Chapter 89

śrīkṛṣṇa uvāca |
kṣetre kuṃkumavāpyākhye prāgbhāge rādhike śubham |
amarāṇāṃ nivāsārhaṃ vanaṃ vai pārijātakam || 1 ||
[Analyze grammar]

viśālaṃ yojanāyāmaṃ tataśceśānadigbhavam |
vanaṃ kādambamutkṛṣṭaṃ yojanatrayavistṛtam || 2 ||
[Analyze grammar]

tataścottarato bhadrānadī divyā virājate |
yasyāṃ sthale sthale sasnau svāmikṛṣṇanarāyaṇaḥ || 3 ||
[Analyze grammar]

tasyāstīre suviśramya snātvā saṃbhakṣya pāyasam |
tato yātrāsamājo vai sasārā'gre gṛṇan harim || 4 ||
[Analyze grammar]

bhūmāvarttagajaścāgre svarṇacitrādirañjitaḥ |
gairikāśailatulyaḥ sa bherīṃ jīmūtasadṛśīm || 5 ||
[Analyze grammar]

udvahan yāti cāgre vai saśabdā garjanāvatīm |
tatpaścāccharabho yāti vairājāvarttanāmakaḥ || 6 ||
[Analyze grammar]

paṭahadvayamucchabdaṃ pṛṣṭhe vahan samucchrayaḥ |
tatpaścānmāṇikīpṛṣṭhe dhvajaṃ śatakarāyatam || 7 ||
[Analyze grammar]

kauśeyaṃ svarṇatārādipañcadevavirājitam |
udvahan yāti vindhyādrirabbhrāṇi karṣayan dhvaje || 8 ||
[Analyze grammar]

tatpaścācchaṃkhanādaśca daśadikṣu ninādavān |
maruddevakṛto bhāti bhūyate svargavāsibhiḥ || 9 ||
[Analyze grammar]

tatpaścād rodasī cāpi ninādayat sudhātujam |
vigalaṃ bhagavān dhṛtvā vāmano yāti hāsayan || 10 ||
[Analyze grammar]

tatpaścācchrīnṛsiṃhaśca svayaṃ vai garjayan diśaḥ |
divyasiṃhacchaṭāśobhaḥ prayāti piṃganetrakaḥ || 11 ||
[Analyze grammar]

tatpaścādaśvinīdevau sūryacandrasamāvubhau |
surūpau turagārūḍhau kurvāte jayaghoṣaṇām || 12 ||
[Analyze grammar]

tatpaścācchvetavārāho dhunvan digantakān balī |
garjayan yāti tīrthārthaṃ śvetavarṇo'tirūpavān || 13 ||
[Analyze grammar]

tato yānti ca gandharvā vādakā vādyavedinaḥ |
vādayanti ca jhaṃkārān karatālān mṛdaṃgakān || 14 ||
[Analyze grammar]

vīṇāṃ mayūrakāṃścāpi tantrīṃ jalaninādakān |
prāṇapāśān gālaśabdān tālikātālapaṭṭakān || 15 ||
[Analyze grammar]

vṛttabherīḥ paṭahāṃśca veṇunālān sṛjihvikāḥ |
trāṭakān citraghoṣāṃśca śalākān rāgiṇīstathā || 16 ||
[Analyze grammar]

evaṃvidhāni vādyāni hyavādyanta tataḥ param |
tato vai kīrtanakārāḥ puṃtīrthāḥ saṃprayānti hi || 17 ||
[Analyze grammar]

divyāḥ siddhāstato yānti satyaḥ sādhvyaśca sādhavaḥ |
kīrtayanti harernāma savādyaṃ kṛṣṇamānasāḥ || 18 ||
[Analyze grammar]

tato yānti pitaraśca jayaśabdaiśca kīrtanaiḥ |
tato vai devatā yānti surāḥ sarve dyuvāsinaḥ || 19 ||
[Analyze grammar]

