Chapter 55

śrīkṛṣṇa uvāca |
śṛṇu tvaṃ rādhike rājā parameśaṃ tadā''rthayat |
mṛtānāṃ tu yathā muktistathā kuru dayāṃ kuru || 1 ||
[Analyze grammar]

vimānena samāgatya yatra yatrā'bhavad raṇaḥ |
tatra tatra vihṛtyaiva kuru tīrthāni keśava || 2 ||
[Analyze grammar]

bhaviṣyāṇāṃ ca lokānāṃ bhūrbhavenmuktibhājanā |
evaṃ kṛpāṃ parāṃ nātha pāpināṃ kuru tāriṇīm || 3 ||
[Analyze grammar]

śrīkṛṣaganārāyaṇa uvāca |
dhanyā te vimalā rājanmatistvadya pravartate |
abriktaṃ sarvathā deśaṃ kariṣye tīrtharūpiṇam || 4 ||
[Analyze grammar]

nadyastā brahmaṇaḥ putryo daityayogena daityatām |
tūpagatāḥ pāvanāstāḥ pāvayiṣye'dya vai punaḥ || 5 ||
[Analyze grammar]

ityuktamātre nadyaśca sarāṃsi parvatāstathā |
mūrtimantaḥ samāyātāḥ prārthayituṃ prabhuṃ tadā || 6 ||
[Analyze grammar]

ūcurnātha kṛpāsindho pāvayā'smān samantataḥ |
hariḥ prāha tathā'stvevaṃ pāvayiṣye drutaṃ hi vaḥ || 7 ||
[Analyze grammar]

atha sampūjya tā nadyo draṣṭuṃ ca brahmakanyakāḥ |
svabhaginīrdraṣṭumeva vimāne cordhvabhūstare || 8 ||
[Analyze grammar]

yayustatra militvā tā āmantryā''bhāṣya vai muhuḥ |
yayuścā'dṛśyatāṃ drāk ca tataḥ kṛṣṇanarāyaṇaḥ || 9 ||
[Analyze grammar]

vimānena yayau kartuṃ tīrthāni pāvanāni ca |
uddhartuṃ ca mṛtātmanaḥ pradakṣiṇakrameṇa vai || 10 ||
[Analyze grammar]

prathamaṃ śrīharistatra vimānena tadottaram |
yayau pāvayituṃ yuddhakṣetrāccaṇḍanadīṃ śubhām || 11 ||
[Analyze grammar]

caṇḍanadyāṃ tathā snātvā caṇḍasarasi vai hariḥ |
vaimānikāstathā sarve narā nāryo mahattamam || 12 ||
[Analyze grammar]

tīrthaṃ vidhāya ca tatastrirāśiparvataṃ yayuḥ |
parvataṃ ca pradakṣiṇaṃ kṛtvā snātvā jalādiṣu || 13 ||
[Analyze grammar]

tīrthaṃ tatparvataṃ kṛtvā nārāyaṇyā dvitīyake |
dhodhe snātvā tṛtīye ca dhodhe snātvā caturthake || 14 ||
[Analyze grammar]

dhodhe snātvā pañcame ca snātvā dhodhe tataḥ param |
antavairāsaṃgame ca snātvā ca ṣaṣṭhadhodhake || 12 ||
[Analyze grammar]

śvetanīlasvarūpiṇyornārāyaṇyośca saṃgame |
snātvā tūyānasarasi tīrthāni vyadadhāt prabhuḥ || 16 ||
[Analyze grammar]

ābālākhyataḍāgeṣu snātvā cakre tu mokṣadān |
taḍāgānnirmalajalān caturaśca tataḥ param || 17 ||
[Analyze grammar]

ukteṣu tīrthavaryeṣu ye ye mṛtā mahāhave |
tāṃstān pretān samāhūya teṣāṃ mokṣaṃ vyadhātprabhuḥ || 18 ||
[Analyze grammar]

divyayānaistu te sarve svargaṃ yayurhi śāśvatam |
apārakaruṇāsindhurmokṣado yatra vai hariḥ || 19 ||
[Analyze grammar]

tatra kā karmasāpekṣā gatiḥ kā kṛpayodbhavā |
jubvāṃ nadīṃ tataḥ spṛṣṭvā rudrabāṣpasarovaram || 20 ||
[Analyze grammar]

