Chapter 88

śrīkṛṣṇa uvāca |
śrūyatāṃ rādhike divyaṃ camatkāraṃ punarhareḥ |
prayāge kuṃbhayoge tu koṭiśo dehino yayuḥ || 1 ||
[Analyze grammar]

mānavā nāgadaityāśca surāḥ ṛṣigaṇāstathā |
pitaro munayaḥ siddhāḥ śrāvaṇe tatra cāyayuḥ || 2 ||
[Analyze grammar]

daśakrośeṣu sarvatra nagaraṃ nūtanaṃ hyabhūt |
tadbahirdevavṛkṣāśca vallikā ūṣurutsukāḥ || 3 ||
[Analyze grammar]

divyānyapi ca tīrthāni divyānyapi sarāṃsi ca |
saritaḥ sarvato divyāḥ kūpā vāpyaśca dīrghikāḥ || 4 ||
[Analyze grammar]

āyayustatra vai snātuṃ kuṃbhayoge tu saṅgame |
gaṃgāyamunayoryoge sarasvatyāḥ samāgame || 5 ||
[Analyze grammar]

śrāvaṇe ca tathā bhādrapade sasnuśca tīrthake |
tairthikairnijapāpāni triveṇyāṃ kṣālitāni vai || 6 ||
[Analyze grammar]

atha tatra mahātyāgī sādhuḥ sanatkumārakaḥ |
brahmaputraḥ pañcavarṣabālarūpaḥ samāyayau || 7 ||
[Analyze grammar]

divyā'ṇuvyomayānastho'yutabhāskarasannibhaḥ |
dyotayan bhūtalaṃ sarvaṃ diśo'mbaraṃ samantataḥ || 8 ||
[Analyze grammar]

āścaryaṃ dehinaḥ prāpurdevādyāstoṣamāyayuḥ |
vimānaṃ sūkṣmarūpaṃ tadvikāsamagamat punaḥ || 9 ||
[Analyze grammar]

yatra divyasvarūpaḥ sa yogī bālo hyadṛśyata |
śanairavātarad bhūmāvakṣayavaṭasannidhau || 10 ||
[Analyze grammar]

tatra tasthau mahāyogī śīghraṃ cādṛśyatāṃ gataḥ |
prāvirāsa triveṇyāṃ saḥ sasnau śīghraṃ hariṃ smaran || 11 ||
[Analyze grammar]

tiro bhūtvā kṣaṇād yatra vimānaṃ tatra cāyayau |
vaṭasparśaṃ tataḥ kṛtvā nanāma vaṭaśāyinam || 12 ||
[Analyze grammar]

pupūja divyakusumairvavande vedasaṃstavaiḥ |
tāvattatrā''yayurjñātvā devarṣipitṛmānavāḥ || 13 ||
[Analyze grammar]

darśanārthaṃ samāgatya puṣpādyaistamapūjayan |
svāgataṃ kuśalaṃ pṛṣṭvā parasparaṃ ca te tataḥ || 14 ||
[Analyze grammar]

tasthuścāpi niṣeduśca viśāle bhūtale divi |
tāvattatra tu tīrthāni nadā nadyaḥ samāyayuḥ || 15 ||
[Analyze grammar]

prayāgo mūrtimāṃścāpi sarāṃsi kūpavāpikāḥ |
pūṣā kaṭvī ca pannārī candrāvatī ca mañjirā || 16 ||
[Analyze grammar]

indrāvatī kuśī mahānadī huhūgalī tathā |
gaṇḍakī kañcanagaṃgā śatalājā ca gogarā || 17 ||
[Analyze grammar]

cambalā cīnapā nandā jhelamā kābilā nadī |
luṇī sindhustathā cānyā militvā brahmaṇaḥ sutam || 18 ||
[Analyze grammar]

sanatkumāraṃ papracchurnatvā pāpavināśakam |
ṛṣiे dvādaśavarṣeṣu yāni pāpāni dehinām || 19 ||
[Analyze grammar]

asmāsu tu samāgatya kṣālitāni bhavanti vai |
tāni tiṣṭhanti sarvāṇi dvādaśavatsarāṇi ca || 20 ||
[Analyze grammar]

kuṃbhasnānaprasaṃgena tyaktānyatra prayāgake |
tadā vayaṃ sukhaṃ śāntiṃ prāpnumaḥ pāpavarjitāḥ || 21 ||
[Analyze grammar]

