Chapter 92

śrīkṛṣṇa uvāca |
śṛṇu tvaṃ rādhike vāsudevaṃ saṃkarṣaṇādayaḥ |
traya īśeśvarā jñānaṃ papracchurbrahmabodhakam || 1 ||
[Analyze grammar]

jñānaṃ jīveśvarāṇāṃ tu bhaktikṛd vada cāgraja |
ko vā tvātmā ca kā muktiḥ saṃsāraḥ kinnimittakaḥ || 2 ||
[Analyze grammar]

kaḥ saṃsārastathā brahma kiṃ tat parataraṃ tataḥ |
tvaṃ vetsi paramaṃ guhyaṃ sarvaṃ vai bhagavan prabho || 3 ||
[Analyze grammar]

nārāyaṇa svayaṃ sākṣātpurāṇā'cintyapūruṣa |
na hyanyo vidyate vettā tvāmṛte puruṣottama || 4 ||
[Analyze grammar]

evamuktvā'niruddhaśca pradyamnaḥ saṃprakarṣaṇaḥ |
dadhyuḥ svasvahṛtsu taṃ kaṃcitparamaṃ puruṣaṃ prabhum || 5 ||
[Analyze grammar]

tāvad vilokayāmāsuḥ śrīhariṃ puruṣottamam |
vihāya vāsudevākhyaṃ rūpaṃ tatkāraṇaṃ param || 6 ||
[Analyze grammar]

anādiśrīkṛṣṇanārāyaṇaṃ brahmaparaṃ harim |
vibhrājamānaṃ muktaiśca sevitaṃ divyamadbhutam || 7 ||
[Analyze grammar]

śrīvatsavakṣasaṃ kāntaṃ prabhāmaṇḍalamaṇḍitam |
sarvāyudhadharaṃ kṛṣṇanārāyaṇaṃ dhiyā yutam || 8 ||
[Analyze grammar]

nityānandaguṇaiśvaryabhūtiśaktisukhāśrayam |
dvibhujaṃ koṭimuktābhirmuktaiḥ sevitapatkajam || 9 ||
[Analyze grammar]

hasantaṃ hāsayantaṃ ca koṭikandarpasundaram |
kiśoraṃ divyaśobhāḍhyaṃ sarvasṛṣṭimanoharam || 10 ||
[Analyze grammar]

ujjvalaṃ saumyabhāvena saṃbhṛtaṃ cāyatekṣaṇam |
pare dhāmni divyagajāsanasthaṃ parameśvaram || 11 ||
[Analyze grammar]

tato'kṣaraṃ brahmadhāma dadṛśuḥ sīmavarjitam |
koṭimuktān dadṛśuścākṣarasaṃjñān manoharān || 12 ||
[Analyze grammar]

tataste dadṛśuḥ śīghraṃ golokaṃ gopasaṃśritam |
gopīgaṇaiḥ śobhitaṃ śrīrādhākṛṣṇā'bhyadhiṣṭhitam || 13 ||
[Analyze grammar]

tataste dadṛśū ramyaṃ vaikuṇṭhaṃ brahmasadṛśam |
lakṣmīnārāyaṇāvāsaṃ koṭipārṣadasaṃśritam || 14 ||
[Analyze grammar]

tato divyaṃ sukailāsaṃ sadāśivaśivāśritam |
dadṛśuste ca bhūmno'thā'mṛtākhyaṃ dhāma śobhitam || 15 ||
[Analyze grammar]

tataste dadṛśurviṣṇorvaikuṇṭhaṃ kṣīrasāgaram |
śvetadvīpaṃ badarīṃ ca vāsudeve'graje tadā || 16 ||
[Analyze grammar]

tatra tatra harermūrtiṃ yādṛśīṃ tādṛśīṃ tu te |
vāsudeve dadṛśurhi sarvāṃ sṛṣṭiṃ ca māyikīm || 17 ||
[Analyze grammar]

atha tiro'bhavat sṛṣṭiḥ kṣaṇānte tejasāṃ cayam |
dadṛśustatra ca divyaṃ saurāṣṭraṃ vai yathāsthitam || 18 ||
[Analyze grammar]

tatra kṣetraṃ cāśvapaṭṭasaro'bhidhaṃ subhāsvaram |
tatra kuṃkumavāpīṃ ca tathā śrīlomaśāśramam || 19 ||
[Analyze grammar]

tatsarvaṃ paramaṃ dhāma divyamuktādirājitam |
brahmapriyābhisaṃvyāptaṃ sāṃkhyayoginyadhiśritam || 20 ||
[Analyze grammar]

anādiśrīkṛṣṇanārāyaṇabhaktādhivāsitam |
divyaśrīkambharālakṣmīgopālakṛṣṇaśobhitam || 21 ||
[Analyze grammar]

prabhāpāravatīlakṣmīmāṇikīrādhikāśritam |
mañjulāsaguṇāhaṃsāvijayālalitāśritam || 22 ||
[Analyze grammar]