tato yānti ca ṛṣayaḥ satyasthā bhūgatāstathā |
kīrtayantaśca vedānāṃ mantrān sāmastavāṃstathā || 20 ||
[Analyze grammar]

tato'pi cāraṇā bhāṭā gandharvā gāyakāstathā |
prayānti vādyaghoṣaiśca nāmakīrtanakāriṇaḥ || 21 ||
[Analyze grammar]

tatpaścācca surarājāḥ prayānti lokapālakāḥ |
tatpaścāt saritaḥ sarvā nadyaḥ prasravaṇāni ca || 22 ||
[Analyze grammar]

sarāṃsi ca taḍāgāśca prayānti kīrtayanti ca |
tato yānti ṛṣipatnyo devyastataḥ surastriyaḥ || 23 ||
[Analyze grammar]

kīrtayantyo bālakṛṣṇapadyāni premapūritāḥ |
tato yānti vanāraṇyaśailabhūtīrthamaṇḍalam || 24 ||
[Analyze grammar]

tato dāsāstathā dāsyastato yānti ca mānavāḥ |
evaṃ yātrāpravāhaśca samājo yojanāvadhim || 25 ||
[Analyze grammar]

dīrghāṃ'bhavattadā divyaḥ puṣpavṛṣṭirabhūttadā |
mahīmānāni tīrthāni tvāgacchantīti vīkṣya ca || 26 ||
[Analyze grammar]

anādiśrīkṛṣṇanārāyaṇaḥ svāgatavāñcchayā |
agragobhūccātiharṣāt tathā gopālakṛṣṇakaḥ || 27 ||
[Analyze grammar]

kapilādyāḥ sādhavaśca lomaśādyā maharṣayaḥ |
rādhāramādyāḥ satyaśca śaṃkarādyāśca vaiṣṇavāḥ || 28 ||
[Analyze grammar]

viprā vedavidaścāpi kanyāḥ koṭyarbudārbudam |
brahmapriyāḥ kambharāśrīstathā sarvāśca vallikā || 25 ||
[Analyze grammar]

tīrthaṃ kuṃkumavāpī ca tathā'nyā dīrghikāḥ śubhāḥ |
kṣetraṃ cāśvapaṭṭasarastathā''śramasya pādapāḥ || 30 ||
[Analyze grammar]

kṣetrapālāśca tīrthāni sarvāṇyaśvasarastaṭe |
yāni vasanti ye devā nadyo nadāśca parvatāḥ || 31 ||
[Analyze grammar]

sarve te dhṛtamālāśca madhuparkādisaṃyutāḥ |
gītavāditrayuktāśca tairthikānabhisaṃyayuḥ || 32 ||
[Analyze grammar]

brahmahṛdo'śvataṭākastathā kuṃkumavāpikā |
agre yayurhareḥ pārśve virajādyāstato yayuḥ || 33 ||
[Analyze grammar]

āgatāste mahīmānā vilokya harimandiram |
prāsādaṃ sāptabhaumaṃ ca śātakauṃbhaṃ tathā'param || 34 ||
[Analyze grammar]

namaścakrurdaṇḍavacca dhūliṃ nyadhuśca mūrddhasu |
jayaśabdān jagaduśca pūrṇotsāhapariplutāḥ || 35 ||
[Analyze grammar]

viviśuḥ kṣetrapīṭhaṃ te dūraṃ tu yojanaṃ yadā |
mimiluścakrurālokaṃ jayadhvanīn punaḥ punaḥ || 36 ||
[Analyze grammar]

parasparaṃ sukhavādān papracchuḥ svāgataṃ tathā |
cakrustīrthātmanāṃ nārāyaṇaḥ śrī bhagavān svayam || 37 ||
[Analyze grammar]

aho bhāgyamaho bhāgyaṃ tīrthānāmāgamo mama |
ityuktvā śrīharistebhyo madhuparkādikaṃ dadau || 38 ||
[Analyze grammar]