snātvā mārkiśanadhodhe ālāvartasarovare |
antāvartataḍāge ca snātvā kimusarovare || 21 ||
[Analyze grammar]

vijñatūrīyasarasi nyājāsarovare tathā |
tuṃgānīke taḍāge ca snātvā rukvasarovare || 22 ||
[Analyze grammar]

raphijyāyāṃ tataḥ snātvā rovumāyāṃ samāplavat |
nyājāsarovare snātvā śivāsarovare tataḥ || 23 ||
[Analyze grammar]

jāmbūjāyāṃ tataḥ snātvā baṃgavyālīsarovare |
māvūrasarasi snātvā kaṅgūsnānaṃ tato'karot || 24 ||
[Analyze grammar]

tatra tatra ca nidhanaṃ gatān pretān kṛpālayaḥ |
amokṣayat tathā tāni tīrthānyapyākarot prabhuḥ || 25 ||
[Analyze grammar]

tato yayau dinolūkataḍāgaṃ bhagavān hariḥ |
vijñaturīyadhodhe ca jñātvā kubaṃgikātaṭe || 26 ||
[Analyze grammar]

tajje sarovare snātvā limpāpagāyāṃ cāplavat |
bālanadyāṃ tataḥ snātvā dakṣiṇāvargaparvatam || 27 ||
[Analyze grammar]

vimānenordhvamullaṃghya kāruvārdhiṃ jagāma ha |
vimānādavatīryā'tha sarve sasnuśca sāgare || 28 ||
[Analyze grammar]

tataste yānamāruhya orañjāsaritaṃ yayuḥ |
snātvā raṇe mṛtān uktasthāneṣvapi mṛtāsurān || 29 ||
[Analyze grammar]

amokṣayacchrībhagavān kālahariraṇāttataḥ |
yayau kunayanāṃ snātvā kurenṛkyāṃ samāplavat || 30 ||
[Analyze grammar]

gatvā kuvaṃśajāṃ snātvā sthānalyākhye jalāśaye |
karmāṅgyāṃ ca mahānadyāṃ snātvā mahāsamāgame || 31 ||
[Analyze grammar]

limpāsarovare snātvā tumbāsarovare tathā |
sthānalyādhodhabhāgeṣu snātvā āruvamījale || 32 ||
[Analyze grammar]

karmāṅgyāṃ ca tathoveṇyāṃ snātvā tayoḥ samāgame |
sāmudrasaṃgame snātvā koṭipretapramokṣaṇam || 33 ||
[Analyze grammar]

cakāra śrīharistatra mṛtānāṃ śāśvatārthakṛt |
tāni vidhāya tīrthāni āgīvyāṃ prayayau tataḥ || 34 ||
[Analyze grammar]

karmaghnaṃ parvataṃ tīrthaṃ kṛtvā venajayātaṭe |
snānaṃ ca saṃgame tasyā naṣṭajarāsamāgame || 35 ||
[Analyze grammar]

keḍaṃḍāyāṃ tathā nadyāṃ tathā caṇḍasarovare |
phegavipīnasarasi snātvā saritsamāgame || 36 ||
[Analyze grammar]

gambikāyāṃ sphuṭāyāṃ ca senāgolasaritsu ca |
phalgubīje tathā snātvā raṇamullaṅghya vai hariḥ || 37 ||
[Analyze grammar]

raṇe sarovare snātvā ataleṣṭaṃ ca parvatam |
alajālisaraḥpañcasvāplavanaṃ cakāra saḥ || 38 ||
[Analyze grammar]

tanmukhaṃ parvataṃ gatvā trirāśiparvataṃ tataḥ |
līlābījaraṇaṃ gatvā kṛtvā tīrthāni vai jale || 39 ||
[Analyze grammar]

bhūmadhyābdhau tataḥ snātvā nārāyaṇīyasāgare |
samudrasaṃgameṣveva snātvā''dye dhodhasārake || 40 ||
[Analyze grammar]

navabījaraṇaṃ dṛṣṭvā snātvā raktasamudrakam |
kṛtvā sarvāṇi ca tāni pavitrāṇi jalāni tu || 41 ||
[Analyze grammar]

nadīrnadāṃstaḍāgāṃśca saro vāpīḥ pravāhakān |
deśān raṇān parvatāṃśca mahāpagāśca nālikāḥ || 42 ||
[Analyze grammar]