kintu varṣe vatsare ca prativarṣaṃ kathamṛṣe |
pāpanāśo bhavennastu yena śāntirbhavet sadā || 22 ||
[Analyze grammar]

māse māse tathā pakṣe ghorapāpadine tathā |
yatra gatvā pāpaśāntiryathā bhavet pradarśaya || 23 ||
[Analyze grammar]

mahāpāpātipāpānāṃ jvalanaṃ yatra jāyate |
tatsthalaṃ dāhakaṃ vipra pradarśaya ca naḥ prabho || 24 ||
[Analyze grammar]

prayāgaśca haridvāraḥ puṣkaro nāśikastathā |
kuṃbhe pāpaharāḥ sarve pāpavanto bhavanti te || 25 ||
[Analyze grammar]

tataste pāpanāśārthaṃ yānti śrīkṛṣṇagomatīm |
ityevaṃ nāradāt pūrvaṃ śrutaṃ godāvarītaṭe || 26 ||
[Analyze grammar]

tatra yāmo'thavā śreṣṭhaṃ tīrthottamaṃ bhaved bhuvi |
kathayā'tra ṛṣe sarvaṃ viditaṃ te'sti mānase || 27 ||
[Analyze grammar]

iti pṛṣṭo brahmaputraḥ sanātanahariḥ svayam |
sanatkumāranāmā'sau prāha tirthāni tādṛśam || 28 ||
[Analyze grammar]

śreṣṭhācchreṣṭhatamaṃ sadyaḥ pratyahaṃ pāpadāhakam |
mahāpāpātipāpānāṃ yāvadbrahmāṇḍavartinām || 29 ||
[Analyze grammar]

īśvarāṇāmīśvaro yaścāvatārādhipaḥ prabhuḥ |
paramātmā mahākṛṣṇo'nādikṛṣṇanarāyaṇaḥ || 30 ||
[Analyze grammar]

parabrahmā'kṣaramuktapatiḥ paratarātparaḥ |
paradhāmanivāsaśca svāmī svāminikeśvaraḥ || 21 ||
[Analyze grammar]

bhagavatāṃ yāvatāṃ yo bhagavān yasya no samaḥ |
adhikastu bhavennaiva yatra kāṣṭhā parā gatiḥ || 32 ||
[Analyze grammar]

so'yaṃ rājā'dhirājaśca svamūrteḥ kṣaṇamātrataḥ |
rādhāpatiṃ śrīpatiṃ ca lakṣmīpatiṃ satīpatim || 33 ||
[Analyze grammar]

āviścakāra vasituṃ tebhyo dhāmāni saṃdadau |
dadāvaiśvaryasiddhīśca dadau nijaguṇāṃstathā || 34 ||
[Analyze grammar]

so'yaṃ śrīkambharāputraḥ śrīmadgopālanandanaḥ |
sṛṣṭyādau yatra prathamaṃ prāvirbabhūva bālavat || 35 ||
[Analyze grammar]

vartate kuṃkumavāpīkṣetre muktaprasevitaḥ |
muktānībhiḥ sevitaśca brahmapriyāprasevitaḥ || 36 ||
[Analyze grammar]

munibhirlomaśādyaiśca brahmaviṣṇumaheśvaraiḥ |
avatāraiḥ sevitaśca sahasrabhujaviṣṇubhiḥ || 37 ||
[Analyze grammar]

lakṣamastakavedhobhirvāsudevādibhistathā |
sevito vandito yatra bhūmāvakṣarasaṃjñake || 38 ||
[Analyze grammar]

kṣetre'śvapaṭṭasaraso'bhitaḥ krīḍati mādhavaḥ |
lomaśasyāśramasyāpyantike sarvatra vartate || 39 ||
[Analyze grammar]

yatra muktā vṛkṣarūpā surapatnyaśca vallayaḥ |
muktāḥ stambasvarūpāśca vartante darśanecchayā || 40 ||
[Analyze grammar]

yatprasādecchukā devā bhūtvā pipīlikātmakāḥ |
api haṃsacaṭakādyāścarantyaśvasaro'bhitaḥ || 41 ||
[Analyze grammar]