puṣpahārān candanāni puṣpamālā daduḥ pare |
militvā kuśalaṃ pṛṣṭvā samāśliṣya yathocitam || 39 ||
[Analyze grammar]

tairthikāstīrthakāmāśca kṛṣṇakīrtanatatparāḥ |
āyayuḥ kuṃkumavāpīsannidhāvāśvasārasam || 40 ||
[Analyze grammar]

luluṭhuḥ kṣetramārgasya dhūlyāṃ tīrthāni vai muhuḥ |
mahadbhāgyaṃ manyamānā devā devyastatharṣayaḥ || 41 ||
[Analyze grammar]

kecinnṛtyanti gāyanti vādayantyapare tadā |
dhārayanti rajo mūrdhni dehe sammardayanti ca || 42 ||
[Analyze grammar]

namanti mastakaiḥ kecit kecidañjalinā harim |
kecid vakṣaḥsu ca rajo yojayanti pare mukhe || 43 ||
[Analyze grammar]

svayaṃkumāro bhagavān luloṭha kṛṣṇapādayoḥ |
kecid vijñāya māhātmyaṃ bhaktānāṃ padrajāṃsi ca || 44 ||
[Analyze grammar]

ṛṣīṇāṃ sarvatīrthānāṃ dhārayanti ca mūrdhasu |
kecit patrāṇi puṣpāṇi śalākāśca tṛṇānyapi || 45 ||
[Analyze grammar]

gṛhṇanti tu mukhe dhṛtvā manvate kṛtakṛtyatām |
jalaṃ prasravaṇotthaṃ ca matvā pāpapraṇāśakam || 46 ||
[Analyze grammar]

ghaṭukaṃ ghaṭukaṃ pītvā manvate kṛtakṛtyatām |
kecit tvaśvasarovārispṛṣṭaṃ vāyuṃ samāgatam || 47 ||
[Analyze grammar]

mukhe pītvā muhuryānti nirvṛttiṃ paramāṃ tadā |
kecit smaranti dhāmāni kecittadavatārakān || 48 ||
[Analyze grammar]

kecinmuktān tadaiśvaryasiddhīḥ smaranti taddhṛdaḥ |
āyudhāścakraśaṃkhādyāḥ pārṣadāḥ sevikāstathā || 49 ||
[Analyze grammar]

mahīmānān yadiṣṭaṃ tad dāpayanti pathi drutam |
evaṃ vādyaiḥ kīrtanaiśca vāhanaiḥ premapūrakaiḥ || 50 ||
[Analyze grammar]

jayanādaiḥ saha sarve prāpuḥ saro'śvasaṃjñakam |
yeṣāṃ vajrasamānyāsan pāpāni dehināṃ tadā || 51 ||
[Analyze grammar]

tīrthe tyaktāni sarvāṇi tānyapyasaṃkhyakāni vai |
aśvapaṭṭasarasastu darśanāt haridarśanāt || 52 ||
[Analyze grammar]

dagdhānyeva drutaṃ tatra śeṣamātraṃ na vidyate |
anyatīrthe kṛte snāne yāni prayānti dūrataḥ || 53 ||
[Analyze grammar]

tāni dagdhāni sarvāṇi cāśvasaro vilokanāt |
aho kṛṣṇasya māhātmyaṃ pratyakṣaṃ dṛśyate mahat || 54 ||
[Analyze grammar]

yadrajo yajjalaṃ yasya kṣetrasya patramityapi |
dāhayanti ca pāpāni kiṃ vaktavyaṃ harau tadā || 55 ||
[Analyze grammar]

evaṃ praśaṃsamānāste mahīmānāḥ sarastaṭe |
uttare'tiviśāle ca śāṃkare supradeśake || 56 ||
[Analyze grammar]

viśaśramustathā sasnuḥ papurjalaṃ vavandire |
tīrthavidhiṃ pracakruścākṣālayan pāpamātrakam || 57 ||
[Analyze grammar]