tattatpradeśajān grāmān nagarāṇi gṛhāṇi ca |
rājadhānīrjaladhānīrvanadhānīśca bhūmikāḥ || 43 ||
[Analyze grammar]

pavitrīkṛtya ca tīrthīkṛtya śrīmannarāyaṇaḥ |
koṭigaṇaiḥ pārṣadaiśca devībhiḥ sādhubhiḥ saha || 44 ||
[Analyze grammar]

dharmarājaskandaśaṃbhuvināyakādibhiḥ saha |
sthale ca vihṛtya pretoddhāraṃ vidhāya ca || 45 ||
[Analyze grammar]

abriktaṃ sumahākhaṇḍaṃ tīrthībhūtaṃ vidhāya ca |
daśasāhasrakrośātmabhūmiṃ kṛtvā supāvanīm || 46 ||
[Analyze grammar]

jumāsemlānṛpaṃ prāha bhagavān puruṣottamaḥ |
rājan manorathaste'tra jāto vai saphalaḥ khalu || 47 ||
[Analyze grammar]

adhunā ca vayaṃ yāmo raivate'śvasarovaram |
śrutvā rājā''ha bhagavan muktimicchāmi śāśvatīm || 48 ||
[Analyze grammar]

mokṣadātā miled yāvad yadi mokṣaṃ na vindati |
saṃsārastasya śirasi dhruva eva sthito bhavet || 49 ||
[Analyze grammar]

mayā bhuktaṃ bahu rājyaṃ daśalakṣasamāntaram |
mama pūrvaṃ gatā daityāḥ koṭivarṣopajīvinaḥ || 50 ||
[Analyze grammar]

naitāḥ kaiścit samaṃ yātāḥ pṛthvī sampat prajāstathā |
na yāsyanti mayā sākaṃ tato me bhagavan prabho || 51 ||
[Analyze grammar]

kurūddhāraṃ kṛpāṃ kṛtvā lapsye yacchāśvataṃ padam |
pāvitaṃ tu kuṭumbaṃ me pāvitā pṛthivī mama || 52 ||
[Analyze grammar]

pāvitāśca prajāḥ sarvā pretā uddhāritāstathā |
nadyādīni ca tīrthāni pāvanāni kṛtānyapi || 53 ||
[Analyze grammar]

ahaṃ patnyā samaṃ yāmi tava dhāma sanātanam |
tathā me kuru jīvendra kṛpāṃ prasannatodbhavām || 54 ||
[Analyze grammar]

imāśca kanyakā me vai sahasraṃ ṣoḍaśābdikāḥ |
santi sarvā varārohā varo bhava suhṛdgamaḥ || 55 ||
[Analyze grammar]

anye santi kumārā me teṣāṃ yatheṣṭakaṃ kuru |
kuṭumbināṃ ca bhṛtyānāṃ kṛṣṇa yatheṣṭakaṃ kuru || 56 ||
[Analyze grammar]

anādiśrīkṛṣṇanārāyaṇaḥ śrutvā'tibhāvukam |
rājānaṃ prāha rājendra pāpapuṇye gate tava || 57 ||
[Analyze grammar]

mokṣayogyo'si te mokṣaṃ karomi kṣaṇamātrataḥ |
ityuktaśca tadā dhīmān tatkṣaṇaṃ kanyakā nijāḥ || 58 ||
[Analyze grammar]

haste jalaṃ gṛhītvaiva datvā śrīpatihastake |
sahasrakanyakāḥ kṛṣṇa te dadāmi tava striyaḥ || 59 ||
[Analyze grammar]

bhavantu sarvasaubhāgyayuktā matsantatiḥ sukhā |
ityuktvā pradadau divyaṃ yautakaṃ koṭi cārbudam || 60 ||
[Analyze grammar]

sauvarṇaṃ rūpyakaṃ mauktijālaṃ hīrakaratnakam |
bhūṣāmbarāṇi divyāni yānavāhanakāni ca || 61 ||
[Analyze grammar]

dāsān dāsīrdadau tāvat sahasrasaṃkhyakā api |
hastivājyuṣṭragavayān gomahiṣyādikaṃ dadau || 62 ||
[Analyze grammar]

anādiśrīkṛṣṇanārāyaṇo nītvā vimānake |
kanyāśca yautakaṃ yāne dhṛtvā prāha nṛpaṃ tadā || 63 ||
[Analyze grammar]

rājan śrīnāradādatra gṛhāṇa caraṇāmṛtam |
tava rājñyastriśatāni gṛhṇantu caraṇāmṛtam || 64 ||
[Analyze grammar]

tava putrāśca gṛhṇantu kuṭumbaṃ caraṇāmṛtam |
ityuktāste nāradādvai jagṛhuścaraṇāmṛtam || 65 ||
[Analyze grammar]