daśayojanakaṃ kṣetraṃ cākṣarabrahma tanmatam |
yadrajasā parivyāptāḥ kīṭā yānti parāṃ gatim || 582 ||
[Analyze grammar]

pratyaṇubhūtalaṃ tattu divyaṃ mokṣapradaṃ śubham |
parameśvarayogena pavano'pi pramokṣadaḥ || 43 ||
[Analyze grammar]

vallayaścāpi vṛkṣā vai lokān pavitrayanti hi |
aśvapadrṛsarasyeva bhagavān nityameva tu || 44 ||
[Analyze grammar]

snāti khelati bhaktaiśca brahmahrado'tra vartate |
gaṃgādyāni sutīrthāni vartante tajjalādiṣu || 45 ||
[Analyze grammar]

amṛtākhyo hradaścāpi virajā yamunādikāḥ |
vartante tatra sarasi śrīhareryogalālasāḥ || 46 ||
[Analyze grammar]

tādṛśaṃ pāvanaṃ loke svarge satye rasātale |
vaikuṇṭhādau ca vā nadyo vartante nādhikaṃ tataḥ || 47 ||
[Analyze grammar]

puruṣottamayogāt tat saro'kṣarasvarūpatām |
prāptaṃ sarvokṛṣṭatāṃ ca pāpatāpanivārakam || 48 ||
[Analyze grammar]

nityaṃ gatvaiva tatraiva snātavyaṃ sāyamityapi |
divājātāni pāpāni dahyanti tatprasaṃgataḥ || 49 ||
[Analyze grammar]

prātargatvā''plavanaṃ ca kāryaṃ tena niśodbhavam |
pāpaṃ sarvaṃ vilīyeta snātuścā'śvasarovare || 50 ||
[Analyze grammar]

pratiparva pragantavyaṃ snātavyaṃ tatra dehibhiḥ |
divyā'divyairātmabhiśca vāsanākalmaṣāpahe || 51 ||
[Analyze grammar]

māse māse ca vā varṣe ṛtau vā cāyane'pi vā |
snātavyaṃ tatra gatvaiva sarvapāpaṃ daheddhi tat || 52 ||
[Analyze grammar]

tatrā''ste kuṃkumavāpī yasyā jalaṃ hariḥ svayam |
sadā pibati naivedyaiḥ saha vāpyā jale tathā || 53 ||
[Analyze grammar]

aśvapaṭṭasaraścedaṃ nityaṃ snāti prage hyage |
seyaṃ kuṃkumavāpīti śrīharerhṛdayaṃ matam || 54 ||
[Analyze grammar]

tatparaṃ nāsti tīrthaṃ vai dhāmalokeṣu kutracit |
devalokeṣu vā nāsti nāstīśvarādidhāmasu || 55 ||
[Analyze grammar]

kutaḥ pṛthvyāṃ tu labhyeta vinā kuṃkumavāpikām |
kuṃkumavāpikātulyā kuṃkumavāpikā svayam || 56 ||
[Analyze grammar]

kṛṣṇanārāyaṇatulyaḥ kṛṣṇanārāyaṇaḥ svayam |
kaṃbharāśrīsatītulyā kaṃbharāśrīsatī svayam || 17 ||
[Analyze grammar]

gopālakṛṣṇatulyaśca gopālakṛṣṇa eva saḥ |
akṣaraṃ cākṣaratulyaṃ paraṃ tulyaṃ na vidyate || 58 ||
[Analyze grammar]

etadbrahmāṇḍatulyaṃ ca etadbrahmāṇḍameva hi |
yatrā'nādiḥ parabrahma kṛṣṇanārāyaṇo'sti hi || 59 ||
[Analyze grammar]

tatra nadyo bhavatyastu gatvā kurvantu cāplavam |
aśvapaṭṭasarodivyavāriṇi prātareva ca || 60 ||
[Analyze grammar]

pibantu kuṃkumavāpījalaṃ haripadāmṛtam |
pratyakṣaṃ bālakṛṣṇaṃ ca prasevantāṃ divāniśam || 61 ||
[Analyze grammar]

vasantu devyastatraiva mūlarūpaiḥ sadā sukham |
kāryarūpairviharantu deśeṣu jalarūpikāḥ || 62 ||
[Analyze grammar]