śatena dvādaśabhiśca priyābhiradhivāsitam |
anantakoṭayabjakānādhiṣṭhitaṃ divyabhūtikam || 23 ||
[Analyze grammar]

dadaśurdivyakalaśaiḥ prāsādānapi śobhitān |
mahāprāsādametasyā'nādikṛṣṇasya dadṛśuḥ || 24 ||
[Analyze grammar]

svātmādhāraṃ paraṃ divyaṃ yatra śrībhagavān svayam |
kiśorapratibhaścāste bālakṛṣṇo narāyaṇaḥ || 25 ||
[Analyze grammar]

nārāyaṇānāṃ paramaḥ pumān śrīparameśvaraḥ |
īśvarāṇāṃ ca paramaḥ sākṣācchrīpuruṣottamaḥ || 26 ||
[Analyze grammar]

avatārasamūhānāṃ kāraṇaṃ cā'vatārī yaḥ |
kṛṣṇānāṃ cāpi yaḥ kṛṣṇo vyūhānāṃ vyūhakṛtprabhuḥ || 27 ||
[Analyze grammar]

taṃ hariṃ dadṛśū rādhe vāsudeve harau tu te |
vibhrājamānaṃ vimale gajasvarṇāsane harim || 28 ||
[Analyze grammar]

yadantarā sarvametad yato'bhinnamidaṃ jagat |
savāsudevaṃ taṃ dṛṣṭvā mahānandaṃ prapedire || 29 ||
[Analyze grammar]

tataḥ kṣaṇāntare sarvaṃ līnaṃ dadṛśire puraḥ |
vāsudevaṃ dadṛśuste praśāntamanaso'bhavan |
evaṃ pratyakṣavijñānaṃ kārayitvā tu tāṃstataḥ || 30 ||
[Analyze grammar]

vāsudevaḥ samuvāca guhyaṃ jñānaṃ sanātanam |
yanna devā vijānanti yajamānā dvijātayaḥ || 31 ||
[Analyze grammar]

taṃ jñātvā parameśānaṃ brahmībhūtā maharṣayaḥ |
saṃsāraṃ na prapadyante pūrve'pi brahmadhāminaḥ || 32 ||
[Analyze grammar]

ātmā'yaṃ sukhavān svacchaḥ śuddhaḥ sūkṣmaḥ sanātanaḥ |
tadantare tu yaścāste sarvāntaraḥ parātparaḥ || 33 ||
[Analyze grammar]

so'ntaryāmī sa puruṣaḥ sa prāṇaḥ svāmisaṃjñakaḥ |
asmāt sañjāyate viśvaṃ tasya dhāmni pralīyate || 34 ||
[Analyze grammar]

sa māyāṃ chāyayā gṛhṇan karoti vividhāstanūḥ |
nā'sya bandho na tadbhāvo nāyaṃ māyāguṇāśrayaḥ || 35 ||
[Analyze grammar]

yathā prakāśatamasostādātmyaṃ nopapadyate |
tadvadaikyaṃ na sambandhaḥ prapañcaparamātmanoḥ || 36 ||
[Analyze grammar]

chāyātapau yathā loke parasparavilakṣaṇau |
tadvat prapañcapuruṣau vibhinnau paramārthataḥ || 37 ||
[Analyze grammar]

ātmā śuddho nityabuddho muktarūpaḥ svabhāvataḥ |
paramātmā'tiśuddhaśca sarvajñaścātmasusthitaḥ || 38 ||
[Analyze grammar]

vikārahīnau nirdvandvau sadānandapariplutau |
ātmatadantarātmānau sayujau divyasadguṇau || 39 ||
[Analyze grammar]

nityayuktau ca suhṛdau draṣṭārau ca niyāmakau |
ātmā karma kṛtaṃ bhuṃkte'ntaryāmī bhogavarjitaḥ || 40 ||
[Analyze grammar]

diśatyeva yathākālaṃ niyāmya śreṣṭhine phalam |
ahaṃ kartā sukhī duḥkhī kṛśaḥ sthūlaśca mānavān || 41 ||
[Analyze grammar]

ahaṃkāreṇa tadbhoktā bhavatyajñānavaibhavāt |
ajñānādanyathājñānānmanasā saha yujyate || 42 ||
[Analyze grammar]