śrīhareḥ pādadhautaṃ tajjalaṃ papuśca te mudā |
drāk samādhau gatāḥ sarve brahmaṇi līnanāḍikāḥ || 66 ||
[Analyze grammar]

dvirūpāḥ sarva evaite tadā kṛṣṇecchayā'bhavan |
chāyārūpā devaloke'bhavan marutsurāstu te || 67 ||
[Analyze grammar]

anye divyavimāneṣu bhūtvā divyavapurdharāḥ |
anādiśrīkṛṣṇanārāyaṇadhāma yayustadā || 68 ||
[Analyze grammar]

athaitāḥ kanyakāstasya śavakhātān pracakrire |
bhūsamādhiṃ kārayitvā tathottarakriyādikam || 69 ||
[Analyze grammar]

sarvaṃ ca vidhivat kṛṣṇaḥ kārayitvā yathocitam |
nīlaśvetanarāyaṇyornadyordhodhe tu ṣaṣṭhake || 70 ||
[Analyze grammar]

sarvaṃ samāpya vidhivad dvirājyaṃ vyabhajatprabhuḥ |
adanākhātage tīre jīmūtīnagarāttataḥ || 71 ||
[Analyze grammar]

paścime tūnāyavāridhānīmembāgapattanam |
uṣṇāṃgyākhyanadīmūlaṃ karmāṃgādreśca paścime || 72 ||
[Analyze grammar]

buyāparyantamevāsya khaṇḍasya madhyabhāgataḥ |
sīmāṃ pradarśya collikhya dakṣiṇaṃ cottaraṃ tathā || 73 ||
[Analyze grammar]

dakṣiṇaṃ pradadau rudraśirase bhaktayogine |
anādiśrīkṛṣṇanārāyaṇabhaktāya keśavaḥ || 74 ||
[Analyze grammar]

uttaraṃ ca tathā rājyaṃ dinamerāhvayāya ca |
dadau nārāyaṇaḥ sākṣānnijabhaktāya keśavaḥ || 75 ||
[Analyze grammar]

rudraśirādinamerābhidhau senāpatiprabhau |
yuddhe cāstāṃ nirmanaskau bhaktau nārāyaṇasya tau || 76 ||
[Analyze grammar]

tābhyāṃ rājye pradatte ca hyabhiṣiktau svayaṃ tadā |
hariṇā devasadṛśo kṛtā mukuṭamarpitam || 77 ||
[Analyze grammar]

dakṣiṇe ca mahārājye rājadhānī kṛtā tadā |
rudraśiretivikhyātā vijñaturīyapārśvagā || 78 ||
[Analyze grammar]

pūrvasyāṃ ca daśayojanāyatā tvatiśobhitā |
uttare ca tathā khaṇḍe dinamereṇa nirmitā || 79 ||
[Analyze grammar]

rājadhānī caṇḍasaro'ntike paścimabhūtale |
nāmnā sā dinamereti daśayojanavistṛtā || 80 ||
[Analyze grammar]

tasyāṃ devālayaṃ kṛtvā sahasradhanurucchrayam |
anādiśrīkṛṣṇanārāyaṇasya mūrtiruttamā || 81 ||
[Analyze grammar]

kānakī sthāpitā tena hareṇa sahitā śubhā |
sanatā nāradenāpi dharmadevena śobhitā || 82 ||
[Analyze grammar]

evaṃ rudraśirasā'pi sahasradhanurucchrayam |
kārayitvā''layaṃ ramyaṃ parvataśṛṃgasadṛśam || 83 ||
[Analyze grammar]

anādiśrīkṛṣṇanārāyaṇasya mūrtiruttamā |
sanatā śaṃbhunā dharmadevena nāradena ca || 84 ||
[Analyze grammar]

sevitā sthāpitā tatra kānakī bahuśobhanā |
evaṃ kṛṣṇaḥ svayaṃ datvā bhaktābhyāṃ rājadhānike || 85 ||
[Analyze grammar]

