ||
[Analyze grammar]

tato bhūmā mahāviṣṇustato virāṭ ca viśvasṛṭ |
tato maharṣayo devā jagatsthāvarajaṃgamam || 12 ||
[Analyze grammar]

jaganmātā mahāmāyā tasyecchā mūlarūpiṇī |
amṛtākhyā doṣakartrī pāragā pūrikā tathā || 13 ||
[Analyze grammar]

mahadādyaṃ viśeṣāntaṃ samprasūte'khilaṃ jagat |
sā yā prakṛtiriṣṭaiva kāntāvanmohinī priyā || 14 ||
[Analyze grammar]

mohāpannastu puruṣaḥ sa ātmā jīva īśvaraḥ |
ahaṃkārakṛtamaitryo mahattattvātibāndhavaḥ || 15 ||
[Analyze grammar]

mānase kṛtaviśvāso janmalābhāya kalpate |
prakṛtau nāsti yasyeṣṭaṃ mohastasya na vidyate || 16 ||
[Analyze grammar]

ahaṃkāre na vai maitrī mahattatve na bandhutā |
mānase na ca viśvāso mokṣalābhāya kalpate || 17 ||
[Analyze grammar]

tasyaite'nukūlabhāve vartante hyupakāriṇaḥ |
māyā kālaśca puruṣasta ete'pyupakāriṇaḥ || 18 ||
[Analyze grammar]

prāpayantyakṣaraṃ divyaṃ yasyeṣṭaḥ parameśvaraḥ |
anādiśrīkṛṣṇanārāyaṇaḥ paramadhāmagaḥ || 19 ||
[Analyze grammar]

tadyogāttvasya jāyante bhaktasya divyavigrahāḥ |
jñānecchākṛtayaścāpi sukhaduḥkhādibhāvanāḥ || 20 ||
[Analyze grammar]

dharmādharmādikośāśca mano'haṃbuddhivedanāḥ |
jāyante divyarūpāśca sattvaṃ rajaśca kalmaṣam || 21 ||
[Analyze grammar]

tanmātrāṇīndriyavargaḥ ṣaṭkośā bhūtapañcakam |
tadvikārāstathā sarve jāyante divyaghaṭṭanāḥ || 22 ||
[Analyze grammar]

tatkriyāstadvyavahāraśceṣṭā vartanamityapi |
sarvaṃ divyaṃ mokṣadaṃ ca jāyate brahmanirguṇam || 23 ||
[Analyze grammar]

kālo nātra prabhuryo vai sṛjate harate prajāḥ |
sarve kālasya vaśagāḥ kālo bhaktasya vai vaśe || 24 ||
[Analyze grammar]

bhakte'kṣaraṃ tvakṣare ca sarvajñaḥ svāmivallabhaḥ |
sarvajñānna paraḥ kaścit taṃ bhajitvā pramucyate || 25 ||
[Analyze grammar]

nityaṃ nāstīti jagati kiñcit sthāvarajaṃgamam |
ṛte śrīparamātmānaṃ śrīkṛṣṇaṃ puruṣottamam || 26 ||
[Analyze grammar]

nā'yaṃ tapobhirvividhairna dānena na cejyayā |
śakyo vai dehibhirjñātuṃ vinā bhaktiṃ parāśrayām || 27 ||
[Analyze grammar]

śrīhariṃ sarvabhūtānāmantastiṣṭhati sarvataḥ |
taṃ sarvasākṣiṇaṃ lokā na jānanti pareśvarāḥ || 28 ||
[Analyze grammar]

yasminnantaḥ sarvamidaṃ yaśca sarvāntare sthitaḥ |
so'yaṃ dhātā vidhātā ca kālo'gnirviśvatomukhaḥ || 29 ||
[Analyze grammar]

na taṃ paśyanti munayo rājasāḥ pitṛdevatāḥ |
brahmā virāṭ tathā bhūmā ye cānye tatpare'pi ca || 30 ||
[Analyze grammar]

yathākathañcit tannāthaṃ jānāmyarthaṃ tato'varam |
muktā nāntaṃ nā'kṣaraṃ ca tadā'nyeṣāṃ tu kā kathā || 31 ||
[Analyze grammar]