bālakṛṣṇasya yogena yūyaṃ prāpsyatha satsukham |
lānirdeśyamavarṇyaṃ cā'sīmātyānandalakṣaṇam || 63 ||
[Analyze grammar]

yanmūrtisthaḥ parānando'kṣare brahmaṇi nāsti ca |
anyatra tu kutaḥ syādvai tat sukhaṃ lapsyatha dhruvam || 64 ||
[Analyze grammar]

sarvātmanā'rpaṇenaiva bālakṛṣṇasya sevane |
sarvaṃ sukhaṃ haristuṣṭo dāsyatyeva nijapriyam || 65 ||
[Analyze grammar]

yatrā'ntaraṃ manāk cāste tatrā''nande'pi cāntaram |
yatrāntaraṃ na tatrāsti tatrānande na cāntaram || 66 ||
[Analyze grammar]

dvayoraikye pravāhāśca sukhasyā''virbhavanti vai |
sacchrīkṛṣṇo naraśreṣṭhaḥ cit bhavatyastu sevikāḥ || 67 ||
[Analyze grammar]

tayorānanda evāyaṃ tatra duḥkhasya kā kathā |
pāpāni kṛṣṇayogena vilīyante kṣaṇe kṣaṇe || 68 ||
[Analyze grammar]

puṇyānāṃ parvatāstatra prodbhavanti kṣaṇe kṣaṇe |
ānandānāṃ pravāhāśca sāmudrā iva sarvaśaḥ || 69 ||
[Analyze grammar]

jāyante śrīhareryogāt sevantāṃ yāntu taṃ harim |
ityevaṃ kathyamānānāṃ nadīnāṃ romamaṇḍalāt || 70 ||
[Analyze grammar]

niryayuḥ sūkṣmakīṭā vai kṛṣṇavarṇāḥ samantataḥ |
tebhyaḥ pṛṣṭaṃ tadā tābhiḥ ke bhavanto'tra niryayuḥ || 71 ||
[Analyze grammar]

ūcuḥ kīṭā vayaṃ pāpānyaghināṃ pāparūpiṇaḥ |
bhavatīṣu samutsṛjya pāpino yānti vai gṛham || 72 ||
[Analyze grammar]

vayaṃ tāni nirgatā vo dehebhyo'śvasaraḥsmṛteḥ |
gamiṣyāmo vayaṃ nadyastvanyatra parvatādiṣu || 73 ||
[Analyze grammar]

anyathā vastatra gatvā snānamātreṇa naḥ kṣayaḥ |
ityevaṃ bhayamāsādya nirgatānyatra jīvataḥ || 74 ||
[Analyze grammar]

ye smṛtvā kuṃkumavāpīṃ bālakṛṣṇaṃ paraṃ prabhum |
aśvapaṭṭasaraḥkṣetramakṣaraṃ yānti tatprati || 75 ||
[Analyze grammar]

taiḥ kṛte saṃkrame śīghraṃ naśyantyaghāni sarvaśaḥ |
tasmādvayaṃ jīvanecchāvanto yāmaḥ sthalāntaram || 76 ||
[Analyze grammar]

maraṇājjīvanaṃ śreṣṭhaṃ tapasā vā kṣudhā'pi vā |
kvacidavaśyaṃ jāyeta jīvata bhadradarśanam || 77 ||
[Analyze grammar]

puruṣārtho'pi jāyeta labhyeteṣṭaṃ punaḥ punaḥ |
ityuktvā niryayuḥ sarvāghāni saridgaṇāttadā || 78 ||
[Analyze grammar]

tīrthāni cāpurāścaryaṃ yasya śravaṇataḥ khalu |
pāpāni yānti vai dūraṃ tattīrthaṃ kīdṛśaṃ bhavet || 79 ||
[Analyze grammar]

tasmād gatvaiva sevyaṃ tat vastavyaṃ tatra caiva nu |
iti niścitya ca muniṃ praśaśaṃsuḥ punaḥ punaḥ || 80 ||
[Analyze grammar]

pupūjuścātibhāvena samūcuśca muniṃ muhuḥ |
sanatkumāra bhagavan prāpaya kṣetrameva naḥ || 81 ||
[Analyze grammar]

tvayā sahaikavāraṃ tvamupakāraṃ vidhehi naḥ |
omityevaṃ jagādā'sau munistīrthāni tatkṣaṇam || 82 ||
[Analyze grammar]