prākṛtaṃ guṇasaṃsargaṃ yojayitvā mano'sthiram |
svadharmāḍhyaṃ tadātmānaṃ sampādayati vai muhuḥ || 43 ||
[Analyze grammar]

ahaṃkārā'vivekena kartā'haṃ ceti mānayan |
svātmānaṃ cā'kṣaraṃ brahma vismaratyeva kalmaṣī || 44 ||
[Analyze grammar]

anātmanyātmavijñānī sarvaduḥkhapraśevadhiḥ |
rāgadveṣādayaścāpi bhrāntijāstatra yanti ca || 45 ||
[Analyze grammar]

tairdoṣaiḥ puṇyapāpe'yaṃ bhuṃkte svabhāvaje yathā |
bhrāntināśe tu doṣāṇāṃ vigame niṣprapañcakaḥ || 46 ||
[Analyze grammar]

ekaḥ santiṣṭhate deve kṛṣṇanārāyaṇe'rpitaḥ |
saccidānandayogena saccidānandavān sadā || 47 ||
[Analyze grammar]

vartate parameśasya kṛpayā ceśvaro yathā |
yathā vai dhūmasamparkānnākāśo malinaḥ kvacit || 48 ||
[Analyze grammar]

tathā mānasadoṣaiśca nirlepo'kṣarasaṃjñitaḥ |
upādhivarjitaḥ śuddho vimalātmā prakāśate || 49 ||
[Analyze grammar]

jñeyaṃ tyaktvā tato jñaptiṃ jñaptisaṃskāramityapi |
tyaktvā tvātmaprakāśaḥ syād yathā nārāyaṇaḥ svayam || 50 ||
[Analyze grammar]

tasmādātmā'kṣaraḥ śuddho nityaḥ śrīharisaṃśritaḥ |
upāsitavyo mantavyaḥ śrotavyaśca mumukṣubhiḥ || 51 ||
[Analyze grammar]

yadātmani parabrahma bhāti sarvatra sarvadā |
śraddadhānasya bhaktasya tadā sampadyate svayam || 52 ||
[Analyze grammar]

yadā sarvaṃ kāryajātaṃ svasminnevā'bhipaśyati |
kāryajāte nijātmānaṃ tadā sampadyate hariḥ || 53 ||
[Analyze grammar]

yadā sarvaṃ samādhistho nātiriktaṃ prapaśyati |
ekībhūtaḥ pareṇā''tmā tadā muktaḥ prajāyate || 54 ||
[Analyze grammar]

yadā'sya mānasā bhāvā vilīyante pare harau |
tadā'yamamṛtībhūto mokṣaṃ yāti hareḥ padam || 55 ||
[Analyze grammar]

yadā sarvaṃ pṛthagbhūtaṃ tasminneva vilokyate |
tataścāpi ca vistāraṃ tadā'sya brahmayogyatā || 56 ||
[Analyze grammar]

yadā paśyati cātmānaṃ tadātmānaṃ ca kevalam |
tadā'sya brahmasampattirnivṛttirmāyikī tadā || 57 ||
[Analyze grammar]

yadā janmajarāduḥkhavyādhīnāmekabheṣajam |
ātmātmabrahmavijñānaṃ tadā'yaṃ śāśvataḥ śivaḥ || 58 ||
[Analyze grammar]

yathā nadīnadā yānti sāgareṇaikatāṃ tathā |
ātmā'kṣareṇa taccāpi pare brahmaṇi caikatām || 59 ||
[Analyze grammar]

vrajettadā bhavet sākṣādaparokṣānudarśanam |
viśeṣā'dvaitā'dvaitaṃ tad śrutibhiḥ sannirūpitam || 60 ||
[Analyze grammar]

tadvijñānaṃ paraśreyaḥpradaṃ copāsanābhidham |
yatra tajjāyate tatra na prapañco na vāsanā || 61 ||
[Analyze grammar]

ajñānaṃ vartate yatra tatra mohaśca vāsanā |
tasmānmohaṃ parityajya dagdhvā sarvāstu vāsanāḥ || 62 ||
[Analyze grammar]

sarvaśrutisunistāraṃ brahma bhūtvā tared budhaḥ |
vijñānaṃ bhagavadbhaktiṃ yogaṃ saṃsādhya vai dhruvam || 63 ||
[Analyze grammar]

brahmarūpaṃ vibhāvyaiva paraṃ harimavāpnuyāt |
eṣa ātmā'hamavyakto brahmedaṃ dhāma bhaktimat || 64 ||
[Analyze grammar]

brahmaṇyayaṃ paraḥ svāmī so'kṣare puruṣottamaḥ |
viśeṣā'dvaitā'dvaitaṃ tad yo hariḥ parameśvaraḥ || 65 ||
[Analyze grammar]