nityaṃ tadvigrahe vyāptā naiva jānāti māṇikī |
tadā'nyāsāṃ tu śaktīnāṃ kā kathā'sya vijānane || 32 ||
[Analyze grammar]

gṛṇanti satataṃ vedā tamekaṃ parameśvaram |
yajanti vividhairyajñairbrāhmaṇā vedapāragāḥ || 33 ||
[Analyze grammar]

dhyāyanti yoganiṣṭhāśca yatante pāramīkṣitum |
vinā'nugrahamevā'sya naiva paśyanti kāṣṭhayā || 34 ||
[Analyze grammar]

sa eva sarvahaviṣāṃ bhoktā cāpi phalapradaḥ |
sarvadevatanuḥ so'yaṃ sarvātmā śreyasāṃ padam || 35 ||
[Analyze grammar]

taṃ tatkṛpayā paśyanti vidvāṃsaḥ santa eva tu |
teṣāṃ sannihitaḥ so'yaṃ ye taṃ nityamupāsate || 36 ||
[Analyze grammar]

tebhyo dadāti tatsthānamānandaṃ paramaṃ padam |
uttamā madhyamāścāpi nikṛṣṭāḥ pāpayonayaḥ || 37 ||
[Analyze grammar]

tasya bhaktyā pramucyante tenaiva saṃgatā yadā |
tadbhaktā na vinaśyanti nimnaṃ yānti na vai padam || 38 ||
[Analyze grammar]

tanmārgasthāstasya yogaṃ kārayanti hi sādhavaḥ |
yo vai nindati tān mūḍho bālakṛṣṇaṃ sa nindati || 39 ||
[Analyze grammar]

yastān pūjayate bhaktyā sa taṃ pūjayati prabhum |
patraṃ puṣpaṃ phalaṃ toyaṃ bhojanaṃ cāmbaraṃ dravam || 40 ||
[Analyze grammar]

tasmai dadāti yo bhaktyā sa syāt tasya priyaḥ sadā |
sa pūrvaṃ bhaktavargasya duḥkhanāśārthameva hi || 41 ||
[Analyze grammar]

śaktiṃ prakāśayāmāsa rādhikāṃ nijavāmataḥ |
tayā'rthitaḥ sa vai kṛṣṇo babhūvā'kṣaradhāmani || 42 ||
[Analyze grammar]

goloke nyavasat tasyā bhaktigrahaṇahetave |
sa pūrvaṃ bhaktavargasya sampaddānārthameva tu || 43 ||
[Analyze grammar]

śaktiṃ prakāśayāmāsa śrīlakṣmīṃ nijavakṣasaḥ |
tathā'rthitaḥ sa vaikuṇṭhe nārāyaṇo babhūva ha || 44 ||
[Analyze grammar]

sa pūrvaracanārthaṃ vai sṛṣṭiṃ sasmāra pūrvavat |
śaktiṃ prakāśayāmāsa jaghanāt prakṛtiṃ parām || 45 ||
[Analyze grammar]

tayā'rthitaḥ sa bhagavānnavyākṛte'kṣarāśraye |
vāsudevo'hamabhavaṃ prakṛteścetanāpradaḥ || 46 ||
[Analyze grammar]

tenā'rthitā mahāsṛṣṭirjanisthairyāntadharmiṇī |
tanmūrtyātmakamaddehādbhavantastraya eva ca || 47 ||
[Analyze grammar]

aniruddhaśca pradyumnaḥ saṃkarṣaṇo'tivaibhavāḥ |
prāvirbhūtā guṇakāryakarāḥ śrīparameśvarāḥ || 48 ||
[Analyze grammar]

tenā'rthitastato nyāyaḥ sa bhūmā taddhṛdudbhavaḥ |
īśvarāṇāṃ nyāyakartā'mṛte dhāmni virājate || 49 ||
[Analyze grammar]

tenā'rthitastato māyāvikāro'ṅkurakāraṇam |
muktastasya bhrakuṭestu samutpannaḥ sa pūruṣaḥ || 50 ||
[Analyze grammar]

prakṛteḥ puruṣaḥ so'yaṃ ramate māyayā tadā |
tasmājjātaṃ ca yugalaṃ buddhyā mahatsamākhyayā || 51 ||
[Analyze grammar]