pṛthivyāṃ yāni kānyeva jahṛṣuścāti sarvaśaḥ |
śīghraṃ vārtā prakāśaṃ sā'bhavat kuṃbhā''gateṣu tu || 82 ||
[Analyze grammar]

sanatkumāro bhagavān sarvapāpaviśuddhaye |
anādiśrīkṛṣṇanārāyaṇaṃ prati prayāti vai || 84 ||
[Analyze grammar]

sarvatīrthāni cādāya saha kuṃkumavāpikām |
yatra sākṣāddhariścāste bālakṛṣṇaḥ pareśvara || 85 ||
[Analyze grammar]

aśvapaṭṭasaraḥkṣetre yatrāste lomaśo muniḥ |
kuṃbhaṃ kṛtvā tu gacchāmo divyatāprāptaye khalu || 86 ||
[Analyze grammar]

ityevaṃ niścayaṃ kṛtvā dhṛtvopakaraṇāni ca |
tīrthayātrāvidhānārthaṃ tīrthāni niryayustadā || 87 ||
[Analyze grammar]

sarvakhaṇḍasthanadyastu sarvakhaṇḍasarāṃsi ca |
sarvakhaṇḍagatāḥ kūpā vāpyo'khātāśca sāgarāḥ || 88 ||
[Analyze grammar]

nirjharaṇāni sarvāṇi taṭākā dīrghikāstathā |
saṃgamāni nadīnāṃ ca samudrasaritāṃ tathā || 89 ||
[Analyze grammar]

jalatīrthāni cālokya pṛthvītīrthāni yānyapi |
pārvatāni sthalāni gahvarāṇyucchrayāṇi ca || 90 ||
[Analyze grammar]

vanānyaraṇyavaryāṇi ghāṭāni saritastathā |
dvīpānāṃ saritaścāpi tīrthayātrārthamāgatāḥ || 91 ||
[Analyze grammar]

mimiluḥ sahayoginyaḥ sahayogā yathāyatham |
parvatāḥ śṛṃgaśailāśca taddevā devikāstathā || 12 ||
[Analyze grammar]

hradā hadinyaḥ sarvāstu padbhiryātrāṃ vyadhurhitām |
lakṣasaṃkhyāni tīrthāni tathā'nye lakṣaśo'pi ca || 93 ||
[Analyze grammar]

vādyairvāditrakairvaṃśaistrāsakaiḥ karatālakaiḥ |
mṛdaṃgairdvimṛdaṃgaiśca bherībhiḥ svaravādyakaiḥ || 94 ||
[Analyze grammar]

tāratantrībhirevāpi tumburādyaistathetaraiḥ |
suvādyaiḥ saha gāyantaḥ kīrtanāni harestu vai || 95 ||
[Analyze grammar]

āśvīnamāsamāsādya prayāgānniryayuḥ sukham |
mārge te puṣkaraṃ kṛtvā gatvā siddhāśramaṃ tathā || 96 ||
[Analyze grammar]

satīṃ bahucarāṃ natvā catuṣṭilakaparvatam |
dṛṣṭvā tīrthāni devāśca siddhā maharṣayastathā || 97 ||
[Analyze grammar]

pitaraḥ parvatādyāśca divyarūpadharāḥ khalu |
āyayuḥ kuṃkumavāpīkṣetrasīmāntikaṃ mudā || 98 ||
[Analyze grammar]

sanatkumārasahitāḥ ṛṣayaśca mahārṣayaḥ |
tathā'nye divyadehāśca yogino'pi samāyayuḥ || 99 ||
[Analyze grammar]

viśaśramustu te kṣetrāduttarāt śāṃkarīṃ diśam |
kramavyūhaṃ tataścakruḥ samājotsavabodhakam || 100 ||
[Analyze grammar]

rādhike svargavāsinyo devyo gāndharvya ityapi |
satyaḥ sādhvyaḥ samājagmustīrthadarśanalālasāḥ || 101 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne śrīsanatkumārarṣipradarśitā'śvapaṭṭasaromāhātmyena sarvatīrthānāṃ prayāgataḥ kuṃkumavāpīṃ prati yātrānirdeśa |
nāmā'ṣṭāśītitamo'dhyāyaḥ || 88 ||
[Analyze grammar]