athā'nādikṛṣṇanārāyaṇaṃ saṃsnāpya tajjalaiḥ |
cakruḥ snānāni tīrthādyāḥ papurvāri prasādajam || 58 ||
[Analyze grammar]

divyavārbhirdivyarūpā muktarūpāśca te'bhavan |
evaṃ cāśvasarastīrthaṃṃ kṛtvā vidhānatastataḥ || 59 ||
[Analyze grammar]

yayuḥ śrīkuṃkumavāpīṃ viśālāṃ dhāmarūpiṇīm |
tajjalaṃ vai papuḥ sarve sasnurjalairmuhurmuhuḥ || 60 ||
[Analyze grammar]

tadā sārṣṭi tu te prāptāstīrthādyā harivāñcchayā |
tato brahmahradaṃ gatvā sasnuḥ papuśca tajjalam || 61 ||
[Analyze grammar]

tataḥ sārūpyabhāvaṃ ca prāptāste mahīmānakāḥ |
vālakṛṣṇasamāḥ sarve guṇarūpasamṛddhibhiḥ || 62 ||
[Analyze grammar]

sañjātā muktiyogyāste punarjanmavivarjitāḥ |
athottaraṃ yayuḥ sarve lomaśasyāśramaṃ śubham || 63 ||
[Analyze grammar]

lomaśaḥ svāgataṃ cakre miṣṭānnaphalavāribhiḥ |
bhojayāmāsa tīrthādyān sarvān vai mahīmānakān || 64 ||
[Analyze grammar]

brahmadhāmānītadugdhasārairbhojyaiśca tarpaṇaiḥ |
tṛptiṃ prakārayāmāsa mukhavāsān samārpayat || 65 ||
[Analyze grammar]

yayustīrthāni sarvāṇi devarṣipitṛmānavāḥ |
nadā nadyaḥ parvatāśca vanāraṇyāni yānyapi || 66 ||
[Analyze grammar]

mahīmānāśca te sarve bālakṛṣṇālayaṃ śubham |
divyaṃ divyavibhūtyāḍhyaṃ divyamuktaniṣevitam || 67 ||
[Analyze grammar]

apratarkyānantaśaktisevitaṃ ceśvarāśrayam |
avatāraiḥ sadā juṣṭaṃ sāyujyamuktidaṃ śubham || 68 ||
[Analyze grammar]

tatrānādikṛṣṇanārāyaṇasnātajalahrade |
divye brahmahradaśreṣṭhe prasasnurmahīmānakāḥ || 69 ||
[Analyze grammar]

divyadehā divyadṛṣṭiyuktā divye pare'kṣarāt |
dhāmni sthitān nijān sarve hyapaśyanta hi śāśvatān || 70 ||
[Analyze grammar]

tadā pūrṇaṃ mahimānaṃ vividurmahīmānakāḥ |
sālokyaṃ sārṣṭi sārūpyaṃ sāyujyaṃ cātra santi vai || 71 ||
[Analyze grammar]

pāpamuktiścānyatīrthe tvaśvasaro'ghadāhakam |
sārṣṭidā kuṃkumavāpī brahmahradaḥ svarūpadaḥ || 72 ||
[Analyze grammar]

sālokyadaṃ lomaśasyāśramaṃ divyaṃ hi vartate |
bālakṛṣṇālayaścāyaṃ sāyujyamuktido'sti hi || 73 ||
[Analyze grammar]

aho kṛṣṇapratāpena sarve tvekaikataḥ khalu |
vardhante cātisāmarthye mokṣadāḥ sarvathā'pyaho || 74 ||
[Analyze grammar]

atra vāsaḥ prakartavyo'thavā gantavyamakṣare |
parabrahmaṇi samprāpte ko'nyatra saṃvasedaghī || 75 ||
[Analyze grammar]