sevitaśca pumān tasyāḥ kānto ramaṇarañjanaḥ |
pradhānapuruṣau deho hareḥ khyātāvubhau sadā || 52 ||
[Analyze grammar]

tattvaṃ tābhyāmahaṅgarvābhidhānaṃ samajāyata |
mahāviṣṇuḥ sa vai jātaḥ sṛṣṭyarthaṃ śrīniṣevitaḥ || 53 ||
[Analyze grammar]

tasmājjāto virāḍākhyastato devā harādayaḥ |
tebhyaḥ pitṛpraṇālyā vai vedānaprāpayaddhariḥ || 54 ||
[Analyze grammar]

sa eva parame dhāmni rājamānaḥ pareśvaraḥ |
tapo'rthaṃ kalpayāmāsa naranārāyaṇaṃ tanūm || 55 ||
[Analyze grammar]

jīvalokasya śāntyarthaṃ duḥkhanāśārthamityapi |
āsurāṇāṃ praśāntyarthaṃ lakṣmīśaḥ kṣīrasāgare || 56 ||
[Analyze grammar]

śvedhāmni ramākānto virājateṃ'śamātrataḥ |
yogināṃ ca satāṃ sādhvīyoṣitāṃ paramo guruḥ || 57 ||
[Analyze grammar]

dhārmikāṇāṃ sa goptā ca nihantā vedavidviṣām |
māyikānāṃ ca māyāyā nihantā sa pareśvaraḥ || 58 ||
[Analyze grammar]

sā māyā ca parā śaktiryadā vidyeti gīyate |
sā māyā cā'parā śaktiryadā'vidyā hi sā matā || 59 ||
[Analyze grammar]

nāśayet sa ca tāṃ māyāṃ mokṣaprado hi mādhavaḥ |
śrīkṛṣṇaḥ sarvaśaktīnāṃ pravartako nivartakaḥ || 60 ||
[Analyze grammar]

ādhārabhūtaḥ sarvāsāṃ nidhānamamṛtasya ca |
ekā śaktiḥ keśavasyā'kṣaraṃ brahma ca dhāma yat || 61 ||
[Analyze grammar]

anyā śaktirvipulā yā saṃsthāpayati vai jagat |
tatrāntaryāmitā tasya cāparā śaktireva sā || 62 ||
[Analyze grammar]

jñānabhaktiprapakṣābhyāṃ samārādhayati prabhum |
sa yāti vai harerdhāma vyatikramya tu kilbiṣam || 63 ||
[Analyze grammar]

sarvāḥ śaktīrvyatikramya māṃ prayāti madiṣṭakṛt |
mamopāsanayā kecid bhavantyapi narāyaṇāḥ || 64 ||
[Analyze grammar]

mama bhāvaiḥ saṃbhṛtāśca tārayanti ca dehinaḥ |
kecid bhavanti lokeśā viṣṇavastatkṛpāvaśāt || 65 ||
[Analyze grammar]

kecit harādayaścāpi kecid brahmādikeśvarāḥ |
teṣu sarveṣu bhagavān prerakaśca nivartakaḥ || 66 ||
[Analyze grammar]

so'yaṃ brahmavidāṃ brahmā svayaṃbhūrviśvatomukhaḥ |
māyāvināmayaṃ devaḥ purāṇo hariravyayaḥ || 67 ||
[Analyze grammar]

yogināmastyayaṃ śaṃbhuḥ strīṇāṃ devī girīndrajā |
ādityānāmayaṃ viṣṇurvasūnāmasti pāvakaḥ || 68 ||
[Analyze grammar]

rudrāṇāṃ śaṃkaraścāyaṃ garuḍaḥ patatāmayam |
airāvato gajendrāṇāṃ rāmaḥ śastrabhṛtāmayam || 69 ||
[Analyze grammar]