bhaktadattāṃ divyapūjāṃ gṛhītvā puruṣottamaḥ |
sarvaśubhāśiṣo datvā vimānamadhiruhya ca || 86 ||
[Analyze grammar]

kanyāvargeṇa ca dāsīdāsavrātaiḥ prapūjitaḥ |
bhūpābhyāṃ dāsadāsyādīrdatvā kṛtvā ca vaiṣṇavāḥ || 87 ||
[Analyze grammar]

brahmakanyā dvāsaptatisahasrāṇi sahasrakam |
rājyakanyāstathā naijānpārṣadāndevasevakān || 88 ||
[Analyze grammar]

sarvameva samādāya vyomnā jagāma pūrvataḥ |
pūrvasyāṃ raktavārdhiṃ ca samuttīrya haristataḥ || 89 ||
[Analyze grammar]

ārabījaṃ mahādeśaṃ dadarśa vyomamārgataḥ |
tatrāha dharmarājaṃ śrīkṛṣṇanārāyaṇaḥ svayam || 90 ||
[Analyze grammar]

paśya rājan mahādaityaṃ deśeṣvatra prasahya saḥ |
nṛpo bhūtvā mahārājyaṃ karoti dānavānugaḥ || 91 ||
[Analyze grammar]

raktabījaścārabījo balavān lokanāśanaḥ |
sumahāvālukāvyāptaraṇottarapradeśake || 92 ||
[Analyze grammar]

badhīrāyananagaraṃ kṛtvā vasati nirbhayaḥ |
śrīnāyiparvataṃ ramyaṃ bahuśobhitakandaram || 93 ||
[Analyze grammar]

latāvimānasaṃchannaṃ mattasattvasamākulam |
vividhaiḥ kusumaiścāpi sugandhitānilāśrayam || 94 ||
[Analyze grammar]

dṛṣṭvā ramyaṃ raktabījo tathā'nye dānavādayaḥ |
daśasahasrasaṃkhyāste ārabījā vasanti hi || 95 ||
[Analyze grammar]

ūrdhvaretasīsaritaṃ tvabhivyāpya hi vartate |
teṣāṃ rājyaṃ viśālaṃ vai mlecchācārajuṣāṃ yama || 96 ||
[Analyze grammar]

devānāṃ sa virodhyeva daityo'sya dānavādayaḥ |
bakadānaṛṣestatrā''śramaṃ vināśya te'surāḥ || 97 ||
[Analyze grammar]

vartante sa ṛṣistatra tāyigrāsanadīṃ prati |
gatvā jalatale sthitvā tapaḥ karoti dāruṇam || 98 ||
[Analyze grammar]

tamenaṃ prathamaṃ natvā tato'surān vināśaya |
dūtān yāmyāṃstathā raudrān saha nītvā prayāhi ca || 99 ||
[Analyze grammar]

tān sarvān nāśayitvā vā vidrāvya vā rasātalam |
ṛṣyāśramaṃ punarbhītivarjyaṃ vidhāya dharmarāṭ || 100 ||
[Analyze grammar]

tava dūto maunadharmā aravo nāma nāmataḥ |
vartate yoganipuṇastasmai rājyaṃ samarpaya || 101 ||
[Analyze grammar]

ityuktvā śrīkṛṣṇanārāyaṇo hāraṃ dadau gale |
yamarājasya ca sainyaṃ dadau kalpalatāṃ tathā || 102 ||
[Analyze grammar]

yamastvājñāṃ gṛhītvaiva sasainyo vyomamārgataḥ |
yayau taṃ dānavaṃ tūrṇaṃ raṇamullaṅghya yatnataḥ || 103 ||
[Analyze grammar]

anādiśrīkṛṣṇanārāyaṇaḥ śrībhagavān svayam |
āyayau kuṃkumavāpīkṣetraṃ śrīlomaśāśramam || 104 ||
[Analyze grammar]

jayatūrṇaṇyavādyanta jayaghoṣāstadā'bhavan |
aśvapaṭṭasarorāṣṭraṃ brahmānandabharaṃ hyabhūt || 105 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne abriktadeśeṣu śrīharirvihṛtya tīrthāni vidadhe mṛtānāmuddhāraṃ ca vidadhe rājyaṃ dvedhā vibhajya |
bhaktābhyāṃ dadau rājakuṭumbasya mokṣaṃ cakre cetyādinirūpaṇanāmā pañcapañcāśattamo'dhyāyaḥ || 55 ||
[Analyze grammar]