evaṃ vai kathayantaste vyadhurmahotsavaṃ niśi |
cāndre tu kumude māse saptamyāḥ kṛṣṇake dale || 76 ||
[Analyze grammar]

gāyanaiḥ kīrtanairnṛtyairbhajanaiḥ stavanaistathā |
dhyānaiḥ kathāśravaiścāpi ninyurniśāṃ sukhaṃ tu te || 77 ||
[Analyze grammar]

prātaḥ snātvā'śvasarasi kṛṣṇārcanārthamāyayuḥ |
sarve tvekādaśe janmadine'ṣṭamyāṃ mahotsave || 78 ||
[Analyze grammar]

nirmite maṇḍape rātrau viśāle viśvakarmaṇā |
madhye gajāsane tatra vyarājata hariḥ svayam || 79 ||
[Analyze grammar]

anyānyapyāsanānyatra siṃhāsanāni sarvaśaḥ |
sthāpitāni ca teṣvatreśvareśvarāḥ pareśvarāḥ || 80 ||
[Analyze grammar]

avatārāstathā muktā muktānyaḥ sādhvya ityapi |
sādhavo brahmaśīlāśca devā devyo maharṣayaḥ || 81 ||
[Analyze grammar]

brahmādyāḥ ṛṣayaścāpi pitaro devakoṭayaḥ |
vyarājanta ca tīrthāni nadā nadyaḥ sarāṃsi ca || 82 ||
[Analyze grammar]

lokapālā rājyapālāḥ śailā vanāni bhūmayaḥ |
araṇyāśca drumā vallyastṛṇāni dīrghikāstathā || 83 ||
[Analyze grammar]

jaḍacetanatattvāni vyarājantā''saneṣu ca |
devavādyānyavādyanta māṃgalyānyabhavaṃstadā || 84 ||
[Analyze grammar]

vedaghoṣāhyajāyantā'bhavatkusumavarṣaṇam |
lomaśo munirāṭ māyāvarjito'pūjayaddharim || 85 ||
[Analyze grammar]

tilakaṃ candrakaṃ bhāle'kārayatparamātmanaḥ |
mukuṭaṃ nidadhe tasya mastake mālikāṃ śubhām || 86 ||
[Analyze grammar]

kānakīṃ taulasīṃ cāpi pauṣpīṃ rātnīṃ dadau gale |
puṣpāṃjaliṃ dadau cāpi durvāṃkurāṇi karṇayoḥ || 87 ||
[Analyze grammar]

haste śrīphalamagryaṃ ca dadau phalāni cāgrataḥ |
candanaṃ pādayoścāpyavardhayaccākṣataistataḥ || 88 ||
[Analyze grammar]

ārārtrikaṃ hareścakre āśīrvādān dadau śubhān |
atha śrīkaṃbharādevī pupūja bālakṛṣṇakam || 89 ||
[Analyze grammar]

śrīmadgopālakṛṣṇaśca hāraṃ kṛṣṇagale nyadhāt |
bhagavān śukadevaśca vallabhādyā daduḥ srajaḥ || 90 ||
[Analyze grammar]

hemanto bhagavāścāpi haimyupadāḥ samuttamāḥ |
santoṣā cāmṛtā dugdhā jīvantyādyā daduḥ srajaḥ |
tilakaṃ kauṃkumaṃ cakrurbhāle binduṃ harestataḥ || 91 ||
[Analyze grammar]

atheśvarā avatārā muktā muktānya īśikāḥ |
pūjayitvā''rārtrikaṃ ca pracakruḥ śrīharestadā || 92 ||
[Analyze grammar]

brahmavratāḥ ṛṣayaśca pitaraḥ suramānavāḥ |
devā devyo nadā nadyaḥ sarāṃsyupajalānyapi || 93 ||
[Analyze grammar]

śailāśca bhūmayo'khātāstīrthāni ca vanāni ca |
araṇyāni ca tattvāni pupūjuḥ parameśvaram || 94 ||
[Analyze grammar]