sarvarasaḥ sarvarūpaḥ sarvagandho'jaro'maraḥ |
sarvataḥ pāṇipādaśca sarvātmā sarvatomukhaḥ || 66 ||
[Analyze grammar]

anādiśrīkṛṣṇanārāyaṇo'ntaryamano'pi saḥ |
apāṇipādo javago grahītā sarvasaṃsthitaḥ || 67 ||
[Analyze grammar]

acakṣurapi caṣṭe'so karṇaśūnyaḥ śṛṇotyayam |
vedā'hamenaṃ puruṣaṃ purāṇaṃ parameśvaram || 68 ||
[Analyze grammar]

pare dhāmni sthitaṃ cāpi kambharāśrīsutaṃ śubham |
kṛṣṇanārāyaṇaṃ śrīśaṃ naranārāyaṇaṃ ca tam || 69 ||
[Analyze grammar]

vāsudevaṃ haraṃ viṣṇuṃ hariṃ sarvāntarasthitam |
paśyanti ṛṣayastaṃ tu tadanugrahaśālinaḥ || 70 ||
[Analyze grammar]

tāpasā naiva paśyanti paśyantyenaṃ hi sevakāḥ |
nirguṇo'malarūpasya yadaiśvaryā'kṣarābhidham || 71 ||
[Analyze grammar]

upāsakāḥ prapaśyanti sūkṣmatattvādidarśinaḥ |
yanna devā vijānanti mohitāstasya māyayā || 72 ||
[Analyze grammar]

kā kathā jīvalokasya śṛṇudhvaṃ bhrātaro mama |
aniruddha tvayi tvāste sarjanaiśvaryamuttamam || 73 ||
[Analyze grammar]

akṣarasyaiva tadboddhaṃ brahmaṇaḥ koṭibhāgajam |
pradyamna tvayi yaccāste poṣaṇaiśvaryamityapi || 74 ||
[Analyze grammar]

akṣarasyaiva tad bodhyaṃ brahmaṇaḥ koṭibhāgajam |
saṃkarṣaṇa tvayi cāste saṃhāraiśvaryamityapi || 75 ||
[Analyze grammar]

akṣarasyaiva tadbodhyaṃ brahmaṇaḥ koṭibhāgajam |
mayi cāste yadaiśvaryaṃ vasatirdīvyatistathā || 76 ||
[Analyze grammar]

akṣarasyaiva bodhyaṃ tad yatprāptaṃ tena vai hareḥ |
ahaṃviśeṣaṇaṃ tatrā'kṣare'dvaitasvarūpiṇi || 77 ||
[Analyze grammar]

viśeṣādvaitametadvai cā'kṣaraṃ brahma vidyate |
tadekaṃ tvakṣaraṃ nānyat samaṃ cākṣarasaṃjñitam || 78 ||
[Analyze grammar]

viśeṣyaṃ tvakṣaraṃ yatrā'dvaite śrīparamātmani |
samanveti sa viśeṣādvaitādvaitaḥ pareśvaraḥ || 79 ||
[Analyze grammar]

māyātītaṃ cākṣaraṃ ca tadatītaḥ paraḥ prabhuḥ |
māyāṃ vihāya jīvāścākṣaraṃ yānti hi tatpadam || 80 ||
[Analyze grammar]

praviṣṭāstasya sāyujyaṃ labhante bhaktiyoginaḥ |
ye hi māyāmatikrāntāḥ sarvā viśvasvarūpiṇīm || 81 ||
[Analyze grammar]

labhante te'kṣaradhāma tatra me paramaṃ padam |
na teṣāṃ punarāvṛttiraiśvarī cāpi māyikī || 82 ||
[Analyze grammar]

prasādāttasya kṛṣṇasyā'kṣareśasya hareḥprabhoḥ |
anādiśrīkṛṣṇanārāyaṇasyetyanuśāsanam || 83 ||
[Analyze grammar]

tatputraśiṣyasādhubhyo dātavyaṃ brahmayoṣite |
pradātavyaṃ na cānyebhyo'pātrebhyo'pathyameva yat || 84 ||
[Analyze grammar]

ityetad rādhike tubhyaṃ mayā jñānaṃ prakāśitam |
vāsudevena yatpūrvaṃ cānujebhyaḥ prakīrtitam || 85 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne vāsudevaḥ gītāyāṃ parabrahmavijñānena viśeṣādvaitā'dvaitena tatpadaprāptyādinirūpaṇanāmā dvānavatitamo'dhyāyaḥ || 92 ||
[Analyze grammar]