ṛṣīṇāṃ ca vaśiṣṭho'yaṃ devānāṃ ca śatakratuḥ |
śilpināṃ viśvakarmā'yaṃ prahlādaḥ suravidviṣām || 70 ||
[Analyze grammar]

munīnāmapyayaṃ vyāso gaṇānāṃ ca vināyakaḥ |
vīrāṇāṃ vīrabhadro'yaṃ siddhānāṃ kapilo muniḥ || 71 ||
[Analyze grammar]

parvatānāmayaṃ merurnakṣatrāṇāṃ tu candramāḥ |
vajraṃ praharaṇānāṃ ca vratānāṃ satyameva saḥ || 72 ||
[Analyze grammar]

ananto bhogināṃ so'yaṃ senānīnāṃ ca pāvakiḥ |
āśramāṇāṃ gṛhasthaḥ sa yugānāṃ satyameva saḥ || 73 ||
[Analyze grammar]

kuberaḥ sarvayakṣāṇāṃ nirvṛtiḥ sarvarakṣasām |
prajāpatīnāṃ dakṣaśca mṛgendrāṇāṃ mṛgādhipaḥ || 74 ||
[Analyze grammar]

vedānāṃ sāmavedaśca japyānāṃ praṇavastvayam |
sūktānāṃ pauruṣaṃ sūktaṃ manurnītimatāṃ hi saḥ || 75 ||
[Analyze grammar]

vidyānāmātmavidyā saḥ tattvānāṃ cetano hi saḥ |
gatīnāṃ muktirevā'yaṃ bandhanānāṃ tu vāsanā || 76 ||
[Analyze grammar]

patnīvrato dvijānāṃ tu satīnāṃ kambharā satī |
sampadāṃ ca mahālakṣmīrūpaḥ saḥ puruṣottamaḥ || 77 ||
[Analyze grammar]

evaṃ vai bhāvayettatra tatra kṛṣṇanarāyaṇam |
tena nārāyaṇaḥ svāmī tatra phalati sarvathā || 78 ||
[Analyze grammar]

sa ca mūrtisvarūpo'sti sarvalokeṣu cānujāḥ |
tathaivācāryarūpo'sti guruḥ śrīparameśvaraḥ || 79 ||
[Analyze grammar]

sādhurūpaḥ sa evā'sti divyadehaḥ sa pāvanaḥ |
pitṛrūpaḥ sa evā'sti mātṛrūpo'pi mādhavaḥ || 80 ||
[Analyze grammar]

satīrūpaḥ patirūpaḥ sa evā'sti narottamaḥ |
aṣṭāvete hi guravastārakā divyabhāvitāḥ || 81 ||
[Analyze grammar]

teṣāṃ pratyupakāro hi na kathaṃcana vidyate |
teṣāṃ nityaṃ priyaṃ kuryāt karmaṇā manasā girā || 82 ||
[Analyze grammar]

ta evaite'nādiśrīmatkṛṣṇanārāyaṇātmakāḥ |
matvaivaṃ ye bhajante tān yānti te paramāṃ gatim || 83 ||
[Analyze grammar]

so'yaṃ sākṣātparabrahā'nādiśrīpuruṣottamaḥ |
sarvāvatāraśāstā ca kṛṣṇanārāyaṇaḥ prabhuḥ || 84 ||
[Analyze grammar]

bhagavāṃścā'kṣarātītaścāntaryāmīśvareśvaraḥ |
bālarūpaḥ kambharāśrīgṛhe cāste'vatīrya ca || 85 ||
[Analyze grammar]

śrīmadgopālabālaḥ saḥ lomaśāśramasannidhau |
prāsāde kānake cāste'kṣarakṣetre'śvasārase || 86 ||
[Analyze grammar]

tīrthe kuṃkumavāpyākhye bhūtale divyavigrahe |
vartate mānave rūpe brahmapriyābhisevitaḥ || 87 ||
[Analyze grammar]

kṛpayā jīvamokṣārthaṃ brahmāṇḍarakṣaṇāya ca |
vartate mānave rūpe mānavarjyo'pi mādhavaḥ || 88 ||
[Analyze grammar]

brahmaviṣṇumaheśānām bhavatāmaṃśarūpiṇām |
dṛndṛśyo vartate bhāgyād yo nā'smaddṛkpragocaraḥ || 89 ||
[Analyze grammar]

ityuktvā virarāmā'sau vāsudevaḥ prabhuḥ kṣaṇam |
dadhyuścitte trayaste'pi divyamānavamacyutam || 90 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne vāsudevagītāyāṃ prabhoḥ prāptisādhanavibhūtīnāṃ nirūpaṇanāmā trinavatitamo'dhyāyaḥ || 93 ||
[Analyze grammar]