ārārtrikaṃ tathā puṣpāñjalīn tathopadā daduḥ |
ābhūṣaṇāni vastrāṇi tathopakaraṇānyapi || 95 ||
[Analyze grammar]

ūrmikāḥ phalapuṣpāṇi ratnāni hīrakāṇi ca |
yānāni kalpavṛkṣāṃśca dadurdivyāni pūjane || 96 ||
[Analyze grammar]

evaṃ pūjottaraṃ sabhāparihārottaraṃ hariḥ |
bhojayāmāsa sarvān vai mahīmānān gṛhīyakān || 97 ||
[Analyze grammar]

āgantukānatithīṃśca sarvān dehina ityapi |
dadau tu dakṣiṇāstebhyaḥ prāsādikāni bhāvataḥ || 98 ||
[Analyze grammar]

tadā tīrthaiḥ kṛtā tatrā'bhyarthanā śrīhareḥ puraḥ |
labdhvā mokṣapradaṃ lābhaṃ cānyaṃ lābhaṃ ka icchati || 99 ||
[Analyze grammar]

tasmānmokṣaṃ kṛpāsindho dehi naḥ śāśvataṃ sukham |
hariḥ kṛpayā teṣāṃ vai vyadhād rūpatrayaṃ tadā || 100 ||
[Analyze grammar]

mūlaṃ divyaṃ tathā chāyāṃ mūlarūpāṇi dhāmasu |
vimānaiḥ so'preṣayacca pārṣadaiḥ saha keśavaḥ || 101 ||
[Analyze grammar]

divyānyatha svarūpāṇi svasannidhāvarakṣayat |
aśvapaṭṭasaraḥkṣetre yatheṣṭaṃ nyavasaṃśca te || 102 ||
[Analyze grammar]

tīrthātmakāḥ samūrtāśca viśvakarmakṛteṣu ca |
yogyālayeṣu santuṣṭā hareḥ sevābhilāṣukāḥ || 103 ||
[Analyze grammar]

chāyārūpāṇi tīrthānāṃ yāni tatrā'bhavaṃstadā |
tebhyaḥ prāha prabhurlokapāvanārthaṃ śubhaṃ vacaḥ || 104 ||
[Analyze grammar]

madicchayaiva tīrtheśā yuṣmajjanmā'sti bhūtale |
lokānāṃ pāvanārthaṃ vai tasmādgantavyamīśvarāḥ || 105 ||
[Analyze grammar]

kāryarūpeṇa tatraiva sthātavyaṃ yatra saṃsthitiḥ |
mayā kṛtā'sti loke'tra nadīnadasarāṃsi ca || 106 ||
[Analyze grammar]

tattathaiva hi vastavyaṃ pāpipāpadahāya vai |
āgantavyaṃ prativarṣaṃ janmāhe mama sarvaśaḥ || 107 ||
[Analyze grammar]

parvaṇyekādaśīkāle kuṃbhe māghe ca kārtike |
saṃkrāntau śrāvaṇe cāpi vaiśākhe puruṣottame || 108 ||
[Analyze grammar]

ityuktāste samūrtāśca tīrtheśvarāḥ praṇamya ca |
yayurnaijān pradeśāṃśca mahīmānā yayustathā || 109 ||
[Analyze grammar]

brahmapriyā hariṃ kāntaṃ prapūjya lomaśāśramam |
yayuśca rādhike sarve svasvasthānāni mānavāḥ || 110 ||
[Analyze grammar]

rātrāvapyutsavaḥ śreṣṭhaḥ kṛto nartanagāyanaiḥ |
paṭhanācchravaṇāccāpi bhuktimuktiprado bhavet || 111 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne sarvatīrthadevādīnāṃ kuṃkumavāpīyātrāgamanaṃ śrīharerjanmadinotsavaścetyādinirūpaṇanāmā navā'dhikā'śīti |
tamo'dhyāyaḥ || 89 ||
[Analyze grammar]